Пайвандҳои дастрасӣ

Хабари нав

Хабарҳо

Толибон ба ихроҷи нирӯҳои хориҷӣ аз Афғонистон даъват карданд

Намояндагони Толибон ва ҳайате ба раҳбарии раиси ҷумҳурии собиқи Афғонистон Ҳомиди Карзай дар ҷараёни рӯзи дуюми музокирот дар шаҳри Маскав ба ихроҷи нирӯҳои хориҷӣ аз хоки ин кишвар даъват карданд. Ин музокирот бо вуҷуди ҳузур надоштани намояндагони ҳукумати Афғонистон аз ҷониби бархе ҳамчун “музокироти байнихудии” афғонҳо арзёбӣ шуд. Ин нишаст аз ҷониби дафтари президенти Афғонистон Ашраф Ғанӣ интиқод шуд.

Музокироти Маскав дар ҳоле баргузор мешавад, ки дар шаҳри Доҳа, пойтахти Имороти Муттаҳидаи Арабӣ музокироти сулҳ ба хотири хатми ҷанги 17-сола дар ин кишвар дар ҳоли анҷомёбӣ аст, бо ин вуҷуд, ки Толибон ҳамоно аз мулоқоти мустақим бо намояндагони ҳукумати Афғонистон худдорӣ мекунанд.

Президенти ИМА Доналд Трамп дар ҷараёни суханрониаш дар Конгресс шоми 5 феврал ин музокиротро “созанда” номид ва дар робита бо хатми ҷанги тӯлонӣ мӯҳтотона изҳори назар кард. 6 феврал Толибон иддао карданд, ки Вашингтон дар ҷараёни музокирот дар Доҳа розӣ шуданд, ки то охири апрел нисфи нирӯҳои заминии худро аз хоки Афғонистон берун кашанд ва ин ҷараён гӯё шурӯъ шудааст. Абдулло Салом Ҳанафӣ, муовини раиси дафтари сиёсии Толибон дар Доҳа дар сӯҳбат бо хабарнигорон дар Маскав гуфт, ки “амрикоиҳо розӣ шуданд, ки нисфи нирӯҳояшонро билофосила берун кашанд. Берункашӣ 1 феврал шурӯъ шуда то охири апрел идома меёбад”, гуфт ӯ.

Янукович: "Маро аҳмақ карда партофтанд"

Виктор Янукович, президенти собиқи Украина, намояндагони Иттиҳодияи Аврупоро гунаҳкор кард, ки моҳи феврали соли 2014 ӯро фиреб додаанд. Янукович рӯзи чаҳоршанбе гуфт, аврупоиҳо ӯ водор намуданд, ки бо мухолифон созиш кунад, "вале баъдан аз мақом барканор шудани ӯро қонунӣ арзёбӣ намуданд".

"Маро аҳмақ карда партофтанд", - гуфт ӯ дар нишасти хабарӣ дар Маскав.

Раиси ҷумҳури пешини Украина гуфт, чанд рӯз қабл аз як муолиҷаи тиббӣ аз хориҷа ба Русия баргашт. Дар ин муддат дар ғайбаш дар додгоҳи Киев Януковичро бар асоси моддаҳои "хиёнати давлатӣ" ба 13 соли зиндон маҳкум карданд.

Ӯ гуфт, бо вуҷуди гунаҳкор эълон шудан, исми ӯ дар феҳристи афроди мавриди ҷустуҷӯи полиси байналмилалӣ - Интерпол нест ва метавонад ба ҳар кишвар сафар кунад.

Янукович ҳукумати Украинаро мавриди интиқод қарор дод ва президенти кунунӣ Петро Порошенкоро муттаҳам кард, ки намехоҳад дар кишвар сулҳ барқарор шавад. Ба қавли Виктор Янукович, Украина "макони ҷангу бесуботӣ" шудааст ва ба ин моҷаро "беихтиёр пои Иттиҳодияи Аврупо, Амрико ва Русия кашида шуд".

Ӯ, инчунин, сиёсати иқтисодии Украинаро интиқод кард ва гуфт, ки панҷ соли охир "сиёҳтарин" давра дар таърихи ин кишвари мустақил буд. Вай истиқлолхоҳии калисои православии Украинаро низ танқид кард.

Ба бовари Янукович, интихоботи президентии соли 2019 дар Украина одилона ва озод нахоҳад буд.

Виктор Янукович моҳи феврали соли 2014 дар авҷи эътирозҳои хиёбонӣ аз Киев фирор кард ва баъдан бо қарори Рада ё порлумон, аз қудрат барканор шуд. Тамоми ин солҳо ӯ дар Русия зиндагӣ мекунад ва мегӯяд, ки барканориаш ғайриқонунӣ буд.

Ҳукми додгоҳи Киев рӯзи 24-уми январи имсол содир шуд. Дар шарҳи қарори додгоҳ гуфта шуд, амалҳои Янукович боис ба "ғасби Қрим аз ҷониби Русия, шурӯи ҷанг дар Донбасс ва хисороти зиёд барои Украина шуд".

Мақомоти Қазоқистон: ҳалокати 5 кӯдак дар сӯхтор натиҷаи "хатои наҷотбахшон" буд. ВИДЕО

Дар шаҳри Остона 5 феврал ҷасади панҷ хоҳареро ба хок супурданд, ки шаби 4 феврал дар натиҷаи оташ гирифтани як кулбаи муваққатӣ дар маҳаллаи "Коктал-1"-и ноҳияи Сариарк ба ҳалокат расиданд.

Дар ҷанозаи кӯдакон одамони зиёде иштирок доштанд. Бештари онҳо суол мекарданд, ки чаро шаҳрдории пойтахти Қазоқистон ба ин оилаи серфарзанд хона надод ва чаро волидони кӯдакон маҷбур буданд, шабона кӯдаконро танҳо гузошта, кор кунанд.

Сӯхтор тахминан соатҳои сеи шаб рух додааст. Падари кӯдакон корманди барқ буда, он шаб ба маҳалли кораш даъват шудааст. Модари онҳо низ се рӯз пеш дар як корхонаи маҳсулоти плостикӣ ба кор даромадааст. Ин хонаводаи серфарзанд сахт ба маблағ ниёз дошта, мақомот ҳатто онҳоро бо сабабҳои номаълум дар навбати хона нагузоштаанд.

Ҳамсояҳои қурбониён мегӯянд, волидони кӯдакон борҳо аз мақомот дархости хона карда буданд. Вале мақомот мегӯянд, ин хонавода чунин дархост накарда буд. Сухангӯи шаҳрдории Остона Элмира Жургенбоева дар нишасти хабарӣ тасдиқ кард, ки оилаи мазкур дар навбати хона қарор надошт ва танҳо ҳамчун оилаи серфарзанд аз давлат дар ҳаҷми 30 доллар кумакпулӣ мегирифт.

"Шаҳрдор ва кормандони хадамоти иҷтимоӣ аз вазъи хонавода хабар надоштанд. Шояд танҳо дар мактаб медонистанд", - афзуд Жургенбоева.

Ба иттилои сомонаи шаҳрдории Остона, бештари сӯхторҳо (беш аз 50%) дар пойтахти Қазоқистон дар маҳаллаҳои аҳолинишин ва зиёда аз 65%-и онҳо дар манзилҳои хусусӣ рух медиҳанд.

