Пайвандҳои дастрасӣ

Хабари нав

Хабарҳо

Трамп гуфт, Туркия аз ҳад гузаронад, иқтисодашро "нобуд мекунад"

Президенти Амрико Доналд Трамп бо раиси ҷумҳури Туркия Раҷаб Таййиб Эрдуғон

Мақомоти Туркия гуфтанд, ки тайёрӣ ба амалиёти низомӣ дар шимолу шарқи Сурия "ба поён расидааст", дар ҳоле ки президент Доналд Трамп таҳдид кард, агар Туркия "аз ҳад гузаронад", иқтисоди он кишварро "нобуд мекунад".

Масъулони Вазорати мудофиаи Туркия рӯзи 7-уми октябр дар "Твиттер" навиштанд, қувваҳои мусаллаҳи кишвар "ҳеҷ гоҳ сохтани даҳлези террористиро дар марзҳояшон таҳаммул нахоҳанд кард".

Вазорат гуфтааст, эҷоди "минтақаи амн" дар шимоли Сурия ба мардуми он ва сулҳу оромӣ дар минтақа зарур аст.

Ин изҳорот пас аз тасмими ногаҳонии Трамп дар бораи беруншавии нерӯҳои Амрико аз минтақаҳои назди сарҳади Сурия бо Туркия садо дод, ки нирӯҳои таҳти раҳбарии курдро дар минтақа дар миёни ҳамлаи артиши Туркия мемонад.

Иёлоти Муттаҳида дар Сурия тақрибан 1000 сарбоз дорад ва 50 нафари онҳо аз минтақаи сарҳадӣ бароварда шуда, ба ҷойҳои дигар кӯчонида шудаанд. "Ҷойе, ки оташи ҷанг нест", -- гуфт як мансабдори баландпояи ҳукумати Иёлоти Муттаҳида.

Ягонаҳои муҳофизати халқҳои Курд (YPG), ки ба Қувваҳои Демократии Сурия (SDF) дар шимолу шарқи Сурия бартарӣ доранд, ҳампаймонҳои асосии Амрико дар шикаст додани гурӯҳи тундрави “Давлати исломӣ” ҳастанд.

Элиот Энгел: Трамп қасди хуруҷ аз паймони "Фазои боз"-ро дорад

Элиот Энгел, раиси демократи Кумитаи робитаҳои хориҷии Маҷлиси намояндагони Амрико

Як намояндаи баландпояи Маҷлиси Намояндагони Амрико аз Ҳизби демократ мегӯяд, давлати президент Доналд Трамп дар пайи баррасии берун рафтан аз паймони "Фазои боз" мебошад. Ин паймон яке аз паймонҳои муҳим оид ба назорати яроқ ва халъи силоҳ мебошад, ки дар остонаи фурӯпошӣ аст.

Элиот Энгел, раиси демократи Кумитаи робитаҳои хориҷии палатаи мазкур рӯзи 7-уми октябр бо нашри номае чунин иддао кардааст. Аммо ҳеҷ изҳорот ё тасдиқи фаврӣ аз Кохи Сафед ё Пентагон дар бораи ин иддао дода нашудааст.

Энгел дар нома ба мушовири амнияти миллӣ Роберт О,Брайен навиштааст: "Ман аз гузоришҳо дар бораи он ки ҳукумати Трамп масъалаи баромадан аз паймони "Фазои боз"-ро баррасӣ мекунад ва шуморо низ ба чунин амалӣ бепарвоӣ даъват мекунад, сахт нигарон ҳастам".

"Берун шудани Амрико танҳо ба Русия фоида меорад ва ба манфиатҳои амнияти миллии ҳампаймонон ва ҳамроҳони мо зараровар аст", -- навиштааст ӯ.

Паймони 14-солаи "Фазои боз" аз ҷониби 34 давлат имзо шуда, ҳадафи он тақвияти суботи байналмилалӣ бо иҷоза додан ба кишварҳои имзокунанда барои анҷоми парвозҳои назоратӣ ба фарози сарзаминҳои якдигар, мушоҳидаи марказҳои низомӣ ва иншоотҳои дигар аст .

Дар гузашта бархе аз қонунгузорҳо ва мансабдорони ҳарбии Амрико изҳор доштанд, ки Русия бо истифода аз фанноварии дурбини пешрафта, дар қаламрави Иёлоти Муттаҳида парвозҳо мегузаронад.

Мақомоти Иёлоти Муттаҳида ҳавопаймои Русияро бо истифода аз ин фанноварӣ дар соли 2016 аз парвоз нигоҳ доштанд.

Вазири хориҷии Русия бо сафари дурӯза вориди Қазоқистон шуд

Сергей Лавров, вазири корҳои хориҷии Русия имрӯз, 8 октябр бо президенти Қазоқистон Қосимҷомарт Тоқаев мулоқот мекунад. Ойбек Смадияров, сухангӯи вазорати корҳои хориҷии Қазоқистон хабар дод, ки Лавров бо ҳамтои қазоқистониаш Мухтор Тлеубердӣ низ мулоқот хоҳад кард.

"Вазирони хориҷии ду кишвар масоили муҳими ҳамкориҳои дуҷониба, равобити байналхалқии ду кишварро баррасӣ мекунанд", - гуфт Смадияров.

Масоили байналхалқӣ ва амнияти минтақавӣ низ дар гуфтугӯи ду вазир баррасӣ хоҳад шуд.

Ҷонибҳо ҳамчунин масоили омодагӣ ба баргузории чорабиниҳои дуҷонибаро муҳокима мекунанд. Миёни ин чорабиниҳо - 16-умин форуми байниминтақавӣ дар Омск, мулоқоти СПАД дар пойтахти Қирғизистон ҳастанд.

Неруҳои Туркия ба мавқеи курдҳои Сурия ҳамла карданд

Неруҳои ҳавоии Туркия дар шимолу шарқи Сурия ба мавқеи курдҳо ҳамла карданд. Дар ин бора расонаҳои Сурия хабар доданд. Ҳамла дар вилояти Хасака сурат гирифт, ки ситоди гуруҳҳои мусаллаҳи курдӣ дар ин вилоят қарор дорад. Дар бораи куштаву захмиҳо ҳанӯз хабаре нарасидааст.

