Пайвандҳои дастрасӣ

Хабари нав

Хабарҳо

Зеленский шаҳрвандии Михаил Саакашвилиро барқарор кард

Михаил Саакашвили

Владимир Зеленский, президенти Украина, шаҳрвандии Михаил Саакашвили, волии пешини Одессаро барқарор кард.

Дар фармоне, ки рӯзи 28-уми май имзо шуд, қарори президенти пешини Украина Петро Порошенко аз моҳи июли соли 2017 дар бораи аз шаҳрвандии Украина маҳрум шудани Саакашвилӣ бекор гардидааст.

Фармони Зеленский баъди ҳашт рӯзи ба ҳайси президент савганд ёд кардани ӯ ва шаш рӯз баъд аз дархости вакили мудофеи Михаил Саакашвили сурат гирифт.

Таня Баҳрановска, сухангӯи Саакашвили, ба Радиои Озодӣ гуфт, ӯ бегоҳи 29-уми май бо ҳавопаймо аз Варшава, пойтахти Лаҳистон, ба Киев парвоз хоҳад кард.

Михаил Саакашвили, раиси ҷумҳури пешини Гурҷистон ва дӯсти даврони донишҷӯии Петро Порошенко, соли 2015 шаҳрвандии Украинаро гирифт ва раиси вилояти Одесса таъйин шуд. Ба хотири онки байни Гурҷистону Украина низоми душаҳрвандӣ нест, мақомоти Тифлис ӯро аз шаҳрвандии он кишвар маҳрум карданд.

Моҳи ноябри соли 2016 муносибати Саакашвили бо Порошенко дар робита ба иттиҳоми фасоди молӣ бад шуд ва ӯро аз мақоми раиси вилояти Одесса барканор карданд. Моҳи июли соли 2017, вақте Михаил Саакашвили ҳизби мухолифи “Ҷунбиши нерӯҳои нав”-ро созмон дод, Порошенко ӯро аз шаҳрвандии Украина маҳрум намуд. Вай моҳи феврали соли 2018 аз Украина ихроҷ карда шуд.

Саакашвили аз он вақт то кунун дар Ҳолланд зиндагӣ мекунад.

Таҳдиди раиси Фарғона: "Рӯдаҳоятонро ба саратон "салла" мекунам"

Шуҳрат Ғаниев

Раиси вилояти Фарғонаи Узбекистон Шуҳрат Ғаниев дар як ҷаласа раҳбарони Бюрои иҷрои иҷборӣ ва Нозироти андози ин вилоятро таҳдид кардааст, ки “рӯдаҳоятонро канда, бар саратон мепечонам”.

Соҳибкоре, ки навори суҳбати Ғаниевро фиристод, мегӯяд, онро 22-юми май дар як ҷаласа дар бинои ҳукумати вилояти Фарғона сабт кардааст. Ғаниев аз раҳбарони Бюрои иҷрои иҷборӣ ва Нозироти андози вилояти Фарғона "хоиноне ном мебарад, ки аз зери дор гурехтаанд".

"5-10 соли умрат дар зиндон хоҳад гузашт. Ба ман фарқ надорад, ки ту раҳбари Бюрои иҷрои иҷборӣ ҳастӣ, ё ниҳоди дигар. Дар ҳар сурат шумо, лаънатиҳоро зиндонӣ хоҳам кард. Худро базӯр қапида истодаам, вагарна рӯдаҳоятонро канда, бар саратон мепечонам", -- мегӯяд ӯ.

Раиси вилояти Фарғона дар идома меафзояд, раиси ду ниҳоди мазкур зодаи шаҳри Тошканд ҳастанд ва ба вилоят зарари зиёде расондаанд.

"Шумо пас аз таъйин шудан ба вазифаҳои раҳбарӣ дар Фарғона вилояти моро ба ботлоқ андохтед. Бори дигар огаҳ мекунам, ки ҳардуяшонро зиндонӣ хоҳам кард. Агар нақшаро дар моҳи май иҷро накунанд, ба ҷавобгарии ҷиноӣ кашида хоҳанд шуд. Ба ман ин гуна хоинҳо лозим нест. Онҳо мо - фарғонагиҳоро масхара доранд. Инҷо маҳз онҳое ҷамъ шудаанд, ки аз таги дор гурехтаанд", -- изҳор медорад Ғаниев.

Шуҳрат Ғаниев бо кадом сабаб раҳбарони Бюрои иҷрои иҷборӣ ва Нозироти андози Фарғонаро сахт сарзаниш мекунад, маълум нест. Вале аз суҳбатҳои ӯ фаҳмида мешавад, ки онҳо нақшаро иҷро накардаанд.

Лавров: "Нерӯҳои хориҷӣ аз Афғонистон пурра бароварда шаванд"

Сергей Лавров, вазири корҳои хориҷии Русия бо Ҳомид Карзай, раисҷумҳури собиқи Афғонистон

Сергей Лавров, вазири корҳои хориҷии Русия, дар нишасте дар Маскав бо ҳайати Толибон хостори баровардани нерӯҳои байналмилалӣ аз Афғонистон шуд.

Гурӯҳи 14-нафарии Толибон бо роҳбарии Мулло Абдулғанӣ Бародар барои гуфтугӯ бо сиёсатмадорони баландпояи афғон ва бузургони қабилавӣ ду рӯз дар Маскав буданд.

Лавров рӯзи 28-уми май дар нишасте бахшида ба 100-солагии муносибатҳои Русияву Афғонистон гуфт: “Русия бовар дорад, ки низои Афғонистон бо роҳи низомӣ ҳал намешавад. Роҳи ягонаи имконпазир ба сулҳ дар Афғонистон – роҳи сиёсӣ ва дипломатӣ мебошад.”

