Пайвандҳои дастрасӣ

Хабари нав

Хабарҳо

Хайрулло Мирсаидов Гурҷистонро тарк кард ва ба Аврупо рафт

Акс аз бойгонии Хайрулло Мирсаидов

Хайрулло Мирсаидов – хабарнигор ва раҳбари КВН-и Тоҷикистон – Гурҷистонро ба қасди Аврупо тарк кардааст. Ӯ рӯзи 12-уми феврал дар суҳбат бо Радиои Озодӣ гуфт, феълан дар яке аз шаҳрҳои аврупоӣ қарор дорад.

Додгоҳи шаҳри Хуҷанд Мирсаидовро ғоибона ба 8 моҳи зиндон маҳкум карда ва рӯзи 11-уми феврал таҳти ҷустуҷӯ қарор дод. Мақомот ӯро барои сарпечӣ аз корҳои ислоҳӣ ва тарки маҳалли зист айбдор карданд.

Хайрулло Мирсаидов охири соли гузашта бо нияти табобат аз Тоҷикистон ба Гурҷистон рафт. Мақомот гуфтанд, ӯ ҳаққи берун рафтан аз маҳалли зистро надошт ва барои чунин рафтораш ду сол корҳои ислоҳии ӯ ба ҳашт моҳи зиндон иваз шудааст.

Мирсаидов мегӯяд, тамоми ҳукми додгоҳ яктарафа аст ва то замони пурра сафед шудан дар Аврупо хоҳад монд. Ӯ афзуд буданаш дар Гурҷистон ба манфиат набуд ва аз ин хотир ба тарки он кишвар маҷбур шуд.

“Ҳар лаҳза метавонистанд дар ҷустуҷӯи байналмилалӣ диҳанд. Байни Тоҷикистону Гурҷистон созишномаи боздошт ва истирдоди гумонбарон вуҷуд дорад. Ва агар ин ҳолат иттифоқ меафтод, дар Тоҷикистон боз зиндон интизор буд”, - гуфт ӯ рӯзи сешанбе.

Қазияи Хайрулло Мирсаидов тақрибан ду сол боз идома дорад. Мирсаидов моҳи декабри соли 2017 боздошт ва моҳи июли соли гузашта бо ҷурми "азонихудкунӣ ва исрофкории маблағҳои давлатӣ", "сохтакории ҳуҷҷатҳо" ва "пахши маълумоти бардурӯғ" ба 12 соли зиндон маҳкум шуд. Боздошти ӯ баъди он сурат гирифт, ки хабарнигори тоҷик дар шабакаҳои иҷтимоӣ раиси собиқи идораи ҷавонони вилояти Суғдро ба талаби "пора" муттаҳам кард.

Дар пайи талаби ҷомеаи шаҳрвандӣ ва созмону кишварҳои байналмилалӣ, Додгоҳи вилояти Суғд рӯзи 22-юми августи 2018 Мирсаидовро аз зиндон озод кард, вале доғи судиро аз номи ӯ набардошт. Хайрулло Мирсаидов ба пардохти 78 ҳазор ҳазор сомонӣ ҷарима ва инчунин ду сол корҳои ислоҳӣ муваззаф шуд. Мирсаидов мегӯяд, ин ҷаримаро пардохт кардааст.

Помпео ваъда дод, ки ИМА Словакияро аз назари амниятӣ пуштибонӣ мекунанд

Котиби давлатии ИМА Майк Помпео гуфт, ки ИМА ба Словакия дар масоили амниятӣ ва иқтисодӣ кӯмакҳо хоҳад кард. Словакия кишвари навбатии Аврупои Марказӣ аст, ки дар ҷараёни сафари панҷрӯзааш Помпео аз он ҳам дидан кард. Ин сафар бо ҳадафи коҳиши нуфузи Русия ва Чин дар минтақа анҷом мешавад.

Дар маросиме, ки дар сарҳади Австрия ва назди Даромадгоҳи муҷассамаи озодӣ барпо шуд, Помпео гуфт: “Мехоҳам мардуми Словакия бубинанд, ки Амрико бо онҳо ҳамкор аст ва ба наздашон баргаштааст”.

Муҷассамаи озодӣ ба хотири 400 қурбонии солҳои 1945-1989 дар марз бо Чехословакияи собиқ гузошта шудааст. Ин шумор мардум ба ҳангоми талоши фирор аз деворҳои сангини режими сотсиалистӣ кушта шуданд.

“Аз номи ИМА ман ифтихор дорам бигӯям, ки дар канори мардуми Словакия ва Аврупо истодаам ва барои бунёди ояндаи шукуфон, боамн ва хеле олӣ ӯҳдадор мешавам”, гуфт Помпео.

Ӯ инчунин гуфт, ки ИМА ва Аврупо “бояд ба арзишҳои худ таъкид кунанд”, чун “таҷовузи Русия озодиҳоро ба ҳам мезанад” ва Чин “аз роҳи тавсеаи нуфузаш дар ҷаҳон мардумро саркӯб мекунад”.

Сафари Помпео ба Аврупо аз дидору гуфтугӯҳо дар Венгрия шурӯъ шуд. Баъди Словакия Помпео қарор аст ба Полша, Белгия ва Исландия сафар кунад.

Дар Будапешт рӯзи 11 феврал Помпео ба хотири таъкиди аҳамияти демократия ва ҳукумати қонун бо нахуствазири ростгаро Виктор Орбан дидору гуфтугӯ кард.

Вашингтон ин масъалаҳоро дар муқобила бо ҳаракатҳои зиддиаврупоиву НАТОи Русия ва Чин муҳим арзёбӣ мекунад.

Сардабири вебсайти беларусӣ дар додгоҳ муҳокима мешавад

12 феврал, Золотова дар додгоҳ ҳозир мешавад

Сардабири як вебсайти хабарии пурхонандае дар Беларус дар паи иттиҳоми ин ки маълумоти расмиро аз як оҷонсии давлатӣ бо роҳҳои ғайриқонунӣ дарёфт кардааст, дар додгоҳ ҳозир шуд. Додгоҳе дар шаҳри Минск рӯзи 12 феврал баррасии муқаддамотии қазияи Марина Золотова, сардабири вебсайти Tut.by-ро шурӯъ кард. Ҳомиёни ҳуқуқ аз ин парванда изҳори нигаронӣ ва аз афзоиши маҳдудияту фишор болои озодии баён дар аҳди Александр Лукашенкоро интиқод кардаанд. Августи порсол полис дафтарҳои кории вебсайти Tut.by-ро ҳамроҳ бо офиси BelaPan кофтукоб кард.

Чанд хабарнигор, аз ҷумла худи Золотова боздошт шуданд. Муфаттишон тахмин карданд, ки кормандони ин ду расона аз компютерҳои худ исму калидвожаҳои бегонаро истифода карда, ба бахши обунаи пулакии оҷонсии давлатии BelTA ворид мешуданд. Як нашрияи дигар – “Беларусская наука” ҳам ҳамчунин мавриди ҳадаф буд. Дар маҷмӯъ 15 нафар бояд муҷозот мешуд, вале ҳама, ба ҷуз Золотова дар ниҳоят баъди пардохти ҷарима озод гардиданд. Золотова дар ин байн бо иттиҳоми дигари “беамалии расмӣ” ҳам гунаҳгор шудааст. Худи ӯ ин иттиҳомротро рад мекунад. Дар сурати гунаҳгор эълон шудани Золотова, ба ӯ муҷозот аз пардохти ҷарима то 5 соли зиндон таҳдид мекунад.

