Бино ба омори расмӣ, теъдоди ҷинояту ҷинояткорӣ, аз ҷумла ғоратгариву роҳзанӣ дар Тоҷикистон дар панҷ моҳи имсол ва дар муқоиса ба ҳамин давраи соли 2024 зиёд шудааст.

Рақамҳои изтиробангез, ки Оҷонси давлати омор нашр кардааст, нишон медиҳанд, ки аз моҳи январ то майи имсол дар Тоҷикистон бештар аз 10 ҳазору 700 ҷиноят сабт шудааст, ки дар муқоиса ба 5 моҳи соли гузашта 1080 ҷиноят бештар аст.

Дар ин давра 44 ғоратгарӣ сурат гирифтааст, 17 мавриди таҷовузи ҷинсӣ ва ё қасди таҷовузро ҳам сабт кардаанд. Дар 5 моҳи соли 2024 аз ин навъи ҷинояти вазнин фақат 9 маврид сабт шудааст. Дуздиву қаллобӣ дар Тоҷикистон дар ин давра нисбат ба ҳар ҷинояти дигар зиёдтар - тақрибан 3800 маврид сабт шудааст.

Ҷиноятҳои иқтисодӣ ҳам зиёд шудааст, вале дар ин миён яке аз навъҳои он, яъне порахӯрӣ ва ё ришвахорӣ бетағйир мондааст. Агар дар панҷ моҳи соли 2024 дар кишвар 40 нафарро ба порахӯрӣ муттаҳам карда бошанд, пас дар ҳамин муддати имсол 40 парванда бо айни иттиҳом боз шудааст.

Сабабҳои афзоиши ҷинояткориро нагуфтаанд, чун вазифаи Оҷонси давлатии омори Тоҷикистон фақат ҷамъоварии рақаму омор ва нишон додани тамоюлҳои иқтисодиву иҷтимоӣ дар кишвар аст.

Президент Доналд Трамп гуфт, ки ширкати нӯшобаҳои Coca-Cola розӣ шуд, ки дар таҳияи ин намуд нӯшокиҳо, ки дар ИМА фурӯхта мешаванд, аз найшакар – шакари табиӣ истифода кунад. Ҳоло дар Амрико барои омода кардани нӯшокии маъруф шарбати ҷуворимакка ба кор меравад. Вале чанде пеш вазири беҳдошти ИМА Роберт Кеннедии хурдӣ аз таъсири манфии ин маҳсулот ба саломатии инсон изҳори нигаронӣ карда буд.

Трамп, ки нӯшидани Coca-Cola-ро дӯст медорад, дар саҳифааш дар шабакаи Truth Social навишт: “Ман бо Coca-Cola дар бораи истифодаи найшакар ба ҳангоми истеҳсоли Coke дар Амрико сӯҳбат кардам ва онҳо розӣ шуданд. Мехоҳам ба ҳамаи онҳое дар Coca-Cola, ки дар қабули чунин қарор иштирок кардаанд, миннатдорӣ баён кунам”.

Намояндаи ширкати нӯшокиҳои маъруф бидуни тасдиқи мустақими ин ки дар дастури таҳияи Coca-Cola тағйироте ворид мешавад, гуфт, “ташаббуси президент Трампро қадрдонӣ мекунад” ва “дар наздиктарин фурсат ҷузъиёти нави маҳсулоти пешрафтаи Coca-Cola-ро нашр хоҳад кард”.

Дар ҳоле, ки барои истеҳсоли Coca-Cola дар Амрико аз шарбати ҷуворимакка истифода мекунанд, дар кишварҳои дигари мисли Мексика, Бритониё ва Австралия асосан найшакар ба кор меравад.

Мақомот мегӯянд, Ҳизби халқии демократии Тоҷикистон дар 7 ҳазору 336 сохтори давлат ва корхонаву идораҳо ташкилоти ибтидоии худро дорад. Санҷидани дурустии ин изҳорот бо далели ношаффофии маълумот дар бораи омори воқеии аъзову тарафдорони ҳизби ҳоким дар Тоҷикистон имкон надорад.

Ин омор рӯзи 17 июл дар маҷлиси васеи Кумитаи иҷроияи марказии Ҳизби ҳокими халқии демократӣ садо дод, ки дар Тоҷикистон ба як ташкилоти тақрибан яккатози сиёсӣ табдил шудааст. Ҷаласа таҳти раҳбарии раиси ин ҳизб Эмомалӣ Раҳмон баргузор шуд.