Пештар аз ин президенти Туркия Раҷаб Эрдуғон аз омодагии неруҳои туркӣ ба амалиёти низомӣ дар ҳудуди Сурия хабар дода буд.

Мавлуд Човушоғлу, вазири корҳои хориҷии Туркия дар суҳбати телефонӣ бо ҳамтои эрониаш Муҳаммад Ҷавод Зариф гуфт, ки амалиёти низомӣ чораи муваққатист, зеро Туркия ба тамомияти арзии Сурия эҳтиром қоил аст.

Курдҳои Сурия - шарикони аслии ИМА дар мубориза зидди гуруҳи террористии "Давлати исломӣ" ҳастанд. Туркия гуруҳҳои курдиро террорист медонад.

Президенти ИМА Доналд Трамп рӯзи 6 октябр гуфт, агар Туркия коре кунад, ки ба ӯ писанд наояд, иқтисодашро ба ҳам хоҳад зад. "Пештар гуфта будам ва ҳоло боз ҳам мегӯям, агар Туркия коре кунад, ки аз чорчӯба берун бошад, иқтисодашро ба пуррагӣ маҳв хоҳам кард", - изҳор дошт Трамп.

Президентҳои ИМА ва Туркия 6 октябр суҳбати телефониеро анҷом доданд. Трамп пас аз суҳбат гуфт, дар робита ба амалиёти низомии Туркия дар шимоли Сурия аз Раҷаб Эрдуғон ҳимоят намекунад. Трамп гуфт, нерӯҳои амрикоӣ дар он иштирок нахоҳанд кард.

Дар Андиҷон мехостанд, латту кӯби хонандаро пинҳон кунанд

Дар шабакаҳои иҷтимоии Узбекистон видеои шикояти хонандае нашр шуд, ки мегӯяд, ӯро як омӯзгор латту кӯб кардааст. Ин ҳодиса як ҳафта пеш дар мактаби рақами 30-и ноҳияи Асакаи вилояти Андиҷон рух додааст.

Дар видео нафаре аз кӯдак сабаби гиряашро мепурсад ва ӯ дар ҷавоб мегӯяд, ки бо як ҳамсабақи худ ҷанҷол карданд ва омӯзгор танҳо ӯро муҷозот намуд. "Муаллима ба рӯям ду бор зад",-мегӯяд хонанда.

Зоҳиран кӯдак аз хонаводаи камбизоат аст ва худи ӯ низ дар навор мегӯяд, ки ҳангоми ҷанҷол ягона шими мактабияш дарид. Кӯдак ҳамчунин шикоят мекунад, ки омӯзгор ҳамеша ӯро таҳқир мекунад.

"Муаллим ҳамеша маро таҳқир карда, "саги безот" мегӯяд. Ӯ чӣ ҳақ дорад, ки маро дашном медиҳад ва латту кӯб мекунад? Дигар хоҳиши иштирок дар дарси ҷуғрофиёро надорам",-меафзояд хонанда.

Бахши узбекии Радиои Озодӣ маълум кард, ки ҳодиса дар мактаби рақами 30-и Асака рух дода, кӯдак дар синфи 7-ум мехонад. Яке аз кормандони мактаби мазкур, ки аз қазия огаҳ аст, гуфт, ҳодиса як ҳафта пеш дар дарси ҷуғрофиё рух додааст.

"Дар рафти дарс ду хонанда ҷанҷол мекунанд ва омӯзгор яке аз онҳоро ду шапотӣ мезанад. Вақтҳои ахир шикоят аз болои омӯзгори фанни ҷуғрофиё зиёд шудааст",-афзуд ҳамсуҳбати мо.

Мудири мактаби рақами 30 Гулчеҳра Мирзоахмедова рух додани ҳодиса дар муассисаи таълимии зери раҳбарияшро тасдиқ кард. "Ҳамин ҳоло видеоро тамошо ва омӯзгору волидони кӯдакро даъват кардам. Ин масъаларо ҳал мекунем. Шумо дертар ба ман занг занед",-изҳор дошт мудир. Вале баъдан ба зангҳои мо дигар ҷавоб надод.

Занозании муҳоҷирон дар Новосибирск: 50 кас боздошт шуд

Дар натиҷаи як занозании гуруҳӣ дар шаҳри Новосибири Русия 50 кас боздошт шуданд. Дар ин задухӯрд ҷамъан ҳудуди 200 кас иштирок дошт.

Шоҳидони ҳодиса дар шабакаҳои иҷтимоӣ хабар доданд, ки ҳодиса 7 октябр дар назди бозори "Хилокский" рух дод. Ба маҳалли ҳодиса маъмурони "ОМОН" ва "СОБР" сафарбар шудаанд.

Манбаи хабаргузории "Интерфакс" мегӯяд, иштирокдорони занозанӣ аз силоҳ истифода накарданд ва танҳо нозири минтақавӣ барои огоҳӣ ба осмон оташ кушодааст. Вале хабаргузории ТАСС бо такя ба манбаи худ иттилоъ дод, ки дар задухӯрд аз ислоҳ истифода шудааст. Дар Вазорати умури дохилии Русия гуфтанд, ки дар он ҳодиса як кас осеб дидааст, вале аз шарҳи бештар худдорӣ карданд.

Шоҳидон дар шабакаҳои иҷтимоӣ навиштанд, ки дар маҳалли ҳодиса як мошини "Газел" ва як "Инфинитӣ" оташ гирифт. Нашрияи "Новосибирск Онлайн" иттилоъ дод, ки задухурд ба далели оташ гирифтани мошини "Инфинитӣ" сар задааст.

"Тайга.Инфо" навишт, низоъ нахуст миёни ду тоҷир бар сари пули иҷораи анбор сар задааст. "Яке аз тоҷирон афроди мусаллаҳро барои гирифтани пули иҷораи анбор ба сари тоҷири дигар фиристод ва ин муноқиша ҳанӯз 4 октябр оғоз шуда буд", - афзудааст манбаи расона.

