Пайвандҳои дастрасӣ

Хабари нав

Хабарҳо

Номи шаҳри Остона ба Нурсултон иваз шуд. ВИДЕО

Рӯзи 20 март дар як раъйдиҳии парлумони Қазоқистон шаҳри Остона - пойтахти Қазоқистон ба Нурсултон тағйири ном кард. Номи нави пойтахти Қазоқистон ба ифтихори президенти каноррафтаи ин кишвар Нурсултон Назарбоев номгузорӣ шудааст.

Ба тарафдории тағйири ном кардани пойтахти кишвар аксар аъзои парлумони ин кишвар овоз доданд.

Нурсултон Назарбоеви 78-сола рӯзи 19 март дар як изҳороти телевизионии худ гуфт, ки тасмим гирифтааст аз 20 март салоҳиятҳои худро дар мақоми президенти Қазоқистон канор мегузорад. Дар як маросими савгандёдкунӣ рӯзи чоршанбе собиқ раиси Сенат Қосимҷомарт Тоқаев иҷрокунандаи вазифаи президент ва чанд соат баъд духтари Назарбоев - Дариға Назарбоева раиси Сенат интихоб шуд.

Исми пойтахти кунунии Қазоқистон дар давоми солҳои шӯравӣ се дафъа иваз шудааст. Дар таърихчаи расмии ин шаҳр гуфта мешавад, ки то соли 1961 исми шаҳр Акмолинск буд, баъдан солҳои 1961-1992 ба Селиноград табдили ном кард. Баъди истиқлолият исми шаҳр Акмола шуд ва баъди тасмими кӯч додани маркази маъмурӣ ё пойтахти Қазоқистон ба он, исмаш Остона шуд. Дар матбуот маъмулан Остонаро шаҳри "ободшуда бо дасти Нурсултон Назарбоев" меноманд, ки феълан беш аз 1 миллион аҳолӣ дорад.

Дар китоби интиқодиаш дар ҳақи президент Назарбоев "Крестный тесть" домоди марҳуми ӯ ва ҳамсари собиқи Дариға Назарбоева - Роҳат Алиев навишта буд: президент ба хотири таъмини амнияташ дар баробари хатари эътирозу таҷаммӯи эҳтимолии мардум қарор кард пойтахтро аз Алмаато ба Остона кӯч диҳад. Ба навиштаи Алиев, Остона, як шаҳри "сарду дурафтода ва дастнорас" аст ва ташкили ҳама гуна таҷаммӯъҳои эҳтимолии мардумӣ дар назди қасри раёсатҷумҳурии Оқорда ғайриимкон мебошад.

Назарбоевро барои саркӯби мухолифону эътирозгарон зиёд интиқод кардаанд.

Остона ба Нурсултон тағйири ном кард. Назари сокинон дар ин замина
лутфан мунтазир бошед

Феълан кор намекунад

0:00 0:01:10 0:00

Нахуствазири Австралия шарҳи Эрдуғонро маҳкум кард

Скотт Моррисон

Нахуствазири Австралия Скотт Моррис шарҳи президенти Туркия Раҷаб Тайиб Эрдуғонро, ки ба думболи қатли ом дар масҷид пахш шуд, маҳкум кард ва гуфт, ки дар робита ба муносибат бо Туркия "тамоми гузинаҳо"-ро арзёбӣ хоҳад кард.

"Шарҳи президенти Туркия Эрдуғонро дар ин шароити ҳассос ман барои Австралиягиҳо бисёр таҳққиромез ва бисёр бемасъулиятона мешуморам",- гуфт Моррис рӯзи 20 март.

Эрдуғон қаблан ҳушдор дод, ки Австралиягиҳои зидди мусалмон "дар тобутҳо бармегарданд", ба мисли падарбузургҳои онҳоро дар Галлиполӣ, майдон набардҳои хунини Ҷанги Якуми Ҷаҳон.

Беш аз 8 ҳазор сарбози Австралия ва Зеландияи Нав дар шаҳри соҳилии Галлиполӣ, дар ҷанг алайҳи неруҳои Туркия кушта шуданд. Ин сана ҳодисаи муҳими таърихи ҳарду кишвар ҳисоб мешавад ва шаҳрвандони ду кишвар ҳар сол моҳи апрел, дар солгарди ҳодиса ба Галлиполӣ мераванд.

Моррис гуфт, ки Эрдуғон бо чунин шарҳ рӯҳи сарбозони кушташудаи Австралия ва Зеландияи Навро таҳқир кард.

"Ман интизор дорам, ман дархост мекунам, ки ин гуфтаҳо шарҳ дода шаванд ва бардошта шаванд",- гуфт Моррис.

Ҳамла ба масҷиди Зеландияи Навро, ки дар он 50 намозгузор кушта шуд, марди 28-солаи Австралиягӣ анҷом дод, ки бовар меравад аз тарафдорони бартарии сафедпӯстҳо бар дигарон аст.

Боздошти гумонбарони ҳамла ба муҳоҷирон дар Ёқутистон. ВИДЕО

Айсен Николаев - раҳбари минтақавӣ ҳангоми сӯҳбат бо тазоҳургарони Ёқутистон

Пулиси Русия дар Ёқутистон гурӯҳи иборат аз сокинони маҳаллиро бо гумони ҳамла ба муҳоҷирони Осиёи Марказӣ боздошт кард. Ҳамлаҳо ба дунболи силсилаи эътирозҳо дар заминаи таҷовуз шудани як зан аз тарафи шаҳрванди Қирғизистон ҷараён гирифтанд.

Пулиси шаҳри Якутск, ки рӯзи 20-уми март бо Радиои Озодӣ сӯҳбат дошт, теъдоди боздоштшудаҳоро ошкор накард.

Ин ниҳод аз сокинон даъват кард, ки аз "таҳрики нафрати қавмӣ" канораҷӯӣ кунанд.

Рӯзи 19-уми март дар пасманзари ҳамлаҳо дастикам 80 мусофирбар, ки ронандаҳояшон шарҳвандони Осиёи Марказӣ буданд ва тиҷоратҳои мансуб ба муҳоҷирони корӣ дар Якутск масдуд шуд.

Ташаннуҷ дар Якутск, шаҳре дар 4,900-километрии пойтахти Русия, рӯзи 17-уми март дар ҳоле оғоз шуд, ки пулис шаҳрванди 23-солаи Қирғизистонро бо гумони рабудан ва таҷовуз кардани як зани 36-сола боздошт кард.