Дар маҷлиси ҳизб бар пояи Оинномаи он низомномаҳои ҳизбӣ дар таҳрири нав тасдиқ гардидаанд. Ҷузъиёти тағйирот нашр намешавад, фақат таъкид шудаст, ки вазифаи ҳизб фаъолтар ба роҳ мондани таблиғот дар мавзӯи “тарбияи ватандӯстӣ” хоҳад буд.

Раҳмон аз “мухолифату низоъҳо, яроқнокшавии бошитоб, “ҷанги сард”, тағйирёбии босуръати иқлим” чун чолишҳои замони нав ёдовар шудааст.

ҲХДТ дар интихоботи моҳи марти парлумонии Тоҷикистон, онгуна, ки пешбинӣ мешуд, баранда эълон шуд ва ҳизбҳои дигар – аграрӣ, ислоҳоти иқтисодӣ ва демократӣ шумори ками курсиҳоро ба даст оварданд.

Соли 2025 интихоботи Тоҷикистонро яке аз ношаффофтарин маъракаҳои сиёсӣ номиданд, чун дар овоздиҳии рӯзи 2-юми март хабарнигорони мустақил ваё расонаҳои хориҷӣ барои бозтоби корзори сиёсӣ роҳ дода нашуданд. Дар интихоботҳои пешина ҳузури ками раъйдиҳандагон, овоздиҳии як нафар ба ҷойи чанд кас ва партофтани бастаи варақаҳои пуршуда ба сандуқҳои раъйдиҳӣ сабт шуда буд.

Намояндагони чанд ҳизбу созмони мухолифи ҳукумати Тоҷикистон дар хориҷа интихоботро "намоишӣ" донистанд. Ҷунбиши ислоҳот ва рушди Тоҷикистон, қароргоҳаш дар Амстердам, ба бойкот даъват кард. Раҳбари “Гурӯҳи 24”, ки фаъолияташ дар Тоҷикистон мамнуъст, интихоботро маҳкум намуд. Дафтари Ниҳодҳои Демократӣ ва Ҳуқуқи Инсон (ODIHR)-и САҲА, ки имсол натавонист аз интихобот назорат кунад, ҳеч корзори сиёсиро дар Тоҷикистон мутобиқ ба меърёҳои байнулмилалӣ ва демокративу шаффоф надонистааст.

Вакилони Думаи давлатии Русия тарҳи санадеро қабул карданд, ки асос ва ё баҳонаҳо барои маҳрум сохтани хориҷиён аз ҳаққи шаҳрвандии кишварро зиёд мекунад.

Бар асоси қонуни нав, агар як шаҳрванди Тоҷикистон ё Узбекистон шаҳрвандии Русияро гирифта бошад ва ҷинояти сахте содир кунад, шиносномаи ӯро бечунучаро аз дасташ мегиранд ва аз ҳаққи шаҳрвандии Русия маҳрум мекунад.

Дар гузашта фаъолони сиёсӣ аз ҷумла аз Тоҷикистон ба мисли Каромат Шарипов ва Иззат Амонро бо иттиҳомоти қонуншиканӣ аз шаҳрвандии Русия маҳрум сохта ба Тоҷикистон ихроҷ карданд. Асосҳои нав барои маҳрумсозӣ ҷиноятҳои сахт, ба мисли қатл, таҷовузи гурӯҳӣ, таҷовуз бо бераҳмии хос буда метавонанд.

Шумори шаҳрвандони Русия аз ҳисоби шаҳрвандони Тоҷикистон даҳҳо ҳазор нафарро такшил медиҳад ва танҳо соли 2022 беш аз 170 ҳазор тоҷикистонӣ соҳиби шиносномаи русӣ шудаанд.

Ҳамчунин агар касе, ки бо кӯдаки то 12-сола иртиботи тифл иртиботи ҷинсӣ дошт, ё кӯдакону наврасонро ба танфурӯшиву иртиботи ҷинсӣ маҷбур месозад, ё маводи порнографӣ бо ҳузури кӯдаконро омодаву нашр мекунад, аз ҳаққи шаҳрвандии Русия маҳрум сохта мешавад.