Хоксупории 5 тифли қурбонии сӯхтор дар Остона
лутфан мунтазир бошед

Феълан кор намекунад

0:00 0:02:12 0:00

Парвандаи Сафар Исҳоқов ба Додситонии кул ирсол шуд

Кумитаи амнияти миллии Қирғизистон парвандаи фасодкорӣ ҳангоми бозсозии Маркази гармидиҳии шаҳри Бишкекро ба Додситонии кулли ин кишвар фиристод. Дар ин бора вакили дифои яке аз гумонбарон ва сарвазири пешини Қирғизистон Сафар Исҳоқов хабар дод. Ба гуфтаи вакили дифоъ Нурбек Токтакунов, Додситонии кулли Қирғизистон бояд давоми панҷ рӯз айбномаро тасдиқ ва эълом кунад. Сипас парванда ба додгоҳ ирсол мешавад ва додгоҳ низ дар навбати худ бояд давоми даҳ рӯз нахустин мурофиаро баргузор намояд. Токтакунов изҳор дошт, ки ба иллати камии муҳлат наметавонад бо тамоми маводи парванда ошно шавад, чун он аз 53 ҷилд иборат аст. Кумитаи амнияти Қирғизистон Исҳоқовро 5 июни соли гузашта бо ҷурми фасодкорӣ ҳангоми иҷрои тарҳи "Бозсозии Маркази гармидиҳии Бишкек" дастгир кард. Ӯ дар он айбдор мешавад, ки ҳангоми раҳбари шуъбаи сиёсати хориҷии дастгоҳи президент будан аз манфиатҳои ширкати хориҷӣ ҷонибдорӣ кардааст. Худи Исҳоқов ин гумонро рад мекунад.

Додгоҳи Узбекистон бори нахуст парвандаи марбут ба ҳиҷобро баррасӣ мекунад

Додгоҳи Шайхонтоҳури шаҳри Тошканд рӯзи 5 феврал баррасии шикояти падари як донишомӯзи литсейи Академияи исломии Узбекистонро зидди раҳбарияти таълимгоҳ оғоз кард, ки бо рӯймоли мазҳабӣ омадан ба дарсро манъ намудааст. Ба гуфтаи Абдувоҳид Яъқубов, падари донишомӯзи 17-солаи литсей, ки худ ҳуқуқшинос аст, додгоҳи Шайхонтоҳур баррасии шикояти ӯро ба рӯзи 7 феврал мавқуф гузошт. Яъқубов мегӯяд, пас аз эътирози ӯ додраси парванда иваз карда шудааст.

"Духтари ман ноболиғ аст ва бинобар ин, хостам, аз ҳуқуқҳои ӯ худам ҳимоят кунам. Ба додгоҳ шикоят бурда, бекор кардани қарори дохилии таълимгоҳро талаб кардам, ки омадани донишомӯзонро ба дарс бо рӯймоли исломӣ манъ мекунад. Зеро ин хилофи Конститутсия ва санадҳои байналмилалиест, ки ҳукумати Узбекистон онҳоро имзо кардааст", - изҳор дошт ҳамсуҳбати мо.

Аз аввали соли хониш дасти кам чаҳор донишомӯзи Академияи байналмилалии исломии Тошканд барои ба дарсҳо наомадан ихроҷ шудаанд. Яке аз ин донишҷӯён Луиза Муминҷоноваи 19-сола 5 феврал гуфт, ба далели манъи пӯшидани рӯймоли исломӣ натавонист таҳсилашро идома диҳад. "Ба ман гуфтанд, ки таҳсил ё рӯймолро интихоб кун ва ман рӯймолро интихоб карданд", - афзуд Луиза. Як ёвари ректори Академияи исломии Тошканд тасдиқ кард, ки бо рӯймоли исломӣ ё ҳиҷоб омадан ба дарсҳо манъ шудааст. Ба гуфтаи ӯ, дар деворҳои академия кодекси либоси донишомӯзон возеҳ навишта шудааст ва дар баробари ҳиҷобу рӯймоли исломӣ пӯшидани ҷинсу доманҳои кутоҳ барои духтарон манъ аст.

Толори консерти Остонаро "эътирози худҷӯши модарон" фаро гирифт. ВИДЕО

Садҳо сокини шаҳри Остонаи Қазоқистон, ки аксарашон модарони серфарзанд буданд, рӯзи 6 январ дар маркази Остона ҷамъ омада, беҳсозии шароити зисту зиндагиашонро талаб карданд. Қисме аз онҳо дар толори консерти "Остона" гирди ҳам омаданд.

Мулоқоти шаҳрвандон бо афроди расмӣ ба ҷамъомади худҷӯш табдил шуд. Даҳҳо зан ба саҳна баромада, талабҳояшонро баён карданд. Таъмини манзил, фарогирии кӯдакон дар боғчаҳо, афзоиши кумакҳои моддӣ ва беҳсозии шароити зиндагонӣ - аз талабҳои асосии модарон буд. Бархе аз дигар ҷамъомадагон истеъфои вазири меҳнат ва ҳифзи иҷтимоии аҳолиро талаб карданд.

Ҳокими шаҳри Остона Ермек Амоншоев, ки дар ҷамъомад ҳузур дошт, сокинонро ба эътидол даъват ва ваъда дод, ки талабҳои онҳо "дар асоси қонун" баррасӣ хоҳанд шуд. Намояндагони додситонӣ ва вазорати меҳнату ҳифзи иҷтимоии аҳолӣ низ дар толор ҳузур доштанд.

Модарони серфарзанд ҳамчунин муроҷиаташонро ба президент ва ҳукумати Қазоқистон баён карданд. Дар ин муроҷиат низ беҳсозии шароити зиндагӣ зикр шудааст.

Модарони серфарзанд дар пайи марги 5 кӯдаки як хонавода дар асари сӯхтори рӯзи 4 феврал гирди ҳам омаданд. Дар шаҳри Алматои Қазоқистон рӯзи чаҳоршанбе даҳҳо сокин дар бинои ҳукумати шаҳр ҷамъ шуданд.

Дар Конститутсияи Қазоқистон омадааст, ки "ақди никоҳ ва хонавода, модарӣ, падарӣ ва даврони кӯдакӣ таҳти ҳимояти давлат аст".

Кобули расмӣ ва Толибон барои гуфтугӯи мустақим ба Тошканд даъват шуданд

Вазири умури хориҷии Узбекистон Абдулазиз Комилов ҳукумати Афғонистон ва гуруҳи даҳшатафкани Толибонро барои гуфтугӯи мустақим ба шаҳри Тошканд даъват кард.

Бино ба хабарҳои расмӣ, Комилов ин изҳороти худро дар мулоқот бо намояндаи махсуси дабири кулли СММ, раҳбари Маъмурияти СММ барои мусоидат ба Афғонистон Тадамичӣ Ямамото баён доштааст. Ямамото дар доираи як сафар меҳмони Тошканд аст.

Абдулазиз Комилов изҳор доштааст, ки Узбекистон омодааст, тамоми шароитро барои гуфтугӯи мустақими ҳукумати Афғонистон ва Толибон дар ҳудуди худ фароҳам кунад.

