Пайвандҳои дастрасӣ

Хабари нав

Ноне, ки дар Тоҷикистон ба қимати ҷон ҳифз шуд. ВИДЕО


Матлуба Зулфова бо нони таърихӣ

Як хонавода дар шаҳри Леваканди вилояти Хатлон нонеро ҳифз кардааст, ки 33 сол пеш аз Самарқанд оварда шудааст. Умаралӣ Зулфов ва ҳамсараш Матлуба Зулфова, устодони фанни таърих, ки ба гирдоварии ашёи қадимӣ машғуланд, ин нонро “хотирае аз шаҳри ормонҳо” медонанд.

“Онро нахӯрдем. Ба ман писанд омад ва онро дар танаи девор овехтам”, - мегӯяд Матлуба Зулфова. Ҳатто дар овони ҷанги шаҳрвандии Тоҷикистон ин нон ҳифз шудааст, ба қимати ҷон.

“Гуруснагӣ буд. Чанд дафъа қасд кардам, ки нонро дар об тар карда, ҳамроҳи кӯдакон хӯрем, Аммо як чиз... меҳру муҳаббат водор сохт, ки нигоҳ дорем”, - афзуд ӯ. Бо ҳамин алоқамандии барои мо номафҳум, аммо барои ин хонавода возеҳ то ҳол ин нонро нигаҳ медоранд.

Гузориши видеоӣ дар инҷост:

Таърихи нони 33-сола дар Тоҷикистон
лутфан мунтазир бошед
### Эмбед ###

### Феълан кор намекунад ###

0:00 0:04:43 0:00

Умаралӣ Зулфов, омӯзгори таърих дар шаҳри Леваканд аст ва пас аз як тасодуф дар хурдиаш ба гирдоварии ашёи қадимӣ, аз ҷумла тангаву нишон шуруъ кард. Ҳоло 56-сола аст ва барои ҳар бинанда ганҷинаи худро бо ифтихор нишон медиҳад.

Ба ҷуз аз нишонҳои овони Шӯравӣ пулҳои кишварҳои хориҷиро дӯстонаш ба ӯ армуғон меоварданд. “Як танг ҳаст, соли бароришаш 1932 аз Полша. 10 тангаи златии нуқрагӣ дорам. Тангаи 50 лингаи Муғлистон аст. Даҳ сенти амрикоӣ ҳаст”, - нақл мекунад ӯ.

Умаралӣ Зулфов мегӯяд, ҳар даври таърихӣ ҳикмат дорад ва вазифаи инсон аст, ки онро ба наслҳои нав мерос гузорад, ёдгориҳои онро чун далели гӯё ҳифз намояд. Худро фарзанди Шӯравӣ меҳисобад ва мегӯяд, набераҳо замони зиндагии бобояшонро бояд донанд.

Солҳои 80-уми асри гузашта Умаралӣ Зулфовро барои хидмат ба Афғонистон бурданд. Аз онҷо фиттаҳои Аҳмад Зоҳир, хонандаи машҳурро овард. Ин фиттаҳо ҳоло истифода намешаванд, вале онҳоро Умаралӣ чун гавҳараки чашм эҳтиёт мекунад.

Ҳамин тавр, коллексияи кордҳои худро низ.

Умаралӣ Зулфов ва ҳамсараш Матлуба Зулфова
Умаралӣ Зулфов ва ҳамсараш Матлуба Зулфова

Барои Умаралӣ Зулфов ва ҳамсараш Матлуба Зулфова ҳеҷ чиз кӯҳна намешавад, барои онки гувоҳи таъриханд. Бинобар ин, онҳоро, ба таъбире, дар таги ҳафт қабат кӯрпача ва ҳафт сандуқ нигаҳ медорад.

Андешаи Шумо

Намоиши шарҳҳо

Назари хонандагон

New Comments Available

Агар сухане, назаре ё хабаре доред, ба мо занг занед ё SMS (паёмак) фиристед:

Дар Душанбе:

+992 988 65 94 63
+992 988 65 94 64

Дар Прага:

+420 724 053 959

XS
SM
MD
LG