Пайвандҳои дастрасӣ

Хабари нав

Хабарҳо

Раҳмон дар ҷаласаи сарони кишварҳои Авруосиё ширкат мекунад

Соли 2014 дар маросими имзои созишномаи Авруосиё аз ҷумла президенти собиқи Қазоқистон Нурсултон Назарбоев иштирок карда буд

Президенти Тоҷикистон Эмомалӣ Раҳмон ба ҳайси «меҳмони ифтихорӣ» дар ҷаласаи Шӯрои олии иқтисодии Авруосиё иштрок мекунад, ки қарор аст рӯзҳои 28 ва 29 май дар пойтахти Қазоқистон – шаҳри Нурсултон баргузор шавад. Ҷаласа бо ширкати президентони кишварҳои узв ба муносибати панҷсолагии имзои созишномаи Иттиҳоди иқтисодии Авруосиё баргузор мешавад.

Кремлин хабар дод, ки дар ин нишаст президенти Русия Владимир Путин иштирок мекунад ва раҳбарони дигар, аз ҷумла, президентони Беларус, Қазоқистон, Қирғизистон ва нахуствазири Арманистон ҳам омодагии худро барои сафар ба Қазоқистон тасдиқ карданд.

Ба унвони кишвари нозири ин ҳамоиш президенти Молдова Игор Додон ҳам ба шаҳри Нурсултон даъват шудааст. Нахустин бор дар ин нишаст президенти муваққатии Қазоқистон Қосимҷомарт Тоқаев ширкат мекунад, ки моҳи март баъди истеъфои Нурсултон Назарбоев сари кор омад.

Дар ин ҷаласа натиҷаҳои кори ин созмон дар панҷ соли гузашта баррасӣ шуда, бахшҳои аслии ҳамкорӣ дар панҷсолаи оянда, аз ҷумла дар соҳаи тиҷорат, иқтисод, саноат, молиёт ва сиёсати иҷтимоӣ муҳокима хоҳад шуд. Раҳбарони ин кишварҳо ҳамчунин мавқеи худро ба таҳаввулоти байналмилалӣ баён мекунанд.

Созмони Иттиҳоди иқтисодии Авруосиё, ки соли 2014 бо ташаббуси Русия арзи ҳастӣ кардааст, пайваста аз Тоҷикистон даъват мекунад, ки ба узвияти он шомил шавад. Тоҷикистон аз узвият ба ин созмон истиҳола мекунад ва дар тамоми ин солҳо гуфтааст, ки “мавзӯи узвият дар созмонро мавриди омӯзиш қарор додааст”.

Оинномаи Иттиҳоди иқтисодии АвруОсиё мегӯяд, ки дар қаламрави кишварҳои узв гардиши озоди нерӯи корӣ, сармояҳо, мол ва хадамот кафолат дода мешавад. Аммо дар амал, ба андешаи бархе кишварҳои узви ин созмон, шароити рақобати молу хадамот дар дохили созмон баробар нест.

Истеъфои нахуствазири Австрия баъди видеои ҷанҷолӣ

Парлумони Австрия дар паи раъйи адами эътимод нахуствазир Себастиан Куртсро ба истеъфо фиристод

Себастиан Куртс, нахуствазири Австрия, ки дар маркази як моҷарои сиёсӣ қарор гирифт, рӯзи 27 май бо раъйи адами эътимоди парлумон рӯбарӯ ва аз мақомаш маҳрум шуд.

Эътилофи сиёсии ӯ ҳам дар ҳукумат пароканда шудааст. Овоздиҳӣ барои эълони адами эътимод ба нахуствазирро вакилон аз ҳизби сотсиал-демократ ва ҳизби рости ифротгаи Озодӣ барпо карданд, ки дар эътилоф бо Куртс қарор доштанд.

Ҳамакнун президент Александр ван дер Беллен бояд нахуствазири навро таъин кунад, то ки ӯ то замони баргузории интихоботи навбатӣ дар моҳи сентябр ҳукумати навро созмон бидиҳад.

Бӯҳрони сиёсӣ ҳафтаи гузашта дар паи нашри як навори видеоие сар зад, ки соли 2017 сабт шуда, дар он дида мешавад, ки шахси монанд ба муовини нахуствазир Ҳайнс-Кристиан Штрахе ба як соҳибкори рус бар ивази имтиёзҳои сиёсӣ шартномаҳои корӣ пешниҳод мекунад.

Штрахе ва ҳизби Озодӣ 18 маи соли ҷорӣ ба истеъфо рафтанд. Ба иловаи ин ки ин ҳизб шиорҳои зиддимуҳоҷиронро ба забон оварда бо тундгароҳо аз гурӯҳҳои ифротгаро дар тамос мебошад, ҳизби Озодӣ дар эҳтимоли пешбурди манфиатҳои Русия гумонбар дониста шуд.

Навори видеоӣ 17 май нашр шуд ва дар он дида мешавад, ки гӯё Штрахе ба як зане, ки мегӯяд аз гурӯҳҳои сарватманди Русия намояндагӣ мекунад, дар самти бунёди сохтмонҳои зербиноӣ ҳамкорӣ пешниҳод мекунад. Дар ин видео зан ба забони русӣ сӯҳбат карда худро ҳамчун хоҳарзодаи як соҳибкори хеле сарватманди Русия муаррифӣ кардааст.

Як мақоми дигар аз ҳизби Озодӣ дар ин навор ба унвони тарҷумони немисиву русӣ хидмат мекунад. Ин саҳна дар яке аз рӯзҳои моҳи июли соли 2017 дар ҷазираи Ибитсаи Испания ва се моҳ пеш аз интихоботе сабт шудааст, ки дар он ҳизби Озодии Штрахе пирӯз шуд ва худи ӯ баъдан ба мақоми муовини нахуствазир интихоб шуд.

