Пайвандҳои дастрасӣ

logo-print

Панҷ медали варзишгарони тоҷик дар қаҳрамонии ҷаҳон дар Эрон


Варзишгарони тоҷик дар мусобиқоти қаҳрамонии ҷаҳон дар риштаи каратэ-до, ки дар пойтахти Эрон – шаҳри Теҳрон - баргузор шуд, панҷ медал – як тилло, як нуқра ва се биринҷӣ - ба даст оварданд.

Дар сабқати бузургсолон Шероз Икромов дар вазни то 84 кило бо медали тилло, Сафаралӣ Давлатов дар вазни то 67 кило бо медали нуқра ва Бадриддин Умедов дар вазни беш аз 84 кило бо медали биринҷӣ сарфароз гаштанд.

Дар сабқати наврасони синашон 16-17-сола Мурод Назаров дар вазни то 55 кило ва Ҳоҷиқурбон Маҳмадов дар вазни то 52 кило бо медалҳои биринҷӣ мукофотонида шуданд.

Дар ин бора ба Радиои Озодӣ Муҳаммад Бодаков, сармураббии дастаи мунтахаби каратэ-дои Тоҷикистон, рӯзи 22 сентябр хабар дод. Ба гуфтаи ӯ дар ин мусобиқот беш аз 400 варзишгар аз 30 кишвари ҷаҳон ширкат дошт. Оқои Бодаков афзуд, “дар риштаи каратэ-до аввалин медалро ба Тоҷикистон соли 1994-ум дар Бозиҳои осиёӣ дар Ҷопон Исроил Исмоилов, ки феълан раиси Федератсияи каратэ-дои Тоҷикистон аст, оварда буд. Вай дар рақобатҳо дар вазни беш аз 75 кило бо нишони биринҷӣ сарфароз гашта, дар таърихи варзиши тоҷик саҳифаи наве боз кардааст. Умуман, ин нахустин медали варзишгарони тоҷик дар Бозиҳои осиёӣ ба шумор меравад. Варзишгарони мо баъдан дар тӯли 22 сол дар чемпионатҳои ҷаҳон, Осиё ва мусобиқоти байналмилалӣ ба натиҷаҳои баланд ноил гаштаанд.”

Ба гуфтаи оқои Бодаков, барои омодагии каратэчиёни тоҷик ба мусобиқоти байналмилалӣ шароити зарурӣ фароҳам аст. “Дар шаҳри Турсунзода як маркази замонавии варзишӣ бо номи “Қасри Самандар – XXI” мавҷуд аст, ки дар онҷо варзишгарони мо ҳам тамрин мекунанд, ҳам ғизо мехӯранд ва ҳам хобу истироҳат мекунанд. Ягона мушкилоте, ки дорем, ин камбуди маблағ аст. Бинобар ин мо дар бисёр мусобиқоти байналмилалӣ иштирок карда наметавонем”, - иброз дошт Муҳаммад Бодаков.

XS
SM
MD
LG