Аз эҳтимоли роҳандозии ду ҳамлаи террористӣ дар вилояти Суғд ҷилавгирӣ шудааст.

Шариф Назарзода, сардори Раёсати умури дохилии вилояти Суғд, рӯзи 27-уми июл дар ноҳияи Шаҳристон гуфт, ки дар як маврид шаҳрвандони кишварҳои хориҷӣ қасд доштанд, иншооти муҳимро дар Тоҷикистон битарконанд.

Генерал Назарзода гуфт, ки яке аз ин ҳамлаҳо дар ноҳияи Ҷаббор Расулов ва дигаре дар Истаравшан “тарҳрезӣ шуда буд”. Ӯ афзуд, “дар ноҳияи Ҷаббор Расулов шаҳрвандони давлатҳои дигари хориҷӣ мехостанд, амалиёти террристӣ роҳандозӣ кунанд. Дар ин бора бо иттиҳоми қасди роҳандозии амалиёти террористӣ парванда боз намудем.”

Сардори Раёсати умури дохилии Суғд гуфт, дар ин робита як сокини ноҳияи Ҷаббор Расулов бо номи Шерзод Нормамадов дастгир карда шуд ва ҳамчунин бо дархости онҳо мақомоти яке аз кишварҳои ҳамсоя 4 шаҳрванди худро дастгир намудааст.

Ба гуфтаи Шариф Назарзода, дар мавриди дуюм дар Истаравшан гурӯҳе қасд дошт нисбат ба кормандони ҳифзи ҳуқуқ амалҳои террористӣ анҷом диҳад, ки ба қавли ӯ ошкор ва як нафари онҳо дастгир ва силоҳҳояш мусодира гардид.

Доналд Трамп, раисҷумҳури Иёлоти Муттаҳида, гуфт, ба зудӣ тангӣ ё оброҳаи муҳими Ҳурмузро, ки тайи моҳҳои охир сабаби ҷанҷоли Вашингтону Теҳрон гаштааст, қаламрави Амрико эълон хоҳад кард.

Ӯ рӯзи 14-уми август дар як суханронияш гуфт, "пас аз он ки кори шикаст додани Эронро ба анҷом расонем; кишваре, ки ба таври бисёр бад дар ҳоли шикаст хӯрдан аст, ба зудӣ тангаи Ҳурмузро ҳамчун қаламрави Иёлоти Муттаҳида эълон хоҳам кард."

Козим Ғарибободӣ, муовини вазири корҳои хориҷии Эрон, дар вокуниш гуфтааст, “тангаи Ҳурмуз қаламрави Эрон аст ва хоҳад буд.”

Вай дар саҳифааш дар шабакаи “Х” навишт, “бастани тангаи Ҳурмуз ё иҷозат додан ба рафтуомади озоди киштиҳо дар он, дар ихтиёри Эрон аст ва то замоне ки шароит фароҳам нашавад, муҳосира идома хоҳад дошт.”

Дар рӯзҳои охир раисҷумҳур Доналд Трамп ва мақомҳои дигари амрикоӣ талош кардаанд, ки фишорҳои иқтисодиро бар Эрон бештар кунанд.

То оғози ҳамлаи Амрикову Исроил ба Эрон дар моҳи феврали имсол, беш аз 20 дарсади нафт ва гази ҷаҳон аз тангии Ҳурсуз мегузашт. Пас аз он, Эрон ин роҳро амалан бастааст ва фақат интихобан ба баъзе аз киштиҳои борбар иҷозаи гузар медиҳад.

Амрико ва кишварҳои дигар мегӯянд, ки тангии Ҳурмуз як оброҳаи байнулмилал буда, таҳти назорати ҳеч кишваре нест.

Вашингтон ва Теҳрон рӯзи 17-уми июн бо ҳадафи хатми муноқиша ва бозгушоии Ҳурмуз ёддошти тафоҳуми 60-рӯза имзо карда буданд. Аммо ихтилофҳо бар сари маънои шартҳои созишнома боис ба ҳамлаҳои нави ҳар ду тараф ба ҳамдигар шуданд.