Ҳафт шаҳрванди Тоҷикистон дар Ленинград маҷрӯҳ шуданд

Соли 2014. Автодроми Сочи

Матбуоти русӣ мегӯяд, ки дар сохтмони автодроме дар вилояти Ленинград ҳафт шаҳрванди Тоҷикистон осеб дида ба бемористон интиқол ёфтанд. ТАСС менависад, ки рӯзи 27 май дар ҷараёни корҳои сохтмонии автодроми «Игора-драйв» дар ҳудуди вилояти Ленинград дар ҷараёни корҳои дарахтбурӣ коргарон – ҳама шаҳрвандони Тоҷикистон осеб диданд. Ҳолати яке аз онҳо сангин арзёбӣ мешавад. Ҷароҳати шаш нафари дигар миёна арзёбӣ шудааст. Ҳуввияти коргарони осебдида ошкор намешавад. Се нафари осебдида ба бемористони Всеволжск ва чор нафарашон ба шифохонаи вилояти Ленинград интиқол дода шуданд.

Дар ҷараёни корҳои сохтмони автодроми «Игора-драйв» дар ҳудуди ноҳияи Приозерскии Ленинград дар масоҳати 350 метри мураббаъ чӯбу дарахти зиёд ба замин сарозер шуд. Кормандони вазорати ҳолатҳои изтирорӣ маҳалли ҳодисаро таҳқиқ мекунанд.

Маросими ифтитоҳи автодроми нав қарор аст соли ҷорӣ баргузор шавад. «Эхо Москвы” мегӯяд, ки арзиши ин тарҳ 10 миллиард рубл буда, муаллифи он архитектор Герман Тилке мебошад, ки дар гузашта тарҳи “Формула-1” ва автодороми шаҳри Сочиро сохта ба истифода додааст. Дар хабар гуфта мешавад, ки проекти куллии автодром ва осоишгоҳи “Игора” ба миллиардери рус Юрий Ковалчук марбут аст, ки моликдори бонки “Россия” мебошад.

Тамдиди соати корӣ барои иваз кардани шиносномаҳои тоҷикӣ

Акс аз бойгонӣ

Вазорати умури дохилии Тоҷикистон дар як талош барои ташвиқи мардум ба табдил кардани шиносномаҳои қадимӣ, гуфтааст, кор дар шӯъбаҳои шиносномадиҳиро то соати 10 шаб тамдид мекунад.

Вазорат бо нашри як баёнияи расмӣ дар рӯзи 27-уми май гуфт, тибқи дастури вазири корҳои дохилӣ ҳамаи шӯъбачаҳои шиносномадиҳии вазорат дар шаҳру ноҳияҳо вазифадор шудаанд, ки реҷаи кории худро аз соати 08:00-и субҳ то соати 22:00-и шаб ба роҳ монанд.”

Муроҷиати вазорат ба мардум баъд аз он садо дод, ки порлумони Тоҷикистон масъалаи табдили шиноснома ва симкортҳоро баррасӣ кард. Бар асоси муқаррарот, сокинон бояд то рӯзи 10-уми августи имсол симкортҳояшонро дигарбора ба номашон сабт кунанд ва ин кор фақат бо кортҳои нави ҳуввият сурат мегирад.

Касе ки шиносномаи соли 1996-ро дошта бошад, баъди 10-уми август аз симкорташ маҳрум мешавад. Мақомот гуфтаанд, ки вазорат қодир аст, моҳе фақат то 50 ҳазор шиноснома иваз кунад, вале маълум нест, бо тамдиди муҳлати корӣ вазорат дар як моҳ ба чанд нафар метавонад корти нави ҳуввият бидиҳад. Дар Тоҷикистон то ҳол беш аз 3 миллион нафар шиносномаҳои соли 1996 доштаанд.

Ҳафт узви як оила дар Кобул кушта шуданд

Хонае, ки дар он куштор рух дод

Полиси Афғонистон гуфт, ки афроди мусаллаҳ 7 узви як хонаводаро дар шаҳри Кобул ба қатл расониданд. Сухангӯи полиси Кобул Фирдавс Фаромурз гуфт, ки ин ҳодиса субҳи 27 май дар минтақаи ғарбии Кобул рух дод.

Фаромурз гуфт, ки дар миёни кушташудаҳо се зан ва ду кӯдак низ буд. Ду узви дигари оила дар ин ҳамла бо ҷароҳатҳои мухталиф ҷон ба саломат бурданд.


Ба гуфтаи Фирдавс Фарормурз, бовар меравад, ки ин куштор ба баҳси замин рабт дорад. “Полис муайян кард, ки баҳси сарзада марбут ба даъвоҳои байниоилавӣ будааст”. Ӯ гуфт, ки аъзои хонаводаи қурбонӣ ба полис шикоят карданд.

Фаромурз гуфт, ки таҳқиқ шурӯъ шудааст, вале феълан ҳеҷ нафаре бо гумони даст доштан дар ин ҳодиса боздошт нашудааст.

Баҳси замин дар кишвари ҷангзадаи Афғонистон, ки 40 соли охир оташи ҷанг дар он хомӯш намешаваду миллионҳо одам беҷо шудааст, хеле маъмул аст.

Замоне, ки бархе муҳоҷирон ба хонаҳои худ бармегарданд, дармеёбанд, ки хонаи онҳоро нафарони дигар ишғол кардаанд. Дар миёни афроде, ки бо истифода аз зӯр даст ба моликияти дигарҳо мезананд, сиёсатмадорону фармондеҳони бонуфуз ҳам ҳастанд.

Ошӯб дар зиндон. Эътирози даҳҳо маҳбус дар Одесса

Акс аз бойгонӣ

Дар як зиндони низомаш умумии шаҳри Одессаи Украина бетартибӣ ва сӯхтор рух дод. Бахши русии Радиои Озодӣ бо такя ба нашрияи "Думская.net" хабар дод, ки дар назди зиндони №51 шумори зиёди мошинҳои сӯхторхомӯшкунӣ ва ёрии таъҷилӣ ҷамъ омадааст. Инчунин шумори зиёди ходимони полис ва ҳам низомиёни горди миллӣ ҷамъ шудаанд.