Видео бо забони русӣ аст:

Тоҷикистону Қирғизистон гуфтугӯҳои марзиро моҳи апрел идома медиҳанд. ВИДЕО

Музокироти Тоҷикистону Қирғизистон барои коҳиши ташаннуҷ дар марз

Интизор меравад, рӯзҳои 4-5 апрел мулоқоти навбатии ҳайатҳои ҳукуматии Тоҷикистону Қирғизистон дар робита ба таъйин ва аломатгузории хати марз дар шаҳри Душанбе баргузор шавад.

Дар ҳамин ҳол, шуъбаи иттилооти дастгоҳи президенти Қирғизистон назари муовини сарвазири ин кишвар Жениш Разоқовро нашр кардааст, ки ҳайати Бишкекро дар гуфтугӯҳои марзӣ бо Душанбе раҳбарӣ мекунад.

Ба гуфтаи ӯ, дар минтақаҳои баҳсии Қирғизистону Тоҷикистон пайваста низоъ сар мезанад ва бинобар ин мақомоти ду кишвар пешниҳод кардаанд, ки комисияи муштаракеро ба раҳбарии раисони вилоятҳои Суғди Тоҷикистон ва Бодканди Қирғизистон таъсис диҳанд. Ҳамчунин марзбонони қирғизу тоҷик бо ҳам кӯчаҳоеро назорат хоҳанд кард, ки шаҳрвандони ду кишвар дар онҳо равуо мекунанд.

"Хабареро хондам, ки гӯиё барои бунёди роҳи "Исфара-Ворух" иҷозат дода шудааст. Бояд донист, ки Исфара аввали роҳ ва Ворух охири роҳ аст. Дар ин миён роҳи мазкур аз ҳудуди Қирғизистон се бор мегузарад. Соли 2014 протоколе имзо шудааст, ки бар асоси он роҳи иловагӣ сохта мешавад ва он деҳаи Оқсойи ноҳияи Бодкандро давр хоҳад зад. Дар ҳоли ҳозир роҳи асосӣ аз деҳаи мазкур мегузарад ва роҳи дувум берун аз деҳа, дар ҷое, ки хонаҳо нестанд, бунёд мешавад. Ин роҳ мустақил нест ва дар бораи ҷудо шудани кадом як коридоре низ суҳбат нашудааст. Танҳо ин як роҳи иловагие аст, ки ҳам шаҳрвандони Қирғизистон ва ҳам шаҳрвандони Тоҷикистон аз он метавонанд истифода кунанд. Яъне, ду гузина аст. Як роҳ аз деҳаи Оқсой ва роҳи дувум берун аз он мегузаранд", - изҳор доштааст Разоқов.

Ба гуфтаи ӯ, минтақае, ки дар он роҳ бунёд мешавад, ҳудуди Қирғизистон аст. Разоқов мегӯяд, ҷониби Тоҷикистон пешниҳод кардааст, ки дар бунёди роҳ кумак кунад, вале ба далели он ки роҳ дар ҳудуди Қирғизистон аст, Бишкек тасмим гирифтааст, ки онро худ бунёд кунад.

13 март дар байни сокинони деҳаи Оқсойи Қирғизистон ва Меҳнатободи Тоҷикистон низоъ сар зад. Ба ин низоъ бунёди роҳи Оқсой-Тамдиқи ноҳияи Бодканд сабаб шуд, ки аз минтақаи баҳсӣ мегузарад. Дар натиҷаи задухӯрд ду шаҳрванди Тоҷикистон ба ҳалокат расида, се шаҳрванди Қирғизистон захмӣ шуданд. 15 март вазъ дар марз дубора ба эътидол омад ва рӯзи 18 март дар пайи гуфтугӯи мақомоти ду кишвар роҳҳо низ дубора боз шуданд.

Финландия хушбахттарин кишвари дунё. Тоҷикистон дар ҷойи 74-ум аст

Дар раддабандии кишварҳои хушбахти дунё (World Happiness Report), ки бахши Созмони Милали Муттаҳид дар умури ҷустуҷӯи роҳи босубот таҳия кард, Финландия хушбахттарин кишвари дунё номбар шуд. Тоҷикистон дар ҷойи 74 ва Русия дар мақоми 59-ум қарор доранд.

Бар пояи гузориши солонаи ин ниҳод, ки 20 март дар Рӯзи байналмилалии хушбахтӣ нашр шуд, Финландия бали аз ҳама аз ҳама баланд, 7,63-ро гирифт.

Дар ҷойи дуввум Норвегия, баъдан Дания, Исландия ва Шветсария кишварҳои хушбахт эълон шуданд. Русия аз ҷиҳати хушбахтӣ даҳ зина поён рафт ва дар ҷойи 59-ум, дар байни Перу ва Қазоқистон қарор гирифт. Рӯйхати кишварҳои хушбахти дунё бо Бурунди тамом мешавад, ки дар мақоми 156 ҷой дорад.

Барои мушаххас кардани хушбахтӣ шаш омил: тавлиди нохолиси дохилӣ бар сари аҳоли, тӯли умр, саховатмандӣ, пуштибонии иҷтимоӣ, озодӣ ва таъсири фасодкорӣ дар қабули қарорҳои ҳаётан муҳим ба назар гирифта шуд.

Ҳар як омил аз рӯи ҷадвали 10-балӣ арзёбӣ ва баъдан ҳисоби миёна барои кишвар бароварда шудааст.

Шавкат Мирзиёев бахшида ба Наврӯз 44 маҳбусро афв кард

Президенти Узбекистон Шавкат Мирзиёев бахшида ба ҷашни Наврӯз фармони афви 44 маҳбусро имзо кард.

Бар пояи ин фармони Мирзиёев, ки 19 март имзо шуд, ​7 маҳбус пурра ва 11 кас шартан озод шуда, ҷазои 12 тан сабук ва аз муҳлати ҳафбси 13 нафари дигар кам карда мешавад. Ҷамъан 30 нафар аз зиндон озод хоҳанд шуд.

Синни ду тани афвшудаҳо аз 60 боло буда, панҷ нафари онҳо занон буданд.

Дар миёни афвшудаҳо 23 нафар онҳое буданд, ки бо иттиҳоми иштирок дар фаъолияти созмонҳои мамнуъ зиндонӣ шудаанд.

Вазири умури дохилии Ёқутистон аз санҷиши сартосарии муҳоҷирон хабар дод

Тазоҳуроти зидди муҳоҷирати ғайриқонунӣ дар Ёқутистон

Вазири умури дохилии Ёқутистон Владимир Прокопенко дар мулоқот бо намояндагони мақомоти Қирғизистон гуфт, ки дар кишвараш "санҷишҳои иловагии сартосарӣ"-и муҳоҷирони корӣ ба роҳ монда мешавад.