Яке асоси дигаре, ки метавонад, ҳар шаҳрванди Тоҷикистон, ё кишвари дигареро аз ҳаққи шаҳрвандии Русия маҳрум созад, гунаҳкор донистан ба ифротгароӣ ва дуруст шуморидани терроризм аст. Солҳои ахир теъдоди зиёде аз шаҳрвандони Тоҷикистонро дар Русия бахусус бо иттиҳоми ифротгароӣ ба зиндон маҳкум кардаанд.

Президенти Қазоқистон бо ворид кардани ислоҳот ба қонуне розӣ шуд, ки ҳамакнун барои таъқиби касе ва ҳам маҷбур кардан ба издивоҷ ҷазои ҷиноӣ ҷорӣ шавад.

Дар ин бора сомонаи президенти Қазоқистон хабар додааст. Бар асоси ин тағйирот, барои таъқиби пайвастаи шахси дигар аз 1485 доллар ҷарима то 50 шабонарӯз ҳабс пешбинӣ мешавад. Ҷазо инчунин издивоҷи берун аз хоҳишро таҳти таҳдид, хушунат, тамаъҷӯӣ, фош кардани маълумоти беобрӯкунанда ваё расонидани зарарро пешбинӣ кардааст.

Барои издивоҷи маҷбурӣ ҷазо аз 14,8 ҳазор доллар ҷарима то ду соли зиндонро пешбинӣ мекунад. Агар арӯсӣ бо истифода аз зӯр ва хушунат сурат гирифтааст ваё ҷабрдида ноболиғ аст, дар сурати сӯиистифода аз мансаб ваё бо иштироки гурӯҳи нафарон рух додааст, аз се то ҳафт соли маҳрумият аз озодӣ пешбинӣ мешавад.

Агар паёмадҳои сангине дошт, то даҳ соли зиндон муқаррар шудааст.

Инчунин, бар асоси дигар тағйирот ба қонунҳо, дар Қазоқистон нисбат ба занҳо, ноболиғон ва маъюбон ҷазои ҳабси якумрӣ татбиқ намешавад.

Додгоҳе дар Туркия раиси шаҳри Истамбул Акрам Имомоғлуро аз рӯи иттиҳоми таҳқир ва таҳдиди додситони шаҳр ба 1 солу 8 моҳ ҳабс маҳкум кард. Салоҳиятҳои Имомоғлу баъди ҳабси ӯ боздошта шуд ва ба иттилои матбуоти Туркия, айни замон, фаъолияти сиёсии Имомоғлуро маҳдуд накардаанд. Ҳабси Имомоғлу боиси эътирозҳои серҷамъияти тарафдоронаш шудааст.

Баҳонаи боз кардани парванда сӯҳбатҳои раиси шаҳр дар бори додситони калони шаҳри Истамбул Акин Гюрлек дар моҳи январи соли 2025 будааст. Имомоғлу, ки мухолифи асосии президенти Раҷаб Тайиб Эрдуғон мебошад, ҳама иттиҳомҳоро рад мекунад. Ӯ дар додгоҳ гуфтааст, ки зидди сӯиистифода аз низоми додгоҳӣ ва ба ҳайси василаи сиёсӣ истифода шудани он мубориза бурдааст. “Ин чиз воқеан ҳам таҳқири миллати мо аст”, гуфт Имомоғлу.

Ӯро 19 марти имсол, чанд рӯз пеш аз интихоботи ҳизби ҷумҳурихоҳи мардумии Туркия боздошт карданд, ки бояд номзад ба президентӣ дар интихоботи соли 2028-ро интихоб мекард. Бо вуҷуди ҳабси Имомоғлу, ҳизбаш маҳз ӯро чун номзади худ пешбарӣ кардааст.

Мақомоти Туркия раиси шаҳри Истамбулро дар ташкил ва раҳбарии созмони ҷиноӣ, ришвадиҳӣ, қаллобӣ ба ҳангоми барпо кардани тендер ва аз роҳи ғайриқонунӣ ба даст овардани маълумоти хусусӣ муттаҳам кардааст.

Ба ғайр аз ин Имомоғлуро инчунин дар мусоидат ба терроризм гумонбар медонанд. Ӯву се нафари дигарро дар иртибот бо Ҳизби коргарии Курдистон, як ташкилоти мамнӯъ дар Туркия муттаҳам мекунанд. Мурофиа аз рӯи ин иттиҳомҳо ҳанӯз шурӯъ нашудааст.

