Ҷоизаҳои AFC ба беҳтаринҳои футболи 2017 тақдим шуд

ноябр 30, 2017

Нарзуллоҳи Латиф

Конфедератсияи футболи Осиё (AFC) дар як маросими пуршукӯҳ, ки шоми чоршанбеи 29-уми ноябр дар пойтахти Тайланд – шаҳри Бангкок – доир шуд, беҳтаринҳои мавсими футболи соли 2017-ро бо ҷоизаҳо сарфароз гардонд.

Федератсияи футболи Тоҷикистон ҳамроҳи федератсияҳои футболи Лубнон ва Ветнам барои ҷоизаи “Созмони футболи миллии дар ҳоли рушди сол” (AFC Member Association of the Year – Developing category) довталаб буд, вале ҷоиза насиби Федератсияи футболи Ветнам гардид.

Ба иттилои сомонаи расмии Конфедератсияи футболи Осиё, маросими супурдани ҷоизаҳои AFC («AFC Annual Awards 2017”), ки дар он мавсими имсолаи футбол натиҷагирӣ ва лауреатҳои соли 2017 эълон шуданд, дар театри “Аксра”-и Бангкок доир гардид. Дар ин маросими ботантана ба ғолибони номинатсияҳо ҷоизаҳо супурда шуд.

Чунончи, барои ҷоизаи “Беҳтарин бозигари сол” байни мардон се нафар – Ву Леи (Чин), Умар Ҳарбин (Сурия) ва Умар Абдулраҳмон (Имороти Муттаҳидаи Араб) довталаб буданд. Ин ҷоизаро президенти Конфедератсияи футболи Осиё Салмон Бин Иброҳим Ал-Халифа ба бозигари дастаи мунтахаби Сурия ва бошгоҳи футболи «Ал-Ҳилол»-и Арабистони Саудӣ Умар Ҳарбин тақдим намуд.

Бояд гуфт, ки Федератсияи футболи Тоҷикистон ҳамроҳи федератсияҳои футболи Лубнон ва Ветнам барои ҷоизаи “Созмони футболи миллии дар ҳоли рушди сол” (AFC Member Association of the Year – Developing category) довталаб буд, вале ҷоиза насиби Федератсияи футболи Ветнам гардид. Зимнан, соли 2015 низ Федератсияи футболи Тоҷикистон барои ҷоизаи мазкур довталаб буд, вале он ба Созмони футболи Ҳонконг супурда шуд.

Барандагони ҷоизаҳои AFC дар соли 2017:

Ҷоизаи «Алмоси Осиё»:
Юсуф Ал-Cеркал (Имороти Муттаҳидаи Араб).

Ҷоизаи «Орзуи Осиё»:
Созмони футболи Ҷопон.

Созмонҳои миллии сол:
Рӯҳбаландкунанда – Федератсияи футболи Ҷумҳурии Исломии Эрон;
Дар ҳоли рушд – Федератсияи футболи Ветнам;
Кӯшишкунанда – Федератсияи футболи Афғонистон.

Ҷоизаи эътирофи президенти АFC барои инкишофи футболи оммавӣ:
Рӯҳбаландкунанда – Ассотсиатсияи футболи Чин;
Дар ҳоли рушд – Ассотсиатсияи футболи Сингапур;
Кӯшишкунанда – Федератсияи футболи Бутан.

Мураббии беҳтарин:
Миёни занон – Асако Такакура (Ҷопон);
Миёни мардон – Такафуми Ҳори (Ҷопон).

Бозигари беҳтарини футзал:
Алиасғар Ҳасанзода (Эрон).

Бозигари беҳтарини Осиё:
Миёни занон – Саманта Керр (Австралия);
Миёни мардон – Умар Ҳарбин (Сурия);

Ҷоизаи махсус ба довар:
Бахтиёр Намозов (Узбакистон).

Бозигари беҳтарини ҷавон:
Миёни занон – Сунг Ҳянг-Сим (Кореяи Шимолӣ);
Миёни мардон – Ли Сунг Ву (Кореяи Ҷанубӣ).

Бозигари беҳтарини осиёӣ, ки дар дигар қитъа бозӣ мекунад:
Сон Ҳунг-мин (Кореяи Ҷанубӣ).