“Мо даъват мекунем, ки нерӯҳои хориҷӣ аз Афғонистон пурра бароварда шаванд. Мо аз ҳамаи ҷонибҳои Афғонистон мехоҳем ҳарчи зудтар бо дар бар гирифтани гурӯҳи густурдаи нерӯҳои сиёсӣ ва иҷтимоӣ гуфтугӯҳоро оғоз кунанд”, -- гуфт Лавров ҳангоми шодбоши ҳайати Толибон дар ин нишаст, ҳарчанд ин ҷунбиш як созмони террористӣ дар Русия шинохта шудааст.

Ба гузориши ТАСС, дар ин нишаст президенти пешинаи Афғонистон Ҳомид Карзай ва сафири Афғонистон дар Русия Муҳаммадлатиф Баҳанд иштирок кардаанд. Аммо рӯшан нест, ки Баҳанд бо ҳайати Толибон гуфтугӯ дошт. Муҷоҳид нагуфт, ки оё Толибон бо намояндагони ҳукумати Афғонистон вомехӯранд ё не.

"Омодабош" дар Сербистон, баъди амалиёти пулиси Косово

Амалиёти пулис субҳи 28-уми май дар минтақаи асосан сербнишини шимоли Косово муносибати бе ин ҳам бади Приштина бо Сербистонро бадтар кард. Ин амалиёт Белгардро водор намудааст, ки нерӯҳояшро ба ҳолати омодабош дарорад.

Пулиси Косово рӯзи 28-уми май гуфт, нерӯҳои махсус дар шимоли ин кишвар “чанде аз кормандони маҳаллии пулис ва сокинонро дастгир кардаанд”.

Ҳошим Тачи, президенти Косово, дар Приштина ба хабарнигорон гуфт, як шаҳрванди Русия низ дастгир шудааст, ки зери ниқоби дипломат мехост аз амалиёт пешгирӣ кунад. Ӯ ҷузъиёти бештар надод.

Вале сафорати Русия дар Белград гуфт, нафари боздоштшуда Михаил Красношченко аст.

Пулиси Косово дастгиршудаҳоро барои “фаъолияти ҷиноӣ” муттаҳам кард.

Косово як вилояти пешини Сербистон аст, ки 11 сол пеш аз он ҷудо шуд. Бо онки 115 кишвари дунё Косоворо ба ҳайси давлати мустақил эътироф кардаанд, Сербистон истиқлоли онро ҳеҷ гоҳ напазируфт.

Оҷонсӣ гуфт, мизони бекорӣ дар Тоҷикистон 2,2% аст, вале...

Оҷонси омори Тоҷикистон гузориш дод, ки аз шумораи умумии қувваи корӣ дар кишвар 2,2 дарсад ҳамчун шахсони бекор расман сабтином шудаанд. Вале коршиносон мегӯянд, омори расмии бекорӣ дар Тоҷикистон воқеӣ нест ва шумораи бекорон ба маротиб аз ин бештар аст.

Мақомот мегӯянд, то охири моҳи марти имсол 51 ҳазор нафарро дар Тоҷикистон расман бекор эътироф кардаанд. Тақрибан панҷоҳ дарсдаи ин афрод занон будаанд.

Оҷонси омор имсол ҳамчунин ибораи нави "бекории пинҳонӣ"-ро ба кор бурдааст. Мақомот мегӯянд, "бекории пинҳонӣ машғулияти нопурра аст ва замоне ки қисми кормандон ба рухсатии маҷбурӣ ва ё рӯзи кории нопурра фиристода мешаванд."

Ба маълумоти Оҷонси омор, дар моҳҳои январ-марти соли ҷорӣ 3 ҳазору 800 нафар бо хости маъмурият ба рухсатии маҷбурӣ фиристода шудаанд, ки аз онҳо 2 ҳазору 100 нафар бе маош мондаанд.

Зариф гуфт, Эрон силоҳи ҳастаӣ намесозад

Муҳаммадҷавод Зариф

Муҳаммадҷавод Зариф – вазири корҳои хориҷии Эрон – гуфт, кишвараш ба дунболи сохтани силоҳи ҳастаӣ нест.

Зариф инро рӯзи 27-уми май дар ҷавоб ба изҳороти нави Доналд Трамп, президенти Амрико, баён кард.

Трамп бо сафари давлатӣ дар Ҷопон қарор дорад. Ӯ рӯзи 27-уми май дар Токио гуфт, Вашингтон дар пайи сарнагунии режими Эрон нест, балки мехоҳад бовар ҳосил кунад, ки Теҳрон силоҳи ҳастаӣ намесозад.

Пас аз ин изҳороти Трамп, вазири корҳои хориҷии Эрон дар "Твиттер" навишт, раҳбари олии ин кишвар Оятуллоҳ Алии Хоманаӣ бо судури фатво Теҳронро аз дастёбӣ ба силоҳи ҳастаӣ манъ кардааст. Ӯ ҳамчунон дар идома навишт, "терроризми иқтисодӣ" ба мардуми Эрон осеб мерасонад ва "боис ба таниш дар минтақа мешавад".

Робитаҳо байни Теҳрону Вашингтон баъди хуруҷи Амрико аз созиши атомии соли 2015 бо Эрон бисёр сард шудааст. Ҳукумати Доналд Трамп баъд аз ин таҳримот ба зидди Эронро барқарор кард ва дар чанд ҳафтаи гузашта ҳузури нерӯҳояш дар Ховари Миёнаро низ тақвият бахшид.

Ҳамла ба мактабҳо дар Афғонистон тақрибан 3 баробар афзудааст

Бунёди кӯдакони Созмони Милали Муттаҳид (UNICEF) гуфт, ки соли гузашта ҳамлаи ҷангҷӯён ба мактабҳо дар Афғонистон тақрибан се баробар афзудааст.

Ин созмон рӯзи 28-уми май гуфт, агар дар соли 2017-ум 68 ҳамла ба мактабҳо сабт шуда буд, дар соли 2018 ин рақам ба 192 расидааст.

