Пайвандҳои дастрасӣ

Хабари нав

Хабарҳо

Вазири тоҷик ва намояндаи WHO коронавирусро баррасӣ кардаанд

Brussels -- Sirojiddin Muhriddin, foreign minister of Tajikistan, 10Dec2019

Сироҷиддин Муҳриддин - вазири умури хориҷии Тоҷикистон, бо Ҳанс Клюге мудири минтақавии Созмони Ҷаҳонии Тандурустӣ дар Аврупо доир ба роҳҳои пешгирӣ аз сирояти коронавируси нав суҳбати телефонӣ анҷом додааст.

Дафтари матбуоти Вазорати корҳои хориҷӣ рӯзи 23-уми апрел дар як изҳороти расмӣ дар вебсайти вазорат гуфт, ки гуфтугӯ рӯзи 22-уми апрел сурат гирифтааст. Дар баёния омадааст, ки Сироҷиддин Муҳриддин бо Клюге доир ба “масъалаи пешгирии шуюи бемории COVID-19”- суҳбат карданд ва "паёмадҳои он ба кишвар ва дар ин замина мусоидати Созмони Ҷаҳонии Тандурустӣ барои Тоҷикистонро мавриди баррасӣ қарор доданд."

Мақомоти Тоҷикистон мегӯянд, то кунун ягон мавриди сирояти COVID-19 дар кишвар сабт нашудааст, аммо марги чанд нафар аз бемориҳое ба мисли илтиҳоби шуш, ки шабеҳи КОВИД-19 аст, шубҳаву гумон дар бораи воқеияти гуфтаҳои мақомотро зиёд кардааст.

Ҳарчанд дар баёния чизе доир ба омадани ҳайати созмон ба Тоҷикистон барои таҳқиқи вазъ гуфта нашудааст, вале Ҳанс Клюге рӯзи 22 уми апрел дар як баёнияи расмӣ гуфт, қарор аст, ҳафтаи оянда як ҳайате барои омӯзиши вазъ ба Тоҷикистону Туркманистон бираванд, ки ҳарду дар қатори кишварҳои "орӣ аз вируси КОВИД-19" ҳастанд.

Маълум нест, ҳайат чӣ гуна ва аз кадом роҳе ба Душанбе меоянд, ҳарчанд кишварҳои минтақа, ки марзҳоро ба рӯи ҳам бастаанд, ба онҳое, ки шиносномаҳои дипломатӣ доранд, иҷозаи равуо медиҳанд.

Ҳамаи хабарҳои имрӯзро дар инҷо бихонед

Путин гуфт, тасмим нагирифтааст, ки баъди 2024 президент монад ё не

Владимир Путин

Владимир Путин, раиси ҷумҳурии Русия, гуфт, ҳанӯз тасмим нагирифтааст, ки баъди ба охир расидани давраи ҳозираи раҳбарияш дар соли 2024 дубора номзадии худро пешбарӣ кунад ё на.

"Мувофиқи Конститутсия ҳақ дорам, ки ба муҳлати нав интихоб шавам. Вале оё ин корро мекунам ё не, ҳанӯз тасмим нагирифтаам," – гуфт Путин рӯзи 30-юми ноябр дар як нишасти сармоягузорӣ дар Маскав.

Ислоҳоти баҳсбарангезе, ки соли гузашта ба Конститутсияи Русия дохил карда шуд, заминаро барои дар қудрат мондани Путин то соли 2036 фароҳам меоварад.

Мухолифин онро танқид мекунанд.

Путини 69-сола аз соли 1999 боз ҷилави қудратро дар Русия ба даст дорад. Дар ин миён як муддат сарвазир будааст.

Ҳазораҳо мегӯянд, Толибон онҳоро аз хонаҳояшон меронанд. ВИДЕО

Ҳазораҳо мегӯянд, Толибон онҳоро аз хонаҳояшон меронанд
лутфан мунтазир бошед

Феълан кор намекунад

0:00 0:03:11 0:00

Ҳазораҳои Афғонистон мегӯянд, Толибон хонаҳояшонро ишғол намуданд ва онҳо маҷбур шуданд, аз макони доимии зисташон фирор кунанд.

Як гурӯҳи ҳазораҳои вилоятҳои Дайкундӣ ва Урузгон дар Кобул паноҳгоҳ ёфтаанд.

Қавми ҳазора тахминан 9 дар сади аҳолии Афғонистонро ташкил медиҳад. Дар давраи ҳукмронии қаблии Толибон ҳазораҳо, ки аксаран шиамазҳаб мебошанд, мавриди таъқиб қарор доштанд.

Аз моҳи августи имсол, замони сари қудрат омадани Толибон дар Афғонистон, гузоришҳо дар бораи таъқиби ҳазораҳо боз ба чашм мехӯранд.

Созмони Афви Байнулмилал (Amnesty International) навиштааст, ки моҳи октябр дар минтақаи Дайкундӣ Толибон 13 ҳазора, собиқ сарбозони ҳукуматиро ба қатл расонданд. Ҳамон вақт Толибон таъқибу азияти ҳазораҳоро рад карданд.

Ҳавопаймои Русия шаҳрвандони кишварҳои узви СПАД-ро аз Кобул берун меорад

18 ноябри соли 2021, Кобул. Ҳавопаймои русӣ ба Афғонистон ёрии башарӣ овард

Сафорати Русия дар Кобул хабар дод, ки ҳавопаймои ин кишвар рӯзи 1-уми декабр шаҳрвандони кишварҳои узви Созмони Паймони Амнияти Дастҷамъӣ ё ОДКБ-ро аз Кобул берун меорад. Маълум нест, ки оё дар миёни мусофирон шаҳрвандони Тоҷикистон ҳам хоҳанд буд ё на.

Ба узвияти созмон Арманистон, Беларус, Қазоқистон, Русия ва Тоҷикистон шомиланд.

Моҳи август, баъди сари қудрат омадани “Толибон” дар Афғонистон, Русия бисёре аз шаҳрвандони кишварҳои узви СПАД-ро аз Афғонистон берун бурда буд.

Ба навиштаи хабаргузории ТАСС, дар ҳавопаймо инчунин донишҷӯёни афғонистонии муҳассили мактабҳои олии Русия ва шаҳрвандони Русия ҷой дода мешаванд.