Дар Кумитаи ҳолатҳои фавқулода ва ниҳодҳои вобастаи он дар минтақаҳои Тоҷикистон тағйироти кадрӣ анҷом шудааст.

Бино ба қарори ҳукумат аз 15-уми август, генерал Муҳаббат Иброҳимзода (Саидвалӣ) ва Раҳмоналӣ Саиданварзода муовинони нави раиси Кумита таъйин гаштанд.

Муҳаббат Иброҳимзода то ин дам сардори яке аз раёсатҳои Кумитаи ҳолатҳои фавқулода буд. Аз он пеш дар мақоми мудири Маркази миллии Тоҷикистон дар масъалаи минаҳо кор кардааст.

Дар бораи Раҳмоналӣ Саиданварзода маълумоти зиёде дар даст нест.

Инчунин, сардорони Идораи ҳолатҳои фавқулода дар Вилояти Мухтори Кӯҳистони Бадахшон, Суғд ва Хатлон иваз карда шудаанд.

Дар иваз Сулаймон Исозода аз мансаби муовини раиси Кумитаи ҳолатҳои фавқулода озод гардидааст. Мақомот далели ин тасмимро “гузаштан ба кори дигар” гуфта, вале шарҳе надодаанд.

Дафтари матбуоти президенти Тоҷикистон рӯзи 15-уми август афроди тозатаъйинро “кадрҳои соҳибтахассусу варзида” номидааст. Намояндагони мухолифини ҳукумат дар хориҷа мегӯянд, ин таъйинот на аз нигоҳи шоистасолорӣ, балки бештар бар асоси хидмату садоқат ба режим сурат мегирад.

Тоҷикистон имсол шоҳиди офатҳои табиии зиёд, аз ҷумла омадани селу тармафароӣ ва шамоли сахт шуд. Ба гузориши расмӣ, дар нимаи аввали имсол дар ин офатҳо 12 нафар ба ҳалокат расидаанд. Ҳодисаҳои нохуши табиӣ дар шаш моҳи аввали имсол ба иқтисоди Тоҷикистон беш аз 52 миллион сомонӣ ё 5,7 миллион доллар зарар расондааст.

Додгоҳи парвандаҳои ҷиноӣ дар Вена, маркази Австрия, як дархости дигари Тоҷикистонро рад кардааст.

Мақомоти Тоҷикистон аз ин кишвари аврупоӣ хостаанд, ки Ҳанифамои Дӯстмуҳаммад (Шарифова), ҳамсари Шавкати Муҳаммад, намояндаи мухолифини ҳукуматро ба Душанбе таслим кунад.

Шавкати Муҳаммад (Шавкатҷон Шарифов) дар суҳбат бо Радиои Озодӣ гуфт, мурофиа рӯзи 14-уми август баргузор ва ба нафъи онҳо анҷом шуд.

Мақомоти амниятии Тоҷикистон Ҳанифамоҳи Дӯстмуҳаммади 48-соларо ба "иштирок дар фаъолияти ҳизбу созмонҳои мамнӯи сиёсӣ, иҷтимоӣ ва динӣ ва мусоидат ба кори онҳо тавассути расонаҳо ё интернет" муттаҳам кардаанд.

Ин банди қонуни ҷиноии Тоҷикистон (қисми 2-и моддаи 307, замимаи 3) аз панҷ то ҳашт сол зиндонро пешбинӣ мекунад.

Аз ин қабл, Додгоҳи парвандаҳои ҷиноии Вена дархости Душанберо дар бораи таслими Шавкати Муҳаммад, модараш Шарофат Шарифова ва бародараш Билолиддин рад карда буд.

Вазорати корҳои дохилии Тоҷикистон ҳар сеи онҳоро ба тундгароӣ муттаҳам кардаанд, аммо худи онҳо дорои ангезаи сиёсӣ медонанд.

Шавкати Муҳаммад 48-сола ва сухангӯи Паймони миллӣ, як созмони мухолифи ҳукумати Тоҷикистон, аст. Дар гузашта раиси дафтари Ҳизби ҳоло мамнӯи наҳзати исломӣ дар ноҳияи Ашти вилояти Суғд буд.