Толибон ҳайати музокиротии худро мушаххас карданд

Қароргоҳи Толибон дар Доҳа

Толибон ҳайати 14-нафараи гурӯҳи музокиротиро мушаххас карданд, ки қарор аст моҳи феврал дар даври навбатии гуфтугӯҳо бо фиристодаи вижаи ИМА барои Афғонистон иштирок кунанд. Дар изҳороти ин гурӯҳ аз 12 феврал гуфта мешавад, ки гурӯҳи Толибонро Шермуҳаммад Аббос Станикзай раҳбарӣ мекунад. Ба ин феҳрист инчунин исми Анас Ҳаққонӣ, бародари зиндонии раҳбари шабакаи Ҳаққонӣ, як гурӯҳи бонуфузе дар ҳайати Толибон ворид шудааст. Забеҳулло Муҷаддадӣ, сухангӯи Толибон гуфт, ки Ҳаққонии зиндонӣ дар Кобул бояд “озод шавад ва дар музокирот иштирок кунад”.

Оҷонсии истихбороти Афғонистон - раёсати миллии иттилоот гуфт, ки дар заминаи озод шудани Ҳаққонӣ аз зиндон ҳанӯз ҳеҷ қароре қабул нашудааст. Ин таҳаввулот дар ҳолест, ки дар паи ҷанги 17-сола дар Афғонистон фиристодаи ИМА Залмай Халилзод ва намояндагони Толибон дар Қатар ба давраи ниҳоии музокираҳо наздик мешаванд. Қарор аст мулоқоти навбатии онҳо 25 феврал дар шаҳри Доҳа, пойтахти Қатар баргузор шавад.

Сироҷиддини Мӯҳриддин: Ворид шудан ба ЕАЭС-ро меомӯзем

Тоҷикистон ҳанӯз ба хулосае нарасидааст, ки оё шомили Иттиҳоди иқтисодии АвруОсиё (ЕАЭС), як созмони зери нуфузи Русия, бишавад ё не.

Сироҷиддини Мӯҳриддин, вазири корҳои хориҷии Тоҷикистон, гуфт, ҳанӯз ин масъаларо меомӯзанд. “Ин масъаларо ҳамаҷониба меомӯзем ва то ҳанӯз аз коршиносон низ машварати мушаххас нагирифтаем”, - гуфт ӯ рӯзи 12-уми феврал дар нишасти матбуотӣ.

Русия борҳо ба Тоҷикистон пешниҳод кардааст, ки дари Иттиҳоди иқтисодии АвруОсиё ба рӯяш боз аст. Дар ин созмони иқтисодӣ Беларусу Қирғизистон ва Қазоқистону Арманистон низ шомиланд.

Сироҷиддини Мӯҳриддин гуфт, бо ҳамаи кишварҳои узви Иттиҳоди иқтисодии АвруОсиё ҳамкории хуб доранд ва аз сатҳи муносибатҳо розиянд.

Аммо гуфт, “Шумо медонед, ки мо ба кишварҳои Иттиҳоди иқтисодии АвруОсиё амалан роҳи мустақим надорем. Танҳо бо Қирғизистон марз дорем. Мо беш аз 90 дар сади молро аз тариқи Узбекистон дастрас мекунем.”

Оинномаи Иттиҳоди иқтисодии АвруОсиё мегӯяд, дар қаламрави кишварҳои узв гардиши озоди нерӯи корӣ, сармояҳо, мол ва хадамот кафолат дода мешавад.

Дар ин миён муҳоҷирони корӣ ҳастанд, ки муштоқи ҳарчи зуд ба ЕАЭС шомил шудани Тоҷикистон мебошанд. Онҳо бовар доранд, увзияти Тоҷикистон дар ин созмони зери назари нуфузи Русия шароити кори онҳоро дар ин кишвар беҳтар хоҳад кард.

Вале дар гузашта бархе аз мақомот дар Тоҷикистон гуфта буданд, ки шароити узвият дар созмони Иттиҳоди иқтисодии АвруОсиё бозгӯи манфиатҳои кишвар нест.

Дар ин бора бештар бихонед:

Иттиҳоди иқтисодии АвруОсиё ва Тоҷикистон: Тафриқаҳои гумрукӣ

Патрик Шанаҳан вориди Ироқ шуд

Шанаҳан ва низомиёни амрикоӣ дар Афғонистон. 11 феврал

Иҷрокунандаи вазифаи вазири дифои ИМА Патрик Шанаҳан барои машварат бо фармондеҳони низомии амрикоӣ ва мақомоти ироқӣ вориди Бағдод шуд. Дар ҷараёни ин сафар ҳузури ояндаи нирӯҳои амрикоӣ дар Ироқ баъди берун шудани нирӯҳо дар Сурияи ҳамсоя баррасӣ мешавад. Шанаҳан рӯзи 12 феврал аз Афғонистон вориди Ироқ шуд, ки он ҷо бо як сафари эълоннашуда қарор дошт. Сафар ба Бағдод дар ҳоле сурат мегирад, ки президенти Амрико Доналд Трамп гуфт, вуҷуди пойгоҳи низомӣ дар Ироқ ба он хотир муҳим аст, ки Вашингтон аз наздик аз Эрон назорат кунад. Президенти Ироқ Баҳром Солеҳ баъдан гуфт, ки конститутсияи ин кишвар иҷоза намедиҳад, ки қаламрави Ироқ ҳамчун пойгоҳи таҳдидкунанда ба манфиату амнияти кишварҳои ҳамсоя истифода шавад. Дар пойгоҳи ИМА ҳудудан 5200 низомӣ қарор дорад, ки вазифаашон аз тамрину машварати амниятӣ ба низомиёни ироқӣ иборат аст. Моҳи декабр Трамп бо изҳороташ дар бораи он ки ният дорад 2 ҳазор низомиашро аз хоки Сурия берун кунад, шарикони байналмилалии худро дар ҳайрат гузошт. Дар ин қаламрав низомиёни амрикоӣ ба арабҳои Сурия ва муттафиқони дигарашон – размандагони курд дар мубориза бо гурӯҳи “Давлати исломӣ” ва дигар гурӯҳҳои ҷангҷӯ мусоидат мекунанд.

Дар интихоботи президентии Украина 44 номзад иштирок мекунад

Дар интихоботи президентии Украина теъдоди рекордии номзадҳо -- 44 кас иштирок хоҳанд кард. Президенти кунунии кишвар Петр Порошенко низ яке аз номзадҳои асосӣ ба шумор меравад ва ваъда медиҳад, ки дар мӯҳлати дуюми панҷсолаи президентияш кишварро ба Иттиҳоди Аврупо ва НАТО шомил хоҳад кард.

Бино ба назарпурсиҳои ахир, дар интихоботи президентии 31 март сарвазири пешини Украина Юлия Тимошенко ва ҳаҷвнигор Владимир Зеленский рақибони асосии Порошенко ҳастанд.

Порошенкои 53-сола, яке аз сарватмандтарин афроди Украина дар натиҷаи эътирозҳое сари қудрат омад, ки моҳи феврали соли 2014 бо сарнагун шудани ҳукумати президенти пешини Украина Виктор Янукович анҷомиданд.

