Дастаи «Алтин Асир», қаҳрамони чаҳоркаратаи Туркманистон, барои бозии даври охирини марҳилаи гурӯҳии Ҷоми AFC (Конфедератсияи футболи Осиё)-2018 муқобили тими “Истиқлол”, қаҳрамони шашкаратаи Тоҷикистон, рӯзи 14-уми май ба Душанбе омад.
Ба ҳайати “Алтин Асир” таҳти раҳбарии сармураббӣ Язгулӣ Хоҷагелдиев дар бозӣ муқобили “Истиқлол” 18 футболбоз дохил аст:
Дарвозабонҳо – Маммет Оразмуҳаммедов, Нургелдӣ Остонов.
Ҳимоятгарон – Сардор Аннаоразов, Зафар Бобоҷонов, Оқмурод Ҷумъаназаров, Қурбонгелдӣ Ботиров, Сердал Гелдиев, Мекан Ашуров.
Нимҳимоятгарон – Шуҳрат Суюнов, Умедҷон Остонов, Фурқат Турсунов, Бекмурод Боев, Расул Хоҷаев, Аннасаҳет Аннасаҳедов.
Ҳамлагарон – Мурод Яхшиев, Олтинмурод Аннадурдиев, Салим Нурмуродов, Михаил Титов.
Баъди ба Душанбе расидан аввалин тамрини футболбозони туркман шоми душанбеи 14-уми май дар майдони эҳтиётии Варзишгоҳи марказии пойтахти Тоҷикистон доир шуд. Бегоҳи имрӯз, 15-уми май, меҳмонон дар Варзишгоҳи марказии шаҳри Ҳисор тамрин мекунанд.
Бозии даври шашуми мусобиқаи гурӯҳии Ҷоми AFC-2018 миёни дастаҳои «Истиқлол» (Тоҷикистон) - «Алтин Асир» (Туркманистон) рӯзи чоршанбе, 16-уми май, дар Варзишгоҳи марказии шаҳри Ҳисор соати 18:00 шуруъ мешавад. Ин бозиро довари ФИФА Умар Муборак Ал-Яъқубӣ аз Умон ҳакамӣ мекунад.
Баъди натиҷагирии даври панҷуми мусобиқа дар ҷадвали гурӯҳи “D” дастаи “Истиқлол”-и Тоҷикистон бо 13 имтиёз дар ҷои аввал қарор дорад. “Алтин Асир”-и Туркманистон бо 11 имтиёз дар ҷои дувум мебошад. “Аҳал”-и Туркманистон бо 4 имтиёз дар ҷои севум аст. “Олой”-и Қирғизистон бидуни имтиёз дар зинаи охирин – чаҳорум – ҷойгир шудааст.
Муҳсин Муҳаммадиев, сармураббии дастаи «Истиқлол», дар суҳбат бо Радиои Озодӣ гуфт, “дар назди мо дар Ҷоми АФК вазифаи ҷиддӣ гузошта шудааст. Аввалан - аз гурӯҳ баромадан. Тақдири роҳхати ягона ба даври баъдии мусобиқа рӯзи 16-уми май дар бозии хонагии мо муқобили рақиби аслиамон - «Алтин Асир» - ҳал хоҳад шуд.”
Бояд гуфт, ки барои роҳ ёфтан ба даври баъдии мусобиқа “Истиқлол”-ро дар бозии охирин бо қаҳрамони Туркманистон натиҷаи мусовӣ низ қаноатманд мекунад. Вале ба “Алтин Асир” барои аз гурӯҳ баромадан дар бозӣ муқобили қаҳрамони Тоҷикистон танҳо ғалаба зарур аст.
Марҳилаи гурӯҳии Ҷоми AFC-2018 дар минтақаи Марказӣ 16-уми май ба поён мерасад. Ба даври баъдии мусобиқа танҳо ғолиби гурӯҳ роҳ меёбад. Пас аз анҷоми марҳилаи гурӯҳӣ бозиҳои ниманиҳоӣ ва ниҳоии байниминтақавӣ баргузор мешаванд. Бозии ниҳоии Ҷоми AFC-2018 рӯзи 27-уми октябри имсол барпо мегардад.
Мавқеи дастаҳо дар ҷадвали гурӯҳи “D”
|
Ҷ |
ДАСТАҲО |
Б |
Ғ |
М |
Б |
Т |
И |
|
1 |
«Истиқлол» (Тоҷикистон) |
5 |
4 |
1 |
0 |
8-4 |
13 |
|
2 |
«Алтин Асир» (Туркманистон) |
5 |
3 |
2 |
0 |
14-5 |
11 |
|
3 |
«Аҳал» (Туркманистон) |
5 |
1 |
1 |
3 |
5-3 |
4 |
|
4 |
«Олой» (Қирғизистон) |
5 |
0 |
0 |
5 |
5-20 |
0 |
Бозиҳои боқимонда:
Даври 6-ум
16 май (чоршанбе)
«Истиқлол» (Тоҷикистон) – «Алтин Асир» (Туркманистон)
«Олой» (Қирғизистон) – «Аҳал» (Туркманистон)
