Чаҳор даста - дар марҳилаи ниҳоии Ҷоми ФФТ

Марҳилаи пешакии мусобиқот барои Ҷоми ФФТ (Федератсиони футболи Тоҷикистон) дар минтақаи Душанбе ба поён расид. Чаҳор даста - “Барқчӣ”-и Ҳисор, “Регар-ТадАЗ”-и Турсунзода, ССКА “Помир”-и Душанбе ва «Истиқлол»-и Душанбе - ба марҳилаи ниҳоӣ роҳ ёфтанд.

Дар марҳилаи пешакӣ дар минтақаи Душанбе ҳашт даста иштирок дошт. Дастаҳо ба ду гурӯҳ тақсим шуда буданд: гурӯҳи «А» - «Ваҳдат» (Ваҳдат), «Локомотив-Помир» (Душанбе), «Барқчӣ» (Ҳисор) ва «Регар-ТадАЗ» (Турсунзода, гурӯҳи «Б» - «Истиқлол» (Душанбе), «Кӯктош» (Рӯдакӣ), «Маҳаллаи 83» (Душанбе) ва ССКА «Помир» (Душанбе).

Бозиҳо дар гурӯҳҳо аз рӯи системи даврӣ дар як давра барпо гардиданд. Аз рӯи натиҷагирии мусобиқоти марҳилаи пешакӣ ду дастаи беҳтарин аз ҳар гурӯҳ ба қисми ниҳоии Ҷоми ФФТ, ки аз 11-ум то 22-юми феврал дар Душанбе баргузор мешавад, роҳ ёфтанд.

“Барқчӣ”, ки дар ҳарсе бозиаш пирӯз шуд, бо 9 имтиёз дар ҷадвали гурӯҳи “А” мақоми аввалро касб намуд. “Регар-ТадАЗ” бо 6 имтиёз дувум шуд. «Локомотив-Помир» бо 3 тимтиёз дар ҷойи севум қарор гирифт. “Ваҳдат” бидуни имтиёз дар зинаи охирин – чаҳорум – ҷойгир шуд.

ССКА «Помир», ки дар ҳарсе бозиаш ғалаба кард, бо 9 имтиёз дар ҷадвали гурӯҳи “Б” мақоми аввалро соҳиб гашт. “Истиқлол” бо 6 имтиёз ҷойи дувумро гирифт. “Маҳаллаи 83” бо 3 имтиёз севум шуд. “Кӯктош” бидуни имтиёз ҷойи охирин – чаҳорумро ишғол кард.

Ба ин тартиб, ба марҳилаи ниҳоии Ҷоми ФФТ аз минтақаи Душанбе дастаҳои «Барқчӣ», «Регар-ТадАЗ» (гурӯҳи «А»), ССКА «Помир» ва «Истиқлол» (гурӯҳи «Б») роҳ ёфтанд.

Ба иттилои Лигаи футболи Тоҷикистон, мусобиқот барои Ҷоми ФФТ, мисли солҳои пешин, дар ду марҳила – пешакӣ ва ниҳоӣ – сурат мегирад. Марҳилаи пешакӣ дар минтақаҳои Суғду Хатлон идома дорад. Аз ин минтақаҳо дудастаӣ ба марҳилаи ниҳоӣ роҳ меёбанд.

Ҷоми ФФТ. Марҳилаи пешакӣ. Минтақаи Душанбе

Гурӯҳи «А». Даври 3-юм

«Локомотив-Помир» – «Регар-ТадАЗ» – 1:2

Голҳо: Фирӯз Қараев, 29 (0:1). Фирӯз Фузайлов, 47 (1:1). Сафаралӣ Каримов, 71 – аз пеналтӣ (1:2).

27 январ. Ҳисор. Варзишгоҳи марказӣ. 200 тамошобин.

«Барқчӣ» – «Ваҳдат» – 8:1

Голҳо: Нуриддин Ҳамроқулов, 8 (1:0). Нуриддин Ҳамроқулов, 26 (2:0). Шарафҷон Солеҳов, 34 (3:0). Фирдавс Файззода, 40 (3:1). Шарафҷон Солеҳов, 44 – аз пеналтӣ (4:1). Манучеҳр Сафаров, 51 (5:1). Нуриддин Ҳамроқулов, 52 (6:1). Шаҳром Самиев, 62 (7:1). Шаҳром Самиев, 79 (8:1).

27 январ. Ҳисор. Варзишгоҳи марказӣ. 100 тамошобин.

Гурӯҳи «Б». Даври 3-юм

«Кӯктош» – ССКА «Помир» – 1:3

Голҳо: Азизбек Султонов, 22 (1:0). Самад Шарифов, 29 – аз пеналтӣ (1:1). Зоир Ҷӯрабоев, 85 (1:2). Билол Сулаймонов, 90+3 (1:3).

26 январ. Душанбе. Майдони эҳтиётии Варзишгоҳи марказии ҷумҳуриявӣ. 100 тамошобин.

«Маҳаллаи 83» – «Истиқлол» – 0:4

Голҳо: Сиёвуш Асроров, 44 – аз пеналтӣ (0:1). Дилшод Восиев, 61 (0:2). Ромиш Ҷалилов, 64 (0:3). Комрон Турсунов, 88 (0:4).

26 январ. Душанбе. Варзишгоҳи марказии ҷумҳуриявӣ. 100 тамошобин.