Пайвандҳои дастрасӣ

Хабари нав

Хабарҳо

Музокироти ҳайатҳои Тоҷикистону Қирғизистон ба анҷом расид

Марзи Тоҷикистону Қирғизистон

Даври дувуми музокироти ҳайатҳои Тоҷикистону Қирғизистон, ки рӯзи 16-уми март оғоз ёфта буд, ба анҷом расид.

Хабарнигори бахши қирғизии Радиои Озодӣ аз ҷои ҳодиса гузориш дод, ки ҳайатҳо ба раҳбарии муовинони нахуствазири ду кишвар ба марзи деҳаи Оқсойи Қирғизистон ва ҷамоати Ворухи Тоҷикистон рафтаанд. Интизор меравад, онҳо бо сокинони ду деҳа ва раҳбарони маҳалҳо вазъият дар сарҳадро баррасӣ кунанд.

Дар ҳоли ҳозир роҳи Ӯш-Бодканд-Исфана ва роҳе, ки шаҳри Исфараро бо ҷамоати Ворух мепайвандад, бастааст. Хабар дода мешавад, ки дар музокироти рӯзи шанбе ин масъала баррасӣ шудааст, вале маълум нест, ҷонибҳо ба чӣ қарор расидаанд.

Музокироти аввал рӯзи 14-уми март ва пас аз муноқишаи маргбор миёни сокинони Исфараи Тоҷикистон ва Бодканди Қирғизистон сурат гирифта буд. Дар ин муноқиша ду шаҳрванди Тоҷикистон кушта ва беш аз бист нафар, аз ҷумла се сокини Қирғизистон захмӣ шуданд.

Муноқиша дар пайи сохтмони роҳи Оқсой-Тамдиқ шуруъ шуд. Роҳро Қирғизистон месозад. Ҷониби Тоҷикистон бо он розӣ нест.

Мақомоти Тоҷикистон то ба ҳол дар мавриди музокирот ва ҷузъиёти он чизе нагуфтаанд. Қаблан онҳо дар сар задани низоъ дар марз сокинон ва нерӯҳои марзбонии кишвари ҳамсояро муттаҳам карда буданд.

Хатти марзи байни Тоҷикистону Қирғизистон 976 километр тӯл дорад ва то кунун танҳо 504 километри он таъйин ва аломатгузорӣ шудааст. Дар минтақаҳои аломатгузоринашудаи марз, умдатан дар байни вилоятҳои Суғд ва Бодканд, борҳо сокинон барои дастрасӣ ба обу чарогоҳ даст ба гиребон шудаанд.

Ҳамид Исмоилов: “То мақомот расман узр напурсад, намеравам”

Ҳамид Исмоилов

Ҳамид Исмоилов, сардори бахши Осиёи Марказии радиои Би-би-сӣ ва муаллифи романи "Базми ҷинҳо", ба суолҳои хабаргузории расмии Узбекистон (УзА) посух надодааст. Исмоилов дар Лондон зиндагӣ мекунад ва ҳафтаи гузашта ҷоизаи Бонки Аврупоии Таҷдид ва Рушдро соҳиб шуд.

Хабарнигори УзА ба Ҳамид Исмоилов муроҷиат кардааст, то ба чанд суол дар бораи адабиёт ҷавоб гӯяд. Вале Исмоилов гуфтааст, ду сол қабл мақомоти Узбекистон ӯро бе сабаб аз кишвар ронданд. Ва афзудааст, то замоне мақомот аз ӯ расман узр нахоҳанд, ба Узбекистон нахоҳад рафт.

Дар ин бора рӯзи 15-уми март бахши узбекии Радиои Озодӣ хабар дод.

Ҳамид Исмоилов рӯзи якуми марти соли 2017 аз Лондон ба Тошканд рафт ва дар фурудгоҳи пойтахт дастгир ва ҳамон рӯз аз Узбекистон ихроҷ гардид.

Он вақт Исмоилов бо ҳайате аз намояндагони Бритониё ба онҷо рафта буд. Сабаби ихроҷи хабарнигор ва нависандаи узбек аз Тошканд то ҳанӯз маълум нест.

Ҳамид Исмоилов дар оғози солҳои навадум дар таҳияи филми ҳуҷҷатӣ дар бораи Узбекистон бо Би-би-сӣ ҳамкорӣ кардааст. Комиссияи давлатии Узбекистон ин филмро “хилоф бо ҷараёнҳои фарҳангии” он кишвар донист ва баъдан алайҳи Исмоилов парвандаи ҷиноӣ боз шуд. Ӯро ба талош барои сарнагунии ҳукумат айбдор карданд.

Ҳамид Исмоилов соли 1992 Узбекистонро тарк кард ва аз он замон то кунун дар Лондон зиндагӣ мекунад.

Раиси ҷумҳури Амрико як қатъномаи Конгрессро вето кард

Доналд Трамп, раиси ҷумҳури Амрико, шоми 15-уми март бо радди як қатъномаи Конгресс аввалин ветои давраи раёсати ҷумҳурии худро содир кард, то маблағи сохтмони девор дар марз бо Мексикаро таъмин кунад.

Трамп дар Кохи Сафед гуфт, “Конгресс ҳақ дорад, қатъномаро тасвиб кунад ва ман вазифа дорам, ки онро рад намоям.”

Раиси ҷумҳури Амрико рӯзи гузашта бо як шикасти хиҷолатовар рӯбарӯ шуд, зеро сенаторҳо, аз ҷумла беш аз даҳ сенатори Ҳизби Ҷумҳурихоҳ, раъй доданд, то фармони ӯ барои эълони ҳолати фавқулода дар марз бо Мексика лағв шавад.

Эҳтимоли ин ки Конгресс битавонад аз се ду бахши раъй барои лағви ин фармони раиси ҷумҳурро ба даст биорад, зиёд нест. Аммо демократҳо мегӯянд, ки ба ҳар ҳол дар ин роҳ иқдом мекунанд.

Доналд Трамп мехоҳад, бо истифода аз эълони ҳолати изтирорӣ миллиардҳо доллари будҷаи федералро барои бунёди девор дар марзи Амрико бо Мексика харҷ кунад.

