Пайвандҳои дастрасӣ

Хабари нав

Хабарҳо

Додгоҳ Отамбоевро ба пардохти 300 000 сом ҷуброн маҳкум кард

Алмосбек Отамбоев

Додгоҳи ноҳияи Октябри шаҳри Бишкеки Қирғизистон даъвои се шаҳрванд алайҳи президенти пешин Алмсобек Отамбоев ва мудири телевизиони "Апрел" Дмитрий Ложников қисман қонеъ кард.

Отамбоев вазифадор шуд, ки ба ҳар кадом аз се даъвогар 100 ҳазор сом - дар маҷмуъ 300 ҳазор сом (наздики 4,5 ҳазор доллар) ҷуброн пардохт кунад.

Ахматбек Келдибеков, раиси пешини порлумон, Азимбек Бекназаров ва Кенешбек Дуйшебоев аъзои пешини Ҳукумати муваққат 26 декабри соли 2018 Отамбоев ва мудири телевизиони "Апрел" Дмитрий Ложниковро ба додгоҳ кашиданд. Баҳс сари мусоҳибае буд, ки Отамбоев 10 декабр дар телевизиони мазкур доир кард.

Ба бовари даъвогарон, президенти пешин дар мусоҳибааш ба шарафу номуси онҳо латма задааст. Даъвогарон аз президенти пешин 18 миллин сом ҷуброни зарари маънавӣ талаб доштанд.

Украина дар озмуни "Евровидение" иштирок намекунад

Овозхони украинӣ Анна Корсун

Украина дар озмуни "Евровидение-2019" иштирок намекунад. Дар ин бора Ширкати миллии радиотелевизионии Украина хабар дод. Худдории тими ғолиб аз иштирок дар озмуни пешини "Евровидение" сабаби чунин тасмим шудааст.

Ширкати радиотелевизионӣ ҳамчунин ба "мушкили системавӣ" ишора кардааст, ки ба ҳунарнамоии сарояндагони украинӣ дар ҳудуди "кишварҳои таҷовузгар" марбут аст. Қонунгузории Украина ин мафҳумро танҳо дар нисбати Русия кор мебарад.

Пештар аз ин аъзои гуруҳи ҳунарии Brunettes shoot Blondes-и Украина хабар доданд, ки ба озмуни "Евровидение" намераванд.

Ширкати миллии радиотелевизионии Украина чанде пеш гуфт, баъди он ки чанд гуруҳи ҳунарӣ аз ширкат дар озмун даст кашиданд, мумкин аст, Украина дар озмун аслан ширкат накунанд.

Сароянда Maruv (номи аслиаш Анна Корсун) низ гуфт, дар "Евровидение" аз Украина намояндагӣ намекунад.

Украина дар озмуни "Евровидение -2016" пирӯз шуда буд. Он замон овозхони тотор аз Қрим Ҷамила Украинаро дар озмун намояндагӣ карда буд.

Баррасии тарҳи ҷамъоварии маълумот оиди пулҳои Путин дар Конгресси ИМА

Президенти Русия Владимир Путин

Конгресси ИМА тарҳи қонунеро баррасӣ мекунад, ки ба истихбороти Амрико дастур медиҳад дар бораи дороиҳои президенти Русия Владимир Путин маълумот ҷамъ кунад. Ин санад, ки бо ибтикори узви Конгресс аз Ҳизби Демократ Валдис Деминг ва ҷумҳурихоҳ Элис Стнефаник таҳия шудааст, дар саҳифаи Деминг нашр шуд. Ба гуфтаи муаллифони тарҳи қонун, ҳукумати Русия коррупсияро ҳамчун абзори нигаҳдории қудрат ва заъиф кардани режимҳои демократӣ истифода мекунад.

"Беҳтарин роҳ ҳамла ба ҳукумати Путин ва шириконаш ва пайгирии мавҷи пулҳои ғайриқонунии пинҳонӣ аст, ки амалиёти онҳоро сармоягузорӣ мекунад",- гуфт Деминг. Тарҳи қонун ёдрас мекунад, ки Русия ба дахолат ба сохторҳои демократии ИМА муттаҳам мешавад.

Санад ба ҷомеаи истихбороти Амрико - 16 ниҳоде, ки ба ҷамъоварии маълумоти истихборотӣ машғул аст, пешниҳод мекунад, ки манбаҳои бой шудани атрофиёни Путин ва шахсан худи ӯро пайгирӣ ва мушаххас кунад, ки кадом олигархи рус "таҷрибаҳои коррупсионии Владимир Путин"-ро осон мекунад.

Моҳи январи соли 2018 Вазорати молияи ИМА "гузориши Кремлин"- рӯйхати афроди наздик ба президенти Русия Владимир Путинро нашр кард, ки метавонанд таҳти таҳрими Амрико қарор бигиранд. Ба ин феҳраст 210 нафар, бо шумули ҳамаи аъзои ҳукумати Русия, кормандони маъмурияти президент, ширкатҳои давлатӣ, раҳбарони вазоратҳои қудратӣ ва олигархҳо шомил ҳастанд.

Моҳи июли соли 2017 раҳбари бунёди Heritage Capital Уилиям Браудер ҳангоми сӯҳбат дар кумитаи Сенати ИМА гуфт, ки Владимир Путинро сарватмандтарин одами ҷаҳон арзёбӣ мекунад. Броудер, ки дар Русия ба ҷиноятҳои молӣ муттаҳам шуд, дороиҳои Путинро $200 миллиард шумурдааст.

Биноба маҷаллаи Forbes соли 2017 дороиҳои Кирилл Шамолов - домоди президенти Русия Владимир Путин, ба $1,3 миллиард баробар буд. Дертар Bloomberg хабар дод, ки Шамолов аз духтари Путин ҷудо шудааст.

Покистон ду сарнишини ҳиндуро асир гирифт

Яке аз сарнишинҳои ҳавопаймои Ҳиндустон

Мақомоти Покистон субҳи 27-уми феврал аз сарнагун кардани ду ҳавопаймои низомии Ҳиндустон хабар доданд. Яке аз ҳавопаймоҳо дар ҳудуди Кашмир ва дувумӣ дар Ҳимолойи Ҳиндустон суқут кард.

Ба гуфтаи мақомоти Покистон, ду сарнишини ҳинду ба асорат афтодаанд, ки якеашон ҳоло дар беморхона бистарӣ аст.

Низомиёни Ҳиндустон низ аз ин пештар тасдиқ карданд, ки як ҳавопаймои низомии онҳо дар минтақаи баҳсии миёни ин кишвару Покистон – Кашмир суқут кардааст.

Ҳиндустон пас аз суқути ҳавопаймоҳояш дасти кам чаҳор фурудгоҳро дар марз бо Покистон баст. Чину Амрико Ҳиндустон ва Покистонро ба хештандорӣ даъват карданд. Намояндаи Толибон дар навбати худ гуфт, низои ду кишвар метавонад ба раванди гуфтугӯи сулҳи Афғонистон таъсири манфӣ расонад.

