Пайвандҳои дастрасӣ

Хабари нав

Хабарҳо

Гуайдо гуфт, "марҳилаи ниҳоии" барканории ҳукумати Мадуро амалӣ мешавад

Раҳбари мухолифони Венесуэла Ҳуан Гуайдо гуфт, ки «марҳилаи ниҳоии» нақшаи барканории президент Николас Мадуроро ба роҳ монда, иддао кард, ки аз пуштибонии «сарбозони ҷасур» бархурдор аст. Вале тарафдорони президент Мадуро гуфтанд, ки чизе тағйир наёфтааст ва кишварро онҳо назорат мекунанд. Мақомот дар ҳукумати Мадуро рӯзи 30 апрел амалкарди Гуайдоро ҳамчун талоши табаддулоти давлатӣ маҳкум карданд. Бархе гузоришҳо ҳокист, ки дар пойгоҳи ҳавоии беруни Каракас ба сӯи Гуайдо ва ҳам даҳҳо мардони низомипӯш бо гази ашковар ҳамла сурат гирифт.

Дар нақли қавл аз шоҳидон Reuters гузориш дод, ки тарафдорони низомипӯши Гуайдо ва ҳам сарбозони тарафдори Мадуро ба сӯи ҳам оташ кушоданд. Вазири иттилоот Хорхе Родригес дар саҳифаи худ дар Twitter навишт, ки ҳукумати сотсиалистии Мадуро бо як “талоши кудатои” хурд, ки аз ҷониби низомиёни “хоин” ҳимоят мешавад, дастбагиребон шудааст.

Вазири дифоъ Владимир Падрино гуфт, ки нирӯҳои мусаллаҳ дар ҳимояти ҳукумати Мадуро қарор доранд ва ҳамаи воҳидҳои низомӣ гузориш доданд, ки дар ҳама ҷо ва ҳам пойгоҳҳо вазъ мӯътадил мебошад. Гуайдо, ки президентии ӯро ИМА ва дигар кишварҳо дастгирӣ мекунанд, дар як навори видеоӣ ҳозир шуд ва дар он дида мешавад, ки ӯ дар пойгоҳи ҳавоии Ла Карлота дар иҳотаи афроди мусаллаҳ ва ҳам мошинҳои қавии ҳарбӣ қарор доранд.

Нахустин форуми вакилони ҷавони Қирғизистон ва Қазоқистон

Дар шаҳри Бишкек рӯзҳои 29-30 апрел Форуми I вакилони ҷавони Қазоқистону Қирғизистон баргузор мешавад.

Дар ин чорабинӣ, ки бо ҳимояти Клуби дипломатии Остона ташкил шудааст, намояндагони Кумитаи кор дар умури ҷомеаи шаҳрвандии вазорати иттилоот ва ризоияти ҷамъиятии Қазоқистон, Эътилофи вакилони ҷавони Қирғизистон, вакилони маҳаллӣ ва вакилони шаҳрии ду кишвар, тоҷирон, коршиносон, аъзои созмонҳои ғайриҳукуматӣ ва созмонҳои ҷавонон ширкат мекунанд.

Дар ин чорабинӣ мавзуи "Модели идораи маҳаллӣ дар Қирғизистон ва Қазоқистон: таҷрибаи мусбати ҳамсояҳо дар рушди минтақа" баррасӣ шуд. Давоми ду рӯз ширкатдорон масоил ва мушкилоти ду кишварро баррасӣ карданд.

"Ҳадафи форум - тақвияти гуфтугӯи минтақавӣ ва робитаҳои сиёсии байни ду кишвар аст. Оянда дар назар аст, ки ҳамасола ин гуна форум баргузор шавад", - гуфт Кайирболат Сахметов, президенти Клуби дипломатии Остона.

Дарозтарин пули Тоҷикистон аз болои обанбори Роғун

акс аз бойгонӣ

Ду бонки байналмиллалӣ барои таҷдиду азнавсозии роҳи Ваҳдат-Рашт- Лахш- Қарамиқ, ки аз сарҳади Тоҷикистону Қирғизистон мегузарад, ба Тоҷикистон 350 миллион доллар қарз медиҳанд.

Бинобар маълумоти Бонки аврупоии таҷдид ва рушд, ки рӯзи 30-уми апрел дастраси Радиои Озодӣ шуд, 350 миллион доллар қарзро Бонки Осиёи Рушд ва Бонки аврупоии таҷдид ва рушд дар доираи тарҳи СAREC ихтисос медиҳанд.

Ин маблағ барои таҷдиди қитъаи 72 то 158-ум километри роҳ аз Обигарм то Нурободро дар бар мегирад. Дар доираи ин лоиҳа ҳамчунон сохтмони пуле ба дарозии 800 метр дар назар аст.

Дар Вазорати нақлиёти Тоҷикистон ба Радиои Озодӣ гуфтанд, бинобар тадриҷан боло рафтани сатҳи оби обанбори нерӯгоҳи Роғун як қисмати роҳи кунунӣ зери об мемонад ва аз ин рӯ зарурати сохтмони пул ба ин дарозӣ ба вуҷуд омадааст.

Дар сурати бунёд шудан, ин дарозтарин пул дар Тоҷикистон хоҳад буд.

Бонки аврупоии таҷдид ва рушд гуфтааст, пас аз семоҳаи дуввум пешбинӣ мешавад, барои интихоби ширкати пудратчӣ озмун ё тендер эълон мешавад.

Аммо дар мавриди шарту фоизҳои ин қарз ба Тоҷикистон чизе гуфта намешавад.

Зеленский расман президенти тозаинтихоби Украина эълон шуд

Комисияи марказии интихоботӣ (КМИ)-и Украина рӯзи 30 апрел натиҷаҳои даври дувуми интихоботи президентии ин кишварро эълом дошт ва зимни ин Володимир Зеленскийро расман президенти тозаинтихоби Украина номид.

