Google мессенҷери худаш бо номи Hangouts-ро сохтааст, ки барио смартфонҳои муҷаҳҳаз бо барномаи Android аст. Ин барномаи Google нафақат имкони табодули паёмҳои катбӣ, балки имкони баргузории конфаронсҳои видеоиро низ фароҳам меорад, ки барои тадвири ҷаласаҳо ваё мизигирду анвоъи дигари сӯҳбатҳо дар матбуот шароит эҷод мекунад.
Forbe’s менависад, аз намояндагони насли аввали мессенҷерҳо, ки дар оғози асри 21 бозорро пур карданд, ҳоло шояд танҳо Skype мутмаинан рӯи пояш истодааст. Ин шабакаи сӯҳбатҳои арзон аз тариқи интернет, ки аз соли 2011 ба ширкати Microsoft тааллуқ гирифт, дар ҳоли ҳозир ҳудуди 300 миллион корбар доштааст.
Ширкати Skype ҳанӯз дар соли 2003 аз сӯи Никлас Заннстрем аз Шветсия ва Янус Фриис аз Дания бунёд шудааст. Дар сохтани он барномасозони эстонӣ Аҳтӣ Ҳейнл, Прийт Казесалу ва Яан Таллинн ҳам ширкат кардаанд. Ин нахустин барномае буд, ки ба сӯҳбатҳои садоӣ такя кард, на мисли дигар мессенҷерҳои маъруфи он давра, танҳо ба табодули паёмҳои хаттӣ. Дар ниҳоят, шӯҳрати Skype ба ҳадде расид, ки Microsoft дар соли 2011 барои соҳиб шуданаш ба он 8,5 миллиард евро дод. Маблағе, ки дар таърихи харидҳои ин бузургтарин ширкати компутарии дунё собиқа надошту надорад.
Маҷаллаи амрикоӣ дар даҳгонааш ҳамчунин аз Line ситоиш кардааст, ки танҳо дар соли 2011 вориди бозор шуд, вале ин мессенҷери марбут ба як ширкати ҷопонӣ тавонист дар зарфи ҳамагӣ 19 моҳ шумори муштариёнашро ба 100 миллион нафар бирасонад. Барои муқоиса, Twitter ва Facebook барои расидан ба чунин муарра мутаносибан 49 ва 54 моҳ сарф карда буданд. Line танҳо дар семоҳаи сеюми соли гузашта 154 миллион фоида оварда, ҳоло 300 миллион муштарӣ дорад ва мехоҳад то 2 соли дигар ин рақамаро ба 500 ило 600 миллион бирасонад.
Мессенҷери WeChat, марбут ба Tencent, яке аз бузургтарин ширкатҳои интернетии Чин, ки аз соли 2011 ба ин сӯ 270 миллион тарафдорон гирд овардааст ва ҳоло ин шабака бо истифода аз хидматҳое, чун гузоштани паём то даме ки касе ба он посух диҳад, ё ларзондани смартфон ба хотири маълум кардани муштариёни дигаре, ки дар наздикӣ қарор доранд, қаламрави нуфузашро ба хориҷтар аз Чин тавсиъа медиҳад. Сеяки муштариёни кунунии WeChat дар хориҷи Чин, бештар аз ҳама дар Италияву Мексика ва Бразилия ба сар мебаранд.
Мессенҷери дигари пурмуштарӣ Viber, сохтаи сарбозони собиқи артиши Исроил Талмон Марко ва Игор Магазинник аст, ки аз соли 2010 ба ин тараф шумори корбаронашро ба 200 миллион расондааст.
Дар даҳгонаи Forbe’s ҳамчунин Kik, мессенҷере ки Тед Ливингстон дар соли 2007 барои ширкати BlackBerry сохта буду ҳоло BlackBerry аз ин тифли сохтааш даст кашидааст, бо 100 миллион муштарӣ, Snapchat, сохтаи Эван Шпигел бо 26 миллион муштарӣ ва ICQ – яке дигар аз “пирон”-и бозори мессенҷерҳо, ки ҳанӯз дар соли 1998 ба майдон омада, ҳоло ба миллиардерҳои Русия Алишер Усмонов ва Юрий Милнер тааллуқ дорад, зикр шудаанд.
Албатта, ICQ шукӯҳи қаблиашро аз даст додааст ва агар дар соли 2009 беш аз 47 миллион муштарӣ дошт, имрӯз аз он артиши бузург танҳо ҳудуди 12,5 миллион тарафдорашро ҳифз кардааст. Аммо ба навиштаи маҷаллаи амрикоӣ, агар давраи суъуди ситораи ICQ алакай пушти сар шуда бошад, ахтари Snapchat дар ин осмон тоза ҷавлон мекунад. Forbe’s менависад, ки раҳбарони Facebook ба Эван Шпигел барои ин шабакае, ки ибтидо танҳо дар чордевори донишгоҳи Стенфорд амал мекард ва ҳамакнун ҳар рӯз аз тариқаш беш аз 350 миллион паём радду бадал мешавад, 3 миллиард доллар ваъда кардааст. Ваъдае ки Шпигел феълан қабул надорад.