Даври дувуми музокироти Тоҷикистону Қирғизистон дар марз

Музокироти намояндагони Тоҷикистону Қирғизистон. Акс аз вебсайти Вазорати корҳои дохилии Қирғизистон

Даври дувуми музокироти намояндагони Тоҷикистону Қирғизистон барои ҳалли муноқишаҳои марзӣ рӯзи 16-уми март идома кард.

Хадамоти давлатии марзбонии Қирғизистон гуфт, музокирот дар ҳудуди ин кишвар ва дар минтақае бо номи “Дача” ҷараён дорад. Ҳайати Тоҷикистонро муовини нахуствазир Азим Иброҳим ва ҳайати Қирғизистонро муовини сарвазири он кишвар Ҷениш Раззоқов раҳбарӣ мекунанд.

Музокирот рӯзи 14-уми март ва пас аз муноқишаи маргбор миёни сокинони Исфараи Тоҷикистон ва Бодканди Қирғизистон оғоз ёфта буд. Дар ин муноқиша 2 шаҳрванди Тоҷикистон кушта ва беш аз бист нафар, аз ҷумла се сокини Қирғизистон захмӣ шуданд.

Муноқиша дар пайи сохтмони роҳи Оқсой-Тамдиқ шуруъ шуд. Роҳро Қирғизистон месозад. Ҷониби Тоҷикистон бо он розӣ нест.

Бо гузашти ду рӯз мақомоти Тоҷикистон ҷузъиёти музокиротро ошкор накардаанд. Вазорати корҳои дохилии Қирғизистон рӯзи 15-уми март натиҷаҳои аввали музкоиротро эълон кард ва гуфт, дар навбати аввал гумонбарони ташкили низоъ пайдо ва ба ҷавобгарӣ кашида хоҳанд шуд. Инчунин, маъмурони пулиси ду кишвар дар марз навбатдории шабона ташкил мекунанд.

Хадамоти давлатии марзбонии Қирғизистон рӯзи шанбе вазъият дар марзи ду кишварро “муътадил” арзёбӣ кард ва гуфт, “таҷаммӯи сокинон мушоҳида нашудааст”.

Гумонбари ҳамла дар Зеландияи Нав дар додгоҳ ҳозир шуд

Брентон Таранти 27-солаи австралиягӣ, ки ба ҳамла болои ду масҷид дар Зеландияи Нав муттаҳам аст, рӯзи 16-уми март бори нахуст дар додгоҳ ҳозир шуд. Ӯ дар даст завлона ва дар тан либоси сафеди хоси зиндониҳоро дошт.

Додраси додгоҳи Крайстчерч, шаҳре, ки рӯзи 15-уми март болои ду масҷид ҳамла сурат гирифт, Брентон Тарантро расман ба қатл муттаҳам кард.

Тарант ба эълони иттиҳоми қатл ҳеч вокуниш нишон надод ва то 5-уми апрел дар боздошт хоҳад монд.

Рӯзи ҷумъа бар асари ҳамлаи террористӣ ба ду масҷид дар шаҳри Крайстчерчи Зеландияи Нав, ​49 нафар кушта ва даҳҳо тани дигар захмӣ шуданд. Зеландияи Нав ба хотири ҳамлаҳои маргбор мотам эълон кардааст.

Нахуствазири Зеландияи Нав рӯзи ҷумъаро "рӯзи сиёҳ" дар таърихи кишвараш унвон намуд.

Беларусия сафири Русияро "ҳисобдори умедбахш" номид

Сафири Русия дар Беларусия Михаил Бабич

Вазорати корҳои хориҷии Беларусия изҳороти ахири сафири Русия Михаил Бабичро шадидан интиқод кард ва худи сафирро "ҳисобдори умедбахш" номид.

Намояндаи Вазорати корҳои хориҷии Беларусия Анатолий Глаз рӯзи 15 март дар шарҳи изҳороти Бабич ба хабаргузории РИА "Новости" гуфт, ки равобити Русияву Беларусия амиқтар аз " бастаи ҳисобҳои ҷаълӣ" аст, ки ба гуфтаи ӯ "сафири Русия ба он такя мекунад". Ӯ ба Михайил Бабич, сафири Русия дар Беларусия, машварат дод, ки беҳтар аст ба вежагиҳое кишваре, ки дар он сафир шудааст тармакуз кунад, бо таърихаш шинос шавад ва каме эҳтиромро нигаҳ дорад".

Худи Бабич дар посух гуфт: "Эҳтимол баландтарин қуллаи мактаби дипломатӣ, ки дар ин шарҳ зикр шудааст, ҳамин бошад". Бабич дар ҷавоб ба шарҳи Глаз таъкид кард, муҳимтар аз ҳама қазовати далелҳои ҳам тарафи Русия ва ҳам Беларусия ва пайдо кардани қарорест, ки барои ҷонибҳо қобили қабул аст.

Бабич рӯзи 14 март ба РИА "Новости" гуфт, ки саҳми Русия дар рушди иқтисоди Беларусия, шартҳои муносиби қарз ба Минск ва фуруши гази арозон ба ин кишвар нодида гирифта мешавад"

Ӯ ҳамчунин гуфт, "ҳайратовар" мебуд агар Русия барои истиқрори иншоотҳои низомиаш дар Беларусия пул падохт кунад".

Қаблан президенти Беларусия Александр Лукашенко гуфтугӯҳоеро, ки Русия Беларусияро мехуронад, "гапи беҳуда" номид.

Харҷҳои низомии НАТО чаҳор дарсад афзудааст

Йенс Столтенберг

Ҳампаймонони НАТО харҷҳои низомии худро якбора афзоиш доданд. Дар гузориши НАТО барои соли 2018 омадааст, "аз ҳама бештар Латвия, Литва, Эстония, Лаҳистон ва Нидерланд харҷ доштаанд."

Гузоришро дабири кулли НАТО Йенс Столтенберг рӯзи 14-уми март рӯнамоӣ кард. Ӯ гуфт, харҷи умумии ҳампаймонони НАТО дар панҷ соли охир ба нишондоди болотарин расид ва танҳо дар як соли охир харҷҳо 4 дарсад бештар шудаанд.

"Бо ҳадафи пуштибонӣ аз амният ҳампаймонон дар бахшҳои мухталиф бештар аз гузашта якҷоя бо ҳам рафтор мекунанд", - гуфт Столтенберг.