Евроюст - як идораи Иттиҳоди Аврупо, ки бо додгоҳҳо кор мекунад, рӯзи 16 июл дар бораи безарар кардани гурӯҳи рахнагарон бо исми NoName057(16) хабар дод, ки масъули ҳамлаҳои азими компютерии DDoS ба зербиноҳои муҳими дифоию энергетикӣ ва ҳам идораҳои давлатӣ дар Аврупо мебошад.

Амалиёти байналмилалии сохторҳои ҳифзи қонун бо иштироки 12 давлат, аз ҷумла ИМА рӯзи 15 июл ҷараён гирифт. Дар натиҷа, як шабакаи компютерҳое аз байн бурда шуд, ки барои ҳамлаҳои рахнагарӣ бо истифода аз садҳо сервер дар тамоми ҷаҳон истифода мешуданд. Reuters навишт, ки Олмону Испания нисбати ҳафт гумонбар, аз ҷумла ташкилкунандагони эҳтимолии ин шабака воқеъ дар Русия дастури боздошт содир намуданд.

Дар маҷмӯъ 24 кофтукоб анҷом шудааст. Додситонии Олмон ва Евроюст гуфтанд, ки рахнагарон беш аз 4 ҳазор ихтиёриёнро дар Телеграм, шабакаҳои иҷтимоӣ ва дигар пойгоҳҳо барои ин кор ҷалб карда буданд. Танҳо дар Олмон дар паи 14 ҳамлаи рахнагарӣ 230 идора осеб дидааст. Дар Шведсия идораҳои давлативу бонкҳо мавриди ҳамла қарор гирифтанд.

Дар Швейсария моҳи июни соли 2023 ҳангоми суханронии видеоии президент Владимир Зеленский дар парлумон ва инчунин июни соли 2024 зимни баромадаш дар мавзӯи сулҳи Украина мавриди ҳамлаи ҳакерӣ қарор гирифтааст. Бори охир ҳамла моҳи июн дар ҷаласаи НАТО дар Нидерланди сурат гирифт.

Дар натиҷаи ҳамлаҳои ҳавоии Русия ба шаҳри Доброполйеи вилояти Донетск дастикам ду нафар куштаву 27 кас захмӣ гардиданд. Дар ин бора Вадим Филашкин, раиси маъмурияти ҳарбии вилоят хабар дод.

Ӯ гуфт, ки ба ин шаҳр бомбаҳои ҳавоии 500-килограммӣ партоб шуд ва ҳадафи он як фурӯшгоҳи азиме дар маркази шаҳр будааст. Дар натиҷа, 54 дӯкон, 304 манзил ва ҳашт мошин осеб дидааст.

Президенти Украина Владимир Зеленский ҳодисаи рухдодаро «як террори аблаҳонаи русӣ» номид ва гуфт, ки ин ҳамлаҳо ҳеҷ арзиши ҳарбӣ надоранд. Ӯ гуфт: «Ҳеҷ арзиши ҳарбие дар ин ҳамлаҳо нест – ин танҳо талоши куштани мардуми зиёд аст.

Русияи имрӯза пур аз чунин ҳамлаҳо аст. Мо посух хоҳем дод. Бо ҳампаймоҳо ба хотири ба хатми ҷанг водор кардани Русия ҳамкорӣ хоҳем кард».

Шоми 16-уми июл нерӯҳои ҳавоии Русия ба маркази шаҳри Добропиляи вилояти Донетски Украина бомба партоб карданд.

Зарба тақрибан соати 17 дар маркази савдои "Аврора" замоне сурат гирифт, ки сокинон аз кор бармегаштанд ва мардуми зиёде дар ин марказ ҳузур доштанд.

Вадим Филашкин, раҳбари маъмурии вилояти Донетск хабар дод, ки бар асари ҳамлаи ҳавоии Русия ба шаҳри Доброполии вилояти Донетск, дастикам ду нафар кушта ва 27 тани дигар захмӣ шуданд.

Ба гуфтаи ӯ, ин бомбаи 500-килограмӣ, ки партоб шуд, ҳадафаш маркази тиҷоратӣ дар маркази шаҳр будааст.

Дар натиҷа 54 нуқтаи савдо, 304 ҳуҷраи истиқоматӣ ва 8 автомашина зарар дидаанд.

Раисиҷумҳури Украина Владимир Зеленский ин ҳодисаро "терроризми аблаҳонаи Русия" номид.

