Пайвандҳои дастрасӣ

Хабари нав

Хабарҳо

Дар Эрон як журналисти рус боздошт шуд

Юлия Юзик

Мақомоти Русия ва наздикони Юлия Юзик, журналисти рус гуфтанд, ки ӯ дар Теҳрон боздошт шудааст. Сухангӯи сафорати Русия дар Теҳрон Андрей Ганенко рӯзи 4 октябр ба хабаргузории Интерфакс гуфт, ки дипломатҳои рус аз ҳодиса огоҳанд ва барои дарёфти хабари бештар кор мекунанд. Ӯ ҷузъиёти аз ин бешро шарҳ надод. Духтари Юзик дар саҳифаи фейсбукии модари худ навишт, ки ӯ “мушкилоти хеле зиёд дорад” ва додгоҳ “сарнавишти ӯро муайян мекунад”.

Борис Войтсеховский, ҳамсари собиқи Юзик ба Радиои Озодӣ гуфт, ки ӯро дар ҷосусӣ ба манфиати Исроил гунаҳгор мекунанд. Ин хабар расман тасдиқ намешавад.

Бар асоси иттилои Войтсеховский, дар сурати гунаҳгор эълон шудани Юзик дар додгоҳ, ӯро 10 соли зиндон таҳдид мекунад. Ӯ инчунин гуфт, Юзик, ки дар Эрон ҳамчун хабарнигори расонаи русӣ кор мекард, рӯзи 3 октябр баъди ворид шудан ба Теҳрон бо кадом як даъватномаи ношиносе боздошт шуд. Ӯ гуфт, ки баробари дар хоки Эрон фуруд омаданаш шиносномаи ӯро мақомоти марзбонии Эрон гирифтанд.

Юзик соли 1981 дар минтақаи Ростови Русия таваллуд шудааст. Ӯ соли 2003 баъди нашри китобаш бо номи “Арӯсони Оллоҳ” маъруф шуд, ки дар бораи занони бомбгузор дар минтақаи аксаран мусалмоннишини Қафқози Шимолии Русия қисса мекард.

Украина марди беларуси гумонбар дар ҷосусиро озод кард

Юрий Политика дар додгоҳи Чернигов

Мақомоти украинӣ як шаҳрванди Беларус Юрий Политикаро, ки барои ҷамъоварии иттилои махфӣ ба як созмони номаълуми давлатӣ дар додгоҳ посух медиҳад, озод карданд.

Тарас Ҳоролюк, вакили дифои Политика ба Радиои Озодӣ гуфт, ки додгоҳе дар шаҳри шимолии Чернигов рӯзи 3 октябр ба шарти берун нарафтан аз маҳалли иқомат шахси зерҳимояи ӯро озод кард. Политика бояд дар мурофиаҳои додгоҳӣ иштирок кунад.

Политика соли 2017 дар марзи Беларусу Украина боздошт ва дар ҷосусӣ гумонбар шуд. Мақомоти украинӣ гуфтанд, ки ӯ дар бораи амалиёти нирӯҳои мусаллаҳи Украина бар зидди ҷудоиталабони рӯ ба Русия дар минтақаи шарқи Украина иттилои махфие дар даст дошт. Баъди боздошти Политика дар Украина, мақомот дар Беларус моҳи октябри соли 2017 журналисти украинӣ Павло Шаройкоро боздошт ва ӯро дар ҷосусӣ айбдор карданд. Шаройко моҳи маи соли гузашта ба 8 соли зиндон маҳкум шуд.
Гурӯҳҳои ҳуқуқи башар дар ҳарду кишвар аз Минск ва Киев даъват карданд, ки Палитика ва Шаройкоро бо ҳам табдил кунанд.

Озодии Политика як рӯз пеш аз мулоқоти дар шаҳри украинии Житомир барномарезишудаи миёни президентони Беларус ва Украина – Александр Лукашенка ва Владимир Зеленский сурат гирифт.

Додситони кулли Украина: Дар бораи хилофкориҳои писари Байден хабар надорам

Ддодситони кулли Украина Руслан Рябошапка

Додситони кулли Украина гуфт, ки дар бораи кадом фаъолияти ғайриқонунии писари собиқ муовини президенти ИМА Ҷо Байден хабаре надорад, вале гуфт, ки ҳоло додситонҳо чанд парвандаи махфӣ, аз ҷумла якеро, ки марбут ба макони кори Ҳантер Байден аст, таҳқиқ мекунанд.

Зимни сӯҳбат бо хабарнигорон дар Киев рӯзи 4 октябр додситони кулл Руслан Рябошапка гуфт, ки дар робита бо парвандаи марбут ба ширкати Burisma, ки соли 2014 Ҳантер Байденро ба кор гирифта буд, ҳеҷ як ҳуқуқшиноси хориҷӣ бо ӯ дар тамос нашудааст.

Сӯҳбати телефонии президенти ИМА Доналд Трамп ва президенти Украина Владимир Зеленский, ки дар ҷараёни он Трамп раҳбари Украинаро водор мекунад, ки аз паи таҳқиқи парвандаи писари Байден шавад, боиси шурӯи ҷараёни радди салоҳият ё импичменти президенти Амрико шуд.

Қонунгузорони амрикоӣ ин масъаларо мавриди таҳқиқ қарор додаанд, ки то куҷо Трамп мехоҳад аз роҳи фишор ба ҳукумати хориҷӣ дар роҳандозии таҳқиқи кори рақиби интихоботиаш манфиати хусусӣ бардорад.

Рябошапка ба саволи хабарнигорон дар бораи ин ки оё ӯ дар заминаи кадом хилофкориҳои писари Байден хабар дорад, гуфт, ки “ман чунин иттилое надорам”.