Намояндаи ҷамъияти қирғизҳо дар Новосибир Жаркинбой Тойтуков дар суҳбат бо расонаҳо гуфтааст, ки занозанӣ миёни шаҳрвандони Қирғизистон сар зад. Бино ба фарзияи пешакӣ, як шаҳрванди Қирғизистон аз ҳамватанони худ пул тамаъ мекардааст. "Одамони ӯ шаҳрвандони моро латтукӯб карда, пул талаб мекарданд ва намегузоштанд, ки ҳамватанонамон дар бозор ором кор кунанд",-афзуд Тойтуков.

Дар натиҷа тоҷирон дигар вазъро таҳаммул накардаанд ва мошини "Инфинитӣ"-и шаҳрванди Қирғизистонро оташ задаанд.

Сафорати Қирғизистон дар Русия то ҳол ҳодисаро шарҳ надодааст.

Варзишкори узбек пас аз муҳориба дар Грозний ҷон бохт

Варзишкори узбек дар риштаи муҳорибаҳои омехта (ММА) Бекзод Нурматов пас аз рақобат бо варзишкори рус Беслан Исоев дар мусобиқаи шаҳри Грозний, ки 4 октябр баргузор шуд, аз олам даргузашт.

Ҷасади Нурматовро 8 октябр ба ватан оварданд. Бекзод дар мусобиқаи "Absolute Championship Akhmat 100" дар Чеченистон аз рақибаш Исоев бо хол шикаст хӯрда буд.

Ба гуфтаи созмондиҳандагони мусобиқа, Нурматов дар охири муҳориба худро аз зарбаи сахте натавонист ҳимоят кунад. Пас аз поёни муҳориба вазъи сиҳатии Нурматов бад шуда, ӯро ба беморхона интиқол доданд. Пас аз се рӯзи беҳушӣ, шаби якшанбе ба душанбе даргузаштааст.

Хабаргузории русии ТАСС бо такя ба наздикони варзишкор иттилоъ дод, ки ҷасади Нурматовро рӯзи сешанбе ба ватан интиқол медиҳанд ва худи ҳамон рӯз ба хок супорида хоҳад шуд.

Нурматов 27 сол дошта, дар 13 муҳориба 11 пирӯзӣ ба даст овардааст. Вазорати дифои Узбекистон Нурматовро ифтихори артиши ин кишвар номид. Варзишкори узбек солҳои ахир дар яке аз бошгоҳҳои муҳорибаи омехтаи Санкт-Петербург тамрин мекард.

"Расонаҳои Тоҷикистон 159 бор меъёри ахлоқро нақз карданд"

Дар се моҳи ахир аз ҷониби расонаҳо дар Тоҷикистон 159 бор меъёрҳои ахлоқи журналистӣ, нақз шудааст. Шӯрои Васоити Ахбори Омми Тоҷикистон рӯзи 8-уми октябр зимни як ҳамоиш аз мониторинги семоҳаи худ натиҷагирӣ кард. Ба гуфтаи масъулони ин Шӯро, мониторинг 50 расонаи электронӣ ва чопии дохилиро дар бар гирифт.

Масъулони Шӯрои ВАО гуфтанд, ки бар пояи ин мониторинг, давоми ин се моҳ аз ҳама бештар меъёрҳои ахлоқи журналистӣ аз сӯи ҳафтаномаи СССР - 19 бор, "Фараж" ва "Самак" 18 борӣ, "Оила" 16 бор, нақз шудааст.

Бандҳои асосие, ки расонаҳо онро нақз кардаанд, ин ҷудо будани эҷодиёт аз тиҷорату реклама, асардуздӣ, иффати миллӣ ва эҳтироми фарҳанги ғайр ва ҳифзи шаъну шараф ва эътибори шахс мебошад.

Ин нишаст бо ширкати масъулони Шӯрои ВАО намояндагони расонаҳои кишвар дар Маҷмааи "Шарқи Озод" баргузор шуд.

Шӯрои ВАО як созмони мустақили журналистист, ки соли 2009 ташкил шуда, дар баробари ҳимоят аз ҳаққи хабарнигорон муҳтавои матолиби нашрияҳоро аз нигоҳи мутобиқаташон ба Кодекси ахлоқи журналистӣ низ пайгирӣ мекунад.

Эрону Тоҷикистон барои тармими туннели "Истиқлол" $10,5 млн ҷудо карданд

Мақомоти тоҷик ва эронӣ ба мувофиқа расидаанд, ки бархе тарҳҳои ниматамоми Эрон дар Тоҷикистон, монанди туннели "Истиқлол" (Анзоб)-ро, ки насби таҷҳизоти он такмил нашудааст, бо ҳамкории якдигар ба итмом расонанд.

Ин мавзӯъ дар мулоқоти Ризо Ардакониён бо Сӯҳроб Мирзозода, муовини аввали вазири нақлиёти Тоҷикистон дар Теҳрон, матраҳ шудааст. Ба гуфтаи мақомоти эронӣ, ин сафар бар асоси тамоюли ҳар ду кишвар барои фаъолияти бештари Эрон ва ширкатҳои паймонкорӣ ва машваратии Эрон дар Тоҷикистон, сурат гирифтааст.

Муовини вазири энержии Эрон ба расонаҳои ин кишвар гуфтааст, ки маблағи ин тарҳҳо 10,5 миллион доллар мебошад, ки ба таври 50-50 дарсадӣ байни ду кишвар иҷро хоҳад шуд. Ҷонибҳо ба тавофуқ расидаанд, ки ин тарҳҳо ниматамом то соли 2020 ба анҷом расанд. Нақби муҳиме, ки сохтмонаш солҳои тӯлонӣ идома кард, вале ҳанӯз ҳам системаи ҳавокашии муносиб ва рӯшноӣ надорад.

Нақби “Истиқлол”-ро ки маркази Тоҷикистонро бо шимоли он мепайвандад, Эрон бо харҷи бештар аз 60 миллион доллар ва дар муддати 3 сол сохт. Онро соли 2006 бо ҳузури Маҳмуди Аҳмадинажод, раиси ҷумҳури собиқи Эрон ва Эмомалӣ Раҳмон, раиси ҷумҳури Тоҷикистон ба истифода доданд. Аммо нақби мазкур солҳои тӯлонӣ як роҳи торику хатарнок ва ноҳамвор барои нақлиёт буд ва баъд аз тармиму таҷдиди тӯлонӣ дар соли 2011 роҳашро ҳамвор ва обашро хушк карданд.