Ин нашрия гуфтааст, ки беш аз 100 зиндонӣ дар дохили маҳбас ошӯб бардоштанд. Чанде баъд раиси полиси вилоят гуфт, ки ошӯбгарон 500 нафар ҳастанд ва аллакай дар бораи осеб дидани як зиндонӣ ва чаҳор корманди зиндон хабарҳо мерасад. Хабар дар бораи қурбониҳо дар даст нест. Бархе матбуот дар бораи гӯё фирор кардани 6 то 15 зиндонӣ хабар доданд, вале тасдиқи расмии ин хабар вуҷуд надорад.

Собиқ раиси низоми зиндонҳои Украина Сергей Старенкий дар саҳифаи худ дар Фейсбук гуфт, ки моҷарои маҳбусон панҷ рӯз пеш шурӯъ шуд ва имрӯз ба марҳилаи доғи худ расид.

Сабаби ошӯб метавонад шароити бади нигаҳдорӣ ва ташдидёбии қоидаҳои будубош дар зиндон бошад. Нашрияи "Думская.net" гуфтааст, ки гӯё панҷ рӯз пеш дар паи бо корд маҷрӯҳ кардани як корманди зиндон ба маҳбусон имкони мулоқот бо наздикон ва ғизохӯриҳои умумӣ дар ошхона манъ шуд. Баъди эътирози зиндониҳо, гӯё раҳбарияти зиндон таҳдид кард, ки рӯзи 27 май дар маҳбас тамринҳои нирӯҳои вижа барпо мешавад ва баъди ин зиндониҳо аз роҳи ошӯб талош карданд пеши роҳи тамринҳоро бигиранд. Бар асоси иттилои дастрас, дар робита бо ошӯб дар зиндон аз рӯи моддаи “фаъолиятҳое, ки боиси бебандуборӣ дар муассисаҳои ислоҳи ҷазо мешавад” парвандаи ҷиноӣ боз ва таҳқиқ шурӯъ шудааст.

Ба Муҳаммадҷон Улуғхоҷаев айб эълон шуд

Акс аз бойгонӣ

Нисбати сухангӯи Сарраёсати қӯшунҳои сарҳадии Тоҷикистон Муҳаммадҷон Улуғхоҷаев тибқи банди “Хиёнат ба ватан” (305, қисми 2)-и Кодекси ҷиноии Тоҷикистон айбномаи расмӣ эълон шуда, парвандаи ӯ мақоми "махфӣ" гирифтааст. Мақомоти марбута рӯзи 26 май ба Радиои Озодӣ гуфтанд, аз ин ба баъд тафтиши пешакии парванда то замони содир шудани ҳукми додгоҳ ба гунаи пӯшида идома пайдо мекунад.

Бино ба гуфтаи як манбаи дигар, ки ин хабарро тасдиқ кард, парвандаро ҳоло муфаттишони Додситонии кулли Тоҷикистон ва Кумитаи амнияти миллӣ муштаракан таҳқиқ мекунанд. Ба гуфтаи ӯ, Улуғхоҷаев ба он айбдор мешавад, ки маълумоти марбут ба сирри давлатиро ба созмонҳои хориҷӣ додааст. Дар сурати исбот шудани ин иттиҳом ба Муҳаммадҷон Улуғхоҷаев аз 15 то 25 соли ҳабс таҳдид мекунад.

Гуфта мешавад, ӯ рӯзи 10 апрел боздошт шудааст. Зебо Улуғхоҷаева, модари Муҳаммадҷон Улуғхоҷаев гуфта буд, ки мақомот рӯзи 16-уми апрел манзили писарашро кофтукоб карданд. Ин дар ҳолест, ки мақомот аз боздошти Муҳаммадҷон Улуғхоҷаев, сабабҳои он ва кофтукоби манзили ӯ расман хабаре нашр накардаанд.

Модари Муҳаммадҷон Улуғхоҷаев афзуд, барои писараш вакили дифоъ гирифтааст, вале намедонад, ки алайҳи ӯ бо кадом моддаҳо парванда боз кардаанд. Хонум Улуғхоҷаев танҳо гуфт, "ман ба бачам бовар дорам. Бовар дорам, ки ягон кор накардаст."

Дар ҳамин ҳол, ҳамкорони имрӯзаву собиқи Улуғхоҷаев мегӯянд, дар бораи фаъолияти кориву масъулиятшиносии ӯ танҳо назари нек доранд. Аз ҷумла, яке аз ҳамкорони ӯ дар сӯҳбат бо Радиои Озодӣ гуфт, "магар осон аст, ки дар ин муддат то мартабаи подполковник баланд шавад? Хеле шахси бомасъулият аст, вале мо ҳам намедонед, ки дар асл чӣ гузашт". Ин корманди нерӯҳои марзбонӣ гуфт, ки бори охир "як-яку ним моҳ пеш Муҳаммадҷонро дар як ҷаласаи корӣ дида буд".

Муҳаммадҷон Улуғхоҷаев, ба қавли ҳамкорони собиқаш, 36 сол дошта, риштаи физикаи Донишгоҳи технологии Тоҷикистонро хатм кардааст. Дар гузашта дар оҷонсии "Азия-Плюс" ва баъдан дар вазорати дифои Тоҷикистон ба ҳайси як корманди техникии дафтари матбуот кор кардааст.

Соли 2009 ба кор дар Раёсати нерӯҳои марзбонии КДАМ гузашт. Ин ҷо низ корро аз наворбардориву иҷрои масъулиятҳои фаннӣ шурӯъ карда, баъдан дар соли 2014 масъулиятҳои сухангӯ ва иртибот бо матбуотро ба дӯш гирифт.

Раиси ҳизби ҳокими Руминия ба 3,5 соли зиндон маҳкум шуд

26 май, Бухарест

Додгоҳи таҷдиди назари Руминия ҳукми 3,5 соли зиндони Ливиу Драгня, раиси ҳизби ҳокими сотсиал-демократиро бетағйир гузошт. Гузоришҳо ҳокист, ки иҷрои ҳукми раиси ҳизби сиёсӣ билофосила шурӯъ мешавад.

Драгняро барои коррупсия ва шеваи худкомаи раҳбарӣ гунаҳгор мекунанд. Баъди интихоботи соли 2016 ӯ қарор буд нахуствазири Руминия мешуд, вале доғи судӣ ба ин иҷоза надод. Бо ин ки дар ҳукумат дигар аъзои ин ҳизб раҳбарӣ мекарданд, ба андешаи таҳлилгарон, “раиси воқеии ҳукумат маҳз Драгня буд”.