Беш аз даҳ сол боз дар хориҷа қарор дорад ва дар навиштаву барномаҳои видеоияш дар шабакаҳои иҷтимоӣ сиёсатҳои ҳукумати Тоҷикистонро башиддат танқид мекунад.

Вазорати корҳои дохилии Тоҷикистон моҳи апрели соли 2026 аз Австрия хостааст, дар умум 18 нафар аз паноҳҷӯён ва намояндагони мухолифини ҳукуматро ба Душанбе супорад.

Дар шаҳри Душанбе даҳ нафарро бо гумони ба дигарон гузарондани ВИЧ ё бемории норасоии масунияти бадан дастгир кардаанд.

Раёсати умури дохилии пойтахт рӯзи 14-уми август гуфт, боздошти ин афрод, ки дар миёнашон занон низ ҳастанд, дар ҳашт моҳи имсол сурат гирифт.

Манбаъ аз касе ном набурда, вале гуфтааст, "гумонбарон беш аз 60 нафарро ба ин вирус гирифтор кардаанд."

Аз ҷумла, ба иттилои Раёсати корҳои дохилии Душанбе, "як зани 25-сола бо зиёда аз 20 ҷавон муносибатҳои маҳрамона барқарор намуда, онҳоро ба вируси норасоии масунияти бадан сироят кардааст."

Ин иттилои расмист ва таҳқиқи мустақилонаи он феълан имконпазир нест.

Мақомот мегӯянд, ба зидди гумонзадҳо бар асоси моддаи 125-и Кодекси ҷиноии Тоҷикистон парванда боз карда, барои муҳокима ба додгоҳ фиристодаанд. Ба онҳо вобаста аз бахшҳои ин банди қонуни ҷиноӣ то даҳ сол зиндон таҳдид мекунад.

Дар солҳои охир ва пас аз сахттар шудани ҷазо барои дидаву дониста олуда кардани дигарон ба ВИЧ чандин сокини Тоҷикистон бо ҳамин иттиҳом боздошт шудаанд.

Додгоҳи ноҳияи Шаҳритуси вилояти Хатлон соли 2019 як мардро бо гуноҳи мубтало кардани ҳамсараш ва чанд зани дигар ба вируси норасоии масунияти бадан ба панҷ сол зиндон маҳкум кард.

Соли 2025 дар вилояти Суғд ба зидди беш аз сӣ кас барои сироят кардани дигарон ба вируси норасоии масунияти бадан парванда боз намуданд.

Дар Тоҷикистон беш аз сездаҳ ҳазор шахси олуда ба вируси норасоии масунияти бадан сабт шудааст, ки бештари онҳо мардон будаанд.

Интиқоли нерӯи барқ баъди қариб се соат дар шаҳри Душанбе ва минтақаҳои дигари Тоҷикистон барқарор шудааст. Сокинон мегӯянд, барқ пас аз соати 17:30 рӯшан шуд.

Нерӯи барқ тақрибан соати 15:14 дар саросари пойтахти Тоҷикистон ва вилоятҳои Суғду Хатлон қатъ гардид.

Бо вуҷуди бартараф шудани мушкилӣ, сабабҳои қатъи саросарии барқ феълан номаълум аст.

Вазорати энергетика ва захираҳои оби Тоҷикистон дар хабарномае навишт, мутахассисон сабабро месанҷанд. "Натиҷаҳои таҳқиқот дар асоси хулосаҳои дахлдор пешниҳод хоҳанд гардид", - омадааст дар хабарномаи расмӣ.

Вазорат гуё рух додани садамаро дар нерӯгоҳи барқи обии "Норак" рад кардааст.

Дар гузашта баъди рух додани садама дар нерӯгоҳи “Норак” чанд соат саросари Тоҷикистон, ба истиснои Вилояти Мухтори Куҳистони Бадахшон, бе барқ монда буданд.

Дар ҳамин рӯз сокинони шаҳри Алматои Қазоқистон ва чанд вилояти Қирғизистон ҳам аз қатъи барқ шикоят карданд.

Мақомоти Қазоқистон мушкилро ба низоми ягонаи энергетикии Осиёи Марказӣ пайванд доданд.