Эрон, ки бо Тоҷикистон дар чанд соли пеш робитаҳои хуб дошт, ду тарҳи бузург, аз ҷумла нақби "Истиқлол" ва нерӯгоҳи "Сангтӯда-2" –ро амалӣ кардааст. Айни замон ду тараф баъди робитаҳои сарди сесола, ба ҳам наздик мешаванд ва дар тобистони имсол раиси ҷумҳури Эрон Ҳасани Рӯҳонӣ ба Тоҷикистон сафар кард.

Тӯйҳои бидуни санади издивоҷ дар Узбекистон ҷиноят шумурда мешаванд

Дар Узбекистон тасмим доранд, барои бастани никоҳи бидуни сабт дар мақомоти расмии давлатӣ ҷавобгарии ҷиноӣ роҳандозӣ кунанд.

"Барои бастани никоҳи бидуни қайд дар мақомоти давлатӣ ҷавобгарии ҷиноӣ пешбинӣ хоҳад шуд. Дар робита ба ин ҳоло дар ҷумҳурӣ ба қонунгузорӣ тағйирот ворид мешавад ва дар асоси ин тағйирот, домуллоҳое ба ҷавобгарӣ ҷалб мешаванд, ки бидуни санади САҲШ (сабти асноди ҳолатҳои шаҳрвандӣ) зану мардро никоҳ мекунанд",-гуфт Гавҳар Олимова, муовини раиси вилояти Самарқанди Узбекистон.

Ба иттилои расонаҳои маҳаллӣ, дар Узбекистон соли ҷорӣ расман 33 ҳазор ҷуфт аз қайди расмии никоҳи давлатӣ гузаштаанд. Ин дар ҳолест, ки 12 150 оилаи дигар бар асоси қонунҳои шариат оила бунёд кардаанд.

Гуфтугӯи телефонии Эмомалӣ Раҳмон ва Александр Лукашенко

Эмомалӣ Раҳмон ва Александр Лукашенко, президентҳои Тоҷикистон ва Белорус ба густариши ҳамкориҳо миёни ду кишвар дар арсаҳои гуногун таъкид кардаанд. Ба иттилои дафтари матбуоти раёсати ҷумҳури Тоҷикистон, Эмомалӣ Раҳмон ва Александр Лукашенко дар ин гуфтугӯи телефонӣ, ки рӯзи 5-уми октябр сурат гирифтааст, президентҳои ду кишвар "ҳамчунин масъалаҳои алоҳидаи минтақивию байналмилалии мавриди таваҷҷуҳи тарафайнро баррасӣ намуданд".

Дафтари матбуоти раёсати ҷумҳури Белорус ҳам мегӯяд, ки сарони ду кишвар аз сатҳи ҳамкориҳои муваффақ дар арсаҳои гуногун изҳори ризоят намудаанд. Ин манбаъ мегӯяд, ки Лукашенко оқои Раҳмонро ба муносибати зодрузаш табрик гуфтааст.

Гуфтугӯи сарони Тоҷикистон ва Белорус дар ҳоле сурат мегирад, ки аз чанд рӯз ба ин тараф як фаъоли сиёсии мухолифи ҳукумати Тоҷикистон дар Белорус дар боздошт қарор дорад.

Мақомоти Белорус рӯзи 25-уми сентябр Фарҳод Одинаевро дар гузаргоҳи марзии "Каменный Лог", воқеъ дар сарҳади Литва ва Белорус боздошт карданд. Ӯ барои ширкат дар машварати солонаи Созмони Амният ва Ҳамкории Аврупо дар бораи ҳуқуқи инсон роҳии Варшава буд.

Мақомоти Тоҷикистон қаблан дар нома ё дархости худ ба ҷониби Беларус, Фарҳод Одинаевро ба "иштироку сармоягузорӣ ва таблиғи фаъолияти ифротгароӣ" муттаҳам карда буданд. Онҳо гуфтаанд, ки парвандаи зидди Одинаев моҳи октябри соли 2018 кушода шудааст. Вале намояндагони мухолифини тоҷик дар хориҷа мегӯянд, Фарҳод Одинаев чанд сол боз аз фаъолиятҳои сиёсӣ даст кашида, дар Маскав "зиндагии ором" дошт.

Пулиси Қирғизистон гуфт, видеои арӯсрабоиро таҳқиқ мекунад

Пулиси вилояти Таласи Қирғизистон эълом кард, ки видеои рабудани духтари 16-соларо бо мақсади издивоҷи маҷбурӣ таҳқиқ хоҳад кард. Наздикони духтар то ҳол ба пулис шикоят накардаанд.

Ахиран дар шабакаҳои иҷтимоӣ видеое нашр шуд, ки нишон медиҳад, духтареро дар як хона иҷборан нигаҳ медоранд ва ӯро маҷбур мекунанд, ки рӯймол бандад. Дар навор соли таваллуди духтар 2003 ва аз домод 1984 гуфта мешавад. Ин ҳодиса 6 октябр дар вилояти Талас рух дод.

Дар Кодекси нави ҷиноии Қирғизистон ҷазо барои арӯсрабоӣ сангинтар шуда, аз 5 то 10 соли зиндон пешбинӣ гаштааст. Ҳамчунин онҳое, ки духтари ноболиғро ба издивоҷ маҷбур мекунанд, 200 ҳазор сом ҷарима мешаванд.

Ба иттилои Вазорати умури дохилии Қирғизистон, дар 6 моҳи аввали соли равон 118 ҳолати арӯсрабоӣ ба қайд гирифта шудааст. Бештари ин ҳолатҳо дар деҳот рух додааст.

Аҳолии Русия то соли 2024 танҳо аз ҳисоби муҳоҷирон афзоиш меёбад

Коҳиши табиии шумори аҳолии Русия то соли 2023 идома хоҳад ёфт. Дар ин бора дар пешбинии рушди иқтисодию иҷтимоии Русия барои солҳои 2020-2022 гуфта шудааст, ки ҳамроҳ бо тарҳи будҷаи федеролӣ ба Думаи давлатӣ пешниҳод гашт.

