Пайвандҳои дастрасӣ

Хабари нав

Бохти мунтахаби футзали Тоҷикистон ба қаҳрамони Осиё


Дастаи мунтахаби футзали Тоҷикистон дар охирин бозии худ дар мусобиқоти муқаддамотии Ҷоми миллатҳои Осиё аз тими миллии футзали Эрон, қаҳрамони феълии Осиё ва ҷоизадори биринҷии қаҳрамонии ҷаҳон, бо натиҷаи 2:12 шикаст хӯрд. Ин бозии гурӯҳи “B” шоми сешанбеи 17-уми октябр дар шаҳри Табризи Эрон доир шуд.

Мунтахаби Эрон, ки дар мусобиқоти муқаддамотии Ҷоми миллатҳои Осиё дар ҳарду бозиаш пирӯзӣ ба даст овард, дар гурӯҳи «В» бо 6 имтиёз мақоми аввалро касб кард. Эрониҳо пеш аз ин тими миллии Афғонистонро бо натиҷаи 8:2 шикаст дода буданд.

Тими миллии Тоҷикистон таҳти раҳбарии сармураббӣ Ҳусейн Шодиев бо 3 имтиёз дар гурӯҳи “В” мақоми дувумро соҳиб шуд. Мунтахаби Тоҷикистон дар бозии аввали худ тими миллии Афғонистонро бо натиҷаи 4:3 мағлуб карда буд. Тими миллииАфғонистон бидуни имтиёз дар мақоми охирин - севум - қарор гирифт.

Ба ин тартиб, аз гурӯҳи “В” дастаҳои мунтахаби Эрон ва Тоҷикистон ба марҳилаи ниҳоии Ҷоми миллатҳои Осиё-2018, ки рӯзҳои 6-18 феврали соли оянда дар Тайбэйи Чин бо ширкати 16 тими миллӣ баргузор мешавад, роҳ ёфтанд.

Рӯзи сешанбеи 17-уми октябр дар бозии охирин миёни дастаҳои мунтахаби Узбакистон ва Қирғизистон ғолиби гурӯҳи “А” маълум шуд. Тими миллии Узбакистон, ки дар ин дидор бо натиҷаи 4:3 пирӯз гардид, бо 9 имтиёз мақоми аввалро касб кард. Мунтахаби Қирғизистон бо 6 имтиёз ҷойи дувумро гирифт.

Ҳамин тариқ, аз гурӯҳи “А” тимҳои миллии Узбакистон ва Қирғизистон ба марҳилаи ниҳоии қаҳрамонии Осиё-2018 роҳ ёфтанд. Вале дастаҳои мунтахаби Туркманистону Непал аз ҳаққи ширкат дар марҳилаи ниҳоии Ҷоми миллатҳои Осиё-2018 маҳрум шуданд.

XS
SM
MD
LG