Навор дар Инстаграм:

Рамазоналӣ Басиров, шаҳрванди Тоҷикистонро, ки дар ҳамлаи паҳподӣ ба Нижнекамск дар Тотористони Русия кушта шуд, дар зодгоҳаш, ноҳияи Бобоҷон Ғафурови вилояти Суғд, дафн кардаанд.

Як манбаъ дар ҳукумати ин ноҳия ба Радиои Озодӣ гуфт, маросими видоъ бо ин ҷавон 13-уми август дар ҷамоати Овчӣ-Қалъача баргузор шуд.

Рамазоналӣ Басиров шаби 9 ба 10-уми август дар ҳамлаи паҳподии Украина ба шаҳри Нижнекамск ҷон бохт. Дар ин ҳодиса се зодаи дигари Тоҷикистон захмӣ шуданд. Ҳашт муҳоҷир аз Узбекистон низ қурбонии ин ҳодиса буданд.

Рамазоналӣ Басиров 30 сол дошт ва ба гуфтаи наздиконаш дар як ширкати сохтмонӣ ба ҳайси ронандаи мошини борбардор кор мекард. Аз ин ҷавон се фарзанд ятим монд.

Намояндагони ҷомеаи тоҷикони Нижнекамск пештар ба Радиои Озодӣ гуфта буданд, ки харҷи фиристодани ҷасади Басировро корфармо ва ҳукумати Тотористон пардохт мекунанд. Ҳанӯз маълум нест, ки ба хонаводаи ин ҷавон ҷуброни молӣ додаанд ё не.

Фонд ё Бунёди авруосиёии муътадилгардонӣ ва рушд барои дастгирии буҷа ба Тоҷикистон 200 миллион доллар қарз медиҳад.

Созишномаи мазкурро 13-уми август Файзиддин Қаҳҳорзода, вазири молияи Тоҷикистон бо намояндаи навтаъини ин созмони молӣ Ярослав Мандрон дар Душанбе имзо карданд.

Дар гузориши Вазорати молия омадааст, 200 миллион доллар дар се марҳила ба кишвар дода мешавад. Дар навбати аввал Тоҷикистон 100 миллион ва дар ду давраи баъдӣ 50-миллионии дигар дарёфт мекунад.

Аммо шарту шароити ин қарз маълум нест. Намояндагони Вазорати молия танҳо гуфтанд, маблағ “барои таъмини устувории молияи давлатӣ ва иҷрои уҳдадориҳои иҷтимоӣ” сарф мешавад.

Инро ҳам бихонед:

"Қарзи боимтиёз." Дигар ба Тоҷикистон грант намедиҳанд?

Фонди авруосиёии муътадилгардонӣ ва рушд соли 2009 аз ҷониби Арманистон, Беларус, Қазоқистон, Қирғизистон, Русия ва Тоҷикистон таъсис ёфтааст. Тибқи омори ахир, Тоҷикистон аз ин созмони молӣ 104,93 миллион доллар қарздор аст.

Қарзи хориҷии Тоҷикистон то 1-уми июли имсол 2,9 миллиард доллар ҳисоб шудааст. Рақаме, ки ба тақрибан чордаҳ дар сади Маҷмӯи Маҳсулоти Дохилӣ баробар аст. Масъалаи қарзи хориҷӣ ва тарзи истифодаву баргардондани он дар Тоҷикистон ҳамеша як мавзӯи нигаронкунанда будааст.

Мақомоти Тоҷикистон тасдиқ карданд, ки Ҷасминаи Ширинҷон (Ятимзода), сокини 21-солаи ноҳияи Дарвоз дар Вилояти Мухтори Кӯҳистони Бадахшон "аз тири силоҳбадастон аз Афғонистон" кушта шудааст, аммо аз ягон гурӯҳ ном нагирифтанд.

Дақиқ нест, ҳодисаи рӯзи 13-уми август ногаҳонӣ будааст, ё барқасдона. Аммо ин воқеа дар замоне рӯй додааст, ки дар ноҳияи Нусайи Афғонистон, дар рӯ ба рӯи ноҳияи Дарвози Тоҷикистон, даргирии нерӯҳои ҳукумати "Толибон" ва афроди як фармондеҳи норозии ин гурӯҳ, Ҷумъахони Фотеҳ, ҷараён дорад.