Бар асоси санад, ба афзоиши шумори аҳолии Русия то соли 2023 муҳоҷирон "кумак" хоҳанд кард. Танҳо пас аз соли 2024 аҳолии Русия ба таври табиӣ афзоиш хоҳад ёфт. Шумори аҳолии Русия то соли 2024 ба наздики 149 миллион нафар хоҳад расид.

Пештар Росстат коҳиши босуръати аҳолии Русияро ба қайд гирифта буд. Дар нимаи аввали соли равон шумори фавтидагон нисбат ба таваллудшудаҳо 199 ҳазор бештар қайд шуда, ҳатто муҳоҷирон натавонистанд, коҳиши табиии аҳолиро "ҷуброн" кунанд.

Росстат охирҳои моҳи декабри соли гузашта хабар дод, ки бори нахуст дар 10 соли ахир шумори аҳолии Русия поин рафт.

Оҷонси омори Русия аз соли 2015 ба ин сӯ ҳангоми шумори аҳолӣ сокинони нимҷазираи ишғолии Қрим (ҳудуди 2 млн нафар)-ро ба ҳисоб мегирад. Аз замони ишғоли Қрим аз ҳисоби кӯч бастани тоторҳо ба минтақаҳои Украина шумори аҳолии он 50 ҳазор кам шудааст.

Дар Қазоқистон тартиби расонидани кумакҳои иҷтимоиро тағйир медиҳанд

Вазорати меҳнат ва ҳифзи иҷтимоии Қазоқистон рӯзи 7 октябр тарҳи "навшуда"-и механизми кумакҳои иҷтимоии суроғавиро ба ҳукумат пешниҳод кард.

Ин тарҳ бозҳисоби семоҳаи кумакҳои иҷтимоии суроғавиро барои "пешгирӣ аз вайронкориҳои эҳтимолӣ", инчунин ҷорӣ кардани тартиби кумак ба кӯдакон аз хонаводаҳои камбизоат пешбинӣ мекунад.

Биржан Нуримбетов, вазири меҳнат ва ҳифзи иҷтимоии Қазоқистон рӯзи 7 октябр гуфт, шарти асосии дарёфти кумакҳои иҷтимоии суроғавӣ шуғл пайдо кардани яке аз аъзои оила хоҳад буд. "Агар узви қобили меҳнати хонавода аз шуғлҳои пешниҳодшуда даст кашад, дар он сурат кумакҳои иҷтимоӣ ҳам ба вай ва ҳам ба аъзои оилааш қатъ мешавад", - гуфт Нуримбетов.

Механизми нави кумакҳои иҷтимоии суроғавӣ қарор аст, аз 1 январи соли 2020 ба иҷро дарояд. Кумаки нави давлатӣ барои оилаҳои серфарзанд, вобаста ба шумори фарзандон, расонидани аз 42 500 танга то 73 375 танга (мутаносибан 100 ва 180 доллари ИМА)-ро пешбинӣ мекунад.

"Барои кӯдакони то синни мактабӣ ғизои кӯдакона, васоили гигиенӣ, хадамоти омӯзишӣ таъмин карда мешавад. Барои кӯдакони синни мактабӣ ғизои гарм дар мактаб, либоси мактабӣ ва лавозимоти дигар, пардохти ҳаққи роҳкиро, инчунин хадамоти тиббӣ расонида мешавад", - гуфт вазир.

Ба иттилои вазорати меҳнат, дар нуҳ моҳи соли ҷорӣ кумаки иҷтимоии суроғавӣ ба бештар аз 400 ҳазор хонавода ва ё наздики 2,1 миллион одам расонида шудааст.

Баъди марги панҷ хоҳар аз як хонавода дар оташсӯзии моҳи феврали соли ҷорӣ дар пойтахти Қазоқистон, дар чанде аз минтақаҳои дигари он кишвар модарони серфарзанд бо нишони эътироз ба кӯча баромаданд.

Садҳо зан афзоиши кумакҳои давлатӣ, ҳалли мушкили дастрасӣ ба манзил, имтиёз ба хонаводаҳои серфарзандро талаб карданд. Дар пайи ин эътирозҳо ҳукумати Қазоқистон кумакҳои суроғавии иҷтимоиро бештар ва барномаи қарзҳои имтиёзнокро ҷорӣ кард.

Ироқ пас аз задухурдҳои хунин низомиёнро аз Бағдод мебарорад

Нахуствазири Ироқ Одил Абдулмаҳдӣ дастур дод, ки низомиён аз минтақаҳои шианишини шаҳри Бағдод берун бурда шуда, ба ҷои онҳо нерӯҳои пулиси федеролӣ ҷойгир карда шавад.

Фармони ихроҷи низомиён аз минтақаи Садр-Ситӣ 7 октябр, пас аз он содир гашт, ки дар натиҷаи як ҳафтаи эътирозҳои зиддиҳукуматӣ дар саросари Ироқ беш аз 100 кас кушта шуданд.

Сокинони Ироқ зидди сатҳи баланди бекорӣ, хадамоти сусту нокофии иҷтимоӣ ва фасодкории сартосарӣ эътироз доранд.

Низомиёни Ироқ дар изҳороти худ иқрор карданд, ки зидди тазоҳургарон "аз ҳад зиёд нерӯ" истифода шуд. Ба иттилои низомиён, мақомот ба ҷавобгарӣ кашидани фармондеҳонеро оғоз карданд, ки дар ин амалҳои ғайриқонунӣ даст доранд.

ИМА аз хабарҳо дар бораи хушунати ақалиятҳо дар Шинҷон нигарон аст

Элис Уэллс, як масъули вазорати хориҷии ИМА аз хабарҳо дар бораи хушунати ҷинсӣ нисбати ақалиятҳои уйғур ва қазоқ дар вилояти Шинҷони Чин амиқан изҳори нигаронӣ кард. Ин мақомдорои ИМА аз Пекин даъват кард, ки "ҳамлаи бераҳмона ба ҳуқуқи инсон ва озодии виҷдон"-ро қатъ кунад.