Ба савол дар бораи ин ки оё ҳуқуқшиноси хусусии ӯ Рудолф Ҷулинӣ бо ӯ дар тамос шуд ё на, додситони кулли Украина таъкид кард, ки ҳеҷ кас аз хориҷа бо ӯ дар тамос нашудааст ва гуфт, ки “додситонҳо аз сиёсат берун ҳастанд”.

Оҷонсии ҳастаии СММ: Эрон "дар самти дуруст ҳаракат мекунад"

Ниҳоди нозири фаъолиятҳои ҳастаӣ дар назди СММ мегӯяд, ки Эрон бо барномаи ҳастаиаш “дар самти дуруст” ҳаракат мекунад, вале айни замон ҳушдор дод, ки ба масъалаҳо то ҳол пурра расидагӣ нашудааст. Иҷрокунандаи вазифаи раиси оҷонсии энержии ҳастаии назди СММ Корнел Ферута гуфт, ки давоми чанд ҳафтаи ахир Эрон дар заминаи амнияти барномаи ҳастаиаш ба саволҳо посух дод.

Оҷонсии энержии ҳастаии СММ моҳи гузашта ба Теҳрон гуфт, ки ирсоли гузориш оид ба амнияти барномаи ҳастаии Эрон аз назари вақту фурсат хеле муҳим аст. Оҷонсӣ нагуфт, ки манзураш аз масъалаҳои ҳалношуда чист, вале дипломатҳо гуфтанд, ки оҷонсӣ интизор аст, ки Эрон ба онҳо намунаҳои оғози соли ҷорӣ аз амборҳои воқеъ дар наздикиҳои Теҳрон гирифташударо ирсол кунад.

Дар як изҳороти нахуствазири Исроил Бенямин Нетаняҳу гуфта шуд, ки Эрон бо фаъолиятҳои ғайрирасмии ҳастаӣ машғул аст ва далели ин ошкор шудани намунаҳое аз уран дар муҳити зисти атрофи он макон аст. Вале Эрон ин иттиҳомҳоро рад карда гуфт, ки ин як муассисаи шустушӯи қолиҳо аст.

Корнел Ферута ахиран ба журналистон дар Вена гуфт, ки пешравӣ дар паи мулоқот ва гуфтугӯ бо мақомҳои мухталифи расмии Эрон чанд ҳафта пеш пешравиҳо ба даст омадааст.

“Ин як ҷараёни ҷорӣ аст. Ман пешгӯӣ карда наметавонам, ки чӣ гуна анҷом мешавад. Ҳамкорӣ ба маънои он нест, ки ҳама масъалаҳо ҳал шудаанд, вале ин қадаме ба самти дуруст мебошад”, гуфт Ферута. Ферута гуфт, ки саволҳои Оҷонсии нирӯи ҳастаӣ ба таври мустақим ба созиши соли 2015-и миёни Эрон ва қудратҳои ҷаҳонӣ рабт надоранд.

Хокистари ҷасади Маҳатма Ганди дуздида шудааст

Зарфи дорои хокистари ҷасади роҳбари ҳаракати озодихоҳи Ҳиндустон Маҳатма Гандиро аз осорхонаи марказии он кишвар рабуданд. Ҳамзамон рӯи аксҳои ин сиёсатмадор "хоин" навиштанд. "Ҳодисаи мазкур дар солгарди 150-уми вай, дар таърихи 2 октябр рух дод",-менависанд расонаҳо.

Гандӣ моҳи январи соли 1948 кушта шуд ва хокистари ҷасади ӯро, ки бар асоси анъанаҳои ҳиндӣ сӯзонида шуда буд, тақсим ва дар чанд осорхона нигаҳ медоштанд. Рабуда шудани зарфи хокистари ӯро аз осорхонаи марказӣ соати 11 шаб мушоҳида карданд ва пулис айни ҳол гумонбаронро меҷӯяд.

Гандӣ ҳаракати муқовимати бидуни хушунатро нисбати ҳукумати истеъмории Англия роҳандозӣ кард ва ин навъи ҳаракат дар саросарӣ дунё паҳн шуд. Бисёре аз ҳиндуҳо ӯро падари миллат унвон мекунанд. Ҳиндустон маҳз дар замони роҳбарии вай дар соли 1947 соҳиби истиқлол шуд.

Аммо бархе аз сокинони дигар ӯро барои созиш кардан бо аҳолии мусалмони Ҳинд танқид мекунанд. Ин афрод мегӯянд, масъулияти тақсими кишвар ба Ҳинду Покистон бар дӯши Гандӣ аст.

ИМА ба Зеленский дар ивази таҳқиқи Байден сафар ба Вашингтонро пешниҳод кардааст

Волкер ба Маҷлиси намояндагон ворид мешавад

Матни имейлу мукотибаҳое, ки тоза нашр шуданд, ҳокӣ аз онанд, ки ба назар мерасад, дипломатҳои баландпояи амрикоӣ бар ивази таҳқиқи аъмоли оилаи Ҷо Байден, собиқ муовини президент дар Украина ба президенти ин кишвар Владимир Зеленский пешниҳод карданд, ки бо як сафари баландпоя аз ИМА дидан кунад. Бастаи мукотибаҳо шоми 3 октябр аз ҷониби мақомоти Маҷлиси намояндагон дар паи мусоҳиба бо Кӯрт Волкер, собиқ фиристодаи вижаи ИМА дар Украина фош шуд, ки ҳафтаи гузашта аз мақомаш истеъфо дод.