Ба огаҳии Вазорати умури хориҷии Узбекистон, намояндаи СММ аз сиёсати Узбекистон ба раҳбарии президент Шавкат Мирзиёев дар робита ба раванди сулҳи Афғонистон ва барқарорсозии ин кишвар аз нигоҳи иҷтимоиву иқтисодӣ истиқбол кардааст.

Мақомоти Қирғизистон гуфтанд, хабари "бомбгузорӣ"-и фурудгоҳ аз хориҷ фиристода шудааст

Кумитаи давлатии амнияти миллии Қирғизистон (КДАМ) хабари бомбгузорӣ шудани фурудгоҳи "Манас"-ро шарҳ дод.

Ба иттилои ин ниҳод, соати 14:41 дақиқаи 5 феврал ба почтаи электронии яке аз ширкатҳои ҳавопаймоии Қирғизистон дар бораи гузоштани бомб дар яке аз биноҳои фурудгоҳ паём расид. "Гуруҳи навбатдори КДАМ ва ВКД ба ҷои ҳодиса рафтанд. Дар ҷараёни тафтиш ҳеҷ дастгоҳи таркандае пайдо нашуд", - хабар дод КДАМ.

Бино ба иттилои пешакӣ, хабари бомбгузорӣ аз хориҷи Қирғизистон ирсол шудааст.

Мақомоти Қирғизистон мегӯянд, касонеро ҷустуҷӯ доранд, ки хабари бардурӯғи бомбгузориро фиристодаанд.

Додгоҳи Қазоқистон муттаҳами "даъват ба ғасби ҳукумат"-ро сафед кард

Додгоҳи шаҳри Актауи Қазоқистон рӯзи 6 феврал сокини маҳаллӣ - Айгул Акбердиеваи 39-соларо сафед кард, ки дар "даъват ба ғасби ҳукумат" айбдор мешуд. Ин зан дар шабакаҳои иҷтимоӣ дар мукотибаҳои созмони дар Қазоқистон мамнуи "Интихоби демократии Қазоқистон" ширкат кардааст.

Жанар Сундеткалиева, вакили мудофеи Акбердиева гуфт, ки нафари таҳти ҳимояи вай "барои вуҷуд надоштани ҷиноят" сафед карда шуд. Акбердиева айби эълоншударо рад мекунад.

Ҳукми додгоҳии Акбердиева дар ҳоле сурат мегирад, ки дар чандин шаҳри Қазоқистон баъди марги панҷ кӯдаки як хонавода дар таърихи 4 феврал, гирдиҳамоиҳо барпо мешавад. Акбердиева - модари 4 фарзанд дар додгоҳ гуфт, "вазъи иҷтимоии мардум бад аст" ва ба ин далел "аз сиёсатҳои давлат ҳимоят намекунад" ва дар бораи мафҳуми "даъват ба ғасби ҳукумат" танҳо дар додгоҳ огоҳӣ пайдо кард.

Акбердиева гуфт, "ҳаргиз касеро даъват накардааст ва танҳо фикри худро баён доштааст". Додситон аз додгоҳ хоста буд, ки ӯро панҷ сол зиндонӣ кунад, зеро гумони эълоншуда "комил исбот гардидааст".

Баррасии парвандаи Акбердиева ҳанӯз 24 сентябри соли гузашта шуруъ гардида буд. Шавҳари 45-солаи Акберидева - Абловас Ҷумаев бо айни ҳамин айб моҳи сентябр се сол зиндонӣ шуд. Ин зану шавҳар айбномаро сиёсӣ медонанд.

НАТО ва Македония созишномаи таърихии узвиятро имзо карданд

Кишварҳои узви НАТО рӯзи 6 феврал бо Македония як санади аъзогӣ имзо карданд, ки Скопйеро барои пазириш ба узвияти ин паймони низомӣ як қадам наздиктар мекунад. Ин созиш баъди он ҳосил шуд, ки Македония ва Юнон дар баҳси номгузорӣ шудани кишвар ҳама ихтилофҳоро бартараф карданд ва баъди ин муносибатҳои ду кишвар оддӣ шуд.

Вазири хориҷаи Македония Никола Димитров ҳамроҳ бо намояндагони 29 кишвари узви НАТО созишномае имзо кард, ки таҳти раҳбарии дабири кулли ин паймон Йенс Столтенберг дар Брюссел баргузор шуд. Столтенберг баъди ин маросим дар саҳифаи худ дар шабакаи Twitter навишт, ки “имрӯз як рӯзи таърихӣ аст. Ҳамаи кишварҳои узв протоколи узвият бо Македонияро имзо карданд, ки ба минтақа амният ва шукуфоии бештар меорад. Базудӣ қароргоҳи НАТО-ро 30 парчам оро хоҳад дод”.

Македония ва Юнон соли гузашта созишномаи тағйири ном кардани Македонияро ба Ҷумҳурии Македонияи Шимолӣ имзо карданд. Македония гуфт, умедвор аст, ки Юнон кишвари нахустини узви НАТО мешавад, ки протоколи узвиятро тасвиб мекунад ва баъди ин кишвар бо номи наваш номгузорӣ мешавад.

Шурӯъ аз соли 1991 Юнон бо “Македония” номгузорӣ шудани исми кишвари собиқ узви Югославия мухолифат дошт ва мегуфт, ки айни чунин номро як вилояти таърихии Юнон дорад. Ин санад бо номи “Созишномаи Преспа” маъруф шуд, ки ба номи дарёе гузошта шудааст, ки аз марзи ду кишвар мегузарад ва созишнома ҳам соли гузашта дар соҳилҳои ин дарё имзо шуда буд.
Дар Атен раиси маҷлис гуфтааст, ки протокол рӯзи 7 феврал вориди барномаи парлумон мешавад ва рӯзи 8 феврал овоздиҳӣ барпо хоҳад шуд.

Эрон гуфт, "Амрико аз диктатору қассобу тундравҳо" ҳимоят мекунад

Вазири умури хориҷии Эрон Муҳаммад Ҷавод Зариф дар вокуниш ба интиқоди президенти Амрико Доналд Трамп гуфт, ки ИМА “диктатор, қассоб ва тундравҳо”-ро дар Ховари Миёна ҳимоят мекунад. Бо ин изҳороташ, ки дар шабакаи Twitter нашр шуд, Зариф рӯзи 6 феврал ба суханронии президенти Амрико дар Конгресс вокуниш нишон дод. Баъди он ки моҳи маи порсол Трамп ба таври якҷониба аз созиши соли 2015-и ҳастаӣ бо Эрон берун шуду дубора таҳримҳои иқтисодиро болои ин кишвар таҳмил кард, таниш дар равобити Теҳрону Вашингтон боло гирифт.

Дар саҳифаи Twitter-аш вазири хориҷаи Ҷумҳурии Исломӣ навишт, ки “адовати ИМА боиси пуштибонӣ аз диктаторҳо, қассобону тундравҳо шуд, ки дар минтақа танҳо харобӣ меоранд”. Трамп дар суханронии худ дар Конгресс аз қарори берун шудан аз созиши ҳастаӣ ҳимоят кард. Трамп Эронро “сармоягузори калони терроризм дар ҷаҳон” номид ва гуфт, ки маъмурияти Амрико барои муқобила бо ин таҳдидҳо қотеона амал мекунад. Вале Зариф гуфт, ки Эрон, аз ҷумла ҷомеаи яҳудиҳои сокини ин кишвар баъди инқилоби исломии соли 1979 “40 соли пешрафташ”-ро таҷлил мекунад.