Аз соли 2015 ба ин тараф бори аввал афзоиши ҳамла ба мактабҳо дар Афғонистон мушоҳида шудааст. Форе Ҳенриетта, мудири иҷроияи ЮНИСЕФ мегӯяд, "маориф дар Афғонистон зери оташ аст."

Вай афзуд, "ҳамлаҳои бешуурона ба мактабҳо, куштану захмӣ кардан, осеб расондан ва рабудани омӯзгорон ва таҳдидҳо алайҳи маориф умед ва орзуҳои як насли комили кӯдаконро аз байн мебаранд."

Ба далели таҳдиди гуруҳҳои ҷангҷӯе ба монанди «Толибон» ва «Давлати исломӣ» дар тамоми Афғонистон беш аз 1000 мактаб баста мемонад.

ЮНИСЕФ мегӯяд, эҳтимол истифодаи бинои мактабҳо ба ҳайси марказҳои овоздиҳӣ дар интихоботи порлумонии соли 2018 яке аз омилҳои афзоиши ҳамлаҳо шудааст.

Ин бахши Созмони Милали Муттаҳид мегӯяд, тақрибан 3,7 миллион нафар, яъне ниме аз кӯдакони синни мактабӣ дар Афғонистон аз таҳсил дуранд.

Баҳси додгоҳии ноширони китобҳои Чингиз Айтматов дар Туркия

Додгоҳе дар Туркия баррасии шикояти нашркунандагони китобҳои нависандаи қирғиз Чингиз Айтматовро бо забони туркӣ оғоз кард. Бино ба навиштаи "Hürriyet", баҳси додгоҳӣ бар сари ҳаққи муаллифӣ аст.

Дар Туркия аз соли 1991 то соли 2007 китобҳои Айтматовро "Ötüken yayıncılık" нашр мекард ва соли 2017 ҳуқуқи муаллифии осори нависандаи қирғиз ба ширкати "Nora kitap" дода шуд. Вале аввалӣ бо вуҷуди ин нашри китобҳои Айтматовро идома дод. Дар натиҷа "Nora kitap" соли 2017 зидди "Ötüken yayıncılık" ба додгоҳ шикоят бурд.

Китобҳои "Киштии сафед" ва "Ниҳолаки рӯймолсурхаки ман"-и Чингиз Айтматов ба рӯйхати "100 асари классикӣ"-и тасдиқкардаи Вазорати маорифи Туркия шомил шудаанд.

Чингиз Айтматов – яке аз нависандаҳои серхонандатарини ҷаҳон ба шумор рафта, осори ӯ бо беш аз 170 забон тарҷума шудааст.

Дар Ҷопон як марди ношинос 2 нафарро кушт ва 15 танро захмӣ кард

Дар Ҷопон як шахси ношинос бо корд ба одамоне ҳамла кард, ки дар истгоҳи автобус истода буданд. Ин ҳодиса дар шаҳри Кавасаки наздикии Токио рух дод.

Дар ҳодисаи мазкур 15 нафар, аз ҷумла 13 хонандаи мактаб маҷруҳ шуда, ду нафари дигар ба ҳалокат расиданд. Ҳодиса субҳи 28-уми май рух дод.

Пулис ҳамлагарро боздошт кард. Марди ношиноси 40-50-сола худро бо корд захмӣ кард ва дар бемористон фавтид.

Ба иттилои расонаҳо, дар ҷои ҳодиса ду корд пайдо шуд. Шахсият ва ҳадафи ҳамлагар то кунун мушаххас нашудааст.

Дар Ҷопон дар соли 2016 дар бемористони равонӣ як коргар 19 одамро бо корд кушта буд. Вай гуфт, мехоҳад, одамони имконияташон маҳдуд вуҷуд надошта бошанд.

Мақомоти Ишқобод коргоҳҳоро аз биноҳои нав берун мекунанд

Мақомоти Ишқобод ширкатҳоеро, ки дар таҳхонаи биноҳо коргоҳ доранд, маҷбур мекунанд, онҳоро холӣ созанд.

"Аксари ширкатҳое, ки дар минтақаҳои марказӣ ҷойгир ҳастанд, намехоҳанд, ба маконҳои дигар раванд. Ба ҳамин хотир, мехоҳанд дар марказ коргоҳи нав пайдо кунанд", - хабар дод як сокини шаҳри Ишқобод.

Ахиран хабар расид, ки мақомоти шаҳрӣ мехоҳанд, ҳамаи коргоҳҳои ширкатҳоро ба Минтақаи саноатии Ишқобод кӯчонанд. Ин минтақа дар канори шаҳр ҷойгир аст. Талаботи мақомот шаби 15 май ба соҳибкорон расонида шуд.

Аммо хабарнигори бахши туркмании Радиои Озодӣ мегӯяд, аксари соҳибкорон мехоҳанд, дар маркази шаҳр боқӣ монанд. "Ширкатҳо намехоҳанд, аз маркази шаҳр кӯч банданд. Ба ҳамин хотир, ҳоло мақомот таҳхонаи биноҳоро тафтиш карда, ширкатҳоро маҷбур ба кӯчидан мекунанд", - гуфт хабарнигор.

Қазоқистон дар бораи вазъи Шинҷон: "Кори дохилии Чин аст"

Вазирони умури хориҷии Қазоқистон ва Чин.

Вазорати корҳои хориҷии Қазоқистон гуфт, дар бораи шумори қазоқтабороне, ки дар "марказҳои бозомӯзӣ"-и минтақаи Шинҷони Чин нигаҳдорӣ мешаванд, маълумот надорад.

