Ширкати паҳлавонони ҷавони тоҷик дар қаҳрамонии ҷудои ҷаҳон 

Варзишгарони тоҷик дар мусобиқаи қаҳрамонии ҷаҳон оид ба ҷудо (дзюдо) миёни навҷавонон, ки аз 18 то 22-юми октябр дар шаҳри Загреби Хорватия баргузор мешавад, ширкат меварзанд.

Чунонки сомонаи расмии Федератсиони байналмилалии ҷудо (IJF) хабар додааст, дар ин мусобиқа беш аз 630 варзишгар (писарону духтарон) аз 87 кишвари панҷ қитъаи олам рақобат хоҳад кард.

Ба ҳайати дастаи мунтахаби Тоҷикистон даҳ гуштигир шомил аст: Суҳроб Боқиев (вазни зери 60 кг), Сомон Маҳмадбеков, Муҳаммадраҳим Сарахонов (ҳарду дар вазни зери 66 кг), Хайёмиддин Ҷабборов, Эраҷ Абдуллоев (ҳарду дар вазни зери 73 кг), Раҳматуллобек Фарҳодов, Ҷаҳонгир Маҷидов (ҳарду дар вазни зери 81 кг), Ҳоҷимашраб Раҳмонов (вазни зери 90 кг), Темур Раҳимов (вазни зери 100 кг) ва Шакармамад Мирмамадов (вазни +100 кг).

Ёдовар мешавем, паҳлавонони тоҷик дар мусобиқаи қаҳрамонии ҷаҳон оид ба ҷудо миёни наврасони то 18-сола, ки моҳи августи соли равон дар пойтахти Чили - шаҳри Сантяго – баргузор шуд, як медал ба даст оварданд. Ҷамолиддин Абдуллоев дар рақобатҳо дар вазни зери 66 кило бо медали биринҷӣ сарфароз гашт.

Ҷаҳонгир Маҷидов дар рақобатҳо дар вазни зери 81 кило мақоми панҷумро соҳиб шуд. Зимнан, Ҷаҳонгир дар феҳристи Федератсиони ҷаҳонии ҷудо (IJF) дар байни наврасон бо 591 имтиёз мақоми аввалро касб кардааст.