Парвандаи дувуми раиси “Умед-88” ҳам ба додгоҳ рафт. ВИДЕО

Мақомоти Додгоҳи олии Тоҷикистон гуфтанд, ки алайҳи раиси ширкати “Умед-88” Раҷабалӣ Одинаев боз як парвандаи ҷиноӣ дар дасти баррасӣ аст. Одинаев моҳи сентябри соли 2018 бо иттиҳоми дуздии моликияти давлатӣ ва исрофкорӣ ба 24 соли зиндон маҳкум шуда буд.

Шермуҳаммади Шоҳиён, раиси Додгоҳи олии Тоҷикистон, рӯзи 4-уми феврал дар нишасти матбуотӣ гуфт, парвандаи дувуми Одинаев марбут ба қарзҳои бонкиест, ки то ҳол баргардонда нашудаанд.

Парвандаи нав алайҳи ширкати замоне муваффақ ва овозадор дар ҳолест, ки хешовандони Раҷабалӣ Одинаев моҳи октябри соли 2018 бозбинии ҳукми аввалаи ӯро хоста буданд. Онҳо гуфтанд, дар сурати озод шудани раиси "Умед-88", имкони бозгардони қарзҳои давлат вуҷуд дорад.

Вале рӯзи рузи 6-уми январ Мавлуда Қаландарзода, раиси Додгоҳи олии иқтисодии Тоҷикистон гуфт, "ҳукми раиси ширкати "Умед-88" қувваи қонунӣ гирифта, алакай мавриди иҷро қарор дорад."

Боз як парванда алайҳи раиси "Умед-88" дар додгоҳ
лутфан мунтазир бошед

Феълан кор намекунад

0:00 0:02:05 0:00

Дар Додгоҳи олии Тоҷикистон гуфтанд, парвандаи дувуми Раҷабалӣ Одинаев баъд аз эълони ҳукми аввалии ӯ боз шуда, муҳри махфӣ надорад. Ҳоло маълум нест, ки худи Одинаев ба ин парванда ва иттиҳоми нав чӣ назар дорад.

Раҷабалӣ Одинаев аз моҳи октябри соли 2017 дар боздошт аст. Вай ба сабаби напардохтани 171 миллион сомонӣ пули сохтмони нерӯгоҳи Роғун, ки Вазорати молия соли 2015 ҳамчун қарз ба ширкати зери раҳбарии ӯ дода буд, айбдор шуд.

Ду тоҷик дар Русия ба ҳукми тӯлонии зиндон маҳкум шуданд

Идораи полисе дар Уфаи Бошқирдистон

Додгоҳи олии Тоҷикистон ду шаҳрванди ин кишварро барои қатли соҳиби маркази савдои "Универсал”-и шаҳри Уфаи Русия Марат Куптсов ва захмӣ кардани ҳамсари ӯ аз 15 то 25 сол зиндонӣ кард.

Додситонии кулли Тоҷикистон рӯзи 6 феврал дар вебсайти расмиаш хабар дод, ки Эҷод Носиров ва Алишер Нуриддинов, шаҳрвандони Тоҷикистон рӯзи 23 марти соли 2016 бар ивази як миллион рубл дар Бошқирдистон ба соҳибкор ва ҳамсараш бо яроқи оташфишон ҳамла намуданд. Мавқеи худи мазҳумшудаҳо ба ин ҳукм ва иттиҳоме, ки бар асоси он зиндонӣ шуданд, нашр намешавад.

Мақомоти Русия қаблан гуфта буданд, ки кушторро Ирина Куптсова, яке аз пайвандони Марат Куптсов фармоиш додааст. Ӯ аз ин соҳибкор якуним миллион рубл қарздор буд, вале ба ҷои додани қарз ба як миллион рубл аз киллерҳои тоҷик дархост кард, ки ӯро бикушанд. Ин соҳибкор 23 марти соли 2016 дар назди хонааш ҳангоми фаромадан аз мошин кушта шуд.

Ба гуфтаи Додситонии кулли Тоҷикистон, ҳадаф куштани тоҷир буд, вале ба хотири ошкор нашудани ҷиноят ҳамсари ӯ низ мавриди ҳамла қарор гирифт. Ӯ дар беморхона наҷот ёфт.

Ин ду нафар пас аз содир кардани ҷиноят ба Тоҷикистон фирор кардаанд ва, ба гуфтаи мақомот, моҳи июли соли 2018 боздошт шуданд.

“Дар инҷо Э. Носиров касби пеша намудааш, яъне ҷинояткориро идома дода, 16 июли соли 2018 дар шаҳри Душанбе ғайриқонунӣ ба баҳси шаҳрвандон Абдуллоев А. ва Раҳимов П. ҳамроҳ шуда, барои ситондани 600 доллари ИМА П. Раҳимовро таҳдиди куштан намудааст”- навиштааст Додситонии кули Тоҷикистон.

Ин ду нафар ба куштор ва роҳзанӣ муттаҳам шуда, рӯзи 21-уми декабри соли 2018 ҳукм гирифтанд.

Давлатзода: "Комиссияи вижа масъалаи бозкушоии масҷидҳоро баррасӣ мекунад"

Кумита оид ба корҳои дин, танзими анъана ва ҷашну маросимҳои Тоҷикистон мегӯяд, ки комиссияи вижа масъалаи бозкушоӣ ва бунёди масҷидҳои нав дар манотиқи кишварро баррасӣ мекунад.

Сулаймон Давлатзода, раиси Кумитаи оид ба корҳои дин, танзими анъана ва ҷашну маросимҳо рӯзи 6-уми январ дар ҳошияи нишасти хабарии ниҳоди зери раҳбариаш ба Радиои Озодӣ гуфт, бар асоси санҷишу баррасиҳои ин комиссия, Кумитаи дин пешниҳоди худро ба ҳукумати Тоҷикистон барои фаъол сохтани масҷидҳо ироа хоҳад кард.

Гуфта мешавад, ки ин тасмим дар пайи шикоятҳои пайдарпайи сокинон аз набуди масоҷид ва ё дур будани он аз маҳалҳои зист, рӯи даст гирифта шудааст. Шикояти мардум ин будааст, ки хусусан дар фасли сармо ба ин мушкил бештар рӯбарӯ мешаванд. Бархе аз сокинон дар манотиқи кишвар мегӯянд, ки намедонанд намози ҷумъаро дар куҷо адо кунанд.

Ба гуфтаи мақомот, дар соли 2018 танҳо дар ноҳияи Ваҳдат ҳудуди 100 масҷид аз нав ба қайд гирифта шуда ва иҷозаи фаъолият дарёфт карданд. Ин хабарро мақомоти ҳукумати ноҳияи Ваҳдат низ таъйид карда ва гуфтанд, ки аксари ин масҷидҳо қаблан фаъолият доштанд, вале тайи солҳои ахир баста шуданд.

Тибқи маълумоти Кумитаи оид ба корҳои дин, феълан дар кишвар 3867 иттиҳодияи динӣ дар феҳрасти давлатии иттиҳодияҳои динии кишвар ба қайд гирифта шудааст.