Бори охир ҳавопаймои русӣ рӯзи 18-уми ноябри имсол аз Афғонистон беш аз 200 шаҳрванди Русия, Арманистон, Беларус, Украина ва Афғонистонро берун овардааст.

Дар хабар гуфта шудааст, ки ҳавопаймо ба Кобул 36 тонна ёрии башардӯстона низ хоҳад бурд.

Соҳибкорони қазоқ аз мақомот ҳимояти манфиатҳояшонро талаб доранд

Яке аз шоҳроҳҳои Қазоқистон.

Гуруҳи соҳибкорони Қазоқистон, ки мехоҳанд аз ширкати озарии "СПИК Аккорд" 168 миллион танга (ҳудуди 385 ҳазор доллар) қарзи худро рӯёнанд, 29-уми ноябр дар назди ҳукумати вилояти Оқтеппа ҷамъ шуданд.

Соҳибкорон аз мақомоти Оқтеппа даъват карданд, ки манфиатҳои онҳоро ҳимоят ва мулоқот бо раиси ноҳияи Бойғанини вилоят Ундасин Оразалинро баргузор намоянд.

Ба гуфтаи соҳибкорон, сокинони ноҳия соли 2019 ба ширкати озарӣ, ки шоҳроҳи Оқтеппа-Астраханро бозсозӣ мекард, техникаҳои гуногунро ба иҷора доданд, вале ширкат пули иҷораи онҳоро напардохтааст.

Ин ширкат барои таъмири роҳ аз ҳукумати Қазоқистон ҳудуди 9 миллиард доллар маблағ дарёфт карда буд, вале намояндагони ширкат соли гузашта корро ба поён нарасонида, Қазоқистонро тарк карданд.

Соҳибкорони қазоқ мегӯянд, ширкати "СПИК Аккорд"-ро ба додгоҳ кашиданд, вале ду сол мешавад, наметавонанд қарзи худро рӯёнанд.

Талошҳои барои тамос бо намояндагони "СПИК Аккорд" бенатиҷа буданд.

Президенти Узбекистон дастур дод, ки "ток-шоу"-ҳоро назорат кунанд

Президенти Узбекистон, Шавкат Мирзиёев, рӯзи 23-юми ноябри имсол дар ҷараёни сафари корияш ба ноҳияи Шайхонтоҳури вилояти Тошканд ба муовини сарвазири ин кишвар дастур додааст, ки барномаҳои ток-шоуи баъзе аз телевизионҳоро таҳти назорат гирад.

Раҳбари бунёди "Нуронӣ" Рустам Калонов дар ҷараёни мулоқоти Мирзиёев бо фаъолони Шайхонтоҳур аз сифати баъзе аз барномаҳои телевизионҳои Узбекистон шикоят кардааст.

"Ҷаноби президент, мехоҳам, таваҷҷуҳи шуморо ба барномаи "Mahallada duv-duv gap" дар телевизиони "Sevimli" ҷалб кунам. Он мухолифи расму ойини мост. Ман ҳайронам, ки чӣ гуна онро бо аъзои хонавода тамошо мекунанд. Агар онҳо мушкили маҳалларо ҳал карданӣ ҳастанд, бигузор дар ҷояш рафта, ҳал кунанд. Як барномаи дигар бо номи "Yor-yor" аст, ки дар он зан шавҳар ва мард ҳамсар мекобанд," - изҳор дошт ӯ.

Ба иттилои сомонаи Kun.uz, Мирзиёев баъди муроҷиати Калонов ба муовини сарвазири ин кишвар дастур додааст, ки ин гуна барномаҳоро таҳти назорат қарор диҳад.

Дар пайи бодҳои сахт дар Туркия чор нафар ҷон дод

Боди сахт дар Истанбул, ки макони зисти 15 миллион нафар аст, бебандубории зиёд эҷод кард

Дар пайи бодҳои сахти рӯзи 29-уми ноябр дар шаҳри Истанбул ва атрофи он, чор нафар, аз ҷумла як шаҳрванди хориҷӣ ҷон дода, 19 нафари дигар осеб дидаанд.

Мақомоти Истанбул рӯзи 30-юми ноябр гуфтанд, ки суръати бод дар шаҳри соҳилӣ то 130 километр дар соат мерасид. Раёсати обу ҳавосанҷии Туркия гуфт, рӯзи сешанбе эҳтимоли ба шаҳрҳои дигари Туркия, ба монанди Измир, рафтани бодҳои сахт вуҷуд дорад.

Ба иттилои расмӣ, аз миёни осебдидаҳо се нафар дар ҳолати вазнин ҳастанд.

Дар наворҳое, ки тавассути телевизиону шабакаҳои иҷтимоӣ паҳн шуданд, саҳнаҳои афтодани бурҷи баландошёнае дар соҳилҳои Истанбул ва канда шудани боми биноҳо дида мешавад.

Ширкати ҳавопаймоии Туркия гузориш дод, ки нақшаҳои парвоз тағйир ёфта, роҳ ба соҳили баҳр баста шудааст.

Маскав гуфт, ба сохтмони 5 мактаби русӣ дар Тоҷикистон $150 миллион медиҳад

Алексей Оверчук, муовини нахуствазири Русия. Арманистон, сентябри соли 2021

Як мансабдори баландпояи Русия гуфт, ин кишвар барои бунёди панҷ мактаби русизабон дар Тоҷикистон 150 миллион доллар ҷудо кардааст. Ба иттилои расмӣ, дар ҳар яке аз ин мактабҳо тахминан 1200 нафар таҳсил хоҳанд кард.

Хабаргузории русии ТАСС навишт, Алексей Оверчук, муовини нахуствазири Русия, ки 30-юми ноябр ба шаҳри Душанбе омад, аз яке аз маҳалҳои сохтмони мактаби нав дидан кардааст.

Ӯ гуфт, дар ин мактабҳо омӯзгорон аз Русия омада, дарс медиҳанд ва барномаи таълимиро мутобиқ бо барномаи таълимии Тоҷикистон таҳия хоҳанд кард. Моҳи апрели соли 2019 миёни Тоҷикистон ва Русия созишномаи сохтмон ва таъмини моддиву фаннии панҷ мактаби русӣ дар шаҳрҳои Душанбе, Хуҷанд, Бохтар, Кӯлоб ва Турсунзода имзо шуд.