Драгняро додгоҳи зинаи аввал барои талоши сӯиистифода аз мақом ва сохтакорӣ ба 3,5 соли зиндон маҳкум карда буд. Ҳоло бо иҷро шудани ҳукми додгоҳ карераи сиёсии Драгня дигар хотима меёбад.

Ҳукми додгоҳи таҷдиди назар дар соатҳое содир шуд, ки рӯзи 26 май сокинони Руминия дар як раъйдиҳӣ тадбирҳои пешниҳодкардаи ҳизби ҳоким барои мубориза бо коррупсияро рад карданд.

Дар Қирғизистон қонуни ба ҷавобгарӣ кашидани президенти собиқ ба иҷро даромад

25 май дар ҷаласаи охирини ҳизбӣ Алмосбек Отамбоев аз раисии ҳизби сотсиал-демократӣ истеъфо дод

Дар Қирғизистон рӯзи 27 май қонуни наве ба иҷро даромад, ки мавриди пайгарди қонунӣ қарор додани собиқ президентонро иҷоза медиҳад. Ин қонун ду рӯз баъди он ба иҷро даромад, ки собиқ раиси ҷумҳурӣ Алмосбек Отамбоев аз мақоми раиси ҳизби оппозитсионии сотсиал-демократи Қирғизистон истеъфо дод. Ин қонун миёнаҳои моҳи май аз ҷониби президенти амалкунанда Сооронбой Ҷеенбеков имзо шуд. Ҳоло қонуни нав иҷоза медиҳад, ки дар заминаи қарорҳои қабулкардаи Отамбоев таҳқиқоти ҷиноӣ ба роҳ монда шавад. Даъватҳо дар ин замина аз ҷониби сиёсатмадорони зиёде ба гӯш мерасад. Дар ҳоле, ки қонун боз шудани парвандаи ҷиноӣ дар нисбати президенти амалкунандаро иҷоза намедиҳад, қонуни нав президенти собиқро баъди тарки мақоми президентӣ карданаш мавриди пайгард қарор медиҳад.

Сокинони Руминия зидди бозбинии ислоҳоти коррупсия овоз доданд

Бар асоси ҳисоби бахши муҳими натиҷаҳои як раъйдиҳӣ дар Руминия, шаҳрвандони ин кишвар бо тадбирҳои ҷилавгирикунанда зидди фасод мухолифат карда гуфтаанд, ки ин чораҳо мубориза бо коррупсияро мушкилтар мекунанд. Ин нахустин овоздиҳии сокинони Руминия дар масъалаи тағйири қонунгузории зидди фасод буд, ки аз ҷониби ҳизби ҳокими сотсиалистӣ пешниҳод ва баробар бо интихоботи Парлумони Аврупо рӯзи 26 май баргузор шуд. Дар паи шумориши аз се ду ҳиссаи овозҳо маълум шуд, ки беш аз 80 дар сади мардум ба ду саволи референдум посухи мусбат доданд. Ин саволҳо чунин буданд: “Оё шумо бо манъи афв ва бахшиши гуноҳи муттаҳамон дар коррупсия розӣ ҳастед?” ва “Оё шумо манъи қабули муқаррароти изтирории ҳукумат дар заминаи ҷиноятҳо, муҷозот, сохторҳои адлияро пуштибонӣ мекунед ва оё мустақиман то Додгоҳи конститутсионӣ рафтани шикоятҳо дар ин замина тарафдор ҳастед?”. Дар раъйдиҳӣ 41 дарсад иштирок карданд.

Президенти марказгаро Клаус Йоҳаннис, ки баргузории овоздиҳиро тарафдорӣ кардааст, гуфт, ки сокинони Руминия зидди пешниҳоди эътилофи ҳокими чапгаро овоз доданд, ки мехост ислоҳоти зиддикоррупсионӣ дар ин кишвари фасодзадатарин дар Иттиҳодияи Аврупоро бозбинӣ кунад.

Дар таркиши минибусе дар Кобул 10 нафар маҷрӯҳ шуд

Дар паи таркиши як минибусе дар Кобул, ки ба он бомба насб шуда буд, даҳ нафар маҷрӯҳ шуд. Ин мошин коргарони ҳукуматиро интиқол медод. Сухангӯи вазорати умури дохилии Афғонистон гуфт, бомба субҳи 27 май ва дар лаҳзаҳое таркид, ки кормандони вазорати умури динӣ ба кор мерафтанд. Яке аз маҷрӯҳшудаҳо дар ҳолати сангин мебошад. Ҳанӯз ҳеҷ гурӯҳ ё нафаре масъулияти ин ҳодисаро ба дӯш нагирифтааст, вале дар гузашта маъмулан чунин ҳамлаҳоро аъзои Толибон ва ҷангиёни гурӯҳи “Давлати исломӣ” анҷом додаанд. Ҳафтаи гузашта дар паи таркише дар як масҷиди Кобул ба ҳангоми намозгузорӣ, се нафар, аз ҷумла як рӯҳонии бонуфуз кушта шуда, дасти кам 20 нафар маҷрӯҳ шуданд.

Дар Узбекистон қарзи соҳибкоронро бахшиданд

Дар шаҳри Тошканди Узбекистон қарзи 1815 соҳибкори хусусиро дар ҳаҷми бештар аз 26 млн доллар бахшиданд. Ин қарз аз ҳисоби напардохтани андоз ва ҷаримаҳои молӣ ҷамъ шуда буд.

Хабар дода мешавад, ки ҳамаи ин соҳибкорон ба далели надоштани имкони пардохти қарзу ҷаримаҳо фаъолияташонро қатъ кардаанд.

Аз ин шумор 524 соҳибкор дар ноҳияи Учтепин баъди соф шудани қарзҳояшон дубора фаъолиятро оғоз кардаанд.

Ҳамзамон назорати давлатии андози Узбекистон аз соҳибкорон даъват кард, ки то 1 июли соли ҷорӣ мушкили қарзҳояшонро ҳал ва дубора фаъолияташонро ба роҳ монанд.