Нирӯҳои ҳавоии Ҳиндустон субҳи 26-уми феврал бахши покистонии Кашмирро ҳадаф қарор доданд. Ба иттилои хабаргузории ANI, 12 ҳавопаймои "Мираж 2000С"-и Ҳиндустон гӯё ба пойгоҳи ҷангҷӯёни гуруҳҳои террористии "Артиши Муҳаммад" ва "Ҳизби Муҳаммад" бомба афканда, онро пурра маҳв карданд.

"Дар натиҷаи зарбаҳои ҳавоии Ҳиндустон пойгоҳҳои террористии Балакот, Чакотӣ ва Музаффаробод пурра маҳв шуданд", - навиштааст ANI.

Вазири умури хориҷии Ҳиндустон Виҷай Гокхале гуфт, ҷангҷӯён ба ҳамлаҳои нави террористии зидди кишвараш омодагӣ медиданд ва зарбаҳои ҳавоӣ низ барои пешгирӣ аз ин ҳамлаҳо анҷом дода шуд. Ба гуфтаи ӯ, дар натиҷаи зарбаҳо шумори зиёди ҷангҷӯён бо шумули фармондеҳонашон кушта шудаанд.

Вале мақомоти Покистон гуфтанд, дар минтақае, ки ҳадафи зарбаҳои нирӯҳои ҳавоии Ҳиндустон қарор гирифт, ягон пойгоҳи террористӣ вуҷуд надошт ва касе ҳам ба ҳалокат нарасидааст. "Ҳеч гуна талафоти инсоние ба қайд гирифта нашудааст", - гуфт сухангӯи Нирӯҳои ҳавоии Покистон генерал-майор Азиф Ғафур.

Боздошти 16 эътирозгар дар Жанаозени Қазоқистон (Видео)

Хабарнигорони Радиои Озодъ Сония Тойкен ва Санат Нурбек

Аз 23 то 25 феврал дар шаҳри Жанаозени Қазоқистон 16 сокин ба ҷавобгарии маъмурӣ ҷалб шудааст. Ҳар кадоми онҳо аз 5 то 7 рӯз ҳабси маъмурӣ шуданд. Дар ин бора додситонии маҳаллӣ хабар дод.

Ба иттилои мақомот, сабаби боздошти сокинон "ифлос кардани ҷойҳои ҷамъиятӣ, суханҳои қабеҳ ва дигар аъмоли огоҳонае, ки ба тартиботи ҷамъиятӣ халал мерасонад", будааст.

Ба ҷуз ин, ба иттилои додситонӣ, нисбати як сокини шаҳри Жанаозен барои "барангехтани адовати иҷтимоӣ, миллӣ, қавмӣ ва нажодӣ" парвандаи ҷиноӣ боз гардидааст.

Ин дар ҳолест, ки пештар мақомот хабари ба ҷавобгарӣ ҷалб шудани сокинони Жанаозенро рад карда буданд. Сокинон бо талаби таъмини ҷойи кор гирдиҳамоӣ ташкил карданд.

Дар Жанаозен чӣ мегузарад?
лутфан мунтазир бошед
Embed

Феълан кор намекунад

0:00 0:01:49 0:00

27 феврал пулиси Жанаозен хабарнигорони бахши қазоқии Радиои Озодӣ Сания Тойкен ва Санат Нурбековро боздошт кард. Ин ду хабарнигор баъди шаш соати боздошт раҳо шуданд.

Дар идораи пулис шикоятеро аз номи як сокини шаҳр ба хабарнигорон нишон додаанд. Сокини шаҳр бо насаби Шаудиров шикоят кардааст, ки мусоҳибаи хабарнигорон бо сокинони шаҳр мумкин аст, "боиси оташангезӣ" шавад.

Дар шаҳри Жанаозен чораҳои амниятӣ тақвият дода шудааст. Дар кӯчаҳои шаҳр шумори зиёди низомиҳо дида мешавад.

Идомаи боздошти мақомоти баландпоя дар Узбекистон

Вазорати адлияи Узбекистон

Чанд манбаъ дар мақомоти ҳифзи ҳуқуқи Узбекистон хабар доданд, ки маъмурони Хадамоти амнияти президент рӯзи 23-юми феврал муовини сардори Идораи кадрҳои Вазорати адлияи ин кишвар Юсуф Хоҷаевро боздошт кардаанд.

Боздошти Хоҷаеви 58-сола дар пасманзари дастгир шудани даҳҳо мансабдори баландпояи Хадамоти амнияти давлатӣ ва мақомоти додситонии ин кишвар сурат мегирад.

Як манбаъ дар Додситонии кулли Узбекистон гуфт, Юсуф Хоҷаев дар доираи парвандае боздошт ва бозпурсӣ мешавад, ки зидди раҳбарони дастгиршудаи Хадамоти амнияти давлатӣ боз шудааст.

13-уми феврал хабар расид, ки раиси барканоршудаи Хадамоти амнияти давлатии Узбекистон Ихтиёр Абдуллоев ба муҳлати як моҳ таҳти боздошт қарор гирифт ва ҳоло дар боздоштгоҳи хадамот бозпурсӣ мешавад.

Юсуф Хоҷаев, ки дар миёни ҳамкоронаш бо лақаби "Юсуфи тасмимгир" маъруф аст, гӯиё дар ҳолатҳои ришвахории миёни раҳбарияти пешини Хадамоти амният ва мақомоти ҳифзи ҳуқуқи Узбекистон даст дорад.

Як ҳуқуқшинос аз шаҳри Тошканд гуфт, ки наздикони Юсуф Хоҷаев дар ҳоли ҳозир вакили дифоъ ҷустуҷӯ дорад.

Ветнам мизбони мулоқоти Трамп ва Ким шуд

Президенти ИМА Доналд Трамп ва раҳбари Кореяи Шимолӣ Ким Чен Ун дар остонаи шурӯи ҳамоиши дурӯза дар пойтахти Ветнам ҳамдигарро шодбош гуфтанд. Дар ин ҳамоиш қарор аст масъалаи барномаи ҳастаӣ ва мушакии Пхенян мавриди баррасӣ қарор гирад.

Дар лаҳзаи шодбош, ки дар меҳмонхонаи панҷситорадори Sofitel Legend Metropole дар шаҳри Ҳаной ҷараён гирифт, ду раҳбар дасти ҳамдигарро фишурда ба ҳам табассум карданд. Қарор аст ду раҳбар дар ҳузури мушовиронашон инчунин як ғизои шоме ҳам бихӯранд.

Трамп дар сӯҳбат бо хабарнигорон гуфт, ки бовар дорад музокироти онҳо “муваффақиятомез” мегузарад ва худи ӯ дар “масъалаи халъи силоҳи ҳастаӣ” фикрашро тағйир доданӣ нест.

Ким Чен Ун ҳам изҳори хушбинӣ кард ва гуфт, ки бовар дорад “натиҷаҳои ин музокирот мавриди истиқболи ҳама мардум мешавад”. Вай гуфт, “тамоми талошамро ба харҷ медиҳам, ки натиҷаи хубе ба даст ояд”.

