Оғози Бозиҳои варзишии Тоҷикистон - 2018

Имрӯз, 6-уми апрел, дар шаҳри Душанбе, дар Донишкадаи тарбияи ҷисмонии Тоҷикистон ба номи Саидмуъмин Раҳимов, маросими ифтитоҳи Бозиҳои варзишии Ҷумҳурии Тоҷикистон - 2018 баргузор шуд.

Ба барномаи Бозиҳои варзишии Тоҷикистон, ки аз 7-уми апрел то 2-юми май дар шаҳрҳои Душанбе, Бохтар, Кӯлоб, Турсунзода, Истаравшан, ноҳияҳои Ашт, Рашт ва вилояти Суғд идома меёбанд. 11 намуди варзиш дохил аст: баскетбол, бокс, вазнабардорӣ, варзиши сабук, волейбол, гуштии миллӣ, гуштии озод, гуштии юнониву румӣ, самбо, таэквондо (ВТФ) ва ҷудо.

Бозиҳои варзишии Ҷумҳурии Тоҷикистон, ки бо ибтикори Кумитаи кор бо ҷавонон ва варзиши кишвар дар чор сол як маротиба барпо мегарданд, барои дарёфти чеҳраҳои нав ва ба ҳайати дастаҳои мунтахаби ҷумҳурӣ ҷалб намудани онҳо мусоидат менамоянд.

Ин бозиҳо як давраи омодагии варзишгарони тоҷик ба Бозиҳои XVIII осиёӣ, ки аз 18-уми август то 2-юми сентябри имсол дар шаҳрҳои Ҷакарта ва Палембанги Индонезия баргузор мешаванд, ба шумор мераванд.

Барномаи Бозиҳои варзишии Ҷумҳурии Тоҷикистон-2018

Баскетбол. (мардон) 13-17 апрел. Шаҳри Истаравшан

Баскетбол (занон). 21-25 апрел. Шаҳри Душанбе (Маҷмааи варзишии Кумитаи андози Тоҷикистон)

Бокс. 7-8 апрел. Ноҳияи Ашт

Вазнабардорӣ. 5-6 май. Шаҳри Кӯлоб

Варзиши сабук. 28-29 апрел. Шаҳри Душанбе (Варзишгоҳи марказии ҷумҳуриявӣ)

Волейбол (мардон). 21-25 апрел. Шаҳри Бохтар (Қӯрғонтеппаи собиқ)

Волейбол (занон). 28 апрел - 2 май. Вилояти Суғд

Гуштии миллӣ. 7-8 апрел. Ноҳияи Рашт

Гуштии озод. 14-15 апрел. Шаҳри Душанбе (Толори варзишии “Манеж”)

Гуштии юнониву румӣ. 28-29 апрел. Шаҳри Кӯлоб

Самбо. 21-22 апрел. Вилояти Суғд

Таэквондо ВТФ. 5-6 май. Шаҳри Турсунзода

Ҷудо. 5-6 май. Вилояти Суғд