Пайвандҳои дастрасӣ

Хабари нав

Хабарҳо

Мюллер: Ҳадаф муттаҳам кардани Трамп ба ҷиноят набуд

Роберт Мюллер

Роберт Мюллер бори нахуст пас аз поёни таҳқиқоти дусолааш дар мавриди дахолати Русия дар интихоботи Амрико гуфт, ҳадаф муттаҳам кардани Доналд Трамп ба ҷиноят набуд.

Вай рӯзи 29-уми май дар Вазорати адлияи Амрико гуфт, агар барои суханронӣ дар Конгресс ҳам даъват шавад, ҳеч иттилоеро берун аз ончи дар гузоришаш нашр кардааст, ба забон нахоҳад овард.

Шарҳи додситони вижа дар ҳоле садо дод, ки чанд таҳқиқоти демократҳои Конгресс дар робита ба гузориши Мюллер ва, инчунин, тиҷорат ва муомилаҳои Трамп идома дорад.

Роберт Мюллер рӯзи чаҳоршанбе дар шарҳи худ як нуктаи асосии гузоришашро такрор кард, ки Русия дар маъракаи интихоботи президентии соли 2016 дахолат кардааст.

Гузориши Мюллер моҳи гузашта нашр шуд.

Президенти Шӯрои Аврупо ба Тоҷикистон омад

Доналд Туск

Доналд Туск, президенти Шӯрои Аврупо, шоми 29-уми май вориди Душанбе шуд ва ӯро дар фурудгоҳи байналмилалии пойтахт Сироҷиддин Муҳриддин, вазири умури хориҷии Тоҷикистон пешвоз гирифт. Туск сафари худро ба чанд кишвари Осиёи Марказӣ аз Тоҷикистон оғоз кард. Вай рӯзи 30-юми май бо раисҷумҳур Эмомалӣ Раҳмон мулоқот ва аз чанд мавзеи кишвар дидан мекунад. Вале аз рӯи барномаи сафари ӯ мулоқоташ бо ҷомеаи шаҳрвандии Тоҷикистон дар назар нест. Ҳарчанд намояндагони созмонҳои иҷтимоӣ мегӯянд, ки ба ӯ дар бораи вазъи ҳуқуқи инсон ва дастрасӣ ба Интернет ва озодии баён гуфтании зиёд доранд. Доналд Туск пас аз анҷоми сафараш дар Тоҷикистон ба Қазоқистону Узбекистон меравад.

Тафсилоти бештарро дар бораи сафари Туск дар инҷо хонед

Тоқаев дар мубоҳисаҳои телевизионӣ иштирок намекунад

Қосимҷомарт Тоқаев, президенти муваққати Қазоқистон бо раиси ҷумҳури пешин Нурсултон Назарбоев

Қосимҷомарт Тоқаев дар мубоҳисаҳои телевизионӣ байни номзадҳо ба мақоми президенти Қазоқистон иштирок намекунад.

Дар ин бора намояндагони президенти муваққат рӯзи 29-уми май ба матбуот хабар доданд. Интихоботи президентӣ дар Қазоқистон рӯзи 9-уми июни имсол баргузор хоҳад шуд.

Тасмими ахир эҳтимол боис ба интиқоди бештар аз интихобот хоҳад шуд, ки мухолифони ҳукумат мегӯянд, озоду мунсифона нахоҳад гузашт ва ҳатман Тоқаевро ба қудрат хоҳад расонд. Президент дар Қазоқистон барои панҷ сол интихоб мешавад.

Чанд соат пеш аз мубоҳисаҳои телевизионӣ, Эрлан Карин, ёвари Тоқаев ва ҳизби ҳокими "Нур Отан" хабар доданд, ки ба ҷойи ӯ раиси ситоди интихоботиаш Маулен Ашимбоев иштирок мекунад.

Онҳо гуфтанд, Қосимҷомарт Тоқаев дар нишасти раҳбарони кишварҳои узви Иттиҳоди Иқтисодии АвруОсиё иштирок дорад. Ин нишаст рӯзи 29-уми май дар Нурсултон, пойтахти Қазоқистон, баргузор шуд.

Мунтақидон танзими вақти мубоҳисаро зери шубҳа бурданд, ки ба Тоқаев имкон додааст, дар баҳсҳо иштирок накунад.

Президенти пешини Қазоқистон Нурсултон Назарбоев моҳи марти имсол пас аз сӣ сол аз қудрат канор рафт. Вай ба ҳайси раҳбари доимии Шӯрои амният ва раиси ҳизби ҳокими "Нур Отан" хоҳад монд.

Нозирони байналмилалӣ ягон интихоботи даврони ҳукумати Назарбоевро мувофиқ ба меъёрҳои демократӣ надонистаанд.

Волкер фаъолиятҳои Русияро дар шарқи Украина "ишғолгарӣ" номид

Курт Волкер

Намояндаи хоси Амрико барои Украина фаъолиятҳои Русияро дар шарқи Украина "ишғолгарӣ" номид.

Курт Волкер рӯзи 28-уми май аз Маскав хост, ки ба иҷрои ваъдаҳои худ бар асоси созишномаи Минск оғоз кунад. Вай гуфт, Украина ҳам бояд масъулиятҳои худро ба ҷо орад.