Уэллс дар саҳифаи Твиттер мақолаи нашрияи Washington Post-ро бознашр кард, ки дар он суханҳои занони қазоқтабори сокини Шинҷон оварда шудааст. Қазоқтаборон, ки сарфи назар аз монеаҳои давлати Чин билохира ҳудуди он кишварро ба қасди Қазоқистон тарк карданд, аз хушунатҳое нақл карданд, ки нисбати онҳо дар Чин раво дида шудааст. Гулзира Могдини 38-сола, яке аз он занон, ки ҳоло дар Қазоқистон зиндагӣ дорад, мегӯяд, дар Шинҷон тифли батнашро иҷборан исқот кардаанд.

Он занон гуфтаанд, ки дар "урдугоҳҳои бозтарбия"-и Шинҷон муҳофизон занони ҷавонро таҷовуз мекунанд.

Расонаҳо аз мавҷудияти урудгоҳҳои Шинҷон аз соли 2017 ба ин тараф хабар медиҳанд. Расонаҳои Ғарб менависанд, ки дар ин урдугоҳҳо ақалиятҳои қавмӣ, аз ҷумла уйғурҳо, қазоқҳо, қирғизҳо, тоторҳо ва ғайра, ки пайрави ислом ҳастанд, нигаҳдорӣ мешаванд. Ба иттилои СММ, дар соли 2018 дар урдугоҳҳои мазкур бештар аз 1 миллион одам нигаҳдорӣ мешуд.

Оғози берун омадани нерӯҳои амрикоӣ аз марзи Сурия ва Туркия

Бино ба гузоришҳо, Иёлоти Муттаҳида эълон кардааст, ки ҳангоми амалиёти фаврии Туркия ба зидди нерӯҳои таҳти раҳбарии курд дар шимолу шарқи Сурия, нерӯҳои Амрико берун хоҳанд шуд.

Пас аз чанд соати ин эълон нирӯҳои Иёлоти Муттаҳида аз минтақае дар дарозии марзи Сурия бо Туркия ба ақибнишинӣ сар кардаанд.

Хабаргузории Reuters бо такя ба як мансабдори амрикоӣ гуфтааст, ки рӯзи 7-уми октябр нерӯҳои Амрико ду постгоҳи назоратиро дар Тел Абяд ва Рас ал-Айн тарк кардаанд.

Нозирони ҳуқуқи башари Сурия, қароргоҳаш дар Бритониё, тасдиқ карданд, ки нерӯҳои Амрико аз мавқеи асосӣ дар ин ду маҳал ақибнишинӣ кардаанд. Қувваҳои демократии Сурия (SDF) бо раҳбарии курдҳо низ дар изҳороте гуфтааст, «нерӯҳои Амрико аз минтақаҳои наздисарҳадӣ бо Туркия берун шуданд».

Туркия моҳҳо боз таҳдид мекунад, ки дар сарҳади шимолу шарқиаш бо Сурия як амалиёти низомӣ оғоз мекунад ва мехоҳад дар он ҷо “минтақаи амн” эҷод кунад.

Кохи Сафед рӯзи 6-уми октябр гуфт, Туркия "бо амалиёти дарози барномарезишудааш дар Сурияи Шимолӣ, ба зудӣ пеш хоҳад рафт".

Дар изҳорот омадааст, Иёлоти Муттаҳида, ки садҳо сарбоз дар Сурия дорад, дар ин амалиёт «ҳамроҳ намешавад ва тарфдорӣ намекунад» ва нерӯҳои ИМА «дигар дар минтақаи наздик нахоҳанд монд».

ИМА аз хабарҳо дар бораи хушунати ақалиятҳо дар Шинҷон нигарон аст

Элис Уэллс, як масъули вазорати хориҷии ИМА аз хабарҳо дар бораи хушунати ҷинсӣ нисбати ақалиятҳои уйғур ва қазоқ дар вилояти Шинҷони Чин амиқан изҳори нигаронӣ кард.

Ин мақомдорои ИМА аз Пекин даъват кард, ки "ҳамлаи бераҳмона ба ҳуқуқи инсон ва озодии виҷдон"-ро қатъ кунад.

Уэллс дар саҳифаи Твиттер мақолаи нашрияи Washington Post-ро бознашр кард, ки дар он суханҳои занони қазоқтабори сокини Шинҷон оварда шудааст. Қазоқтаборон, ки сарфи назар аз монеаҳои давлати Чин билохира ҳудуди он кишварро ба қасди Қазоқистон тарк карданд, аз хушунатҳое нақл карданд, ки нисбати онҳо дар Чин раво дида шудааст. Гулзира Могдини 38-сола, яке аз он занон, ки ҳоло дар Қазоқистон зиндагӣ дорад, мегӯяд, дар Шинҷон тифли батнашро иҷборан исқот кардаанд.

Он занон гуфтаанд, ки дар "урдугоҳҳои бозтарбия"-и Шинҷон муҳофизон занони ҷавонро таҷовуз мекунанд.

Расонаҳо аз мавҷудияти урудгоҳҳои Шинҷон аз соли 2017 ба ин тараф хабар медиҳанд. Расонаҳои Ғарб менависанд, ки дар ин урдугоҳҳо ақалиятҳои қавмӣ, аз ҷумла уйғурҳо, қазоқҳо, қирғизҳо, тоторҳо ва ғайра, ки пайрави ислом ҳастанд, нигаҳдорӣ мешаванд. Ба иттилои СММ, дар соли 2018 дар урдугоҳҳои мазкур бештар аз 1 миллион одам нигаҳдорӣ мешуд.

Трамп раиси порлумонро ба "хиёнат ба давлат" айбор кард

Доналд Трамп ва Нэнсӣ Пелосӣ

Доналд Трамп, президенти Амрико, шаби 6-уми октябр раиси Палатаи намояндагони Конгресси Амрико Нэнсӣ Пелосиро дар "ҷиноятҳо ва аъмоли вазнин, инчунин эҳтимоли хиёнат ба давлат" айбдор ва ба "эъломи нобоварии фаврӣ" нисбат ба вай даъват кард. Трамп рӯзи якшанбе чунин матнеро дар шабакаҳои иҷтимоӣ нашр кард. ​

Айбномаи "ҷиноятҳо ва аъмоли вазнин", ки Трамп ба он такя мекунад - баҳои ҳуқуқиест, ки онро одатан ҳангоми сабти сабабҳои эъломи нобоварӣ истифода мебаранд.

