Ин матлаб дар ҷамъи соҳибкорони тоҷик зимни ҷаласаи Шӯрои машваратии назди раисиҷумҳури Тоҷикистон эълон шудааст. Гуфта мешавад, ҳадаф аз ин иқдом анҷоми ислоҳот дар бахши маъмурӣ ва идораи соҳибкорӣ, рушди соҳибкорӣ ва беҳбуд бахшидани фазои сармоягузорӣ мебошад.
Барномаи «200 рӯзи ислоҳот» иборат аз тадобири кӯтоҳмуддати ҳукумат барои суръат бахшидан ба ислоҳоти идораи иқтисодиёт, ҳамгунсозии санадҳои қунонгузорӣ ба мавозини байнулмилалӣ, ҷалби сармоя ва ба ин тартиб боло бурдани мизони рушди иқтисодӣ хоҳад буд.
Ин барнома дар сурате, ки таваҷҷӯҳи аслӣ ба масъалаҳои умда, назири муқобила бо коррупсия ё фасод, дар он ҷойи аслиро дошта бошад, метавонад то ҷое муваффақ шавад ...
Зайдулло Сайидов, раиси анҷумани соҳибкорони Тоҷикистон, ки дар ҷаласаи шӯрои машаваратии назди раисиҷумҳур ширкат дошт, дар мавриди иқдомоти умдаи барномаи «200 рӯзи ислоҳот» гуфт, ҳадаф аз ин барнома дар ҳамин муддат бартараф намудани камбудиҳое мебошад, ки дар роҳи рушди соҳибкорӣ, ҷалби сармоя вуҷуд дорад. Ва инчунин мутобиқсозии меъёрҳо ва мусоидат барои ҷалби сармояи хориҷӣ.
Ин дар ҳолест, ки бархе аз таҳлилгарон чунин иқдомеро дар ҷиҳати ҷалби сармоя ва беҳбуд бахшидани фазои сармоягузорӣ як амали таҷрибашуда медонанд ва мегӯянд, агар дар воқеъ истифодаи аҳсан аз ин фурсат сурат бигирад, хеле аз масоил, ба вижа масъалаи ҳамгунсозии барнома ва қонунҳои Тоҷикистон ва таъмини шароити шохисҳои саромягузорӣ, метавонад ҳалли худро пайдо кунад.
Дар ҳамин ҳол Масъуд Собиров, мудири кафедраи иқтисодиёти Донишгоҳи иқтисодиёти Тоҷикистон, мегӯяд, ин барнома дар сурате, ки таваҷҷӯҳи аслӣ ба масъалаҳои умда, назири муқобила бо коррупсия ё фасод, дар он ҷойи аслиро дошта бошад, метавонад то ҷое муваффақ шавад.
Ба эътиқоди оғои Собиров, фасодзадагии густарда дар ниҳодҳои Тоҷикистон монеи аслии сарозер шудани сармояи хориҷӣ ба кишвар шудааст. Ва дар ин марҳила ва фурсати дусадрӯза бояд таваҷҷӯҳи аслӣ рӯи ҷустуҷӯи роҳҳои коҳиши мизони фасод ҷалб шавад. Агарчанд, мегӯяд оғои Собиров, ба натиҷаҳои қобили мулоҳизаи ин барнома бовари чандоне надорад.
Дар айни ҳол бархе дигар иқтисодшиносон ба муваффақияти барномаи 200 рӯзи ислоҳот ба назари шубҳа менигаранд. Нуриддин Қаюмов, раиси пажӯҳишгоҳи иқтисоди вазорати рушди иқтисодии Тоҷикистон, ин иқдоми кумиятаи сармоягузориро чандон бунёдӣ ва ҷиддӣ намедонад ва мегӯяд, ин барнома ба хотири ӯ барномаи панҷсад рӯзи Чубайсро дар Русия меорад.
Оғои Қаюмов ҳамчунин афзуд, умдатарин шохисҳо барои ҷалби сармоягузорӣ ва фазои муносиб аз нигоҳи ҳуқуқӣ барои ин кор дар Тоҷикиситон фароҳам шудааст. Зарфи чанд соли охир ба манзури дарёфти узвияти Созмони ҷаҳонии тиҷорат ва иттиҳодияи гумрукӣ иқдомоте дар ҷиҳати ҳамгусозии қавонин бо мавозини байнӯлмилалӣ сурат гирифта, ки ҳамзамон фазоро барои сармоягузорӣ мусоидтар кардааст. Аммо оғои Қаюмов низ мегӯяд, муҳимтарин мушкили иқтисоди Тоҷикистон боз ҳам маҷудияти фасод аст, ки сармоядоронро мегурезонад.