Трамп талош дорад бо Ким, ки бо сиёсати диктаторӣ ва саркӯби мардум ва озодиҳояш маъруф буда баробар бо ин дорои силоҳи ҳастаӣ мебошад, созиш кунад.

Ин дуюмин мулоқоти ду раҳбар аст. Нахустин дидори таърихии миёни президентони ИМА ва Кореяи Шимолӣ моҳи июни соли 2018 дар Сингапур баргузор шуда буд. Вале аз он замон то кунун дар равобити ду ҷониб пешрафти андаке мушоҳида шудааст.

Трамп дар ҳавопаймои ширкати Air Force One вориди Ҳаной ва Ким савори қатори махсуси амниятӣ дар давоми се шабонарӯз ва дар паи як сафари 3-ҳазоркилометрӣ, тавассути хоки Чин вориди пойтахти Ветнам шуд.

Пеш аз тарки Вашингтон, Трамп дар саҳифаи худ дар Twitter навишт: “Дар паи анҷоми барномаи халъи силоҳ, Кореяи Шимолӣ базудӣ ба як қудрати иқтисодӣ табдил мешавад. Вагарна вазъият тағйир намеёбад. Раҳбар Ким як қарори оқилона қабул мекунад”.

Рӯзи 25 феврал дар ҷараёни мулоқот бо раҳбарони аёлатҳои кишвар дар Кохи Сафед, Трамп пешгӯӣ кард, ки ин “як ҳамоиши хеле азим” хоҳад буд.

Қаноатшоҳ Лоиқзода: "Барканори ман ба ягон ҳодиса рабт надорад"

Қаноатшоҳ Лоиқзода

Қаноатшоҳ Лоиқзода рӯзи 26-уми феврал аз мақоми раиси ноҳияи Рашт барканор шуд. Дар шарҳи фармони президент дар ин бора сабаби аз мақомаш озод шудани Лоиқзода гуфта намешавад.

Ҳоло Раҳимҷон Муқимӣ иҷрокунандаи вазифаи раиси ноҳияи Рашт аст. Маълум нест, Қаноатшоҳ Лоиқзода ба вазифаи наве дар сохторҳои ҳукуматӣ таъйин хоҳад шуд ё на.

Лоиқзода рӯзи 27-уми феврал ва пас аз чанд лаҳзаи нашри фармони барканориаш гуфт, ба ӯ кор дар мақоми дигар пешниҳод нашудааст. “Мо сарбозем. Новобаста аз он ки мансаб медиҳанд ё не, хидмат мекунем”, - афзуд ӯ.

Қаноатшо Лоиқзодаи 48-сола чаҳор сол пеш ба мақоми раиси ноҳияи Рашт таъйин шуд ва исмаш борҳо дар матбуот ва шабакаҳои интернетӣ дар робита бо ҳодисаҳои баҳсбарангез расонаӣ гардид.

Ҷунайдулло Худоёров
Ҷунайдулло Худоёров

Яке аз ҳодисаҳои пурсарусадо – боздошту зиндонӣ шудани як фаъоли Фейсбук аз ноҳияи Рашт Ҷунайдулло Худоёров буд. Худоёров соли 2018 бо ҷурми пайравӣ аз ҷараёни мазҳабии “Салафия” ба панҷ соли зиндон маҳкум шуд.

Наздикони Худоёров ин иттиҳомро қотеона рад карда мегӯянд, Ҷунайдулло ба хотири интиқодаш аз мақомоти ноҳияи Рашт, аз ҷумла раиси ҳамакнун собиқ Қаноатшоҳ Лоиқзода дар саҳифаҳои шабакаҳои иҷтимоӣ ба зиндон рафт.

Қаноатшоҳ Лоиқзода рӯзи 27-уми феврал гуфт, ки барканории ӯ ба ин ва дигар ҳодисаҳо рабт надорад. Лоиқзода кӯтоҳ гуфт, ки “ин нодуруст аст” ва телефонашро қатъ кард.

Мувофиқи қонунҳои Тоҷикистон, таъйини мақомоти маҳаллии ҳокимияти давлатӣ интихобӣ нест ва бар асоси фармони президент сурат мегирад.

Таркиши телевизор дар хонае дар Душанбе боиси сӯхтор дар манзил шуд

Дар паи сӯхторе дар як хонаи истиқоматӣ дар шаҳри Душанбе ду нафар ба бемористони интиқол ёфтанд. Хабарнигорони Радиои Озодӣ мегӯянд, ҳодиса дар утоқи воқеъ дар ошёнаи сеюми як манзили сетабақа дар кӯчаи Садриддин Айнӣ рух дод, ки дар муқобили фурӯшгоҳи "Пайкар" ҷойгир аст. Фарзияи аввалия ин аст, ки дар паи ногаҳон таркидани телевизори хона сӯхтор рух дод.

​ Ҳангоми рӯй додани ҳодиса дар дохили хона модар ва духтари 9-солааш қарор доштанд. Ҳардуи онҳо ба бемористон интиқол ёфтанд ва ба гуфтаи шоҳидони айнӣ, осори ҷароҳат дар бадани онҳо дида намешуд.

"Вале модару духтар дар ҳолати шок буданд", гуфтанд ҳамсояҳо ба Радиои Озодӣ. Ба маҳалли ҳодиса хадамоти сӯхторхомӯшкунӣ ва ёрии таъҷилӣ расиданд. Тафсилоти дигар феълан маълум нест.

Вакили пешини Трамп алайҳи ӯ дар Конгресс шаҳодат медиҳад

Майкл Коэн

Майкл Коэн, вакили пешини Доналд Трамп, рӯзи чоршанбе дар бораи робитаи эҳтимолии Трамп ба нашри маводи Wikileaks, ки ба рақиби ӯ аз Ҳизби демократ Ҳилларӣ Клинтон дар интихоботи соли 2016 халал расонд, дар Конгресс шоҳидӣ медиҳад.

Ӯ ҳамчунин сарвари давлатро ба қаллобӣ ва нажодпарастӣ муттаҳам мекунад. Тарҳи 20-саҳифагии суханронии Коэнро нашрияи Politico рӯзи 27-уми феврал нашр ва онро хабаргузории Reuters бозгӯ кард.

Трамп субҳи чоршанбе дар Твиттер навишт, ки Коэн дурӯғ мегӯяд ва ҳадафаш кам кардани ҳукмаш аст.

Ҳафтаи равон Коэн розӣ шуд, ки дар чанд кумитаи Конгресси ИМА шоҳидӣ диҳад. Ӯ дар ҷараёни суханрониаш ҳамчунин қавл медиҳад, барои исботи суханонаш, ки президент шахсан дар амалиёти ғайриқонунӣ даст дорад, ба Конгресс санад пешниҳод хоҳад кард.

Ӯ ҳамчунин хоҳад гуфт, бо дастури президент, барои харидани хомӯшии ҳунарманди "порно" Сторми Дэниэлс, оид ба робитаҳои маҳрамонааш бо президенти оянда, ба ӯ $130 000 дод. Ин пардохт метавонад тартиби сармоягузории маъракаи интихоботиро нақз кунад.