Ҳадафи мувофиқатномаи Минск, ки соли 2015 имзо шудааст, поён додан ба ҷанги байни нерӯҳои давлатии Украина ва ҷудоиталабони зери ҳимояти Русия дар шарқи Украина аст.

Волкер дар суҳбати видеоӣ бо хабарнигорон аз Вашингтон дар мавриди ояндаи Украина зери раҳбарии президенти нав Владимир Зеленский суҳбат кард.

Ӯ гуфт: "Мо ба Владимир Зеленский дар бораи афроди ҷудогона ягон тавсияи хос надодем, зеро ба усули мудирият ва сиёсатҳое, ки вай иҷро мекунад, таваҷҷуҳ дорем. Дар бораи ваъдаи раисҷумҳур Зеленский барои ислоҳот дар Украина, мубориза бо фасод, ислоҳи низоми адлия ва ҳокимияти қонун. Мо аз ин усул ва сиёсатҳо пурра ҳимоят мекунем ва мунтазири ҳамкорӣ бо ӯ ҳастем."

Владимир Зеленскийи 41-сола, ҳаҷвнигор ва бозингари бе ҳеҷ гузаштаи сиёсӣ, рӯзи 21-уми апрели имсол дар даври дувуми интихоботи президентии Украина Петро Порошенкоро шикаст дод. Вай рӯзи 20-уми май ба ҳайси раисҷумҳур савганд ёд кард ва расман ба кор оғоз намуд.

Белгия як узви ДИИШ-ро ба Русия истирдод кард

Белгия як шаҳрванди Русияро, ки ба узвият дар гуруҳи тундрави "Давлати исломӣ" гумонбар аст, ба Маскав таслим кард.

Масъулони Хадамоти федеролии амнияти Русия рӯзи 29-уми май гуфтанд, ки Имомпошо Аҳмадовро дар боздоштгоҳе дар Маскав нигоҳ медоранд.

Ба иттилои онҳо, Аҳмадов соли 2014 ба Сурия рафта, ба сафи гуруҳи даҳшатафкани "Давлати исломӣ" пайвастааст.

Чанде аз ҷангҷӯёни қафқозӣ дар Интернет навори савганди вафодории худро ба гуруҳи "Давлати исломӣ" нашр карда буданд, ки дар Русия ва кишварҳои дигар мамнуъ ва террористӣ аст.

Мақомоти Русия мегӯянд, ду ҳазор аз шаҳрвандони ин кишвар ба сафи ҷангҷӯёни гуруҳи "Давлати исломӣ" дар Ироқу Сурия пайвастаанд. Ҷое, ки ин созмони террористӣ соли 2014 минтақаҳои зиёдро зери тасарруфи худ дароварда буд ва ҳоло аз даст додааст.

Ҷон Болтон дар Абузаби амнияти минтақаро баҳс мекунад

Ҷон Болтон

Ҷон Болтон, мушовири амнияти миллии Амрико, гуфт, “тақрибан мутмаинанд”, ки дар паси ҳамла ба киштиҳои нафткаш дар соҳили Имороти Мутатаҳидаи Араб дар аввали моҳи ҷорӣ Эрон меистад.

Болтон рӯзи 29-уми май дар Абузаби, маркази Имороти Муттаҳидаи Араб гуфт, “ин киштиҳо бо минаҳои баҳрӣ мавриди ҳамла қарор гирифтаанд, ки эҳтимол аз Эрон аст”.

Гуруҳи иборат аз намояндагони панҷ кишвар, аз ҷумла Амрико, ҳамлаи рӯзи 12-уми майро таҳқиқ мекунанд. Дар ин ҳамла чаҳор киштӣ, аз ҷумла ду киштии нафткаши Арабистони Саудӣ осеб дидааст.

Инчунин, Арабистони Саудӣ Теҳронро барои ҳамлаҳо бо дрон ба маҳалли тавлиди нафти он кишвар муттаҳам кардааст.

Мақомоти Эрон иттиҳомотро рад мекунанд.

Ҷон Болтон рӯзи 28-уми май барои гуфтугӯ дар бораи амнияти минтақа вориди Имороти Муттаҳидаи Араб шуд. Сафари ӯ дар ҳоле сурат мегирад, ки танишҳо байни Эрону Амрико ва муттаҳидонаш дар Халиҷи Форс афзудааст.

Як сокини Душанбе бо ҷурми таҷовузи духтараш умрбод ҳабс шуд

Акс аз бойгонӣ

Як сокини шаҳри Душанбе бо ҷурми таҷовуз ба номуси духтари ноболиғаш ба ҳабси абад маҳкум шудааст.

Ҳукмро Додгоҳи пойтахт рӯзи 28-уми майи имсол содир кард. Бино ба ҳукм, С.И. дар зиндони низомаш пурзӯр нигаҳдорӣ мешавад.

"Ин сокини пойтахт ба номуси духтари ноболиғи худ дастдарозӣ карда, чанд дафъа такроран ӯро таҷовуз намудааст", -- гуфтанд дар хадамоти матбуоти Додгоҳи шаҳри Душанбе.