Президенти Амрико Доналд Трамп соли 2017 аз ҳампаймонони аврупоии НАТО талаб карда буд, ки сармоягузорӣ ба буҷаи созмонро бештар кунанд.

Бо ин вуҷуд, тавре дар гузориш омадааст, ҳамагӣ 6 кишвари узви НАТО - Эстония, Юнон, Лаҳистон, Латвия, Литва ва Бритониё тавонистанд, ки ба ҳадафи пешгузошта бирасанд - яъне, харҷҳои низомиро то 2 дарсади ММД (Маҷмӯи Маҳсулоти Дохилӣ) расонанд.

Дар маҷмуъ, кишварҳои НАТО дар соли 2018 қариб се триллион доллар харҷи низомӣ доштаанд. Наздики 70 дарсади ин харҷҳо ба Амрико рост меояд.

Қирғизистон сокинони ду деҳаи ҳаммарз бо Исфараро кӯчонд

Мақомоти Қирғизистон шаби 14-уми март ва баъди муноқишаи маргбор дар сарҳад, сокинони ду деҳаи ҳаммарз бо Исфараи Тоҷикистонро ба маконҳои дигар кӯч додаанд.

Дар баёнияи ҳукумати Қирғизистон гуфта шудааст, ки онҳоро тариқи автобус ва мошинҳои сабукрав ба шаҳри Бодканд бурданд. Баёния рӯзи 15-уми март нашр шуд.

Бино ба хабари ҳукумати Қирғизистон, сокинони рустои Оқсой ва Куктош дар бинои литсейи касбии рақами 57 ва хонаҳои истиқоматӣ дар кӯчаи С.Айтматов ҷобаҷо шудаанд. Бархе ба хонаҳои наздикони худ рафтаанд.

Чингиз Есенқулов, сардори дафтари матбуоти ҳукумати Қирғизистон, аз посух гуфтан ба суоли Радиои Озодӣ дар бораи онки кӯч додани сокинони Оқсой ва Куктош ба шаҳри Бодканд чӣ маъно дорад, худдорӣ кард. Ӯ рӯзи 15-уми март гуфт, "ин тасмими муваққатист ва асосан занону кӯдаконро барои оромиши онҳо ба ҷойи дигар бурдаанд".

Муноқиша дар марзи Тоҷикистону Қирғизистон рӯзи 13-уми март ва баъди оғози сохтмони роҳи Оқсой-Тамдиқ оғоз шуд. Моҷаро ду рӯз давом кард ва дар натиҷаи он ду шаҳрванди Тоҷикистон кушта ва беш аз ду ҷониб зиёда аз бист нафар захмӣ шуданд.

Музокироти мақомоти Тоҷикистону Қирғизистон рӯзи 15-уми март баргузор шуд. Ба иттилои ҷониби Қирғизистон, ду тараф тавофуқ кардаанд, ки "гунаҳкорони низоъ"-ро муайян ва нисбат ба онҳо "қарори воқеӣ" қабул мекунанд.

Тарафи Тоҷикистон ҷузъиёти музокиротро ошкор накардааст.

Хатти марзи байни Тоҷикистону Қирғизистон 976 километр тӯл дорад ва то кунун танҳо 504 километри он таъйин ва аломатгузорӣ шудааст.

Дар минтақаҳои номуайяни марз, умдатан дар байни вилоятҳои Суғд ва Бодканд, сокинон борҳо барои дастрасӣ ба обу чарогоҳ даст ба гиребон шудаанд.

Интерпол ба боздошти 20 гумонбари куштори Хошуқчӣ амр дод

Рӯзноманигор Ҷамол Хошуқҷӣ

Пулиси байналмилалӣ - Интерпол қарори боздошти 20 шаҳрванди Арабистони Саудиро содир кард, ки дар куштори хабарнигори мунаққиди Оли Сауд Ҷамол Хошуқчӣ айбдор мешаванд.

Дар ин бора нашрияи Daily Sabah бо истинод ба Вазорати адлияи Туркия иттилдодааст. Қарори боздошти шаҳрвандони Арабистони Саудӣ дар асоси дархости Анқара содир шуд.

Рӯзноманигори саудӣ Ҷамол Хошуқчӣ бо нашрияи The Washington Post ҳамкорӣ ва сиёсатҳои Риёзро танқид мекард. Рӯзноманигорро 2 октябри соли гузашта дар консулгарии Арабистони Саудӣ дар Истамбул куштанд. Вале ҷасади ӯ то ҳол пайдо нашудааст.

Ангушти иттиҳом ба сӯи валиаҳди Арабистони Саудӣ Муҳаммад бин Салмон баланд шудааст. Аммо Риёз даст доштани валиаҳдро дар ин ҳодиса рад мекунад. Мақомоти Арабистони Саудӣ дар робита ба қатли Хошуқчӣ 21 нафарро дастгир карданд. Боздоштшудаҳо даст доштани худро дар ин ҷиноят рад мекунанд.

Узбекистон наққошии 150 миллионии Рембрантро бозпас гирифт

Наққошии Рембрант

Додситонии кулли Узбекистон 13 март наққошии Рембрандт Ван Рейн (1606-1669) - рассоми машҳури ҳолландиро ба Вазорати фарҳанги Узбекистон баргардонд. Додситонӣ гуфт, ин наққошӣ ғайриқонунӣ аз Узбекистон ба хориҷ бурда шуд.

28 августи соли 2008 сокини Тошканд А.П. наққошии Рембрандтро ба К.Й. дар ивази 50 ҳазор доллар фурухта ва К.Й. расмро ба хориҷи Узбекистон бурд.

Дар солҳои 2014-2018 парвандаи ҷиноӣ ба далели мавҷуд набудани ҷиноят ва инчунин ба поён расидани муҳлати кофтуков борҳо қатъ шуд.

Аммо баъдан А.П. аз додситонӣ пайдо кардани асарро дархост кард. Додситонӣ моҳи июни соли 2018 расми Рембрандтро пайдо кард.

Шаҳрвандон К.Й. ва Р.Ф. айбдор эътироф шуд ва наққошӣ ба Узбекистон баргашт.

Дар хабари додситонӣ гуфта шудааст, ки вазорати фарҳанги Узбекистон арзиши нигораро аз 8 то 15 млн евро баровард мекунад. Дар музоядаҳои Аврупо мумкин аст, онро то 150 млн евро нарх кунанд.