Александр Бугаев, муовини вазири маорифи Русия дар сафараш ба Душанбе, рӯзи 30-юми ноябр гуфтааст, дар доираи барномаи “Омӯзгори рус дар хориҷа” донишгоҳи омӯзгории Алтай мутахассисонашро барои кор аз рӯи ин тарҳ омода мекунад, то ба Тоҷикистон омада кор кунанд.

Қарори ба Тоҷикистон фиристодани омӯзгорони Русия дар музокироти президентони ду кишвар – Эмомалӣ Раҳмон ва Владимир Путин дар Душанбе моҳи феврали соли 2017 гирифта шуд ва августи ҳамон сол нахустин гурӯҳи 29-нафарии омӯзгорон ба Душанбе омаданд.

Соли 2018-2019 шумори омӯзгорони Русия 55 нафарро ташкил дод. Ин омӯзгорон асосан мутахассисони забон ва адабиёти рус ҳастанд, вале дар миёни онҳо омӯзгорони фаннҳои дигар, аз ҷумла, математика, физика, кимиё низ мебошанд.

Дар Душанбе ҳамкориҳои ОМ ва Корея баррасӣ мешавад

Мулоқоти Вазири корҳои хориҷии Кореяи Ҷануби Чон Ий Ён бо ҳамтои тоҷикаш Сироҷиддин Муҳриддин

Рузи 30-юми ноябр дар шаҳри Душанбе Форуми 14-уми ҳамкории Осиёи Марказӣ ва Кореяи Ҷанубӣ оғоз шуд, ки дар он вазирони корҳои хориҷии ин кишварҳо иштирок доранд. Ин ҳамоиш бо ҳадафи густариши ҳамкориҳои оянда ва рушди муштараки Кореяи Ҷанубӣ ва Осиёи Марказӣ баргузор мешавад. Дар чаҳорчуби ин форум ва сафараш ба Душанбе рӯзи 29-уми ноябр Вазири корҳои хориҷии Кореяи Ҷануби Чон Ий Ён бо Эмомалӣ Раҳмон, раиси ҷумҳури Тоҷикистон мулоқот кард. Сайти президенти Тоҷикистон менависад, ки Эмомалӣ Раҳмон дипломати кореягиро барои кӯмаки ин кишвар ба Тоҷикистон дар давраи пандемияи коронавирус ташаккур кардааст.

Дар ҷараёни сафари расмии вазири корҳои хориҷии Кореяи Ҷанубӣ Чон Ий Ён ба Тоҷикистон, Протокол оид ба ворид намудани тағйирот ба Эъломияи байни Тоҷикистон ва Корея “Оид ба канорагирӣ аз андозбандии дукарата” ба имзо расид. Вазорати корҳои хориҷии Тоҷикистон рӯзи 29-уми ноябр навишт, ки дипломати калони кореягӣ дар садри як ҳайат бо ҳадафи анҷоми як сафари расмӣ дар Тоҷикистон ва ҳам ширкат ҳамоиши “Осиёи Марказӣ - Ҷумҳурии Корея” ба Душанбе сафар кардааст.

Дар ҷараёни дидору гуфтугӯҳои президенти Тоҷикистон Эмомалӣ Раҳмон бо вазири корҳои хориҷии Корея Чон Ий Ён, дар баробари масоили дигар, вазъ дар Афғонистон ва дигар масоили байналмилалӣ баррасӣ шудааст.

Кореяи Ҷанубӣ – кишваре дар Осиёи Шарқӣ ва мустақар дар нимҷазираи Корея яке аз давлатҳои босуръат пешраванда ба ҳисоб меравад ва дар даҳсолаҳои охир ба макони кору муҳоҷирати хориҷиҳои зиёд, аз ҷумла тоҷикистониҳо табдил шудааст. Садҳо тоҷикистонии муқими Корея бештар ҷавонону донишҷӯён ваё муҳоҷирони кориро ташкил медиҳанд. Тоҷикистон бо ин ки соли 1992 бо Кореяи Ҷанубӣ ҳамкориҳои дипломатӣ барпо кардааст, ҳамкориҳои наздиктари миёни ду кишвар тано дар чанд соли охир эҳсос мешавад. Умеди Тоҷикистон аз ин ҳамкориҳо пеш аз ҳама сармоягузорӣ ба иқтисоди кишвар ва фаъол шудани созишномаи муҳоҷирати корӣ аст. Созишномаи фароҳамкунандаи шароити кор барои шаҳрвандони Тоҷикистон дар Кореяи Ҷанубӣ, ки сӯҳбаташро мақомот чанд соли пеш шурӯъ карданд, то ҳанӯз ниҳоӣ нашудааст ва шаҳрвандони Тоҷикистон ҳамоно вобастаи бозори кори Русия мемонад.

Иқтисодшиносон мегӯянд, мизони додугирифти молу коло ҳам миёни ду кишвар дар сатҳи поин аст – 25,5 миллион доллар, ки бештар аз ҳисоби маҳсулоти аз Корея ба Тоҷикистон воридшаванда ҳисоб шудааст. Тобистони соли гузашта раҳбари Кумитаи сармоягузорӣ ва амволи давлатии Тоҷикистон гуфт, ки бо сабаби пандемияи коронавирус мувофиқаҳои қаблан ҳосилшуда миёни Тоҷикистону Кореяи Ҷанубӣ барои сармоягузорӣ дар ҳафт тарҳ бо маблағи умумии 320 миллион доллар муаллақ мемонад. Яке аз ин тарҳҳо бунёди корхонаи истеҳсоли мошинҳои барқиро дар назар мегирад.

КМИР Қирғизистон гуфт, ҳангоми нашри натиҷаҳои интихобот "иштибоҳ" шудааст

Назди Комиссияи марказии интихобот ва раъйпурсии Қирғизистон.