Пайнавишти ин ҷаласаи КМИ-ро намояндагони ҳамаи номзадҳои интихобот имзо карданд, шикоятҳое, ки ин қарорро зери шубҳа гузоранд, садо надоданд.

Зеленский дар даври дувум зиёда аз 73 ва арқиби ӯ Петро Порошенко беш аз 24 дарсад раъй гирифтанд.

Маросими савганди президенти нави Украина бояд дар давоми 30 рӯз пас аз эълони натиҷаҳои интихобот баргузор шавад.

Володимир Зеленский 41 сол дорад. Вай ҳунарпеша, шоумен ва продюсер, раҳбари студияи "Квартал-95" буда, то ширкат дар интихоботи президентӣ бо сиёсат шуғл надошт ва мансаби давлатиеро ишғол накардаасст.

Гутереш аз раҳбари Чин хост, ки ба ҳуқуқи инсон эҳтиром гузорад. ВИДЕО

Антонио Гуттереш бо Си Ҷинпин

Дабири кулли Созмони Милали Муттаҳид Антонио Гутереш дар мулоқоти охири худ бо президенти Чин Си Ҷинпин вазъияти ақаллиятҳои уйғурро баррасӣ кардааст. Ӯ аз роҳбари Чин хостаст, ба ҳуқуқи инсон эҳтиром гузорад.

Сухангӯи Созмони Милал Стефан Дуҷорик рӯзи 29-уми апрел гуфт, Гутереш ба Си Ҷинпин гуфтааст, "ба ҳуқуқи инсон бояд пурра эҳтиром гузошт, ҳатто ҳангоми мубориза ба терроризм ва экстремизм".

Гутереш рӯзи 26-уми апрел дар Пекин бо Си Ҷинпин вохӯрдааст. Дуҷорик гуфт, мулоқот "хеле самимӣ ва боз" буд.

Гутереш аз раҳбари Чин хост, ки ба ҳуқуқи инсон эҳтиром гузорад
лутфан мунтазир бошед

Феълан кор намекунад

0:00 0:00:57 0:00

Изҳороти дабири кулли СММ пас аз он садо дод, ки раиси иҷроияи созмони Дидбони ҳуқуқи башар Кеннет Рот дар рӯзномаи "Вашингтон Пост" Гутерешро барои "хомӯшиаш дар бораи ҳуқуқи башар" танқид кардааст.

Чин барои нигоҳ доштани тақрибан 1 миллион уйғур ва мусалмонони дигар дар "марказҳои бозомӯзӣ" зери танқидҳои сахт мебошад. Фаъолони ҳуқуқи башар ин марказҳоро "урдугоҳҳои зиндониён" меноманд.

Рӯҳонӣ: Бо вуҷуди фишорҳо, Эрон ба содироти нафт идома медиҳад

Ҳасани Рӯҳонӣ, раиси ҷумҳури Эрон

Ҳасани Рӯҳонӣ, раиси ҷумҳури Эрон, рӯзи 30-юми апрел дар як суханронӣ аз телевизиони давлатӣ гуфт, ҳарчанд фишор аз сӯи Вашингтон афзоиш меёбад, Эрон ба содироти нафти худ идома хоҳад дод.

“Амрикоиҳо дар моҳҳои оянда хоҳанд дид, ки содироти нафт идома меёбад,” -- гуфт Рӯҳонӣ.

Ӯ афзуд, “тасмими Амрико дар бораи он ки содироти нафти Эрон ба сифр расад, як тасмими хатост ва мо иҷозат нахоҳем дод, ки ин тасмим ба иҷро дарояд.”

Суханони Рӯҳонӣ пас аз чанд рӯзе садо дод, ки Вашингтон эълон кард, дигар харидорони нафти Эронро аз таҳримҳо истисно нахоҳад кард.

Кохи Сафед дар як баёния рӯзи 21-уми апрел гуфт: “Ин тасмим ба он мақсад гирифта шудааст, то содироти нафти Эрон ба сифр расад ва режим аз сарчашмаи аслии даромади худ маҳрум шавад.”

Сохтмони пули 800-метрӣ бар фарози обанбори "Роғун"

Маҳалли сохтмони нерӯгоҳи Роғун

Ду бонки байналмилалӣ барои азнавсозии баъзе аз қитъаҳои роҳи Ваҳдат-Рашт-Лахш-Қарамиқ, ки то сарҳади Қирғизистон мерасад, ба Тоҷикистон 350 миллион доллар қарз медиҳанд.

Қарзи Бонки Осиёии Рушд ва Бонки Аврупоии Таҷдид ва Рушд дар доираи тарҳи СAREC ҷудо мешавад. Мақомот гуфтанд, таҷдиди аз 72 то 158-ум километри роҳ дар назар аст, ки аз Обигарм то Нурободро дар бар мегирад.

Дар доираи ин лоиҳа ҳамчунон сохтмони пуле ба дарозии 800 метр дар назар аст.

Дар Вазорати нақлиёти Тоҷикистон рӯзи 30-юми апрел ба Радиои Озодӣ гуфтанд, "бинобар тадриҷан боло рафтани оби обанбори нерӯгоҳи барқи обии Роғун як қисмати роҳи кунунӣ зери об мемонад ва аз ин рӯ зарурати сохтмони пул ба ин дарозӣ ба миён омадааст."

Дар сурати бунёд шудан, ин дарозтарин пул дар Тоҷикистон хоҳад буд.

Бонки Аврупоии Таҷдид ва Рушд гуфтааст, пас аз семоҳаи дувуми имсол барои интихоби ширкати пудратчӣ тендер ё музояда эълон карда хоҳад шуд.

