Мақомоти Амрико мегӯянд, Отия Абдулраҳмон, фарди дуввуми созмони терорристии Ал-Қоида кушта шудааст. Ба гуфтаи як мақоми Иёлоти Муттаҳида, ки нахостааст, номаш ошкор шавад, Отия Абдулраҳмон, масъули ташкили амалиётҳои Ал-Қоида рӯзи 22 август дар вилояти қабоилнишини Вазиристони Покистон ба ҳалокат расидааст. Бино ба гузоришҳо ӯ бар асари ҳамлаи мушакии ҳавопаймои бидуни сарнишини Амрико ҷон додааст. Қатли Абдулраҳмон, ки аз дастёрони аслии Айман ал-Завоҳирӣ, раҳбари феълии Ал-Қоида аст, як талафоти бузурги дигаре барои ин созмони террористӣ дониста мешавад, ки раҳбари пешини он Усома Бен Лодин, моҳи май аз тарафи нерӯҳои махсуси Амрико дар Покистон кушта шуд.