Президенти Олмон бо сафари серӯза ба Тошканд меравад

21 январ, Берлин. Раиси ҷумҳурии Узбекистон Шавкат Мирзиёев меҳмони президенти Олмон Френк-Валтер Штейнмайер буд

Президенти Олмон Френк-Валтер Штейнмайер қарор аст рӯзи 27 май бо як сафари серӯза вориди Тошканд, пойтахти Узбекистон шавад. Тақвияти ҳамкориҳои дуҷониба ҳадафи аслии ин сафар мебошад.

Сафари Штейнмайер инчунин то ҷое ба унвони тақвияти талошҳои Узбекистон дар роҳандозии ислоҳоти сиёсӣ баъди дар соли 2016 сари қудрат омадани президент Шавкат Мирзиёев арзёбӣ мешавад. Мирзиёев талош дорад баъди солиёни дароз ин кишвари Осиёи Марказиро аз инзиво берун кунад.

Мирзиёев, ки солҳои тӯлонӣ дар аҳди президент Ислом Каримов нахуствазири ин кишвар буд, баъди даргузашти ӯ сентябри соли 2016 дар интихобот пирӯз шуд. Мирзиёв талош кардааст бо кишварҳои ҳамсояаш дар минтақа робитаҳои наздику пурсамари иқтисодиву сиёсӣ ба роҳ монда, иқтисоди ин кишвари иборат аз 30 миллион ҷамъиятро зинда кунад. Инчунин ӯ дар амри роҳандозии ислоҳот дар бахши ҳуқуқи башар, ки замони Каримов дар ҳоли хеле сангин қарор дошт, иқдомҳое рӯи даст гирифт.

Дар остонаи сафари Штейнмайер ба Тошканд, созмони ҳомии ҳуқуқи инсон Human Rights Watch (HRW) аз Олмон даъват кард, ки дар баробари ситоиш аз тағйироти мусбат дар ин кишвар, ёдовар шавад, ки роҳи ислоҳот “тӯлонӣ” аст ва ҳамоно аз дохили Узбекистон хабарҳо аз “боздоштҳои худсарона, шиканҷа ва бадрафторӣ бо дастгиршудаҳо ба даст мерасанд, ки хусусияти сартосарӣ доранд”.

Дар ҷараёни сафараш ба Олмон моҳи январи имсол Мирзиёев гуфт, ки мехоҳад ҳамкориҳои Узбекистонро бо Олмон “ба сатҳи сифатан нав” бардорад ва он замон садри аъзам Ангела Меркел ҳам гуфта буд, ки хостори дар симои Узбекистон дидани як “шарики боэътимод” аст.

Қарор аст Штейнмайер бо Мирзиёев дар Тошканд мулоқот карда, ҳайати соҳибкорони олмонӣ бо ҳамкоронашон дар Узбекистон тарҳҳои муштараки тиҷоратиро баррасӣ кунанд ва инчунин мулоқоти Штейнмайер бо намояндагони ҷомеаи шаҳрвандӣ низ баргузор шавад. Дар ин бора дар изҳороти матбуотии ҳукумати Олмон хабар дода шудааст.

Президенти Олмон ҳамроҳ бо ҳамсараш Элке Буденбендер ба Тошканд меравад ва қарор аст инчунин аз донишгоҳи давлатии Ургенҷ дар ғарби Узбекистон дидан карда, ба тамошои шаҳри таърихии Хива ҳам сафар кунад.

Дар як изҳороти муҳаққиқони масоили Осиёи Марказӣ дар HRW рӯзи 23 май гуфта шуд, ки ҳукумати Узбекистон “ҳамоно хеле худкома” боқӣ мемонад. “Қонунҳои нав, ки дар вокуниш ба даъватҳои байналмилалӣ қабул шудаанд, бояд дар амал дар зиндагии мардуми оддӣ татбиқ шаванд, то ки зиндагии ҳамарӯзаи одамони оддӣ дигар шавад”.

Дар миёни ин ислоҳот ҳомиёни ҳуқуқ ба зарурати иҷозаи кори созмонҳои маҳалливу байналмилалӣ, фаъолияти озоди хабарнигорон, озодиҳои динӣ ба намояндагони гурӯҳҳои мазҳабии мухталиф, мустақилияти низоми додгустарӣ ва таъмини адолат дар нисбати зиндониҳои сиёсӣ таъкид кардаанд.
Дар изҳороти ҳомиёни ҳуқуқ гуфта мешавад, ки дар остонаи сафари Штейнмайер мақомоти Узбекистон дастрасӣ ба бархе вебсайтҳои хабарии мисли Deutsche Welle-ро имконпазир карда, вале боз ҳам вебсайтҳои дигари хабарии мисли бахши Узбекии Радиои Озодӣ баста боқӣ мемонад.

Дар изҳорот омадааст, ки “талошҳои ҳукумат барои эҷоди фазои мусбат дар остонаи сафари Штейнмайер танҳо дар ҳолати пурра боз шудани интернет барои шаҳрвандони маҳаллӣ муассир хоҳад буд”.

Шойгу дар садри аъзои ҳукумати Русия ба Тоҷикистон сафар мекунад

Октябри соли 2017, Душанбе. Нишасти вазирони дифои кишварҳои узви Муштарак-ул-Манофеъ

Рӯзи 28 май қарор аст ба Тоҷикистон вазири дифои Русия Сергей Шойгу сафар кунад. Оҷонсии русии Интерфакс рӯзи 27 май бо такя ба ВКХ Тоҷикистон хабар дод, ки Шойгу “бо раҳбарии ҳайате аз ҳукумати Русия” ба Душанбе парвоз хоҳад кард. Ин манбаъ мегӯяд, ки ҷузъиёти сафари вазири дифои Русия феълан нашр намешавад, вале ҳафтаи гузашта хабаргузории дигари русии ТАСС гуфта буд, ки ин сафар ба хотири баррасии масоили ҳамкориҳои низомии миёни ду кишвар баргузор мешавад. Қарор аст Шойгу бо президенти Тоҷикистон Эмомалӣ Раҳмон ҳам дидору гуфтугӯ ва аз пойгоҳи низомии 201-уми Русия дидан кунад.

