Дар бозии байни тимҳои Эрону Нигерия ҳисоб кушода нашуд. Шореҳони варзиш мегӯянд, баъди 4 рӯзи бозиҳои пур аз шавқу шӯр бо натиҷаҳои бисёр авқот ногаҳонии Ҷоми ҷаҳонӣ -2014, тимҳои Нигерия ва Эрон шаби 16 июн шояд дилгиртарин бозии ин мусобиқотро нишон доданд. Ин аввалин бозие буд, ки дар гол зада нашуд. Ва ҳам рақобати Эрону Нигерия аввалин бозие буд дар ин Ҷоми ҷаҳонӣ, ки мусовӣ анҷом ёфт.
Бар асоси арзёбии ФИФА, дар ин бозӣ тӯб 36 дарсад дар ихтиёри дастаи Эрон буд ва 64 дарсади дигар дастаи Нигерия тӯбро дар ихтиёри худ дошт. Эрон дар се маврид дарвозаи рақибашро нишон гирифт ва Нигерия низ шаш бор дарвозаи Эронро ҳадаф қарор дод. Дар ин бозӣ танҳо як корти зард дода шуд, ки он "насиб"-и Темуриён, бозигари дастаи Эрон шуд.
Бозии Эрон бо Нигерия бозии дувуми гурӯҳи F буд. Шаби қабл аз ин, Босния ва Аргентина аз ин гурӯҳ дар баробари ҳам қарор гирифтанд ва ёрони Месси бо ҳисоби 2:1 ҳарифонашонро шикаст доданд. То ин лаҳза Аргентина се имтиёз ва Эрон ва Нигерия ҳар кадом як имтиёз дарёфт кардаанд ва Босния ҳеҷ имтиёзе ба даст наовардааст. Дар даври баъдӣ рӯзи 21 июн дастаи Эрон бо Аргентина бо якдигар рақобат мекунанд.
Имшаб дар рӯзи панҷуми мусобиқоти гурӯҳии Ҷоми ҷаҳонии футбол -2014 дар Бразилия дар гурӯҳи H Олмон ба дидори Португалия рафта, дар гурӯҳи F Эрон бо тими Нигерия вориди рақобат хоҳад шуд. Бозии дувуми даври аввал дар гурӯҳи H байни дастаҳои Ғана ва Иёлоти Муттаҳидаи Амрико дар соатҳое доир мешавад, дар Тоҷикистон алакай субҳи 17 июн медамад.
Бозии Олмон бо Португалия соати 21 00 ба вақти Тоҷикистон ва бозии Эрон бо Нигерия соати 24 00 ба вақти Тоҷикистон ва бозии Ғана бо Амрико соати 03 00 оғоз мешаванд.
Тими Эрон, ки бо лақаби “Шерони Эрон” маъруф аст, дар ҳоле алайҳи тими “супер-уқоб”-ҳои кишвари африқоии Нигерия ба майдон медарояд, ки дар бозии якум дар ин гурӯҳ тими Аргентина ба раҳбарии Леонел Месси бар Босния ва Ҳерзеговина бо ҳисоби 2:1 ғолиб омад ва ҳоло бо 3 имтиёз пешсафи ин гурӯҳ аст.
Шабакаи телевизионии Евронюс пешбинӣ кардааст, ки Эрон бар Нигерия бо ҳисоби 2-1 пирӯз хоҳад шуд. Тими Эронро ба Ҷоми ҷаҳонӣ мураббии маъруфи португалӣ Карлуш Пейруш омода кардааст. Аз ситораҳои нисбатан маъруфи ин тим яке Ҷаводи Накӯном аст, ки бо 6 голи задааш дар роҳи дастёбии Эрон ба Ҷоми ҷаҳонӣ дар Бразилия нишонзани беҳтарини тими миллӣ шуд.