Ба маълумоти Вазорати умури дохилии Ёқутистон, Прокопенко афзуд, ки дар асоси қонунҳои муҳоҷирати ин кишвар бахши мусофирбарӣ ва соҳибкории ғайриқонунӣ санҷида мешавад.

Дар Ёқутистон 18 март сокинон бар зидди муҳоҷирати ғайриқонунӣ тазоҳурот карданд. Дар он раиси Ёқутистон Айсен Николаев, шаҳрдори Якутск Сардана Авксентева ва мансабдорони баландпояи дигар иштирок доштанд. Мақомоти Ёқутистон ваъда доданд, ки қоидаҳои будубоши муҳоҷиронро дар минтақа пурзӯр хоҳанд кард.

Ба ин тазоҳурот хабари таҷовузи як сокини маҳаллӣ аз сӯи муҳоҷирон сабаб шуд. Ба гуфти Кумитаи тафтишотӣ Русия яке аз онҳо шаҳрванди Қирғизистон буд. Ин ниҳод гуфт, кирӯзи 17 март се марди ношинос як занро иҷборан ба мошин шинонда, ба самти номаълум бурдаанд. Баъди чанде зан ба мақомот хабар дод, ки таҷовуз шудааст.

Вале раиси Иттифоқҳои касабаи муҳоҷирони кории Русия Ренат Каримов тазоҳуроти зидди муҳоҷиронро маҳкум кард. Ӯ гуфт, дар баробари миллатгароии русу украин миллатгароии ёқутистонӣ низ шакл мегирад.

"Куштору таҷовуз дар байни русу, тотор, ёқутиву қирғиз ва миллатҳои дигар низ ҳаст. Чаро бояд як ҷиноятро бар сари як гуруҳи муайяни муҳоҷирон бор кард?", - гуфт ӯ дар суҳбат бо ​Znak.com.

Дар Ёқутистон пас аз тазоҳуроти 18 март ҳамлаи сокинони маҳаллӣ ба муҳоҷирони корӣ афзоиш ёфт. Аз ҷумла, ахиран ҳафт сокини маҳаллӣ ба як ронандаи автобус, ки муҳоҷир аст, ҳамла кардаанд.

Як гуруҳ аз мансабдорони Қирғизистон барои баррасии вазъ ба Ёқутистон рафтанд. Ба ҳайати гуруҳ муовини раиси Хадамоти муҳоҷирати назди ҳукумати Қирғизистон Самад Тоқтоболотов, мушовири сафорати ин кишвар дар Русия Достон Ниёзалиев ва раҳбари ҷамъияти қирғизҳо дар Русия Жазбек Бекболиев шомиланд.

Додгоҳи Қирғизистон санҷиши идораи нашрияи "Супер-инфо"-ро ғайриқонунӣ номид

Додгоҳи ноҳияи Якуми майи шаҳри Бишкек рӯзт 19 март шикояти ҳуқуқшиноси "Супер-инфо" қонеъ кард ва санҷиши идораи ин нашрияро ғайриқонунӣ номид.

Ба гуфтаи вакили дифои "Супер-инфо" Таалайгул Токтакунова, додгоҳ қарори аз санҷиши андоз гузаронидани нашрияро ғайриқонунӣ ва беасос хонд. "Қарори додгоҳ бояд бе қайду шарт иҷро шавад. Санҷишгарон бояд қарори худро зуд бекор кунанд", - афзуд ӯ.

Дар Хадамоти мубориза бо ҷиноятҳои иқтисодӣ ё пулиси молии Қирғизистон гуфтанд, ки моҳи январи соли 2019 як шаҳрванд ба пулис аз фаъолиятҳои ғайриқонунии бунёди ҷамъиятии "Маркази пуштибонӣ аз расонаҳо" ва баъзе нашрияҳо шикоят овардааст. Шаҳрванд аз номувофиқатии нишондоди адади нашр дар сомона ва дар худи нашрия шикоят кардааст. Бо дархости ин шаҳрванд тафтиши фаъолияти нашрияро оғоз кардаанд.

Фармоишгари асосии "Маркази пуштибонӣ аз расонаҳо" нашрияи "Супер - Инфо" аст. Ба иттилои пулиси молӣ, маҳз ҳамин нашрия теъдоди воқеии нашрашро пинҳон доштааст.

Дар "Маркази пуштибонӣ аз расонаҳо" мегӯянд, Хадамоти андоз пештар фаъолияти нашрияро санҷида буд ва ҳеч гуна қонуншиканиеро ҳам ошкор накардааст. Ба гуфтаи масъулони нашрия, маълумоти мақомот дар бораи номувофиқатии нишондоди адади нашр куҳна аст.

Пойгоҳи ДИИШ дар шарқи Сурия суқут кард

Амалиёти озодшавии Боғуз

Нирӯҳои мухолифи мавриди ҳимояти ИМА минтақаи аҳолинишини Боғуз дар шарқи Сурияро бозпас ва садҳо ҷангҷӯи гурӯҳи террористии "Давлати исломӣ"-ро асир гирифтанд. Боғуз охирин минтақаи зери идораи гуруҳи террористии "Давлати исломӣ" (ДИИШ) буд.

Сухангӯи Нирӯҳои демократии Сурия Мустафо Балӣ, ишғоли Боғузро қадами бузург ба пеш номид, аммо гуфт, ки эълони шикасти пурраи ДИИШ ҳоло зуд аст. Ҷангҷӯёни ДИИШ феълан як минтақаи хурдро дар канори рӯдхонаи Фурот дар даст доранд.

Мустафо Балӣ мегӯяд, дар миёни асирон шахсоне низ ҳастанд, ки дар ҳамлаи террористии моҳи январ дар шимоли Сурия гумонбар мешаванд. Дар натиҷаи ин ҳамла 16 нафар, аз ҷумла ду низомӣ ва ду шаҳрванди мулкии ИМА ҷон бохтанд.

Бино ба иттилои нашрияи The Wall Street Journal, ИМА мехоҳад, то 1000 сарбози худро дар Сурия нигаҳ дорад. Вале як мақоми баландпояи низомии Амрико ин хабарро "нодуруст" номид. Се моҳ пеш президенти ИМА Доналд Трамп гуфт, ки ҳамаи сарбозони амрикоӣ Сурияро тарк мекунанд. Ин тасмими ӯро бештари сиёсатмадорони ИМА танқид, вале Кремл ҷонибдорӣ кард. Дертар расонаҳо хабар доданд, ки Кохи сафед мехоҳад, дар Сурия аз 200 то 400 сарбози амрикоиро боқӣ гузорад.