Ин айбнома одатан нисбат ба мансабдорон дар ҳолатҳои зерин истифода мешавад: ҳангоми фасодкорӣ, хунукназарӣ, шоҳидии бардурӯғ додан, сӯистифода аз мансаб, порахӯрӣ, тарс додани шоҳидон, истифодаи ғайримақсадноки амволи давлатӣ, иҷро накардани уҳдадориҳо ва ҷиноятҳои дигар.

Ин изҳороти Трамп дар ҳоле садо медиҳад, ки ахиран аз пайдо шудани шоҳиди дувум дар парвандаи эъломи нобоварӣ нисбати Трамп хабар расид. Гуфта мешавад, шоҳиди дувум аз ҳисоби кормандони мақомоти қудратӣ, омода аст, зидди президент шоҳидӣ диҳад.

Палатаи намояндагони Конгресси Амрико рӯзи 25-уми сентябр раванди эъломи нобоварӣ нисбат ба Трампро шуруъ кард. Президентро дар "ҷиноятҳо ва аъмоли вазнин" айбдор мекунанд. Трамп дар пайи суҳбати телефонии моҳи июл бо президенти Украина Владимир Зеленский ба эъломи нобоварӣ рӯ ба рӯ шуд.

Мухолифони сиёсии президенти ИМА мегӯянд, вай дар суҳбати телефонӣ аз ҳамтои украинаш хостааст, фаъолияти Хантер Байден, писари Ҷозеф Байден - рақиби эҳтимолии интихоботии соли 2020-и Трампро дар Украина тафтиш кунад. Трамп таҳдид кардааст, ки агар тафтиш сурат нагирад, ИМА ба Киев кумаки моливу низомӣ нахоҳад расонд.

Намояндагони Трампу Зеленский мегӯянд, ҳеч гуна фишоре аз сӯи президенти ИМА ҷо надошт.

Дар Тошканд хонандагонро бо рӯймол ба дарс намемонанд

Дар назди дарвозаи мактабҳои яке аз ноҳияҳои шаҳри Тошканд ҳар субҳ омӯзгорон хонандагонро маҷбур мекунанд, ки рӯймолҳои худро бигиранд.

Бахши узбекии Радиои Озодӣ рӯзи 3-юми октябр навори садоиеро аз ҷаласаи шуъбаи маорифи яке аз ноҳияҳои Тошканд дастрас кард. Дар ҷаласа ба иштирокдорон дастур мешавад, ки аз охирҳои моҳи сентябри имсол хонандагонро бо рӯймолҳои мазҳабӣ ба дарсҳо роҳ надиҳанд.

"Соати 7-и субҳ бояд дар назди дарвозаи мактаб як зан ва як мард истанд ва онҳоро ҳамроҳ бо хонандагоне, ки дер меоянд, акс гирифта ба ман фиристанд", -- мегӯяд мудири шуъбаи маорифи яке аз ноҳияҳои Тошканд.

Ӯ ҳамчунин аз муовини мудири мактабҳо даъват мекунад, ки бо эҳсоси волидони диндор бозӣ накарда, риояи либоси ягонаи мактабиро қотеона талаб кунанд. "Вақте омӯзгори мард ба духтарҳо мегӯяд, ки "рӯймолатро каш" ба падари онҳо сахт мерасад. Зеро барои онҳо баробар бо талаби кашидани эзор аст. Бинобар ин, хоҳиш мекунам, дар назди дарвозаи мактаб омӯзгорони зан ҳам истанд ва хонанда бояд пеш аз дохил шудан рӯймоли худро бигирад ва ба навбатдор диҳад. Пас аз дарс навбатдор вақте хонанда аз ҳудуди мактаб берун шуд, рӯймолашро баргардонад. Волидон бояд дар хонаҳои худ амру фармон диҳанд. Хонандаҳо дар мактаб бояд ба талаботи шумо итоат кунанд", -- афзуд вай.

Яке аз иштирокдорони ҷаласаи мазкур гуфт, дар ҳоли ҳозир иҷрои қарори Девони вазирони Узбекистон дар бораи либоси ягонаи мактабиро на танҳо кормандони соҳаи маориф, балки мақомоти махсус ва ҳукуматҳои маҳаллӣ низ назорат мекунанд.

Дар Вазорати хориҷии Тоҷикистон бо сафирони САҲА мулоқот доир мешавад

Вазорати умури хориҷии Тоҷикистон бо сафирони кишварҳои узви Созмони Амният ва Ҳамкории Аврупо дар шаҳри Душанбе, як мулоқот баргузор мекунад. Қарор аст, ин дидор имрӯз, 7-уми октябр дар бинои Вазорати умури хориҷӣ баргузор шавад.

Дар Вазорати умури хориҷии Тоҷикистон ба Радиои Озодӣ хабари баргузории ин мулоқотро тасдиқ карданд. Масъулини Дафтари барномаҳои САҲА дар Душанбе низ ба Радиои Озодӣ гуфтанд, дар ин мулоқот 16 сафири кишварҳои узви САҲА ширкат меварзанд. Дар назар аст, ки дар ин нишаст масъалаи ҳамкориҳои Тоҷикистон бо САҲА баррасӣ гардад.

Ба гуфтаи яке аз ширкатдорони ин мулоқот, дар қатори мавзуъҳои дигар ҳамчунин натиҷаҳои машварати солонаи Созмони Амният ва Ҳамкории Аврупо дар бораи ҳуқуқи инсон дар шаҳри Варшава баррасӣ хоҳанд шуд.

Машварати солонаи САҲА дар бораи ҳуқуқи инсон аз 16 то 26-уми сентябр дар шаҳри Варшава -- пойтахти Лаҳистон баргузор шуда буд. Дар ин ҳамоиш намояндагони ҳукумати Тоҷикистон ва низ мухолифони сиёсии он, ширкат доштанд.