Вазорати корҳои хориҷии Тоҷикистон рӯзи 14-уми август ба ҷониби Афғонистон нота ё ёддошти эътирозӣ фиристодааст.

Раисҷумҳур Эмомалӣ Раҳмон ба пайвандони Ҷасминаи Ширинҷон (Ятимзода) изҳори ҳамдардӣ карда, аз мақомоти ноҳияи Дарвоз хостааст, ба онҳо кумак кунанд ва тарбияи кӯдаки хурдсолашро зери назорат гиранд.

Дар бораи кушта шудани Ҷасминаи Ширинҷон, сокини 21-солаи деҳаи Даштак дар ноҳияи Дарвози Тоҷикистон, нахуст Радиои Озодӣ хабар дод. Чанд манбаи огоҳ дар ноҳияи Дарвоз ба Радиои Озодӣ гуфтанд, "ӯ аз шикамаш тир хӯрда, дар роҳ ба сӯйи бемористони марказии ноҳия ҷон дод."

Шарҳи "Толибон", гурӯҳи ҳоким дар Афғонистон, ҳанӯз дар ин бора дастрас нест. Мақомоти Тоҷикистон мегӯянд, ки тафтиши қазияро оғоз кардаанд, то сабабҳояшро маълум кунанд.

Дар ҳамин ҳол, Вазорати корҳои хориҷии Тоҷикистон дар як хабарномааш аз 14-уми август, ки нусхаи он дар ихтиёри Радиои Озодӣ қарор гирифт, аз ҷониби Афғонистон талаб кардааст, "масъаларо ҷиддӣ дарк карда, дахлнопазирии сарҳади давлатии Тоҷикистонро риоя намояд ва барои пешгирӣ аз такрори чунин ҳодисаҳо чораҳои муассир андешад."

Ҳарчанд вазорат ошкоро нагуфтааст, эҳтимол ишорааш ба парвози чанд чархбол аз Афғонистон дар наздикии ноҳияи Дарвози Тоҷикистон ва суқути яке аз онҳо дар қарибии хати марз аст. Ин лаҳзаҳоро сокинон дар ноҳияи Дарвоз ба навор гирифтаанд ва чанд порчаи он дастраси Радиои Озодӣ низ шуд.

Лаҳзаи суқути чархбол:

Дар як соли охир бар асари он чи мақомоти Тоҷикистон тирандозӣ аз самти Афғонистон гуфтаанд, чанд нафар куштаву захмӣ шудаанд.

Аз ҷумла, шаби 26-уми ноябри соли 2025 дар як ҳамла ба қароргоҳи корхонаи заршӯйӣ дар ноҳияи Шамсиддини Шоҳини вилояти Хатлон 3 шаҳрванди Чин кушта шуданд. Рӯзи 30-юми ноябри ҳамон сол дар ҳамла аз самти Афғонистон ду роҳсози чинӣ дар ҳудуди ноҳияи Дарвози Вилояти Мухтори Кӯҳистони Бадахшон ҷон бохтанд. Захмиҳо низ буданд.

Навор дар Инстаграм:

Ҳамзамон бо панҷумин солгарди бозгашти Толибон ба қудрат, бахши занони СММ мегӯяд, аз 10 зан 7 нафари онҳо дар Афғонистон бо мушкилоти равонӣ рӯбарӯ ҳастанд ва маҳдудиятҳои ҷоришуда бар занон ва духтарон, омили асосии ин вазъият мебошад.

Бахши занони СММ рӯзи 12 август дар гузорише ба ҳамин муносибат гуфтааст, ки маҳдудияти дастрасии занон ва духтарон ба таҳсил, кор ва хадамоти тандурустӣ, ҳамчунин хушунатҳои хонаводагӣ, инзивои иҷтимоӣ ва дастрасӣ надоштан ба имконот, аз омилҳои таъсиргузор бар мушкилоти равонии онҳо аст.

Дар ин гузориш омадааст, ки наздик ба 11 миллион зан ва духтар дар Афғонистон ба кӯмакҳои башардӯстона ниёз доранд.