Эмомалӣ Раҳмон барои таҷлили Наврӯз ба Норак рафт

Эмомалӣ Раҳмон, раисҷумҳури Тоҷикистон ба шаҳри Норак рафтааст. Дафтари матбуоти президент мегӯяд, ҳадаф аз ин сафари Эмомалӣ Раҳмон иштирок дар чорабиниҳои ҷашни Наврӯз мебошад. Ба қавли манбаъ, президент дар оғози сафараш ба татбиқи лоиҳаи "Барқарорсозии Нерӯгоҳи барқи обии “Норак" оғози расмӣ бахшид.

Қарор аст барои таҷлил аз ҷашни Наврӯз наздики 10 ҳазор нафар ба шаҳри Норак биравад. Инчунин фардо ҷашни Наврӯз дар маркази Душанбе низ таҷлил мешавад. Дар Тоҷикистон ба муносибати ҷашни Наврӯз чаҳор рӯз истироҳат эълон шудааст.

Брайан Ҳук: эрониҳо ҷойи кор мехоҳанд, на лаънат хондан ба Амрико

Брайан Ҳук

Дипломати баландпояи ИМА ба президенти Эрон Ҳасан Рӯҳонӣ гуфт, ки ба ҷойи даъвати эрониҳо барои лаънат хондан ба Амрико, дар заминаи иқтисоди фалаҷ, онҳоро бо ҷойи кор таъмин кунад.

Рӯзи сешанбе дар номае бо забони форсӣ дар твиттер Брайан Ҳук, намояндаи вежаи ИМА дар умури Эрон, ки гоҳо ба изҳороти мақомоти баландпояи ин кишвар посух медиҳад, навишт: "Дар посух ба иқтисоди фалаҷ Рӯҳонӣ аз мардуми Эрон даъват кард, ки ба Ийолоти Муттаҳида, Исроил ва Арабистони Саудӣ лаънат фиристанд! Бо рӯ овардан ба лаънат ва сеҳру ҷоду ӯ мехоҳад масъулияти мушкили иқтисодиро бар души дигарон бор кунад",- гуфт Брайан Ҳук.

Рӯзи 18 март Ҳасан Рӯҳонӣ дар сӯҳбати телевизионӣ аз эрониҳо даъват кард, ки ба ИМА, Исроил ва Арабистони Саудиро лаънат фиристанд. Изҳори назари Рӯҳонӣ талоши муттаҳам кардани ИМА барои иқтисоди фалаҷшудаи Эрон буд. Вашингтон соли гузашта аз қарордоди ҳастаии Эрон бо қудратҳои ҷаҳонӣ, ки даст кашидани Эрон аз барномаҳои ҳастаӣ ба ивази сабукӣ дар таҳримҳоро пешбинӣ мекард, хориҷ шуд ва таҳримҳои зидди Теҳронро дубора барқарор кард.

Рӯҳонӣ, соли 2017 бо ваъдаи рушди иқтисод ба қудрат расид, иддао кард, ки "Амрико мехоҳад Эронро "таҳти султаи худ қарор диҳад".

Баъди берун шудани ИМА аз қарордоди ҳастаии соли 2015 бо Эрон, иқтисоди ин кишвар ва ҳамин тавр пули милии Эрон шадидан коҳиш ёфт ва нархҳо осмонӣ шуданд. Соли гузашта мавҷи тазоҳуроти зиддиҳукуматӣ Эронро фаро гирифт. Буҳрони иқтисодӣ шадидан ба Эрон зарба зад ва мунақидон ошкоро истеъфои Ҳасан Рӯҳониро талаб карданд.

Эрдуғон гуфт, Эрон ба амалиёти мусаллаҳона алайҳи Курдҳо ҳамроҳ шуд

Мулоқоти Эрдуғон бо Рӯҳонӣ дар Сочӣ.14 феврал, 2019

Анқара дубора иддао кард, ки Туркия ва Эрон алайҳи курдҳои ҷудоиталаб якҷо амалиёти низомӣ пеш мебаранд, дар ҳоле, ки матбуоти нимарасмии Эрон бо такя ба низомиён ин иддаро рад мекунад.

Президенти Туркия Раҷаб Тайиб Эрдуғон рӯзи 18 март гуфт, ки амалиёт ҷангиёни Ҳизби мамнуъи Коргарии Курдистонро ҳадаф қарор медиҳад. Эрдуғон афзӯд, ки ин аввалин амалиёт аст амалиёт аст ва изҳори умед кард, ки чунин рисолат дар оянда низ анҷом шавад.

Шабакаи телевизиони Туркия аз қавли вазири умури дохилии ин кишвар гуфт, "Имрӯз соати 8- саҳар Туркия якҷо бо Эрон нахустин амалиёти муштаракро анҷом доданд". Маълум нест, ки ин амалиёт дар куҷо сурат гирифт.

Миллионҳо курд дар манотиқи марзии Туркия, Ироқ, Сурия ва Эрон зиндагӣ мекунанд. Баъзи онҳо ба гурӯҳи мусаллаҳи Ҳизби Коргарии Курдистон робита доранд, ки даҳсолаҳо боз барои истиқлолият мубориза мебарад.

Хбаргузории нимарасмии Форс гузориш дод, ки мақомоти Эрон даст доштани кишварашон дар ин амалиётро рад мекунанд. "Нерӯҳои Туркия бар зидди Ҳизби Коргарии курдисон амалиёт пешмебаранд, аммо нерӯҳои Эрон бахши ин амалиёт нестанд", гуфт манбаи хабаргузории Форс ва афзуд, "нерӯҳои Эрон ҳар гурӯҳеро, ки барои нооромии кишвар талош мекунанд, саркӯб хоҳад кард.

Сипоҳи Посдоронии Инқилоби Эрон дар гузашта бо шӯришгарони Курд дар шимоли кишвар, наздик ба марзи Туркия ва марзи Ироқ вориди даргирӣ шуда буд.

Вазорати дифоъ:Толибон 58 сарбози амниятиро асир гирифтанд

Марзи Туркманистон бо Афғонистон

Вазорати дифои Афғонистон мегӯяд, ҷангиёни Толибон 58 сарбози нерӯҳои давлатиро, ки дар ҷараёни даргирии дурӯза қаламрави Туркманистонро убур карданд, асир гирифтанд.

Нерӯҳо ҳудудан ду ҳафта пеш дар ноҳияи Бала Марғоби вилояти Бодғиз, ҳаммарз бо ин кишвари Осиёи Марказӣ, ба ҳамлаи Толибон рӯ ба рӯ шуданд.