Назарбоев дар робита бо марги панҷ кӯдак дар сӯхтор тасаллият баён кард

Матбуоти расмӣ тасаллияти президенти Қазоқистон дар робита бо марги панҷ тифли ноболиғ дар як сӯхтори хона дар шаҳри Остонаро нашр кард. Дар як сӯхтори шаби 4 феврал дар кулбае, ки барои зиндагии муваққатӣ пешбинӣ шудааст, якбора панҷ фарзанди як оила ҷон дод. Субҳи 5 феврал маросими хоксупории онҳо баргузор шуд.

Президент Нурсултон Назарбоев дар як изҳороташ ба мақомот таъкид кардааст, ки чораҳои заруриро андешанд, то ки чунин ҳодисаҳо такрор нашаванд. Ӯ ин ҳодисаро “як фоҷеаи азим” номидааст. Бо дастури президенти Қазоқистон, ҳукумат ва ҳокими Остона бояд тамоми кӯмакҳои заруриро ба ин оила бирасонанд.

Атфоли дар сӯхтор кушташуда ҳама духтарҳои 1 то 12-сола буданд. Ба ҳангоми сӯхтор волидони ин кӯдакон дар ҷои кор буданд. Раиси шаҳри Остона ҳодисаро “як саҳлангории хадамоти изтирорӣ” номидааст. Марги кӯдакон боиси сарусадо дар ҷомеа ва шабакаҳои иҷтимоӣ шуд.

Доналд Трамп дар баробари Конгресс суханронӣ мекунад

Президенти ИМА Доналд Трамп қарор аст шоми 5 феврал бо паёми дуюми худ дар баробари Конгресс суханронӣ кунад ва ин навбат қарор аст дар масоили муҳоҷират, низоъ дар Ховари Миёна ва иқтисоди ИМА тамаркуз кунад. Суханронии президент дар шароите шунида мешавад, ки ихтилофҳои дохилии миёни демократҳои Конгресс ва президент дар ҳоли афзоиш аст.

Суханронии президент чанд рӯз баъди хатми мутаваққифшавии кори ҳукумати Амрико баргузор мешавад, ки 35 рӯз идома дошт ва тӯлонитарин дар таърихи ин кишвар буд. Ҳукумат баъди он аз кор монд, ки ҳарду палатаи Конгресс аз маблағгузории яке аз тарҳҳои баҳсбарангези президент – бунёди девор дар хати марз бо Мексика худдорӣ кард. Трамп бовар дорад, ки ин марз макони қочоқи маводи мухаддир ва ҳам убури ғайриқонунии муҳоҷирон аз кишвари ҳамсоя шудааст. Созиши фаъол кардани кори ҳукумат то 15 феврал идома мекунад ва Трамп таҳдид кардааст, ки агар Конгресс бо тахсиси 5,7 миллиард доллар маблағ розӣ нашуд, дар кишвар ҳолати фавқулодда эълон мекунад.

Трамп қарор буд рӯзи 29 январ дар Конгресс суханронӣ кунад, вале раиси Маҷлиси намояндагон Ненсӣ Пелосӣ нагузошт, ки ин маросим баргузор шавад. Зимни сӯҳбаташ бо хабарнигорон рӯзи 1 феврал Трамп ишора кард, ки дар суханрониаш ҳолати фавқулодда эълон мекунад. “Шумо суханрониро шунида, мебинед, ки дафъатан баъди пахши он чӣ мешавад”, гуфт Трамп.

Бар асоси конститутсияи Амрико, қарорҳои марбут ба хароҷотро Конгресс қабул мекунад ва бо тасмимҳои худ сарфу харҷи пули андозсупорандагонро тасдиқ ё рад мекунад.
Мутаваққифшавии кори ҳукумат, ки садҳо ҳазор коргари сохторҳои федеролиро бемаош гузошт, ба обрӯи Трамп латма зад.

Мақомот дар Хатлон "Амалиёти иҷоранишин"-ро роҳандозӣ карданд

Искандар Солеҳзода, сардори Раёсати умури дохилӣ дар Хатлон.

Мақомоти интизомӣ дар ҷануби Тоҷикистон "Амалиёти иҷоранишин"-ро роҳандозӣ кардаанд. Ҳадаф аз роҳандозии ин амалиёт, ошкор кардани ҷинояткорӣ будааст. Генерал Искандар Солеҳзода, сардори Раёсати умури дохила дар Хатлон мегӯяд, ин амалиёт як моҳ идома мекунад.

Искандар Солезода рӯзи 5-уми феврал зимни нишасти хабарӣ гуфт, вақте як нафари ҷинояткор ё таҳрибкор мехоҳад амале анҷом диҳанд, дар оғоз як ё ду рӯз пеш ҷойбаҷо мешаванд ва баъдан ҷойи ҳодисаро омӯхта, амалеро анҷом медиҳанд.

Ба ин манзур, мақомоти интизомӣ дар Хатлон мегӯянд, ки афроди иҷорадиҳанда бояд дар мавриди афроде, ки дар хонаҳояшон иҷора менишинанд, маълумот ироа кунанд. Ҳамчунин ба гуфтаи мақомот, моликони меҳмонхонаҳо бояд давоми як шабонарӯз дар бораи меҳмонони хориҷии худ гузориш диҳанд.

Ин амалиёт ҳудуди ҳафт моҳ пас аз ҳамла ба сайёҳони хориҷӣ дар ноҳияи Данғара сурат мегирад. Дар ҳамла ба ҷаҳонгардони хориҷӣ дар рӯзи 29-уми июли соли гузашта, чаҳор сайёҳи хориҷӣ ҷон бохта ва ду тани дигар ҷароҳат бардоштанд.

Мақомоти интизомӣ дар Хатлон мегӯянд, ки соли гузашта ҷиноятҳои дорои хусусиятҳои террористӣ ва экстремистӣ назар ба соли 2017 дар ҳудуди вилоят камтар будааст.

Искандар Солеҳзода афзуд, ки рӯзҳои ахир ду сокини ноҳияи Вахш, ки шомили "Давлати исломӣ" будаанд, пушаймон шуда, ба ватан баргаштанд ва мавриди афв қарор гирифтанд. Ба гуфтаи вай, қарор аст рӯзҳои наздик нафари савум низ баргардонида шавад.

"Вазифаи мо пушти панҷара бурдани сокинон нест, кӯшиш мекунем, ки пешгирӣ кунем, онҳое, ки бармегарданд, аз ҷавобгарии ҷиноӣ озод мешаванд",-афзуд вай.

Шоҳроҳи Душанбе-Чаноқ боз шуд

Ҳаракати воситаҳои нақлиёт дар роҳи Душанбе-Чаноқ-ягона роҳ ба шимоли кишвар, дубора имконпазир шуд. Ин роҳ субҳи 5-уми феврал дар пайи барфрезии шадид баста шуда буд.

Далери Абдулло, сухангӯи ширкати IRS рӯзи 5-уми феврал дар сӯҳбат ба Радиои Озодӣ гуфт, ҳаракат дар роҳи Душанбе-Чаноқ боз шуд, аммо ҳоло танҳо ба худравҳое, ки аз Хуҷанд ба пойтахт меоянд, иҷозаи убури роҳ дода мешавад.