Аммо дар мавриди шарт ва баҳраҳои ин қарз ба Тоҷикистон чизе гуфта намешавад.

Императори Ҷопон аз тахт фуромад ва салтанаташро поён дод

Императори Ҷопон Акиҳито эълом дошт, ки аз тахт даст мекашад. Маросими тахтфароии ӯ рӯзи сешанбе баргузор гашт ва аз нимашаби 30 апресл сар карда, ӯ дигар императори Ҷопон нахоҳад буд.

Ба ин муносибат Акиҳито аз ҳамаи онҳое, ки ӯро ҳамчун рамзи миллӣ арҷ мегузоштанд, сипосгузорӣ намуд ва афзуд барои сулҳу хушбахтии кишвараш дуъо хоҳад кард.

Акиҳитои 85-соларо аз номи ҳукумат ва мардум сарвазири Ҷопон Синдзо Абэ табрик ва ситоиш намуд. Қатъи фаъолияти императории Акиҳито, ҳанӯз соли 2017 эълон шуда, lар 200 соли ахир бори аввал аст, ки императори Ҷопон худро аз тоҷу тахт канор мекашад. 1 майи соли 2019 унвони император ба писари бузурги Акиҳито, валиаҳди 57-сола Наруҳито мегузарад.

Акиҳито аз соли 1983 императори Ҷопон буд.Тасмими ихтиёран даст кашидан аз имрепаториро Акиҳито тобистони соли 2016 гирифт ва онро ба солмандӣ ва вазъи сиҳатияш бастагӣ дод. Порлумони Ҷопон қарори махсусеро қабул кард, ки канор рафтани император бидуни халалдор шудани тартиби умумии ҷойнишинӣ ба тахту тоҷро таъмин мекунад.

Сафир: Амрико ҷонибдори суботи иқтисодӣ дар Тоҷикистон аст

Сафири Амрико дар Тоҷикистон Ҷон Марк Поммершайм

Сафири нави Амрико дар Душанбе гуфт, ки Иёлоти Муттаҳида "ҷонибдори суботи иқтисодӣ дар Тоҷикистон аст". Ҷон Марк Поммершайм рӯзи 29-уми апрел дар мулоқот бо муовини аввали раиси Бонки миллии Тоҷикистон Ҷамолиддин Нуралиев гуфт, "онҳо дар масоили иқтисодӣ ҳамеша омодаи ҳамкорианд".

Поммершайм моҳи марти имсол ба ҳайси сафири Амрико дар Душанбе ба кор оғоз кард. Ӯ қаблан бо манзури ошноӣ бо мақомоти дигари Тоҷикистон низ дидору мулоқот дошт.

Масъулони Бонки миллӣ ба сафири Амрико дар мавриди вазъи макроиқтисодии кишвар маълумот додаанд. "Ҷамолиддин Нуралиев ба Поммершайм дар бораи нигоҳ доштани сатҳи таваррум, низоми бонкӣ ва ислоҳоти дар ин самт татбиқшаванда, беҳ гардидани вазъи низоми бонкӣ нисбат ба солҳои қаблӣ, кам шудани ҳиссаи қарзҳои ғайрифаъол дар сандуқи қарзӣ маълумот дод", -- гуфтан дар Бонки миллии Тоҷикистон.

Дар ин дидор бо сафир, Нуралиев ҳамчунин доир ба тарҳи CASA-1000, хатти интиқоли нерӯи барқ ба Афғонистону Покистон, саҳми Амрико дар мавриди татбиқи ин тарҳ ва ҳамчунон сохтмони нерӯгоҳи Роғун маълумот додааст.

Гардиши савдо миёни Тоҷикистону Амрико чандон зиёд нест. Бино ба омори охир, гардиши савдо миёни ду кишвар дар соли 2017 каме беш аз 75 миллион долларро ташкил додааст.

Амрико дар 27 соли ахир ба Тоҷикистон 1,8 миллиард доллар кумак кардааст. Давлати Амрико дар бунёду бозсозии дидбонгоҳҳои марзӣ дар Тоҷикистон саҳм гирифта ва ба нерӯҳои низомӣ техника ва нақлиёт додааст.

Трамп ва Эрдуғон интиқоли С-400-po ба Туркия баррасӣ карданд

Раҳбарони ИМА ва Туркия - Доналд Трамп ва Раҷаб Эрдуғон дар як суҳбати телефонӣ масъалаи интиқоли муҷтамаи зиддимушакии С-400-и Русияро ба Туркия баррасӣ карданд. Ин хабарро ҳам Анқара ва ҳам Вашингтон дар иттилоияҳои расмии худ тасдиқ намудаанд.

Дар иттилоияи ҷониби Анқара омадааст, Эрдуғон ба Трамп пешниҳод кард, ки барои омӯзиши масоили марбут ба интиқоли С-400 як гуруҳи кории муштарак таъсис дода шавад. Вале Кохи сафед дар ин замина чизе нагуфтааст.

Тасмими Туркия барои харидории муҷтамаи русии С-400 нигаронии ҷониби Амрикоро ба бор овардааст. Вашингтон мегӯяд, насби ин муҷтамаъ дар ҳудуди Туркия зидди меъёрҳои НАТО аст. Вале Эрдуғон гуфт, кишвараш аз тасмими худ даст нахоҳад кашид. Ин нуктаро ӯ дар мулоқоти ахираш бо президенти Русия Владимир Путин дар шаҳри Москва дубора такрор кард. Интизор меравад, нахустин муҷтамаъ моҳи июли соли равон ба Туркия интиқол дода шавад.

