Ҳукумати Ҷумҳурии Чех ширкати “Аэрофлот”-и Русияро аз рӯйхати довталабони саҳмияҳои ширкати ҳавопаймоии кишвар берун кард. Мақомоти Чехия ин тасмими худро ташреҳ накардаанд. Акнун барои соҳиб шудан ба бастаи аслии саҳмияҳои ширкати ҳавопаймоии Ҷумҳурии Чех ду консорсиуми аврупоӣ талош меварзанд. Интизор меравад, соҳиби нави ширкат моҳи сентябр маълум шавад.

Муҳоҷире дар шаҳри Екатеренбурги Русия се кӯдаки хурдсолро аз манзили оташгирифта наҷот додааст. Ҳодиса рӯзи 14-уми май дар бинои панҷошёнаи деҳаи Новоберезовский ва замоне рух дод, ки Саид Шарипови 32-сола ба дорухона мерафт.

Муҳоҷир ба хабарнигорон нақл кардааст, ки садои гиряи кӯдаконро аз хонаи оташгирифта дар табақаи аввал шунида ба кӯмаки онҳо шитофтааст. Кӯдакон дар хона танҳо будаанд.

Сокинон Саидро барои ин ҷасораташ қаҳрамон ном мебаранд, аммо ӯ мегӯяд, танҳо вазифаи инсониашро иҷро кардааст, зеро худаш ҳам соҳиби як фарзанд аст. Саид 16 сол инҷониб дар Екатеренбург чун ронандаи таксӣ кор мекардаст. Ин бори аввал нест, ки муҳоҷирон барои наҷоти дигарон ҷони худро дар хатар мегузоранд ва бархе дар чунин ҳодисаҳо ҷон додаанд.

Аммо матбуоти Русия ки бо муҳоҷирситезӣ маъруф аст, ингуна хабарҳоро камтар инъикос мекунад. Шаҳрвандӣ ва дигар ҷузъиёти вобаста ба ҳуввияти Шарипов нашр намешавад.

Президенти ИМА Доналд Трамп гуфт, дар сурати пешрафт дар музокироти миёни Русия ва Украина, ӯ метавонад рӯзи 16 май ба Истанбул биравад. Дар ин бора хабаргузории AFP иттило додааст.

Трамп, аз ҷумла, гуфт, «Медонед, агар чизе шавад, ман рӯзи ҷумъа рафта метавонистам (ба Истанбул)». Трамп дар шарҳи ба музокирот нарафтани Путин гуфт, раҳбари Русия барои он ба Истанбул нарафт, ки Трамп он ҷо ҳозир нашудааст.

“Агар ман наравам, вай чаро он ҷо равад? Фикр накунам, ки агар ман наравам, Путин биравад”, гуфт Трамп.

Трамп ин ҳарфҳоро рӯзи 15 май баён кард. Ӯ қаблан гуфта буд, ки бо вуҷуди нақшаҳои бисёр зиёдаш дар сафар ба минтақа, «ба хотири наҷоти ҷони инсонҳо» омода аст ба Истамбул сафар кунад. Трамп дар Ховари Миёна бо мақомоти кишварҳои минтақа мулоқот мекунад ва қарор аст сафари ӯ 15 май бо боздид аз Имороти Муттаҳидаи Арабӣ ба анҷом бирасад.

Рӯзи 15 май дар Туркия бояд мулоқоти мустақими ҳайатҳои ҳукуматии Русия ва Украина баргузор шавад. Путин шаби 14 май феҳристи аъзои ҳукуматашро барои сафар ба Истанбул тасдиқ кард ва ёвари президент Владимир Мединскийро раҳбари ин ҳайат таъин намуд.

Худи Путин, зоҳиран ба ин мулоқот намеравад. Аз ҷониби ИМА дар музокироти Истамбул котиби давлатӣ Марко Рубио ва фиристодаи вижаи президент Стив Уиткофф иштирок мекунанд.

