Қарор аст, имрӯз дар Кубаи коммунистӣ номи раиси ҷумҳури нав ва ҷойгузини Фидел Кастро эълом шавад. Интизор меравад, Шӯрои Миллии Куба Раул Кастро бародари Фидел Кастроро раиси ҷумҳури нав интихоб намояд. Тайи 18 моҳи бемории Фидел Кастрои солхурда бародараш масъулияти идораи Кубаро бар ӯҳда дошт. Фидел Кастро тақрибан 50 сол раҳбари Куба буд ва ҳафтаи гузашта эълом кард, ки аз қудрат канор меравад. Аммо бо ин вуҷуд вай ҳамчун раҳбари Ҳизби Коммунисти Куба нуфузи қавие дар ин кишвар хоҳад дошт.
