Кулул Қурбонов, аввалин қаиқрони тоҷик, ки чанд соли ахир бистарӣ буд, имрӯз, 2-юми август, дар Душанбе даргузашт.
Нодир Сафаров, дабири кулли Федератсияи қаиқронии Тоҷикистон, бо таъйиди ин хабар ба Радиои Озодӣ гуфт, ки мураббии саршиноси тоҷик бар асари ҳамлаи қалбӣ дар синни 81- солагӣ аз олам чашм пӯшидааст.
Кулул Қурбонов 10-уми октябри соли 1936 дар ноҳияи Панҷи вилояти Хатлон ба дунё омадааст. Ӯ аввалин қаиқрони тоҷик буд, ки солҳои 50-уми қарни гузашта дар ҳайати дастаи мунтахаби Тоҷикистон ба комёбиҳо мушарраф шудааст.
Вай соли 1957 дар мусобиқаи пурнуфузи “Дӯстии халқҳо” дар Қирғизистон дар қаиқронӣ дар каноэи дукаса (ҳамроҳи Саидмурод Ҳакимов) бомуваффақият ҳунарнамоӣ карда, дар байни варзишгарони Осиёи Миёна аввалин шуда меъёри устоди варзиши СССР-ро иҷро намудааст. Ӯ ҷоизадори бисёркаратаи Спартакиадаи халқҳои Иттиҳоди Шӯравӣ буд.
Кулул Қурбонов, ки дар тарбияи шогирдон саҳми арзанда гузоштааст, бо унвони фахрии “Мураббии шоистаи ҶШС Тоҷикистон” мушарраф шуда буд. Ҷасади Кулул Қурбонов бегоҳи 2-юми август дар шаҳри Душанбе ба хок супурда мешавад.