Яке аз масъалаҳои дигаре, ки миёни ИМА ва Туркия ихтилофи назарро ба бор овардааст, таҳримҳои зидди Эрон ва вазъ дар Сурия ҳаст. Эрдуғон таҳдид дорад, ки зидди курдҳо -- ҳампаймонони ИМА дар мубориза бо гуруҳи террористии "Давлати исломӣ" амалиёти низомиро ба роҳ мемонад.

Ҷасади подполковники узбекро дар ҷои кор овезон пайдо карданд

Ҷасади подполковник Асомхоҷа Аброровро, ки дар маҳбаси сукунатии ноҳияи Зангиотаи вилояти Тошканд кор мекард, шаби 26 ба 27-уми апрел дар ҳуҷраи корияш овезон пайдо карданд.

Ба гуфтаи як манбаъ дар Вазорати умури дохилии Узбекистон, ҳодиса ҳамчун худкушӣ таҳқиқ мешавад. Наздикони Аброров гуфтанд, мақомот ҷасади ӯро 28-уми апрел пас аз ташхиси тиббӣ-додгоҳӣ ба онҳо супурдаанд.

Дар Додситонии кулли Узбекистон гуфтанд, ки дар робита ба ҳодисаи худкушии Аброров тафтишот оғоз шудааст. Яке аз наздикони Аброров мегӯяд, намояндагони ВКД Узбекистон ҳангоми супурдани ҷасад гуфтаанд, ки ӯ дар натиҷаи афсурдагӣ худкушӣ кардааст.

Ба гуфтаи ҳамсуҳбати мо, Аброров як моҳ пеш аз мақоми муовинии сардори пулиси шаҳри Оҳангарони вилояти Тошканд барканор ва барои кор ба маҳбаси Зангиота фиристода шуд. Ӯ аз ин кор норозӣ будааст.

Як корманди маҳбаси Зангиота гуфт, подполковник дар натиҷаи хастагии аз ҳад зиёд ва афсурдагӣ худкушӣ кардааст. "Дар ҷои кор фишор хеле зиёд аст. Бар асоси қонунгузорӣ, дар ҳафта бояд панҷ рӯз 8-соатӣ кор кунем. Вале мо дар як рӯз то 18 соат кор мекунем", - афзуд ӯ.

Намояндаи шуъбаи кадрҳои ВКД Узбекистон низ тасдиқ кард, ки дар ҳақиқат афсарони онҳо бидуни истироҳат кор мекунанд.

Трамп шартҳои қабули паноҳандагонро сахттар мекунад

Президенти ИМА Доналд Трамп шоми душанбе дастур дод, дар робита ба назорати мавҷи муҳоҷироне, ки барои дарёфти ҳаққи паноҳандагӣ ба ин кишвар меоянд, чораҳои нав ҷорӣ карда шавад.

Баррасии дархости паноҳандагии муҳоҷирон дар давоми 180 рӯз, ҷорӣ кардани маблағи муайян барои баррасии дархостҳо ва додани иҷозатномаи муваққатии кор аз зумраи чораҳои нав аст. Ҳамчунин ба муҳоҷироне, ки марзи ИМА-ро ғайриқонунӣ мегузаранд, иҷозатномаи муваққати кор дода намешавад.

Ҳадафи чораҳои нав таъмини иҷрои раванди дарёфти ҳаққи паноҳандагӣ ва пешгирӣ аз сӯистифодаҳо дар рафти он гуфта мешавад.

Бар асоси қонунгузории ИМА, ҳар шахс метавонад, дар гузаргоҳҳои марзии ин кишвар ҳаққи паноҳандагиро дархост кунад ва баррасии ин гуна дархост метавонад то чанд сол идома ёбад. Дар натиҷа бештари онҳо ҷавоби рад гирифта, дар ИМА ғайриқонунӣ зиндагӣ мекунанд.

Маъмурияти президент Трамп дар ин замина аз иқдомҳои гуногуне кор гирифта, аз ҷумла муҳоҷиронро то муайян шудани посухи дархости паноҳандагияшон дубора ба Мексика ё марказҳои махсус мефиристад. Вале додгоҳҳои ИМА бештари ин чораҳоро ғайриқонунӣ номиданд.

Дар моҳи марти соли равон 92 ҳазор нафар бо ҷурми убури ғайриқонунии марзи Мексика ва ИМА боздошт шудаанд. Ин рақам дар моҳи марти соли 2018 ҳудуди 38 ҳазорро ташкил додааст.

Дар Қирғизистон эътирозҳо зидди истихроҷи уран авҷ мегиранд (видео)

Дар шаҳри Бишкеки Қирғизистон зидди истихроҷи уран якбора ду эътироз баргузор мешавад.

Дар майдони марказии Бишкек ва гулгашти ба номи Горкий ҳамзамон ду эътироз зидди истихроҷи уран баргузор мешавад.

Дар майдони марказӣ "Ҳизби сабзҳо" бо роҳбарии Эркин Булекбоев эътироз ташкил кард.

Дар гулгашти Горкий эътирози сокинони Балиқчӣ баргузор мешавад, ки ахиран дар шаҳри Балиқчӣ ҳам гирдиҳамоӣ ташкил карда буданд.

Эътирозҳо зидди истихроҷи уран дар Қирғизистон баъди он сар заданд, ки хабари коркарди кони уран дар вилояти Иссиқкӯл расонаӣ шуд. Фаъолони маданӣ ба ҷамъоварии имзо шуруъ ва тасмими баргузории эътирозҳоро эълом карданд.

Ширкати русиву қирғизии "ЮрОсиё дар Қирғизистон" мехост, дар кони ноҳияи Тони Иссиқкӯл уран истихроҷ кунад. Вале корбарони шабакаҳои иҷтимоӣ маъракаеро зидди коркарди кон ба роҳ монда, фаъолони маданӣ дар Бишкек эътироз карданд. Онҳо гуфтанд, коркарди уран ба муҳити зист ва саломатии сокинон зарари сахт мерасонад.

