Хабари дигари марбут ба Украина мегӯяд, вазирони хориҷаи Амрикову Русия Ҷон Керрӣ ва Сергей Лавров рӯзи 5 март дар Порис роҳҳои ҳалли буҳрони Украинаро баррасӣ мекунанд. Лавров, ки қабл аз ин музокирот дар Мадрид сӯҳбат мекард, масъулияти ин буҳронро ба дӯши Ғарб бор кард, ки ба гуфтаи ӯ, дар Украина аз эътирозгароне, ки даст ба "хушунатҳои ваҳшиёна" мезананд, пуштибонӣ мекунад. Лавров гуфт, Маскав наметавонад ба афроди мусаллаҳ дар Қрим фармони бозгашт ба пойгоҳҳояшонро диҳад, чунки онҳо "нирӯҳои худдифоъ" ("самооборона") мебошанд, на нирӯҳои доимии артиши Русия.
Лавров ҳамчунин гуфт, салоҳияти даъвати нозирони байналмилалӣ ба Қрим дар дасти мақомоти ин нимҷазира ва давлати Украина аст.
Ва аммо вазири муваққати хориҷаи Украина Андрий Дешнитса гуфтааст, Киев хостори ҳалли сулҳомези буҳрон аст. Дешнитса, ки дар Порис баъди музокира бо ҳамтои фаронсавиаш Лоран Фабиус сӯҳбат мекард, гуфт, Украина хостори "равобити ҳамсоягӣ" бо Русия мебошад. Лоран Фабиус, ки қабл аз мулоқоти Керрӣ ва Лавров бо радиои Фаронса сӯҳбат мекард, гуфт, агар Русия танишҳои кунуниро рафъ накунад, ба хатари таҳримот рӯбарӯ хоҳад шуд: "Агар таниш рафъ нашавад, фардо таҳримот ҷорӣ хоҳад шуд - дар масъалаи виза, музокироти иқтисодии мавҷуда, ё дар мавриди ҳисобҳои бонкии шумори муайяне аз олигархҳо."
Нирӯҳои Русия дар Қрим ду баталйони Украинаро забт кардаанд
Дар ҳамин ҳол, хабарҳои расида аз Қрим мегӯянд, нирӯҳои Русия бахше аз шабакаи низоми зиддимушакии Украина дар ин нимҷазираро забт кардаанд. Интерфакс аз тасарруфи ду баталйони дифоъи зиддимушакии артиши Украина хабар медиҳад. Хабаргузории Франс Пресс аз қавли сухангӯи вазорати дифои Украина гуфт, бо ин ҳол, нуқтаи фармондеҳӣ ва маркази назорати пойгоҳи Евпатория таҳти назорати артиши Украина боқӣ мемонанд.
Ҳамзамон, бино ба гузоришҳои расида, пулиси Украина бинои ҳукумати вилояти Донетскро, ки эътирозгарони тарафдори Русия ишғол кардаанд, тарк мекунад. Бар боми ин бино дигарбора парчами Русияро афрохтаанд.
Русия баъди барканории раисиҷумҳури собиқи Украина Виктор Януукович дар таърихи 22 феврал бо баҳонаи ҳимоят аз шаҳрвандонаш дар Украина ҳарчӣ фаъолтару ошкортар вориди қазия мешавад.
Рӯзи 1 март Шӯрои федеросиюни парлумони Русия ба раиси ин ҷумҳурӣ Владимир Путин иҷозат дод, ки ба Украина нирӯ ворид кунад.
Путин рӯзи 4 март дар як нишасти хабарӣ гуфт, нирӯҳои Русия дар сурати зарурат истифода хоҳад шуд