Майкл Коэн ҳамчунин хоҳад гуфт, ки президенти оянда замоне ки вориди маъракаи интихотӣ буд, ба гуфтушуниди тарҳи бунёди бинои осмонбӯс дар наздикиҳои маркази Маскав, музокирот пеш мебурд, ҳарчанд дар мазҳари ом эълон мекард, дар Русия манфиатҳои тиҷоратӣ надорад.

Вакили пешин ҳамчунин хоҳад гуфт, ки мушовири сиёсии Трамп, Роҷер Стоун, ки чанде пеш боздошт шуд, аз қабл Коэнро аз гуфтушунид бо бунёдгузори Wikileaks Ҷулиан Ассанҷ, нашри мукотибаҳои Ҳилларӣ Клинтон ва таъсири ин амал ба маъракаи интихоботии номзади Ҳизби демократ огоҳ карда буд.

Коэн ҳамчунин дар бораи суханони нажодпарастонаи Трамп дар бораи аҳолии сиёҳпӯсти Амрико сӯҳбат хоҳад кард.

Аз сӯи дигар, дар тарҳи суханронии Коэн гуфта мешавад, ӯ далели мустақими робитаи ситоди пеш аз интихоботии Трамп бо Русияро, ки прокурори вежа таҳқиқ мекунад, дар даст надорад.

Моҳи декабри соли гузашта Коэн бо ҷурми дурӯғгӯӣ дар зери савганд, нақзи таъминоти молии маъракаи интихоботӣ ва сарпечӣ аз пардохти молиёт ба се соли зиндон маҳкум шуд. Додгоҳ моҳи феврал оғози давраи адои ҷазои ба 6-уми май гузаронд.

Доналд Трамп қаблан тамоми иттиҳомоти пешнависи суханронии Коэнро рад карда буд. Роҷер Стоун музокирот бо Ассанҷро такзиб мекунад.

Трамп рӯзи чоршанбе гуфт, "Коэн яке аз чандин вакиле буд, ки аз ман намояндагӣ мекард. Ӯ муштариҳои дигар низ дошт. Ӯ барои дурӯғгӯӣ ва қаллобӣ муҷаввизашро аз даст дод. Ӯ корҳои баде кардааст, ки ба Трамп рабт надорад. Ӯ дурӯғ мегӯяд, то муҳлати ҳабсашро камтар кунад."

Хабарнигорони Радиои Озодӣ дар Жанаозен боздошт шуданд

Сония Тойкен, хабарнигори бахши қазоқии Радиои Озодӣ

Пулиси вежаи Қазоқистон ду хабарнигори бахши қазоқии Радиои Озодӣ - гузоришгар Сония Тойкен ва наворбардор Санат Нурбекро, ки дар пайи омода кардани гузориш аз тазоҳуроти сокинони шаҳри Жанаозен буданд, боздошт кард.

Дар бораи боздошти хабарнигорон як сокини маҳаллӣ хабар дод ва гуфт, чанд рӯзи ахир дар шаҳр вазъи фавқулода амал мекунад ва даҳҳо нафар боздошт шудаанд.

Тавре Сония Тойкен хабар медиҳад, дар вақти боздошт пулис алайҳи онҳо аз нерӯ истифода кард. Хабарнигоронро ба мошин ба департаменти пулиси шаҳри Актау интиқол доданд, ки дар фосилаи якуним соат аз Жанаозен қарор дорад. Ба гуфтаи пулис, гӯиё аз рӯи хабарнигорон шикоят ворид шудааст.

Аз 9-уми феврал дар майдони назди идораи шуғли аҳолӣ ва барномаҳои иҷтимоӣ тазоҳуроти сокинони бе ҷойи кор ҷараён дорад. Дар эътирозҳо ҷавонон, кормандони пешини соҳаи нафткашӣ, нафақахӯрон ва маъюбон иштирок доранд.

Ҷавонон бо нашри як видео аз президенти Қазоқистон Нурсултон Назарбоев хостанд, ки ба маошҳои ночиз ва набуди ҷойи кори муносиб таваҷҷуҳ кунад. Майдон дар иҳотаи кормандони пулис қарор дорад.

Мақомоти вилояти Мангистау рӯзи сешанбе бо пахши як изҳорот вуруди нерӯҳо ба Жанаозенро такзиб карданд. Дар изҳорот вазъи Жанаозен "ором" арзёбӣ шудааст.

Соли 2011 нафткашҳои Қазоқистон бо талаби имтиёзи молӣ даст ба тазоҳурот заданд. Рӯзи 16-уми декабри соли 2011 тазоҳурот ба бетартибӣ печид ва пулис ба сӯи коргарон оташ кушод. Дар натиҷа даҳҳо нафар кушта ва 400 нафар захмӣ шуд. Мақомот 37 нафарро ба бетартибии оммавӣ муттаҳам ва даҳҳо фаъоли коргариро ба муҳлатҳои тӯлонӣ зиндонӣ кард. Панҷ ходими пулис барои суистифода аз салоҳият зиндонӣ шуд.

Сӯхтор дар роҳи оҳани Қоҳира даҳҳо нафарро кушта ба ҷой гузошт

Сӯхтор дар истгоҳи роҳи оҳани Қоҳира. 27-уми феврал, 2019

Гузоришҳо аз Миср мегӯянд, ки дар пайи сӯхтор дар истгоҳи роҳи оҳани Қоҳира дастикам 25 нафар кушта ва беш аз 50 нафар захмӣ шуд.

Ба гуфтаи манбаъҳои амниятӣ, оташ дар ҳоле аланга зад, ки қатор ба платформаи истгоҳи Рамзез бархӯрд. Бино ба хабарҳои таъйиднашуда, сӯхтор дар пайи таркиши танкери ҳомили сӯзишворӣ ба бор омад.

Муҳаммад Саид, сарвари бемористони роҳи оҳани Қоҳира гуфт, ки эҳтимол теъдоди қурбониҳо афзоиш ёбад.

Даҳҳо мошини ёрии таъҷилӣ ва оташнишон ба ҷойи ҳодиса, ки дуди ғализ аз он боло мешавад, ҷалб шуданд.

Пулиси Испания дар марги Малашенко осори ҷиноятро ошкор накард

Игор Малашенко

Пулиси Испания осори ҷиноятро дар марги Игор Малашенко - бунёдгузори шабакаи телевизионии НТВ пайдо накард. Бино ба маълумоти ибтидоӣ, сиёсатшинос ва мудири расона дар шаҳри Сотогранди Испания худкушӣ кард.

Натиҷаи ниҳоии колбадшикофӣ ҳудудан баъди як моҳ мушаххас мешавад. Дар ин бора хабаргузории РИА Новости рӯзи 26-уми феврал бо такя ба Додгоҳи олии Аналузия хабар дод.

Хабари марги Малашенкои 64-сола рӯзи 25-уми феврал пахш шуд. Пулиси Испания аз рӯи ҳодиса парвандаи ҷиноӣ боз кард ва бо ҳамсари сиёсатшинос, блогнависи шинохта Божена Ринска сӯҳбат анҷом дод.