Бар асоси омори расмӣ, дар ду соли гузашта дар Тоҷикистон ҳудуди 30 мавриди таҷовуз ба номуси ноболиғон сабт шудааст.

Дар Тоҷикистон таҷовуз ба номус ҷинояти сангин ба шумор меравад ва барои таҷовузи ноболиғи то 14-сола аз 12 то 25 соли зиндон ва ҳабси якумрӣ пешбинӣ шудааст.

Корпартоии гӯштфурӯшону қассобҳо дар Қирғизистон

Дар шаҳри Ӯши Қирғизистон қассобҳои маҳаллӣ назди бинои ҳукумат ҷамъ омада, талаби мулоқот бо раиси шаҳрро доранд. Сабаби ин гирдиҳамоӣ - талабҳои сахти мақомот аз фаъолияти онҳост.

Ба гуфтаи ҷамъомадагон, нозироти давлатии бойторӣ дар шаҳри Ӯш фармони бастани қассобхонаҳоро додааст.

Ба ҷуз ин, воридоти гӯшт аз вилоят ба шаҳр манъ шудааст.

Мақомоти давлатӣ гуфтанд, ки талабот ба сифати гӯшт бо ҳадафи назорати ин маҳсулот сахттар шудааст ва қассобхонаҳое баста шудаанд, ки бо талаботи Иттиҳоди иқтисодии АвруОсиё мувофиқ нестанд.

Дуконҳои гӯшт рӯзи 28-уми май дар шаҳри Ӯш баста шуданд. Гуфта мешавад, дар корпартоии қассобҳову гӯштфурӯшон то 250 одам ширкат мекунад.

"Хеши олигархи рус" дар Австрия донишҷӯе аз Босния будааст

Расонаҳо шахсияти духтареро мушаххас карданд, ки дар соли 2017 дар Ибитс бо муовини садри аъзами вақти Австрия Ханс-Кристиан Штрахе мулоқот ва худро "хеши олигархи рус" муаррифӣ карда буд.

Ба навиштаи нашрияи австриягии Die Kronen-Zeitung, дар воқеъ, ин духтар як донишҷӯи босниягӣ аст. Барои ширкат дар таҳияи навори мазкур бо Штрахе ба вай дар ивази ҳар рӯз наздики 7 ҳазор евро пардохт кардаанд.

Ба иттилои рӯзноманигорон, духтарро барои нақши хеши олигархи рус дар асоси иттилои шахсии Штрахе интихоб кардаанд. Донишҷӯ дар мулоқот бо вай имкони сармоягузорӣ аз сӯи Русияро дар остонаи интихоботи порлумонии Австрия баррасӣ кард.

Навор ду ҳафта пеш нашр шуд. Баъди нашри навор Штрахе ба истеъфо рафт, дар Австрия эътилофи ҳукмрон фурӯ рехт ва шӯрои миллии он кишвар ба садри аъзам Себастян Куртс раъйи нобоварӣ эълом кард.

Штрахе мегӯяд, қонунро нақз накардааст. Феълан мулоқоти ӯро бо "хеши худхондаи олигархи рус" додситонӣ тафтиш мекунад. Дар ҳамин ҳол, мухолифон мавзуи баргузории интихоботи нави порлумониро муҳокима доранд.

Узбекистон мошинҳои навъи Volkswagen истеҳсол мекунад

Франк-Валтер Штайнмайер ва Шавкат Мирзиёев

Узбекистон якҷо бо ширкати Volkswagen мошин истеҳсол мекунад. Дар ин бора маркази матбуотии президенти Узбекистон хабар дод. Ба иттилои марказ, президенти Олмон Франк-Валтер Штайнмайер рӯзи 28-уми май бо президенти Узбекистон Шавкат Мирзиёев чанд созишнома имзо кард.

Ба ҷуз ин, ҷонибҳо дар мавриди додугирифт ва ҳифзи иттилоъ, ҳамкорӣ дар бахши кам кардани партоби газҳои гулхонаӣ ва мувофиқ шудан ба тағйирёбии иқлим созишномаи ҳамкорӣ ба имзо расониданд.

Президенти Олмон ҳамроҳ бо ҳамсараш рӯзи 29-уми май бо донишҷӯёни Донишгоҳи давлатии Урганҷ мулоқот ва ба шаҳри таърихии Хева мераванд.

Табодули мол миёни ду кишвар дар соли 2018 ба 770 миллион доллар расид. Ин нишондод нисбат ба як соли пеш 25 дарсад бештар аст.

Президенти Олмон рӯзи 27-уми май бо сафари расмӣ вориди Узбекистон шуд.

Дар Қирғизистон президенти "Акнет"-ро боздошт карданд

Вазорати умури дохилии Қирғизистон хабар дод, ки президенти "Акнет" -- бузургтарин ширкати фароҳамкунандаи Интернет дар ин кишвар Кубан Ажимудинов дастгир ва ба боздоштгоҳи муваққатӣ интиқол дода шуд. Ҳамроҳ бо Ажимудинов сармуҳосиб ва мудири кулли ширкати "Строй сет", як ширкати вобаста ба "Акнет"-ро низ дастгир кардаанд.