Дар Қазоқистон мехоҳанд барои маҷбур кардан ба издивоҷ ҷазои ҷиноӣ ҷорӣ кунанд. Дар ин бора ба Бахши қазоқии Радиои Озодӣ Мурат Абенов, як вакили Маҷлиси Қазоқистон хабар дод. Ӯ гуфт, пешниҳод мешавад, ки барои содир кардани чунин ҷиноят ҳадди аксар 7 соли ҳабс ҷорӣ шавад. Ӯ гуфт, ки ҳоло дар парлумон мизони ҷазо ҳам барои арӯсрабоӣ ва ҳам барои маҷбур кардан ба издивоҷ баррасӣ мешавад ва ин намуд ҷиноятҳо аз ҷаримабандӣ то ҳабси воқеиро пешбинӣ хоҳанд кард.

Ин вакили маҷлис гуфт, ки дар давоми се соли гузашта ба сохторҳои ҳифзи қонуни Қазоқистон 214 аризаи шикоятӣ дар заминаи рабоиши занон бо мақсади ба ақди нигоҳи худ даровардани мардон ворид шудааст, вале аз ин ҳамаи шикоятҳо танҳо даҳ ададаш то ба додгоҳ расидааст. Дигар парвандаҳоро бо сабаби “набуди ҷиноят” бастаанд, ҳарчанд ҷабрдидаҳо собит кардаанд, ки онҳоро берун аз хоҳишашон рабуда, нисбаташон зӯр истифода шудааст.

Ҳоло қонунгузории Қазоқистон ҳолатҳои дуздии занонро бо мақсади арӯсӣ аз рӯи моддаи “Одамрабоӣ” баррасӣ мекунанд. Ҳомиёни ҳуқуқ мегӯянд, ки омори воқеии ҳолатҳои дуздии занон бо мақсади ба никоҳ даровардани онҳо метавонад хеле зиёд бошад, чунки на ҳама ҷабрдидаҳо аз ин ҳодисаҳо ба сохторҳои ҳифзи қонун шикоят мекунанд.

Дар доираи таҷлили Рӯзи ҷаҳонии футбол аз 19-ум то 25-уми май дар саросари Тоҷикистон баргузории чорабиниҳои оммавӣ ба нақша гирифта шудаанд.

Ба иттилои Федератсияи футболи Тоҷикистон, ба ифтихори Рӯзи ҷаҳонии футбол 22-юми май дар Варзишгоҳи марказии Душанбе бозии дӯстона миёни устураҳои футболи Тоҷикистону Русия доир мегардад.

Ба ҳайати дастаи собиқадорони тоҷик бозигароне, ки дар рушди футболи кишвар саҳми арзанда гузоштаанд, шомил хоҳанд шуд.

Дар ҳайати мунтахаби устураҳои Русия футболбозони маъруф, ба мисли Ринат Дасаев, Егор Титов, Дмитрий Аленичев, Валерий Шмаров, Сергей Киряков ва дигарон иштирок хоҳанд кард.

Варзишгоҳи марказии Ҳисор макони баргузории бозӣ барои Суперҷоми Тоҷикистон-2025 байни қаҳрамони кишвар – «Истиқлол»-и Душанбе ва барандаи Ҷоми Тоҷикистон – «Регар-ТадАЗ»-и Турсунзода мегардад. Бозӣ 25-уми май дар Рӯзи ҷаҳонии футбол баргузор мешавад.

Тибқи иттилои дафтари матбуоти бошгоҳи “Истиқлол”-и Душанбе, 19-уми май дар қароргоҳи даста воқеъ дар дараи Алмосии Ҳисор ҷашнвораи футбол бо барномаҳои рангини варзишию фарҳангӣ доир хоҳад шуд.

Ёдовар мешавем, FIFA (Федератсияи байнулмилалии футбол) эълон намуд, ки рӯзҳои 21–25-уми май чорабиниҳои Ҳафтаи ҷаҳонии футбол ба таври густарда барпо мегардад.

Ҳафтаи мазкур ба хотири Рӯзи ҷаҳонии футбол (25-уми май) бахшида мешавад, ки он тибқи қатъномаи Маҷмаи Умумии Созмони Милали Муттаҳид таъсис ёфтааст.

Футбол яке аз намудҳои маъмултарини варзиш дар ҷаҳон ба ҳисоб меравад ва Англия ватани он ҳисобида мешавад, ки аввалин мусобиқаи расмӣ соли 1872 дар қаламрави ин кишвар баргузор шудааст.

