Пайвандҳои дастрасӣ

Хабари нав

Ҷоми AFC-2013: Бохти «Равшан» ба “Ал Рамза” бо ҳисоби 0-5


Дастаи “Равшан”-и Кӯлоб, қаҳрамони Тоҷикистон, дар бозии даври панҷуми мусобиқаи гурӯҳии Ҷоми AFC- Конфедератсияи футболи Осиё-2013 дар сафар аз тими “Ал Рамза”-и Урдун бо ҳисоби бузурги 0:5 шикаст хӯрд.

Ин бозии гурӯҳи “D”рӯзи сешанбе, 23-юми апрел дар варзишгоҳи байналмилалии Шоҳ Абдуллоҳи пойтахти Урдун – шаҳри Уммон баргузор шуд.

Голҳоро Аманҷо (дақиқаи 5-ум), Мусъаб Аллаҳҳам (30), Муҳаммад Ал Довуд (44), Муҳаммад Кассас (53) ва Болигубия (83) заданд.

Ёдовар мешавем, ки дастаи “Равшан” дар нахустин бозиаш рӯзи 6-уми март дар шаҳри Хуҷанд аз тими “Ал Рамза” бо ҳисоби 0:1 мағлуб шуда буд.

Дар бозии дигари даври панҷум дар гурӯҳи “D” рӯзи сешанбе дастаи “Ал Шорта”-и Сурия дар майдони худ аз тими “Ал Қудсия”-и Кувайт бо ҳисоби 0:2 мағлуб гашт.

Баъди натиҷагирии бозиҳои панҷ даври мусобиқаи интихобӣ дар гурӯҳи “D” тими “Ал Қудсия” бо 12 имтиёз дар ҷойи аввал аст. Тимҳои “Ал Рамза” ва “Ал Шорта” бо 9-имтиёзӣ мутаносибан дар ҷойҳои дувуму севум қарор доранд. Дастаи “Равшан” бидуни имтиёз (таносуби тӯбҳояш 1-14) дар зинаи охирин - 4-ум ҷойгир шудааст.

Дастаи «Равшан» дар даври шашум ва охирини мусобиқаи гурӯҳии Ҷоми AFC рӯзи 30-юми апрел дар шаҳри Хуҷанд бо тими “Ал Шорта”-и Сурия рақобат мекунад.

Дастаи «Регар-ТадАЗ»-и Турсунзода, барандаи Ҷоми Тоҷикистон, бозии даври панҷуми мусобиқаи гурӯҳии Ҷоми AFC-ро рӯзи чоршанбе, 24-уми апрел дар шаҳри Хуҷанд бо тими “Сафо”-и Лубнон анҷом медиҳад.

Ин бозии гурӯҳи “А” дар варзишгоҳи “20-солагии Истиқлолияти Тоҷикистон”-и маркази вилояти Суғд соати 15 оғоз меёбад. Ёдовар мешавем, ки нахустин бозии дастаи “Регар-ТадАЗ” рӯзи 5-уми март дар сафар бо тими “Сафо” бо ҳисоби 1:1 анҷом ёфта буд.

Дар бозии дигари даври панҷум дар гурӯҳи “А” рӯзи чоршанбе дастаи “Кувайт”-и Кувайт дар майдони худ бо тими “Ал Риффа”-и Баҳрайн рақобат мекунад.

Ҳоло дар гурӯҳи “А” дастаи “Кувайт” бо 12 имтиёз дар ҷойи аввал аст. Тими “Ал-Риффа” бо 6 имтиёз дар ҷойи дувум ва дастаи “Сафо” бо 4 имтиёз дар ҷойи севум мебошанд. Дастаи “Регар-ТадАЗ” бо як имтиёз (таносуби тӯбҳояш – 2-12) дар ҷойи охирин – 4-ум қарор дорад.

Шарҳҳоро бинед (13)

Корбарони азиз! Ҳангоми навиштани шарҳ аз истифодаи таҳқиру тӯҳмат нисбат ба якдигар, намояндагони қавму миллатҳо ва динҳои гуногун худдорӣ кунед. Шарҳҳое, ки дорои туҳмату таҳқир, дашном ва иттилооти дурӯғанд ё гурӯҳеро таблиғ мекунанд, нашр карда намешаванд!
Ин баҳс баста шудааст.

Шарҳҳо

Шарҳи нав расид
Идома
XS
SM
MD
LG