Вакилон аз ҳизби "Новые люди" ба Думаи давлатии Русия пешниҳод кардаанд, ки аз ин ба баъд барои муҳоҷирон ба ватан фиристодани пули беш аз маошашон манъ карда шавад.

Ин пешниҳод аллакай таҳия ва ба Бонки марказии Русия ирсол шудааст.

Муаллифони ин пешниҳод гуфтаанд, ки набудани назорати қонунӣ дар ин самт, шароитро барои қонунигардонии даромадҳои ғайриқонунӣ, гурез аз пардохти андоз ва баровардани сармояи Русия ба хориҷ, фароҳам меорад.

Илова бар ин, вакилони ин ҳизб пешниҳод кардаанд, ки муҳоҷирон ҳангоми аз маошашон бештар равон кардани пул, дар мавриди қонунӣ будани он маълумотнома пешниҳод кунанд.

Назорат болои пули муҳоҷирон иқдоми нав нест.

Қаблан Сергей Миронов, роҳбари ҳизби "Справедливая Россия - За правду” пешниҳод карда буд, ки барои интиқоли пули муҳоҷирон дар ҳаҷми 1 дарсад комиссияи давлатӣ ҷорӣ карда шавад, аммо ин пешниҳоди вай қабул нагардид.

Як созмони хориҷӣ кам шудани интиқоли маблағ ба Тоҷикистонро дар се соли оянда пешгӯӣ кардааст.

Фонди авруосиёии суботу рушд дар гузориши нави минтақавиаш гуфтааст, мушкилоти эҳтимолӣ дар қонунигардонии будубоши муҳоҷирони кории тоҷик метавонад боиси коҳиши интиқолҳо аз 2 то 4 дарсади Маҷмӯи маҳсулоти дохилӣ гардад ва мутаносибан сатҳи некуаҳволии аҳолиро поин барад.

Таҳлилгарони Фонд пешбинӣ кардаанд, ки ҳаҷми интиқоли маблағ аз ҷониби муҳоҷирон дар соли равон аз 44,7 млрд сомонӣ дар соли 2024, то 40 млрд сомонӣ кам мешавад.

Мувофиқи пешгӯии онҳо, соли 2026 ҳаҷми интиқол то 37 млрд ва дар соли 2027 - то 35 млрд сомонӣ поин хоҳад рафт.

Тибқи гузориши Бонки Ҷаҳонӣ, соли 2024 маблағи фиристодаи муҳоҷирон 45 дарсади Маҷмӯи маҳсулоти дохилии Тоҷикистонро ташкил дод.

Соли 2023 муҳоҷирон ба Тоҷикистон 5,7 миллиард доллар фиристодаанд, ки барои кишвар маблағи "рекордӣ" ба ҳисоб рафта буд.

Артиши Исроил рӯзи 16-уми июл ба бинои Ситоди неруҳои мусаллаҳи Сурия воқеъ дар Димишқ ҳамлаи ҳавоӣ кардааст.

Ду манбаи амниятии Сурия ба хабаргузории "Ройтерс" гуфтаанд, ҳамлаи ҳавоии Исроил бинои Вазорати дифои Сурияро ҳадаф қарор додааст. Ҳанӯз ҷузъиёти бештар дар бораи ин ҳамла мунтазир нашудааст.

Бар асоси ин гузориш, атрофи дафтари президенти Сурия низ аз сӯи неруи ҳавоии Исроил бомборон шудааст.

Исроил гуфт, ки ҳадафаш аз ҳамла, ҳимоят аз ақалияти дурузҳо мебошад. Дар даргириҳо миёни дурузҳо ва неруҳои Сурия дар рӯзҳои ахир, зиёда аз 200 кас кушта шудааст.

Баъди оғози даргирӣ миёни ақалияти дурузҳо ва неруҳои Сурия дар аввали ин ҳафта, артиш ба шаҳри ас-Сувайда ворид шуд. Тибқи гузоришҳо, 15-уми июл артиши Исроил ба неруҳои ҳукуматии Сурия дар ас-Сувайда зарба задааст.

Шайх Ҳикмат ал-Хаҷри, яке аз роҳбарони ақалияти дуруз, ҳукумати Сурияро ба нақзи оташбас ва бомборон кардани шаҳр муттаҳам кард. Артиши Сурия мегӯяд, танҳо ба ҳамлаҳо посух додааст.