"Дар ҷараёни тафтиши парванда маълум шуд, ки соли 2017 ба буҷаи "Акнет" ҳамчун пардохти абонентӣ беш аз 1 миллиард сом (зиёда аз 17 млн доллар) ворид шудааст. Масъулони ширкат дар охири сол даромади холиси худро 195 миллион сом нишон додаанд. Дар соли 2018 ба ҳисоби ширкат ҳамчун пардохти абонентӣ 1,2 миллиард сом ворид гаштааст. Тафтишот ба хулосае омад, ки масъулони "Акнет" харҷи худро барзиёд ва даромадро кам нишон додаанд",-афзудааст ВКД.

Ҳамчунин фаъолияти 11 ширкати вобаста ба "Акнет" ошкор карда шудааст. "Аз моҳи июни соли 2016 то соли 2018 аз ҳисоби "Акнет" ба ҳисоби ширкати вобаста ба он -- "Строй сет" 101 009 401 сом интиқол ёфта, ҳамчун маблағи хадамоте ба қайд гирифта шудаанд, ки тасдиқи худро наёфтанд. Ҳолатҳои ҳамсони дигар низ ошкор шудааст",-гуфтааст ВКД дар шарҳи боздошти раҳбарони ширкатҳо.

Зидди гумонбарон бар пояи банди "азхудкунии маблағи калон бо маслиҳати пешакӣ" парвандаи ҷиноӣ боз шудааст.

Навбатпоии сокинони Ишқобод барои хариди шакару биринҷ

Дар назди фурӯшгоҳҳои давлатии шаҳри Ишқободи Туркманистон, аз ҷумла дар мағозаҳои бозори марказии пойтахт вақтҳои ахир навбатпоии сокинон барои харидани биринҷ ва шакар мушоҳида мешавад.

Бахши туркмании Радиои Озодӣ видеои навбатпоии сокинонро дар назди фурӯшгоҳҳои Ишқобод дар даст дорад, вале ба хотири таъмини амнияти хабарнигоронаш аз нашри он худдорӣ мекунад.

Дар навор дида мешавад, даҳҳо одам барои харидани шакар дар назди фурӯшгоҳ навбат истодаанд. Дар пайи ба миён омадани навбатпоиҳо фурӯши биринҷ низ маҳдуд шуда, бар ҳар як нафар 3 кило биринҷ ва 1 кило шакар фурӯхта мешавад.

Нархи маҳсулоти фурӯшгоҳҳои давлатӣ нисбат ба бозор ва мағозаҳои хусусӣ арзон буда, дар ҳоли ҳозир як кило шакар 8 манат ва як кило биринҷ 7 манат (бо қурби расмӣ 2 доллар) фурӯхта мешавад. Нархи як кило биринҷ дар бозор 20 манат ва як кило шакар 12 манат аст.

Сокинони Туркманистон аз охирҳои соли 2017 ба ин сӯ бо мушкили норасоии маводи ғизоӣ, аз ҷумла орд, нон, равғани пахта ва тухм рӯбарӯ ҳастанд ва болоравии нархоҳо низ пайваста ба назар мерасад.

Ба Путин, Лукашенко ва Ҷеенбеков "ордени Назарбоев" доданд

Роҳбари Қазоқистон ба президенти Русия Владимир Путин, роҳбари Белорус Александр Лукашенко ва президенти Қирғизистон Сооронбой Ҷеенбеков ордени "Президенти нахустини Қазоқистон - пешвои миллат Нурсултон Назарбоев" тақдим кард.

Фармони Қосимҷомарт Тоқаев дар бораи тақдими орденҳо 28-уми май нашр шуд. Дар фармон омадааст, ки се роҳбар "ба ифтихори 25-солагии пайдоиши идеяи ҳамгироии Авруосиё ва панҷсолагии имзои Шартнома дар бораи Иттиҳоди иқтисодии Авруосиё, инчунин саҳми вижа дар тақвият ва густариши ҳамкориҳо бо Қазоқистон" бо орден мушарраф мешаванд.

Дар ҳайати иттиҳоди мазкур, ки аз сӯи Москва роҳбарӣ мешавад, Арманистон низ шомил аст. Имрӯз, 29-уми май, дар пойтахти Қазоқистон саммити Иттиҳоди иқтисодии Авруосиё баргузор мешавад.

Оғози таҳқиқи таҷовузи зани узбек ҳамроҳи духтари 12-солааш дар Русия

Дар шаҳри Санкт-Петербурги Русия яке аз ду марди гумонбарро дар нигаҳдории ғайриқонунӣ ва озору азияти ҷинсии шаҳрванди Узбекистон ҳамроҳи духтари 12-солааш боздошт карданд. Ин ду мард ба он айбдор мешаванд, ки зани 33-сола аз шаҳри Тошканд Н. ва духтари 12-солаашро ғайриқонунӣ аз озодӣ маҳрум ва таҷовуз кардаанд. Гумонбари боздоштшуда шаҳрванди 47-солаи Тоҷикистон аст.