Ӯ ҷонибдори ҳамгироӣ бо Ғарб буда, Русияро барои ишғоли Қрим, барангехтани низоъ ва дастгирии ҷудоихоҳон дар шарқи Украина танқид мекунад.

Тимошенкои 58-сола яке аз раҳбарони "инқилоби норанҷӣ"-и соли 2004 буда, дар интихоботи соли 2014 аз Порошенко шикаст хӯрд.

Дар Қазоқистон 25 навбатдори кони Тенгиз заҳролуд шуданд

Кормандони ширкати пудратчии "Тенгизшевройл" дар шаҳраки навбатдории кони нафту гази вилояти Атирауи Қазоқистон аз ғизо заҳролуд шудаанд.

Хабаргузории расмии "Казинформ" рӯзи 11 феврал хабар дод, ки 25 нафар пас аз хурдани ғизои шом худро "бад" ҳис карданд ва ба беморхонаи шаҳри Кӯлсарӣ интиқол дода шуданд. "21 тани онҳо пас аз муойина ва дарёфти кумаки тиббӣ рухсат шуда, 4 нафари боқӣ бистарӣ гаштанд", - навиштааст хабаргузорӣ бо истинод ба Идораи тандурустии Атирау.

Бино ба иттилои нашрияи минтақавии "Ак жайик", кормандон 8 феврал заҳролуд шуда, табибон вазъи онҳоеро, ки бистарианд, муътадил арзёбӣ мекунанд. Дар ҳоли ҳозир сабабҳои ҳодисаро таҳқиқ доранд.

Тенгиз аз нигоҳи ҳаҷми захираи нафт дувумин кони бузургтарини Қазоқистон шумурда мешавад. Ин конро ширкати муштараки "Тенгизшевройл" дар ихтиёр дорад, ки ба ҳайати он Chevron, ExxonMobil Kazakhstan Ventures Inc, ширкати қазоқии "КазМунайГаз" ва LUKArco шомиланд.

Туркманистон иҷрои нақшаи пахтаву гандумро ду-се баробар зиёд эълом кард

Туркманистон дар омори расмиаш зикр кард, ки нақшаи давлатии ғунучини пахтаву гандум дар соли 2018 иҷро шудаааст. Айни замон, ба навиштаи матбуоти мустақил, дар оморҳои расмӣ ҳаҷми ҳосили ҷамъшудаи пахтаро ду ва гандумро се баробар бештар нишон додаанд.

Дар ин бора "Хроника Туркменистана" бо истинод ба арқоме хабар дод, ки дар гузоришҳои Вазорати кишоварзӣ ва оби Туркманистон дарҷ шудаанд.

Бино ба иттилои расмӣ, кишоварзони Туркманистон соли гузашта 450 ҳазор тонна пахта ҷамъоварӣ кардаанд. Вале ҳукумати Туркманистон 17 декабри соли 2018 ҳаҷми пахтаи ҷамъшударо беш аз 1 миллиону 99 ҳазору 236 тонна эълом кард. Бино бар нақшаи раҳбарияти ин кишвар, бояд 1 миллиону 50 ҳазор тонна пахта ҷамъоварӣ мешуд.

"Хроника Туркменистана" менависад, ки соли 2018 нақшаи давлатии гандум дар Туркманистон танҳо 30% иҷро шудааст. Кишоварзон ба ҷои 1,6 миллион тонна гандуми нақшавӣ 538 ҳазор тонна ҷамъоварӣ карданд.

Туркманистон дар пасманзари хабарҳои ҷалби иҷбории кормандони давлатӣ ба пахтачинӣ, таъхири пардохти пули кишоварзон, камҳосилӣ ва худдории деҳқонон аз кишти пахта ба иллати камсудияш аз аввали соли равон нархи хариди давлатии пахта ва гандумро боло бурд.

Дар ин кишвар замин моликияти давлат буда, кишоварзоне, ки онро ба иҷора мегиранд, бо дастури мақомот маҷбуранд танҳо пахта ва гандум кишт кунанд.

Дар Узбекистон мудири мактаберо барои обунаи маҷбурӣ аз кор ронданд

Uzbekistan -- Uzbek newspapers, 11May2013

Мудири мактаби №10 ноҳияи Янгиюли Узбекистон Шавкатҷон Ризоев барои маҷбуран обуна кардани омӯзгорон ба нашрияҳои даврӣ аз мақом барканор шуд.

Дар ин бора рӯзи 11 феврал расонаҳои Узбекистон бо такя ба вазорати маорифи он кишвар хабар медиҳанд.

Ризоев дар моҳи январ ба омӯзгорон дастур додааст, ки якбора ба чанд маҷалла обуна шаванд.

"Роҳбари мактаб дар асоси моддаи 181 Кодекси меҳнат барои ҷалби омӯзгорон дар кори ба рӯйхатгирии сокинон дар охири моҳи декабри соли 2018 танбеҳ гирифта буд. Омӯзгорон набояд ба чунин корҳо ҷалб карда шаванд. Мудири мактаб аз ин хулоса набароварда, моҳи январи соли 2019 омӯзгоронро иҷборан ба чанд маҷалла обуна кардааст", - омадааст дар хабари вазорати маориф.

Конгресси ИМА ба баҳси амнияти марзӣ нуқта гузошт

Демократҳо ва ҷумҳурихоҳони Конгресси ИМА дар масъалаи амнияти марзҳои ҷанубии ин кишвар ба созиши муқаддамотӣ расиданд. Ин созиш бояд аз эълони "шатдаун"-и навбатӣ пешгирӣ кунад. Қарор буд, 15 феврал кори ҳукумат қатъ шавад.

Ричард Шелбӣ, сенатори ҷумҳурихоҳ ба рӯзноманигорон гуфт, ки конгрессменҳо тавонистанд, дар мулоқоти пӯшида ба "созиши усулӣ" даст ёбанд. Мулоқоти пӯшида то нисфишабии рӯзи душанбе идома кардааст. Ҷузъиёти созиш шарҳ дода намешавад.

Дар ҳоли ҳозир маълум нест, президенти ИМА Доналд Трамп аз созиши ҳосилшуда пуштибонӣ мекунад ё на.

Тарҳи созиш ҷудо кардани 1,375 млрд долларро барои сохтмони девори байни марзи ИМА ва Мексико мадди назар дорад. Трамп барои девор 5,7 млрд дархост карда буд. Агар ҷонибҳо то охири ҳафтаи ҷорӣ ба созиш нарасанд, дар он сурат ҳукумати ИМА мумкин аст, дубора қисман фаъолияташро қатъ кунад.

Доналд Трамп рӯзи 25 январ хабар дод, ки муассисаҳои давлатӣ баъди "шатдаун" дубора ба фаъолият мепардозанд. "Шатдаун" дар охири соли 2018 эълон ва 35 рӯз идома кард.

Парвандаи фасодкорӣ дар азнавсозии маркази гармидиҳии Бишкек ба додгоҳ рафт

Додситонии кулли Қирғизистон омӯзиши парвандаи ҷиноятии фасодкорӣ дар азнавсозии маркази гармидиҳии шаҳри Бишкекро ба охир расонд.

Тафтишро Кумитаи давлатии амнияти миллии Қирғизистон анҷом додааст.