Сарвазири Қирғизистон Муҳаммадқулӣ Абилғозиев 22 апрел дастур дод, ки то эъломи натиҷаи ташхиси зистмуҳитӣ корҳо дар кон қатъ шаванд.

Худи ширкат мегӯяд, ҳангоми коркарди уран аз техникаҳои бехатарӣ истифода мекунад ва ба муҳити зист осебе нахоҳад расид.

Бархе аз вакилони порлумони Қирғизистон пешниҳод карданд, ки то соли 2070 ба истихроҷи уран дар ин кишвар моратория эълом шавад.

Русия интиқоли пулро ба Қазоқистону Қирғизистон маҳдуд кард

Бонки марказии Русия аз 16 апрел интиқоли пулро ба як қатор кишварҳо, аз ҷумла Ветнам, Чин, Қирғизистон ва Қазоқистон тавассути низомҳои пардохтӣ маҳдуд кардааст. Дар ин бора нашрияи "Ведомостӣ" бо истинод ба се манбаи огаҳ аз қазия хабар додааст.

Дар як моҳ ба Қазоқистон интиқоли 150 ҳазор рубл ва барои кишварҳои дигар 100-ҳазоррублӣ иҷозат дода шудааст. Ба гуфтаи манбаи нашрия, Бонки марказии Русия тавассути ин иқдоми худ мехоҳад, бо амалиёти пинҳонӣ, аз ҷумла соҳибкории ғайрирасмӣ мубориза барад.

Ба гуфтаи ҳамсуҳбати дигари нашрия, шаҳрвандони хориҷие, ки дар бозорҳои Русия савдо мекунанд, худро ҳамчун соҳибкор ба қайд намегиранд ва ба воситаи низомҳои пардохтӣ пули молҳояшонро мефиристанд. Ба ҳисоби бонк, аз ҳама бештар маблағ ба чаҳор кишвари мазкур интиқол дода мешудааст.

Бино ба иттилои РБК, соли 2018 ба воситаи низомҳои пардохтӣ ба Қирғизистон $1,3 млрд, ба Чин $675 млн, ба Қазоқистон $392 млн ва ба Ветнам $175 млн фиристода шудааст.

Бонки марказии Русия мегӯяд, соли гузашта ҳаҷми маблағе, ки шаҳрвандони хориҷӣ ба кишварҳои худ фиристоданд, ба сатҳи рекордӣ -- $529 млрд расидааст, ки нисбат ба соли 2017 9,6% бештар мебошад.

Додгоҳ ҳукми сарвазирони пешини Қирғизистонро тағйир надод

Kyrgyzstan, Bishkek City Court, apr 9, 2019

Додгоҳи шаҳрии Бишкек 29 апрел қарор кард, ки гумонбарони парвандаи фасодкорӣ дар бозсозии Маркази гармидиҳии пойтахти Қирғизистон дар ҳабси пешакӣ бимонанд. Вакилони дифои айбдоршавандаҳо хоста буданд, ки ҳукми ҳабси пешакии онҳо ба ҳабси хонагӣ иваз карда шавад.

Аз ин пеш, Додгоҳи ноҳияи Свердлови Бишкек муҳлати ҳабси гумонбаронро то 12 июни соли равон дароз карда буд.

Баъди садамаи 26 январи соли 2018 дар маркази гармидиҳии Бишкек се парвандаи ҷиноӣ боз шуд. Яке аз ин парвандаҳо марбут ба фасодкорӣ ҳангоми интихоби ширкати кироякор аст. Тафтишот мегӯяд, шахсони масъул аз манфиатҳои ширкати TBEA ҷонибдорӣ кардаанд.

Ҳашт тан аз мансабдорони баландпояи Қирғизистон - аз ҷумла сарвазирони пешин Сафар Исҳоқов ва Жантор Сатиболдиев, вазири пешини энержӣ, раиси пешини Холдинги миллии энержӣ, роҳбари ширкати пойгоҳҳои барқӣ, вазири молияи Қирғизистон дар доираи парвандаи мазкур айбдор мешаванд.

Додситонии кулли Қирғизистон Откурбек Ҷамшедов пештар гуфт, тафтишот ҳамчунин ба кори президенти пешини ин кишвар Алмосбек Отамбоев низ баҳои ҳуқуқӣ хоҳад дод.

Автобуси ҳомили хонандагон дар наздикии Тошканд оташ гирифт

Автобуси ҳомили 53 мусофир, ки бештари онҳо хонандагони мактаб буданд ва аз сафари Бухоро бармегаштанд, шаби 29 апрел дар наздикии шаҳри Тошканд нахуст чаппа шуд ва баъдан оташ гирифт.

Кумитаи ҳолатҳои фавқулоддаи Узбекистон хабар медиҳад, ки автобус дар натиҷаи кафидани чархаш чаппа шудааст. Ҳамаи мусофирон фавран аз автобус берун оварда шуда, касе ҳалок нагардид. "Дар натиҷаи садама 6 кас маҷруҳ шуданд",-хабар дод кумита.

Ба иттилои мақомот, дар автобус 37 хонандаи мактаби №31 ноҳияи Паркет, 3 омӯзгори мактаб, 10 падару модари хонандагон ва 3 ронанда ҳузур доштанд.

Баҳс сабаби таъхири парвоз аз Бохтар ба Маскав шуд

Акс аз бойгонӣ

Масъулони Фурудгоҳи шаҳри Бохтар таъхири ҳавопаймои ширкати русии “Нордвинд”- ро ки озими Маскав шуд, тасдиқ карданд, вале сабаби онро шарҳ надоданд.