СММ дар ин гузориш гуфтааст, ки аз соли 2021 ба ин сӯ Толибон беш аз 100 фармон алайҳи занон ва духтарон содир кардаанд, ки табъизро ниҳодина ва ҳуқуқи асосии онҳоро нақз кардааст.

Аз замони бозгашти Толибон ба қудрат дар соли 2021, маҳдудиятҳои густурда бар омӯзиш ва кори занон ва духтарон вазъ шудааст.

СММ ва шуморе аз ниҳодҳои байналмилалӣ борҳо дар бораи паёмадҳои ин маҳдудиятҳои ҳуқуқӣ, иҷтимоӣ ва иқтисодии занон ҳушдор додаанд.

Иёлоти Муттаҳида аз соли 1991 то кунун ба Тоҷикистон ба маблағи зиёда аз 400 миллион доллар кумаки амниятӣ кардааст.

Карсон Релитс Рокер, кордори сафорати Амрико дар Душанбе, дар як нигоштааш гуфтааст, ин ёриҳо асосан барои ҳифзи сарҳад, мубориза бо терроризм, омӯзиши нерӯҳои амниятӣ ва рушди зербунёдҳо дар марз сарф шуданд.

Мақолаи ӯ бахшида ба 250-солагии истиқлоли Амрико ва 35-солагии муносибати Вашингтону Душанбе рӯзи 13-уми август нашр шуд.

Ба иттилои ӯ, Вашингтон дар ин муддат беш аз даҳ дидбонгоҳи сарҳадиро дар марзи Тоҷикистон бо Афғонистон сохта ё таъмир кардааст. Аз ҷумла, бунёди қисми сарҳадии “Айвоҷ” дар ноҳияи Шаҳритус, ки 14,5 миллион доллар харҷ дошт.

“Ин кумакҳо ба нерӯҳои амниятии Тоҷикистон имкони назорат ба қаламрави васеъ ва кӯҳистонӣ ва имкони вокуниши фаврӣ ба ҳамлаҳо дар сарҳадро медиҳад,” – афзудааст ӯ.

Карсон Релитс Рокер дар мақолааш гуфтааст, Иёлоти Муттаҳида танҳо дар панҷ соли охир барои беҳтар кардани тавоноиҳои Тоҷикистон дар мубориза бо терроризм қариб 40 миллион доллар додааст.

Вай ҳамзамон аз нақши Душанбе барои пуштибонӣ аз амалиёти байнулмилалии зиддитеррористӣ, баъд аз ҳамлаҳои 11-уми сентябри соли 2001, ситоиш намудааст.

Ба гуфтаи ӯ, агарчи Тоҷикистон “дар рӯ ба рӯи таҳдиди террористони ҷаҳонӣ ба соҳибихтиёрӣ ва субот” қарор дошт, ба ҳавопаймоҳои Амрико иҷоза додааст, ки дар хокаш поин биоянд ва сӯзишворӣ бигиранд.

Кордори сафорати Амрико бори дигар пуштибонии кишварашро аз Душанбе баён дошта, “Тоҷикистони амну соҳибихтиёр”-ро ба нафъи тамоми минтақа донистааст. “Мо якҷоя муборизаро бар зидди терроризм, ки кишварҳои моро таҳдид мекунад, идома хоҳем дод,” – хулоса кардааст ӯ.

Додугирифти Тоҷикистон ва Амрико зиёд нест, аммо Иёлоти Муттаҳида ҳар сол ба воситаи барномаҳои гуногун ба Душанбе миллионҳо доллар мадад мекунад. Соли 2025 ширкатҳои Тоҷикистону Амрико бо ҳам ба маблағи беш аз 3 миллиард доллар созишнома имзо карданд.

Ҳомид Карзай, раисҷумҳури пешини Афғонистон, дар мусоҳиба бо рӯзномаи итолиёии "Корйере делла Сера" гуфтааст, дар Афғонистон монд, то барои беҳбуди вазъи кишвараш талош кунад.

Ӯ гуфтааст, акнун замони оштӣ аст ва кӯшиш мекунад масъалаҳои Афғонистонро аз зовияи "ҷумҳурият" ё "иморат" набинад.