Ба қавли сухангӯи IRS, талош доранд бо даст додани имконият ҳаракат аз ҷониби Душанбе ба вилояти Суғд низ боз шавад. Масъулини ширкати IRS мегӯянд, хатари фаромадани тарма ҳамчунон боқист ва танҳо имрӯз беш аз 50 тармаро тоза кардаанд.

Дар ду ҳафтаи ахир ин бори дуюм аст, ки роҳи Душанбе-Чаноқ баста мешавад.

Роҳи Душанбе-Чаноқ аз шоҳрагҳои нақлиётии Тоҷикистон вилояти Суғдро ба Душанбе пойтахти кишвар мепайвандад. Дар гузашта дар натиҷаи тарма дар ин роҳ даҳҳо нафар ҳалок шудаанд. Се корманди ширкати мутасаддии нигоҳубини роҳ низ ҳангоми поккорӣ зери тарма монда ба ҳалокат расидаанд.

Сенат бо хуруҷи нирӯҳои амрикоӣ аз Сурияву Афғонистон розӣ нест

Сенати Амрико дар як иқдоми бештар расмӣ бо амри президент Доналд Трамп дар заминаи хуруҷи нирӯҳои амрикоӣ аз хоки Сурияву Афғонистон мухолифат кард. Як таҳрир ба қонун, ки 4 феврал муаррифӣ шуд ва бештар хусусияти ғайриҳатмӣ дорад, гуфта шудааст, ки гурӯҳи “Давлати исломӣ” ҳамоно як хатар ба амнияти Иёлоти Муттаҳида боқӣ мемонад. Аз он ҷо ки Трамп узви ҳизби ҷумҳурихоҳ буда, маҳз намояндагони ҳамин ҳизб назорат бар палатаи болоии Конгрессро ба ӯҳда доранд, таҳрири мазкур ҳамчун мухолифати ҷиддӣ бо сиёсати хориҷӣ арзёбӣ мешавад.

Таҳрире, ки аз он 70 узви маҷлис дар муқобили 26 нафар овоз доданд, мегӯяд, ки дар муқобила бо ҷангиёни гурӯҳи “Давлати исломӣ” ва Ал-Қоида дар Сурия ва Афғонистон пешравӣ ҳосил шудааст. Вале айни замон, хуруҷи комил метавонад минтақаро бесубот кунад ва халое эҷод кунад, ки аз ҷониби Эрону Русия пур мешавад. Таҳрири воридшуда бахше аз қонунест, ки дар робита бо амнияти Ховари Миёна қабул шуда ҳоло бояд аз ҷониби аксар демократҳои Маҷлиси намояндагон ҳам баррасӣ шавад. Феълан тахминан 2 ҳазор сарбози амрикоӣ дар Сурия ва тахминан 11 ҳазори дигар дар Афғонистон мустақар шуда дар сафи нирӯҳои НАТО хизмат мекунанд.

Худойбердӣ Холиқназарзода ва Сайфулло Сафаров бознишаста шуданд

Сайфулло Сафаров

Худойбердӣ Холиқназарзода, раиси Маркази тадқиқоти стратегии Тоҷикистон, бо сабаби бознишастагӣ аз мақоми худ озод шуд. Хадамоти матбуоти президент рӯзи 5-уми феврал гуфт, Диловар Қодирзода мудири нави Маркази тадқиқоти стратегӣ таъйин шудааст. Вай то ин дам раиси Донишкадаи соҳибкорӣ ва хизмат буд.

Сайфулло Сафаров, муовини аввали раиси Маркази тадқиқоти стратегии Тоҷикистон, низ аз мақоми худ озод ва бознишаста шудааст.

Сафарови 66-сола аз соли 2001 ба ин тараф ба ҳайси муовин ва муовини аввали раиси Маркази тадқиқоти стратегӣ кор мекард. Ӯ дар гузашта мушовири президенти Тоҷикистон низ буд.

Номи Сайфулло Сафаров сари чанд вақт дар робита ба шарҳи тасмимҳои ҳукумат ва ҳодисаҳо сари забонҳо мешуд. Вай моҳи сентябри соли гузашта дар нишасти ОБСЕ дар Варшава ҷониби Тоҷикистонро намояндагӣ кард ва бо чанд изҳороти худ, аз ҷумла дар бораи эҳтимоли музокирот бо мухолифон, дар сархатти расонаҳо қарор гирифт.

Хадамоти матбуоти президенти Тоҷикистон мегӯяд, рӯзи 5-уми феврал чанд тағйироти дигари кадрӣ сурат гирифт. Бар асоси он, Ибодулло Машраб аз мақоми муовини вазири фарҳанг ва Насриддин Исматулло аз мақоми муовини вазири умури хориҷӣ барканор шудаанд. Ибодулло Машраб ба нафақа баромада, Насриддин Исматулло сафири Тоҷикистон дар Покистон таъйин гардидааст.

Неъматулло Эмомзода аз мақоми сафири Тоҷикистон дар Эрон ва Абдукарим Зарифзода аз мақоми муовини раиси Оҷонси зидди фасод барканор шудаанд. Сабаби барканории Эмомзода расидан ба синни нафақа гуфта шудааст, вале иллати барканории Зарифзода маълум нест.

Носирҷон Салим низ аз вазифаи раиси Донишгоҳи давлатии омӯзгории Тоҷикистон озод шуда, мудири Пажӯҳишгоҳи забон ва адабиёти ба номи Рӯдакӣ таъйин шудааст.

Ҳар сол дар моҳи январу феврал, дар остона ва баъди маҷлиси солонаи ҳукумат, тағйироти кадрӣ сурат мегирад. Дар тағйироти қаблӣ раисони ширкати давлатии «Тоҷик Эйр», бонки давлатии «Амонатбонк», вазири саноат ва сардори Сарраёстаи геолгияи Тоҷикистон иваз шуданд.

Баҳси нафақа дар нишасти хабарии Оҷонсии суғуртаи иҷтимоӣ

Сафаралӣ Наҷмиддинов,

Мизони пасти нафақа дар Тоҷикистон, яке аз масъалаҳое буд, ки имрӯз, 5-уми феврал дар нишасти матбуjтии Сафаралӣ Наҷмиддинов, директори Оҷонсии суғуртаи иҷтимоӣ ва нафақаи кишвар? баҳсҳоеро ба миён овард.

Сафаралӣ Наҷмиддинов дар посухи ба пурсиши хабарнигорон, ки чаро шаҳрвандон 180 сомонӣ -- як нафақаи ночизе мегиранд, иброз дошт, ки ба ин андеша розӣ шуда наметавонад. Ӯ гуфт, ба онҳое 180 сомонӣ нафақапулӣ пардохт мешавад, ки дар ҳеҷ куҷое кор накардаанду ҳиссае надоранд.

Дар ин нишаст, хабарнигорон иловатан пурсиданд, онҳое ҳам, ки cолҳои зиёде кору фаъолият кардаанд, ҳоло то 400-500 сомонӣ нафақа мегиранд ва оё ин маблағ барои рӯзгори онҳо басанда кофӣ аст? Наҷмиддинов шарҳ дод, ки ҳукумат ҳамасола кӯшиш дорад андозаи нафақаро зиёд кунад.