Аз он замон то инҷониб 22 мусобиқаи қаҳрамонии ҷаҳон оид ба футбол сурат гирифтааст, ки охиринаш соли 2022 дар Қатар доир гаштааст.

Ҳоло футбол на танҳо бозӣ, балки як тиҷорати бузурги варзишӣ низ мебошад. Футболбозони маъруфи ҷаҳон маоши калон мегиранд.

Федератсияи байнулмилалии футбол (FIFA) нақшаҳоеро эълон кардааст, ки мувофиқи он то соли 2026-ум шаст дар сади аҳолии ҷаҳон ба футбол машғул хоҳанд шуд.

FIFA ният дорад, ки барои рушди ин бозӣ чор миллиард доллар сармоягузорӣ кунад.

Футбол дар Тоҷикистон аз солҳои 20-уми қарни гузашта роҳандозӣ шудааст. Соли 1937 аввалин мусобиқаи қаҳрамонии кишвар баргузор шуда буд.

“Динамо”-и Сталинобод (ҳозира Душанбе) аввалин дастаест, ки ба унвони қаҳрамони Тоҷикистон мушарраф гаштааст. Ин даста, ҳамчунин, аввалин барандаи Ҷоми Тоҷикистон мебошад. Соли 1992 Федератсияи миллии футболи Тоҷикистон таъсис ёфта, соли 1994 ба узвияти AFC (Конфедератсияи футболи Осиё) ва FIFA пазируфта шудааст. Аз соли 1992 дар Тоҷикистони соҳибистиқлол мусобиқаи қаҳрамонии кишвар барпо мегардад. Аввалин қаҳрамони Тоҷикистон дар замони истиқлолият дастаи “Помир”-и Душанбе мебошад.

Дастовардҳои бузурги футболи тоҷик дар тули беш аз 50 сол ба "Помир" марбут аст, вале ин дастаи машҳур, ки аз байн рафтааст, боиси нигаронии ҳазорҳо мухлисонаш гардидааст.

Дар замони истиқлолият бошад, дастаи “Истиқлол”-и Душанбе, ки 13 бор ба унвони қаҳрамони Тоҷикистон мушарраф шудааст, муваффақтарин аст.

Дастаи мунтахаби миллии Тоҷикистон бори аввал дар таърихи худ дар марҳилаи ниҳоии Ҷоми Осиё, ки аз 12-уми январ то 10-уми феврали соли 2024 дар Қатар доир гардид, иштирок карда, ба даври чаҳорякниҳоӣ роҳ ёфт.

Дар Тоҷикистон занон низ ба футбол машғуланд. Дастаҳои мунтахаби футболи духтарон ва тими миллии занонаи Тоҷикистон ҳамасола дар мусобиқоти интихобии қаҳрамонии Осиё ва қаҳрамонии CAFA (Ассотсиатсияи футболи Осиёи Марказӣ) ширкат меварзанд.

Дар Тоҷикистон барномаи давлатии рушди ин навъи олимпии варзиш дар кишвар қабул шудааст.

Ба ин тартиб, футбол ҳамчун варзиши рақами як дар Тоҷикистон бозии дӯстдоштаи ҳазорҳо кӯдакону наврасон ва ҷавонону бузургсолон гаштааст.

Нигаронӣ аз амиқрафти тамоюлҳои диктотурӣ ва нуфузи афзояндаи Русияву Чин дар минтақаи Осиёи Марказӣ, ва ба вижа Тоҷикистон, ҳарчи бештар зарурати роҳандозӣ шудани ислоҳоти иҷтимоӣ ва сиёсиро дар ин кишвар ба вуҷуд овардааст.

Ин андешаро мухолифон ва фаъолони сиёсию мадании кишварҳои Осиёи Марказӣ дар ҷараёни конфронси байналмилалии “Тавсеаи таҷовузи Русия алайҳи Украина дар қаламрави Осиёи Марказӣ: Чолишҳои Қафқозу кишварҳои Балтика ва ҳам Иттиҳоди Аврупо” баён карданд. Ин ҳамоиш рӯзи 13 май дар шаҳри Вилнюс баргузор шуд.

Дар кори он даҳҳо намояндагони кишварҳои Осиёи Марказӣ, аз ҷумла Шарофиддин Гадоев, раиси Ҷунбиши ислоҳот ва рушд ва дигар фаъолони тоҷикистонӣ иштирок карданд.