Қаблан як манбаъ дар ҳукумати ИМА гуфт, ки дар сӯҳбати телефонии 25 июл Трамп Зеленскийро ба шурӯи таҳқиқи аъмоли писари Ҷо Байден, як узви шӯрои мудирони ширкати газе дар Украина водор кард. Дар матни мукотибаи фошшуда қабл аз сӯҳбати телефонии Трамп ва Зеленский субҳи 25 июл навишта шудааст, ки фиристода мегӯяд: “Аз Кохи Сафед хабар расид – ба назар мерасад президент Z трампро бовар кунонд, ки таҳқиқро ба роҳ мемонад / “ба умқи он чи ки (соли 2016) рух дод, меравад”, мо таърихи сафар ба Вашингтонро дақиқ мекунем”.

Як мушовири Зеленский зоҳиран ин пешниҳодро пазируфт ва ин ризоият ҳамчунин марбут ба таҳқиқи кори ширкати гази Burisma дар Украина мебошад. Писари Байден – Ҳантер замоне, ки падараш муовини президент Барак Обама буд, раҳбарии шӯрои мудирони ин созмонро дар Киев ба ӯҳда дошт.

Вале то ҳол ҳеҷ нишонаҳои қонуншикании эҳтимолие, ки метавонист аз ҷониби падару писар Байден роҳ дода шавад, пешниҳод нашудааст.

Ҳуқуқшиноси эҳсонкори қирғизистонӣ соҳиби ҷоизаи СММ шуд

Азизбек Ашӯров, ҳуқуқшиноси қирғизистонӣ соҳиби ҷоизаи ба номи Нансени Дафтари комисари олии СММ дар умури паноҳандагон шуд. Маросими эътои ҷоиза рӯзи 2 октябр дар Женева барпо шуд.

Моҳи июли соли ҷорӣ Қирғизистон нахустин кишваре дар дунё гардид, ки масъалаи бешаҳрвандиро ҳал кардааст. Дар ин дастовард хадамот ва кумакҳои Азизбек Ашӯров кам набуд. Созмони "Ҳуқуқшиносони бидуни марзи Водии Фарғона", ки роҳбариашро Ашӯров дар ихтиёр дорад, ба афроди беҳуҷҷат ва бешаҳрвандӣ кумакҳои ройгони ҳуқуқӣ мерасонад.

Ба иттилои маъмурияти СММ дар умури паноҳандагон, созмони "Ҳуқуқшиносони бидуни марзи Водии Фарғона" ба бештар аз 10 ҳазор фарди бешаҳрвандӣ кумаки ройгони ҳуқуқӣ расонидааст. Ашӯров гуфт, ба ин теъдод одамон давоми чаҳор соли охир кумак расонида шудааст.

Ҳукумати Қирғизистон дар якҷоягӣ бо ҳуқуқшиносони созмони "Ҳуқуқшиносони бидуни марзи Водии Фарғона" ва ёрии маъмурияти СММ дар умури паноҳандагон сар аз соли 2014 ба деҳаҳои он кишвар рафта, афроди бешаҳрвандиро пайдо ва барояшон ҳуҷҷат таҳия кардаанд. Дар саросари Қирғизистон 13 ҳазору 707 фарди бе шаҳрвандӣ пайдо гардид.

Ҷоизаи СММ ба ифтихори муҳақиқ Фритоф Нансен (1861-1930) гузошта шуд, ки вай дар бахши ҳимояи ҳуқуқи паноҳандагон фаъолият мекард.

Украина аз ИМА 150 мушаки Javelin мехарад

Департаменти давлатии ИМА шартномаи фурӯши 150 мушаки зидди тонкии Javelin ба Украина ва таҷҳизоти дигари муҳим барои ин мушакҳоро тасдиқ кард. Дар ин бора вазорати мудофиаи ИМА рӯзи панҷшанбе хабар дод. Мушакҳо ва таҷҳизоти муҳим барои онҳо бештар аз 39 миллион доллар арзиш доранд. Ин дувумин маҷмуи мушакҳои Javelin аст, ки ба Украина фурӯхта мешавад. Соли гузашта ИМА ба Украина 200 мушак ва 37 маҷмаи партобкунанда ирсол карда буд.

Дар гуфтугӯи телефонии президенти ИМА Доналд Трамп дар таърихи 25 июли соли ҷорӣ бо ҳамтои украинаш Владимир Зеленский маҳз ҳамин навъи мушак баррасӣ шуда буд. Он гуфтугӯ боис гардид, ки Конгресси ИМА масъалаи эъломи нобоварӣ ба Трампро ба муҳокима бигирад.

Дар ин гуфтугӯ Зеленский изҳор дошт, Украина ба интиқоли минбаъдаи аслиҳа аз ИМА умедвор аст. Трамп дар посух аз Зеленский "хостори кумак" шуд ва дархост кард, ки фаъолияти писари мухолифи сиёсиаш Ҷо Байден дар Украина тафтиш шавад. Демократҳои Конгресс ба хулоса расиданд, ки Трамп ба президенти Украина бад-ин тартиб, бо ҳадафи зиён расонидан ба шаҳрванди ИМА, фишор овардааст. Трамп инро рад мекунад.

Интиқоли аслиҳаи кушандаро ба Украина нахуст ҳукумати Трамп шуруъ кард. Барак Обама, президенти пешини ИМА ба Украина танҳо аслиҳа ва таҷҳизоти ғайрикушанда интиқол дода буд. Дар ҳамин ҳол, ҳанӯз дақиқ нест, ки мушакҳои Javelin дар ҷангҳои шарқи Украина то кунун истифода шудааст ё на.