Пойгоҳи мазкур макони истиқрори 7 ҳазор низомии Русия буда, бар асоси созишномаи байнидавлатии Тоҷикистону Русия ҳақи то соли 2042 фаъолият карданро дорад. Русияву Тоҷикистон худро шарикони стратегӣ меноманд ва мубориза бо терроризму қочоқи маводи мухаддир аз муҳимтарин бахшҳои ҳамкории низомии ин ду кишвар ба шумор меравад.

Интихоботи Парлумони Аврупо: ҳизбҳои рӯ ба Аврупо мавқеи худро аз даст доданд

Итолиё. Маттило Салвинии ростгаро

Натиҷаҳои интихоботи Парлумони Аврупо бозгӯи фазои кунунии табиати сиёсии Иттиҳодияи Аврупо мебошад: дар интихобот нирӯҳои аслии чап ва рости марказгаро мавқеи бартарии худро аз даст дода, мақоми ҳомиёни муҳити зист, ҳизбҳои рости ифротгаро ва пуштибони бизнесу тиҷорат тақвият ёфтааст.

Бар асоси натиҷаҳои овоздиҳии 27 май “эътилофи азими” Ҳизби мардумии Аврупо ва сотсиалистҳо дигар аксариятро ташкил намедиҳанд.
Вале дар ҳоле, ки нирӯҳои рости ифротгаро ва миллатгароҳо натиҷаҳои аз гузашта беҳтар ба даст оварданд, дастоварди Сабзу либералҳо ба онҳо имкони назорати шаст дар сади курсиҳои Парлумони Аврупо, яъне 505 курсӣ аз 751 курсии мавҷударо фароҳам меорад. Либералҳо 100 ва сабзҳо тахминан 70 курсии маҷлисро ба даст оварданд ва ҳамакнун садои онҳо назар ба гузаштаҳо баландтар садо дода, мавқеи марказгароҳо заъифтар мешавад.

Вале натиҷаҳо интизороти сиёсатмадорони ростгарои мисли Марин Лё Пен дар Фаронса ва Маттео Салвинӣ дар Итолиёро, ки мухолифи тақвияти ормонҳои Иттиҳодияи Аврупо мебошанд, бароварда намекунад.

Дар Бишкек ба хотири қурбониёни хушунат тазоҳурот мекунанд

Дар шаҳри Бишкеки Қирғизистон имрӯз, 27-уми май ба хотири қурбониёни арӯсрабоӣ ва хушунат ҳамоиш ё тазоҳуроте баргузор хоҳад шуд.

Яке аз созмондиҳандагони чорабинӣ Гуляйим Айилчӣ гуфт, барои он 27-уми майро интихоб карданд, ки соли гузашта маҳз дар ҳамин рӯз Бурулай Турдаалии 20-сола дар Шуъбаи пулиси ноҳияи Жайилӣ кушта шуд.

"Ҳадафи асосӣ расонидани ин мушкил ба ҷомеа аст. Бояд таваҷҷуҳ кард, ки мушкили никоҳи иҷборӣ ҳанӯз ҳам мавҷуд аст ва аз тарафи дигар 27-уми май солгарди куштори Турдаалӣ аст. Ҳарчанд ҷазоро барои арӯсрабоӣ сангинтар кардаанд, вале он ҳанӯз ҳам мушоҳида мешавад", - изҳор дошт Гуляйим Айилчӣ.

Ёдрас мешавем, 27-уми майи соли 2018 дар шуъбаи пулиси ноҳияи Жайили Қирғизистон Бурулай Турдаалии 20-сола аз захми корд ҷон бохт. Духтарро Марс Бодошев корд зад, ки ба хотири издивоҷ ӯро дуздида буд. Бодошев баъдан худро низ захмӣ кард.

Ин ҳодиса дар ҷомеаи Қирғизистон баҳсҳои тундеро ба бор оварда, президент Сооронбой Ҷеенбеков ба тафтиши мушикофонаи он дастур дод. Вазорати умури дохилии Қирғизистон дар натиҷаи санҷиши ҳодиса эълом кард, ки 23 корманди он муҷозот шуда, 13 нафар бо шумули сардори пулиси вилояти Чуй Нурлан Сарчаев, ду муовини ӯ Марлис Асанову Канат Жумаев ва сардори пулиси Жайил Муратбек Исмоилов мақомҳои худро аз даст доданд.

Додгоҳ моҳи феврали соли равон дар доираи ин парванда Марс Бодошевро ҳамчун гумонбари асосӣ 20 сол бо мусодираи молу мулк аз озодӣ маҳрум карда, дӯсти ӯ Акмат Сейитовро низ дар ҷиноят "шарик" эътироф ва 7 сол зиндонӣ намуд.

Қотилони Маҳсо ба 30 соли зиндон маҳкум шуданд

Акс аз бойгонӣ

Додгоҳе дар Афғонстон ду ноболиғро барои рабудан ва куштани як духтари 6-сола ба 30 солии зиндон маҳкум кард. Қатли бераҳмонаи Маҳсо Аҳмадӣ дар Кобул хашми мардум дар Афғонистонро, ки ҷиноят ба зидди кӯдакон онҷо зиёд аст, барангехт.

Маҳсо Аҳмадиро моҳи март дар шаҳри Кобул рабуданд ва баъд аз онки волидонаш натавонистанд, 300 000 доллар ба одамрабоён бидиҳанд, куштанд. Пулиси Кобул ду ноболиғро дар як амалиёте дастгир кард ва видеоеро намоиш дод, ки ду нафар ҷиноятро эътироф мекунанд.

Ноболиғон дар ин видео нақл мекарданд, ки духтараки 6-соларо дуздида бо мотосикл ба як хонаи иҷора бурдаанд ва чун пулро нагирифтанд, ӯро куштанд. Дар муҳокимаи додгоҳӣ, ки рӯзи 26-уми май дар телевизион намоиш доданд, додрас ҳарду нафарро ба 30 солии зиндон маҳкум кард. Синну соли ноболиғонро нагуфтаанд, аммо додрас гуфт, ки онҳо ҳануз 18 сола нестанд.