Ба иттилои телевизиони Piter.tv, Кумитаи тафтишотии шаҳри Санкт-Петербург дар робита ба ҳодисаи мазкур бо бандҳои "Таҷовуз" ва "Ғайриқонунӣ аз озодӣ маҳрум кардани ду ва зиёда аз он бо шумули ноболиғ" парвандаи ҷиноӣ боз кардааст. Ба гуфтаи раҳбари ҷамъияти минтақавии узбекони "Ватандош" Усмон Баротов, гумонбарон занро ҳамроҳи ду фарзандаш дар як манзили иҷора ба муддати тӯлонӣ нигаҳ дошта, озори ҷинсӣ расондаанд.

"18-уми май тавассути шабакаи иҷтимоии "Одноклассникӣ" ба ман муроҷиат кард. Рӯзи душанбе ҳамроҳи як шиносам онҳоро ба Кумитаи тафтишотӣ оварда, ариза навиштем. Ба гуфтаи зан, ӯ ҳамроҳи духтари 12-сола ва писари 7-солааш дар Санкт-Петербург зиндагӣ мекард. Дар ҳамсоягияш марде аз Тоҷикистон ҳамроҳи як ҷияни 17-солааш мезист. Ин ҷавон, ки ба хонаи онҳо зиёд меомадааст, рӯзе духтари занро танҳо пайдо ва таҷовуз кардааст. Духтар 7-уми май дар ин бора ба модараш хабар додааст ва вақте зан барои даъво ба назди марди ҳамсоя меравад, ӯ низ ӯро ба хона дароварда, латтукӯб ва таҷовуз кардааст",-афзуд Баротов.

Бино ба хабари расонаҳои русӣ, гумонбари асосии парванда - шаҳрванди 47-солаи Тоҷикистон бо хариду фурӯши мошин машғул буда, дар Русия ғайриҷонунӣ ба сар мебарад.

Раиси Шӯрои Аврупо сафараш ба Осиёи Марказиро шуруъ мекунад

Маркази матбуотии Шӯрои Аврупо хабар медиҳад, ки раиси Шӯро Доналд Туск сафари Осиёи Марказиашро рӯзи 29-уми май аз Тоҷикистон шуруъ мекунад. Баъди мулоқот бо Эмомалӣ Раҳмон, вай 30-юми май ба шаҳри Нурсултон меравад.

Доналд Туск 31-уми май дар Қазоқистон бо президенти муваққати он кишвар Қосимҷомарт Тоқаев ва президенти пешини Қазоқистон Нурсултон Назарбоев дидор мекунад. Оқои Туск 31-уми май ба Узбекистон меояд ва бо президент Шавкат Мирзиёев мулоқот анҷом медиҳад. Сафари раиси Шӯрои Аврупо дар минтақа то 2-юми июн идома мекунад.

Туск дар ҳоле ба кишварҳои Осиёи Марказӣ меояд, ки дипломатҳои Иттиҳоди Аврупо рӯзи 15-уми май дар Брюссел ёддошти муштараки ин ниҳодро дар бораи стратегияи нави Иттиҳодияи Аврупо дар Осиёи Марказӣ қабул карданд.

Ин қадами ниҳоӣ дар остонаи қабули стратегияи “ИА ва ОМ: Имкониятҳои нав ба хотири ҳамкориҳои қавӣ” аст, ки интизор меравад моҳи июни имсол аз тарафи вазирони умури хориҷии эътилоф тасвиб ва моҳи июл дар мулоқоти раҳбари сиёсати хориҷии ИА Федерика Могеринӣ дар Бишкек муаррифӣ шавад.

Стратегияи нав бо ҳадафи мусоидат ба минтақа дар муқобила бо ҳама гуна зарбаҳои (иқтисодии) дохиливу хориҷӣ, риояи қонун ва ҳуқуқи башар, фароҳам овардани фазои озоди кор барои сохторҳои маданӣ ва матбуоти мустақил амалӣ мешавад.

Зеленский шаҳрвандии Михаил Саакашвилиро барқарор кард

Михаил Саакашвили

Владимир Зеленский, президенти Украина, шаҳрвандии Михаил Саакашвили, волии пешини Одессаро барқарор кард.

Дар фармоне, ки рӯзи 28-уми май имзо шуд, қарори президенти пешини Украина Петро Порошенко аз моҳи июли соли 2017 дар бораи аз шаҳрвандии Украина маҳрум шудани Саакашвилӣ бекор гардидааст.

Фармони Зеленский баъди ҳашт рӯзи ба ҳайси президент савганд ёд кардани ӯ ва шаш рӯз баъд аз дархости вакили мудофеи Михаил Саакашвили сурат гирифт.

Таня Баҳрановска, сухангӯи Саакашвили, ба Радиои Озодӣ гуфт, ӯ бегоҳи 29-уми май бо ҳавопаймо аз Варшава, пойтахти Лаҳистон, ба Киев парвоз хоҳад кард.

Михаил Саакашвили, раиси ҷумҳури пешини Гурҷистон ва дӯсти даврони донишҷӯии Петро Порошенко, соли 2015 шаҳрвандии Украинаро гирифт ва раиси вилояти Одесса таъйин шуд. Ба хотири онки байни Гурҷистону Украина низоми душаҳрвандӣ нест, мақомоти Тифлис ӯро аз шаҳрвандии он кишвар маҳрум карданд.