Трамп аз Чин хост, ки Ҷо Байденро таҳқиқ кунад

Дар пасманзари даъватҳо ба шурӯи ҷараёни радди салоҳияти президент Доналд Трамп дар Конгресс, худи раиси ҷумҳури Амрико ахиран аз Чин расман хост, ки номзади демократҳо ба интихоботи президентӣ Ҷо Байденро таҳқиқ кунад. Доналд Трамп барои айни чунин дархост аз ҳукумати Украина, ки ҳафтаи гузашта ошкор шуд, бо таҳдиди импичмент ё радди салоҳият рӯбарӯ шудааст. Трамп рӯзи 3 октябр дар сӯҳбат бо хабарнигорон дар Кохи Сафед гуфт, ки бовар дорад ҳам Чин ва ҳам Украина бояд фаъолияти собиқ муовини президент Ҷо Байден ва писари соҳибкораш Ҳантро таҳқиқ кунанд ва даъват ба импичментро интиқод кард.

Ӯ гуфт: “Метавонам бигӯям, ки президенти Украина Владимир Зеленский, агар ман ба ҷои ӯ будам, машварат медодам, ки онҳо ҳарду Байденро тафтиш кунанд. Илова ба ин, Чин бояд тафтиши онҳоро шурӯъ кунад, чунки он чизе, ки дар Чин гузашт, ҳамонгуна, ки дар Украина буд, бад аст”. Ба саволи ин ки оё ӯ аз президенти Чин Сӣ Ҷинпин хоста буд, ки айни корро бикунад, Трамп гуфт: “На, дархост накардам, вале мо бояд сари ин чиз фикр кунем”. Каме баъди ин Трамп дар твиттераш навишт, ки ин масъулияти ӯ аст, ки фасодро таҳқиқ кунад. “Ҳамчун президенти ИМА, ман ҳамаи ҳуқуқро дорам ва зиёда аз ин, вазифадорам, ки ФАСОДРО тафтиш кунам ва аз кишварҳои дигар ҳам дархост кунам, ки ба мо кӯмак кунанд”. Чин ва ИМА дар ҳолати ҷанги тиҷоратӣ ҳастанд, ки ба рушди иқтисоди ҷаҳонӣ таъсири худро гузоштааст.

Дар Намангон ҳангоми санҷиши чархофалаки нав як духтар ҳалок шуд

Дар боғи фароғатии "Водии афсонаҳо"-и Намангони Узбекистон ҳангоми озмоиши чархофалаки нав як духтари 18-сола ҷон бохтааст.

Ба гуфтаи шоҳидони ҳодиса, Эля Холиқова, ки дар боғ ба ҳайси нозир кор мекард, 30 сентябр ҳангоми озмоиши чархофалаки нави "Spin block" ба ҳалокат расид.

Ба огаҳии Додситонии кулли Узбекистон, ҳодиса дар натиҷаи риоя нашудани қоидаҳои бехатарӣ аз сӯи худи духтар рух дод.

Яке аз кормандони боғи "Водии афсонаҳо" ҳалокати духтарро "ҳодисаи нохуш" номида, гуфт, худи Холиқова айбдор аст. "Вай бидуни иҷозат дар чархофалаке, нишаст, ки озмоиш мешуд", - афзуд ҳамсуҳбати мо.

Эля Холиқова, соли таваллудаш 2001, корро дар боғи фароғатии Намангон 1 августи соли равон оғоз карда буд.

СММ: Дар чор сол 14 ҳазор ҳодисаи нақзи шадиди ҳуқуқи кӯдакон дар Афғонистон сабт шудааст. ВИДЕО

Як гузориши СММ мегӯяд, ки бадшавии вазъи амниятӣ дар Афғонистон дар давоми тахминан чор соли охир боиси рух додани 14 ҳазор ҳодисаи “нақзи шадиди” ҳуқуқи кӯдакон шудааст, ки инчунин боиси марги 3500 тифл гардид.

Антонио Гутерреш, дабири кулли СММ “мизони ташвишовар”-и нақзи ҳуқуқи кӯдакон дар Афғонистонро аз ҳама ҷониб маҳкум кард ва гуфт, ки кӯдакон паёмадҳои низоъҳои мусаллаҳонаро дар тани худ эҳсос мекунанд.

Дар фурсати таҳқиқшуда инчунин 9 ҳазор кӯдак маҷрӯҳ шудааст, мегӯяд гузориш.
Яке аз масоили мавриди нигаронии ҷиддӣ, ба гуфтаи Гутерреш, ин аст, ки солҳои 2015 то 2018 аз се як ҳиссаи афроди кушташуда дар Афғонистонро кӯдакон ташкил додаанд. Ин нишондод дар қиёс бо солҳои аз ин пеш 82 дар сад бештар будааст, гуфт ӯ.

Сабаби аслии маргу мири кӯдакон таркиши маводи мунфаҷира ва ҳамлаҳои ҳавоӣ мебошад.

Раҳбари СММ гуфт, ки гурӯҳҳои мусаллаҳ дар 43 дарсади фоҷеаҳои кӯдакон дар Афғонистон гунаҳгор ҳастанд. Аз дасти онҳо 3450 тифл кушта ва 9149 нафар маҷрӯҳ шудаанд.
Гузориш ҳамчунин мегӯяд, ки ширкати 274 кӯдак дар ҳайати гурӯҳҳои мусаллаҳ ва ҳам нирӯҳои давлатӣ тасдиқ шудааст, вале шумори воқеӣ метавонад бештар бошад. Танҳо соли 2016 се ҳазор кӯдак барои ширкат дар гурӯҳҳои мусаллаҳ ҷалб шуда буданд, мегӯянд муҳаққиқони СММ.

Гузориш ҳамчунин ҳодисаҳои хушунати ҷинсӣ нисбати 13 писар ва чор духтарро қайд кардааст, ки танҳо омори тасдиқшуда мебошад ва ба гуфтаи Гутерреш, шумори воқеии ин ҳодисаҳо метавонад ба маротиб бештар бошад.