Ба гуфтаи Ринска, ҷасади Малашекоро, ки ҳеҷ номаи худкушӣ нагузоштааст, нигаҳбон пайдо кард. Чанд манбаъ дафъатан худкушӣ будани марги ӯро тасдиқ кард, аммо тасдиқи расмӣ вуҷуд надошт.

Миёнаҳои моҳи феврал Ринска навишт, ки Малашенко дар бемористони Латвия бистарӣ шуд ва бояд "аз муоинаи тӯлонии неврологӣ" гузарад. Ба гуфтаи ӯ, сабаби хароб шудани асаби Малашенко даъвои давомдори талоқ бо ҳамсари аввалаш Елена Пивоварова аст.

Бино ба эътирофи Ринска, чанде пеш аз фоҷеа ӯ бо ҳамсараш муноқиша дошт ва Малашенко танҳо ба Испания рафт. Ӯ ҳолати равонии ҳамсарашро бисёр хароб арзёбӣ кард ва гуфт, ки эҳтимол ӯро ба худкушӣ расонданд.

"Марги Малашенко барои хонаводаи пешинаш, ки 80 дар сади дороии ӯро талаб кардааст, муфидтар аз зинда буданаш аст", - навишт Божена Ринска.

Игор Малашенко соли 1993 шабакаи телевизионии НТВ-ро таъсис дод ва чанд соли баъдӣ мудири кул ва президенти ин шабака буд. Соли 1996 ӯ раҳбари ситоди интихоботии президенти пешини Русия Борис Елтсин шуд. Баъди пирӯзии Елтсин ба ӯ вазифаи раҳбари маъмурияти президентро пешниҳод карданд, аммо ӯ қабул накард.

Авоили соли 2000-ум баъди пароканда шудан ва ба ихтиёри Кремл гузаштани НТВ, Малашенко аз Русия ба Ню-Йорк рафт ва 9 сол дар онҷо зиндагӣ кард. Дар ин муддат ӯ мудири кулли шабакаи RTVI, саҳоми "Эхо Москвы" ва сомонаи Newsru.com буд. Аз соли 2010 Малашенко раҳбари ширкати "Интер ТВ" буд. Ӯ соли 2012 ба Русия баргашт ва соли гузашта ситоди интхоботии Ксения Собчакро раҳбарӣ кард.

Мирҷоновро баъди чор соли ошӯби Ҳоҷӣ Ҳалим зиндонӣ карданд

Акс аз бойгонӣ

Бо гузашти 4 сол аз ошӯби нофарҷоми зиддиҳукуматӣ дар Тоҷикистон, додгоҳе дар Душанбе як нафарро бо гуноҳи пинҳон доштани ҷиноят ба зиндон маҳкум кард.

Додгоҳи низомии Душанбе рӯзи 25-уми феврал хабар дод, ки Аминҷон Мирҷонов, сокини ноҳияи Абдураҳмони Ҷомӣ, аз тарҳи ошӯб хабар дошт, аммо ба мақомоти интизомӣ хабар надод. Ӯ ба якуним сол зиндон маҳкум шуд.

Дар ҳукми Додгоҳи низомии Душанбе гуфта шудааст, ки Аминҷон Мирҷонов қабл аз ошӯби рӯзҳои 3 ва 4-уми сентябри соли 2015 дар масҷиди деҳаи "Роҳи Сотсиализм"-и ноҳияи Абдураҳмони Ҷомӣ аз тарҳи ин ошӯб огаҳ шудааст, вале дидаву дониста онро аз мақомот пинҳон доштааст.

Дар ҳукми додгоҳ омадааст, Аминҷон Мирҷонов шоҳиди ташвиқоту таблиғоти имоми масҷиди деҳа шудааст, ки чӣ гуна чанд нафарро барои иштирок дар ошӯб ҷалб кардааст. Додгоҳ мегӯяд, «имоми масҷид Маҳмаддовуд Ноибов, узви Ҳизби мамнӯи наҳзати исломӣ буда ва ҷавононро “ба шаҳид шудан” даъват мекард.»

Ба қавли мақомоти додгоҳ, Маҳмаддовуд Ноибов шаш нафарро ба “ошӯб” сафарбар кардааст, вале Аминҷон Мирҷонов ба ин гуруҳ шомил нашуда, айни замон хомӯширо ихтиёр кардааст. Назари вакили мудофеи Аминҷон Мирҷонов маълум нест ва ҳам рӯшан нест, чаро Мирҷонов пас аз чаҳор сол муҳокима шудааст.

Дар бораи сарнавишти Маҳмаддовуд Ноибов ва аъзои дигари гурӯҳе, ки дар ошӯб ширкат кардаанд, чизе гуфта намешавад.

Абдуҳалим Назарзода
Абдуҳалим Назарзода

Дар ошӯб ба раҳбарии Абдуҳалим Назарзода, муовини собиқи вазири дифои Тоҷикистон дар моҳи сентябри соли 2015 даҳҳо нафар ба шумули худи Назарзода кушта шуданд.

Ҳукумат Ҳизби наҳзати исломиро тарҳрези ошӯб номида, фаъолияташро мамнуъ кард, вале раҳбарони ҳизб мегӯянд, ин иддао ҳеҷ асос надорад ва ҳукумат ошӯбро ба ҳайси баҳонае барои аз саҳнаи сиёсӣ дур кардани ягона ҳизби сиёсии мухолиф ба кор бурд.

Тазоҳуроти назди дафтари "Нур Отан"-и Қазоқистон пароканда шуд

Боздошти тазоҳургарон дар назди дафтари ҳизби "Нур Отан". 27-уми феврал, 2019

Кормандони пулис эътирози назди идораи ҳизби "Нур Отан" дар шаҳри Алматои Қазоқистонро пароканда карданд. Ҳамзамон чанде аз эътирозгарон боздошт шуданд.

Пулис замоне ба боздошти эътирозгарон оғоз кард, ки дар гирдиҳамоӣ талаби истеъфои президенти Қазоқистон Нурсултон Назарбоев садо дод.

Намояндагони додситонӣ ба маҳалли таҷаммӯи мардум ҳозир ва талаб карданд, ки гирдиҳамоӣ пароканда шавад. Ба гуфтаи мақомот, гирдиҳамоии сокинон дар назди идораи ҳизби ҳокими Қазоқистон "ғайриқонунӣ" аст.

Рӯзи 27-уми феврал дар Остона бо иштироки Нурсултон Назарбоев анҷумани ҳизби "Нур Отан" баргузор шуд. Анҷуман ба 20-солагии ташкилшавии ҳизб бахшида шудааст.

Эътирозгарони Алмато гуфтанд, ба хотири изҳори мавқеи шаҳрвандӣ ҷамъ омадаанд. Бархе аз онҳо талаби ҷойи кор барои ҷавонон, тақвияти кумакҳои иҷтимоӣ, амалисозии ислоҳот ва тағйири роҳбари ҳизби ҳокимро пеш гузоштанд.

Назарбоев соли 1991 - дар замони Шӯравӣ сари қудрат омад ва давоми тақрибан 30 сол бе танаффус Қазоқистонро идора мекунад. Ҳомиёни ҳуқуқ мегӯянд, Назарбоеви 78-сола таҳаммули дигарандешонро надорад ва барои аз саҳна дур сохтани рақибони сиёсиаш аз фишорҳои қудратӣ кор мегирад.