Комиссияи марказии интихобот ва раъйпурсии Қирғизистон (КМИР) 30 ноябр иштибоҳе, ки 28 ноябр дар сомонаи ин ниҳод ҳангоми шумориши овози иштирокдорони интихоботи порлумонӣ рух дода буд, шарҳ додааст.

Бино ба иттилои комиссия, "ҳеч кас имкони дастрасӣ ба сервер ва низоми раъйдиҳиро надорад" ва ҳамчунин дахолати инсонӣ дар низоми худкори иттилоотии марбут ба раъйдиҳӣ номумкин аст.

Ба гуфтаи масъулони комиссия, мутахассиси КМИР он рӯз ҳангоми нашри натиҷаҳои пешакӣ дар сомона иштибоҳан рақамҳоро дучанд нишон додааст ва каме дертар ин иштибоҳ ислоҳ шудааст.

КМИР Қирғизистон аз аҳзоби сиёсии ин кишвар даъват кардааст, ки ба якдигар "шубҳа" накунанд.

Дар Қирғизистон 28 ноябр интихоботи порлумонӣ баргузор шуд. Ҳизбҳои мухолифи Қирғизистон натиҷаҳои пешакии интихоботи парлумонии ин кишварро, ки рӯзи якшанбе барпо шуд, рад карда Комиссиюни марказии интихоботро дар тақаллуб айбдор намуданд.

Шоми 28-уми ноябр дар як нишасти хабарӣ дар Бишкек раҳбарони чор ҳизби сиёсӣ – “Отамакон”, ҳизби “Озодӣ”, сотсиал-демократҳо ва ҳизби “Ваҳдати қавмҳо” аз мақомот талаб карданд, ки натиҷаҳои интихоботро бекор ва интихоботи навро барпо кунанд.

Мухолифон комиссиюни интихоботро дар он муттаҳам карданд, ки дар 40 дақиқае, ки монитори ҳисобу китоби овозҳо аз кор монд, овозҳо “дуздидаву” “тақаллуб шудаанд”. Мақомоти интихоботӣ гуфтанд, ки 122 ҳазор ё наздики 10 фоизи бюллетенҳо беэътибор дониста мешаванд.

"Омикрон": зуд сироят мекунад, вале ҳанӯз далели ба марг овардани вирус вуҷуд надорад

Созмони ҷаҳонии тандурустӣ ҳушдор дод, ки навъи “Омикрон”-и коронавирус аз назари сирояткунӣ бисёр босуръат буда, дар ҳолати олуда шудан ба он паёмадҳои бисёр сангине ҳам доштааст. Дар як изҳороташ рӯзи 29-уми ноябр ин ташкилоти вобаста ба СММ дар бораи хусусиятҳои “Омикрон”, ки онро коронавируси дар Африқои Ҷанубӣ ошкоршуда меноманд, хулосаҳои худро дар ин бора пешкаш намуд. Мутахассисони тиб мегӯянд, ки ин навъи вирус дар натиҷаи омезиши чандин навъи коронавирус пайдо шуда, тавони зӯр омадан бар масунияти одамро дорад ва хеле осон аз як кас ба каси дигар сироят мекунад.

Айни замон, ба иттилои мутахассисон, бо ин ки ин вирус бо суръати зуд дар кишварҳои гуногун паҳн мешавад, ҳодисаҳои марг бар асари он ба қайд гирифта нашудааст. Ҳоло ин вирус дар чандин кишвари аврупоӣ ошкор шудааст ва дар аксари ҳолатҳо аввалин манбаи сироят шахсоне будаанд, ки аз сафари Африқои Ҷанубӣ ё дигар кишварҳо омадаанд. Баъди Исроил Ҷопон гуфт, ки дарашро ба рӯи хориҷиҳо мебандад. Дар ИМА ва Аврупо гуфтанд, ки барои онҳое, ки аз Африқои Ҷанубӣ меоянд, иҷозаи ворид шудан ба кишвар дода намешавад.

Президенти ИМА Ҷо Байден, ки дишаб дар бораи шакли нави "Омикрон"-и коронавирус сӯҳбат мекард, гуфт, ки зимистони имсола дар кишвар маҳдудиятҳои иҷтимоӣ ҷорӣ намекунад, вале аз мардум тақозо кард, ки ҳатман зидди ковид эм карда шаванд. Ӯ гуфт, "ин навъи коронавирус боиси ташвиши мо аст, вале мо набояд воҳима кунем. Мо бояд бо он мубориза барем", гуфт Байден.

"Барои оташ задани Қуръон". Издиҳоме идораи полиси Покистонро оташ зад

29-уми ноябр, баъди ҳамлаи издиҳом

Полис дар шимолуғарби Покистон гуфт, садҳо нафаре, ки ба дасти онҳо супурдани марди гумонбар дар оташ задани Қуръонро талаб мекарданд, ба идораи полис ҳамла карда ин ва дигар посгоҳҳоро оташ заданд. Ҳодиса шоми 28-уми ноябр рух дод. Сухангӯи полиси ноҳияи Чорсаддаи Покистон ба Радиои Озодӣ гуфт, ки вақте полис талаби издиҳоми хашмолуди мардумро барои таслими марде, ки ӯро ба оташ задани Қуръон айбдор карданд, рад кард, ин тӯда ба хароб кардани идораи полиси маҳаллӣ даст зад. Сафӣ Ҷон, сухангӯи полис гуфт, чунин ба назар мерасад, ки марди гумонбаршуда дар оташ задани Қуръон як мӯътоди маводи мухаддир будааст. Манбаъҳои дигар ӯро мардн номидаанд, ки мушкили равонӣ дорад. Полис тавонист, ки ин мардро ба як макони амн интиқол диҳад.

Хабарнигорони Радиои Озодӣ мегӯянд, ки вазъ дар ноҳияи Чосадда ноором аст. Полис тахминан 20 нафарро бо иттиҳоми доман задани хушунат ва ҳамла ба идораи полис боздошт кард. Аз ноҳияҳои ҳамсояи Мардон ва Навшера ҳам ходимони иловагии ҳифзи қонун барои тақвияти амният ба Чорсадда фиристода шуданд.