Дар изҳороти муштараки ширкатдорон, аз ҷумла, гуфта мешавад, ки дар Тоҷикистон дар натиҷаи ба ҳам омадани чанд омил, як ҳолати “наздик ба таркиш” ба вуҷуд омадааст. Аз ҷумла, “бетағйир мондани қудрат ва адами комили масъулиятпазирӣ дар шароити диктатураи як шахсият; идомаи созиши миёни Русияву Чин дар заминаи истиқлолияти ин кишвар; то рафт амиқтар шудани шикофи байни наслҳои ҷавону калонсоли раҳбарикунанда дар Оиёи Марказӣ; ҳаракат ба самти низоми адлияи ҷазодиҳанда, фасоди беназорат ва фишори афзоянда ба озодиҳои инфиродӣ ва динӣ” чун мушкилоти ҷиддӣ номбар шудаанд.

Муаллифони изҳорот мегӯянд, дар натиҷаи “саркӯбҳои сартосарии режими Эмомалӣ Раҳмон” мардуми зиёд ва ҳам нирӯи корӣ кишварро тарк карда эҳсоси норизоият ва тундгарошавии ҷавонон боло мегирад. “Тавсеаи хатари террристӣ, аз ҷумла, аз гурӯҳҳои вобаста ба Шабакаи Хуросони ДОИШ, ки қисми зиёди онҳо шаҳрвандони Тоҷикистон мебошанд”, ба қавли фаъолон, на танҳо ба эътидоли дохилии ин кишвар, балки кулли минтақа таҳдид мекунад.

Нишасти Вилнюс бо кӯмаки Бунёди дифоъ аз демократия дар Осиёи Марказӣ бо иштироки намояндагони ҷомеаҳои маданӣ, созмонҳои ҳомии ҳуқуқи инсон, ҳаракатҳои сиёсӣ ва коршиносони соҳаи сиёсат ва амнияти минтақаӣ баргузор гардид.

Танҳо 19 дарсади кӯдакони муҳоҷирон дар Русия иҷозаи супоридани имтиҳони забони русиро доштанд ва боқимонда 81 дарсади онҳое, ки ҳуҷҷат супориданд, бинобар пурра набудани ҳуҷҷатҳо, аз ҷумла, маълумоти бардурӯғ дар ҳуҷҷат ё набудани ҷойҳои холӣ дар мактаб, рад шуданд.

Хадамоти федералии назорат дар соҳаи маорифи Русия гуфт, дар маҷмӯъ наздики 2 ҳазор кӯдак барои имтиҳони забони русӣ муроҷиат кардаанд ва танҳо 335 нафар барои санҷиш иҷозат дода шуданд.

Санҷиши донистани забони русӣ барои фарзандони муҳоҷирон дар Русия, ки мехоҳанд таҳсилро дар мактабҳои русӣ идома диҳанд, аз 1 апрели соли 2025 ҳатмӣ шуд.

Бар асоси он, фарзандони муҳоҷирон бе донистани забони русӣ ба мактабҳо пазируфта намешаванд.

Пештар Думаи давлатии Русия бо нашри натиҷаҳои як таҳлил гуфта буд, 41 дарсади фарзандони муҳоҷирон дар ин кишвар бо забони русӣ мушкил доранд.

Муҳоҷирони зиёд аз кишварҳои Осиёи Марказӣ, аз ҷумла Тоҷикистон, қаблан шикоят карда буданд, ки дархости онҳо барои қабули фарзандонашон ба мактабҳои Русия рад мешавад.

Дар кишвари Мексика як духтари блогере, ки бо нашри мавод дар бораи зебоиву ороиш маъруф буд, ҳангоми пахши навбатии зинда тавассути шабакаи TikTok аз тири туфанг ба қатл расониданд. Дар ин бора оҷонсии Рейтерс хабар додааст. Дар Мексика, ки мизони хеле баланди кушторҳо бар пояи ҷинсият дорад, ин ҳодиса бисёриҳоро ваҳшатзада кард. Валерия Маркез 23 сол дошт ва полис рӯзи сешанбе гуфт, таҳқиқи қазияи куштори ӯро бар пояи хушунати ҷинсӣ ба роҳ мондааст.

