Имрӯз дастаҳои мунтахиби футболи Тоҷикистону Афғонистон дар шаҳри Душанбе бозии дӯстона анҷом доданд. Бозӣ дар варзишгоҳи марказии пойтахт баргузор шуд. Дар дақиқаи 33-юми қисмати аввали бозӣ Фаррух Чориев ба дарвозаи меҳмонон зад. Дастаи мунтахаби Афғонистон зери раҳбарии Клаус Штарк-мураббии олмонӣ то 24-ӯми ноябр машқҳои худро дар Тоҷикистон идома медиҳад. Дар ин муддат ин даста як бозии дигар бо дастаи олимпии Тоҷикистон низ анҷом медиҳад. Ин бозӣ 23-юми ноябр дар назар гирифта шудааст ва дар шаҳри Турсунзода баргузор мешавад.
