Дар ҳамин ҳол Маъруф Юсуфов - сарвари қисмати ҷудошудаи сотсиалистҳои вилояти Суғд бо пахши як изҳорот ин даъвои сарвари пешини худро бепоя хонд: «Ин ҷо ҳеҷ гуна табаддулот, ё ки ГКЧП нашудааст, балки 32 нафар вакилони комилҳуқуқи Ҳизби сотсиалистӣ дар вилояти Суғд аз 9 ташкилоти шаҳриву ноҳиявӣ гирд омада, масъалаи аз гирдоби фано ба соҳили офият баровардани Ҳизби сотсиалистии Тоҷикистон, дар навбати аввал - бахши суғдии онро мавриди баррасӣ қарор додем.»
Оқои Юсуфов афзуд, нахустин масъалае, ки аз сӯи раёсати нави сотсиалистҳои Суғд дар наздиктарин рӯзҳо мавриди бозбинӣ қарор хоҳад гирифт, саволи будан ва ё набудани ин ҳизб дар Эътилофи аҳзоби сиёсии Тоҷикистон мебошад.
Лидери нави сотсиалистҳои Суғд, ки худ ва ҷонибдоронашро, ба таъбири худи ӯ - "нохудоёни киштии сотсиалистҳо дар баҳри сиёсии Тоҷикистон" тасаввур мекунад, ба ин саволи Радиои Озодӣ, ки «соҳили офият ва ё наҷот»- ро барои сотсиалистон дар Эътилофи аҳзоби сиёсӣ ва ё рафоқат бо ҳизби ҳизби ҳукмрон мебинад?, чунин посух дод: «Ин масъаларо аксарияти овозҳо ҳал мекунад. На раису на ҷонишин ҳал намекунанд. Фикри аксариятро ба назари эътибор мегирем.»
Вале Моҳинисо Ҳорисова - сарвари сотсиалистҳои Суғд гуфт, бо ин ҳама аз муборизаи сиёсӣ даст нахоҳад кашид:
«Бисёр вақт ман мисраъҳои Гулрухсорро ба хотир меорам, ки мегӯяд:
«Аз он сангҳое, ки мард афканда сӯям,
Барои хеш ҳайкал мегузорам».
Имрӯз маро аз вазифаи сарварии бахши вилоятии ҳизб маҳрум сохтаанд, аммо ман муборизаро давом медиҳам.»
Хонум - Ҳорисова илова кард, ки ӯ барои ғайриқонунӣ аз мақоми раҳбарии Ҳизби сотсиалист дар вилояти Суғд сабукдӯш гардидани худ ба Додгохи олии Тоҷикистон шикоят хоҳад бурд ва дар сурати бетағйир мондани вазъ бо ҷонибдоронаш Ҳизби сотсиалистиро тарк хоҳад кард.