Конфедератсиони футболи Осиё (AFC) доварони бозии ҷавобии плей-оффи Ҷоми AFC-2018 миёни дастаи “Хуҷанд”-и шаҳри Хуҷанд, ҷоизадори нуқраи мусобиқоти қаҳрамонии Тоҷикистон ва ғолиби ҷуфти «Дордой»-и Қирғизистон - «Аҳал»-и Туркманистонро таъйин кард.
Ба иттилои дафтари матбуоти Федератсиони футболи Тоҷикистон, довари ФИФА Нивон Робеш Гамини 33-сола аз Шри-Ланка сардовари ин бозӣ таъйин шудааст. Ба ӯ ҳамватанонаш - Локу Кастхотэҷ Иран Удаякантхаи 39-сола ва Веллабада Хеваҷ Дон Санҷива Премалали 40-сола – кӯмак мекунанд.
Вазифаи довари эҳтиётиро Вираккодикараҷ Касун Лакмал Вираккодии 28-сола бар дӯш дорад. Солеҳ Муҳаммад Абдулло Ҳасан Ал-Марзукӣ аз Имороти Муттаҳидаи Араб нозири доварон ва Субраманиан Маникам аз Малайзия комиссари ин бозӣ таъйин шудаанд.
Бозии ҷавобии плей-оффи Ҷоми AFC-2018 миёни дастаи “Хуҷанд”, ҷоизадори нуқраи мусобиқоти қаҳрамонии Тоҷикистон ва ғолиби ҷуфти «Дордой»-и Қирғизистон - «Аҳал»-и Туркманистон рӯзи 20-уми феврал дар Варзишгоҳи “20-солагии Истиқлолияти Тоҷикистон”-и шаҳри Хуҷанд багузор мешавад.
Бозии аввали “Хуҷанд” дар плей-оффи Ҷоми AFC-2018 ё дар Бишкеки Қирғизистон ва ё дар Балканободи Туркманистон барпо мегардад. Дар мавриди ба марҳилаи гурӯҳии Ҷоми AFC-2018 роҳ ёфтан, «Хуҷанд» дар гурӯҳи «D» бо дастаҳои «Истиқлол» (Тоҷикистон), «Алтин Асир» (Туркманистон) ва «Олой» (Қирғизистон) бозӣ мекунад.
