Дастаи мунтахаби миллии футболи Тоҷикистон таҳти раҳбарии сармураббӣ Ҳаким Фузайлов омодагиро ба бозии интихобии Ҷоми Осиё-2019 муқобили тими Яман шуруъ кард. Ба ҷамъомади таълимиву тамринӣ 23 бозигар – 3 дарвозабон, 8 ҳимоятгар, 9 нимҳимоятгар ва 3 ҳамлагар - даъват шудаанд.
Ба иттилои дафтари матбуоти Федератсияи футболи Тоҷикистон, бозии даври панҷуми мусобиқоти интихобии қаҳрамонии Осиё-2019 дар гурӯҳи «F» миёни дастаҳои мунтахаби миллии Тоҷикистон ва Яман 14-уми ноябр дар Варзишгоҳи марказии шаҳри Ҳисор соати 16:00 шуруъ мешавад.
Ҳайати дастаи мунтахаби миллии футболи Тоҷикистон муқобили Яман:
Дарвозабонҳо: Абдуазиз Маҳкамов («Олой», Қирғизистон), Қурбоналӣ Бобоев («Истиқлол»), Рустам Ризоев («Хуҷанд»);
Ҳимоятгарон: Давронҷон Эргашев («Тараз», Қазоқистон), Сиёвуш Асроров, Аҳтам Назаров, Амирбек Ҷӯрабоев, Табрези Давлатмир (ҳарчор – «Истиқлол»), Зоир Ҷӯрабоев, Фирдавс Чақалов (ҳарду – ССКА «Помир»), Ваҳдат Ханонов («Барқчӣ»);
Нимҳимоятгарон: Парвизҷон Умарбоев («Локомотив», Пловдив, Булғористон), Нуриддин Давронов, Фатҳулло Фатҳуллоев, Ҷаҳонгир Алиев, Муҳаммадҷони Ҳасан, Эҳсони Панҷшанбе, Ромиш Ҷалилов (ҳама – «Истиқлол»), Ҷаҳонгир Эргашев, Хуршед Бекназаров (ҳарду – «Хуҷанд»);
Ҳамлагарон: Манучеҳр Ҷалилов, Дилшод Восиев (ҳарду – «Истиқлол»), Шериддин Бобоев («Барқчӣ»).
Сармураббӣ – Ҳаким Фузайлов.
Ёдовар мешавем, мунтахаби Тоҷикистон нахустин бозиашро дар рақобатҳои муқаддамотии Ҷоми Осиё-2019 ба мунтахаби Яман дар сафар бо ҳисоби 1:2 бохтааст. Футболбозони тоҷик дар бозии дувумашон дар майдони худ аз мунтахаби Филиппин бо ҳисоби 3:4 шикаст хӯрданд. Мунтахаби Тоҷикистон дар даври севум дар меҳмонӣ бар тими Непал бо ҳисоби 2:1 ғолиб омад ва дар даври чаҳорум дар Варзишгоҳи марказии шаҳри Ҳисор бар тими Непал бо ҳисоби 3:0 пирӯз шуд.
Ба ин тартиб, баъди натиҷагирии даври чаҳоруми мусобиқот дар ҷадвали гурӯҳи “F” мунтахаби Филиппин бо 8 имтиёз аз 4 бозӣ (таносуби тӯбҳо – 11-7) мақоми аввалро касб кардааст. Дастаи Яман бо 6 имтиёз аз 4 бозӣ (таносуби тӯбҳо – 5-4) дар ҷойи дувум қарор дорад. Мунтахаби Тоҷикистон бо 6 имтиёз аз 4 бозӣ (таносуби тӯбҳо – 9-7) дар ҷойи севум мебошад. Мунтахаби Непал бо як имтиёз аз 4 бозӣ (таносуби тӯбҳо – 2-9) дар зинаи охирин – чаҳорум - ҷойгир шудааст.
Бояд тазаккур дод, дар мусобиқоти интихобии қаҳрамонии Осиё-2019 ҳамагӣ 24 даста дар шаш гурӯҳ барои роҳхатҳо ба марҳилаи ниҳоӣ мубориза мебарад. Мусобиқоти гурӯҳии интихобии Ҷоми Осиё-2019 то 27-уми марти соли 2018 идома хоҳад кард.
Аз ҳар гурӯҳ ду дастаи пешсаф ба марҳилаи ниҳоии қаҳрамонии Осиё-2019 роҳ ёфта, ба дувоздаҳ дастаи беҳтарин - Австралия, Ҷопон, Кореяи Ҷанубӣ, Эрон, Узбакистон, Ироқ, Қатар, Сурия, Тайланд, Чин, Арабистони Саудӣ ва Имороти Муттаҳидаи Араб – ҳамроҳ мешаванд.
Ҷоми Осиё-2019
Мусобиқоти интихобӣ.
Бозиҳои ду даври боқимондаи гурӯҳи “F”
Даври 5-ум
14 ноябр (сешанбе)
Тоҷикистон – Яман
Непал – Филиппин
Даври 6-ум
27 марти соли 2018 (сешанбе)
Филиппин – Тоҷикистон
Яман – Непал
