Ҳисор ва Душанбе - мизбонони мусобиқоти интихобии қаҳрамонии Осиё-2018

Мусобиқоти интихобии қаҳрамонии футболи Осиё-2018 миёни дастаҳои мунтахаби ҷавонони зери 19-сола дар гурӯҳи «В» аз 31-уми октябр то 8-уми ноябр дар шаҳрҳои Душанбе ва Ҳисор баргузор мешавад. Ба гурӯҳи «В» дастаҳои мунтахаби ҷавонони Бангладеш, Молдив, Тоҷикистон, Шри-Ланка ва Узбакистон шомиланд.

Мунтахаби ҷавонони Тоҷикистон (U-19) таҳти раҳбарии сармураббӣ Мубин Эргашев аввалин бозиашро рӯзи 31-уми октябр бо тими Бангладеш анҷом медиҳад. Баъдан футболбозони ҷавони тоҷик 4-уми ноябр бо мунтахаби Шри-Ланка, 6-уми ноябр бо тими Молдив ва 8-уми ноябр бо дастаи Узбакистон рақобат мекунанд.

Ба иттилои дафтари матбуоти Федератсиони футболи Тоҷикистон, бозиҳои даври аввали мусобиқот 31-уми октябр дар Варзишгоҳи марказии Ҳисор баргузор мешаванд. Бинобар омодагии ин варзишгоҳ ба бозии ниҳоии Ҷоми AFC-2017, бозиҳои даврҳои дувуму севум рӯзҳои 2-юм ва 4-уми ноябр дар Варзишгоҳи марказии Душанбе барпо мегарданд. Бозиҳои ду даври охирини мусобиқот рӯзҳои 6-ум ва 8-уми ноябр боз дар Варзишгоҳи марказии Ҳисор доир мешаванд.

Бояд гуфт, ки ба марҳилаи ниҳоии мусобиқоти қаҳрамонии Осиё-2018 миёни дастаҳои мунтахаби ҷавонони зери 19-сола, ки соли оянда дар Малайзия барпо мегардад, ғолибони 10 гурӯҳи интихобӣ ва 5 дастае, ки дар гурӯҳҳои худ ҷойҳои дувумро мегиранд, аз рӯи нишондодҳои беҳтарин роҳ меёбанд.

Мусобиқоти қаҳрамонии Осиё-2018 миёни дастаҳои мунтахаби ҷавонони зери 19-сола

Сабқати интихобӣ. Гурӯҳи «В»

Даври 1-ум

31 октябр (сешанбе)

14:00 – Молдив – Шри-Ланка. Ҳисор, Варзишгоҳи марказӣ

17:00 – Бангладеш – Тоҷикистон. Ҳисор, Варзишгоҳи марказӣ

Даври 2-юм

2 ноябр (панҷшанбе)

12:00 – Шри-Ланка – Узбакистон. Душанбе, Варзишгоҳи марказӣ

15:00 – Молдив – Бангладеш. Душанбе, Варзишгоҳи марказӣ

Даври 3-юм

4 ноябр (шанбе)

12:00 – Узбакистон – Молдив. Душанбе, Варзишгоҳи марказӣ

15:00 – Тоҷикистон – Шри-Ланка. Душанбе, Варзишгоҳи марказӣ

Даври 4-ум

6 ноябр (душанбе)

14:00 – Бангладеш – Узбакистон. Ҳисор, Варзишгоҳи марказӣ

17:00 – Тоҷикистон – Молдив. Ҳисор, Варзишгоҳи марказӣ

Даври 5-ум

8 ноябр (чоршанбе)

14:00 – Шри-Ланка – Бангладеш. Ҳисор, Варзишгоҳи марказӣ

17:00 – Узбакистон – Тоҷикистон. Ҳисор, Варзишгоҳи марказӣ