Ветнам, Ҷопон, Тайван ва Индонезия - рақибони Тоҷикистон дар футзали Осиё

Дастаи мунтахаби ҷавонони Тоҷикистон (U-20) бар асоси қуръакашӣ, ки 30 март дар пойтахти Тайланд – Бангкок - баргузор шуд, дар марҳилаи ниҳоии мусобиқоти қаҳрамонии футзали Осиё байни тимҳои мунтахаби ҷавонони то 20-сола дар гурӯҳи «В» бо тимҳои Ветнам, Ҷопон, Тайван ва Индонезия рақобат мекунад.

Аз рӯи натиҷаи қуръакашӣ 21 даста ба чаҳор гурӯҳ тақсим шудааст, ки якеаш аз шаш даста ва се гурӯҳи дигар аз панҷдастаӣ иборатанд. Мувофиқи дастури мусобиқот, аз ҳар гурӯҳ ду дастаи беҳтарин ба даври баъдӣ роҳ ёфта, ҷуфтҳои чаҳорякниҳоиро ташкил медиҳанд. Сипас мусобиқот аз рӯи системи олимпӣ сурат мегирад, яъне дастаи мағлубшуда аз ҳаққи идомаи мубориза маҳрум мегардад.

Аввалин мусобиқоти қаҳрамонии футзали Осиё-2017 миёни дастаҳои мунтахаби ҷавонони то 20-сола аз 16 то 26 май дар Бангкок баргузор мешавад.

Натиҷаи қуръакашии марҳилаи ниҳоии қаҳрамонии Осиё-2017 оид ба футзал миёни дастаҳои мунтахаби ҷавонон (U-20):

Гурӯҳи «А»: Тайланд, Ироқ, Малайзия, Бруней, Баҳрайн, Афғонистон.

Гурӯҳи «В»: Ветнам, Ҷопон, Тайван, Тоҷикистон, Индонезия.

Гурӯҳи «С»: Узбакистон, Қатар, Лубнон, Мянмар, Ҳонконг.

Гурӯҳи «D»: Эрон, Қирғизистон, Чин, Муғулистон, ИМА.