Аммо ба қавли як ҳамсуҳбати Радиои Озодӣ баҳс миёни корманди фурудгоҳ ва масъули ширкати "Нордвинд" сабаби таъхири дусоата ва поён кардани мусофирон аз ҳавопаймо шудааст.

Як сокини Бохтар, ки хоҳарзодааш Рӯзибой Расуловро ба Маскав равон кард, дар суҳбат ба Радиои Озодӣ гуфт, як даъво сабаб шуд, ки бори мусофиронро аз ҳавопаймо берун кашанд ва боз дохили ҳавопаймо кунанд.

Баъди таъхири дусоата ҳавопаймои хатсайри Бохтар -Маскав соати 5 шом ба пойтахти Русия парвоз кардааст. Ширкати русии “Нордвинд” ҳафтае се мартаба аз фурудгоҳи Бохтар ба Маскав парвоз мекунад ва қаблан таъхирҳои тулонӣ дар парвозҳои он мушоҳида нашудааст.

Таъсиси маркази нави ёрии ҳуқуқӣ барои муҳоҷирони тоҷик дар Маскав

Иззат Амон як фаъоли муҳоҷирони тоҷик дар Маскав

Дар шаҳри Маскав маркази нави ёрии ҳуқуқӣ барои муҳоҷирони кории тоҷик боз шуд. Ин марказ бо ҷалби панҷ ҳуқуқшинос кори худро аз рӯзи 29-уми апрел шурӯъ кард. Иззат Амон, як ҳомии ҳуқуқи муҳоҷирон ва аз муассисони ин марказ дар суҳбат бо Радиои Озодӣ гуфт, барои кӯмак ба корафтодаҳо панҷ ҳуқуқшиноси касбӣ ҷалб мешавад. Ӯ гуфт, ки хидмати ҳуқуқшиносон дар маҷмӯъ ройгон ва ҳам бетанаффус хоҳад буд. Дар оянда нақша ин аст, ки мутахассисони марказ ба корафтодаҳо аз Тоҷикистон дар дарёфти ҷойи кор низ мусоидат кунанд. Иззат Амон гуфт, ки як ҳадафи онҳо пешгирӣ аз ҳодисаҳои фиребу тақаллуби муҳоҷирони тоҷик дар Русия ҳам мебошад, ки ба хотири ноогоҳии ҳуқуқӣ ва ҳам надонистани забон аз ҷониби афроди ҷиноятпеша фиреб мехӯранд.

Дар Русия бинобар иттилои мақомоти ин кишвар 1 миллиону 200 ҳазор ва ба иттилои ҷониби Тоҷикистон беш аз 400 ҳазор нафар шаҳрвандон кору иқомат мекунанд. Фаъолон дар дохил ва беруни Русия аз мавридҳои зиёди поймолшавии ҳуқуқи муҳоҷирони тоҷик интиқод мекунанд. Дар ҳолатҳои зиёд ходимони ҳифзи қонун ҳам ба поймолкунии ҳуқуқи шаҳрвандони хориҷӣ ҳам даст мезнанд ва дар ин ҳолатҳо бисёри муҳоҷирон намедонанд аз кӣ ва чӣ гуна кӯмак дарёфт кунанд.

Дар Русия созмонҳои ҳомии ҳуқуқи муҳоҷирони тоҷик зиёд нест ва худи фаъолон ҳам ба зарурати афзоиши шумори чунин ташкилот даъват мекунанд.

Шаҳрвандони Қирғизистон зидди кони уран раҳпаймоӣ карданд

Дар ин иқдом наздики 200 сокини маҳаллӣ ширкат кард. Онҳо талаб карданд, ки корҳои иктишофӣ ва истихроҷи уран дар саросари Қирғизистон манъ шавад.

Пештар аз ин додгоҳи ноҳияи Балиқчӣ роҳпаймоии эътирозӣ то шаҳри Бишкекро манъ, аммо гирдиҳамоиро иҷозат дода буд.

Эътирозҳо зидди истихроҷи уран дар Қирғизистон баъди он сар заданд, ки хабари коркарди кони уран дар вилояти Иссиқкӯл расонаӣ шуд. Фаъолони маданӣ ба ҷамъоварии имзо шуруъ ва тасмими баргузории эътирозҳоро эълом карданд.

Ширкати русиву қирғизии "ЮрОсиё дар Қирғизистон" мехост, дар кони ноҳияи Тони Иссиқкӯл уран истихроҷ кунад. Вале корбарони шабакаҳои иҷтимоӣ маъракаеро зидди коркарди кон ба роҳ монда, фаъолони маданӣ дар Бишкек эътироз карданд. Онҳо гуфтанд, коркарди уран ба муҳити зист ва саломатии сокинон зарари сахт мерасонад.

Сарвазири Қирғизистон Муҳаммадқулӣ Абилғозиев 22 апрел дастур дод, ки то эъломи натиҷаи ташхиси зистмуҳитӣ корҳо дар кон қатъ шаванд.

Худи ширкат мегӯяд, ҳангоми коркарди уран аз техникаҳои бехатарӣ истифода мекунад ва ба муҳити зист осебе нахоҳад расид.

Бархе аз вакилони порлумони Қирғизистон пешниҳод карданд, ки то соли 2070 ба истихроҷи уран дар ин кишвар моратория эълом шавад.

Додгоҳи Швейтсария фурӯши мошинҳои Гулнора Каримоваро манъ кард

Се мошини гаронарзише, ки аз духтари калонии президенти пешини Ӯзбекистон Гулнора Каримова мусодира гаштаанд, фурӯхта нахоҳанд шуд.