Вазорат изҳороташро дар ҳоле нашр кард, ки гузоришҳо аз даргириҳо дар Бала Марғоб рӯзҳо боз пахш мешуданд.

"Мутаассифона, 58 сарбози нерӯҳои марзбонӣ аз тарафи душманон боздошт шуданд",- омадааст дар изҳороти Вазорати дифои Афғонистон, ки рӯзи 18 март дар твиттер нашр шуд. Вазорат ҳамчунин навишт, ки ҷустуҷӯи сарбозон то дами озод шудани онҳо идома хоҳад ёфт.

Вазорат гуфт, ки 58 сарбози дигар "аз Туркманистон ба Афғонистон баргашт".

Ҷамшед Шаҳобӣ, сухангӯи волии Бодғиз аввали ҳафтаи равон гуфт, ки ба қаламрави Туркманистон гузаштани баъзе сарбозон "ақибнишинии тактикӣ" буд.

Гурӯҳи ҷангии Толибон рӯзи рӯзи 17 март иддао кард, ки дар Бала Марғоб 72 сарбози нерӯҳои амниятии Афғонистонро асир гирифт.

Асорати даҳҳо сарбози давлатӣ дар ҳолест, ки даври навбатии музокироти байни ИМА ва Толибон дар Доҳа ба поён расид. Амрико талош дорад роҳи поён додан ба ҷанги 18-солаи Афғонистонро пайдо кунад.

Ҳукумати Кобул аз ин нороҳат аст, ки аз раванди музокирот дар канор мондааст.

Иттиҳодияи Аврупо озодии оҷили Аюб Титиевро талаб кард

Аюб Титиев

Иттиҳодияи Аврупо талаб кард, ки раҳбари бахши созмони "Мемориал" дар Грозний Аюб Титиев, ки рӯзи гузашта бо ҷурми "нигаҳдории маводи мухаддир" ба чаҳор соли зиндон маҳкум шуд, "оҷилан ва бидуни қайду шарт" озод шавад.

Дар изҳороти Иттиҳодияи Аврупо, ки рӯзи душанбе пахш шуд, таъкид мешавад, ки ҳукми Титиев мустақиман ба фаъолияти ӯ ҳамчун ҳомии ҳуқуқи инсон рабт дорад ва ҳуқуқи ӯ барои мурофиаи одилона риоя нашуд.

Иттиҳодияи Аврупо ҳамчун ёдовар шуд, ки то ҳол ҳеҷ нафаре барои куштори раҳбари пешини "Мемориал" дар Чеченистон Наталя Эстемирова дар соли 2009, ҷазо нагирифтааст.

Раҳбари Комиссиюни Шӯрои Аврупо дар умури ҳуқуқи инсон Дуня Миятович бо нигаронӣ аз ҳукми Титиев онро намунаи навбатии "фазои хасмона ва хатарнок" барои фаъолони ҳуқуқ дар Чеченистон номид.

Миятович бори дигар аз Русия даъват кард, ки тааҳудоти байналмилалиашро риоя кунад ва мутаваҷеҳ бошад, ки сохтори додгоҳӣ барои таъқиби ҳомиёни ҳуқуқ истифода нашавад.

Титиев моҳи январи соли гузашта дар Чеченистон боздошт шуд ва ба гуфтаи тафтишот гӯё бо худ ҳудудан 200 грам марихуана дошт. Титиев иттиҳомро рад мекунад ва мегӯяд, ки маводи мухаддирро махсус ба мошини ӯ партофтанд.

Ҳамкорони Титиев мегӯянд, ки парвандаи ӯ сохта аст ва ҳукумати Чеченистон мехоҳад бо роҳи шиканҷа аз фаъолон халос шавад. Раҳбари Чеченистон Рамазон Қодиров борҳо аз фаъолияти ҳомиёни ҳуқуқ дар ин ҷумҳурӣ шадидан интиқод кардааст.

Сафири Қазоқистон дар Узбекистон ба дуздӣ муттаҳам шуд

Прачами Узбекистон ва Қазоқистон

Президент Нурсултон Назарбоев сафири Қазоқистон дар Узбекистон Ерик Утембоевро аз мақом барканор кард.

Утембоев моҳи октябри соли 2018 бо фармони президенти Қазоқистон ба иллати гумонбарӣ дар дуздӣ муваққатан барканор шуда буд.

Мақомоти мубориза бо коррупсияи Қазоқистон 16 октябри соли 2018 хабар доданд, ки сафири ин кишвар дар Узбекистон ба дуздии пулҳои буҷа дар ҳаҷми махсусан калон гумонбар мешавад.

"Ерик Утембоев ба он айбдор мешавад, ки ҳамчун шахси масъул санади сохтаи иҷрои корҳои сохтмонӣ дар бинои сафорати Қазоқистон дар Узбекистонро имзо кардааст. Дар натиҷаи амали ғайриқонунии ӯ будҷаи давлат 140 миллион танга (ҳудуди 378 ҳазор долар) зарар дид", - гуфта буд намояндаи Оҷонси умури давлатӣ ва мубориза бо коррупсияи Қазоқистон Жанна Бастарова.

Сафирро дар ин мақом раиси пешини Чимкент ва собиқ узви сенати ин кишвар Дархон Сотиболдӣ иваз кард.

Гумонбари тирпаронӣ дар Утрехти Нидерландия боздошт шуд

Акси гумонбари ҳамлаи Утрехт дар твиттери пулиси Нидерландия

Пулиси Нидерландия гумонбари тирпаронии шаҳри Утрехтро, ки се кушта бар ҷой гузошт, боздошт кард. Аз ӯ шаҳрванди 37-солаи Туркия Гюкман Танис ном бурда мешавад.

Тадобири амниятӣ дар Утрехт пурзӯр ва тамоми мактабу масҷидҳо зери назорат гирифта шудаанд. Ҳаракати нақлиёти ҷамъиятӣ низ ба далели амниятӣ муваққатан қатъ шуд.

Ба маълумоти пулис, гумонбар дар як ҷо - дар трамвай тирпаронӣ кардааст. Пештар хабар дода шуд, ки одамон дар чанд ҷой мавриди ҳамла қарор гирифтаанд. Як қатор шоҳидон ҳам гуфтанд, ки ҳамлагарон чанд нафар буда, бо мошине дар шаҳр чарх мезаданд.