СҶТ одат ба бозиҳои компютериро беморӣ эътироф кард

Созмони ҷаҳонии тандурусӣ (СҶТ) одат кардан ба бозиҳои компютериро ба гуруҳи нави байналмилалии бемориҳо ворид кард. Ин тасмим дар 72-умин Маҷмаи умумии тандурустии кишварҳои узви СҶТ дар шаҳри Женева гирифта шуд.

Одат кардан ба бозӣ дар гуруҳи нави бемориҳо ҳамчун рафтори батакроре қайд шудааст, ки ба иҷрои корҳои муҳими дигар, аз қабили корҳои шахсӣ, хонаводагӣ, иҷтимоӣ, касбӣ ва омӯзиш халал эҷод мекунад. Ин гуруҳи бемориҳо аз соли 2022 ба иҷро медарояд.

Ба назари СҶТ, ин навъи муътодон бозиро бар фаъолиятҳои рӯзмара ва манфиатҳои дигари зиндагӣ афзалтар номида, бо вуҷуди оқибатҳои манфиаш онро идома медиҳанд.

Таҳиягарони бозиҳои компютерӣ дар вокуниш ба ин қарор аз СҶТ даъват карданд, ки тасмимашро бознигарӣ кунад. Ба гуфтаи онҳо, қарори мазкур дар асоси "далелҳои муътамади нокофӣ" гирифта шудааст.

Назарбоев президенти фахрии Шӯрои туркон шуд

Ба Нурсултон Назарбоев, президенти пешини Қазоқистон мақоми фахрии президенти якумрии Шӯрои Туркон дода шуд. Дар ин бора дар изҳороти Шӯрои ҳамкориҳои кишварҳои туркзабон зикр шудааст.

Ба иттилои мақомоти Қазоқистон, ин ташаббусро президенти Туркия Раҷаб Эрдуғон пешниҳод ва роҳбарони дигари Шӯрои туркон ҷонибдорӣ кардаанд. Мақомоти Қазоқистон мегӯянд, Назарбоев ба хотири "нақши барҷастааш дар муттаҳид кардани туркзабонон дар солҳои 1990 ва ташкили созмони ҳамгироии туркон" ба чунин мақом мушарраф шудааст.

"Ақидаҳо ва тарҳҳои Нурсултон Назарбоев аз ин ба баъд низ тариқи Шӯрои туркон амалӣ хоҳанд шуд", - омадааст дар изҳорот.

Як ширкати шавҳари пешини Гулнора Каримова ба фурӯш гузошта шуд

Дар Узбекистон амволи ширкати "Rubicon Wireless Communication", ки ба Рустам Мадумаров, шавҳари пешини Гулнора Каримова, духтари президенти собиқи Узбекистон Ислом Каримов тааллуқ дорад, ба фурӯш гузошта шуд. Дар ин бора расонаҳои Узбекистон 25-уми май хабар доданд.

"Rubicon Wireless Communication" зертобеи ширкати "Perfectum" аст, ки дар бахши алоқаи мобилӣ фаъолият мекунад. Қимати ибтидоии ин ширкат дар музояда 205 млрд сӯм таъйин шудааст. Хабар дода мешавад, ки музояда 10 июни соли ҷорӣ барпо хоҳад шуд.

Пештар аз ин хабар расида буд, ки дар Узбекистон 100 дарсади саҳмияҳои ширкати "EDEL VEYS-ALI"-ро, ки молики нахустин радиои хусусии "Радио Гранд" дар ин кишвар аст, ба фурӯш гузоштанд.

Бино ба хабари расонаҳои Узбекистон, арзиши ширкат 4,1 миллиард сӯм (ҳудуди 480 ҳазор доллар) муайян шудааст. Музоядаи фурӯши ширкат 8 майи соли равон баргузор мешавад.

Пештар Додситонии кулли Узбекистон хабар дод, ки шавҳари пешини духтари калонии президенти нахустини Узбекистон Гулнора Каримова - Рустам Мадумаров дар нақшаи коррупсионии Каримова даст дошта, моҳи июни соли 2014 ба муҳлати тӯлонӣ зиндонӣ шуд.

Додситонии Шветсия Мадумаровро ба миёнаравӣ дар муомилаҳои Каримова бо бузургтарин ширкатҳои мухобиротӣ ҳангоми доду гирифти пора барои ворид шудан ба бозори алоқаи Узбекистон гумонбар медонад.

Кайҳоннавардони Амрико ба Моҳ бармегарданд

Ҳамсафари Замин зери соя

НАСА ва ё Оҷонси Кайҳоншиносии Амрико мегӯяд, мумкин аст, соли 2024 дигарбора кайҳоннавардонашро ба Моҳ бифристад. Созмон рӯзи 23-уми май бо нашри як баёнияи расмӣ дар бораи барномаҳои нав ҷиҳати таҳқиқу иктишофи ҳамсафари замин хабар дод.

Ҷим Брайденстайн, мудири НАСА гуфт, ки аввал як ковишгари бесарнишинро соли 2020 ба курраи Моҳ мефиристанд. Сипас як фазонаварди дигареро соли 2022 партоб мекунанд, ки дар атрофи Моҳ чарх мезанад.

Соли 2024 кайҳоннавардон аз ҷумла як зан ҳам ба Моҳ мераванд. Амрико баъди солҳои 60 ва 70-уми қарни гузашта, дигар барномаҳои таҳқиқотии мукаммал дар курраи Моҳро амалӣ накардааст.

Вазир гуфт, Эрон хоҳони робитаҳои дуруст бо кишварҳои арабист

Муҳаммад Ҷавод Зариф дар нишасти хабарии рӯзи 25-уми май дар Бағдод

Вазири умури хориҷӣ Муҳаммад Ҷавод Зариф, дигарбора гуфт, Эрон хоҳони ҳамкории мӯътадил бо ҳамсояҳои арабаш дар Халиҷи Форс аст ва хост, кишварҳои минтақа аҳдномаи манъи ҳамла ба якдигарро имзо кунанд.