Ба иттилои додситонӣ, айбномаи сарвазирони пешини ин кишвар Сафар Исҳоқов, Жанторо Сатибалдиев, мансабдорони дигар - Осмонбек Ортиқбоев, Айбек Калиев, Салайдин Авазов, Жолдошбек Назаров, Темирлан Бримқулов, Олга Лаврова бо далелҳои сӯистифодаи мансаби давлатӣ ва фасодкорӣ асоснок шудааст.

Ин дар ҳолест, ки дар бораи айбномаи вазири пешини молияи Қирғизистон Олга Лаврова бори аввал хабар дода мешавад. Додситонӣ дақиқан хабар надодааст, ки нисбати вазири молия чӣ айбе эълон кардааст.

Рӯзи 11 феврал хулосаи айбдории мансабдорони зикршуда ба додгоҳи ноҳияи Свердлови шаҳри Бишкек фиристода шуд. Таърихи шуруъи муҳокимаҳои додгоҳӣ ҳанӯз дақиқ нест.

Ба иттило тафтишот, ҳангоми навсозии маркази гармидиҳии Бишкек ба давлат 111 млн доллар зарар расонида шудааст.

Оҷонсӣ дар бораи коррупсия дар зиндонҳо: "Ҷое, ки кор ҳаст, албатта фасод низ ҳаст"

Масъулини Оҷонсии зидди фасоди Тоҷикистон мегӯянд, ки дар зиндонҳои Тоҷикистон метавонад фасод ҷой дошта бошанд.

Муҳаммадсаид Файзуллозода, сардори Сарраёсати мубориза бо коррупсияи Оҷонсии зидди фасод рӯзи 12-уми феврал дар ҳузури хабарнигорон гуфт, “он ҷое, ки кор ҳаст, албатта фасод низ ҳаст.”

Ин масъули Оҷонсии зидди фасод дар посух ба суоли Радиои Озодӣ, ки оё дар зиндонҳои Тоҷикистон фасод ҷой дорад, гуфт:

“Дар зиндонҳои Тоҷикистон мо гуфта наметавонем, ки дар ҳамааш фасод ҷой дорад. Дар он ҷое, ки кор ҳаст, албатта фасод ҳаст. Дар ин самт корҳои оперативӣ бурда шуда истодааст, чораҳои қонунӣ қабул карда мешавад.”

Ҷаноби Файзуллозода аз шарҳи бештар худдорӣ кард ва аз ҷумла нагуфт, ки манзур аз вуҷуди фасод дар зиндон чист, то куҷо бо ин ҷурм касе ба ҷавобгарӣ кашида шудааст ва оё дар кадом зиндонҳои кишвар ин мушкил вуҷуд дорад.

Файзуллозода, дар робита ба ҳодисаи ошӯб дар зиндони рақами 3-и шаҳри Хуҷанд гуфт, он кормандони зиндон, ки даст ба фасодкорӣ задаанд ҷазо хоҳанд гирифт. Ба иттилои мақомот, феълан наздики 10 корманди собиқи ин зиндон ба ҷавобгарӣ кашида шудаанд.

Эҳтимоли вуҷуди фасод дар зиндонҳои Тоҷикистон баъд аз он расонаӣ шуд, ки дар паи ошӯб дар маҳбаси рақами 3-и шаҳри Хуҷанд 7 ноябри соли 2018, бархе расонаҳо бо такя ба шаҳодати волидону наздикони зиндониҳо гуфтанд, ки дар ин зиндон муомилаву муқаррароти ғайриқонунӣ вуҷуд дорад ва бисёр масъалаҳои зиндонҳо бар асоси фасоду пора ҳал мешаванд. Вале мақомоти расмӣ ҳеҷ гоҳ дар ин бора изҳори назар накарданд, ҳамонгуна, ки дар бораи ҷузъиёти бештари сабабҳои сар задани ошӯб ва ҳам ҷараёни таҳқиқи ин қазия то ҳол ҳеҷ сохтори тафтишотӣ ошкору батафсил маълумот надодааст.

Дар паи ошӯб дар зиндони Хуҷанд 21 зиндонӣ ва се корманди маҳбас кушта ва бисёри дигар захмӣ шуданд. Як сабаби аслии сар задани ошӯбро расонаҳои ғайридавлатӣ дар шиканҷаву озори маҳбусон мегӯянд. Мақомот он замон гуфтанд, ки гурӯҳи зиндониҳои маҳкумшуда барои фаъолиятҳои террористиву экстремистӣ мехостанд аз зиндон фирор кунанд, вале аз ин нақшаи онҳо ҷилавгирӣ шуд. Ошӯби зиндони Хуҷандро яке аз пурқурбонитарин ҳодисаҳо дар таърихи зиндонҳои Тоҷикистон мегӯянд.

Баъди ин раҳбарияти низоми додгоҳҳои Тоҷикистон иваз шуд ва раиси нав Мансурҷон Умаров гуфт, ки аз вазъи ҳама зиндонҳову ҳоли маҳбусон дидан кардаст. Сардори идораи зиндонҳои Тоҷикистон рӯзи 15-уми январ дар суҳбат ба Радиои Озодӣ гуфта буд, ки ҳоло дар зиндонҳои Тоҷикистон “мушкили ҷиддие боқӣ намондааст”.

“Он мушкилиҳое, ки буданд масъалаи ҷиноятҳои корупсиониву дигар мо қариб, ки онҳоро аз байн бурдем,”- таъкид кард Мансурҷон Умаров.

Маҳбасҳои Тоҷикистон баста ҳастанд ва дарёфти иттилои бетарафу воқеӣ аз вазъи ҳуқуқи инсон, риоя шудани ҳуқуқи зиндониҳо, поймолшавии қонун ва масоили дигар аксар вақт ғайриимкон аст. Гаҳ-гоҳе дар бораи ҳодисаҳо дар пушти панҷара хешовандони маҳбусон ба расонаҳо хабар медиҳанд.

Дар ҳоли ҳозир дар зиндонҳои Тоҷикистон 12 ҳазор нафар адои ҷазо мекунанд.

Ду зодаи Тоҷикистон дар Маскав 15-солӣ ҳукми зиндон гирифтанд

Додгоҳи минтақавии Маскав рӯзи 11 феврал ду зодаи Тоҷикистонро барои омодагӣ ба амали террористӣ дар маркази Маскав, вилояти Подмосковйе ва як электричкаи шаҳри Маскав ба 15 соли зиндон маҳкум кард. Хабарнигори ТАСС аз дохили толори додгоҳ хабар дод, ки маҳкумшудаҳо – Бахтиёр Маҳмудов ва Зафархон Раҳматов ҳукми зиндонро дар маҳбаси низомаш сангин сипарӣ хоҳанд кард. Додрас гуфт, ки аз дасти маҳкумшудаҳо дар ҷараёни таҳқиқи парванда ду автомат, ду маводи тарканда ва дигар маводи ҷангӣ мусодира шуда дар ихтиёри вазорати дифои Русия қарор дода шуд.

Дар хабар гуфта мешавад, ки маҳкумшудаҳо бо ҳукми зиндон розӣ нестанд ва ҳомиёни онҳо аз болои ин ҳукм шикоят мекунанд. Ин ду зодаи Тоҷикистон 11 декабри соли 2017 боздошт шуданд. Дар ҷараёни мурофиа, ҳарду Маҳмудов ва Раҳматов гуноҳи худро дар ҳифзу нигаҳдории силоҳ ва ҳам амали терористӣ эътироф кардаанд. Додрас гуфт, ки гуноҳи ин ду нафар дар узвияти гурӯҳи мамнӯи “Давлати исломӣ” тасдиқи худро ёфт.