Маркезро рӯзи 13 май дар маҳалли кораш - як ороишгоҳе дар шаҳри Запопани Мексика марде ба қатл расонид, ки вақти суханрониаш дар TikTok вориди ин муассиса шуд. Исми қотил нашр намешавад ва маълум нест, ки ӯ боздошт шудааст ё на ва сабаби ин ҳодиса чӣ мебошад.

Маркез чанд лаҳза пеш аз қатлаш пахши зиндаи видеоиро дар TikTok шурӯъ кард. Садои ӯ, ки мегуфт, “Онҳо омаданд”, дар навори зинда пахш шуд ва баъди ин садои марде ба гӯш расид, ки гуфт, “Ҳей, Вале?”. Маркез гуфт, “Бале?” ва ин лаҳза садои пахши зиндаро хомӯш кард. Лаҳзае баъд ӯ аз зарби тири туфанг кушта шуд. Пораи чеҳраи марде, ки баъди ин телефони Маркезро ба даст гирифт, дар навори зинда дида шудааст.

Маркез дар Инстаграм ва TikTok 200 ҳазор пайрав дошт. Лаҳзаҳое пеш аз фоҷеа ӯ гуфт, ки касе ба ороишгоҳ омада ба ӯ “тӯҳфаи гароне” тақдим кардааст. Маркез ошуфтаҳол менамуд ва гуфт, ки ӯ интизори бозгашти касе набуд.

Мексика, Парагвай, Уругвай ва Боливия дар қаламрави Амрикои Лотин ва Карриб бо омори бисёр баланди кушторҳои занон фарқ мекунанд. СММ гуфтааст, дар ин кишварҳо аз ҳар 100 ҳазор зан дар соли 2023 тибқи омори тахминӣ 1,3 нафарашонро куштаанд.

Ҳайати Русияро дар Истанбул дар музокирот бо Украина рӯзи 15 май Владимир Мединский - ёвари президент Владимир Путин раҳбарӣ мекунад. Ҳамин мақомдор ҳам раҳбарии гурӯҳи музокиротии Русияро дар соли 2022 ба ӯҳда дошт.

Ба ҳайати Русия инчунин муовини вазири корҳои хориҷӣ Михаил Галузин, фармондеҳи раёсати ситоди кулли Русия Игор Костюков, муовини вазири мудофеа Александр Фомин шомил шудаанд. Дар ин бора дафтари матбуоти Кремлин дар як иттилоияе хабар дод.

Аз ин пеш президенти Украина Владимир Зеленский талаб карда буд, ки дар музокироти мустақими нахустини ҳайатҳо баъди беш аз се соли ҷанг президент Путин ҳозир шавад. Ӯ гуфт, дар сурати ғайр, музокира барпо намешавад, вале баъдтар мавқеашро нармтар кард.

Рӯзи 14 май хабаре нашр шуд, ки мегӯяд, котиби давлатии ИМА Марко Рубио, ки қарор буд рӯзи чоршанбе дар Истамбул мешуд, рӯзи ҷумъа ба Туркия меравад.

Рӯзи 15 май дар Душанбе ҷаласаи Шӯрои байниҳукуматии лоиҳаи минтақавии интиқоли неруи барқи CASA-1000 барпо мешавад ва дар кори он ҳайатҳо аз кишварҳои узви ин тарҳ аз Осиёи Марказӣ ва Осиёи Ҷанубӣ иштирок мекунанд. Дар ин бора сомонаи вазорати энергетика ва захираҳои оби Тоҷикистон хабар додааст.

Қабл аз он, рӯзҳои 13 ва 14 май дар Китобхонаи миллии Тоҷикистон ҷаласаи навбатии Гурӯҳҳои кории кишварҳои иҷрокунандаи тарҳи CASA-1000 ва шарикони рушд баргузор мешавад. Ба навиштаи манбаъ, ҷаласа таҳти раёсати муовини вазири энергетика ва захираҳои оби Тоҷикистон Манучеҳр Сафарзода шурӯъ шуд. Ҳадафи он омодагӣ ба ҷаласаи Шӯрои байниҳукуматии тарҳи энергетикӣ аст.