"Вақти гузариш буд, имрӯз муқаррароти нав таъин шуда истодааст, нафақа аз рӯи ҳиссаи сармояаашон таъин мешавад. Мувофиқи дурнамои Стратегияи милли рушди Тоҷикистон, то соли 2030 бояд сатҳи нафақаи минималӣ то 40%-и даромаднокӣ дар ҷумҳуриро ташкил диҳад, яъне то соли 2030 нафақаи шаҳрвандон ҳар сол афзоиш ёфта, на камтар аз 40 фоизи музди меҳнати миёна дар ҷумҳуриро ташкил хоҳад дод".

Бар асоси маълумоти Оҷонсии суғуртаи иҷтимоӣ ва нафақа, феълан нафақаи ҳадди ақал на камтар аз 180 ва нафақаи миёна бошад 309 сомониро ташкил медиҳад. Дар ин нишаст масъулини ин ниҳод иброз доштанд, ки афзоиши нафақаи шаҳрванд, аз ҳиссаи маблағҳои ҷамъшудаи ӯ вобастагӣ дорад.

Ба думболи баёни ин муқаррарот, суоли дигар пешниҳод шуд, ки ҳоло шаҳрвандон ҳаҷми нафақаашро аз рӯи ҳиссагузорияш мегирад, яъне ҳар кас худаш барои худаш нафақа омода мекунад, пас аз ҷониби давлат дастгирӣ чӣ аст? Сафаралӣ Наҷмиддинов дар посух гуфт, ба афроде, ки умуман собиқаи корӣ надоранд, солона зиёда аз 180 миллион сомонӣ нафақа пардохт мешавад, ки ин дастгирии давлатӣ аст.

"135 ҳазору 108 нафар аст, ки ягон ташаккули сармоя надоранд, аммо нафақа мегиранд. Шаҳрвандоне ҳастанд, ки андози иҷтимоӣ месупоранд, лекин он маблағҳое, ки месупоранд, барои пардохти нафақаи онҳо кофӣ нест. Масалан, хоҷагии деҳқонӣ аз рӯи патент дар як моҳ 10 сомонӣ андози иҷтимоӣ месупорад, лекин ҳукумат барои таъини нафақа дар як моҳ 180 сомонӣ муайян мекунад, яъне 170 сомонии аз тарафи ҳукумат дастгирӣ меёбад",-афзуд вай.

Масъалаи дигаре, ки атрофаш саволу ҷавоби зиёд сурат гирифт, ин пешбинии имтиёзҳо барои нафақагирон буд. Директори Оҷонсии суғуртаи иҷтимоӣ ва нафақа таъкид намуд, ки имтиёзҳо ба ятимони кулл, маризони яккаву танҳо, собиқадорони Ҷанги Бузурги Ватанӣ пешбинӣ шудааст. "Дар ин самт, масалан, ирсоли онҳо ба истироҳатгоҳҳо ва пардохти кӯмакпулиҳо аст",-афзуд вай.

Теъдоди нафақахӯрон феълан дар Тоҷикистон ҳудуди 680 ҳазор будааст.

Толибон ба музокироти Маскав ҳозир мешаванд

Ширкатдорони конфронси Маскав. 5 феврал

Ҳайате ба намояндагӣ аз мақомоти Толибон дар Маскав бо шахсиятҳои шинохта, аз ҷумла, собиқ президенти Афғонистон Ҳомиди Карзай гуфтугӯ анҷом медиҳанд. Ин мулоқот, ки рӯзи 5 феврал бидуни ҳузури мақомоти расмии ҳукумати Афғонистон баргузор мешавад, мавриди интиқоди маъмурияти раиси ҷумҳур Ашраф Ғанӣ қарор гирифт.

Ҳукумати Русия даст доштанаш дар корҳои тадорукотии ин нишастро рад карда мегӯяд, ҳамоише, ки музокироти сулҳ ба хотири хатми ҷанги 17-соларо ҳадаф дорад, аз ҷониби ҷамъияти афғонҳои муқими Маскав ташкил шудааст. Ин дар ҳолест, ки баргузории як нишасти баландпояе дар Маскав бидуни ризоияти Кремлин имкон надорад.

Карзай ба нишаст ҳозир мешавад
Карзай ба нишаст ҳозир мешавад

Раиси ҳукумати иҷроияи Афғонистон Абдулло Абдулло гуфт, ки дар маркази чунин музокираҳо бояд ҳукумати ин кишвар қарор дошта бошад ва афзуд, ки аз назари “Кобул чунин музокирот бояд дар шакли дигаргуна баргузор шавад”.

Ӯ гуфт, ки Толибон дар сулҳи Афғонистон як садди бузургтарин мебошанд, вале агар “нишасти Маскав тавонад роҳи музокироти воқеиро боз кунад, боз ҳам як пешравӣ хоҳад буд”.

ИМА дар робита бо ин нишаст расман изҳори назар накардааст. Дар нишасти Маскав ҳайати 10-нафараи Толибон ба раҳбарии Шермуҳаммад Аббос Станикзай иштирок мекунад. Инчунин интизор меравад, ки фармондеҳони бонуфузи ба сиёсат рӯоварда ҳам дар нишасти Маскав ҳозир шаванд.

Дар Хатлон 538 танфурӯшро сабти ном кардаанд. ВИДЕО

Искандар Солеҳзода

Мақомоти интизомии Хатлон мегӯянд, соли гузашта дар вилоят 538 танфурӯшро сабт карданд, ки дар байни онҳо 95 нафар гирифтори вируси норасоии масунияти бадан ва ё ВИЧ ҳастанд.

Искандар Солеҳзода, сардори Раёсати корҳои дохилии вилояти Хатлон, рӯзи 5-уми феврал дар як нишасти хабарӣ дар Бохтар гуфт, "дӯст намедорад, дар бораи ин мавзуъ суҳбат кунад, вале масъалаи доғи ҷомеа аст, ки онҳоро ба ташвиш овардааст."

Ӯ ҳушдор дод, ки дар сурати иртиботи ҷинсӣ бо гирифторон, мумкин аст, бемории вируси норасоии масунияти бадан густариш ёбад ва барои ҳамин онҳо ба зидди "ҷиноятҳои ахлоқӣ" мубориза мебаранд.

Дар Хатлон беш аз 2800 гирифтори вируси норасоии масунияти бадан сабти ном шудаанд ва 900 нафари онҳо зан ҳастанд. Соли гузашта як занеро дар вилоят барои дониста сироят кардани ҳамхобагонаш ба ҷавобгарии ҷиноӣ кашиданд.

Дар Хатлон 538 танфурӯшро сабти ном кардаанд
лутфан мунтазир бошед

Феълан кор намекунад

0:00 0:01:42 0:00

Манъи мошинҳои борбари Тоҷикистон дар марзи Туркманистон. ВИДЕО

Даҳҳо мошини борбар аз Тоҷикистон дубора дар марзи Туркманистон дармондаанд. Ронандаҳо гуфтанд, мақомоти Туркманистон рӯзи 4-уми феврал иҷоза надоданд, ки ба қаламрави ин кишвар ворид шаванд. Ҷониби Тоҷикистон аз мақомоти Туркманистон шарҳи далели чунин рафторашонро хостаанд.

