Пайвандҳои дастрасӣ

Хабари нав

Талоши ҳашт даста барои Ҷоми Тоҷикистон


Шоми 8-уми сентябр бозиҳои ҷавобии ҳаштякниҳоии Ҷоми Тоҷикистон-2014 оид ба футбол баргузор шуданд.

Бозиҳои ҷавобии ҳаштякниҳоии Ҷоми футболи Тоҷикистон-2014, ки шоми душанбеи 8-уми сентябр барпо гардиданд, дастаҳои ширкаткунандаи даври чорякниҳоиро муайян карданд. Аз рӯи натоиҷи бозиҳо дастаҳои «Истиқлол»-и Душанбе, ССКА «Помир»-и Душанбе, «Хайр»-и Ваҳдат, «Регар-ТадАЗ»-и Турсунзода, «Эсхата»-и Хуҷанд, «Ҳосилот»-и Фархор ва «Саройкамар»-и Панҷ ба даври чорякниҳоӣ роҳ ёфтанд.

Ёдовар мешавем, дастаи «Вахш»-и Қӯрғонтеппа, ки бар асоси қуръакашӣ аз бозиҳои даври ҳаштякниҳоӣ озод буд, пеш аз ҳама ба чорякфинал баромадааст.

Барандаи феълии Ҷоми Тоҷикистон - «Истиқлол»-и Душанбе - дар бозии ҷавобӣ низ дар меҳмонӣ «Хуҷанд»-и Хуҷандро бо ҳисоби 2-0 шикаст дод. Ҳарду голро бозигари нави даста Мануэл Бледа Родригеси испаниягӣ, ки дар дақиқаи 78-ум ба майдон омад, дар дақиқаҳои 79-ум ва 90+1 ба самар расонд.

Ҳамин тариқ, «Истиқлол» аз рӯи натоиҷи ду бозӣ бо ҳисоби 8:1 ғолиб шуд ва дар даври ниманиҳоӣ бо дастаи лигаи аввал - «Ҳосилот»-и Фархор – бозӣ мекунад. Фархориҳо дар бозии ҷавобӣ бар тими мизбон – «Исфара»-и Исфара, ки дар мусобиқаи лигаи аввал дар минтақаи Суғд пешсаф аст, бо ҳисоби 4:0 пирӯз шуданд. Бозии аввал дар Фархор бо ҳисоби мусовии 2:2 хотима ёфта буд.

Инчунин дар бозиҳои ҷавобии 1/8-ниҳоӣ «Эсхата»-и Хуҷанд, дастаи лигаи аввал, бар тими меҳмон - «Парвоз»-и Бобоҷон Ғафуров - бо ҳисоби 2:1 ғолиб омад. Дар бозии аввал низ «Эсхата» бо ҳисоби 3:2 ғалаба карда буд. Акнун хуҷандиҳо дар чорякфинал бо дастаи «Саройкамар»-и Панҷ рақобат мекунанд. «Саройкамар» аз рӯи натоиҷи ду бозӣ бо «Ваҳдат»-и Ашт (5:0 ва 1:2) ғолиб дониста шуд.

Вале тими «Энергетик»-и Душанбе, ки ба бозии ҷавобӣ бо «РегарТадАЗ»-и Турсунзода ҳозир нагашт, бо ҳисоби техникии 0:3 мағлуб дониста шуд. Дар 1/4 финал «металлургҳо» бо ССКА «Помир»-и Душанбе рӯбарӯ мешаванд. Низомиён бозии ҷавобиро дар меҳмонӣ бо тими «Равшан»-и Кӯлоб бо ҳисоби 1:1 анҷом доданд. Бозии аввал дар Душанбе бидуни гол хотима ёфта буд. Як голи дар меҳмонӣ задааш ба ССКА пирӯзӣ овард.

Боз як бозии чорякниҳоӣ байни дастаҳои «Хайр»-и Ваҳдат ва «Вахш»-и Қӯрғонтеппа баргузор мешавад. «Хайр» дар бозии ҷавобии ҳаштякниҳоӣ дар меҳмонӣ аз дастаи «Далерон-Ӯротеппа»-и Истаравшан бо ҳисоби 0:1 мағлуб шуд. Бозии аввал дар шаҳри Ваҳдат бо пирӯзии «Хайр» бо ҳисоби 2:0 поён ёфта буд.


Ҷоми Тоҷикистон. 1/8 финал. Бозиҳои ҷавобӣ

«ХУҶАНД» - «ИСТИҚЛОЛ» - 0:2
Бозии аввал – 1:6.

«ЭСХАТА» - «ПАРВОЗ» - 2:1
Бозии аввал – 3:2.

«ДАЛЕРОН-ӮРОТЕППА» - «ХАЙР» - 1:0
Бозии аввал – 0:2.

«РЕГАР-ТАДАЗ» - «ЭНЕРГЕТИК» - 3:0 (натиҷаи техникӣ)
Бозии аввал – 0:0.

«РАВШАН» - ССКА «ПОМИР» - 1:1
Бозии аввал – 0:0.

«ВАҲДАТ» - «САРОЙКАМАР» - 2:1
Бозии аввал – 0:5.

«ИСФАРА» - «ҲОСИЛОТ» - 0:4
Бозии аввал – 2:2.

1/4 финал. Бозиҳои аввал
5-уми октябр (якшанбе)
Оғози бозиҳо – соати 16:30
«ИСТИҚЛОЛ» - «ҲОСИЛОТ»
«ЭСХАТА» - «САРОЙКАМАР»
«ХАЙР» - «ВАХШ»
«РЕГАР-ТАДАЗ» - ССКА «ПОМИР»

Шарҳҳоро бинед (21)

Корбарони азиз! Ҳангоми навиштани шарҳ аз истифодаи таҳқиру тӯҳмат нисбат ба якдигар, намояндагони қавму миллатҳо ва динҳои гуногун худдорӣ кунед. Шарҳҳое, ки дорои туҳмату таҳқир, дашном ва иттилооти дурӯғанд ё гурӯҳеро таблиғ мекунанд, нашр карда намешаванд!
Ин баҳс баста шудааст.

Шарҳҳо

Шарҳи нав расид
Идома
XS
SM
MD
LG