CPJ аз Остона хост, ки ба фаъолияти хабарнигори Радиои Озодӣ монеа нашавад

Сония Тойкен

Кумитаи ҳимоят аз рӯзноманигорон (CPJ) аз мақомоти Қазоқистон даъват кард, ки ба таъқиби хабарнигори Бахши қазоқии Радиои Озодӣ Сония Тойкен ва рӯзноманигорони дигарро барои бозтоби мавзуъҳои доғи иҷтимоӣ хотима гузорад

CPJ шаби 14 март бо нашри як изҳорот гуфт, мақомоти Қазоқистон бояд дархости Тойкенро дар робита ба радди ҷаримае бипазиранд, ки додгоҳ пас аз бозтоби эътирози бекорон дар Жанаозен бастааст. Дар изҳорот омадааст, ки рӯзноманигор дар посух ба бозтоби эътирози сокинон ба ҷавобгарии маъмурӣ кашида шуд.

Сония Тойкен, ки бо сокинони бекор ва норозии Жанаозен суҳбат карда буд, шаби 11 март боздошт ва ба шуъбаи пулис интиқол дода шуд. Додгоҳи Жанаозен субҳи 12 март ӯро дар "нофармонӣ ба амри кормандони пулис" айбдор ва 50 ҳазору 500 танга (беш аз 130 доллар) ҷарима баст.

Худи Тойкен дар суҳбат бо намояндагони CPJ иддаои пулисро рад карда, ҷаримаи худро сиёсӣ номид. "Мақомоти Қазоқистон бояд ба таъқиби хабарнигор Сония Тойкен ва рӯзноманигоронеро, ки мавзуъҳои доғи иҷтимоиро бозтоб мекунанд" хотима диҳанд., - гуфтааст сардори CPJ Карлос Мартинес де ла Серна.

Хабарнигори Бахши қазоқии Радиои Озодӣ тайи моҳҳои ахир бори севум аст, ки боздошт мешавад. Моҳи гузашта низ ӯ ҳамроҳи наворбардори радио Санат Нурбек барои бозтоби эътирози сокинони бекори Жанаозен дастгир шуд. Тойкен 12 феврал низ ҳангоми анҷом додани мусоҳиба боздошт ва ба шуъбаи пулиси Остона интиқол ёфта буд.

Харҷҳои низомии НАТО чаҳор дарсад афзудааст

Дабири кулли НАТО Йенс Столтенберг

Ҳампаймонони НАТО харҷҳои низомиашонро якбора бештар карданд. Аз ҳама бештар Латвия, Литва, Эстония, Лаҳистон ва Нидерланд харҷ доштаанд, омадааст дар гузориши НАТО барои соли 2018.

Гузоришро дабири кулли НАТО Йенс Столтенберг рӯнамоӣ кард. Ӯ гуфт, харҷи умумии ҳампаймонҳои НАТО дар панҷ соли охир ба нишондоди болотарин расид ва танҳо дар як соли охир харҷҳо 4 дарсад бештар шуд. "Бо ҳадафи пуштибонӣ аз амният шарикон дар бахшҳои мухталиф бештар аз гузашта якҷо амал мекунанд", - гуфт Столтенберг.

Президенти ИМА Доналд Трамп соли 2017 аз ҳампаймонҳои аврупоии НАТО талаб карда буд, ки сармоягузорӣ ба буҷаи созмонро бештар кунанд. Аммо бо ин вуҷуд, тавре дар гузориш омадааст, ҳамагӣ 6 кишвари узви НАТО - Эстония, Юнон, Лаҳистон, Латвия, Литва ва Бритониё тавонистанд, ки ба ин ҳадаф бирасанд - яъне, харҷҳои низомиро то 2 дарсади ММД (Маҷмуи Маҳсулоти Дохилӣ) расонанд.

Дар маҷмуъ кишварҳои НАТО дар соли 2018 қариб се триллион доллар харҷи низомӣ доштаанд. Наздики 70 дарсади ин харҷҳо ба ИМА рост меояд.

Эътимодномаи сафирони нави Эрону Амрико дар Тоҷикистон

Ҷон Марк Поммершайм, сафири нави Амрико дар Тоҷикистон бо ҳамсараш Наталя. Акс аз сафорати Амрико

Сафирони тозатаъйини нӯҳ кишвари хориҷӣ дар Тоҷикистон ба президент Эмомалӣ Раҳмон эътимоднома супурданд. Ин маросим рӯзи 15-уми март дар шаҳри Душанбе баргузор шуд. Тайи моҳҳои охир Эрону Қирғизистон, Амрико, Чин, Дания, Шриланка, Венесуэла, Гана ва Конго намояндаҳои расмии худро дар Тоҷикистон нав карданд. Ҷон Марк Поммершайм, сафири нави Амрико ва Муҳаммадтақӣ Собирӣ, сафири нави Эрон ин ҳафта вориди Тоҷикистон шуданд.

Сӯҳбати Эмомалӣ Раҳмон ва Сооронбой Ҷээнбеков дар бораи вазъ дар марз

Эмомалӣ Раҳмон, раиси ҷумҳури Тоҷикистон ва Сооронбой Ҷээенбеков, президенти Қирғизистон рӯзи 14-уми март вазъ дар марзи ду кишварро баррасӣ карданд. Дафтари матбуоти президенти Тоҷикистон мегӯяд, сарони ду кишвар ба тавофуқ расиданд, ки низоъ дар марз аз роҳи мусолиҳатомез рафъ шавад.

Ба иттилои дафтари матбуоти президенти Тоҷикистон, Сооронбой Ҷээнбеков дар сӯҳбати телефонӣ бо Эмомалӣ Раҳмон ба наздикони Ҳусейн Ҳакимов, шаҳрванди Тоҷикистон, ки дар низои наздисарҳадӣ кушта шуд ҳамдардӣ баён кардааст.

"Президенти Ҷумҳурии Қирғизистон Сооронбой Жеенбеков таъзияву тассалият ва ҳамдардии амиқи худро ба аъзои оила ва наздикони шаҳрванди Ҷумҳурии Тоҷикистон Ҳусейн Ҳакимов, ки дар аснои низои наздисарҳадӣ ба ҳалокат расид, иброз дошт",-мегӯяд манбаъ.