Карзай афзудааст, хосташ фароҳам шудани заминаи зиндагии хуб барои ҳамаи афғонистониҳо ва кор ба нафъу рифоҳи кишвар аст.

Вай дар бораи маҳдудиятҳо бар занону духтарон гуфтааст, "омӯзиш як мавзӯи сиёсӣ нест. Чӣ интихобот бошад ва чӣ набошад, мактабҳо бояд боз бошанд".

Ҳомид Карзай ҳамчунин гуфтааст, ҳамаи мардуми Афғонистон мухолифи омӯзиши занону духтарон нестанд ва ба нақши таърихии Робиаи Балхӣ, Гавҳаршод Бегим ва Ойиша Дурронӣ дар арсаи омӯзиш ва адабиёт ишора кардааст.

Рӯзномаи итолиёии “Корйере делла Сера” гузориш додааст, ки Карзай дар Кобул зери ҳокимияти “Толибон” амалан дар ҳабси хонагӣ ба сар мебарад.

Ин мусоҳиба онлайн аз Милан ва пас аз шаш моҳи интизор анҷом шудааст.

Ҳомид Карзайи 68-сола муддати 13 сол Афғонистонро раҳбарӣ кард. Вай соли 2001 ва пас аз фурӯпошии ҳокимияти аввали "Толибон" раҳбари ҳукумати муваққатӣ таъйин шуда буд.

Хадамоти амнияти Украина мегӯяд, нерӯҳои ин кишвар се киштии низомӣ ва баъзе иншооти бандарии Русияро дар пойгоҳи баҳрии "Новороссийск" бо мушак ва паҳпод задаанд.

Бар асоси баёнияи ин ниҳод, ки рӯзи 12-уми август дар "Телеграм" нашр шуд, ду киштӣ бо номҳои "Адмирал Эссен" ва "Адмирал Макаров" ҳомили мушакҳои "Калибр" будаанд ва киштии севум сӯхтрасон будааст.

Дар баёния таъкид шудааст, ки ҳамла ба ин пойгоҳи баҳрии Русия аз назари стратегӣ аҳамияти зиёде дорад.

"Хадамоти амнияти Украина дар ҳоли кам кардани тавони Русия барои назорати Баҳри Сиёҳ ва истифода аз нерӯҳои баҳрияш барои идомаи ҷанг бо Украина аст," -- гуфта шудааст дар баёния.

Владимир Зеленский, раисҷумҳури Украина, бо таъйини ин хабар, эълон кард, ки нерӯҳои кишвараш дар амалиёти густурда ва камсобиқа ба пойгоҳҳои баҳрии Русия дар Новороссийскй ҳамла карданд.

Вазорати дифои Русия ҳанӯз ба иддаои Украина вокунише нишон надодааст.

Як афсари Нерӯҳои марзбонии Тоҷикистон ҳангоми оббозӣ дар канори дарёи Панҷ дар ноҳияи Шамсиддини Шоҳин ғарқ шуда, ҷон додааст.

Мақомот дар ин бора ҳеч иттилоъ намедиҳанд.

Як манбаи Радиои Озодӣ дар ниҳодҳои интизомии вилояти Хатлон 12-уми август бо шарти фош нашудани номаш гуфт, “капитан Ҷаҳонгир Давлатов 26 сол дошт”.

Ба қавли мусоҳиби мо, ҳодиса рӯзи 6-уми август дар дараи Зарбузи ноҳияи Шамсиддини Шоҳин рух дода, ҷасади афсарро баъди ташхис ба наздиконаш дар ноҳияи Исмоили Сомонии пойтахт додаанд.

“Ҷаҳонгир Давлатов ва ҳамкоронаш ба кӯли як корхонаи тило барои оббозӣ рафтаанд. Кӯл чуқур будааст. Ӯ ғарқ шудааст. Ҳамкорон пайкарашро аз об берун оварда, ба мақомот хабар доданд,” -- афзуд манбаъ.

Дараи Зарбуз дар лаби дарёи Панҷ ва дар сарҳад бо Афғонистон ҷойгир аст. Ҳоло дар ин минтақа ду ширкат ба заршӯйӣ машғуланд.