Дар Афғонистон 3500 кӯдак қурбони ҷангҳои чор соли охир шуданд
лутфан мунтазир бошед

Феълан кор намекунад

0:00 0:01:51 0:00

Ҳонгконг қонуни нави ҳолати изтирориро қабул кард

Мақомот дар Ҳонгконг дар паи чор моҳи эътирозҳои хиёбонии мардум қонуни ҳолати изтирориро қабул карданд, ки ба эътирозгарони зиддидавлатӣ бо ниқоб пӯшондани чеҳраро манъ мекунад.

Керри Лам, як мақоми иҷроия дар ҳукумати Ҳонгконг рӯзи 4 октябр бо муаррифии қонуни нав гуфт, ки ин амал дар шароити “таҳти хатар қарор гирифтани оромиши ҷомеа” ва ба хотири “бозгашт ба сулҳ” карда мешавад.

Эътирозҳо моҳи июн дар паи омода шудани тарҳи баъдан мутаваққифшудаи ихроҷ шурӯъ шуд ва ба як маъракаи зиддичинӣ бадал шуд. Эътирозгарон Пекинро ба дахолат дар умури мухторияти Ҳонгконг муттаҳам мекунанд.

Бо ин вуҷуд, ки қонун расман танҳо баъди нимаи дуюми моҳи октябр аз ҷониби парлумони Ҳонгконг қабул мешавад, аллакай нисфишаби 4 октябр он ҳукми қонунро касб хоҳад кард.

Ин дар ҳолест, ки дар эътирозҳои Ҳонгконг бисёр эътирозгарон ба хотири пинҳон доштани ҳуввияташон аз кордиҳандаву раҳбаронашон ва ба хотири ҷилавгирӣ аз осеб дидани манфиатҳои тиҷоратӣ бо ниқоб дар рӯй раҳпаймоӣ мекунанд. Қонуни нав мегӯяд, онҳое, ки муқаррароти ҳолати изтирориро нақз мекунанд, бо таҳдиди то як соли зиндон ва ҷарима дар ҳаҷми 3200 доллар ҷазо дода мешаванд. Дар маҷмӯъ то ҳол 1750 нафар барои иштирок дар эътирозҳо боздошт шудаанд.

Роҳбари пешини иттифоқҳои касабаи Қазоқистон ба додгоҳи болоӣ шикоят мебарад

Ерлан Балтабой, роҳбари пешини созмони касабаи "Меҳнати шоиста", ки моҳи июли соли ҷорӣ бо айби "дуздӣ" 7 сол зиндонӣ шуда буд, тасмим дорад, ба додгоҳи болоӣ шикоят барад. Балтабой моҳи августи соли ҷорӣ дар пайи фармони авфи президенти Қазоқистон Қосимҷомарт Тоқаев аз зиндон озод шуд.

Балтабой ахиран гуфт, аз фармони авфи президент баъди он даст кашидааст, ки мақомот ба вай иҷозаи озодона фаъолият кардан дар бахши иттифоқи касабаро надоданд. Мақомот нисбати Ерлан Балтабой дар моҳи сентябри соли 2018 бо моддаи "Аз худ кардан ва ё харҷ кардани амволи ғайр" парвандаи ҷиноӣ кушода буданд.

Чанде аз созмонҳои ҳомии ҳуқуқ аз таъқиби Балтабой изҳори нигаронӣ ва даъват ба қатъи парвандаи ӯро карда буданд. Балтабой таъқиби нисбаташ шуруъшударо "амали рейдерӣ бо ҳадафи маҳви созмонҳои мустақили касаба" унвон карда буд. "Ман бовар дорам, ки парванда нисбати ман бо ташаббуси Кумитаи давлатии амнияти миллӣ боз шудааст ва ҳадафаш канор задани ман аз фаъолият дар иттифоқи касаба аст",-гуфт Балтабой.

Дар Намангон як падар писари яксолаашро кушт

Дар Намангони Узбекистон падаре, ки намехост, алимент супорад, писари яксолаашро дар канали Шимолии Фарғона харқ кард. Додгоҳ ин мардро 18 сол зиндонӣ кард.

Додгоҳи вилоятии Намангон Расулбек Тошпулодови 26-соларо дар куштори барқасдонаи писари яксолааш айбдор кард.

Расулбек Тошпулодов соли 2017 издивоҷ карда, 4 июли соли 2018 соҳиби фарзанд шуд. Аммо 24 апрели соли ҷорӣ бо баҳонаи ин ки писараш ба ӯ шабоҳат надорад, аз ҳамсараш ҷудо шуд.

Додгоҳ қарор кард, ки Расулбек Тошпулодов 70 дарсади даромадашро ба писараш пардозад.

Ин мард 8 июли соли ҷорӣ писарашро рабуда, ба канали Шимолии Фарғона ғарқ кард.

Маъракаҳои танзимшудаи Узбекистон: сарояндаҳо норозиянд

Сарояндаҳои Узбекистон аз қоидаҳои наве норозиянд, ки шумораи сарояндагону ҳунармандонро дар маъракаҳои тую сур маҳдуд мекунанд. Мақомот мегӯянд, ин ва дигар маҳдудиятҳоро ба хотири камхарҷ кардани анъанаву маросимҳои мардум ҷорӣ кардаанд.

Қоидаҳое, ки дар моҳи сентябр аз сӯи порлумон қабул шуданд, шумораи навозандагону сарояндагон дар маъракаҳо, теъдоди меҳмонон ва адади мошинҳоро ба танзим медароранд.

Ин дар ҳолест, ки чанде аз сарояндагони маъруфи Узбекистон гуфтанд, ҳунарнамоии онҳо манбаи даромади афроди дигар аст.