Ин ниҳод 27-уми май дар посух ба дархости Бахши қазоқии Радиои Озодӣ ба Конвенсияи муносибатҳои дипломатии Вена аз соли 1963 истинод овардааст, ки дар равобити байналмилалӣ "дахолат ба умури дохилии кишвари дигарро манъ мекунад". "Қазоқистон ҳақ надорад, ба мушкили қазоқтабороне дахолат кунад, ки шаҳрвандони Чинанд",-омадааст дар посухи ВКХ Қазоқистон.

Ба огаҳии вазорат, сабаби асосии манъи сафари қазоқтаборон ба Қазоқистон нақзи қонунҳои муҳоҷирати Чин аст. "Агар қазоқтаборон низоми муҳоҷирати Чинро нақз накунанд, мақомоти ин кишвар монеи сафари онҳо нахоҳанд шуд",-афзудааст манбаъ.

Ба огаҳии Кумитаи муҳоҷирати Қазоқистон, соли 2018 шаҳрвандии ин кишварро 14 324 қазоқтабор аз Чин дарёфт кардааст. Танҳо дар чор моҳи аввали соли равон ба 1 929 қазоқтабор шаҳрвандии Қазоқистон дода шудааст.

Дар бораи таъқиби ақалиятҳои миллии Чин, аз ҷумла қазоқтаборон аз баҳори соли 2017 ба ин сӯ хабар дода мешавад. Гуруҳи қазоқтабарони ба Қазоқистон паноҳбурда моҳи октябри соли гузашта бо навиштани як хитобаи дастаҷамъӣ аз садри аъзами Олмон Ангела Меркел низ барои раҳоии наздиконашон аз "марказҳои бозомӯзии сиёсӣ"-и Шинҷон дархости кумак карда буданд.

Худи Пекин боздоштҳои дастаҷамъии ақалиятҳои миллиро рад мекунад. Мақомоти Чин мавҷуд будани "урдугоҳҳои махсус"-ро тасдиқ мекунанд, вале онҳоро "марказҳои омӯзиши касбӣ"-е меноманд, ки гӯё барои пешгирӣ аз экстремизми динӣ таъсис дода шудаанд.

КДАМ Қирғизистон: шумори муҳофизони Отамбоев кам нашудааст

Кумитаи давлатии амнияти миллии Қирғизистон (КДАМ) сарусадоҳои марбут ба муҳофизати президенти пешини ин кишвар Алмосбек Отамбоевро пас аз ҳабси муҳофизи шахсияш Дамир Мусакеев шарҳ дод.

"Бар асоси қонунгузорӣ, давлат президент, раиси порлумон, сарвазир, раиси Додгоҳи олӣ, президенти пешин, дар сурати зарурат вакили порлумон ва раҳбари давлат, ҳукумат ва ҳайати кишвари хориҷиро ҳангоми будубошашон дар Қирғизистон муҳофизат хоҳад кард",-омадааст дар баёнияи КДАМ.

Бино бар ин, ба гуфтаи КДАМ, шумори маъмуроне, ки амнияти Алмосбек Отамбоевро таъмин мекунанд, кам карда нашудааст.

Додгоҳи ноҳияи Свердлови шаҳри Бишкек 24 май муҳофизи шахсии Отамбоев -- Дамир Мусакеевро дар сӯистифода аз мақом айбдор эълом ва 5 сол зиндонӣ кард. Ӯ гӯиё ҳангоми сардори хадамоти 9-уми КДАМ будан дар тақсими хонаҳои хидматӣ аз мақомаш сӯистифода кардааст.

Зеленский ба назди низомиёни Украина ба Донбасс рафт

Президенти нави Украина Владимир Зеленский дар доираи нахустин сафари худ аз вилояти Луҳанск дидан карда, бо вазъи низомиён дар минтақаҳои Луҳанск ва Счастъе шинос шуд.

"Раҳбари давлат бо низомиён дар бораи шароити зист, сифати ғизо, таъмини техника ва хона суҳбат кард",-иттилоъ дод хадамоти матбуотии президенти Украина.

Зеленский дар минтақаи Луҳанск аз хати аввали ҷанг, бахусус аз постгоҳи назоратие дидан кардааст, ки аз мавзеи ҷониби мухолиф ҳамагӣ 400 метр дур қарор дорад.

Президенти Украина гузориши фармондеҳ генерал-лейтенант Александр Сирскийро дар бораи вазъи минтақа шунидааст. Дар ҷаласа сардори Ситоди кул - сарфармондеҳи Нирӯҳои мусаллаҳи Украина генерал-лейтенант Руслан Хомчак низ иштирок дошт.

Сафари вазири дифои Русия ба Тоҷикистон

Сергей Шойгу, вазири дифои Русия шаби гузашта вориди Душанбе шуд. Дар ин бора як манбаъ дар вазорати дифои Тоҷикистон рӯзи 28-уми май ба Радиои Озодӣ иттилоъ дод.

Дар ҳамин ҳол, хабаргузории русии "Интерфакс" рӯзи 28-уми май навишт, ки вазири дифои Русия дар Душанбе бо мақомоти тоҷик дар мавриди бозсозии нерӯҳои мусаллаҳи Тоҷикистон ва таҳкими фаъолияти пойгоҳи 201-и Русия, баҳсу гуфтугӯ кард.

Ин хабаргузорӣ аз қавли раҳбари хадамоти матбуоти вазорати дифои Русия гуфтааст, ки Сергей Шойгу дар робита ба ин масоил бо вазири дифои Тоҷикистон Шералӣ Мирзо гуфтугӯ хоҳад кард. Ба гуфтаи манбаъ, қарор аст Шойгу бо президенти Тоҷикистон Эмомалӣ Раҳмон ҳам дидору гуфтугӯ кунад ва аз пойгоҳи низомии 201-уми Русия дидан намояд.