Дафтари матбуоти президенти Тоҷикистон ҳамчунин гуфт, сарони ду кишвар "ҷиҳати додани супоришҳои дахлдор ба мақомоти салоҳиятдори ҷонибҳо дар хусуси тафтишоти ҳамаҷонибаи ин низоъ, ки боиси талафоти ҷонӣ гардид, ҳамчунин истифодаи роҳҳои мусолиматомези рафъи он ба мувофиқа расиданд".

Моҷаро дар марзи миёни Исфараи Тоҷикистон ва Бодканди Қирғизистон баъд аз зӯҳри 13-уми март оғоз шуд. Ҳодиса баъди он сар зад, ки сокинони Тоҷикистон бо идомаи сохтмони роҳе дар нуқтаи ба гуфтаи онҳо баҳсии марзӣ бо Қирғизистон мухолифат карданд. Қитъае роҳе, ки сохтмонаш боиси моҷаро шуд, дар ҳудудҳои марзии деҳаи Хоҷа Аъло воқеъ буда, сокинони ҳарду кишвар ин ҳудудҳоро порае аз қаламрави худ медонанд.

Шабакаи аввал филми "бачабозӣ"-и Майкл Ҷексонро аз намоиш бардошт

Ҳунарнамоии Майкл Ҷексон дар Сингапур.31 август, 1993

Шабкаи аввали телевизиони Русия филми мустанади "Тарки Неверланд"-ро, ки дар бораи робитаҳои маҳрамонаи Макл Ҷексон бо кӯдакон ҳикоят мекунад, аз намоиш бардошт. Дар ин бора якчанд нашрияи Русия бо ишора ба манбаҳои худ хабар доданд.

Манбаи "Радио Свобода" дар навбати худ, ин хабарро таъид ё такзиб накард, вале гуфт, ки мавқеи расмии Шабакаи аввалро дар ҳолати зарурӣ дафтари матбуоти пешниҳод мекунад.

Филми мустанади иборат аз ду бахш бо номи "Тарки Неверленд", ки бо дархости шабакаи амрикоии HBO таҳия шуда, дар худи ИМА ҷанҷолбарангез шуд, бояд шоми 15-16-и март дар шабакаи аввал ба намоиш медаромад.

Пахши филм дар ин шабакаро аввалин шуда коргардон ва муҷрии телевизиони "Дожд" Михаил Козирев хабар дод. Ӯ гуфт, ки " раҳбарияти Шабакаи аввал ҳарду бахши филмро бо суръати кайҳонӣ тарҷума карда, охири ҳафта ба намоиш мегузоранд. Козирев ҳамчунин вокуниши тамошобинонро пешгӯӣ кард, ки "даст аз Майкл Ҷексон бардоред!" ва "чаро мо бояд ба ин бовар кунем?" хоҳад буд. "Ҳамаи ин ба хотири "пиар" ва ҳарисӣ аст,- афзӯд ӯ.

Нахустнамоиши "Тарки Неверленд" аввали сол дар фестивали синамои "Сандэнс" сурат гирифт ва HBO пахши филмро аввали моҳи март ба роҳ монд. "Неверленд" номи мазрааи Майкл Ҷексон аст, ки кӯдакони зиёд дар он меҳмон мешуданд.

Дар филми мустанад ду мард, Уэйд Робсон ва Ҷеймс Сейчак дар тӯли се соат бо тамоми ҷузъиёташ дар бораи чӣ тавр Майкл Ҷексон ба онҳо дастдарозӣ кард, қисса мекунанд. Он замон Робсон 7 сол дошт ва Сейфчак 10-сола буд. Волидони онҳо то андозае шефтаи овозхон буданд, ки бовар дошатнд, Ҷексон ба онҳо ҳунарҳои саҳнавиро меомӯзад.

Филми "Тарки Неверденд" ҳаводорони Майкл Ҷексон ва наздикони ӯро нороҳат кард. Ба гуфтаи хонаводаи султони поп, Робсон ва Сефчак дар гузашта таҳти савганд гуфта буданд, ки дастдарозие аз тарафи Ҷексон вуҷуд надошт. Наздикони Ҷексон мегӯянд ин ду нафар ҳануӯз соли 2009, баъди марги овозхон барои ҷубронпулӣ ба додгоҳ муроҷиат карданд, аммо додгоҳ ин даъворо рад кард.

Майкл Ҷексон бори аввал соли 1993 ба озори ҷинсии кӯдакон муттаҳам шуд. Он замон дар заминаи шикояти падари як навраси 13- сола Ҷордан Чандлер пулис тафтишот бурд. Аммо Чандлер баъди марги овозхон гуфт, ки ӯро барои пул тӯҳмат карда буд.

Соли 2002 овозхон дубора мавриди иттиҳоми "бачабозӣ" қарор гирифт. Ин бор сухан аз боби дастдарозӣ ба бачаи 13-сола Гэвин Арвизо буд. Аз рӯи ин парванда пулис хонаи Майкл Ҷексонро кофтукоб ва ҳатто ӯро боздошт кард. Аммо ӯ баъдан бо вазиқа озод шуд. Аъзои мунсифа дар додгоҳ гуфтанд, ки барои иттиҳом далели кофӣ вуҷуд надорад ва Ҷексон бегуноҳ эътироф шуд.

Ҳоло маълум нест, ки чаро Шабакаи аввали телевизиони Русия аз нашри филми мустанад худдорӣ кардааст.

Зоиров дар ҷустуҷӯи Ҷозиба: "Ин саг маро ду бор аз марг наҷот додааст". ВИДЕО

Ҷозиба 10 март дуздида шуд ва то ҳол нопайдо аст

Раҳматулло Зоиров, раиси Ҳизби сотсиал-демократи Тоҷикистон мегӯяд, баъди эълони мукофот барои пайдо кардани сагаш даҳҳо нафар ӯро таънаву маломат кардаанд, ки чаро барои як ҷонвар чунин ҳаёҳу бардошт. Раҳматулло Зоиров дар муроҷиатномае дар Фейсбук гуфтааст, ки азбаски сагаш бо номи Ҷозибаро аз хурдӣ бузург карда буд, ин ҷонвар мисли падару модар ва дӯсту бародараш ҳаст.