Муниса Ризоева, сарояндаи узбек гуфт, барои як ҳунарнамоии кутоҳ дар туйҳо то 800 доллар ҳаққи хизмат мегирад. Вай ин муздро бо навозандагон ва дигар афроди тимаш тақсим мекунад. Дар навбати худ, онҳо хонаводаҳояшонро таъмин мекунанд. "Дар маҷмуъ, ҳунарнамоӣ ва даромади ман дар моҳ қариб 150 касро таъмин мекунад", - гуфт Ризоева.

Озода Нурсаидова, сарояндаи дигар ҳам ба ин шева аз ҳунари худ дифоъ ва қоидаҳои навро танқид кард. Сарояндагони дигар - Райҳон, Улуғбек Раҳматуллоев, Мавлуда Асалхоҷаева, Рашид Холиқов, Шаҳзода, Ҷаҳонгир Отаҷонов, Фаррух Зокиров ва Юлдуз Усмонова низ ҳамовоз шуданд.

Қоидаҳои нав иштироки бештар аз 250 меҳмонро дар тӯйҳо манъ мекунанд. Бар асоси ин қоидаҳо, теъдоди мошинҳо ҳам набояд аз 3 адад бештар бошад. Одатан дар тӯйҳои Узбекистон зиёда аз 400 меҳмон даъват мешавад ва шумори мошинҳое ҳам беҳисоб аст, ки дар овардани арус ширкат мекунанд.

Даргузашти ангурпарвари маъруф "Ҳоҷӣ Камол"

Камол Мадумаров, ангурпарвари шинохта дар Тоҷикистон дар синни 80-солагӣ аз олам даргузашт. Дафтари матбуотии раёсати ҷумҳури Тоҷикистон мегӯяд, Эмомалӣ Раҳмон ба хонаводаи Мадумаров ҳамдардӣ баён кардааст.

Манбаъ мегӯяд, "Камол Мадумаров дар давоми умри бобаракати худ барои рушди соҳаи кишоварзии мамлакат, бахусус боғдорию ангурпарварӣ саҳми босазо гузошта, таҷрибаву малакаи худро барои пешрафт ва ободии диёри хеш сарф кардааст".

Камол Мадумаров аз афроди наздик ба президент гуфта мешуд. Дар чанд соли ахир тамоми меҳмонҳои баландпоя, аз ҷумла президентҳои кишварҳо ва хабарнигорони хориҷиро барои меҳмони ба боғи ҳамин ангурпарвар мебурданд. Дар охирин сафари худ ба Тоҷикистон, Шавкат Мирзиёев, раиси ҷумҳури Узбекистон ба хоҷагии ангурпарварии ӯ мошини сабукрав тақдим карда буд.

Камол Мадумаров, аз таъсисдиҳандагони хоҷагии "Боғи Сомон" ва яке аз нафарони бонуфузу боэҳтиром дар шаҳри Турсунзода ба ҳисоб мерафт. Сӯҳбату мулоқоти ӯ бо раисиҷумҳур Эмомалӣ Раҳмон чанд маротиба аз тариқи шабакаҳои телевизионӣ намоиш дода шудааст. "Боғи Сомон" соли 2008 ташкил шуда, яке аз калонтарин хоҷагиҳои ангурпарвари мамлакат ба шумор меравад.

Дар Қазоқистон қаҳвахонае боз шуд, ки ношунавоён хидмат мерасонанд

Табиби қазоқ Азамат Бозилов дар шаҳри Нурсултон қаҳвахонае боз кард, ки дар он шахсони дорои имкониятҳои маҳдуд кор мекунанд. Ба ин иқдоми Бозилов асосан бародараш сабаб шуд, ки маъюби дараҷаи севум аст.

Бозилов кормандони қаҳвахонаашро бо кумаки бародараш тавассути паёмакрасони ношунавоёну гунгҳо пайдо кардааст. "Бародари худи ман ношунаво ва гунг аст. Ӯ чандин сол кор пайдо карда натавонист",-гуфт табиби қазоқ.

"Дар аввал хеле мушкил буд. Вале дертар омӯхтем ва кор осонтар шуд. Пешвози меҳмони нахустин ҳам мушкил буд. Вале вақте ба меҳмон мефаҳмондам, ки намешунавам, ӯ дарк мекард ва кор осон мешуд", - изҳор дошт Ойгул Темиргалиева, ки дар қаҳвахона пешхидмат аст.

Муштариёни қаҳвахона дар интихоби ғизо бо мушкил рӯбарӯ намешаванд. Дар номгӯи ғизоҳо акси онҳо низ оварда шудааст ва ҳамчунин дар деворҳо лавҳаҳое насб гаштааст, ки дар онҳо имову ишораҳои асосӣ навишта шудаанд.

Азамат Бозилов мегӯяд, қаҳвахонаро бо пуле боз кардааст, ки барои хариди хона ҷамъ намуда буд. Падараш низ мошини худро фурӯхта, кумак кардааст.

Дар эътирозҳои Ироқ беш аз 20 кас кушта шуд

Дар эътирозҳои зиддиҳукуматии Ироқ дасти кам 21 нафар кушта ва садҳо тани дигар захмӣ шуданд. Ба иттилои хабаргузории Associated Press, дар миёни кушташудаҳо кормандони пулис низ ҳастанд.

Нерӯҳои ҳукуматӣ барои пароканда кардани тазоҳургарон аз аслиҳа ва гази ашковар истифода бурданд. Мақомоти Ироқ дастрасӣ ба Интернетро дар 75 дарсади қаламрави ин кишвар маҳдуд карданд.

Эътирозҳои оммавӣ дар пойтахти Ироқ, шаҳри Бағдод ва чанде аз шаҳрҳои дигар 1 октябр шуруъ шуд. Сокинон зидди фасодкорӣ, бекорӣ ва сатҳи пасти хизматрасониҳои ҷамъиятӣ, аз ҷумла қатъи барқ ва норасоии об эътироз доранд. Дар шабакаҳои иҷтимоӣ корбарон ҳамчунин талаб доранд, ки ҳукумат ба истеъфо равад.