Конгресс фармони Трамп оиди вазъи фавқулоддаро рад кард

Доналд Трамп

Палатаи намояндагони Конгресси ИМА рӯзи сешанбе бо қабули як қатънома фармони Трамп дар робита ба эъломн вазъи фавқулодда дар марз бо Мексикаро рад кард.

Фармони эълони вазъи фавқулода аз сӯи Трамп рӯзи 15 феврал бо ҳадафи дарёфти харҷи сохтмони девор дар марз ва бе назардошти мавқеи назари Конгресс имзо шуда буд.

Бисёре аз қонунгузорон, аз ҷумла бархе аз ҷумҳурихоҳон бар инанд, ки Трамп аз ҳуқуқи худ барои эълони вазъи фавқулода сӯистифода мекунад. Бар асоси Конститутсияи ИМА назорати харҷҳои давлатӣ дар ихтиёри Конгресс аст.

Қонун дар бораи салоҳияти эълони вазъи фавқулода аз сӯи роҳбари давлат соли 1976 қабул шуда буд. Аз он замон то кунун президентҳои ИМА борҳо аз ин қонун истифода кардаанд, аммо Конгресс боре ҳам монеи президентҳо нашуда буд. Демократҳои кунунии ИМА мегӯянд, вазъи буҳронӣ дар марзҳои ҷанубии Амрико - натиҷаи тахайюлоти Трамп аст.

Фавти як бинокори Масҷиди калонтарини Душанбе

Яке аз бинокороне, ки бар асари сарозер шудан аз гунбази Масҷиди калонтарин дар бемористон бистарӣ шуда буд, ҷон бохтааст. Хабаргузории "Азия плюс" ба нақл аз масъулон дар бемористони Қаряи Боло навишт, ки Давлатшоҳ Юсупови 60-сола, сокини ноҳияи Рӯдакӣ аз замони ҳодиса дар рӯзи душанбеи 25-уми феврал дар ҳолати беҳушӣ ба сар мебурд ва шаби гузашта ҷон бохт. Табибон вазъи саломатии яке дигар аз бинокоронро вахим мегӯянд.

Ҳашт бинокор субҳи 25-уми феврал аз баландии 33 метр ба замин афтода, бо захмҳои мухталиф дар бемористони Қарияи Боло бистарӣ шудаанд. Коргарон ба кафшергарӣ машғул буданд, ки зинапояи зери пояшон ба замин афтод. Табибон гуфтанд, ки бинокорон ба оҳану қубур бархӯрда, захмҳои гуногун бардоштаанд. Гунбази Масҷиди бузургтарин дар Душанбе 60 метр баландӣ дорад.

Раиси ноҳияи Рашт аз мақомаш барканор шуд

Раиси ноҳияи Рашт Қаноатшоҳ Лоиқзода аз мақомаш барканор шудааст. Дафтари матбуоти раёсати ҷумҳури Тоҷикистон рӯзи 27-уми феврал фармон ва амрҳои президент дар мавриди тағйироти кадрӣ дар бархе аз сохторҳои давлатиро ба нашр расонд.

Тибқи фармони Эмомалӣ Раҳмон, раиси ноҳияи Рашт Қаноатшоҳ Лоиқзода аз мақомаш барканор ва Раҳимҷон Набизода иҷрокунандаи ин мақом таъйин шудааст. Сабаби барканории Лоиқзода гуфта нашудааст ва маълум нест, ки ба фаъолияти худ дар сохторҳои давлатӣ идома хоҳад дод ё на.

Бар пояи қарорҳои ҳукумати Тоҷикистон ҳамчунин Лолахон Раҳмонзода ба сабаби ба нафақа рафтан аз вазифаи директори Оҷонсии таъминоти амволи махсус озод гардида ва Савзаалӣ Назирдода ба ҷои ё таъйин шудааст.

Эмомалӣ Раҳмон ҳамчунин Хуршед Файзуллозодаро бинобар таъйин шудан ба вазифаи директори корхонаи "Тоҷинвест", аз вазифаи директори телевизиони "Варзиш" озод кардааст. Ба ҷой ӯ Парвиз Нориён директори телевизиони “Варзиш” таъйин шудааст .

Дафтари матбуоти раёсати ҷумҳури Тоҷикистон мегӯяд, ки дар сатҳи раҳбарии дастгоҳи Додситонии кулл, додситонҳои ноҳияи Рӯшон, Мурғоб, Шаҳринав, Файзобод, Нуробод, Лахш, Бобоҷон Ғафуров, Шаҳристон, Ҷайҳун, Абдураҳмони Ҷомӣ, шаҳрҳои Роғуну Норак, Хуҷанд ва Панҷакент низ тағйирот сурат гирифтааст. Сардорони шӯъбаҳои вазорати корҳои дохилӣ дар ноҳияҳои Вахшу Шаҳритус низ иваз шудаанд.

Таркиши газ чанд хонандаро дар шаҳри Андиҷон захмӣ кард

Субҳи 26-уми феврал дар беморхонаи марказии шаҳри Андиҷони Узбекистон маркази гармидиҳии маҳаллӣ таркид. Ба гуфтаи мақомоти Кумитаи ҳолатҳои фавқулоддаи Узбекистон, 18 хонандаи мактаб ва 4 муаллим, ки дар он лаҳзаҳо аз ташхиси табибон мегузаштанд, маҷруҳ ва бистарӣ шуданд.

"Маркази гармидиҳӣ дар пушти бинои бемористон ҷойгир аст. Утоқи рентген ҳам дар наздикии он аст. Ҳангоми таркиш хонандагони мактаб аз ташхис мегузаштанд",-гуфтаанд мақомот.

Як корманди бемористони шаҳри Андиҷон гуфт, бино ба иттилои пешакӣ, таркиш дар пайи хориҷшавии газ сар задааст. Хонандагони мактаб бо ҷароҳатҳои гуногун дар бемористон бистарӣ шудаанд. Мақомоти маҳаллӣ таҳқиқи ҳодисаро шуруъ карданд.

Гумонбарони парвандаи хиёнат ба давлат аз 14 то 22 сол ҳукм гирифтанд

Додгоҳи ҳавзаи Маскав ноиби пешини Маркази амнияти иттилоотии Хадамоти фереролии амнияти Русия сарҳанг Сергей Михайлов ва собиқ мудири аршади "Озмоишгоҳи Касперов" Руслан Стояновро, ки қаблан дар Вазорати дохилӣ кор мекард, мутаносибан ба 22 ва 14 соли зиндони низомаш сангин маҳакум кард.

Михайлов ҳамчунин аз унвони сарҳанги эҳтиётӣ ва ордени дараҷаи аввали "Барои хизмат ба ватан" маҳрум шуд. Дар ин бора шабакаи телевизионии РБК бо такя ба хабарнигораш дар толори додгоҳ гузориш дод.