Ҷоиза барои маълумот дар бораи саги Раҳматулло Зоиров
лутфан мунтазир бошед

Феълан кор намекунад

0:00 0:01:31 0:00

Раҳматулло Зойиров навиштааст, сагаш ҳатто ду маротиба ӯро аз марг наҷот додааст ва то кунун ҳеҷ яке аз сокинони маҳалли зисташонро ҳам озор надодааст. Раҳматулло Зойиров навиштааст, ки бо ин саг худро бахтиёр меҳисобид. Саги раиси Ҳизби сотсиал демократи Тоҷикистон ба гуфтаи худаш шаби 10-уми март аз хонааш рабудаанд ва ҷустуҷуҳои зиёд натиҷае надодаанд. Раҳматулло Зоиров барои пайдо кардани ӯ 1500 сомонӣ подош таъйин кардааст.

Октябри соли 2017 Зоиров дар кӯча мавриди ҳамлаи афроди ношиносе қарор гирифт. Ӯ баъдан гуфт, ки ҳамин Ҷозиба буд, ки ҳамлагаронро тарсон ва онҳо натавонистанд ба ӯ осеби бештар расонанд
Октябри соли 2017 Зоиров дар кӯча мавриди ҳамлаи афроди ношиносе қарор гирифт. Ӯ баъдан гуфт, ки ҳамин Ҷозиба буд, ки ҳамлагаронро тарсон ва онҳо натавонистанд ба ӯ осеби бештар расонанд

Ҷозиба аз зоти овчаркаи осиёимиёнагӣ буда 27 моҳ дорад ва аз якмоҳагӣ дар тарбияи Зоиров буд.

Маҳмурод Одинаев, яке дӯстони Зоиров, ки дар ҷустуҷӯи саг ба ӯ кумак мекунад, рӯзи 14-уми март дар суҳбат бо Радиои Озодӣ дар ин робита гуфт:

“Бечора устод аз шаб то саҳар дар ҷустуҷӯи саг аст. Ӯ хислати нарме дорад ва бо сагаш унс гирифта буд. Онро аз хурдӣ парвариш кардааст. Ин саг ёвару посбонаш буд. Ҳар гоҳе бо ин саг ба кӯча мебаромад, касе ба ӯ наздик шуда наметавонист".

Дар як мусоҳибаи Радиои Озодӣ бо Р.Зоиров моҳи феврал Ҷозиба дар рӯи ҳавлӣ бозӣ мекард
Дар як мусоҳибаи Радиои Озодӣ бо Р.Зоиров моҳи феврал Ҷозиба дар рӯи ҳавлӣ бозӣ мекард

Ду талабаи пешин дар ҳамла ба мактаби Бразилия 8 нафарро куштанд

Саҳнаи кӯмак Кӯмак ба навресе, ки дар ҳамлаи мусаллаҳона BRAZIL -- A teenager who was injured during a shooting inside the Raul Brasil State School, is carried on a gurney into a hospital, in Suzano, March 13, 2019

Ду талабаи пешини мактабе дар Бразилия, наздикиҳои Сан-Паулу, ки дар чеҳраҳояшон ниқоб доштанд, аз силоҳ оташ кушода, 7 талаба ва кормандони мактабро куштанд ва чандин тани дигарро захмӣ карданд,- мегӯянд мақомоти Бразилия.

Сарҳанги пулис Марсело Сейлс гуфт, ду нафаре, ки субҳи 13 март ба мактаб ҳамла кард бо таппонча, корду табари хурд ви коктейли молотов мусаллаҳ буданд. Ба гуфтаи мақомдори пулис ин ду нафар ҳамларо дар ҳавлии мактаб пиёда карда, сипас ба қисмати дигари мактаб рафтанд ва як нафари онҳо нахуст ба сӯи шарикаш оташ кушод ва сипас худашро парронд.

Мақомот ҳамлагаронро Гулермо Тауччи Монтерои 17-сола ва Энрике де Кастрои 25 сола шиносӣ карданд, аммо ангезаи ҳамла то ҳол номаълум боқӣ мондааст. Модари навраси 17-сола иддао кард, ки писараш дар мактаб мавриди озору азият қарор дошт.

Дар ин ҳамла панҷ талабаи аз 15 то 17-сола ва ду мақомдори 38 ва 59-сола кушта шуданд. Мақомот мегӯянд, соҳиби 51-солаи хадамоти мошиншӯӣ, ки қабл аз ворид шудани ҳамлагарон ба мактаб ҳадафи тир қарор гирифт, даргузашт. 11 нафари дигар захмӣ шуданд.

Икромов гуфт, ки чаро натавонист вожаи "ҳамҷинсгароӣ"-ро талаффуз кунад. ВИДЕО

Тозабек Икромов

Тозабек Икромов, вакили порлумони Қирғизистон шарҳ дод, ки чаро натавонист, вожаи "ҳамҷинсгароӣ"-ро дар ҷаласаи порлумон талаффуз кунад.

"Бархе аз рӯзноманигорон қисме аз суханронии дирӯзии маро дар бораи ҳамҷинсгароён қайчӣ ва аз ҳар зовия нашр карданд. Бале, ман иштибоҳ кардам. Ҳангоми баҳсу баррасиҳо ман эҳсосотамро идора карда натавонистам ва ин вожаро нодуруст талаффуз кардам. Агар дар пойтахти кишвар чорабиние зидди арзишҳои мардуми мо барпо шавад ва бархе аз ҳамкорони мо аз он ҳимоят кунанд, ман наметавонам ба хашм наоям. Аз ҳамин хотир ман эҳсосамро натавонистам, идора кунам. Ба илова, ин вожаест, ки як ҷавонмард набояд талаффуз кунад", - шарҳ дод вай.

Дар шаҳри Бишкеки Қирғизистон 8 март дар робита ба ҳуқуқи занон роҳпаймоӣ баргузор шуд. Бархе аз ширкатдорони роҳпаймоӣ дар даст шиорҳои ҳамҷинсгароёна доштанд, ки боиси эътирози сокинон шуд.

Порлумони он кишвар рӯзи 13 март гузориши КДАМ ва ВКД Қирғизистонро дар бораи созмондиҳандагон ва ҳадафи роҳпаймоӣ шунид. Дар он ҷаласа вакили порлумон Тозабек Икромов натавонист вожаи «гомосексуализм»" (ҳамҷинсгароӣ)-ро такрор кунад ва мавриди танқиди корбарони шабакаҳои иҷтимоӣ қарор гирифт.