Дар Покистон, ки бисёр мардумаш мутаассиб аст, ба масъалаҳои мисли тавҳин ба муқаддасони исломӣ бо ҳассосияти зиёд муносибат мекунанд ва ҳатто дар ҳолати исботношуда будани амали шахсе бе ин ки кори ӯ таҳқиқ шавад, бисёр шудааст, ки издиҳоми хашмолуду бераҳми мардум то марг он нафарро латукӯб мекунад ваё оташ мезанад. Мунаққидон мегӯянд, ки дар Покистон бисёр вақт қонунҳои марбут ба тавҳин худсарона ва бо мақсадҳои шахсӣ ҳам иҷро мешавад.

Ҳомиёни ҳуқуқ: Мақомот ба наздикони Ризоев иҷоза намедиҳанд, ки ӯро бинанд

Абдулмаҷид Ризоев, ҳуқуқшиноси зиндонии тоҷик

Ҳомиёни байнулмилалии ҳуқуқи башар аз сарнавишти вакили мудофеи зиндонӣ, Абдулмаҷид Ризоев, дар Тоҷикистон изҳори нигаронӣ кардаанд. Ба гуфтаи онҳо, наздик ба чаҳор моҳ аст, ки мақомот ба наздикони Ризоев иҷоза намедиҳанд, бо ӯ мулоқот кунанд.

Абдумаҷид Ризоев бо гуноҳи "даъвати оммавӣ ба фаъолияти ифротӣ бо истифода аз матбуот ё шабакаи интернет" гунаҳкор ва ба 5,5 сол зиндон маҳкум шудааст. Худи Ризоев ба бегуноҳияш таъкид карда, гуфтааст, ҳеч гоҳ андешаҳои ифротиро пуштибонӣ накардааст.

Созмони Ҳамкории байналмилалӣ барои ҳуқуқи инсон (International Partnership for Human Rights) мегӯяд, Ризоев аз 11-уми августи имсол имкони дидорбиниро бо ҳеч як вакилаш надорад ва аз 4-уми сентябри имсол ба ин тараф ба наздиконаш иҷоза нашудааст, ки бо ӯ мулоқот кунанд.

Созмони Ҳамкории байналмилалӣ барои ҳуқуқи инсон аз он изҳори нигаронӣ кардааст, ки набудани имкони дидорбинии Ризоев бо наздикону ҳомиёнаш, нигарониро дар бораи шиканҷаву бадрафторӣ нисбати ӯ бештар мекунад. Ин созмон мегӯяд, "Ризоев барои ҳаққи озоди баёни андешааш зиндонӣ шуд ва бояд бидуни шарт ва билофосила озод карда шавад".

Мақомот то кунун ба ин изҳороти созмони Ҳамкории байналмилалӣ барои ҳуқуқи инсон дар робита ба Абдулмаҷид Ризоев вокуниш нишон надодаанд. Вале масъулони Идораи зиндонҳо рӯзи 30-юми октябр ба вакили мудофеи Абдумаҷид Ризоев хабар додаанд, ки ӯ дар утоқи ҷаримавӣ аст, чунки гуё қоидаи маҳбасро вайрон кардааст. Вале маълум нест, чӣ ҳодиса рух додааст ва то куҷо ба ӯ имкон доданд, ки аз худ дифоъ кунад.

Зиндониҳое, ки дар утоқи ҷаримавӣ ҷой дода мешаванд, аз ҳаққи тамоси телефониву дидорбинӣ бо наздиконашон маҳрум ҳастанд.

Рӯзи 26-уми ноябри имсол гузоришгари вижаи Созмони Милал оид ба ҳуқуқи инсон дар тамосаш бо мақомоти Тоҷикистон аз сарнавишти Ризоев ва ҳам зиндонӣ шудани ӯ изҳори нигаронӣ карда буд.

Медведев гуфт, аз афзоиши ҷинояткорӣ миёни муҳоҷирон дар Русия нигаронанд

Дмитрий Медведев.

Мақомоти рус гуфтанд, аз афзоиши ҷинояткорӣ дар миёни муҳоҷирон нигарон ҳастанд. Дар ин бора Дмитрий Медведев, муовини раиси Шӯрои амнияти Русия рӯзи душанбе дар як нишаст бахшида ба масъалаи муҳоҷират ибрози назар кард. Дар ин нишаст Медведев ба зарурати таҳияи тадбирҳои иловагӣ барои таъмини амният дар Русия даъват намуд.

"Бисёре аз шаҳрвандони хориҷӣ дар кишвари мо то ҳол қоидаҳои будубошро вайрон мекунанд. Онҳо аз назорати сохторҳои давлатӣ берун мемонанд, аксар вақт аз тариқи ҳамватанони худашон ба дом меафтанд ва туъмаи созмонҳои ифротгаро ва террористӣ мешаванд",-гуфт Дмитрий Медведев.

Муовини раиси Шӯрои амнияти Русия ҳамчунин гуфт, мақомоти Русия набояд ба пайдо шудани анклавҳои этникӣ дар қаламрави ин кишвар иҷозат диҳанд, чун ба гуфтаи ӯ, ин кор метавонад заминаҳои ҷинояткориро ба вуҷуд орад. Ин мақоми Русия аз ин беш шарҳ надод, ки пайдо шудани анклавҳои этникӣ дар Русия чигуна барои афзоиши ҷинояткорӣ заминаро фароҳам мекунад.

Русия мизбони чанд миллион муҳоҷир аз кишварҳои пасошӯравӣ аст. Аз ҷумла, солона аз Тоҷикистон ҳудуди як миллион нафар барои кору даромад ба Русия мераванд. Ҳомиёни ҳуқуқ аз нақзи густурдаи ҳуқуқи муҳоҷирон дар Русия борҳо интиқод кардаанд.

Михаил Саакашвилӣ бори аввал дар додгоҳ ҳузур пайдо кард

Президенти пешини Гурҷистон Михаил Саакашвилӣ, ки ибтидои моҳи октябри соли ҷорӣ, баъди баргаштан ба кишвараш боздошт шуда буд, рӯзи душанбеи 29 ноябр дар додгоҳ ҳузур пайдо кард. Ӯро аз бемористони низомӣ ба додгоҳ оварданд. Саакашвилӣ баъди берун шудан аз гуруснашинии якмоҳа дар бемористони низомӣ табобат мегирифт.