Бино ба иттилои Le Temps, арзиши се мошини Каримова - Mercedes-Benz SLR2DR, Bentley Arnage ва Range Rover Sport V8 1 миллион франк (ҳудуди 1 миллион доллар) муайян шудааст.

Ба навиштаи Nashagazeta.ch, Додгоҳи федеролии Швейтсария дар робита ба қазияи духтари калонии президенти пешини Ӯзбекистон ду қарореро содир карда, ки яке аз онҳо фурӯхтани мошинҳои Каримоваро манъ мекунад. Ин мошинҳо соли 2013 мусодира гашта, то ҳол дар робита ба тақдири онҳо қароре содир нашудааст.

Додситонии кулли Ӯзбекистон 5 март хабар дод, ки Гулнора Каримова бо қарори додгоҳ аз ҳабси хонагӣ ба зиндон интиқол дода шудааст.

Бо қарори додгоҳи вилояти Тошканд аз 18 декабри соли 2017 Гулнора Каримова 10 сол зиндонӣ шуд. 1 июли соли 2018 муҳлати ҳукми вай 5 сол кам шуд. Ба иттилои додситонӣ, Каримова аз тартиботи ҳабси хонагӣ сӯистифода кардааст ва биноан, ӯро дубора ба маҳбас интиқол додаанд.

Пештар аз ин хабар расид, ки ширкатҳои Telia, VimpelCom ва МТС дар маҷмуъ барои ворид шудан ба бозори мобилии Ӯзбекистон ба Гулнора Каримова тақрибан 1 млрд доллар пора додаанд.

Вазорати адлияи ИМА низ Гулнора Каримоваро расман дар порагирӣ ва пулшӯӣ айбдор кард.

Макрону Меркел Косовову Сербистонро дубора сари мизи гуфтугӯ даъват мекунанд

Қитъаи марзии миёни Косово ва Сербистон

Президенти Фаронса Эммануэл Макрон ва садри аъзами Олмон Ангела Меркел қарор аст рӯзи 29 апрел дар як нишасти минтақавӣ дар Берлин мавзӯи зарурати азсаргирии гуфтугӯҳои миёни Сербистон ва Косоворо баррасӣ кунанд. Дафтари матбуотии президенти Фаронса дар як баёния рӯзи 28 апрел эълон кард, ки ин нишаст ба "устувории минтақа ва таваҷҷӯҳи вижа ба дарёфти роҳи гуфтугӯи миёни Сербистон ва Косово" нигаронида шудааст.

Гуфтушунидҳо миёни Сербистон ва Косово бо миёнаравии Иттиҳоди Аврупо соли гузашта, пас аз гузорише дар бораи эҳтимоли табодули қитъаҳои марзии миёни ду кишвар, ки боиси танқиди зиёд шуд, барҳам хӯрд.

Моҳи ноябр Косово ба молҳои Сербистон молиёти 100-дарсадӣ ҷорӣ кард ва нахуствазири Косово Ромуш Ҳарадинаҷ гуфт, то замони эътирофи истиқлолияти Косово аз ҷониби Белград, ин қарор бекор намешавад. Белград дар навбати худ гуфт, ки то вақте ки тарофа бардошта нашавад, ҳеҷ музокироте бо Косово аз сар гирифта намешавад.

Ҳамоиши эътирозӣ ба ҷонибдорӣ аз фаъолони ҳабсшудаи қазоқ

Дар пойтахти Қазоқистон шоми 28 апрел даҳҳо ҷавон ба ҷонибдорӣ аз фаъолони мадание ҳамоиши эътирозӣ баргузор карданд, ки дар ҷараёни марафони Алмато барои шиори "Аз ҳақиқат ҷойи гурез нест" боздошт шуданд.

Ҷамъомадагон дар даст лавҳаеро бо акси фаъолони боздоштшуда -- Осия Тулесова, Бейбарис Толимбоев, Суинбике Сулаймонова, Айдос Нурболатову Ойгул Нурболатова ва навиштаи "Қаҳрамонҳои мо" доштанд. Яке аз онҳо пироҳанеро бо навиштаи "Аз ҳақиқат ҷойи гурез нест. Ман интихоб дорам" ба бар карда буд.

"Вакили дифоъ дар додгоҳ бегуноҳии фаъолонро собит кард, вале бо ин вуҷуд онҳоро 15 рӯз ҳабс карданд. Кормандони пулис дар санад фаъолонро туҳмат задаанд, ки гӯиё дар даст шиори "Пешвои миллат - таҳқири миллат"-ро доштанд. Вале дар асл дар лавҳаи онҳо "Аз ҳақиқат ҷойи гурез нест. Ман интихоб дорам" навишта шуда буд. Додрас ва маъмурони пулиси мо чеҳраи воқеии худро нишон доданд", - гуфт яке аз иштирокдорони ҳамоиш.

Ёдрас мешавем, пулиси Қазоқистон 21 апрел дар ҷараёни марафони Алмато панҷ фаъоли маданиро барои лавҳаи дасташон бо шиори "Аз ҳақиқат наметавон гурехт" боздошт кард. Фаъолон дар риоя накардани банди "Нақзи тартиби ташкил ё баргузории ҷамъомадҳо"-и Кодекси маъмурии Қазоқистон айбдор шуданд.

Додгоҳи шаҳри Алмато 22 апрел фаъолон Айдос Нурболатов, Ойгул Нурболатова ва Суинбике Сулаймоновароро 20 нишондиҳанда (1 нишондиҳанда - 2 525 танга) ҷарима кард.

Фаъолон Осия Тулесова ва Бейбарис Толимбоев бо ҷурми нақзи қисми 3-и банди мазкур худи он рӯз 15-рӯзӣ ба ҳабс гирифта шуданд. Вакили дифои Тулесова 26 апрел хабар дод, ки шахси зери ҳимояи ӯ аз 23 апрел дар эътироз ба қарори ҳабсаш гуруснанишинӣ эълом кардааст.