Ба навиштаи "Коммерсант", биноба фарзияи тафтишот, Михайлов ва Стоянов соли 2011 дар бораи раҳбари ширкати Chronopаy Павел Врублевский ба Идораи амнияти федеролии ИМА (ФБР) маълумот доданд. ИМА Врублевскийро дар содир кардани ҷиноятҳои киберӣ гумонбар медонад.

Ба маълумоти The Bell, гумонбарон эҳтимол дар бораи рахнагароне, ки қабл аз интихоботи президентии соли 2016-и ИМА ба сервери Ҳизби Демократ ҳамла карданд, ба мақомоти Амрико маълумот додаанд.

Нашрия мегӯяд, ки Михайловро Идораи марказии истихбороти ситоди генралии Русия (ГРУ) таъқиб мекард. Мутахасисони амрикоӣ ба ин назаранд, ки ҳамлаҳои ҳакерии пеш аз интихоботро маҳз ГРУ ташкил кард.

Як қатор расонаҳо боздошти Михайлов ва Стояновро ба суқути гурӯҳи рахнагари "Шалтай-болтай" марбут мекунанд. Раҳбари пешини гурӯҳ Владимир Аникеев рӯзи 22 феврал дар сӯҳбат бо Би-би-си робитаи гурӯҳ бо ФСБ-ро рад кард.

Генерали тоҷик: "ДИИШ ҳанӯз талош дорад шаҳрвандони моро ҷалб кунад"

Абдураҳим Қаҳҳоров, дабири Шӯрои амнияти Тоҷикистон

Дабири Шӯрои амнияти Тоҷикистон гуфт, гурӯҳи тундрави “Давлати исломӣ” ҳанӯз ҳам талош дорад, ки аз роҳҳои гуногун шаҳрвандони кишварро ба сафи худ ҷалб кунад.

Абдураҳим Қаҳҳоров дар ин бора рӯзи 26-уми феврал дар як нишасти минтақаии мубориза бо терроризм дар Душанбе изҳорот дод. Вай гуфт, то кунун эмиссарҳои гурӯҳи "Давлати исломӣ" беш аз ҳазор шаҳрванди Тоҷикистонро ба амалиёти ҷангӣ дар Ироқу Сурия ва Афғонистон ҷалб кардаанд.

Қаблан мақомоти Тоҷикистон гуфта буданд, ки то моҳи сентябри соли 2018 тақрибан 1900 шаҳрванди кишвар ба майдонҳои ҷанг дар Ироқу Сурия рафтаанд.

“Бо изҳори таассуф мегӯям, ки теъдоди қобили мулоҳизаи шаҳрвандони кишвари мо шабакаҳои террористиро ташкил медиҳанд. Ва дар созмонҳои террористӣ нақши муҳимро бозӣ мекунанд”, - афзуд дабири Шӯрои амннияти Тоҷикистон.

Вай дар нишаст аз мақомоти амниятӣ, марзбонӣ ва ниҳодҳои дигари кишварҳои ҳамсуд (Иттиҳоди Давлатҳои Мустақил) хост, ки дар баробари ҳамагуна таҳдидҳо ҳамкории зич ва ҳамоҳангӣ дошта бошанд.

СММ: Дар шаш соли ҷангҳои Украина 13 ҳазор нафар кушта шуд

Комиссионери олии СММ оид ба ҳуқуқи башар дар як гузориши худ аз рӯзи 25 феврал навишт, ки аз замони оғози низоъҳои мусаллаҳона дар шарқи Украина - апрели соли 2014 ҳудудан 13 ҳазор нафар кушта шудааст. Чоряки қурбониҳо сокинони мулкӣ мебошанд ва 30 ҳазор нафари дигар аз оташи ҷанг ҷароҳат бардоштаанд. Як нусхаи гузориши СММ дирӯз дастраси Радиои Озодӣ шуд. Дар маҷмӯъ, дар натиҷаи муқовиматҳои мусаллаҳонаи нирӯҳои ҳукуматӣ ва ҷудоиталабон дар шарқи Украина 3300 сокини мулкӣ ҷони худро аз даст додаанд.

Дар ин гузориш гуфта мешавад, ки бо гузашти тахминан шаш сол аз шурӯи ҷангҳо, пешравии андаке дар амри расидан ба оташбас ва иҷрои созиши сулҳи Минск ҳосил шудааст. Дар гузориши СММ гуфта мешавад, ки дар муддати ҷангҳо дар маҷмӯъ 40 то 43 ҳазор хисороти марбут ба ҷанг ба қайд гирифта шуда, шумори қурбониҳо аз 14 апрели соли 2014 то 31 январи соли 2019 ба 13 ҳазор нафар наздик шудааст.

Дар гузориш мусофирони ҳавопаймои MH17-и ширкати Малайзия ҳам ба унвони қурбониҳои низоъҳои мусаллаҳонаи Украина ёд шудаанд. Дар ҳодисаи суқут дода шудани ҳавопаймои мусофирбар рӯзи 17 июли соли 2014 - 298 сарнишини ҳавопаймои мулкӣ ҷони худро аз даст доданд. Ин ҳавопаймо аз Амстердам ба Куала Лумпур парвоз мекард. Тими байналмилалии таҳқиқотии Ҳолланд гуфт, ки ин ҳавопаймо аз қаламрави таҳти контроли ҷудоиталабон бо истифода аз мушаки навъи “Бук” ҳадаф қарор дода шуд. Худи мушакандоз аз Русия вориди хоки Украина шуда, баъдан дубора ба Русия баргардонида шуд. Дар санади СММ гуфта мешавад, ки аз миёни низомиён дар ҷангҳои шаш соли охир 4 ҳазор узви артиши Украина ва 5400 узви гурӯҳҳои мусаллаҳ кушта шудаанд.

Ин санад инчунин мегӯяд, ки дар қиёс бо соли 2014-и авҷи мухолифатҳо шумори қурбониҳо дар миёни афроди мулкӣ тадриҷан коҳиш ёфта, агар шаш соли пеш 33-34 дарсади қурбониҳо шаҳрвандони оддӣ буданд, соли 2018 - 10-11 дарсади кушташудаҳоро афроди мулкӣ ташкил доданд.

Русия ба мусаллаҳони ҷудоиталаб дар Украинаи шарқӣ, ки манотиқи Донетск ва Луҳанскро дар бар мегирад, кӯмаки низомӣ, иқтисодӣ ва сиёсӣ фароҳам мекунад. Ноябри соли 2016 Додгоҳи байналмилалии ҷиноёни ҷангӣ ҳукм кард, ки ҷанг дар шарқи Украина “як низои мусаллаҳи байналмилалии миёни Украина ва Федератсияи Русия мебошад”.

Сафири Британия зинда будани Скрипалҳоро таъид кард

Сафорати Британия дар Маскав

Сафири Британия дар Русия Лори Бристоу дар сӯҳбат бо хабаргузории "Интерфакс" зинда будани Сергей Скрипал ва духтари ӯ Юлияро тасдиқ кард. Дипломати британиявӣ ҳамчунин гуфт, ки дахости Русия барои мулоқот бо Скрипалҳо ба онҳо супурда шуд. Ба ин тартиб, сафири Британия ба изҳороти сафорати Русия дар Лондон вокуниш нишон дод, ки гуфтааст наметавонад зинда будани Скрипалҳоро "таъид кунад".