Пойгоҳи мазкур макони истиқрори 7 ҳазор низомии Русия буда, бар асоси созишномаи байнидавлатии Тоҷикистону Русия ҳақи то соли 2042 фаъолият карданро дорад. Русияву Тоҷикистон худро шарикони стратегӣ меноманд ва мубориза бо терроризму қочоқи маводи мухаддир аз муҳимтарин бахшҳои ҳамкории низомии ин ду кишвар ба шумор меравад.

Мақомоти Ишқобод коргоҳҳоро аз биноҳои нав берун мекунанд

Мақомоти Ишқобод ширкатҳоеро, ки дар таҳхонаи биноҳо коргоҳ доранд, маҷбур мекунанд, онҳоро холӣ созанд.

"Аксари ширкатҳое, ки дар минтақаҳои марказӣ ҷойгир ҳастанд, намехоҳанд, ба маконҳои дигар раванд. Ба ҳамин хотир, мехоҳанд дар марказ коргоҳи нав пайдо кунанд",-хабар дод як сокини шаҳри Ишқобод.

Ахиран хабар расид, ки мақомоти шаҳрӣ мехоҳанд, ҳамаи коргоҳҳои ширкатҳоро ба Минтақаи саноатии Ишқобод кӯчонанд. Ин минтақа дар канори шаҳр ҷойгир аст. Талаботи мақомот шаби 15-уми май ба соҳибкорон расонида шуд.

Аммо хабарнигори бахши туркмании Радиои Озодӣ мегӯяд, аксари соҳибкорон мехоҳанд, дар маркази шаҳр боқӣ монанд. "Ширкатҳо намехоҳанд, аз маркази шаҳр кӯч банданд. Ба ҳамин хотир, ҳоло мақомот таҳхонаи биноҳоро тафтиш карда, ширкатҳоро маҷбур ба кӯчидан мекунанд",-гуфт хабарнигор.

"Қатора"-и моҳвораҳои Илон Маскро дар Тошканд ба навор гирифтанд

Сокинони шаҳри Тошканди Узбекистон 60 моҳвораи Starlink-ро ба навор гирифтанд, ки ширкати SpaceX, мутааллиқ ба Илон Маск чанд рӯз пеш ба кайҳон партоб карда буд. Ин моҳвораҳо бояд заминро бо интернет таъмин кунанд.

Шаби 25 ба 26 май дар фазои Тошканд 60 моҳвора дида шуд. Наворҳое, ки шоҳидон сабт карданд, дар интернет нашр шуданд. Моҳвораҳои SpaceX-ро дар дигар шаҳрҳо низ дидан мумкин аст.

Мушаки Falcon 9 бо дастгоҳҳои кайҳонӣ аз космодроми Канаверал 24 май ба кайҳон парвоз кард. 60 моҳвораи Starlink ба баландии 440 км дар фазо бароварда шуданд. Қарор аст, ин моҳвораҳо курраи заминро бо интернет таъмин кунанд.

Раҳмон дар ҷаласаи сарони кишварҳои Авруосиё ширкат мекунад

Соли 2014 дар маросими имзои созишномаи Авруосиё аз ҷумла президенти собиқи Қазоқистон Нурсултон Назарбоев иштирок карда буд

Президенти Тоҷикистон Эмомалӣ Раҳмон ба ҳайси «меҳмони ифтихорӣ» дар ҷаласаи Шӯрои олии иқтисодии Авруосиё иштрок мекунад, ки қарор аст рӯзҳои 28 ва 29 май дар пойтахти Қазоқистон – шаҳри Нурсултон баргузор шавад. Ҷаласа бо ширкати президентони кишварҳои узв ба муносибати панҷсолагии имзои созишномаи Иттиҳоди иқтисодии Авруосиё баргузор мешавад.

Кремлин хабар дод, ки дар ин нишаст президенти Русия Владимир Путин иштирок мекунад ва раҳбарони дигар, аз ҷумла, президентони Беларус, Қазоқистон, Қирғизистон ва нахуствазири Арманистон ҳам омодагии худро барои сафар ба Қазоқистон тасдиқ карданд.

Ба унвони кишвари нозири ин ҳамоиш президенти Молдова Игор Додон ҳам ба шаҳри Нурсултон даъват шудааст. Нахустин бор дар ин нишаст президенти муваққатии Қазоқистон Қосимҷомарт Тоқаев ширкат мекунад, ки моҳи март баъди истеъфои Нурсултон Назарбоев сари кор омад.

Дар ин ҷаласа натиҷаҳои кори ин созмон дар панҷ соли гузашта баррасӣ шуда, бахшҳои аслии ҳамкорӣ дар панҷсолаи оянда, аз ҷумла дар соҳаи тиҷорат, иқтисод, саноат, молиёт ва сиёсати иҷтимоӣ муҳокима хоҳад шуд. Раҳбарони ин кишварҳо ҳамчунин мавқеи худро ба таҳаввулоти байналмилалӣ баён мекунанд.

Созмони Иттиҳоди иқтисодии Авруосиё, ки соли 2014 бо ташаббуси Русия арзи ҳастӣ кардааст, пайваста аз Тоҷикистон даъват мекунад, ки ба узвияти он шомил шавад. Тоҷикистон аз узвият ба ин созмон истиҳола мекунад ва дар тамоми ин солҳо гуфтааст, ки “мавзӯи узвият дар созмонро мавриди омӯзиш қарор додааст”.

Оинномаи Иттиҳоди иқтисодии АвруОсиё мегӯяд, ки дар қаламрави кишварҳои узв гардиши озоди нерӯи корӣ, сармояҳо, мол ва хадамот кафолат дода мешавад. Аммо дар амал, ба андешаи бархе кишварҳои узви ин созмон, шароити рақобати молу хадамот дар дохили созмон баробар нест.

Истеъфои нахуствазири Австрия баъди видеои ҷанҷолӣ

Парлумони Австрия дар паи раъйи адами эътимод нахуствазир Себастиан Куртсро ба истеъфо фиристод

Себастиан Куртс, нахуствазири Австрия, ки дар маркази як моҷарои сиёсӣ қарор гирифт, рӯзи 27 май бо раъйи адами эътимоди парлумон рӯбарӯ ва аз мақомаш маҳрум шуд.

