Пайвандҳои дастрасӣ

Нокомии чаҳор варзишгари тоҷик дар қаҳрамонии бокси Осиё


Дар мусобиқаи қаҳрамонии бокси Осиё миёни мардон, ки бо ширкати 179 варзишгар аз 28 кишвар дар шаҳри Тошканд ҷараён дорад, дар даврҳои муқаддамотӣ чаҳор варзишгари тоҷик ноком шуда, аз идомаи мубориза маҳрум гаштанд.

Асрор Воҳидов, муштзани тоҷик, ки дар нахустин рӯзи мусобиқа дар рақобатҳо дар вазни то 56 кило бар Пуран Рай аз Непал бо ҳисоби 5:0 пирӯз шуда буд, рӯзи 1 май дар даври дувум аз Руомей Танака аз Ҷопон бо ҳисоби 0:4 шикаст хӯрд.

Якуми май боз ду варзишгари тоҷик – Фурқатҷони Одилхон дар вазни то 64 кило ва Бахтиёри Мирзомуҳаммад дар вазни то 75 кило –дар аввалин рақобати худ ба нокомӣ дучор шуданд. Фурқатҷон аз муштзани Ҳиндустон Сароҳалуа Лумбантовинг бо ҳисоби 1:4 ва Бахтиёр аз намояндаи Туркманистон Азиз Очилов бо ҳисоби 0:5 мағлуб гаштанд.

Ёдовар мешавем, 30 апрел дар даври аввал муштзани тоҷик Баҳодур Усмонов дар вазни то 60 кило аз Умар Ҳасани ироқӣ бо ҳисоби 2:3 шикаст хӯрда буд. Ба ин тартиб, дар мусобиқаи қаҳрамонии бокси Осиё дар пойтахти Узбакистон чаҳор варзишгари дигар тоҷик рӯзҳои 2-3 май вориди рақобат мешаванд.

Имрӯз, 2 май, се варзишгари тоҷик – Бахтиёр Сагизов дар вазни то 52 кило бо Сеневиратне Бандара (Шри-Ланка), Шаббос Неъматуллоев дар вазни то 81 кило бо Шао Ҳю Ҳи (Тайван) ва Сиёвуш Зуҳуров дар вазни аз 91 кило боло бо Ҳайпинг Му (Чин) қувваозмоӣ хоҳанд кард.

Ҷаҳон Қурбонов, муштзани маъруфи тоҷик, дар вазни то 91 кило дар аввалин рақобати худ рӯзи 3 май бо Маҳмуд Санауллоҳ аз Покистон қувваозмоӣ мекунад.

Мусобиқаи қаҳрамонии бокси Осиё дар Тошканд то рӯзи 7 май идома хоҳад кард. Варзишгарон ба ҷуз медалҳо барои роҳхатҳо ба қаҳрамонии бокси ҷаҳон, ки аз 25 август то 4 сентябр дар Ҳамбурги Олмон баргузор мешавад, мубориза мебаранд.

Назари хонандагон

New Comments Available

Агар сухане, назаре ё хабаре доред, бемалол ба мо занг занед ё SMS (паёмак) фиристед:

Дар Душанбе:

+992 988 65 94 63
+992 988 65 94 64

Дар Прага:

+420 724 053 959

XS
SM
MD
LG