Пайвандҳои дастрасӣ

Хабари нав

Муҳсин Муҳаммадиев: "Бозии хеле мушкил дар пеш аст"


Дастаи “Истиқлол”-и Душанбе, қаҳрамони Тоҷикистон, бозии дувумашро дар марҳилаи гурӯҳии Ҷоми AFC (Конфедератсиони футболи Осиё) - 2018 рӯзи 14-уми март муқобили тими «Алтин Асири»-и Ишқобод, қаҳрамони Туркманистон, баргузор мекунад.

Ин бозии даври дувуми гурӯҳи “D” миёни дастаҳои “Алтин Асир” ва “Истиқлол” дар варзишгоҳи «Спорт топлумӣ»-и шаҳри Балканободи Туркманистон рӯзи чоршанбе соати 16.30 шуруъ мешавад.

Мӯҳсин Муҳаммадиев, сармураббии дастаи «Истиқлол», дар як нишасти хабарӣ, ки имрӯз, 13-уми март, дар Балканобод пеш аз бозӣ муқобили тими мизбон - “Алтин Асир” – доир шуд, гуфт, ки рақибон ҳамдигарро хуб медонанд. Вай афзуд, “моро бозии хеле мушкил дар пеш аст. Мо дар бораи рақибамон хуб иттилоъ дорем, дар навбати худ рақибамон моро нағз медонад. Мо ба «Алтин Асир» эҳтироми зиёд дорем ва фикр мекунам, ки бозӣ шавқовар мегузарад. Мо тамоми қувваамонро баҳри он сарф мекунем, ки ба натиҷаи бароямон қобили қабул даст ёбем. Бигузор зӯртарин пирӯз шавад!”

Ҳайати «Истиқлол» дар бозӣ муқобили «Алтин Асир»:

Дарвозабонҳо – Никола Стошич, Меҳвар Сулаймонов.

Ҳимоятгарон – Сиёвуш Асроров, Артём Барановский, Аҳтам Назаров, Табрези Давлатмир, Ромиш Ҷалилов, Давронҷон Эргашев, Алишер Шарипов.

Нимҳимоятгарон – Фатҳулло Фатҳуллоев, Эҳсони Панҷшанбе, Сергей Тихоновский, Амирбек Ҷӯрабоев, Нозим Бобоҷонов, Муҳаммадҷон Раҳимов.

Ҳамлагарон – Дилшод Восиев, Комрон Турсунов, Николай Зенко.

Ёдовар мешавем, “Истиқлол” дар нахустин бозиаш дар марҳилаи гурӯҳии Ҷоми AFC-2018 рӯзи 7-уми март дар Варзишгоҳи марказии шаҳри Ҳисор бар тими «Аҳал»-и Балканобод, ҷоизадори нуқраи мусобиқоти қаҳрамонии Туркманистон, бо ҳисоби 1:0 ғолиб омад. “Алтин Асир” бошад, дар даври аввал дар меҳмонӣ дастаи “Олой”-и Ӯш, қаҳрамони Қирғизистонро бо ҳисоби бузурги 6:3 шикаст дод.

Баъди натиҷагирии даври аввали мусобиқот дар гурӯҳи “D” дастаҳои “Алтин Асир” ва “Истиқлол” сеимтиёзӣ гирифтаанд. Бо назардошти таносуби беҳтари тӯбҳо “Алтин Асир” дар ҷойи аввал ва “Истиқлол” дар ҷойи дувум қарор доранд.

Дар бозии дигари даври дувум дар гурӯҳи “D” рӯзи 14-уми март “Аҳал” дар майдони худ бо “Олой” бозӣ мекунад.

Марҳилаи гурӯҳии Ҷоми AFC-2018 дар минтақаи Марказӣ, ки 7-уми март оғоз ёфт, 16-уми май ба поён мерасад. Ба даври баъдии мусобиқот танҳо ғолиби гурӯҳ роҳ меёбад. Пас аз анҷоми марҳилаи гурӯҳӣ бозиҳои ниманиҳоӣ ва ниҳоии байниминтақавӣ баргузор мешаванд. Бозии асосӣ ё ниҳоии Ҷоми AFC-2018 рӯзи 27-уми октябр барпо мегардад.

Ҷоми AFC-2018

Гурӯҳи «D». Минтақаи Марказӣ

Даври 1-ум, 7 март (чоршанбе)

«ИСТИҚЛОЛ» (ТОҶИКИСТОН) – “Аҳал” (Туркманистон) – 1:0 «Олой» (Қирғизистон) – “Алтин Асир” (Туркманистон) -3:6

Даври 2-юм, 14 март (чоршанбе)

“Алтин Асир” (Туркманистон) – «ИСТИҚЛОЛ» (ТОҶИКИСТОН) “Аҳал” (Туркманистон) - «Олой» (Қирғизистон)

Даври 3-юм, 11 апрел (чоршанбе)

«ИСТИҚЛОЛ» (ТОҶИКИСТОН) – «Олой» (Қирғизистон)

“Аҳал” (Туркманистон) – “Алтин Асир” (Туркманистон)

Даври 4-ум, 25 апрел (чоршанбе)

«Олой» (Қирғизистон) – «ИСТИҚЛОЛ» (ТОҶИКИСТОН) “Алтин Асир” (Туркманистон) – “Аҳал” (Туркманистон)

Даври 5-ум, 2 май (чоршанбе)

“Аҳал” (Туркманистон) – «ИСТИҚЛОЛ» (ТОҶИКИСТОН) “Алтин Асир” (Туркманистон) – «Олой» (Қирғизистон)

Даври 6-ум, 16 май (чоршанбе)

«ИСТИҚЛОЛ» (ТОҶИКИСТОН) – “Алтин Асир” (Туркманистон) «Олой» (Қирғизистон) – “Аҳал” (Туркманистон)

Назари хонандагон

New Comments Available

Агар сухане, назаре ё хабаре доред, ба мо занг занед ё SMS (паёмак) фиристед:

Дар Душанбе:

+992 988 65 94 63
+992 988 65 94 64

Дар Прага:

+420 724 053 959

XS
SM
MD
LG