Моҳи ноябри соли 2016 муносибати Саакашвили бо Порошенко дар робита ба иттиҳоми фасоди молӣ бад шуд ва ӯро аз мақоми раиси вилояти Одесса барканор карданд. Моҳи июли соли 2017, вақте Михаил Саакашвили ҳизби мухолифи “Ҷунбиши нерӯҳои нав”-ро созмон дод, Порошенко ӯро аз шаҳрвандии Украина маҳрум намуд. Вай моҳи феврали соли 2018 аз Украина ихроҷ карда шуд.

Саакашвили аз он вақт то кунун дар Ҳолланд зиндагӣ мекунад.

Таҳдиди раиси Фарғона: "Рӯдаҳоятонро ба саратон "салла" мекунам"

Шуҳрат Ғаниев

Раиси вилояти Фарғонаи Узбекистон Шуҳрат Ғаниев дар як ҷаласа раҳбарони Бюрои иҷрои иҷборӣ ва Нозироти андози ин вилоятро таҳдид кардааст, ки “рӯдаҳоятонро канда, бар саратон мепечонам”.

Соҳибкоре, ки навори суҳбати Ғаниевро фиристод, мегӯяд, онро 22-юми май дар як ҷаласа дар бинои ҳукумати вилояти Фарғона сабт кардааст. Ғаниев аз раҳбарони Бюрои иҷрои иҷборӣ ва Нозироти андози вилояти Фарғона "хоиноне ном мебарад, ки аз зери дор гурехтаанд".

"5-10 соли умрат дар зиндон хоҳад гузашт. Ба ман фарқ надорад, ки ту раҳбари Бюрои иҷрои иҷборӣ ҳастӣ, ё ниҳоди дигар. Дар ҳар сурат шумо, лаънатиҳоро зиндонӣ хоҳам кард. Худро базӯр қапида истодаам, вагарна рӯдаҳоятонро канда, бар саратон мепечонам", -- мегӯяд ӯ.

Раиси вилояти Фарғона дар идома меафзояд, раиси ду ниҳоди мазкур зодаи шаҳри Тошканд ҳастанд ва ба вилоят зарари зиёде расондаанд.

"Шумо пас аз таъйин шудан ба вазифаҳои раҳбарӣ дар Фарғона вилояти моро ба ботлоқ андохтед. Бори дигар огаҳ мекунам, ки ҳардуяшонро зиндонӣ хоҳам кард. Агар нақшаро дар моҳи май иҷро накунанд, ба ҷавобгарии ҷиноӣ кашида хоҳанд шуд. Ба ман ин гуна хоинҳо лозим нест. Онҳо мо - фарғонагиҳоро масхара доранд. Инҷо маҳз онҳое ҷамъ шудаанд, ки аз таги дор гурехтаанд", -- изҳор медорад Ғаниев.

Шуҳрат Ғаниев бо кадом сабаб раҳбарони Бюрои иҷрои иҷборӣ ва Нозироти андози Фарғонаро сахт сарзаниш мекунад, маълум нест. Вале аз суҳбатҳои ӯ фаҳмида мешавад, ки онҳо нақшаро иҷро накардаанд.

Лавров: "Нерӯҳои хориҷӣ аз Афғонистон пурра бароварда шаванд"

Сергей Лавров, вазири корҳои хориҷии Русия бо Ҳомид Карзай, раисҷумҳури собиқи Афғонистон

Сергей Лавров, вазири корҳои хориҷии Русия, дар нишасте дар Маскав бо ҳайати Толибон хостори баровардани нерӯҳои байналмилалӣ аз Афғонистон шуд.

Гурӯҳи 14-нафарии Толибон бо роҳбарии Мулло Абдулғанӣ Бародар барои гуфтугӯ бо сиёсатмадорони баландпояи афғон ва бузургони қабилавӣ ду рӯз дар Маскав буданд.

Лавров рӯзи 28-уми май дар нишасте бахшида ба 100-солагии муносибатҳои Русияву Афғонистон гуфт: “Русия бовар дорад, ки низои Афғонистон бо роҳи низомӣ ҳал намешавад. Роҳи ягонаи имконпазир ба сулҳ дар Афғонистон – роҳи сиёсӣ ва дипломатӣ мебошад.”

“Мо даъват мекунем, ки нерӯҳои хориҷӣ аз Афғонистон пурра бароварда шаванд. Мо аз ҳамаи ҷонибҳои Афғонистон мехоҳем ҳарчи зудтар бо дар бар гирифтани гурӯҳи густурдаи нерӯҳои сиёсӣ ва иҷтимоӣ гуфтугӯҳоро оғоз кунанд”, -- гуфт Лавров ҳангоми шодбоши ҳайати Толибон дар ин нишаст, ҳарчанд ин ҷунбиш як созмони террористӣ дар Русия шинохта шудааст.

Ба гузориши ТАСС, дар ин нишаст президенти пешинаи Афғонистон Ҳомид Карзай ва сафири Афғонистон дар Русия Муҳаммадлатиф Баҳанд иштирок кардаанд. Аммо рӯшан нест, ки Баҳанд бо ҳайати Толибон гуфтугӯ дошт. Муҷоҳид нагуфт, ки оё Толибон бо намояндагони ҳукумати Афғонистон вомехӯранд ё не.