Қазияи як ширкатдори дигари ҳамин парванда Руслам Баширов, ки ҳамчунин зодаи Тоҷикистон буда, қаблан ба 11 соли зиндон маҳкум шуд, ҷудогона таҳқиқ шудааст. Башировро дар он гунаҳгор карданд, ки мехост маркази тиҷоратии “Эделвейс”-ро дар моҳи декабри соли 2017 битарконад.

Вазири хориҷӣ: "Равобит бо Эрон пас аз ҳимояти гурӯҳҳои сиёсӣ ва молӣ аз ҲНИТ сард шуд"

Сироҷиддини Мӯҳриддин, вазири умури хориҷии Тоҷикистон рӯзи 12-уми феврал зимни нишастии хабарии ин ниҳод гуфт, ки дар равобити сиёсӣ миёни Душанбе ва Теҳрон як мушкили сиёсии кӯчак боқӣ мондааст ва умедворӣ намуд, ки муносибатҳо хуб хоҳанд шуд. Ба гуфтаи вазири умури хориҷии Тоҷикистон, дар равобити ду кишвар то сентябри соли 2015 мушкиле вуҷуд надошт. Аммо ба гуфтаи вай, мушкилоти сиёсӣ баъд аз он ба миён омад, ки бархе аз гурӯҳҳои сиёсиву молӣ дар Эрон аз ҲНИТ ҳимоят намуданд.

Вазири умури хориҷии Тоҷикистон мегӯяд, ки дар бахшҳои дигар, аз ҷумла иқтисодӣ-иҷтимоӣт миёни Душанбе ва Теҳрон мушкиле вуҷуд надорад ва афзуд, ки шуморе аз ширкатҳои эронӣ дар тарҳи муҳими "Роғун" ширкат доранд. Сироҷиддини Муҳриддин дар нишасти хабарии худ умедворӣ кард, ки бо ҳал шудани мушкилоти сиёсӣ, равобити ҳар ду кишвари ҳамзабон рӯ ба беҳбудӣ меорад.

Изҳори назари вазири умури хориҷии Тоҷикистон дар мавриди равобит бо Эрон дар ҳоле садо дод, ки раиси ҷумҳур Эмомалӣ Раҳмон дар паёме мардуми Эронро ба муносибати чиҳилумин солгарди Инқилоби исломӣ таҳниат гуфтааст. Дар ин паём аз ҷумла омадааст, ки "Тоҷикистон алоқаманди таҳким ва густариши ҳарчи бештари муносибатҳои суннатии дӯстона бо Эрон мебошад".

Дар паёми Эмомалӣ Раҳмон ба Ҳасани Рӯҳонӣ ҳамчунин гуфта шудааст, ки Тоҷикистон ва Эрон метавонанд дар ҳавзаҳои мухталиф ҳамкориҳои худро тавсеа диҳанд, ки ба нафъи ҳар ду кишвар ва суботу амният дар минтақа мебошад.

Робитаҳои Тоҷикистону Эрон соли 2015 баъди он сард шуд, ки мақомоти Эрон гуфтанд, Бобаки Занҷонӣ, миллиардери зиндонии эронӣ қисме аз пулҳои худро ба Тоҷикистон бурдааст. Ӯ, ки ба дуздии маблағҳои бузурге гунаҳкор дониста мешавад, дар Тоҷикистон чандин тарҳи бузурги иқтисодӣ амалӣ кардааст. Аз ҷумла истгоҳи муосири автобусҳо дар Душанбе бо пули ширкатҳои ин тоҷири эронӣ сохта шудааст.

Аммо ин робитаҳо баъди ҳузури раиси Ҳизби мамнуи наҳзати исломӣ дар як конфронсе дар Эрон комилан ба сардӣ гароид. Тоҷикистон ҳизбро созмони ифротӣ эълон кардааст. Раҳбарони ҳизб мегӯянд, ҳеҷ гоҳ ақидаҳои ифротӣ надоштаанд ва ҳадафи манъи фаъолияти онҳо дар соли 2016 фақат аз саҳнаи сиёсӣ канор задани як ҳизби исломӣ ва мухолифи давлат буд.

Баъд аз соли 2017 робитаҳо бо Эрон ба ҳадде тира шуд, ки ҳукумати Тоҷикистон ин кишварро ошкоро ба талош барои барангехтани низоъ ва ҳимоят аз терорризм муттаҳам кард. Мақомоти Тоҷикистон ҷониби Эронро ҳамчунин дар қатли шуморе аз чеҳраҳои сиёсӣ ва фарҳангиву илмӣ дар солҳои ҷанги шаҳрвандӣ ва пас аз он муттаҳам карданд. Иттиҳоме, ки Эрон онро ҳамвора радд кардааст.

Сибғатуллоҳ Муҷаддадӣ даргузашт

Сибғатуллоҳ Муҷаддадӣ, нахустин раҳбари ҳукумати Афғонистон пас аз пирӯзии муҷоҳиддин, шаби гузашта дар яке аз бемористонҳои шаҳри Кобул дар сини 93-солагӣ аз дунё даргузашт. Оқои Муҷаддадӣ пас аз шикасти ҳукумати Доктор Наҷибуллоҳ дар соли 1992, барои ду моҳ ба унвони раиси ҳукумати муваққат кор карда буд.

Ӯ раиси Луи Ҷиргаи Қонуни асосии Афғонистон низ буд ва ҳамчунин чандин сол ба унвони раиси Сенати Афғонистон ифои вазифа намуд. Профессор Муҷаддадӣ таҳсилкардаи Донишгоҳи Ал-Азҳари Миср ва муассиси Ҳизби ҷабҳаи наҷоти миллии Афғонистон буд ва аз раҳбарони миёнарави муҷоҳиддин ба шумор мерафт. Сибғатуллоҳ Муҷаддадӣ аз чеҳраҳое буд, ки бар имзои созишномаи амниятӣ бо Амрико таъкид дошт, аммо дар он замон Ҳомиди Карзай, президенти вақти Афғонистон аз имзои он ибо варзид.

Туркманистон роҳи мошинҳои борбари Тоҷикистонро бастааст

Мақомоти тоҷик мегӯяд, Туркманистон ба мошинҳои кишварҳои дигаре, ки барои Тоҷикистон бору коло меоранд, иҷозаи убур аз марзи худро додааст, аммо боркашҳои худи Тоҷикистон ҳамчунон иҷозаи убур аз қаламрави Туркманистонро надоранд. Мақомоти туркман аз рӯзи 4-уми феврал ба ин тараф иҷоза надодаанд, ки мошинҳои борбари Тоҷикистон ба қаламрави ин кишвар ворид шаванд. Ҷониби Тоҷикистон мегӯяд, ки то ҳанӯз ҳеҷ посухи расмӣ аз мақомоти Туркманистон дарёфт накардаанд.