Фарзияи асосии ҳодиса ҳамлаи террористӣ нест. Пулис куштор дар асоси хусумати шахсиро низ ҳамчун яке аз фарзияҳо меомӯзад. Шоҳидон мегӯянд, марди ҳамлагар ошкоро ба самти як зан оташ кушода, сипас онҳоеро низ ҳадаф қарор дод, ки ба кумаки ӯ шитофтанд.

Сарвазири Нидерландия Марк Рютте гуфт, ҳукумати ин кишвар дар робита ба ҳодисаи мазкур ҷаласаи изтирорӣ баргузор кард.

Отамбоев расман мухолифати худро бо ҳукумати кунунӣ эълон кард

Алмосбек Отамбоев

Ҳизби сотсиал-демократии Қирғизистон (ҲСДҚ), раҳбараш президенти пешини ин кишвар Алмосбек Отамбоев, расман эълом кард, дар баробари ҳукумат ва президенти кунунӣ Сооронбой Ҷеенбеков мавқеи мухолифро мегирад.

Дар гузашта Ҷеенбеков ва Отамбоев ҳамсаф буданд ва Ҷеенбеков дар интихоботи соли 2017 аз ҲСДҚ ба президентӣ пешбарӣ ва аз сӯи Отамбоев пуштибонӣ шуда буд.

"ҲСДҚ худро мухолиф эъломн кард, ки ин имкон медиҳад, мақомотро танқид ва роҳҳои дигари рушди кишварро пешниҳод намояд", - хабар дод сухангӯи ҳизб Қундуз Жолдубоева рӯзи душанбеи 18 март.

ҲСДҚ - яке аз қадимитарин ҳизбҳои сиёсии Қирғизистон аст, ки соли 1993 ташкил шудааст. Отамбоев яке аз асосгузорони ин ҳизб аст. Аммо дар пайи ихтилофҳои ду ҳамсафи пешин ҳизб ба чанд қисм тақсим шуд: як шохаро Отамбоев роҳбарӣ мекунад, шохаи дигар ё ҷиноҳи порлумонӣ қисман аз президенти кунунӣ ҳимоят мекунад. Анҷумани навбатии ҳизб, ки бояд ин масъаларо баррасӣ намоянд, 6 апрел баргузор хоҳад шуд.

Шумори заҳролудшудагон дар Қазоқистон ба 45 нафар расид

Дар шаҳри Чимкенти Қазоқистон шумори афроде, ки эҳтимолан дар наздикии мактаби рақами 54 аз газ заҳролуд шудаанд, ба 45 нафар расид. Сардухтури беморхонаи шаҳрии Чимкент Мадина Ёрмаханбетова 19 март гуфт, 41 тани заҳролудшудаҳо хонандагони мактабанд.

"Дараҷаи заҳролуд шудани ҳамаи онҳо сабук буд ва пас аз дарёфти ёрии тиббӣ ба хонаҳояшон рухсат дода шуданд", - афзуд ӯ.

Пештар хабар доданд, ки 38 хонанда ва ду корманди мактаби рақами 54 бо нишонаҳои заҳролудшавӣ аз бӯи ғализе ба беморхона интиқол ёфта, ҳудуди 100 омӯзгору корманди мактаб ва 877 хонанда аз маҳалли заҳролудшавӣ кӯчонида шудаанд.

Як масъули Вазорати тандурустии Қазоқистон Жандарбек Бекшин рӯзи 19 март дар суҳбат бо рӯзноманигорон гуфт, "кӯдакон аз дарди сар ва меъда шикоят мекарданд. Ҳодиса пас аз нисфирӯзӣ рух дод. Он замон кӯдакон гурусна буданд ва баъди хурдани ғизо вазъашон беҳтар шуд".

Ба гуфтаи Бешкин, дар наздикии мактаби рақами 54 истгоҳе ҷойгир аст, ки сохтори интиқоли гази он фарсуда шудааст ва эҳтимол дорад, кӯдакон аз гази он заҳролуд шуда бошанд. Ӯ афзуд, ки кормандони озмоишгоҳи онҳо дар маҳалли ҳодиса ҳеч гуна маводи заҳрогинро ошкор накардаанд.

Эътирози зидди муҳоҷирони меҳнатӣ дар Якутски Русия

Митинг дар Ёқутистон

Дар шаҳри Якутски Русия баъди таҷовузи як зан аз сӯи зодаи Осиёи Марказӣ, рӯзи душанбеи 18 март сокинони маҳаллӣ гирдиҳамоӣ ташкил карданд.

Дар гирдиҳамоӣ бештар аз 3 ҳазор сокини маҳаллӣ, аз ҷумла раиси Ёқутистон Айсен Николаев, шаҳрдори Якутск Сардана Авксентева ва дигар мансабдорони баландпоя ширкат карданд.

Николаев мардумро ба муттаҳидӣ ва роҳ надодан ба амалҳои ғайриқонунӣ даъват кард. Ӯ ваъда дод, ки бар зидди муҳоҷирати ғайриқонунӣ мубориза хоҳад буд. "Агар зарур шавад, зидди муҳоҷирон чораҳои нави маҳдудкунанда қабул хоҳем кард", - гуфт Николаев.

Авксентева изҳор дошт, ки "бояд назму тартибот риоя шавад". Ӯ баъдтар аз саҳифаи Фейсбук навишт, ки гирдиҳамомадагон аз тасмим дар бораи тафтиши муассисаҳое, ки муҳоҷирон он ҷо кор мекунанд, ҳимоят кардаанд.

Рӯзи якшанбе дар шаҳри Якутск зидди муҳоҷирон гирдиҳамоии худҷӯш ташкил шуд. Хабари таҷовузи як сокини маҳаллӣ аз сӯи муҳоҷирон боиси гирдиҳамоии мардум гардид. Кумитаи тафтишотӣ гуфт, ки субҳи 17 март се марди ношинос як занро иҷборан дар мошин шинонда, ба самти номаълум бурдаанд. Баъди чанде зан ба мақомот хабар дод, ки таҷовуз шудааст.

Баъди гирдиҳамоӣ мақомоти қудратӣ масҷидҳои Якутскро зери назорат гирифтанд. Намозгузорон аз сокинон таҳдид шунида, ҳафт сокини маҳаллӣ ба як ронандаи автобус ҳамла карданд, ки муҳоҷир буд.

Пулис се нафарро бо гумони таҷовуз боздошт кардааст.