Президенти пешини Гурҷистонро дар доираи парвандае боздошт карданд, ки қаблан нисбати вай боз шудаву дар доираи он ҳукми боздошташро додгоҳ ғоибона содир карда буд. Саакашвилиро дар сӯистифода аз қудрат ҳангоми парокандасозии эътирози 7 ноябри соли 2007 ва мусодираи дороии тоҷир Бадрӣ Патаркатсишвлӣ айбдор мекунанд. Президенти пешин ин айбҳоро рад мекунад. Саакашвилӣ пеш аз шуруи муҳокима рӯзи душанбе гуфт, додситонӣ ва низоми додгоҳии Гурҷистонро эътироф намекунад.

Президенти пешин талаб кард, ки ӯро дар додгоҳ ҳозир кунанд. Пештар мақомот ба далелҳои амниятӣ ҳузури шахсии ӯро дар додгоҳ иҷозат намедоданд. Аммо дар натиҷаи талаби кишварҳои Ғарбӣ Саакашвилро ба додгоҳ оварданд.

Ҷонибдорони Саакашвилӣ пушти дари додгоҳ дар шаҳри Тифлис ҷамъ шуданд. Дар натиҷа байни сокинон ва пулис занозанӣ сурат гирифт. Чанд нафар аз сӯи пулис боздошт шуд.

Саакашвилӣ дар натиҷаи инқилоб сари қудрат омад ва то соли 2012 Гурҷистонро роҳбарӣ карда буд. Баъди анҷоми муҳлати президентӣ вай кишварашро тарк кард. Мақомоти нави Гурҷистон шаҳрвандии ӯро бекор ва нисбаташ парванда боз карданд. Вай дар моҳи октябри соли ҷорӣ бо ҳадафи ҷонибдорӣ аз мухолифи ҳукумати Гурҷистон вориди кишвар шуд. Мақомоти Гурҷистон ӯро ба маҳзи ворид шудан боздошт карданд.

Қатли бераҳмонаи донишҷӯдухтар дар Туркманистон

Акс аз бойгонӣ.

Дар шаҳри Туркманободи Туркманистон рӯзи 26 ноябр ҷасади як донишҷӯ дар манзили зисташ пайдо шуд. Аз пулиси Туркманобод гуфтанд, ӯро пеш аз қатл таҷовуз кардаанд.

Ба иттилои пулис, дар ҷисми вай панҷ зарби корд мушоҳида шудааст. Мақомот гуфтанд, донишҷӯи кушташуда дар яке аз донишгоҳҳои Туркманистон дар соли севум таҳсил мекард.

"Қатли донишҷӯ дар шаҳри Туркманобод боиси сару садоҳо шудааст. Мо умедворем, ки қотил пайдо карда мешавад", - гуфт як сокини Туркманобод.

Дар моҳи июли соли ҷорӣ дар шаҳри Дашоғуз чунин як куштори дигар сурат гирифта буд. Он замон духтари 19-сола, ки вай низ донишҷӯ буд, бо зарби табар кушта шуд. Пулис қотилро пайдо карда буд.

Дар Намангон музокироти марзии Тоҷикистону Узбекистон доир шудааст

Марзи Тоҷикистон ва Узбекистон.

Дар шаҳри Намангони Узбекистон нишасти навбатии гурӯҳҳои кории Комиссияи муштараки аломатгузории марзи Тоҷикистон ва Узбекистон баргузор шудааст. Вазорати корҳои хориҷии Тоҷикистон иттилоъ дод, ки ин гуфтугӯҳо аз 22 то 27 ноябр доир гардид.

Ба иттилои манбаъ, дар гуфтушунидҳо корҳои аломатгузорӣ баррасӣ ва "пешниҳодҳои бо якдигар мувофиқашуда оид ба лоиҳаи хатти аломатгузории марзи Тоҷикистону Ӯзбекистон омода карда шуданд".

Вазорати корҳои хориҷии Тоҷикистон мегӯяд, ки пас аз анҷоми гуфтугӯҳо протокол имзо шуд. Вохӯрии навбатии корӣ дар Тоҷикистон баргузор мешавад. Замони дақиқи ин вохӯрӣ эълон нашудааст.

Тоҷикистон ва Узбекистон 1300 километр марзи муштарак доранд, ки ҳудуди 90 дарсади он таъйину аломатгузорӣ шудааст.

Эътирозгарони назди консулгарии Чин дар Қазоқистон боздошт шуданд

Пулиси шаҳри Алмато шаш нафареро, ки 29-уми ноябр бо талаби раҳоии наздиконашон аз боздоштгоҳҳои Шинҷон дар назди консулгарии Чин дар Қазоқистон даст ба тазоҳуроти бидуни муҳлат заданд, боздошт кардааст.

Фаъоли мадании қазоқ Байболат Кунболатулӣ аз ҷараёни боздошти эътирозгарон навореро дар шабакаи иҷтимоии "Фейсбук" нашр кардааст.

"Маъмурони пулис пешакӣ хабар доштаанд, ки меоем ва омодагӣ дидаанд. Вақте аз мошин пиёда шудем, зуд моро боздошт карда, ба мошини худашон савор карданд. Онҳо аз нерӯ кор гирифтанд ва дар натиҷа дасти ман осеб дид. Ангуштам сахт дард мекунад. Табибро даъват карданд", - гуфт яке аз эътирозгарони боздоштшуда бо номи Гулпии Казибек.

Ба гуфтаи ӯ, маъмурони пулис телефонҳои ҳамаи дастгиршудаҳоро мусодира кардаанд.

Иқдоми қазоқтаборон пушти дари консулгарии Чин дар шаҳри Алмато 8 феврали соли ҷорӣ шуруъ шуд. Бархе аз онҳо мегӯянд, пайвандони онҳоро дар Чин дар "урдугоҳҳои бозтарбияи Шинҷон нигаҳдорӣ мекунанд".

Бархеи дигар иддао доранд, ки пайвандонашон дар Чин бе айбу асосе ба солҳои тӯлонӣ зиндонӣ шудаанд. Гуруҳи севум даъво доранд, ки мақомоти Чин ҳуҷҷатҳои пайвандонашонро мусодира карда, ба онҳо иҷозаи тарки Чинро намедиҳанд.