Ба навиштаи сомонаи Ariana News, ҳайати Афғонистонро дар нишасти Душанбе Абдулборӣ Умар, раҳбари ширкати энержии “Брешно” намояндагӣ мекунад. Ин манбаъ навишт, дар баробари намояндагони Афғонистон ва Тоҷикистон, инчунин ҳайатҳои Қирғизистон, Покистон, масъулони Бонки исломии рушд ва дигар сохторҳои молӣ дар ҷаласаи Душанбе ҷамъ омадаанд.

CASA-1000 як тарҳи байналмилалиест, ки чанд сол пеш иҷрои он бо кумаки Бонки Ҷаҳонӣ оғоз ёфт ва арзиши он беш аз 1 миллиарду 100 миллион долларро ташкил медиҳад. Бар асоси ин тарҳ, хатти баландшиддати барқи 750-километрие сохта мешавад, ки аз тариқи қаламрави Афғонистон мегузарад ва ба Покистон мерасад. Ҳукумати Толибон, ки расман эътироф нашудааст, баҳори соли 2024 созишномаи CASA-1000-ро имзо намуд ва иҷрои ин тарҳ, ки бо сабаби ноамниҳо дар Афғонистон ба таъхир афтода буд, аз сар гирифта шуд.

Мақомоти тоҷик навиштанд, меҳмонҳоро бо зеристгоҳои 1300 мегаваттӣ дар мавзеи Сангтӯдаи ноҳияи Кӯшониён ва Неругоҳи барқи обии «Норак» ошно мекунанд.

Президенти ИМА Доналд Трамп рӯзи 14 май дар ҷараёни сафараш ба Арабистони Саудӣ бо раҳбари муваққатии Сурия Аҳмад аш-Шаръ дидору гуфтугӯ намуд. Баргузории ин мулоқотро ҳам хабаргузориҳо ва ҳам Кохи Сафед хабар доданд. Вохӯрӣ пушти дарҳои баста барпо шуд, вале акси мулоқоти ду раҳбарро дар шабакаҳо нашр карданд. Дар ин мулоқот инчунин валиаҳди Саудӣ Муҳаммад бин Салмон ҳам иштирок намуд.

Шоми 13 май Трамп гуфт, ки таҳримҳои зидди Сурияро бекор мекунад. Ин таҳримҳо зидди режими президенти пешин Башор Асад ҷорӣ шуда буданд, ки моҳи декабри соли гузашта аз қудрат барканор гардид.

Аш-Шаръ, ки инчунин бо номи Абумуҳаммад Ҷулонӣ ҳам маъруф аст, раҳбарии гурӯҳи мусаллаҳонаи калонтарини мухолифи Асад «Ҳайат Таҳрир аш-Шом»-ро ба ӯҳда дошт.

Азбаски он дар гузашта бо «Ал-Қоида» дар робита буд, ИМА ва дигар кишварҳо онро ба феҳристи созмонҳои террористӣ шомил карда буданд. Баъди сари қудрат омадани Аш-Шаръ, маъмурияти пешини ИМА исми ӯро аз феҳристи афроди мавриди ҷустуҷӯ берун кард.

Маълум нест, ки таҳримҳо кай бекор мешаванд, вале Димишқ ин хабарро истиқбол кард ва дар дохили Сурия ҳам бисёриҳо аз ин қарори Трамп хушнуд шуданд.

Бархе матбуот гуфтанд, ки нахустазири Исроил Бенямин Нетаняҳу ба Трамп ишора кардааст, ки мухолифи чунин қарор аст. Кэролайн Ливитт, сухангӯи Кохи Сафед гуфт, ки дар мулоқот Трамп аз Шаръ даъват кардааст, ки бо Исроил робитаҳои дипломатӣ барқарор кунад, мубориза бо терроризмро идома дода, масъулияти назорат аз зиндонҳоеро, ки он ҷо афроди вобаста ба ДОИШ нигаҳдорӣ мешаванд, ба дӯши худ бигирад. Аш-Шаръ дар навбати худ ба Трамп гуфтааст, ки сармоягузориҳои амрикоиро ба саноати нафтугази Сурия истиқбол мекунад.