Аз сарвазири Қирғизистон хостанд, "Шабакаи панҷум"-ро фурӯшад

Достони Бекешев, вакили порлумони Қирғизистон.

Достон Бекешев, вакили порлумони Қирғизистон ба сарвазири он кишвар Муҳаммадқулӣ Абилғозиев пешниҳод кард, ки телевизиони "Шабакаи панҷум"-ро фурӯшад. Пешниҳоди Бекешев рӯзи 1 октябр дар як муроҷиати видеоӣ садо дод. Вай афзуд, ба зудӣ бо навиштани номае ба сарвазир пешниҳод хоҳад кард, ки "Шабакаи панҷум" бояд фурӯхта шавад.

"Вақтҳои охир мо мушоҳида мекунам, ҳамин ки "Радиои Озодӣ" таҳқиқоти рӯзноманигорие нашр кард, "Шабакаи панҷум" вориди майдон мешавад. Ин шабакаи давлатӣ аст, набояд озодии матбуотро танқид кунад. Чунин хулосае ҳосил мешавад, ки танқид аз номи давлат садо медиҳад. Ман бар ин назарам, ки ин шабака ба мо лозим нест, бояд он фурӯхта шавад", - гуфт вакили порлумон.

"Шабакаи панҷум" дар Қирғизистон соли 2005 баъди аз мақом барканор кардани президенти вақти он кишвар Аскар Оқоев таъсис шуд. Соли 2010 телевизиони мазкур миллӣ гардонида шуд. Дар соли 2011 "Шабакаи панҷум" ба ихтиёри порлумон дода шуд.

"Хонигарии қазоқҳо. Тахти тилоӣ" ба ҷоизаи "Оскар" пешбарӣ шуд

Қазоқистон филми "Хонигарии қазоқҳо. Тахти тилоӣ"-и коргардон Рустам Абурашовро дар бахши "Беҳтарин филм бо забони хориҷӣ" барои ҷоизаи Академияи синамои ИМА - "Оскар" пешбарӣ кард.

Маросими 92-уми супоридани ҷоизаи "Оскар" охирҳои моҳи феврал ё аввали моҳи марти соли 2020 дар Лос-Анҷелес баргузор мешавад.

"Хонигарии қазоқҳо. Тахти тилоӣ" қисми дувуми филми бисёрсериягии “Хонигарии қазоқҳо” аст, ки бар пояи романи “Шамшери гӯё”-и Илёс Есенберлин ва дар чорчӯби тадорукот ба ҷашни 550-солагии давлатдории қазоқҳо ба навор гирифта шудааст.

Филмҳоро "Қазоқфилм" ба навор гирифтааст. Қазоқистон бори нахуст ҳамчун давлати мустақил соли 1991 барои ҷоизаи "Оскар" филми "Марги Отрар"-ро пешбарӣ карда буд. Баъд аз он, тақрибан тайи 15 сол дигар ягон филми қазоқӣ ба ҷоизаи мазкур пешбарӣ нашуд.

Соли 2007 Қазоқистон филм дар бораи Чингизхон "Муғул"-и коргардони рус Сергей Бодровро барои "Оскар" пешбарӣ карда буд ва ҳатто ба феҳристи дарёфткунандагони эҳтимолии ҷоиза низ шомил гашт.

Дар Туркманистон соҳибони дронҳоро ҷарима мекунанд

Дар вилояти Лебапи Туркманистон кормандони ҳифзи ҳуқуқ шаҳрвандонеро бозпурсӣ ва ҷарима мекунанд, ки дрон ё худ ҳавопаймои бесарнишин доранд.

"Агар фаҳманд, ки шаҳрванде дрон дорад, ӯро ба бозпурсӣ даъват карда, баъзан зиддаш парвандаи ҷиноӣ низ боз мекунанд. Чанде пеш соҳиби як студияро даъват карданд, ки тӯйҳоро ба навор мегирад. Вайро ҳамчун шахсе бозпурсӣ карданд, ки ба амнияти давлат хатар дорад. Аз вай пурсидаанд, ки дронро бо кадом мақсад истифода мебарад, дар вилоят боз кӣ дрон дорад ва онҳоро ба кишвар кӣ меорад",-иттилоъ дод хабарнигори бахши туркмании Радиои Озодӣ.

Ба гуфтаи хабарнигор, ворид кардани чунин дастгоҳҳо ба Туркманистон манъ буда, барои он ҷазое муқаррар шудааст, ки қонунгузорӣ ба қочоқчиёни силоҳ пешбинӣ мекунад.

"Дар ягон ҷо дрон ошкоро фурӯхта намешавад. Дар ҳоли ҳозир соҳибони онҳоро аз 1000 то 3000 манат ҷарима доранд. Ҳамчунин огоҳ низ мекунанд, ки агар бори дувум ба даст афтанд, ба ҷавобгарии ҷиноӣ ҷалб хоҳанд шуд (қурби расмии 1 доллар 3,5 манат аст)", - афзуд хабарнигор.

Яке аз кормандони пулиси вилояти Лебап ба шарти ифшо нашудани номаш сабаби пурзӯр шудани назорат аз болои соҳибони дронҳоро шарҳ дод. "Дар ҳоли ҳозир мақомоти туркман нигаронанд, ки касе навбатпоии сокинон барои ғизоро дар назди фурӯшгоҳҳо акс ё ба навор гирифта, оммавӣ мекунад", - изҳор дошт ҳамсуҳбати мо.