Эътилофи сиёсии ӯ ҳам дар ҳукумат пароканда шудааст. Овоздиҳӣ барои эълони адами эътимод ба нахуствазирро вакилон аз ҳизби сотсиал-демократ ва ҳизби рости ифротгаи Озодӣ барпо карданд, ки дар эътилоф бо Куртс қарор доштанд.

Ҳамакнун президент Александр ван дер Беллен бояд нахуствазири навро таъин кунад, то ки ӯ то замони баргузории интихоботи навбатӣ дар моҳи сентябр ҳукумати навро созмон бидиҳад.

Бӯҳрони сиёсӣ ҳафтаи гузашта дар паи нашри як навори видеоие сар зад, ки соли 2017 сабт шуда, дар он дида мешавад, ки шахси монанд ба муовини нахуствазир Ҳайнс-Кристиан Штрахе ба як соҳибкори рус бар ивази имтиёзҳои сиёсӣ шартномаҳои корӣ пешниҳод мекунад.

Штрахе ва ҳизби Озодӣ 18 маи соли ҷорӣ ба истеъфо рафтанд. Ба иловаи ин ки ин ҳизб шиорҳои зиддимуҳоҷиронро ба забон оварда бо тундгароҳо аз гурӯҳҳои ифротгаро дар тамос мебошад, ҳизби Озодӣ дар эҳтимоли пешбурди манфиатҳои Русия гумонбар дониста шуд.

Навори видеоӣ 17 май нашр шуд ва дар он дида мешавад, ки гӯё Штрахе ба як зане, ки мегӯяд аз гурӯҳҳои сарватманди Русия намояндагӣ мекунад, дар самти бунёди сохтмонҳои зербиноӣ ҳамкорӣ пешниҳод мекунад. Дар ин видео зан ба забони русӣ сӯҳбат карда худро ҳамчун хоҳарзодаи як соҳибкори хеле сарватманди Русия муаррифӣ кардааст.

Як мақоми дигар аз ҳизби Озодӣ дар ин навор ба унвони тарҷумони немисиву русӣ хидмат мекунад. Ин саҳна дар яке аз рӯзҳои моҳи июли соли 2017 дар ҷазираи Ибитсаи Испания ва се моҳ пеш аз интихоботе сабт шудааст, ки дар он ҳизби Озодии Штрахе пирӯз шуд ва худи ӯ баъдан ба мақоми муовини нахуствазир интихоб шуд.

Ҳафт шаҳрванди Тоҷикистон дар Ленинград маҷрӯҳ шуданд

Соли 2014. Автодроми Сочи

Матбуоти русӣ мегӯяд, ки дар сохтмони автодроме дар вилояти Ленинград ҳафт шаҳрванди Тоҷикистон осеб дида ба бемористон интиқол ёфтанд. ТАСС менависад, ки рӯзи 27 май дар ҷараёни корҳои сохтмонии автодроми «Игора-драйв» дар ҳудуди вилояти Ленинград дар ҷараёни корҳои дарахтбурӣ коргарон – ҳама шаҳрвандони Тоҷикистон осеб диданд. Ҳолати яке аз онҳо сангин арзёбӣ мешавад. Ҷароҳати шаш нафари дигар миёна арзёбӣ шудааст. Ҳуввияти коргарони осебдида ошкор намешавад. Се нафари осебдида ба бемористони Всеволжск ва чор нафарашон ба шифохонаи вилояти Ленинград интиқол дода шуданд.

Дар ҷараёни корҳои сохтмони автодроми «Игора-драйв» дар ҳудуди ноҳияи Приозерскии Ленинград дар масоҳати 350 метри мураббаъ чӯбу дарахти зиёд ба замин сарозер шуд. Кормандони вазорати ҳолатҳои изтирорӣ маҳалли ҳодисаро таҳқиқ мекунанд.

Маросими ифтитоҳи автодроми нав қарор аст соли ҷорӣ баргузор шавад. «Эхо Москвы” мегӯяд, ки арзиши ин тарҳ 10 миллиард рубл буда, муаллифи он архитектор Герман Тилке мебошад, ки дар гузашта тарҳи “Формула-1” ва автодороми шаҳри Сочиро сохта ба истифода додааст. Дар хабар гуфта мешавад, ки проекти куллии автодром ва осоишгоҳи “Игора” ба миллиардери рус Юрий Ковалчук марбут аст, ки моликдори бонки “Россия” мебошад.

Тамдиди соати корӣ барои иваз кардани шиносномаҳои тоҷикӣ

Акс аз бойгонӣ

Вазорати умури дохилии Тоҷикистон дар як талош барои ташвиқи мардум ба табдил кардани шиносномаҳои қадимӣ, гуфтааст, кор дар шӯъбаҳои шиносномадиҳиро то соати 10 шаб тамдид мекунад.

Вазорат бо нашри як баёнияи расмӣ дар рӯзи 27-уми май гуфт, тибқи дастури вазири корҳои дохилӣ ҳамаи шӯъбачаҳои шиносномадиҳии вазорат дар шаҳру ноҳияҳо вазифадор шудаанд, ки реҷаи кории худро аз соати 08:00-и субҳ то соати 22:00-и шаб ба роҳ монанд.”

Муроҷиати вазорат ба мардум баъд аз он садо дод, ки порлумони Тоҷикистон масъалаи табдили шиноснома ва симкортҳоро баррасӣ кард. Бар асоси муқаррарот, сокинон бояд то рӯзи 10-уми августи имсол симкортҳояшонро дигарбора ба номашон сабт кунанд ва ин кор фақат бо кортҳои нави ҳуввият сурат мегирад.