Накӯном дар Кувайт бозӣ мекунад, вале аз 23 бозигари тими миллӣ 14 нафараш дар мусобиқоти футболи худи Эрон бозӣ мекунанд. Аз легионерҳо дар ин тим метавон боз Ашкон Дижоғоро ном гирифт, ки дар тими инглисии “Фулҳем бозӣ мекунад, Ризо Ҳақиқӣ аз тими “Рубин” аз шаҳри Қазони Тотористони Русия аст ва Даниэл Доварӣ аз “Айнтрахт”-и Олмон.
Аммо аз 23 узви тими Нигерия дуяш дар Исроил ва бақия ҳама дар Аврупо – апз Инглистон то Туркияву Украинаву Русия - бозӣ мекунанд. Аз ситораҳои маъруфи ин тим яке Аҳмад Мӯсо – нишонзани беҳтарини ЦСКА-и Маскав ва лигаи олии футболи Русия аст ва якеи дигар – Эммануэл Эмменике аз “Фенербоғча”-и Истамбул. Питер Одемвинге аз тими инглисии “Сток Ситӣ” , Виктор Мозес аз “Ливерпул” ва Обе Микел аз “Челси” низ “бомба”-ҳоеянд, ки мурабби Нигерия Стивен Кешӣ ба Бразилия овардааст.
Бо ин вуҷуд, бисёре аз шореҳон бар инанд, ки Эрон аз ҳисоби ташкили хубтари бозиаш тавони баранда шудан дар ин рӯёрӯиро дорад. Мухлисони тими Эрон ҳатто мӯътақиданд, ки тими онҳо ҳаққи дигаре ба ҷуз аз пирӯзӣ дар ин тим надорад, чун дар акси ҳол вазъаш дар бозиҳои баъдӣ бо тимҳои қавитари Босния ва бавижа Аргентинаи “мусаллаҳ” бо Месси хеле вазнин хоҳад шуд. Онҳо аз иқболи бади Эрон дар қуръакашии Ҷоми ҷаҳонӣ меноланд, ки ин тимро дар чунин гурӯҳи сахт партофт.
Криштиано Роналдо
Бозии охирин имшаба дар Ҷоми ҷаҳонӣ байни Ғанаву Амрикост. Вале аксари шореҳон бар ин боваранд, ки рақобати асосӣ дар гурӯҳи H байни тимҳои Португалияву Олмон сурат хоҳад гирифт. Португалия, албатта, тамоми умедашро ба Криштиано Роналдо бастааст ва тақрибан як моҳ боз тамоми мухлисони ин тим ва худи Роналдо даст ба дуо бардоштаанд, ки лати хуӯрдаи ин ситораи раддаи аввали футболи муосир то рӯзи бозӣ бо Олмон дуруст шавад. Шореҳони футбол мегӯянд, дар ғайри ин, тими Португалия дар муқобили мошини футболи Олмон шонси чандоне надорад.
Дар воқеъ дар ҳоле ки тими Португалия ба ҷуз аз Роналдо шояд боз битавонад танҳо бо Нани аз “Манчестер Юнайтед”, Раул Мерелеш аз “Фенербоғча” ва Элдер Поштига аз “Латсио” ифтихори зиёд кунад, вале дар тими Олмон тақрибан касе нест, ки ситорааш гуфта нашавад: Мануэл Нойер, Филипп Лам, Бастиан Швайштайгер, Томас Мюллер, Мирослав Клозе, Шкодран Мустафӣ, Марио Гётсе, Тони Кроос, Пер Мартезакер, Ҷером Боатенг, Лукас Подолски, Андреас Шюрле ва албатта, “силоҳи сақил”-и туркии ин тим дар симои Самӣ Хидира ва Масъуд Ӯзил қодиранд миёни ҳар тими тавонои дунёро бишкананд.
Вале боз ҳам футбол футбол аст ва танҳо баъди ҳуштаки ниҳоии довар, ки аз анҷоми ин бозиҳо дарак дод, метавон сад дарсад мутмаин шуд, ки имшаб мурғи иқболи футбол брӯи шонаҳои кадоме аз ин тимҳо нишасту ба кадоми онҳо ин бор пушт гардонд.