Ду табиб дар Қазоқистон ба куштори як навзод гумонбар ҳастанд

Роҳбари як муассисаи тиббиро дар вилояти Атирауи Қазоқистон дар куштори як тифли навзод гумонбар мекунанд. Дар ин бора Шингис Кабдула, як мақомдори Оҷонсии мубориза зидди фасодкории Қазоқистон рӯзи 4 октябр хабар дод.

Лаззат Актаева, ноиб-вазири тандурустии Қазоқистон аз волидони навзод узрхоҳӣ кард. Нисбати табибон бо моддаи "куштор" парванда боз шудааст.

Ба иттилои тафтишот, табибон аз рӯи хунукназарӣ навзодро тифли мурда таваллудшуда сабти ном кардаанд, ҳарчанд тифл ҳанӯз зинда буд. Баъди он ки зинда будани кӯдак дақиқ шуд, табибон нахостанд, санадҳоро дубора сабти ном кунанд: зеро санадҳо дар пойгоҳи умуӣ ворид шуда буд "ва онҳоро тағйир додан имкон надошт", гуфт Шингис Кабдула.

Ба навиштаи расонаҳо, момодоя ба сардухтур тариқи телефон хабар додааст, ки тифл ҳанӯз зинда аст, аммо сардухтур дар навбати худ гуфтааст, ки тифлро "беҳтар аст" дар яхдон боқӣ монанд. Телефони роҳбари муассиса ё сардухтурро мақомоти зидди фасоди Қазоқистон гӯш мекарданд.

Аз рӯи ин модда, сардухтур ва момодояро то 20 соли зиндон таҳдид мекунад.

Марги шаш нақбкан дар Бодканди Қирғизистон

Дар вилояти Бодканди Қирғизистон дар нақбҳои шаҳри Қизил-Киӣ ва Сулюктӣ шаш одам фавтид. Дар ин бора кормандони мақомоти ҳолатҳои фавқулодаи Қирғизистон хабар доданд.

Ҳодисаи аввал дар нақби Қизил-Киӣ рӯзи 6 октябр рух дод ва боиси марги 3 одам шуд. Ҷузъиёти дигари ҳодиса хабар дода намешавад.

Ҳодисаи дигар дар нақби шаҳри Сулюктӣ рӯзи 5 октябр рух дода, боиси марги 3 одам шуд. Гуфта мешавад, ҳамаи фавтидаҳо аъзои як оила будаанд.

Кумитаи ҳолатҳои фавқулодаи Қирғизистон то кунун ҳодисаро шарҳ надодааст.

Мақомоти Қирғизистон, дар соли 2017 дар маҷмуъ дар нақбҳои он кишвар 26 садама ё ҳолатҳои фавқулода ва марги 24 одам сабт шуда буд.

Reuters: "Тошканд дар мубориза бо фаъолон аз таҷҳизоти ҷосусӣ истифода кардааст"

Мақомоти ҷосусӣ ё иктишофии Узбекистон дар мубориза зидди фаъолон ва дигарандешон аз таҷҳизоти компютерии ҷосусӣ истифода кардаанд. Дар ин бора мутахассисони амнияти киберии "Лабораторияи Каспер" дар ҷаласае дар шаҳри Лондони Бритониё рӯзи 3 октябр хабар доданд.

Брайн Бартоломю, намояндаи "Лабораторияи Каспер" гуфт, гуруҳи рахнагари SandCat марбут ба Мақомоти амнияти миллии Узбекистон мебошанд. Мутахассисон ошкор карданд, ки нишонии IP яке аз рахнагарон ё ҳаккерҳо дар қисми низомии 02616 дар шаҳри Тошканд сабт шудааст.

Қисми низомии мазкур дар ҷаласаҳои додгоҳии парвандаи рӯзноманигор Бобомурод Абдуллоев зикр гардида буд, ки дар фаъолиятҳои зиддиконститутсионӣ айбдор мешуд. Газета.uz бо такя ба вакили мудофеи рӯзноманигор навишта буд, ки маҳз ҳамин қисми низомӣ муколамаҳои электронии рӯзноманигорро дарёфт карда ва дар ихтиёри додгоҳ гузошта буд.

ИМА: дар "парвандаи Украина" хабарчини дувум пайдо шуд

Дар ИМА дар парвандаи ба истилоҳ, "украинӣ" хабарчини дувум пайдо шуд. Ба иттилои хабаргузории "Reuters", ӯ маълумот дар бораи тамосҳои президенти ИМА Доналд Трамп бо Украинаро бевосита дарёфт мекардааст.

Хабарчини дувум бо кормандони хадамоти назорати дохилӣ дар ҷомеаи иктишофии Амрико тамос гирифтааст. Дар ин бора вакили дифои хабарчин Марк Заид иттилоъ дод.

Заид дар суҳбат бо Эй-би-сӣ тасдиқ кард, ки хабарчини дувумро нозири кул бозпурсӣ кардааст. Заид хабарчини якумро намояндагӣ мекард, ки ҷузъиёти суҳбати телефонии Трамп бо ҳамтои украиниаш Владимир Зеленскийро ба ниҳодҳои дахлдори ИМА ироа кард. Хабарчини якум гуфт, 25 июл Трамп аз Зеленский хост, зидди рақиби эҳтимолияш дар интихоботи президентии Амрико дар соли 2020 Ҷо Байден дар Украина тафтишотро оғоз кунанд.

Трамп ҳамчунин рӯзи ҷумъа аз мақомоти Чин низ хост, фаъолияти Байденро тафтиш кунанд. Дар робита ба ин амалкарди Трамп миёни ҷумҳурихоҳон ихтилофи назар ба миён омадааст. Сенаторҳои ҷумҳурихоҳ Митт Ромни, Бен Сасс ва Сюзан Коллинз сахт ибрози нигаронӣ карданд, ки Трамп барои интихоби дуборааш ба мақоми президентӣ аз кишварҳои хориҷӣ кумак мехоҳад.

Ёфтҳои бештар

Гузоришҳои видеоӣ

XS
SM
MD
LG