Шералӣ Ганҷалзода, муовини вазири нақлиёти Тоҷикистон, рӯзи 11-уми уми феврал ба Радиои Озодӣ гуфт, мақомоти Ишқобод ахиран ба мошинҳое борбаре, ки аз кишварҳои дигар, аз ҷумла Туркия, ба Тоҷикистон бор меоранд, иҷозаи убур аз марзи худро додааст. Вале бо гузашти ҳудуди даҳ рӯз ва бо вуҷуди талошҳои мақомоти тоҷик, ҷониби Туркманистон сабабу омилҳои бастани марз ба рӯи мошинҳои борбари тоҷикро шарҳ надодааст.

Аз Сафоратхонаи Тоҷикистон дар Ишқобод ба Радиои Озодӣ гуфтанд, ки мақомоти Туркманистон вазъияти ба амаломадаро то ҳол расман шарҳ надодаанд ва бидуни огоҳии расмӣ роҳи убури мошинҳои Тоҷикистонро бастаанд. Намояндагони сафорати Тоҷикистон дар Ишқобод ба Радиои Озодӣ гуфтанд, бо ронандагоне, ки дар нимароҳ мондаанд, дар тамос мебошанд ва ба онҳо вазъро шарҳ додаанд. Ба гуфтаи ин намояндаи сафорат, аз тарафи Фароби Узбекистон ҳудуди 8 мошин дармондаанд, вале дақиқ намедонанд, ки дар Эрон чанд мошини борбари Тоҷикистон банд мондаанд.

Саидакрам Сафаров, ронандаи яке аз ширкатҳои Тоҷикистон гуфт, ҳоло дар Теҳрон қарор дорад ва барои бор кардани мол аз ширкати сохтмонии эронии "Амири кабир" иҷоза намедиҳанд. "Бовар кунед ба хотири он, ки марзи Туркманистон бастааст, дар инҷо иҷозат намедиҳанд, ки мошинро бор кунем, марз ҳамчунон бастааст. Ва мисли мо даҳҳо мошин дар инҷо қарор доранд ва боз дар марз ҳам онҳое, ки мунтазири боз шудани сарҳад ҳастанд, зиёд мебошанд",-афзуд ин ронандаи тоҷик.

Шералӣ Ганҷалзода, муовини вазири нақлиёти Тоҷикистон мегӯяд, соҳибони мошинҳо метавонанд аз ду роҳи алтернативии дигар истифода кунанд. Ин роҳҳо ба қавли ҳамсӯҳбати мо, тариқи Ҳироти Афғонистон ва бандари Озарбойҷон мебошад. Аммо ба гуфтаи соҳибкорон, ин ду масир барои боркашонӣ тӯлонӣ мебошад ва хароҷоти он зиёд аст.

Бори аввал нест, ки Туркманистон бе ягон шарҳи расмӣ гузаштани мошинҳои боркаши Тоҷикистонро аз қаламраваш манъ мекунад. Аз ҷумла, мақомоти Туркманистон аз охири моҳи августи соли гузашта ба мошинҳои Тоҷикистон иҷоза надод, аз қаламрави Эрон вориди кишварашон шаванд. Гурӯҳе аз ронандагон он вақт гуфта буданд, дар марзи Туркманистон ва Эрон дармондаанд ва намедонанд, сабаби роҳ надодани онҳо ба қаламрави Туркманистон чӣ ҳаст.

Ин роҳбандии мақомоти туркман дар роҳи мошинҳои боркаши Тоҷикистон бештар аз як моҳ идома кард. Дар ин муддат мақомоти Ашқобод ҳеҷ шарҳи возеҳе дар бораи манъи вуруди мошинҳо ва қаторҳои Тоҷикистон ба қаламраваш надод.

Охири моҳи август ва аввали сентябри соли гузашта дар маҷмӯъ танҳо дар гузаргоҳи Лутфобод-Ортиқ 100 мошин дармонда буд. Ин мошинҳо асосан молу маҳсулотро аз Туркияву Эрон меоранд ва аз хоки Эрон ба Туркманистон гузашта, сипас ба Тоҷикистон меоянд.

Тоҷикистону Туркманистон аз ҷумлаи ду кишвари Осиёи Марказӣ ҳастанд, ки соли гузашта дар равобиташон сардӣ эҳсос мешуд. Ин ду кишвар ҳарчанд барои якдигар шарики стратегӣ ба ҳисоб мераванд, вале ҳаҷми тиҷораташон ночиз аст.

Дар рӯзи таҷлил аз инқилоби исломӣ Рӯҳонӣ ИМА-ро дар "тавтеа" гунаҳгор кард

Президенти Эрон Ҳасани Рӯҳонӣ дар рӯзи таҷлил аз 40-солагии инқилоби исломии Эрон, ки боиси суқути режими шоҳ шуд, ИМА-ро дар “тавтеа” гунаҳгор кард.

Зимни муроҷиат ба ширкатдорони ҳамоише дар майдони Озодии шаҳри Теҳрон рӯзи 11 феврал, Рӯҳонӣ инчунин гуфт, бо вуҷуди ихтилофҳои ИМА ва муттафиқонаш, Эрон ният дорад қудрати низомӣ ва барномаи мушакиашро тавсеа бахшад.

Дар маросими таҷлил аз 40-солагии инқилоби исломӣ дар Эрон ҳазорҳо сарбозу низомӣ, рӯҳониён ва шаҳрвандони оддӣ иштирок карданд. Дар ҳодисаҳои соли 1979 тарафдорони ҳукумати исломӣ ба раҳбарии Оятулло Рӯҳулло Хумайнӣ ҳукумати шоҳ Ризо Паҳлавиро барканор карда, сари қудрат омаданд.

Дар ҷараёни гирдиҳамоии рӯзи 11 феврал издиҳоми мардум бо шиору навиштаҷоти ҳамешагии мисли “Марг бар Амрико”, “Марг бар Исроил” ва дигарҳо ҳозир шуданд.

Ҷашнгирӣ аз инқилоб дар Эрон ҳамасола рӯзи 1 феврал – дар рӯзи бозгашти Хумайнӣ аз хориҷа шурӯъ мешавад ва рӯзи 11 феврал, дар рӯзи суқути ҳукумат анҷом меёбад.

Ҷашнҳои имсола дар шароите мегузарад, ки таниш дар равобити Эрону ИМА баъди берун шудани Вашингтон аз созиши ҳастаии соли 2015 ва бозгашти таҳримҳо болои иқтисоди Эрон дар ҳоли афзоиш аст.

Сафари котиби давлатии ИМА дар Аврупо шурӯъ шуд

Помпео аз чап ва Орбан аз рост

Котиби давлатии ИМА Майк Помпео рӯзи 11 феврал сафари панҷрӯзаи худро ба кишварҳои Аврупо шурӯъ кард, ки ҳадафаш мухолифат ба нуфузи афзояндаи Русия ва Чин дар Аврупои Марказӣ мебошад. Помпео рӯзи 11 феврал вориди Венгрия шуда, баъдан аз Словакия ва Полша ҳам дидан мекунад. Қарор аст сафари ӯ бо дидор аз Брюссел ва Рейкявики Исландия дар таърихи 15 феврал ҷамъбаст шавад.

Мақомоти баландпоя гуфтанд, ки Помпео бояд бо нахуствазири Венгрия Виктор Орбан, як тарафдори президенти Амрико Доналд Трамп дидору мулоқот кунад. Як мақоми амрикоӣ бидуни бурдани номаш гуфт, ки дар музокирот талошҳо барои “тақвияти равобити амниятӣ ба хотири муқобила бо таҷовузи Русия ва тақвияти НАТО”, ҳамчунин кӯмак ба Украина баррасӣ мешавад.