Тавсияи сафорати ИМА ба шаҳрвандони амрикоӣ дар Тоҷикистон

Сафорати Амрико дар Душанбе ба шаҳрвандони ин кишвар дар Тоҷикистон тавсия додааст, ки дар рӯзҳои таътили наврӯзӣ, аз ҳушёрӣ кор бигиранд. Дар як ҳушдори амниятии ин сафоратхона аз рӯзи 18-уми март, ки дар сафҳаи "Фейсбук"-и ин ниҳоди дипломатӣ низ ба нашр расид, гуфта мешавад, ки раҳбарони гурӯҳи "Давлати исломӣ" ё ДИИШ бо ин маъруф ҳастанд, ки афродро истихдом ва ё таҳрик мекунанд, ки бар зидди ҳар касе, ки пойбанди андешаҳои ифротии онҳо набошад, ҳамла кунанд.

Сафорат мегӯяд, ки бинобар амалкарди қаблии ДИИШ дар Тоҷикистон ва шеваҳои таърихие, ки ин гурӯҳ дар саросари ҷаҳон истифода кардааст, ба шаҳрвандони амрикоӣ тавсия дода мешавад, ки аз ҷойҳои серрафтуомад дурӣ биҷӯянд ва бо ҷонибҳое, ки масъулияти ҳифозати онҳо бар дӯши онҳост, машварат кунанд.

Сафорат ҳамчунин ба шаҳрвандони амрикоӣ тавсия додааст, ки барномаҳои амниятии шахсии худро бозбинӣ карда ва дастгоҳҳои иртибототии худро рӯшан нигаҳ бидоранд. Шаҳрвандони амрикоӣ ҳамчунин тавсия шудаанд, ки аз афроди боваринок дар сафар ва нақшаи ҳаракати худ хабар диҳанд ва аз муҳити атрофи худ ва таҳаввулот амниятӣ дар маҳал огоҳ бошанд.

Ин ҳушдори сафорати Амрико дар Душанбе ба шаҳрвандони он кишвар дар ҳолест, ки сафорати ИМА дар Афғонистон ҳаммарз бо Тоҷикистон низ ҳушдор додааст, ки мумкин аст ҷангиён дар ҷараёни маросими Наврӯз бар хориҷиҳо ҳамла кунанд. Сафорати Амрико дар Кобул дар сафҳаи "Фейсбук"и худ гуфтааст, ки гузоришҳои зиёдеро дар ин маврид аз нимаи моҳи ҷорӣ ба ин сӯ дарёфт кардааст.

Бар асоси ин хабарнома, гурӯҳҳои мусаллаҳ тасмим доранд то дар Кобул -пойтахти Афғонистон ба ниҳодҳои давлатӣ ва ҳамчунин ниҳодҳои амрикоӣ ва хориҷӣ ҳамла кунанд. Сафорати Амрико дар эъломия гуфтаааст, шӯришиён ҳамчунон таҳдид кардаанд, ки бар маҳалли таҷаммӯи хориҷиҳо, аз ҷумла меҳмонхонаҳо ва мактабҳо низ ҳамла хоҳанд кард. Дар хабарнома аз ҳама шаҳрвандони амрикоӣ хоста шудааст, ки аз эҳтиёт кор бигиранд.

Ҷашни Наврӯз дар Тоҷикистон ва Афғонистон сар аз рӯзи панҷшанбеи 21-уми март оғоз меёбад ва чанд рӯз идома хоҳад кард. Дар Тоҷикистон ба ин муносибат рӯзҳои 21-25 таътили расмӣ эълон шудааст.

Путин ба қонуни ҷазои "фейкҳо" ва беҳурматӣ ба мақомот имзо гузошт

Владимир Путин

Президенти Русия Владимир Путин қавонин дар бораи ҷарима, масдуд кардани "фейкҳо" ё хабарҳои дуруғин дар матбуот ва ҳамчунин беҳурматӣ ба мақомот ва намодҳои давлатӣ дар интернетро имзо кард.

Сандаҳои марбута дар портали маълумоти ҳуқуқӣ ба нашр расид.

Санади аввал пахши "фейкҳо" ё хабарҳои ғайри қобили эътимод ва дар интернет воқеъӣ ҷилава додани хабарҳоеро, ки "барои ҳаёти инсон, сиҳатии шаҳрвандон, дороиҳои онҳо, тартибот ва амнияти ҷамъияти таҳдид эҷод мекунад, мамнӯъ месозад.

Барои нашри чунин шарҳ бори аввал аз 30 то 100 ҳазор рубл ва дафъаҳои баъдӣ то 300 ҳазор рубл ҷарима ё боздошт пешбинӣ мешавад.

Маблағи ҷарима барои нашри "фейкҳо" аз ҷониби шаҳрвандон 100 ҳазор рубл, мақомот то 200 ҳазор рубл ва ашхоси ҳуқуқӣ ду миллион рубл муайян шудааст.

Барои таҳқири мақомот ва намодҳои давлатӣ дар интернет ҷарима аз 100 ҳазор ё 15 рӯзи зиндон сар мешавад. Дар сурати нақзи такрории қонун ҷарима то 200 ҳазор мефазояд. Нашри шарҳҳое, ки беҳруматӣ ба мақомотро нишон медиҳанд, "авбошии кӯчак" арзёбӣ хоҳад шуд.

Ҳангоми хониши дуюми тарҳи қонун ба он сабукиҳое ворид шуд. Аз ҷумла, ба васоити ахбор, ки расман сабти ном шудаанд, имкон дода мешавад, "хабари тақаллубӣ"-ро дарҳол ҳазф кунанд ва аз ҷарима халос шаванд.

Хабарнигорон ва фаъолони ҳуқуқи инсон аз тарҳи қонун ҳамчун санади маҳдудкунандаи озодии баён шадидан интиқод карданд.

Миср аз Русия даҳҳо ҳавопаймои ҷангии Су-35 харидорӣ мекунад

Ҳавопаймои ҷангии Su-35

Миср бо Русия барои харидории даҳҳо ҳавопаймои ҷангии Су-35 қарордод имзо кард. Дар ин бора нашрияи "Коммерсант" рӯзи 18 март бо такя ба намояндаи саноати таслиҳоти Русия хабар дод.

Қарордоди фурӯши ҳавопаймоҳо ва таҷизоти маҳви ҳавоӣ ба маблағи 2 миллиард доллар имзо шудааст. Гуфта мешавад, ки созишнома охири соли 2018 ҳукми иҷро гирифт, аммо интиқоли ҳавопаймоҳо ва таҷҳизоти дигар ба солҳои 2020-2021 барномарезӣ шудааст. Ба гуфтаи ҳамсӯҳбати "Коммерсант", ин қарордод корхонаи таслиҳотии Комсомолск -на -Амурро "чандин сол бо кор таъмин мекунад".

