Пайвандҳои дастрасӣ

logo-print

"Лаҳзаҳои гуворо" чӣ гуноҳ кард?


Шамсиддин Орумбекзода, вазири фарҳанги Тоҷикистон.

Шамсиддин Орумбекзода, вазири фарҳанги Тоҷикистон.

Масъулони вазорати фарҳанги Тоҷикистон аз ин, ки бархе гурӯҳҳои ҳунарии мустақил барои баргузории намоишҳои худ дар миёни мардум аз номи вазорат сӯиистифода мекунанд, изҳори нигаронӣ карданд.

Дар нишасти матбуотии Вазорати фарханги Точикистон, ки рӯзи 22 июл баргузор шуд, гуфта шуд, ки гурӯҳҳои хаҷвие монанди "Лаҳзаҳои гуворо" ва "Арабшо" бо истифода аз номи вазорат дар асоси ҳуҷҷатҳои тақаллубӣ, ки гӯё вазорат онҳоро дода бошад, мардумро ба тамошои намоишҳои худ ҷалб мекунанд.

Шамсиддин Орумбекзода, вазири фарҳанги Тоҷикистон бо ишора ба қазияи гурӯҳи "Арабшо" дар минтақаи Кӯлоб гуфт, ки ин гурӯҳ бо истифода аз асноди тақаллубӣ, ки ба вазорати фарҳанг нисбат додааст, намоишҳои худро дар ин минтақа баргузор карда ва маблағ ба даст овардааст. Ба гуфтаи ӯ, фаъолияти ин гурӯҳро мақомоти маҳаллӣ дар Кӯлоб тафтиш мекунанд.

Дар ҳамин хол, яке аз ҳозирон дар ин нишаст гуфт, ки гурӯҳи ҳаҷвии "Лаҳзаҳои гуворо" низ бо истифода аз ном ва асноди тақаллубӣ, ки ба вазорат нисбат дода мешавад, дар мактабҳои ноҳияи Ҳисор намоишҳои худро баргузор карда ва аз хонандагон маблағ ба даст овардааст. Аз ҷумла, ин гурӯҳ муттаҳам ба ин шуд, ки дар мактаби рақами ҳашти ин ноҳия гӯё бо фармони вазири фарҳанг ҳафтае чанд маротиба барномаҳои ҳаҷвӣ намоиш додааст.

Ин ҳам дар ҳолест, ки ба гуфтаи Шамсиддин Орумбекзода, вазири фарҳанги Тоҷикистон, ин вазорат ҳеҷ дастуре дар ин бора ба гурӯҳи “Лаҳзаҳои гуворо” надодааст, зеро ин гурӯҳ дар тобеияти вазорат нест ва ҳаққи баромад аз номи вазоратро ҳам надорад.

Шамсиддин Орумбекзода гуфт: ”Айни ҳол дар дохили вазорат як гурӯҳи бозрасӣ таъсис ёфтааст ва ин масъаларо ҳатман пайгирӣ хоҳад кард. Бо ин, ки гурӯҳи "Лаҳзаҳои гуворо" ҳеҷ тобеияте ба вазорати фарҳанг надорад, вале барои идора кардани фазои фарҳангӣ ва рух надодан ба мавориди тақаллуби ҳуҷҷати вазорат, бояд чорае андешид.”

Дар нишаст Ибодулло Машрабов, муовини вазири фарҳанги Тоҷикистон низ аз ҳуҷҷате бо мӯҳри тақаллубӣ, ки гӯё гурӯҳи “Арабшо компания” бо худ доштааст, интиқод кард ва гуфт, ки вазорати фарҳанг чунин ҳуҷҷати пур аз иштибоҳро ба ин гурӯҳ надодааст ва ин гуна ҳуҷҷатҳо ба таври ғайриқонунӣ таҳия шудаанд.