Вазири умури хориҷии Эрон дар ин бора рӯзи 26-уми май ҳангоми нишасти муштараки хабарӣ бо Муҳаммад Алӣ Ҳаким ҳамтои ироқиаш дар шаҳри Бағдод сухан гуфт.

Алҳаким гуфт, Ироқ мехоҳад, байни Эрону Амрико, ки таниш байнашон авҷ гирифтааст, миёнҷигарӣ кунад, вале таъкид кард, ки Ироқ мухолифи ҳаргуна “иқдомоти якҷонибаи” Вашингтон аст. Ироқ баръакси кишварҳои дигари арабӣ бо Эрону Амрико ҳамкориҳои наздик дорад.

Робитаҳо байни Теҳрону Вашингтон баъди хуруҷи Амрико аз созиши атомии соли 2015 бо Эрон бисёр сард шудааст. Ҳукумати Доналд Трамп баъд аз ин таҳримот ба зидди Эронро барқарор кард ва дар чанд ҳафтаи гузашта ҳузури неруҳояш дар Ховари Миёнаро тақвият бахшид.

Ба гуфтаи мақомоти ироқӣ, рӯзи 25-уми май нахуствазир Одил Маҳдӣ ва раиси ҷумҳур Барҳом Солеҳ бо Муҳаммад Ҷавод Зариф “хатари ҷанг ва зарурати ҷилавгирӣ аз ҷангу танишҳоро” баррасӣ кардаанд.

Боварии мардуми Русия ба Путин бисёр кам шудааст

Акс аз бойгонӣ

Як муассиаи давлатии назарсанҷии Русия мегӯяд, боварии мардум ба раиси ҷумҳур Владимир Путин ба ҳадде кам шудааст, ки дар 13 соли гузашта собиқа надошт. Маркази Таҳқиқи Афкори Умуми Русия рӯзи 24-уми май натиҷаҳои назарсанҷиеро нашр кард, ки нишон додааст, фақат 31.7 дар сади мардум ба Владимир Путин бовар доштаанду тамом. Чунин рақами поин фақат дар соли 2016 дида шудааст.

Айни замон Владимир Путин аз маҳбубияти зиёд бархурдор будааст ва бештар аз 65 дар сади мардум ӯро тарафдорӣ мекардаанд. Баъди интихоби дигарбора ба мақоми раиси ҷумҳур дар соли 2018 обрӯи Владимир Путин дар миёни мардум камтар шуд.

Боло бурдани синни нафақа, коҳиши даромади мардум ва афзоиш додани молиёт аз арзиши изофа аз сабабҳои кам шудани обрӯву эътибори Владимир Путин дониста мешавад. Соли 2015 баъди ишғоли нимҷазираи Қрим аз тарафи Русия, 71 дар сади мардум гуфтанд, ки ба Путин боварӣ доранд. Аммо маҳбубияти ӯ аз он сол ба тадриҷ коҳиш ёфт.

СММ мегӯяд, Толибон асиронашонро мекушанду шиканҷа мекунанд

Акс аз бойгонист.

Дафтари Созмони Милал дар Афғонистон мегӯяд, Толибон бо афғонҳое, ки асир мегиранд, бадрафторӣ мекунанд ва чунин амалкарди онҳо баробар бо шиканҷаи маҳбусон аст.

Дар як баёнияи расмии созмон, ки рӯзи 26-уми май нашр шуд, омадааст, намояндагони СММ бо 13 асири гуруҳи 53 нафарие, гуфтӯгу кардаанд, ки маъмурони амниятии Афғонистон онҳоро моҳи гузашта аз як боздоштгоҳи Толибон дар вилояти Урузгон озод карданд.

Аксарияти онҳое, ки рӯзи 25-уми май озод шуданд, сарбозон, маъмурони амният, мақомоти расмӣ ва ғайринизомиён будаанд. Дар баёния омадааст, ба истиснои се нафар, ки аз соли 2016 дар асорати Толибон будаанд, бақияро аз соли 2018 дар ин зиндон нигаҳ медоштанд.

Ба гуфтаи Созмони Милал, шароит дар ин зиндон бисёр бад будааст ва бандиёнро маҷбуран кор мефармудаанд. Дафтари Созмони Милал аз қавли маҳбусони раҳошуда навиштааст, ки Толибон баъзе аз бандиёнро куштаанд. Дар баёния омадааст, тасвири маҳбусон аз зиндон воқеӣ аст ва онҳо дар бораи шиканҷаву бадрафторӣ ва дасти кам қатли 11 бандӣ аз тарафи Толибон нақл кардаанд.

Интихоботи Иттиҳодияи Аврупо имрӯз поён меёбад

Рӯзи 26-уми май даҳҳо миллион нафар аз сокинони 21 кишвари узви Иттиҳодияи Аврупо барои интихоби вакилони порлумони иттиҳодия раъй медиҳанд.

Интихоботи порлумонӣ дар Олмон, Фаронса, Итолиё, Булғористон, Хорватия ва Маҷористон сурат мегирад ва аҳолии ин кишварҳо намояндагони хеш дар Порлумони Аврупоро интихоб мекунанд. Порлумон дар шаҳри Страссбурги Фаронса қароргоҳ дорад ва аз 751 намоянда иборат аст.

Интихобот рӯзи 23-уми май шуруъ шуд ва ҳафт кишвари узви Иттиҳодияи Аврупо аз он рӯз то кунун раъй додаанд. Бино ба назарсанҷиҳо, мумкин аст, дар интихобот вакилони миллатгаро ва шуҳратталаби мухолифи Иттиҳодияи Аврупо сеяки курсиҳои порлумонро ба даст оварда ва қабули қарорҳо дар порлумонро дар 5 соли оянда мушкил кунанд.

Айни замон ҳамин назарсанҷиҳо нишон додаанд, ки ин гуруҳи довталабон назар ба ончӣ ки тасаввур мешуд, тарафдори зиёд надоштаанд. Бештар аз 400 миллион нафар ҳаққи ширкат дар интихоботи Иттиҳодияи Аврупоро доранд, ки бузургтарин интихоботи байналмилалӣ ба ҳисоб меравад.

Ёфтҳои бештар

Гузоришҳои видеоӣ

XS
SM
MD
LG