Домоди Сергей Шойгу муовини додстони кулли Русия таъин шуд

Владимир Путин ва Сергей Шойгу

Шӯрои федератсияи Русия дар ҷаласаи рӯзи чоршанбе барои додситони кулл Юрий Чайка муовини нав таъин кард. Ин мақомро Алексей Захаров - ҳамсари духтари бузурги вазири дифоъ Сергей Шойгу соҳиб шуд.

Номзадии Захаровро барои баррасӣ дар палати борлоии порлумон, ки зинаи ниҳоии тасдиқи номзадҳост, президенти Русия Владимир Путин пешниҳод кард. Захаров то ин вақт додситони вилояти Маскав буд.

Ба навиштаи нашрияи "Коммерсант", Алексей Захаров дар ин мақом ба ҳавзаи федеролии Шимолу Ғарбӣ назорат мекунад.

Моҳи октябри соли 2018 муовини додситони кулли Русия Саак Карапетян дар суқути чархбол ҳалок шуд. Баъди як моҳи ин ҳодиса ду муовини додситони кулл аз мақом истеъфо доданд. Ҷои ду муовини Юрий Чайка ҳоло ҳам холӣ аст.

ИМА Русия ва Чинро барои нақзи ҳуқуқи инсон танқид кард

Майк Помпео

Ийолоти Муттаҳидаи Амрико дар гузориши солонаи вазъи ҳуқуқи башар дар ҷаҳон ба вазъи уйғурҳои мусулмон дар минтақаи Шинҷони Чин тамаркуз кард. Гузориш рӯзи гузашта аз ҷониби Котиби давлатии ИМА Майк Помпео муаррифӣ шуд.

ИМА, Ғарб ва созмонҳои ҳомии ҳуқуқ бар инанд, ки Чин бо боздошту нигаҳдории уйғурҳо ва ақаллиятҳои дигари мусулмон дар марказҳои махсус маъракаи "покорӣ"-и диниву нажодиеро ба роҳ мондааст.

Вале Пекин иддао дорад, ки барномаи мубориза зидди ифротгароиро иҷро мекунад. Чин марказҳои мазкурро омӯзишгоҳҳое меномад, ки дар онҳо сокинон забони чинӣ ва қонунҳои он кишварро меомӯзанд.

Пештар Помпео хабар дода буд, Вашингтон имкони таҳрим бар зидди мансабдорони Чин барои нақзи ҳуқуқи уйғурҳоро баррасӣ мекунад.

Дар мавриди Русия гуфта шудааст, ки мухолифони рус моҳи марти соли гузашта дар интихоботи президентӣ имкон надоштанд номзади худро ба мақоми раҳбарии он кишвар пешниҳод кунанд.

Департаменти давлатии ИМА вазъи ҳуқуқи инсонро дар Қрими ишғолшуда низ бад арзёбӣ кард ва таҷовузкориҳои Русияро дар шарқи Украина зикр намуд. Департаменти давлатии ИМА аз ҷумла гуфтааст, ки мақомоти Русия шаҳрвандони Украинаро дар Донбасс боздошт мекунанд ва ба додгоҳ мекашанд.

Ҳаракати нақлиёти Узбекистон ба Чин тавассути Тоҷикистон

Шоҳроҳи ноҳияи Айнии Тоҷикистон

Мақомоти Узбекистон тасмим доранд, ки равуои нақлиёт ба Чинро бо убури қаламрави Тоҷикистон ба роҳ монанд. Президенти Узбекистон Шавкат Мирзиёев дар ин бора қарор қабл кардааст.

Чораҳои тақвияти иқтидори транзитии бахши нақлиёти Узбекистон тасдиқ шудааст. "Равуои санҷишии нақлиёт дар масири Узбекистон-Тоҷикистон-Чин ба роҳ монда мешавад", - омадааст дар "харитаи роҳ".

Як намояндаи вазорати нақлиёти Узбекистон хабар дод, ки равуои санҷишӣ бояд имконоти ҳамлу нақли коло аз Узбекистон ба Тоҷикистону Чинро муайян кунад.

Раҳбари пешини ситоди интихоботии Трамп ба 7,5 сол зиндонӣ шуд

Пол Манафорт

Додгоҳи Вашингтон раҳбари пешини ситоди интихоботии президенти ИМА Пол Манафортро дар созиши зидди Амрико ва ҳимояти ғайриқонунии манфиатҳои президенти пешини Украина Виктор Янукович айбдор ва ба муддати 3,5 сол аз озодӣ маҳрум кард.

Манафорт ҳамчунин дар додани баёноти дуруғ ба додситони махсус Роберт Мюллер ва тарсондани шоҳидон дар доираи парвандаи дахолати Русия ба интихоботи президентии ИМА айбдор шуд. Ӯ дар додгоҳ барои амалҳояш узр пурсида, дархости афв кард.

Додгоҳи Вирҷиния низ ҳафтаи гузашта Пол Манафортро ба ҷиноятҳои молӣ ва нақзи қонунҳои андоз ҳангоми мушовири сиёсӣ буданаш дар Украина айбдор ва 4 сол зиндонӣ кард.

Нақшаи даромадҳои ғайриқонунии Манафорт дар натиҷаи санҷишҳои додситони махсус Мюллер ошкор шуданд. Манафорт гуноҳро ба гардан гирифт. Дар ИМА мегӯянд, аз эҳтимол дур нест, ки президент Доналд Трамп мушовири пешини худро афв кунад. Дар Кохи сафед гуфтанд, "президент вақте ки омода шуд, тасмим хоҳад гирифт".

Боздошти ронандае, ки видеои баҳсаш бо нозири БДА ҷанҷолӣ шуд

Акс аз навори баҳси ронанда бо нозири БДА дар Душанбе

Мақомоти интизомии Тоҷикистон ба зидди як сокини ноҳияи Кушониёни вилояти Хатлон “барои таҳқири ду нозири роҳ” парвандаи ҷиноӣ боз кардааст.