Мошинҳои боркаши тоҷиконро ба хоки Туркманистон роҳ надоданд
лутфан мунтазир бошед

Феълан кор намекунад

0:00 0:01:10 0:00

Шералӣ Ганҷалзода, муовини вазири нақлиёти Тоҷикистон, рӯзи 5-уми феврал ба Радиои Озодӣ гуфт, то ба ҳол ҷавоби суоли худро нагирифтаанд. Ӯ афзуд, "ба интиқолдиҳандагони мол гуфтем, як муддат сабр кунанд, то маълум шавад, сабабҳои манъи вуруди мошинҳо ба Туркманистон чист."

“Убури мошинҳои борбари Тоҷикистон аз 4-уми феврал манъ шудааст. То ҳоло тақрибан 20 мошин ҷамъ шуда буд. Имрӯз боз бештар мешавад. Дирӯз ҳатто аз тарафи Термиз ворид шудан намонданд”, - афзуд Ганҷалзода.

Шералӣ Ганҷалзода, инчунин, гуфт, соҳибони мошинҳо метавонанд аз ду роҳи алтернативии дигар истифода кунанд. Ин роҳҳо ба қавли ҳамсӯҳбати мо, тариқи Ҳироти Афғонистон ва бандари Озарбойҷон мебошад. Аммо ба гуфтаи соҳибкорон бо ин ду роҳ масофа зиёд мешавад.

Бори аввал нест, ки Туркманистон бе ягон шарҳ гузаштани мошинҳои боркаши Тоҷикистонро аз қаламраваш манъ мекунад. Аз ҷумла, мақомоти Туркманистон аз охири моҳи августи соли гузашта ба мошинҳои Тоҷикистон иҷоза надод, аз қаламрави Эрон вориди кишварашон шаванд. Гурӯҳе аз ронандагон он вақт гуфта буданд, дар марзи Туркманистон ва Эрон дармондаанд ва намедонанд, сабаби роҳ надодани онҳо ба қаламрави Туркманистон чӣ ҳаст.

Ин роҳбандии мақомоти туркман дар роҳи мошинҳои боркаши Тоҷикистон бештар аз як моҳ идома кард. Дар ин муддат мақомоти Ашқобод ҳеҷ шарҳи возеҳе дар бораи манъи вуруди мошинҳо ва қаторҳои Тоҷикистон ба қаламраваш надод.

Охири моҳи август ва аввали сентябри соли гузашта дар маҷмӯъ танҳо дар гузаргоҳи Лутфобод-Ортиқ 100 мошин дармонда буд. Ин мошинҳо асосан молу маҳсулотро аз Туркияву Эрон меоранд ва аз хоки Эрон ба Туркманистон гузашта, сипас ба Тоҷикистон меоянд.

Тоҷикистону Туркманистон аз ҷумлаи ду кишвари Осиёи Марказӣ ҳастанд, ки соли гузашта дар равобиташон сардӣ эҳсос мешуд. Ин ду кишвар ҳарчанд барои якдигар шарики стратегӣ ба ҳисоб мераванд, вале ҳаҷми тиҷораташон ночиз аст.

Сергей Лавров ба Душанбе омад

Дар "Кохи Миллат" аз субҳи 5-уми феврал музокироти Эмомалӣ Раҳмон, раиси ҷумҳури Тоҷикистон бо Сергей Лавров, вазири корҳои хориҷии Русия идома дорад. Вафо Ниятбеков, роҳбари бахши иттилооти Вазорати корҳои хориҷии Тоҷикистон ба Радиои Озодӣ гуфт, ки ҷаноби Лавров шоми гузашта ба Душанбе расид ва ҳоло бо роҳбари Тоҷикистон мулоқот мекунад. Баъд аз анҷоми ин мулоқот музокироти Сергей Лавров бо Сироҷиддин Муҳиддин, вазири корҳои хориҷии Тоҷикистон дар назар аст. Дар поёни ин мулоқот ҳар ду вазири Тоҷикистону Русия ба саволҳои хабарнигорон посух хоҳанд дод.

Қаблан Вазорати корҳои хориҷии Русия иттилоъ дода буда, ки дар мулоқоти Сергей Лавров бо мақомоти тоҷик масоили ҳамкориҳои ду кишвар дар бахши сиёсиву амниятӣ дар чаҳорчӯби созмонҳои минтақавӣ ва чорабиниҳои марбут ба дидорҳои сиёсии мақомоти баландпояи ду кишвар баррасӣ мешаванд.

Ба гуфтаи сухангӯи вазорати корҳои хориҷии Русия "мулоқоти Сергей Лавров бо президенти Тоҷикистон ва роҳбари Вазорати корҳои хориҷии ин кишвар дар назар аст. Ҷонибҳо ҷараёни омодагӣ барои дидору мулоқот дар сатҳи олии ду кишварро бо назардошти нақши муҳими Тоҷикистон дар СПАД ва сарҳади тӯлониаш бо Афғонистон, баррасӣ мекунанд".

Зимнан, Сергей Лавров баъд аз анҷоми сафараш ба Қирғизистон шоми 4 феврал аз Бишкек вориди Душанбе шуд. Хабаргузории Sputnik аз қавли Сергей Лавров дар Бишкек навиштааст, Русия омода аст ба лоиҳаҳои CASA-1000 ва ТАПИ ҳамроҳ шавад. "Ширкатҳои мо омодагии худро барои пайвастан ба лоиаҳои CASA-1000 ва ТАПИ, ки аз лиҳози энержӣ ҷолибанд, дар марҳалаи аввали татбиқи ин лоиҳаҳо эълон дошта буданд. Онҳо гуфта буданд, ки дар сурати манфиатдории кишварҳои дахлдор омода ҳастанд ба ин лоиаҳо ҳамроҳ шаванд",- гуфтааст Сергей Лавров.

Тарҳҳои CASA-1000 интиқоли нерӯи барқи изофӣ аз Тоҷикистону Қирғизистон ба Афғонистону Покистон дар назар дорад. Пешбинӣ шудааст, ки 70% интиқоли қувваи нерӯи барқ аз Тоҷикистон ва 30% аз Қирғизистон ба Афғонистон ва Покистон сурат хоҳад гирифт. Дар маҷмӯъ, тавассути ин хатти интиқоли нерӯи ба Афғонистон ва Покистон то 5 миллиард кВт/с нерӯи барқ интиқол дода мешавад.

Тарҳи ТАПИ бошад сохтмони хатти лӯлаи гази табиии дарозиаш 1735 километр аз Туркманистон ба Афғонистону Покистон ва Ҳиндустон бо зарфияти солонаи интиқоли то 33 млрдметри мукааб гази табииро дар назар дорад. Маблағи иҷрои ин тарҳ $8 -10 млрд арзёбь мешавад.

Ёфтҳои бештар

ҲСДТ бо чӣ умед дар интихобот иштирок мекунад?
лутфан мунтазир бошед

Феълан кор намекунад

0:00 0:04:10 0:00
Гузоришҳои радиоӣ
ПОДКАСТ
ҲСДТ бо чӣ умед дар интихобот иштирок мекунад?
Гузоришҳои радиоӣ

Гузоришҳои видеоӣ

Ахбори Озодӣ
лутфан мунтазир бошед
Embed

Феълан кор намекунад

0:00 0:15:00 0:00
XS
SM
MD
LG