“Ин ширкатҳо барои шустани сангу шағал кӯлҳои калон сохта, об ҷамъ кардаанд,” – гуфт мусоҳиби мо дар ниҳодҳои интизомии Хатлон.

Инро ҳам хонед:

Ҳалокати як коргар дар ҳавзи заршӯӣ дар Дараи Зарбуз

Дар ду моҳи охир ин бори чорум аст, ки афсару сарбозони Нерӯҳои марзбонӣ дар вилояти Хатлон ғарқ шуда, ҷонашонро аз даст медиҳанд.

Мирзобобур Мирраимови 20-сола моҳи июни имсол дар Қубодиён ба дарёи Ому афтод. Дар Идораи ҳолатҳои фақулодаи вилояти Хатлон рӯзи 3-юми август ба хабарнигорон гуфтанд, ки то кунун ҷасади ӯро наёфтаанд.

Дар охири моҳи июл афсари 23-сола Ёраҳмад Қурбоналиев ва марзбони қаторӣ Билол Каримови 19-сола дар наздикии дидбонгоҳе дар ноҳияи Фархори вилояти Хатлон ба рӯдхонаи сероби Панҷ даромада, ҷасадашон баъди чанд рӯз пайдо шуд.

Кумитаи дин ва танзими ҷашну маросим дар Тоҷикистон тартиби нави дуохониро муайян кардааст.

Дар Тоҷикистон, ки беш аз навад дарсади аҳолияш мусалмон аст, гоҳе барои табобат, дурӣ аз чашми бад ё ҷинбарорӣ дуо мехонанд.

То кунун ҳар рӯҳонӣ метавонист, ки ба беморон дуо хонад.

Аз ин ба баъд чунин маросимро танҳо рӯҳониёни расмӣ метавонанд анҷом диҳанд. Яъне, аъзои Шӯрои уламо, сархатибҳо, имомхатибҳо, имомҳои масҷидҳои панҷвақта, муовинони онҳо ва муаззинҳо.

Маросими дуохонии занон ва кӯдакон бе ҳузури шахсони маҳрами онҳо, яъне мардони хонавода, ба мисли падару бародар ва шавҳар манъ шудааст.

Тартиби нави гузаронидани дуохонӣ моҳи июни имсол аз ҷониби раиси Кумитаи дин ба имзо расида, онро хабаргузории "Азия-Плюс" 11-уми август нашр кард.

Афшини Муқим, сухангӯйи Кумитаи дин, рӯзи 12-уми август ҳадаф аз қабули тартиби навро "пешгирӣ аз муроҷиати сокинон ба муллоҳои ғайрирасмӣ" донист.

"Вақтҳои охир сокинон ба ном муллову фолбинҳое муроҷиат мекарданд, ки бо амалҳои худ шаъну эътибори рӯҳониёнро паст мезаданд. Ҳамчунин, танзими маросими дуохонӣ аз сӯи рӯҳониён ва ходимони динӣ дар сатҳи қонунгузорӣ буд," – афзуд ӯ.

Дар ҳоле ки мақомот ин қоидаҳоро барои ҳифзи шаҳрвандон аз ифротгароӣ ва қаллобӣ муҳим медонанд, нозирони ҳуқуқи башар онҳоро маҳдудияти шадиди навбатӣ ба озодии дин мешуморанд.

Хоҷа Муҳаммад Осиф, вазири дифои Покистон мегӯяд, Эрон ва Амрико ба "шакле аз созиш", наздик шудаанд.

Ин мақомдори баландпояи покистонӣ рӯзи 13 август дар гуфтугӯ бо "Bloomberg" афзуд, "нишонаҳои мушоҳидашуда тайи 2-3 рӯзи ахир далели наздик шудан ба як созиш аст".

Ҳамзамон Муҳсин Нақавӣ, вазири корҳои хориҷии Покистон, "дар чорчӯби ҳамкориҳои дуҷониба", ба Теҳрон сафар кард.

Ӯ бо шуморе аз мақомоти эронӣ, аз ҷумла, Искандар Муъминӣ, вазири корҳои дохилии Эрон дидор кардааст.