То кунун як бахше аз қаламравҳои Сурия берун аз итоати Димишқ мебошанд. Дар ин қаламравҳо, аз ҷумла, сарбозони амрикоӣ ҳастанд, ки ба гурӯҳҳои курду араб дар мубориза бо ДОИШ кӯмак мекунанд. ИМА расман аз якпорчагии Сурия ҷонибдорӣ ва ба мурооти ҳуқуқи ҳамаи гурӯҳҳои қавмиву динӣ пойфишорӣ мекунад.

Имсол дар миёни кишварҳои ҷаҳон Узбекистон шумори бештари лотереяҳои Green Card ё ҳақи иқомату кор дар Амрикоро бурдааст. Дар маҷмӯъ 5564 шаҳрванди Узбекистон барандаи Корти сабз шуданд. Дар ҷои дуюм Алҷазоир аст, ин ҷо 5526 нафар баранда шудаанд.

Дар кишварҳои дигари Осиёи Марказӣ ҳам шумори ғолибони Green Card ба садҳо нафар мерасад. Дар Қирғизистон 3095, дар Тоҷикистон 2982, дар Қазоқистон 2004 ва дар Туркманистон 2010 нафар дар лотерея дастболо шуданд.

Дар ин бора 13 май маркази консулии Кентакки тавассути сомонаи расмии барномаи Green Card хабар додааст.

Дар кишварҳои Русия, Эрон, Афғонистон ва Украина ҳам шумори барандаҳои корти сабз аз 4 то 5,5 ҳазор нафар мерасад.

Дар маҷмӯъ дар саросари ҷаҳон имсол 131060 нафар барандаи корти сабз шуданд. Вале таъкид мешавад, ки виза барои бурдани корти сабз аз ин шумор мардум танҳо ба 55 ҳазор нафар дода мешавад.

Green Card санади расмӣ буда, ба шаҳрвандони хориҷӣ имкони кору зиндагии қонунӣ дар хоки Амрикоро фароҳам мекунад. Ин санад роҳро барои гирифтани шаҳрвандии ИМА ҳам боз мекунад.

Одам (Адам) Қодиров - писари раиси ҷумҳури Чеченистон Рамазон Қодиров мукофоти навбатӣ гирифт. Ин дафъа ба навраси 17-сола ба муносибати 25-солагии ОМОН (Гурӯҳи таъиноти махсус)-и ВКД Чеченистон нишони «Ахмат-Грозный» супурда шуд, ки ба ёди падари раҳбари Чеченистон таъсис шудааст.

Навор аз ҷараёни ҷашнро Рамазон Қодиров дар саҳифаи Телеграммаш нашр кард. Одам Қодиров дабири Шӯрои амнияти Чеченистон аст. Ӯ ҳамчунин раёсати Хадамоти амнияти падарашро бар ӯҳда дорад.

Ӯ аллакай соҳиби унвони Қаҳрамони Ҷумҳурии Чеченистон, ҷоизаи олии ҷумҳурӣ - ордени Қодиров ва ҳадди аққал шаш ордени дигар аст. Аксари ин ҷоизаҳоро Одам Қодиров баъди он соҳиб шуд, ки дар боздоштгоҳ Никита Журавел, ҷавонеро, ки китоби Қуръонро сӯзонда буд, латтукуб намуд.

Журавел барои ин кирдораш ба хиёнат ба ватан гунаҳкор ва ба 3,5 соли зиндон маҳкум шуд. Қодиров он замон навори задани Одамро нашр ва аз кори писараш тавсиф карда буд.

Пулиси вилояти Суғд нисбати панҷ зан барои машғул шудан ба тануфурӯшӣ парванди маъмурӣ тартиб додааст. Мақомот рӯзи 13-уми май дар барномаи махсуси телевизионии Вазорати корҳои дохилӣ хабар доданд, ки ин занҳо муштариёни дискоклубҳои шаҳри Хуҷанд буданд.

Санҷишҳо дар марказҳои дилхушӣ дар доираи амалиёти нави “Ахлоқ” дар вилояти Суғд ба роҳ монда шудааст. Дар натиҷаи гузарондани рейдҳо 70 занро, ки, ба гуфтаи мақомоти ҳифзи ҳуқуқ, “истироҳату дилхушии носолим” доштаанд, барои сӯҳбат ва гузаштан аз муоинаи тиббӣ ба шӯъбаи милиса бурдаанд.