Захмӣ шудани 18 кас аз таркиши газ дар Тошканд

Акс аз бойгонӣ.

Субҳи 29-уми ноябр дар натиҷаи таркиши газ дар хобгоҳи ширкати "Узмилл" дар ноҳияи Сергелии Тошканди Узбекистон сӯхтор ба амал омадааст.

Ба огаҳии Вазорати ҳолатҳои фавқулодаи Узбекистон, ҳангоми таркиш дар маҳалли ҳодиса 43 корманд ҳузур доштанд ва 18 нафарашон ба беморхона интиқол дода шудаанд. Дар ҳоли ҳозир маълум нест, ки таркиш талафоти ҷонӣ дар пай дорад, ё не.

Барои муайян кардани сабабҳои рух додани ҳодиса бо раҳбарии муовини аввали додситони Тошканд гуруҳи фаврӣ-тафтишотӣ таъсис ёфтааст.

Бино ба маълумоти пешакӣ, дар натиҷаи нуқс доштани лӯла гази табиӣ дар дохили бино ҷамъ ва боиси сар задани таркиш шудааст.

Қудратҳои ҷаҳонӣ гуфтугӯи ҳастаӣ бо Эронро дубора оғоз мекунанд

Интизор меравад, имрӯз, 29 ноябр дар шаҳри Вена гуфтугӯҳо барои эҳёи созиши ҳастаӣ бо Эрон, ки соли 2015 ҳосил шуда буд, аз сар гирифта шаванд. Муовини вазири умури хориҷии Эрон Алӣ Боқирӣ 28-уми ноябр дар ин бора бо расонаҳои ин кишвар баъди мулоқот бо раҳбарони ҳайатҳои Чину Русия ва намояндаи Иттиҳоди Аврупо Энрике Мора суҳбат кардааст. "Муҳлати ин давраи гуфтугӯро пешгӯӣ кардан номумкин аст. Шояд, чаҳорчӯба ва давраи муваққатии ин гуфтугӯ муайян карда шавад",-изҳор доштааст Боқирӣ. Дар гуфтугӯҳо кишварҳое, ки ҳанӯз дар созишнома иштирок доранд, аз ҷумла Русия, Чин, Эрон, Олмон, Фаронса ва Бритониё ширкат мекунанд. Ҳайати ИМА ба раҳбарии намояндаи махсуси Амрико дар умури Эрон Роб Мэллӣ ғайримустақим иштирок хоҳад кард.

Австрия 15 қочоқчии инсонро боздошт кард

Муҳоҷирони ғайриқонунӣ дар сарҳади Полшаву Беларус

Мақомоти Австрия як гурӯҳи қочоқчиёни инсонро ошкор карданд, ки дар интиқоли ғайриқонунии садҳо муҳоҷирон тавассути хоки Балкан ба Аврупо гунаҳгор мешаванд. Полис дар вилояти Австрияи поёнӣ хабар дод, ки дар чанд рӯзи гузашта 15 нафарро бо гумони қочоқи инсон боздошт карданд ва инҳо шаҳрвандони Молдова, Украина ва Узбекистон мебошанд. Полис гуфт, ки ба иттилои пешакӣ, ин гурӯҳ мардумро аз сарҳадҳои Сербияву Венгрия баъдан тавассути Словакия ба Ҷумҳурии Чех ва Австрия интиқол медод. Аксари муҳоҷирони ғайриқонунӣ шаҳрвандони Лубнон, Миср ва Сурия мебошанд. Бисёри онҳо бо мақсади ба Олмон расидан вориди Аврупо мешаванд. Полис гуфт, ки ин шабакаи азими қочоқчиён 700 нафарро ба Аврупо ворид карда, аз ҳар як нафарашон аз 4 то 5 ҳазор евро пул гирифтааст. Даромади умуми ин гурӯҳ 2,5 миллион евроро ташкил додааст.

Президенти Чех, ки ба COVID олуда шудааст, аз хонаи шишаӣ нахуствазири навро таъин кард

Петр Фиала нахуствазири нави Ҷумҳурии Чех шуд

Дар Ҷумҳурии Чех маросими таъини нахуствазири нав барпо шуд. Рӯзи якшанбе, 28-уми ноябр президенти ин кишвар Милош Земанро, ки чанд рӯз пеш ба COVID-19 олуда шуд, ба маросим оварданд. Земан дар маросими таъини нахуствазири нави Ҷумҳурии Чех Петр Фиала иштирок кард. Земан, ки давоми шаш ҳафтаи пеш аз ин дар беморхона аз дардҳои дигар муолиҷа гирифтааст, ба коронавирус мубтало шуд. Ӯро дар маросими таъини нахуствазир дохили як қуттӣ ё хонаи шишаӣ савори аробача нигоҳ доштанд. Ба маросими таъини сарвазири нави кишвар ӯро тими кормандони тиббӣ бо риояи тамоми меъёрҳои бехатарии тиббӣ оварда буданд. Фиала эътилофи панҷ ҳизби марказ ва ростгарои оппозитсиониро раҳбарӣ мекунад. Ӯ дар интихоботи моҳи октябри имсол бар нахуствазир Андрей Бабиш ва эътилофи ӯ пирӯз шуд. Мубориза бо мавҷи нави коронавирус, ки ба мушкили рақами яки беморхонаҳо табдил шудааст ва ҳам муқобила бо бӯҳрони энержӣ аз вазифаҳои асосии ҳукумати Фиала хоҳад шуд.

Туркманистон, Озарбойҷон ва Эрон созишномаи калони газро имзо карданд

Се кишвари соҳили баҳри Каспий ё Хазар созишномаи калони газро имзо карданд. Матбуоти Эрон хабар дод, ки дар ҳошияи ҳамоиши иқтисодие, ки дар шаҳри Ишқободи Туркманистон баргузор шуд, рӯзи 28-уми ноябр Эрон, Озарбойҷон ва Туркманистон созишномаи интиқоли 2 миллиард метри кубӣ газро дар як сол имзо карданд. Ҷавод Авҷӣ, вазири нафти Эрон ба матбуоти кишвараш гуфтааст, ки бар асоси ин созишнома, Эрон аз Туркманистон гази табиӣ дарёфт мекунад ва ҳамин миқдор газро ба Озарбойҷон медиҳад. Вазири нафти Эрон ба журналистон гуфтааст, ки бар асоси созишномаи сеҷониба, Туркманистон ҳамарӯза 5 то 6 миллион метри кубӣ газро ба Озарбойҷон медиҳад.