Ба илова дар ҷараёни музокироташ бо мақомоти Венгрия, масъалаи дифои мушакӣ ва ҳавоӣ баррасӣ шуда, саҳми ин кишвар дар Афғонистон ва муборизааш бо гурӯҳи “Давлати исломӣ” дар Ховари Миёна матраҳ мешавад.
Қарор аст Помпео аз ҷомеаи шаҳрвандии Венгрия пуштибонӣ карда бо раҳбарони созмонҳои ҷамъиятии ин кишвар мулоқот кунад.

Венгрия, ки дар гузаштаҳо аз ҷониби созмони Хонаи озодӣ ба унвони як кишвари “озод” арёбӣ мешуд, ба хотири ҳамлаҳои пайвастаи ҳизби нахуствазир Виктор Орбан ба матбуот, додгоҳҳо, гурӯҳҳои динӣ ва созмонҳои ҷамъиятӣ дар гузориши соли 2019-аш ҳамчун як давлати “қисман озод” арзёбӣ мешавад.

Департаменти давлатӣ гуфт, ки сафари Помпео ба Аврупои Марказӣ баъди 30 соли суқути “деворҳои оҳанин” дар паи талошҳои озодихоҳона ва истиқлолталабонаи кишварҳои аврупоӣ сурат мегирад.

Қарор аст рӯзҳои 13 ва 14 феврал Помпео дар конфронси бахшида ба Ховари Миёна иштирок кунад, ки масоили Эронро дар маркази таваҷҷӯҳ қарор додааст. Дар ин нишаст қарор аст нахуствазири Исроил Бенямин Нетаняҳу, муовини президенти Амрико Майк Пенс, домоди президент ва ҳам мушовири калони Трамп дар умури Ховари Миёна Ҷаред Кушнер ва дигарҳо иштирок кунанд.

"Роҳпаймоии хашми модарон" дар саросари Русия

Дар шаҳрҳои Маскав ва Санкт-Петербурги Русия чандин иштирокдори ҳамоиши эътирозии "Роҳпаймоии хашми модарон"-ро боздошт карданд, ки рӯзи 10 феврал бидуни иҷозати мақомот баргузор шуд.

Ба ҷонибдорӣ аз фаъоли "Русияи боз" Анастасия Шевченко, ки бар асоси банди "созмонҳои номатлуб" айбдор мешавад, дар Екатеринбург, Ярославл, Қазон, Махачқалъа, Орёл ва чандин шаҳри дигари Русия тазоҳурот баргузор шуд. Чунин тазоҳурот дар Псков низ баргузор шуд.

Додгоҳ ба Шевченко иҷозат надод, ба аёдати духтари 17-солааш биравад, ки охирҳои моҳи январ дар шуъбаи эҳёгарӣ даргузашт.

"Дар шуъбаи эҳёгарӣ даргузашт ва Анастасияро иҷозат надоданд, ки ба аёдаташ биравад. Зеро ӯ ба хотири мавқеи шаҳрвандӣ дар ҳабси хонагӣ қарор дошт. Имрӯз таъқиби модароне, ки ояндаи беҳтар, созмон додани давлату ҷомеаи беҳтарро мехоҳанд, як кори маъмулӣ ва ҳаррӯза шудааст", навиштаанд иштирокдорони "Роҳпаймоии хашми модарон" дар шабакаи иҷтимоии Фейсбук.

Созмондиҳандагони ҳамоиши эътирозӣ раҳоии занон ва тамоми маҳбусони сиёсиро дар Русия талаб доранд.

Дар эътирозҳои Маскав садҳо нафар иштирок доштанд. Пулиси Петербург иштирокдорони ҳамоиши эътирозиро, ки аз тахминан 150 нафар иборат буд, бо таҳдиди истифодаи нирӯи ҷисмонӣ хост, пароканда шаванд. Ҷамъшудаҳо масири худро тағйир дода, дар кӯчаҳо ором ва бидуни шиор роҳпаймоӣ карданд. Вале бо вуҷуди ин пулис чанд касро дастгир кард.

Созмони байналмилалии ҳомии ҳуқуқи Amnesty International Анастасия Шевченкоро маҳбуси сиёсӣ эътироф карда, аз мақомоти Русия талаб намуд, ӯро фавран озод кунанд.

Намоиши филми "арӯсрабоӣ" қирғизистониҳоро ба хашм овард. ВИДЕО

Саҳнае аз филми арӯсрабоӣ

Намоиши филми бисёрсериягии "Акшоола – Шуои сафед", ки яке аз қаҳрамонони он дуздида мешаваду баъди гуфтугӯ зиндагиро бо нафари рабоянда идома медиҳад, хашми корбарони қирғизро дар шабакаҳои иҷтимоӣ ба бор овард.

Ин филмро телевизиони асосии Қирғизистон тирамоҳи соли 2018 ба намоиш гузошт ва таҳиягаронаш мегӯянд, рабудани арӯс "анъанаи қадимӣ"-и мардуми қирғиз аст. Вале корбарон таҳиягарони онро дар таблиғи ҷинояткорӣ айбдор мекунанд.

"Шуои сафед" яке аз нахустин филми бисёрсериягӣ дар Қирғизистон аст. Онро Ширкати телевизион ва радиои ин кишвар бо пули буҷа ба навор гирифтааст. Ҳарчанд ҳаҷми харҷи филм гуфта намешавад, вале ба иттилои тасдиқношуда, дар таҳияи он 250 ҳазор доллар сарф шудааст.

Бештари бинандаҳоро филми мазкур ба ҳайрат овардааст. Яке аз қаҳрамонони он бо ҳадафи издивоҷи иҷборӣ дуздида мешавад ва шавҳараш чандин бор ӯро латтукӯб низ мекунад. Вале пас аз як суҳбат бо дугонааш, ки ӯро ба зиндагӣ ташвиқ мекунад, вазъ ғайриинтизор тағйир меёбад.

"Ҳамааш хуб мешавад, Ойпарӣ. Ту танҳо Амонро гунаҳкор накун. Шояд ту ҳам гуноҳе дошта бошӣ. Дар бораи ҷанбаҳои мусбати ӯ фикр кун. Аз ҳама муҳимаш ӯ туро дӯст медорад", - мегӯяд дугонааш ба арӯси рабудашуда.

Коргардони филм Ирис Окенова мегӯяд, "Шуои сафед"-ро дар асоси романе таҳия кардаанд, ки воқеияти таърихӣ дорад.

Шӯрои нозирони Ширкати телевизион ва радиои Қирғизистон ваъда додааст, ки дар наздиктарин ҷаласаи худ филмро баррасӣ хоҳад кард. Вале фаъолон мегӯянд, бо ирсоли як хитоба аз мақомот дархост хоҳанд кард, ки филм дубора намоиш дода нашавад.

Ба амрикоиҳо парвоз бо ҳавопаймоҳои Туркманистон манъ шуд

Сафорати Амрико дар Туркманистон аз кормандонаш хост, ки аз хадамоти ширкати ҳавопаймоии ин кишвари пӯшидаи Осиёи Марказӣ истифода накунанд.

Ин тасмими сафорат 7 феврал пас аз он гирифта шуд, ки парвози ҳавопаймоҳои "Туркменҳовайолларӣ"-ро дар ҳудуди кишварҳои Иттиҳоди Аврупо манъ карданд.