То замоне, ки Ғарб бо шартҳои пешниҳодкардаи Маскав барои гуфтугӯи сулҳ розӣ нашавад, Владимир Путин ҷанг дар Украинаро қатъ намекунад. Дар ин бора хабаргузории "Ройтерс" бо такя ба се манбаи наздик ба Кремл гузориш додааст.

Ба иттилои хабаргузорӣ, Путин ҳарфҳои ахири Доналд Трамп дар бораи ҷорӣ кардани таҳримҳои бештарро ҷиддӣ намегирад.

Ҳамсуҳбатони "Ройтерс" гуфтаанд, Владимир Путин бовар дорад, ки иқтисод ва артиши Русия пурқувват ҳастанд ва дар баробари маҳдудиятҳои кишварҳои Ғарбӣ муқобилият карда метавонанд.

Рӯзи 14-уми июл Доналд Трамп, президенти Амрико эълон кард, ки ба Украина силоҳҳои бештар мефиристад. Трамп ҳушдор дод, ки агар Русия давоми 50 рӯз ба сулҳ мувофиқат накунад, ҳамкорони тиҷории Маскавро таҳрим мекунад.

Се манбаи огоҳ ба "Ройтерс" гуфтаанд, Владимир Путин зери фишори Ғарб ҷангро қатъ намекунад, чун бовар дорад, ки Русия тавони муқобила бо таҳримҳои бештари Ғарбро дорад.

Дар зиндонҳои Тоҷикистон зиёда аз 15 ҳазор маҳбус адои ҷазо мекунанд. Ин омор дар гузориши ахири Ваколатдор оид ба ҳуқуқи инсон омадааст.

Омори ахир дар бораи теъдоди маҳбусон дар Тоҷикистон моҳи январи соли 2024 нашр шуда буд. Он вақт шумораи зиндониён 13,5 ҳазор кас гуфта мешуд.

Нигаронӣ аз зиёд будани маҳбусон дар зиндонҳои Тоҷикистон борҳо садо додааст. Азҷумла Ваколатдор оид ба ҳуқуқи инсон соли гузашта се зиндони вобаста ба Вазорати адлияро барои аз меъёр зиёд нигоҳ доштани маҳкумшудаҳо танқид намуд.

Департаменти давлатӣ ё Вазорати корҳои хориҷии Амрико дар моҳи апрели соли 2024 “аз ҳад зиёд будани зиндониҳоро дар маҳбасҳои Тоҷикистон” мушкили ҷиддӣ номида буд.

Бар асоси гузориши Ваколатдор оид ба ҳуқуқи инсон, соли 2024 дар маҷмуъ 15 ҳазору 600 маҳкумшуда аз ташхиси вирусии норасоии масъунияти бадан гузаронда шуданд.

Манбаъ мегӯяд, аз миёни маҳбусон 30 нафарашон гирифтори ВНМО будаанд. “Ин маҳкумшудагон то лаҳзаи ба муассисаҳои ислоҳӣ ворид шуданашон ба чунин бемориҳо гирифтор будаанд,”-омадааст дар гузориши Омбудсмен.

Мақомоти Тоҷикистон ҳар дафъа дар нишастҳои байнулмилалӣ мегӯянд, баъзе аз зиндонҳо нав ва шароити нигаҳдории маҳбусон ба талаботи байнулмилалӣ наздик шудааст.

Бар асоси омори расмӣ, дар Тоҷикистон 19 боздоштгоҳ ва зиндон мавҷуд аст.

Сафаралӣ Наҷмиддинов, собиқ вазири молияи Тоҷикистон дар синни 73-солагӣ даргузашт. Дар ин бора саҳифаи Вазорати молия дар Фейсбук хабар додааст.

Мақомот дар бораи сабаби марги Наҷмиддинов чизе нагуфтаанд.

Сафаралӣ Наҷмиддинов яке аз мансабдорони собиқадори ҳукумати Тоҷикистон буд. Ӯ солҳои 2000-2013 вазири молия ва баъди он то соли 2019 директори Оҷонсии суғуртаи иҷтимоӣ ва нафақа буд.

Номи Сафаралӣ Наҷмиддинов замони кораш дар Оҷонсии суғурта, бештар дар робита ба нафақаҳои ҳангуфт ва нафақаи муҳоҷирон расонаӣ шуда буд.