"Омодабош" дар Сербистон, баъди амалиёти пулиси Косово

Амалиёти пулис субҳи 28-уми май дар минтақаи асосан сербнишини шимоли Косово муносибати бе ин ҳам бади Приштина бо Сербистонро бадтар кард. Ин амалиёт Белгардро водор намудааст, ки нерӯҳояшро ба ҳолати омодабош дарорад.

Пулиси Косово рӯзи 28-уми май гуфт, нерӯҳои махсус дар шимоли ин кишвар “чанде аз кормандони маҳаллии пулис ва сокинонро дастгир кардаанд”.

Ҳошим Тачи, президенти Косово, дар Приштина ба хабарнигорон гуфт, як шаҳрванди Русия низ дастгир шудааст, ки зери ниқоби дипломат мехост аз амалиёт пешгирӣ кунад. Ӯ ҷузъиёти бештар надод.

Вале сафорати Русия дар Белград гуфт, нафари боздоштшуда Михаил Красношченко аст.

Пулиси Косово дастгиршудаҳоро барои “фаъолияти ҷиноӣ” муттаҳам кард.

Косово як вилояти пешини Сербистон аст, ки 11 сол пеш аз он ҷудо шуд. Бо онки 115 кишвари дунё Косоворо ба ҳайси давлати мустақил эътироф кардаанд, Сербистон истиқлоли онро ҳеҷ гоҳ напазируфт.

Оҷонсӣ гуфт, мизони бекорӣ дар Тоҷикистон 2,2% аст, вале...

Оҷонси омори Тоҷикистон гузориш дод, ки аз шумораи умумии қувваи корӣ дар кишвар 2,2 дарсад ҳамчун шахсони бекор расман сабтином шудаанд. Вале коршиносон мегӯянд, омори расмии бекорӣ дар Тоҷикистон воқеӣ нест ва шумораи бекорон ба маротиб аз ин бештар аст.

Мақомот мегӯянд, то охири моҳи марти имсол 51 ҳазор нафарро дар Тоҷикистон расман бекор эътироф кардаанд. Тақрибан панҷоҳ дарсдаи ин афрод занон будаанд.

Оҷонси омор имсол ҳамчунин ибораи нави "бекории пинҳонӣ"-ро ба кор бурдааст. Мақомот мегӯянд, "бекории пинҳонӣ машғулияти нопурра аст ва замоне ки қисми кормандон ба рухсатии маҷбурӣ ва ё рӯзи кории нопурра фиристода мешаванд."

Ба маълумоти Оҷонси омор, дар моҳҳои январ-марти соли ҷорӣ 3 ҳазору 800 нафар бо хости маъмурият ба рухсатии маҷбурӣ фиристода шудаанд, ки аз онҳо 2 ҳазору 100 нафар бе маош мондаанд.

Зариф гуфт, Эрон силоҳи ҳастаӣ намесозад

Муҳаммадҷавод Зариф

Муҳаммадҷавод Зариф – вазири корҳои хориҷии Эрон – гуфт, кишвараш ба дунболи сохтани силоҳи ҳастаӣ нест.

Зариф инро рӯзи 27-уми май дар ҷавоб ба изҳороти нави Доналд Трамп, президенти Амрико, баён кард.

Трамп бо сафари давлатӣ дар Ҷопон қарор дорад. Ӯ рӯзи 27-уми май дар Токио гуфт, Вашингтон дар пайи сарнагунии режими Эрон нест, балки мехоҳад бовар ҳосил кунад, ки Теҳрон силоҳи ҳастаӣ намесозад.

Пас аз ин изҳороти Трамп, вазири корҳои хориҷии Эрон дар "Твиттер" навишт, раҳбари олии ин кишвар Оятуллоҳ Алии Хоманаӣ бо судури фатво Теҳронро аз дастёбӣ ба силоҳи ҳастаӣ манъ кардааст. Ӯ ҳамчунон дар идома навишт, "терроризми иқтисодӣ" ба мардуми Эрон осеб мерасонад ва "боис ба таниш дар минтақа мешавад".

Робитаҳо байни Теҳрону Вашингтон баъди хуруҷи Амрико аз созиши атомии соли 2015 бо Эрон бисёр сард шудааст. Ҳукумати Доналд Трамп баъд аз ин таҳримот ба зидди Эронро барқарор кард ва дар чанд ҳафтаи гузашта ҳузури нерӯҳояш дар Ховари Миёнаро низ тақвият бахшид.

Ҳамла ба мактабҳо дар Афғонистон тақрибан 3 баробар афзудааст

Бунёди кӯдакони Созмони Милали Муттаҳид (UNICEF) гуфт, ки соли гузашта ҳамлаи ҷангҷӯён ба мактабҳо дар Афғонистон тақрибан се баробар афзудааст.

Ин созмон рӯзи 28-уми май гуфт, агар дар соли 2017-ум 68 ҳамла ба мактабҳо сабт шуда буд, дар соли 2018 ин рақам ба 192 расидааст.

