Ширкатҳои интернетрасони Тоҷикистон аз 24 декабр ба бастани марҳала ба марҳалаи 131 сомонаи интернетӣ шурӯъ карданд. Ин иқдом бар асоси дастури катбии раҳбарияти Хадамоти алоқаи Тоҷикистон сурат мегирад. Дар ин нома боз ҳам “зарурати анҷоми корҳои профилактикӣ” ҳамчун далели масдуд кардани сомонаҳои интернетӣ гуфта шудааст. Аммо ба фарқ аз дафъаҳои қаблӣ, ки бо амри Хадамоти алоқа сомонаҳои мунтақиди давлатро масдуд мекарданд, инбор асосан сомонаҳои тафреҳиву мусиқӣ, аз ҷумла “Вконтакте” ва “Моймир” ҳадаф қарор гирифтаанд.