Лари Бристоу гуфт, ки агар Скрипалҳо хоҳиши бо намояндагони дипломатии Русия мулоқот кардан дошта бошанд, ҷониби Британия чунин шароитро фароҳам месозад. Агар чунин хоҳиш набошад, гуфт сафир, ҷониби Британия наметавонад ин мулоқотро ба Скрипалҳо таҳмил кунад. Бристоу тасдиқ кард, ки Сергей Скрипал ва духтари ӯ дар ҷойи амн қарор доранд. "Талош карданд, ки онҳоро бо истифода аз гази фалаҷкунандаи асаб ба ҳалокат расонанд. Мо вазифадорем, ки аз онҳо ҳимоят кунем",- гуфт сафир.

Ӯ ҳамчунин гуфт, ки Британия ба таҳқиқи муштараки қазияи Скрипалҳо якҷо бо Русия манфиатдор нест.

"Мо боварр дорем, ки медонем ин одамҳо кӣ буданд. Мо ҳамчунин бовар дорем, ки Русия низ ин одамҳоро медонад. Агар Русия дар бораи даст доштанаш ва ё даст доштани нафаронаш ба мо маълумот бидиҳад, мо аз ин истиқбол мекунам, аммо намехоҳем бо онҳо таҳқиқоти муштарак анҷом диҳем",- гуфт Лори Бристоу ба хабаргузории "Интерфакс".

Сергей Скрипал- корманди пешини идораи истихбороти Русия, ки Маскав ӯро ба ҷосусӣ муттаҳам карда буд, ва духтари ӯ Юлия моҳи марти соли 2018 дар як боғи шаҳри Солсберии Британия дар ҳоли беҳушӣ пайдо шуданд. Онҳо чандин моҳ дар бемористон таҳти назорати табибон буданд.

Британия борҳо гуфтааст, ки ҳамла ба Скрипалҳо кори дасти Русия аст ва гази фалаҷкунандаи асаб -"Новичок" дар Иттиҳоди Шӯравӣ истеҳсол мешуд.

Кардинал Пелл ба бадрафтории ҷинсӣ муттаҳам шуд

Кардинал Ҷорҷ Пелл

Додгоҳи мунсифа дар Австралия кардинал Ҷорҷ Пеллро дар содир кардани ҷиноятҳои ҷинсӣ муҷрим шинохт. Ба ин тартиб, ин баландтарин мақоми зинанизоми католикӣ аст, ки ба ҷиноятҳои ҷинсӣ айбдор шуд. Дар ин бора бахши русии Би-би-сӣ рӯзи 26-уми феврал хабар дод.

Ҳукми додгоҳ ҳанӯз моҳи декабри соли гузашта содир шуд, аммо бо назардошти баъзе масоили ҳуқуқӣ аз эълонаш худдорӣ карданд. Додгоҳ таъйид кард, ки Пелл соли 1996 дар ҳуҷраи калисои Мелбурн нисбат ба ду бача иқдомоти хушунатомезро ба кор бурд. Кардинал гуноҳро комилан рад кард.

Ҳайати мунсифа далелҳои вакили Пеллро рад кард, ки иттиҳомро бепоя ва маҳсули тахайюли қурбониҳо хонд.

Ҳамчун хазинадори Ватинкан Пелли 77-сола шахси сеюм дар зинанизоми католикӣ буд. Ӯ моҳи июни соли гузашта ба кӯдакозорӣ муттаҳам шуд. Он замон Пелл рухсатӣ гирифт ва аз Ватикан ба Австралия рафт, то шахсан дар додгоҳ иштирок кунад.

Мурофиаи Пелл соли гузашта ду дафъа баргузор шуд, зеро ҳайати мунсифаи аввал натавонист ба қарори мушаххас бирасад.

Миёнаҳои моҳи декабр попи Рум Франсиск се кардиналро аз кобинаи ғайрирасмиаш хориҷ кард. Гуфта мешавад, ки ду нафари онҳо, аз ҷумла Пелл ба дастдарозии ҷинсӣ рабт доштанд.

Калисои католикӣ солҳои ахир ба силсилаи иттиҳомоти марбут ба дастдарозии роҳибон алайҳи бачаҳо ва талошҳои Ватикан барои пинҳон доштани ин мавридҳо рӯ ба рӯ шуд. Ҷанҷол моҳи август баъди нашри гузориши ҳакамони бузурги Пенсилвания сар зад. Бинобар ин санад, ходимони калисои католикӣ беш аз 70 сол бо ин ё он шева дар баробари ҳазорҳо бача ҷинояти ҷинсӣ содир кардаанд.

Вакилони Манафорт додгоҳро ба тараҳҳум даъват карданд

Манафорт дар додгоҳ

Вакилони мудофеи Пол Манафорт, раҳбари собиқи ситоди интихоботии президент Доналд Трамп, аз додгоҳи амрикоӣ даъват карданд, ки ҳукми зерҳимояи онҳоро нарм кунад ва на бештар аз 10 сол диҳад.

Дар муроҷиат ба додгоҳи федеролӣ, ки бояд 13-уми март ҳукми Манафортро эълон кунад, вакилони мудофеъ навиштанд, ҷиноятҳои содиркардаи Манафорт ба маъракаи интихоботии Доналд Трамп рабт надорад.

Зимнан, додситони махсуси ИМА Роберт Мюллер дар робита ба эҳтимоли ҳамкории Манафорт бо Русия дар раванди маъракаи интихоботии соли 2016 Амрико таҳқиқ анҷом медиҳад. Пол Манафорт чанд моҳ роҳбари ситоди интихоботии Доналд Трамп буд.

"Парвандаи ӯ - ҷинояти одамкушӣ, қочоқи маводи мухаддир, ҷиноятҳои созмонёфта ва ё пирамидаи молӣ нест. Пол Манафорт замони мушовир буданаш дар Украина аз роҳҳои дигар пул кор карда, аммо дар ин бора ба давлат хабар надодааст. Вай ин айбро эътироф мекунад", - омадааст дар муроҷиати вакилони мудофеъ.

Вакилон мегӯянд, дар таҷрибаҳои гузашта онҳое, ки айни ҷинояти Манафортро анҷом дода буданд, ба муҳлатҳои тӯлонӣ зиндонӣ нашудаанд. Ба илова, Манафорт зиёни расондаашро ҷуброн кард ва розӣ шуд, ки ҷаримаи чандмиллиониро пардохт намояд.

Роберт Мюллер, додситони махсус мегӯяд, Пол Манафорт барои "мудовим ва бармало" анҷом додани ҷинояткорӣ бояд то 25 сол зиндонӣ шавад. Вакилони мудофеъ даъво доранд, ки ӯ аз карда пушаймон ва сазовори гузашт аст.

Ёфтҳои бештар

Гузоришҳои видеоӣ

Ваъдаи кор дар Чехия дурӯғ баромад
лутфан мунтазир бошед
Embed

Феълан кор намекунад

0:00 0:02:32 0:00
XS
SM
MD
LG