Қоҳира баъди ба қудрат расидани Абдулфаттоҳ ал-Сисӣ, соли 2013, ки бо кӯмаки низомиҳо президент Муҳаммад Мурсиро аз раёсат дур кард, фаъолона ба бозсозии таслиҳотӣ оғоз намуд. Ҳоло Миср яке аз харидорони аслии таҷҳизоти низомии Русия аст. Феълан Маскав ба Миср ҳавопаймои ҷангии МиГ-29/M2, чархболи ҷангии Ка-52, маҷмаи дифои мушакӣ, силоҳои оташфишон ва муҳмоти ҷангӣ мефурӯшад.

Соли 2015 Русия барои фурӯши ҳавопаймои Су-35 бо Чин, ва охири соли 2018 бо Индонезия созишнома имзо кард. Ин созиш Чинро таҳти таҳримҳои ИМА қарор дод. Бинобар таҳрими бахшҳои Вазорати дифои Русия, онҳо ҳақ надоранд муҷаввизи содиротро дарёфт кунанд ва ё бо ширкатҳои амрикоӣ ҳамкорӣ намоянд.

Сарфи назар аз таҳдиди таҳримҳо, ҳукумати Индонезия тасмим надорад, ки қарордод бо Русияро бекор кунад. Интиқоли нахустин ҳавопаймоҳои ҷангии Русия ба он кишвар метавонад охири соли 2019 оғоз шавад.

Дар робита ба тирпарронӣ Утрехт пулис турктабори 37-соларо меҷӯяд

Утрехт -Нидерландия

Пулиси дар робаита ба тирпарронии субҳи рӯзи душанбе дар Утрехти Нидерландия, ки дастикам як нафарро қурбон ва чанд нафари дигарро маҷруҳ кард, як марди 37-солаи турктаборро меҷӯяд.

"Пулис аз шумо мехоҳад дар заминаи ҳодисаи субҳи имрӯз мутаваҷеҳи марди 37-сола бо номи Гокман Танис (зодаи Туркия) бошед",- навишт пулис дар твиттер ва афзӯд, ки "зинҳор ба ӯ наздик нашавед".

Биноба хабарҳои охирин, нерӯҳои вежаи пулис биноеро, ки бовар меравад гумонбар дар онҷо пинҳон шудааст, муҳосира карданд. Дар шаҳр чораҳои амнияти тақвият ёфта, мактабу масҷидҳо таҳти назорат қарор доранд.

Ба гуфтаи пулис гумонбар баъди ҳодиса ҳоло ҳам боздошт нашудааст. Ҳузури густардаи пулис дар назди истгоҳи трамвай, ки тирпарронӣ дар онҷо оғоз шуд ба назар мерасад.

"Тирпарронӣ дар истгоҳи Октоберплейн 24 дар Утрехт сурат гирифт... Чандин нафар захм бардошт. Манотиқи атрофро дар муҳосира гирифтем ва қазияро таҳқиқ мекунам",- гуфт пулиси Утрехт дар твиттер.

Нахуствазири Нидерландия Марк Рютте гуфт, ки дар заминаи ин ҳодиса ҳукумат ҷаласаи изтирорӣ баргузор мекунад.

Пентагон дар Сурия мондани 1,000 сарбози ИМА-ро рад мекунанд

Сарбозони ИМА дар Манбиҷи Сурия

Пентагон гузориш дар бораи барномаи боқӣ гузоштани 1,000 сарбози амрикоӣ дар Сурия, ки маънои ақиб рафтан аз қарори қаблии бурунрафти комили ИМА -ро хоҳад дошт, рад мекунад.

"Иддаое, ки ин бегоҳ аз тарафи як расонаи бузурги ИМА нашр шуд, ки гӯё низомиҳо барномаи нигаҳ доштани 1,000 сарбоз дар Сурияро пайгирӣ мекунанд, аз рӯи далелҳо ғалат аст,- гуфт генерал Ҷозеф Данфорд, фармондеҳи ситоди муштарак рӯзи 17 март.

"Ҳеҷ дигаргуние бар барномаи моҳи Феврал нест ва мо ба татбиқи дастури президент барои коҳиши нерӯҳои ИМА идома медиҳем.- гуфт Данфорд.

Биноба гузориши The Wall Street Journal, музокироти ИМА бо шарикони Аврпуоӣ ва Туркия барои эҷоди минтақаи амн дар шимолу шарқи Сурия, бо ҳадафи ҳимоя аз ҷангиёни Курд, ки шарики Ғарб ба шумор меоянд, ба нокомӣ анҷомид ва Пентагон маҷбур шуд, ки 1,000 сарбози амрикоиро дар онҷо боқӣ гузорад.

Моҳи Декабр президенти ИМА Доналд Трамп эълон кард, ки ҳамаи 2 ҳазор сарбози амрикоиро аз Сурия берун меорад.

Мунаққидон, бо шумули ҳамҳизбҳои Доналд Трамп тасмими президентро танқид карданд ва гуфтанд, ки ин иқдом ҷангиёни Курдро дар ихтиёри Туркия қарор медиҳад, ки онҳоро террорист медонад.

Хабарнигори телевизиони хусусӣ дар Афғонистон кушта шуд

Мошини хабарнигори дигар баъди таркиш дар Ҳилманд

Масъулияти кушторро гурӯҳи тундрави марбут ба ДИИШ бар дӯш гирифт. Хабарнигори 60-сола Султон Маҳмуд Киркхва рӯзи 15 март дар вилояти шарқии Хост кушта шуд.

Дар изҳороте, ки гурӯҳи тундрав рӯзи 17 март нашр кард, азгезаи куштор шарҳ дода нашудааст. Киркхва корманди телевизиони хусусии "Замон" буд. Биноба маълумоти дарёфтӣ, онҳое, ки ба сӯи хабарнигор оташ кушоданд, аз байн бурда шуданд.

Ҳафтаи гузашта хабарнигори дигар - Нисор Аҳмад Амадӣ дар пайи таркиши мошинаш дар вилояти Ҳилманд ба ҳалокат расид.

Ба маълумоти Созмони дифоъ аз хабарнигорон, мақараш дар Ню Йорк, соли гузашта дар Афғонистон дастикам 13 корманди матбуот қурбон шуд. Фаъолони ҳуқуқи инсон мегӯянд, ки ин кушторҳо ба фаъолияти кории хабарнигорон рабт дошт. Биноба натиҷагирии фоҷеабори соли гузашта Афғонистон хатарноктарин кишвар барои фаъолияти хабарнигорон номбар шуд.

Ёфтҳои бештар

Гузоришҳои видеоӣ

XS
SM
MD
LG