Ибодулло Машрабов гуфт: “Ин гурӯҳ як гурӯҳи худфаъолиятие беш нест. Ин ҳуҷҷатро агар як нафари каму беш босавод агар мехонд, мефаҳмид, ки ин ҳуҷҷати пур аз иштибоҳ, моли вазорати фарҳанг нест. Ҳуҷҷатро дидам, имзои вазир нест, балки худашон онро гузоштаанд. Ин гурӯҳҳо ҳамин гуна ҳуҷҷатро асос қарор медиҳанд ва мераванд ҳама ҷо барномаҳову консертҳо доир мекунанд. Пас инҷо айби кӣ аст? Ё ин ки гурӯҳи "Лаҳзаҳои гуворо" се дафъа дар як ҳафта аз номи мо барнома баргузор мекунад. Ин чизҳоро бояд худи мардум дарк кунанд ва пеши роҳашонро бигиранд.”

Аммо бо ин ҳам то кунун ба гуфтаи масъулони вазорати фарҳанг, ҳанӯз дар мавриди эхтимоли тақаллубкории гурӯҳҳои “Арабшо компания” ва “Лаҳзаҳои гуворо” тасмиме аз ҷониби вазорат гирифта нашудаааст.

Дар ҳамин ҳол аъзои гурӯҳи “Лаҳзаҳои гуворо” аз вуҷуди ин гуна амал изҳори беиттилоӣ карданд. Насриддин Нуриддинов, яке аз намояндаи гурӯҳи ҳаҷвии “Лаҳзаҳои гуворо” дар сӯҳбат бо Радиои Озодӣ гуфт, “аъзои ин гурӯҳ дар ҳоли ҳозир дар Театри ҷавонон фаъолият доранд ва аз номи вазорати фарҳанг истифода накардаанд. Насриддин Нуриддинов мегӯяд: ”Ин кор ба гурӯҳи мо ҳеч тааллуқ надорад. Дар гурӯҳи мо фақат чор нафар -- Гулбӣ, Холмурод, Ҷамшед ва ман ҳастем, ки ҳама моро мешиносад.”

Ҷаноби Нуриддинов гуфт, беҳтар мебуд то масъулони вазорати фарҳанг мушаххасан мегуфтанд, ки кадоме аз ҳунармандон ба чунин амал даст задаанд. Ба таъкиди ин ҳунарманди гурӯҳи “Лаҳзаҳои гуворо”, дар ҳоли ҳозир вай ва ҳамкори дигараш Гулбибӣ дар Театри ҷавонон ба номи Маҳмудҷфон Воҳидов фаъолият доранд ва ба ҳеҷ куҷое сафари ҳунарӣ накардаанд.

Зимнан, аз замони таъсиси гурӯҳи ҳаҷвии “Лаҳзаҳои гуворо” 25 сол пур мешавад. Гуфта мешавад, ин гурӯҳ бо ташаббуси Холмурод Сиддиқов ба дунболи пошхӯрии Иттиҳоди Шуравӣ ва соҳибистиқлол шудани Тоҷикистон таъсис ёфтааст.

“Лаҳзаҳои гуворо” аз аввалин гурӯҳҳои хурди ҳаҷвӣ дар замони истиқлоли Точикистон аст, ки дар ду даҳсолаи ахир мухлисону ҳаводорони зиёде пайдо кард ва ҳамвора дар шабакаҳои телевизиони давлатӣ саҳнаҳои ҳаҷвии онҳо ба намоиш гузошта мешаванд. Ҳарчанд дар чандин моҳи ахир фаъолияти ин гурӯҳ дар оинаи нилгун камтар шудааст.

Бо ин ҳам “Лаҳзаҳои гуворо” аз ҷумлаи гурӯҳҳои ҳаҷвӣ аст, ки дар маъракаҳои расмӣ, ба хусус ҷашну маросими идона ширкат мекунад.

Намоиши шарҳҳо

XS
SM
MD
LG