Дафтари матбуоти раёсати умури дохилии Душанбе рӯзи 13-уми март бо нашри баёнияи расмӣ гуфт, Сироҷиддин Наҷимови 39-сола баъди он дастгир шуд, ки видеои “таҳқир ва дашноми ӯ ба унвони нозирони роҳ” дар шабакаҳои иҷтимоӣ баҳси зиёдро барангехт.

Дар ин видео, ки дар шабакаҳои “Однокласнники” ва “Фейсбук” нашр шудааст, дида мешавад, чӣ гуна Сироҷиддин Наҷимов бо як нозири Идораи Бозрасии давлатии Автомобилӣ вориди баҳс мешавад.

Назари вакили мудофеъ ва пайвандони Сироҷиддин Наҷимов дастрас нест. Маълум нест, баҳси ӯ бо нозири БДА ба сари чӣ будааст.

Мақомоти Раёсати умури дохилии Душанбе мегӯянд, ки ронандаи “Тангем” ба талаботи қонунии кормандони милиса итоат накарда, баръакс, онҳоро дашному таҳқир намудааст. Ҳодиса рӯзи 19-уми феврали имсол дар шаҳри Душанбе рух додааст ва видеоро низ ҳамон рӯз дар “Одноклассники” гузоштаанд.

Додситонии ноҳияи Исмоили Сомонии пойтахт барои чунин рафтор, ки ҷинояти сахт ба ҳисоб меравад, рӯзи 27-уми феврали имсол ба зидди Сироҷиддин Наҷимов бо иттиҳоми таҳқири намояндаи ҳокимият парвандаи ҷиноӣ оғоз кард.

Барои ин гуноҳ дар Тоҷикистон ҷаримаи бузург ва беш аз як соли зиндон ҷазо муқаррар шудааст.

Айни замон дар Тоҷикистон шикоят аз кори нозирони роҳ бисёр зиёд аст ва онҳоро ба ришвахорӣ муттаҳам мекунанд ва мегӯянд, онҳо бо ҳар баҳона аз ронандагон пул меситонанд. Дар зери видеои ин ҷанҷол низ аксаран нозирони роҳ танқид шудаанд.

Аҳолии Тоҷикистон дертар аз аҳолии Русия ва Украина пир мешавад

Сокинони Русия зудтар аз бошандагони кишварҳои дигари дунё пир мешаванд. Аз пажуҳиши гурӯҳи байналмилалии донишмандон, ки дар маҷаллаи бонуфузи тиббии Lancet нашр шуд, чунин натиҷа ҳосил мешавад. Муаллифони таҳқиқот суръати рушди бемориҳои марбут ба солмандиро дар байни аҳолии кишварҳои мухталиф омӯхтанд.

Русиягиҳо дар муқоиса бо аҳолии 159 кишвари ҷаҳон зудтар пир мешаванд. Ин таҳқиқот дар навбати аввал таваҷҷӯҳи нашрияи The Bell-ро ба худ кашид.

Муаллифони пажуҳиш суръати пиршавӣ аҳолиро бо усули худ таҳқиқ карданд. Онҳо синни миёнаро ҳисоб карданд, ки одамон акнун ба бемориҳои хоси мардуми солманд гирифтор мешаванд. Ба ин феҳраст 92 ташхис, аз ҷумла бемориҳои Алзоймер, Паркинсон, фишори хун ва глаукома ворид шуданд.

Синни миёна барои рушди бемориҳои марбут ба солмандӣ дар ҷаҳон 65-солагӣ муаян шудааст, аммо дар Русия ин бемориҳо сар аз синни 59 рушд мекунанд,- мегӯянд муаллифони таҳқиқот. Ин син поёнтар аз синни бознишастагӣ ва ҳамчунин поёнтар аз синни пиршавӣ дар Беларусия, Ҳиндустон, Индонезия, Африқои Ҷанубӣ ва Эфиопия аст.

Аз ҳама дертар, ба гуфтаи гурӯҳи таҳқиқотӣ, аҳолии Япония (76,1), Шветсария (76,1), Фаронса (76) ва Сингапур (76) ба пирӣ мерасад. Аз ҳама зудтар аҳолии Папуа-Гвинеяи Нав (45,6), Ҷазираҳои Маршалл (51), ва Афғонистон (51,6) пир мешавад.

Пирӣ дар Русия дар синни 59 солагӣ фаро мерасад, ки болотар синни пиршавӣ дар Украина (57), Узбекистон (58) ва Озарбойҷон (58) аст. Аҳолии Тоҷикистон ва Гурҷистон дар синни 60-солагӣ ва Қирғизистон, Латвия, Литва дар 61 солагӣ солманд мешаванд. Синни пиршавии аҳолии Эстония 66-солагӣ муайян шудааст.

Нигаронӣ аз ҳалокати кӯдакон баъди фурӯрезии биное дар Нигерия

Саҳнаи наҷоти кӯдакон аз зери оворҳо

Гурӯҳҳои наҷот дар Лагос - пойтахти тиҷоратии Нигерия, баъди фурӯпошии як бинои сеошёна, ки мактаби ибтидоӣ низ дар он ҷойгир буд, ба амалиёт оғоз карданд. Фоҷеа рӯзи 13 март дар ҳоле рух дод, ки кӯдакон дар синфхонаҳо буданд ва ҳоло эҳтимоли хисороти ҷонӣ дар байни онҳо боиси нигаронӣ шудааст.

То ин соат дар бораи хисороти ҷонӣ хабаре дастрас нест.

Сокинони маҳаллӣ мегӯянд, ки наҷотдиҳандагон 7 кӯдакро аз зери оворҳо берун оварданд. Бар пояи хабарҳо, дар ин бинои сеошёна якчанд хонаи зист низ мавҷуд буд.

Фурӯпошии биноҳо дар Нигерия як мушкили умумӣ аст, зеро масолеҳи сохтмонӣ дар бисёр маврид бесифат буда, қоидаҳои сохтмонӣ риоя намешаванд,- мегӯянд хабарнигорон.

Соли 2016 бар асари фурӯ рафтани боми калисое дар ҷануби Нигерия беш аз 100 нафар қурбон шуд.

Ёфтҳои бештар

Гузоришҳои видеоӣ

"Бачаҳоро аз дохили ҷойгаҳашон гирифта бурданд"
лутфан мунтазир бошед

Феълан кор намекунад

0:00 0:04:12 0:00
XS
SM
MD
LG