Созмонҳои байналмилалии ҳомии ҳуқуқи Freedom House ва Amnesty International фаъолони боздоштшударо "маҳбусони озодии баён" номида, аз мақомоти қазоқ даъват карданд, ки онҳоро озод кунанд.

"Avengers: Endgame" дар нахустин рӯзҳои истироҳат рекорд гузошт

Филми "Интиқомҷӯён: Поёни бозӣ" (Avengers: Endgame) - чаҳорумин ва охирин силсилафилми "интиқомҷӯён"-и абарқаҳрамонони дунёи Marvel аст, ки дар нахустин рӯзҳои ба фурӯш баромаданаш рекорд гузошт.

Нашрияи Walt Disney, ки ҳаққи фурӯши филмро дорад, хабар дод, филми мазкур дар нахустин рӯзҳои фурӯшаш 1 миллиарду 200 миллион доллар ҷамъ овард.

Дар ИМА ва Канада "Интиқомҷӯён: Поёни бозӣ" 350 миллион ва дар Чин 330 миллион доллар ҷамъ кард.

Бино ба пешгӯии Bloomberg, филми мазкур эҳтимол дорад, бештар аз 2,5 миллиард доллар ҷамъ оварад. Даҳ соли пеш филми "Аватар" бештар аз 2 миллиарду 700 миллион доллар аз ҳисоби фурӯшаш ҷамъ карда буд.

Дар шарқи Туркманистон кишоварзонро ба пиллапарварӣ маҷбур мекунанд

Дар вилояти Лебапи Туркманистон кишоварзонро ба пиллапарварӣ маҷбур мекунанд.

Ба гуфтаи як шоҳид, кишоварзон ба далели камдаромад будани абрешим, намехоҳанд даст ба ин кор зананд. Аммо мақомоти маҳаллӣ аз равишҳои мухталиф кор мегиранд, то кишоварзон ва сокинони маҳаллиро ба ин кор маҷбур кунанд.

"Соли гузашта одамонро фиреб карданд. Ваъда дода буданд, ки дар ивази ҳар пилла даҳ кило беда медиҳанд. Аммо бисёре аз пиллапарварон беда дарёфт накарданд. Имсол ҳам ҳамон ваъдаро доданд, вале сокинон дигар бовар накарданд. Мақомот ҳоло таҳдид доранд, ки замини кишоварзонро бозпас мегиранд", - хабар дод як сокини маҳаллӣ.

"Пиллапарварӣ кори душворе аст. Як моҳ бояд чанд утоқи хонаро холӣ ва аҳли хонаводаро дар берун бояд ҷо кард. Ба ҷуз ин барги тут кам аст, ба ҳама намерасад", - гуфт сокини дигар.

Моҳи январ ҳукумати Туркманистон хабар дод, ки соли ҷорӣ ҳосили пилларо то 2030 тонна мерасонад.

Ӯзбекистону Қазоқистон ҷузъиёти "Silk Visa"-ро ҳал мекунанд

Ӯзбекистону Қазоқистон ҳанӯз моҳи феврали соли ҷорӣ тасмим доштанд, намунаи Шенгени Аврупоӣ - визаи ягонаи "Silk Visa"-ро роҳандозӣ кунанд, ки дар оянда мумкин аст, кишварҳои дигари минтақа фаро гирифта шаванд.

"Мақомоти масъули Ӯзбекистону Қазоқистон ҳоло ин тарҳро фаъолона омоде мекунанд. Сабаби аслии то кунун роҳандозӣ нашудани тарҳ дар он аст, ки ду кишвар равишҳои мухталифи низоми бевизаро бо кишварҳои хориҷӣ дар пеш гирифтаанд. Қазоқистон рӯйхати алоҳидаи кишварҳоеро дорад, ки бо онҳо равуои бевизаро ба роҳ мондааст, мо рӯйхати худро дорем", - гуфт Улуғбек Қосимхоҷаев, муовини аввали раиси Кумитаи ҷаҳонгардии Ӯзбекистон.

Коршиносон гуфтанд, як масъалаи дигар арзиши виза аст. "Қазоқистон як нархгузориро муайян кардааст, мо нархи дигарро. Мо бояд нархро ҳамсон кунем. Аз ҳамин хотир, ҳоло мо ин ҷузъиётро баррасӣ дорем", - гуфт вай.

Қосимхоҷаев дар мавриди замони роҳандозии раводиди мазкур гуфт, иродаи сиёсии раҳбарони ду кишвар дар робита ба Silk Visa ҳаст ва бештари корҳо дар ин замина кайҳо иҷро шудааст. Дар ҳоли ҳозир ниҳодҳои дахлдор бо масъалаҳои боқӣ машғуланд.

Пештар хабар дода буданд, ки Қирғизистону Тоҷикистон низ омодаанд, ба тарҳи Silk Visa пайванданд ва Туркманистон дар ин замина фикр дорад. Имкони пайвастани Озарбойҷону Туркия низ дар оянда баррасӣ мешавад.

Ёфтҳои бештар

Гуфтугӯ бо Умед Бобохонов, муассис ва сардабири "Азия-Плюс"
лутфан мунтазир бошед

Феълан кор намекунад

0:00 0:16:08 0:00
Гузоришҳои радиоӣ
ПОДКАСТ
Гуфтугӯ бо Умед Бобохонов, муассис ва сардабири "Азия-Плюс"
Гузоришҳои радиоӣ

Гузоришҳои видеоӣ

Тарс аз вируси нав дар Тоҷикистон
лутфан мунтазир бошед
Embed

Феълан кор намекунад

0:00 0:02:18 0:00
XS
SM
MD
LG