Авҷӣ инчунин гуфт, ки Эрон дар талоши ҳал кардани як баҳси дарозмуддати қарзи газ бо Туркманистон аст. Соли 2016 Ишқобод иддао кард, ки Эрон барои гази аз Туркманистон ба даст овардааш 1,5 миллиард доллар қарздор аст. Эрон бо ин омор розӣ нашуд. Вазири эронӣ гуфт, ки кишвараш базудӣ ба Туркманистон бахши аввали қарзашро бармегардонад.

Нахустин муроҷиати Мулло Охунд - раҳбари "Толибон"

Мулло Охунд

Нахуствазири “Толибон” баъди беш аз се моҳи ғасби қудрат дар Афғонистон аввалин бор бо як суханрониаш аз худ дарак дод ва гуфт, ки ҳукуматаш хостори равобити нек бо кишварҳои дигар буда, аз паи ҳалли мушклоти иқтисодӣ мебошад. Ҳаммуассиси “Толибон” Мулло Муҳаммад Ҳасан Охунд дар як паёми садоӣ, ки рӯзи 27-уми ноябр дар телевизиони давлатӣ нашр шуд, дар бораи масоили зиёд сӯҳбат кард. Суханронии ӯ 30 дақиқа давом кард ва ӯ гуфт, “Мо тамоми кишварҳоро итминон медиҳем, ки ба корҳои дохилии онҳо дахолат намекунем ва хостори робитаҳои хуби иқтисодӣ бо онҳо ҳастем”. “Толибон” баробари тарки Афғонистон кардани нирӯҳои байналмилалӣ ба раҳбарии Амрико қудратро дар ин кишвар ба дасти худ дароварданд ва Мулло Охунд гуфт, ки “Толибон” ваъдаи худро иҷро карданд, ки он ҳам берун кардани нирӯҳои хориҷӣ аз Афғонистон ва ташкили ҳукумати исломӣ буд.

“Толибон” ҳоло дар талоши ин ҳастанд, ки баъди ду даҳсола ҷангҳову рӯёрӯиҳо як маъмурияти амалкунандае бисозанд. Ин кишвар ҳоло бо як бӯҳрони бисёр сахти молӣ, беқурбшавии пули миллӣ, бекорӣ ва ҳам иқтисоди варшикаста даст ба гиребон аст. Мулло Охунд дар муроҷиат ба ҷомеаи байналмилалӣ дархост кард, ки дар чунин шароит ба Афғонистон кӯмак кунанд.

Ҷо Байден дар бораи "Омикрон" маълумот хоҳад дод

Кохи Сафед гуфт, ки президенти ИМА Ҷо Байден дар бораи навъи нави коронавирус, ки бо номи “Омикрон” сабт шудааст, рӯзи 29-уми ноябр хабар медиҳад. Ин дар ҳолест, ки чанд кишвари аврупоӣ аллакай хабар доданд, ки дар қаламрави онҳо навъи нави COVID-19 ошкор шудааст. “Омикрон”-ро коронавируси ошкоршуда дар Африқои Ҷанубӣ меноманд ва ин навъи вирусро бо хусусияти бисёр зуд сироят шуданаш хатарнок арзёбӣ мекунанд. Тарси мақомот ва донишмандон ин аст, ки “Омикрон” ба воксинаҳои зидди коронавирус тобовар буда, метавонад шахси эмшударо ҳам сироят кунад. Вале ҳамоно ин навъи вирус дуруст омӯхта нашудааст. Мақомот дар Африқои Ҷанубӣ гуфтанд, ки дар кишвари онҳо бисёр беморшудаҳо ҷавонон мебошанд.

Сироятшиноси калони амрикоӣ Энтони Фаучи дар як сӯҳбаташ бо президент Ҷо Байден дирӯз гуфт, ки барои ба даст овардани иттилои пурраву фарогир дар бораи “Омикрон” ду ҳафта вақт лозим мешавад.

Мухолифони Қирғизистон натиҷаҳои интихоботро эътироф намекунанд

Раҳбарони мухолифон дар ҷараёни нишасти матбуотӣ

Ҳизбҳои оппозитсионии Қирғизистон натиҷаҳои пешакии интихоботи парлумонии ин кишварро, ки рӯзи якшанбе барпо шуд, рад карда Комиссиюни марказии интихоботро дар тақаллуб айбдор намуданд. Шоми 28-уми ноябр дар як нишасти хабарӣ дар Бишкек раҳбарони чор ҳизби сиёсӣ – “Отамакон”, ҳизби “Озодӣ”, сотсиал-демократҳо ва ҳизби “Ваҳдати қавмҳо” аз мақомот талаб карданд, ки натиҷаҳои интихоботро бекор ва интихоботи навро барпо кунанд. Мухолифон комиссиюни интихоботро дар он муттаҳам карданд, ки дар 40 дақиқае, ки монитори ҳисобу китоби овозҳо аз кор монд, овозҳо “дуздидаву” “тақаллуб шудаанд”. Мақомоти интихоботӣ гуфтанд, ки 122 ҳазор ё наздики 10 фоизи бюллетенҳо беэътибор дониста мешаванд. Натиҷаҳои пешакии расмӣ мегӯяд, ки се ҳизби рӯ ба давлат барандаи калонтарини интихобот шуданд ва аз 90 курсии парлумон 54 ададаш насиби ҳукуматиҳо мешавад. Дар миёни онҳо ҳизбҳои “Отаҷӯрт”, “Эътимод” ва “Гармония” мебошанд, ки аз даҳуним то беш аз шонздаҳуним фоизи овозҳоро ба даст овардаанд. Се ҳизби дигари ба парлумони навбатӣ роҳёфта аз 5 то 8 фоизи овозҳоро гирифтаанд.

Ёфтҳои бештар

XS
SM
MD
LG