Касе ки шиносномаи соли 1996-ро дошта бошад, баъди 10-уми август аз симкорташ маҳрум мешавад. Мақомот гуфтаанд, ки вазорат қодир аст, моҳе фақат то 50 ҳазор шиноснома иваз кунад, вале маълум нест, бо тамдиди муҳлати корӣ вазорат дар як моҳ ба чанд нафар метавонад корти нави ҳуввият бидиҳад. Дар Тоҷикистон то ҳол беш аз 3 миллион нафар шиносномаҳои соли 1996 доштаанд.

Ҳафт узви як оила дар Кобул кушта шуданд

Хонае, ки дар он куштор рух дод

Полиси Афғонистон гуфт, ки афроди мусаллаҳ 7 узви як хонаводаро дар шаҳри Кобул ба қатл расониданд. Сухангӯи полиси Кобул Фирдавс Фаромурз гуфт, ки ин ҳодиса субҳи 27 май дар минтақаи ғарбии Кобул рух дод.

Фаромурз гуфт, ки дар миёни кушташудаҳо се зан ва ду кӯдак низ буд. Ду узви дигари оила дар ин ҳамла бо ҷароҳатҳои мухталиф ҷон ба саломат бурданд.


Ба гуфтаи Фирдавс Фарормурз, бовар меравад, ки ин куштор ба баҳси замин рабт дорад. “Полис муайян кард, ки баҳси сарзада марбут ба даъвоҳои байниоилавӣ будааст”. Ӯ гуфт, ки аъзои хонаводаи қурбонӣ ба полис шикоят карданд.

Фаромурз гуфт, ки таҳқиқ шурӯъ шудааст, вале феълан ҳеҷ нафаре бо гумони даст доштан дар ин ҳодиса боздошт нашудааст.

Баҳси замин дар кишвари ҷангзадаи Афғонистон, ки 40 соли охир оташи ҷанг дар он хомӯш намешаваду миллионҳо одам беҷо шудааст, хеле маъмул аст.

Замоне, ки бархе муҳоҷирон ба хонаҳои худ бармегарданд, дармеёбанд, ки хонаи онҳоро нафарони дигар ишғол кардаанд. Дар миёни афроде, ки бо истифода аз зӯр даст ба моликияти дигарҳо мезананд, сиёсатмадорону фармондеҳони бонуфуз ҳам ҳастанд.

Ошӯб дар зиндон. Эътирози даҳҳо маҳбус дар Одесса

Акс аз бойгонӣ

Дар як зиндони низомаш умумии шаҳри Одессаи Украина бетартибӣ ва сӯхтор рух дод. Бахши русии Радиои Озодӣ бо такя ба нашрияи "Думская.net" хабар дод, ки дар назди зиндони №51 шумори зиёди мошинҳои сӯхторхомӯшкунӣ ва ёрии таъҷилӣ ҷамъ омадааст. Инчунин шумори зиёди ходимони полис ва ҳам низомиёни горди миллӣ ҷамъ шудаанд.

Ин нашрия гуфтааст, ки беш аз 100 зиндонӣ дар дохили маҳбас ошӯб бардоштанд. Чанде баъд раиси полиси вилоят гуфт, ки ошӯбгарон 500 нафар ҳастанд ва аллакай дар бораи осеб дидани як зиндонӣ ва чаҳор корманди зиндон хабарҳо мерасад. Хабар дар бораи қурбониҳо дар даст нест. Бархе матбуот дар бораи гӯё фирор кардани 6 то 15 зиндонӣ хабар доданд, вале тасдиқи расмии ин хабар вуҷуд надорад.

Собиқ раиси низоми зиндонҳои Украина Сергей Старенкий дар саҳифаи худ дар Фейсбук гуфт, ки моҷарои маҳбусон панҷ рӯз пеш шурӯъ шуд ва имрӯз ба марҳилаи доғи худ расид.

Сабаби ошӯб метавонад шароити бади нигаҳдорӣ ва ташдидёбии қоидаҳои будубош дар зиндон бошад. Нашрияи "Думская.net" гуфтааст, ки гӯё панҷ рӯз пеш дар паи бо корд маҷрӯҳ кардани як корманди зиндон ба маҳбусон имкони мулоқот бо наздикон ва ғизохӯриҳои умумӣ дар ошхона манъ шуд. Баъди эътирози зиндониҳо, гӯё раҳбарияти зиндон таҳдид кард, ки рӯзи 27 май дар маҳбас тамринҳои нирӯҳои вижа барпо мешавад ва баъди ин зиндониҳо аз роҳи ошӯб талош карданд пеши роҳи тамринҳоро бигиранд. Бар асоси иттилои дастрас, дар робита бо ошӯб дар зиндон аз рӯи моддаи “фаъолиятҳое, ки боиси бебандуборӣ дар муассисаҳои ислоҳи ҷазо мешавад” парвандаи ҷиноӣ боз ва таҳқиқ шурӯъ шудааст.

Ба Муҳаммадҷон Улуғхоҷаев айб эълон шуд

Акс аз бойгонӣ

Нисбати сухангӯи Сарраёсати қӯшунҳои сарҳадии Тоҷикистон Муҳаммадҷон Улуғхоҷаев тибқи банди “Хиёнат ба ватан” (305, қисми 2)-и Кодекси ҷиноии Тоҷикистон айбномаи расмӣ эълон шуда, парвандаи ӯ мақоми "махфӣ" гирифтааст. Мақомоти марбута рӯзи 26 май ба Радиои Озодӣ гуфтанд, аз ин ба баъд тафтиши пешакии парванда то замони содир шудани ҳукми додгоҳ ба гунаи пӯшида идома пайдо мекунад.