Оҷонси амнияти ҳавонавардии Аврупо (EASA) парвози ҳавопаймоҳои ширкати миллии Туркманистонро то замони тасдиқи посухгӯ буданаш ба талаботи ҷаҳонии амнияти ҳавонавардӣ боз дошт. "Дар робита ба ин, кормандони сафорати Амрико наметавонанд бо ҳавопаймоҳои ширкати миллии Туркманистон сафар кунанд", – омадааст дар баёнияи сафорат.

Ба огаҳии сафорат, ин тасмим ба парвозҳои маҳаллӣ ва байналмилалӣ дахл дорад. Сафари дипломатҳои амрикоӣ бо ҳавопаймоҳои Туркманистон танҳо баъди бекор шудани маҳдудияти Оҷонси амнияти ҳавонавардии Аврупо мумкин хоҳад шуд.

Рӯзи 4-уми феврали имсол дар сомонаи Вазорати умури хориҷии Бритониё хабар нашр шуд, ки Оҷонсии амнияти ҳавонавардии Аврупо ширкати "Туркменҳовайолларӣ"-ро ба рӯйхати сиёҳ ворид кардааст. То ба ҳол маълум нест, ширкат чӣ меъёрро вайрон кардааст.

Мураббии узбек дар шикастани дандони кӯдаки 4-сола айбдор мешавад. ВИДЕО

Модари як писарбачаи 4-сола аз шаҳри Ангрени Узбекистон мегӯяд, мураббии боғча фарзанди ӯро латтукӯб карда, дандонашро шикастааст. Дар видеое, ки дастраси мо шуд, кӯдак мегӯяд, вақте мураббӣ ӯро зад, дандонаш шикаст.

Ба гуфтаи ҳамсуҳбати мо, мураббӣ фарзандашро пайваста латтукӯб мекард ва 28 январ, пас аз он ки кӯдак бо дастони хунолуд ба хона баргашт, ӯ ба раҳбарони боғча шикоят кард.

"Дастонаш пури хун буд. Рафта, пурсидам, ки чаро боз кӯдакро заданд. Вале мураббӣ дар посух гуфт, ки беҳтар аст, фарзандамро дуруст тарбия кунам. Акнун ӯ то 9-солагӣ бе дандон мегардад?", - изҳор дошт ӯ.

Яке аз раҳбарони боғчаи мазкур гуфт, ҳоло масъаларо баррасӣ доранд ва мураббӣ танбеҳ гирифта, аз модари кӯдак узр пурсид.

"Дандони кӯдак афтидааст. Ба гуфтаи модари ӯ, дандони фарзандаш дар натиҷаи латтукӯб шикастааст. Вале мураббӣ мегӯяд, ӯро латтукӯб накардааст. Бо вуҷуди ин мо аз модари кӯдак узр пурсидем", - афзуд вай.

Модари кӯдак мегӯяд, аз шеваи "муҷозот" шудани мураббии боғча норозӣ аст. "Мураббие, ки кӯдаконро мезанад, набояд дар боғча кор кунад. Ӯ бо навиштани баёнот ва як танбеҳ аз ҷавобгарӣ озод шуд", - илова кард ӯ.

Мақомоти Қазоқистон: дудбаро надоштани хона боиси марги панҷ хоҳар шуд

Мақомоти ҳолатҳои фавқулодаи Қазоқистон сабаби дар оташсӯзӣ ҳалок шудани панҷхоҳаронро дар шаҳри Остона шарҳ доданд.

"Набудани мурӣ ё дудбаро боиси оташсӯзӣ шудааст. Сақфи хона оташ гирифта, фурӯ рехтааст", - хабар дод Жасулан Актаев, як мақомдори Қазоқистон.

Вай гуфт, дар бештари ҳолатҳо соҳибони манзилҳо кормандони ҳолатҳои фавқулодаро намегузоранд, ки хонаҳояшонро тафтиш кунанд. Чораи ягонаи пешгирӣ аз оташсӯзӣ - баргузории корҳои фаҳмондадиҳӣ аст, мегӯяд мақомдор.

Рӯзи ҷумъа дар шаҳри Остона насби дастгоҳҳои аз сухтор огоҳкунанда дар манзили хонаводаҳои серфарзанд шуруъ шуд. Мақомоти он кишвар дар минтақаҳои дигари Қазоқистон низ тифтишро шуруъ карданд.

Ба гуфтаи Актаев, ҳамасола дар Қазоқистон наздики 15 ҳазор оташсӯзӣ сар мезанад, ки 70 дарсади онҳо дар манзилҳои зист рух медиҳанд. Шумори қурбониён дар як соли охир қариб 20 дарсад зиёд шудааст. Дар як моҳи соли 2019 дар оташсӯзиҳои Қазоқистон 116 одам кушта шудааст.

Рӯзи 4 феврал дар шаҳри Остона дар сухтори як манзили зист панҷ фарзанди як оила кушта шуд, ки калонтарини онҳо 12 сол ва хурдтаринашон ҳамагӣ чанд моҳ умр дошт. Мақомоти маҳаллӣ гуфтанд, ки ҳангоми сухтор волидон дар хона набудаанд.

Аз сокинони Бишкек даъват шуд, барои арусӣ аз бонк қарз нагиранд

Шаби 10 ба 11 феврал як гуруҳи фаъолон дар рӯи роҳи наздик ба муассисаҳои молии шаҳри Бишкеки Қирғизистон навиштанд, ки "Барои арусӣ аз бонк қарз нагиред!".

Барои навиштаҳо даромадгоҳи бонкҳо ҳадафмандона интихоб шудааст, хабар доданд фаъолон.

Фаъолон бовар доранд, ки одамон бо пул муносибат карданро намедонанд. "Барои баргузории чорабиниҳои камаҳамият қарз мегиранд. Онҳо барои тиҷорат на, балки барои баргузории туй қарз мегиранд. Баъд дар чоҳи қарз фурӯ мераванду ҷавонон ба ивази чашидани хушиҳои зиндагӣ дар фикри баргардонидани қарз мешаванд", - шарҳ доданд онҳо.

Фаъолон гуфтанд, ки рафтори онҳо ба ҳеч ваҷҳ зидди фаъолияти бонкҳо равона нашудааст.

Дар Қирғизистон маросимҳои арусӣ бо ширкати шумори зиёди меҳмонон барпо мешаванд ва дар бештари ҳолат навхонадорон ё волидони онҳо маҷбур мешаванд, ки аз бонк қарз бигиранд. Ҳукумат ва порлумони Қирғизистон аз маъракаҳои серхарҷ борҳо изҳори нигаронӣ ва даъват карданд, ки танзиме ҷорӣ шавад.

Ёфтҳои бештар

ҲСДТ бо чӣ умед дар интихобот иштирок мекунад?
лутфан мунтазир бошед

Феълан кор намекунад

0:00 0:04:10 0:00
Гузоришҳои радиоӣ
ПОДКАСТ
ҲСДТ бо чӣ умед дар интихобот иштирок мекунад?
Гузоришҳои радиоӣ

Гузоришҳои видеоӣ

Зиндагии Гулбаҳор дар "Кохи яхин"
лутфан мунтазир бошед
Embed

Феълан кор намекунад

0:00 0:02:27 0:00
XS
SM
MD
LG