Аз соли 2015 ба ин тараф бори аввал афзоиши ҳамла ба мактабҳо дар Афғонистон мушоҳида шудааст. Форе Ҳенриетта, мудири иҷроияи ЮНИСЕФ мегӯяд, "маориф дар Афғонистон зери оташ аст."

Вай афзуд, "ҳамлаҳои бешуурона ба мактабҳо, куштану захмӣ кардан, осеб расондан ва рабудани омӯзгорон ва таҳдидҳо алайҳи маориф умед ва орзуҳои як насли комили кӯдаконро аз байн мебаранд."

Ба далели таҳдиди гуруҳҳои ҷангҷӯе ба монанди «Толибон» ва «Давлати исломӣ» дар тамоми Афғонистон беш аз 1000 мактаб баста мемонад.

ЮНИСЕФ мегӯяд, эҳтимол истифодаи бинои мактабҳо ба ҳайси марказҳои овоздиҳӣ дар интихоботи порлумонии соли 2018 яке аз омилҳои афзоиши ҳамлаҳо шудааст.

Ин бахши Созмони Милали Муттаҳид мегӯяд, тақрибан 3,7 миллион нафар, яъне ниме аз кӯдакони синни мактабӣ дар Афғонистон аз таҳсил дуранд.

Баҳси додгоҳии ноширони китобҳои Чингиз Айтматов дар Туркия

Додгоҳе дар Туркия баррасии шикояти нашркунандагони китобҳои нависандаи қирғиз Чингиз Айтматовро бо забони туркӣ оғоз кард. Бино ба навиштаи "Hürriyet", баҳси додгоҳӣ бар сари ҳаққи муаллифӣ аст.

Дар Туркия аз соли 1991 то соли 2007 китобҳои Айтматовро "Ötüken yayıncılık" нашр мекард ва соли 2017 ҳуқуқи муаллифии осори нависандаи қирғиз ба ширкати "Nora kitap" дода шуд. Вале аввалӣ бо вуҷуди ин нашри китобҳои Айтматовро идома дод. Дар натиҷа "Nora kitap" соли 2017 зидди "Ötüken yayıncılık" ба додгоҳ шикоят бурд.

Китобҳои "Киштии сафед" ва "Ниҳолаки рӯймолсурхаки ман"-и Чингиз Айтматов ба рӯйхати "100 асари классикӣ"-и тасдиқкардаи Вазорати маорифи Туркия шомил шудаанд.

Чингиз Айтматов – яке аз нависандаҳои серхонандатарини ҷаҳон ба шумор рафта, осори ӯ бо беш аз 170 забон тарҷума шудааст.

Дар Ҷопон як марди ношинос 2 нафарро кушт ва 15 танро захмӣ кард

Дар Ҷопон як шахси ношинос бо корд ба одамоне ҳамла кард, ки дар истгоҳи автобус истода буданд. Ин ҳодиса дар шаҳри Кавасаки наздикии Токио рух дод.

Дар ҳодисаи мазкур 15 нафар, аз ҷумла 13 хонандаи мактаб маҷруҳ шуда, ду нафари дигар ба ҳалокат расиданд. Ҳодиса субҳи 28-уми май рух дод.

Пулис ҳамлагарро боздошт кард. Марди ношиноси 40-50-сола худро бо корд захмӣ кард ва дар бемористон фавтид.

Ба иттилои расонаҳо, дар ҷои ҳодиса ду корд пайдо шуд. Шахсият ва ҳадафи ҳамлагар то кунун мушаххас нашудааст.

Дар Ҷопон дар соли 2016 дар бемористони равонӣ як коргар 19 одамро бо корд кушта буд. Вай гуфт, мехоҳад, одамони имконияташон маҳдуд вуҷуд надошта бошанд.

Мақомоти Ишқобод коргоҳҳоро аз биноҳои нав берун мекунанд

Мақомоти Ишқобод ширкатҳоеро, ки дар таҳхонаи биноҳо коргоҳ доранд, маҷбур мекунанд, онҳоро холӣ созанд.

"Аксари ширкатҳое, ки дар минтақаҳои марказӣ ҷойгир ҳастанд, намехоҳанд, ба маконҳои дигар раванд. Ба ҳамин хотир, мехоҳанд дар марказ коргоҳи нав пайдо кунанд", - хабар дод як сокини шаҳри Ишқобод.

Ахиран хабар расид, ки мақомоти шаҳрӣ мехоҳанд, ҳамаи коргоҳҳои ширкатҳоро ба Минтақаи саноатии Ишқобод кӯчонанд. Ин минтақа дар канори шаҳр ҷойгир аст. Талаботи мақомот шаби 15 май ба соҳибкорон расонида шуд.

Аммо хабарнигори бахши туркмании Радиои Озодӣ мегӯяд, аксари соҳибкорон мехоҳанд, дар маркази шаҳр боқӣ монанд. "Ширкатҳо намехоҳанд, аз маркази шаҳр кӯч банданд. Ба ҳамин хотир, ҳоло мақомот таҳхонаи биноҳоро тафтиш карда, ширкатҳоро маҷбур ба кӯчидан мекунанд", - гуфт хабарнигор.

Ёфтҳои бештар

Гузоришҳои видеоӣ

XS
SM
MD
LG