Дар Тоҷикистон барои танфурушӣ аз 500 то 2000 сомонӣ ҷарима пешинӣ шудааст ва дар сурати такрори амал 15 рӯз пушти панҷара мераванд. Аммо дар бархе ҳолатҳои дигар ин гурӯҳи занон барои сироят кардани дигарон ба бемориҳои гузаранда то 10 сол зиндонӣ мешаванд.

Ба ин тартиб, қонун «Дар бораи ворид намудани илова ба Кодекси ҷиноятии Ҷумҳурии Тоҷикистон» ҷавобгарии ҷиноятиро барои дар шабакҳои иҷтимоӣ гузоштани лайк ё дигар аломат бекор намуд.

Ангушт задан ба аломати "писанд" ё "лайк" (Like) дар зери матлабҳои интернетӣ, ки қаблан садҳо касро ба зиндон бурдааст, дигар ҷавобгарии ҷиноӣ нахоҳад дошт. Ҳоло пурсиши асосӣ ин аст, ки то куҷо маҳкумшудагон бо ин банди қонуни ҷиноӣ акнун метавонад аз зиндон озод шаванд.

Моҳи апрел Дилшод Ҷӯраев, ҳуқуқдони тоҷик дар суҳбат бо Радиои Озодӣ гуфт, дар сурати амалӣ шудани қонун он ба гурӯҳе аз маҳкумшудагон низ дахл хоҳад дошт. Ӯ машварат дод, ки чунин нафарон бо ёрии вакилони дифояшон барои бозбинӣ шуданти ҳукми додгоҳ муроҷиат кунанд.

Ҷӯраев, аз ҷумла гуфт: “Агар ин шахс бо яке аз ин ду модда – 179 (замимаи 3) ё 307 (замимаи 1) маҳкум шудааст, танҳо барои гузоштани лайк ва барои гузоштани шарҳ дар шабакаҳои иҷтимоӣ, пурра аз ҷазо озод карда мешавад. Ё аз адо намудани ҷазои боқимонда озод карда мешавад".

Ба иттилои расмӣ, дар Тоҷикистон беш аз якуним ҳазор кас барои гузоштани "лайк" ва навиштани шарҳ дар зери матлабҳои, ба гуфтаи мақомот, дорои хусусияти ифротӣ ҷазо гирифтаанд.

Мақомот навору навиштаҳои мухолифон ва созмонҳои мамнуъ дар кишварро ифротӣ мешиносанд, ҳарчанд корбарон онҳоро танқиди барҳақ медонанд ва зерашон “лайк” мегузоранд.

Вакилони порлумони Тоҷикистон дар моҳи июни соли 2018 дар пайи ислоҳи Кодекси ҷиноии кишвар дар қонунгузорӣ “сафедкунии оммавии терроризм тариқи шабакаи Интернет”-ро ҷурм шинохтанд ва ин меъёр дар миёни мардум бо моддаи ҷазо барои “лайк” маъруф аст.

Покистон рӯзи 13 май дар вокуниш ба таҳдиди нахуствазири Ҳинд дар бораи ҳамлаҳои нави марзӣ, ҳушдор дод ва гуфт, ба ҳар гуна таҷовузи эҳтимолӣ посух хоҳад дод.

Нарендра Моди дар суханронии телевизионии рӯзи 12 май гуфт, ки агар Исломобод даст ба ин кор бизанад, Деҳлӣ ба он посухи муносиб медиҳад.

Вазорати корҳои хориҷии Покистон изҳороти Модиро "таҳрикомез" хонд ва хостори хештандорӣ шуд.

Ҳушдори Покистон пас аз он матраҳ шуд, ки ҳафтаи гузашта ду кишвари дорои силоҳи ҳастаӣ, пас аз ҳамлаи маргбор дар Кашмири Ҳинд, ки 26 гардишгарро кушт, вориди даргириҳои мушакӣ ва бо истифода аз ҳавопаймоҳои бесарнишин шуданд.

Оташбасе, ки бо миёнаравии Доналд Трамп барқарор шуд, то кунун ҳифз шудааст.

Фармондеҳони баландпояи ду тараф бар идомаи оташбас ба созиш расидаанд ва мушовирони амнияти миллӣ қарор аст дар яке аз кишварҳои бетараф дар бораи ихтилофҳо, гуфтугӯ кунанд.