Бино ба гуфтаи як манбаи дигар, ки ин хабарро тасдиқ кард, парвандаро ҳоло муфаттишони Додситонии кулли Тоҷикистон ва Кумитаи амнияти миллӣ муштаракан таҳқиқ мекунанд. Ба гуфтаи ӯ, Улуғхоҷаев ба он айбдор мешавад, ки маълумоти марбут ба сирри давлатиро ба созмонҳои хориҷӣ додааст. Дар сурати исбот шудани ин иттиҳом ба Муҳаммадҷон Улуғхоҷаев аз 15 то 25 соли ҳабс таҳдид мекунад.

Гуфта мешавад, ӯ рӯзи 10 апрел боздошт шудааст. Зебо Улуғхоҷаева, модари Муҳаммадҷон Улуғхоҷаев гуфта буд, ки мақомот рӯзи 16-уми апрел манзили писарашро кофтукоб карданд. Ин дар ҳолест, ки мақомот аз боздошти Муҳаммадҷон Улуғхоҷаев, сабабҳои он ва кофтукоби манзили ӯ расман хабаре нашр накардаанд.

Модари Муҳаммадҷон Улуғхоҷаев афзуд, барои писараш вакили дифоъ гирифтааст, вале намедонад, ки алайҳи ӯ бо кадом моддаҳо парванда боз кардаанд. Хонум Улуғхоҷаев танҳо гуфт, "ман ба бачам бовар дорам. Бовар дорам, ки ягон кор накардаст."

Дар ҳамин ҳол, ҳамкорони имрӯзаву собиқи Улуғхоҷаев мегӯянд, дар бораи фаъолияти кориву масъулиятшиносии ӯ танҳо назари нек доранд. Аз ҷумла, яке аз ҳамкорони ӯ дар сӯҳбат бо Радиои Озодӣ гуфт, "магар осон аст, ки дар ин муддат то мартабаи подполковник баланд шавад? Хеле шахси бомасъулият аст, вале мо ҳам намедонед, ки дар асл чӣ гузашт". Ин корманди нерӯҳои марзбонӣ гуфт, ки бори охир "як-яку ним моҳ пеш Муҳаммадҷонро дар як ҷаласаи корӣ дида буд".

Муҳаммадҷон Улуғхоҷаев, ба қавли ҳамкорони собиқаш, 36 сол дошта, риштаи физикаи Донишгоҳи технологии Тоҷикистонро хатм кардааст. Дар гузашта дар оҷонсии "Азия-Плюс" ва баъдан дар вазорати дифои Тоҷикистон ба ҳайси як корманди техникии дафтари матбуот кор кардааст.

Соли 2009 ба кор дар Раёсати нерӯҳои марзбонии КДАМ гузашт. Ин ҷо низ корро аз наворбардориву иҷрои масъулиятҳои фаннӣ шурӯъ карда, баъдан дар соли 2014 масъулиятҳои сухангӯ ва иртибот бо матбуотро ба дӯш гирифт.

Раиси ҳизби ҳокими Руминия ба 3,5 соли зиндон маҳкум шуд

26 май, Бухарест

Додгоҳи таҷдиди назари Руминия ҳукми 3,5 соли зиндони Ливиу Драгня, раиси ҳизби ҳокими сотсиал-демократиро бетағйир гузошт. Гузоришҳо ҳокист, ки иҷрои ҳукми раиси ҳизби сиёсӣ билофосила шурӯъ мешавад.

Драгняро барои коррупсия ва шеваи худкомаи раҳбарӣ гунаҳгор мекунанд. Баъди интихоботи соли 2016 ӯ қарор буд нахуствазири Руминия мешуд, вале доғи судӣ ба ин иҷоза надод. Бо ин ки дар ҳукумат дигар аъзои ин ҳизб раҳбарӣ мекарданд, ба андешаи таҳлилгарон, “раиси воқеии ҳукумат маҳз Драгня буд”.

Драгняро додгоҳи зинаи аввал барои талоши сӯиистифода аз мақом ва сохтакорӣ ба 3,5 соли зиндон маҳкум карда буд. Ҳоло бо иҷро шудани ҳукми додгоҳ карераи сиёсии Драгня дигар хотима меёбад.

Ҳукми додгоҳи таҷдиди назар дар соатҳое содир шуд, ки рӯзи 26 май сокинони Руминия дар як раъйдиҳӣ тадбирҳои пешниҳодкардаи ҳизби ҳоким барои мубориза бо коррупсияро рад карданд.

Дар Қирғизистон қонуни ба ҷавобгарӣ кашидани президенти собиқ ба иҷро даромад

25 май дар ҷаласаи охирини ҳизбӣ Алмосбек Отамбоев аз раисии ҳизби сотсиал-демократӣ истеъфо дод

Дар Қирғизистон рӯзи 27 май қонуни наве ба иҷро даромад, ки мавриди пайгарди қонунӣ қарор додани собиқ президентонро иҷоза медиҳад. Ин қонун ду рӯз баъди он ба иҷро даромад, ки собиқ раиси ҷумҳурӣ Алмосбек Отамбоев аз мақоми раиси ҳизби оппозитсионии сотсиал-демократи Қирғизистон истеъфо дод. Ин қонун миёнаҳои моҳи май аз ҷониби президенти амалкунанда Сооронбой Ҷеенбеков имзо шуд. Ҳоло қонуни нав иҷоза медиҳад, ки дар заминаи қарорҳои қабулкардаи Отамбоев таҳқиқоти ҷиноӣ ба роҳ монда шавад. Даъватҳо дар ин замина аз ҷониби сиёсатмадорони зиёде ба гӯш мерасад. Дар ҳоле, ки қонун боз шудани парвандаи ҷиноӣ дар нисбати президенти амалкунандаро иҷоза намедиҳад, қонуни нав президенти собиқро баъди тарки мақоми президентӣ карданаш мавриди пайгард қарор медиҳад.

Ёфтҳои бештар

Гузоришҳои видеоӣ

XS
SM
MD
LG