Зиёфати духтарону домодҳои Мирзиёев барои сарояндаи рус дар Тошканд

Дар Кохи "Humo"-и шаҳри Тошканди Узбекистон рӯзи 1-уми октябр консерти сарояндаи рус Полина Гагарина баргузор шуд. Зиёфате, ки пас аз ин консерт барпо гашт, баҳсҳои тундеро миёни корбарони узбек дар шабакаҳои иҷтимоӣ ба бор овард.

Ба гуфтаи продюсери Гагарина -- Андрей Мухачев, дар консерти сарояндаи рус дар Тошканд 10 ҳазор одам ширкат дошт. Корбарони узбек дертар дар шабакаҳои иҷтимоӣ видеои зиёфатеро нашр карданд, ки пас аз консерти Гагарина баргузор шудааст.

Дар ин видео, ки эҳтимолан аз сӯи худи Гагарина сабт шудааст, духтарон ва домодҳои президенти Узбекистон Шавкат Мирзиёев низ дида мешаванд.

Саида Мирзиёева дар баробари духтари президент будан имиҷсози рақами яки ҳукумати Узбекистон низ шумурда мешавад. Ӯ муовини мудири Оҷонсии иттилоот ва иртибототи оммавии назди президент аст, ки хидматчии давлатӣ ба шумор меравад. Дар канори Саида хоҳараш Шаҳноза Мирзиёева, сардори яке аз раёсатҳои Вазорати таҳсилоти томактабии Узбекистон нишастааст.

Домодҳои Мирзиёев низ вазифаҳои баланди раҳбарӣ доранд. Бино ба иттилои расман тасдиқношуда, домоди Мирзиёев Ойбек Турсунов муовини аввали раиси дастгоҳи президент ва домоди дувумаш Отабек Умаров муовини сардори Хадамоти амнияти раҳбари давлат аст.

Дар варақаҳои таблиғотии консерти Гагарина қайд шудааст, ки он бо ташаббуси ширкати "Madina's star company" ва дастгирии молии "Капиталбонк" баргузор карда мешавад.

Як манбаъ дар ҳукумати Узбекистон ба шарти ифшо нушадни номаш дар суҳбат бо бахши узбекии Радиои Озодӣ гуфт, "соҳиби ширкати мазкурро дар доираҳои наздик ба хонаводаи президент Мирзиёев бояд ҷуст". Бояд гуфт, қисми зиёди саҳмияҳои "Капиталбонк" ба ширкати домоди калонии президенти Узбекистон Ойбек Турсунов тааллуқ доранд.

Дар Қирғизистон таҳқиқи дубораи куштори журналист Алишер Соипов шурӯъ шуд

Алишер Соипов, журналисти маъруф дар 26-солагӣ кушта шуд

Мақомоти Қирғизистон ба таҳқиқи дубораи куштори журналисти мустақил Алишер Соипов шурӯъ карданд, ки 12 соли пеш дар шаҳри Ӯш мавриди ҳамлаи маргбор қарор гирифт. Бародари ӯ Шоҳрух Соипов рӯзи 3 октябр ба Радиои Аврупои Озод/Радиои Озодӣ гуфт, ки додситонии кулли Қирғизистон дар посух ба созмони IFEX ё шабакаи байналмилалии дифоъ аз озодии баён, мақарраш дар Канада гуфт, ки таҳқиқи дубораи парвандаи журналист дар охири моҳи август аз нав шурӯъ шуд.

Шоҳрух Соипов гуфт, ки аз шунидани ин хабар бисёр хушҳол шуд, вале, ба назари ӯ, “пайдо кардани шахсияте, ки воқеан ҳам хостори куштори Алишер Соипов буд, имкон надорад”. Соипов гуфт, ки мақомот ба онҳо хабар доданд, ки ба таҳқиқи дубораи парвандаи бародари журналисташ пардохтаанд.

Шурӯи таҳқиқи дубораро ба Радиои Озодӣ дар идораи додситонии кулли Қирғизистон ҳам тасдиқ карданд.
Соипов муассис ва сардабири нашрияи “Сиёсат” 24 октябри соли 2007 дар маркази шаҳри Ӯш аз тири туфанг кушта шуд. Ӯ он замон инчунин барои Радиои Озодӣ ва Садои Амрико ҳам гузоришҳо медод.
Баъди куштори ӯ рӯзномаи узбекзабонаш, ки дар ҳудуди Қирғизистон ва Узбекистон паҳн мешуд, аз нашр бозмонд.

Соли 2010 додгоҳи Ӯш як сокини маҳаллӣ Абдулғаффор Расуловро дар куштори Соипов гунаҳгор ва ӯро ба 20 соли зиндон маҳкум кард.

Вале хешовандони Соипов аз болои ин ҳукм шикоят карданд. Онҳо гуфтанд, ки нақшаи куштори ӯ хеле хуб тарҳрезӣ шуда буд ва қотили воқеӣ бемуҷозот мемонад.

Соипов, ки миллаташ узбек буд, дар гузоришҳои худ дар бораи гурӯҳҳои ҷангии исломӣ ва мухолифон дар минтақа мақолаҳо менавишт. Ӯ инчунин соли 2005 дар бораи қатли эътирозгарон дар шаҳри Андиҷони Узбекистони ҳамсоя ҳам гузоришҳо нашр карда буд.

Соли 2012 вазорати дохилии Қирғизистон бар асоси куштори Соипов таҳқиқи тозае ба роҳ монд, вале ин таҳқиқ ҳам бо сабаби мушкили мушаххас кардани шахсиятҳои гумонбарони куштор ноком шуд.

Як корманди полиси Фаронса баъди ҳамла ба ҳамкоронаш кушта шуд

Атрофи қароргоҳи марказии полиси Париж, ки дар назди калисои Нотр Дам воқеъ аст, муҳосира шудааст

Як корманди дафтари марказии идораи полиси шаҳри Париж баъди он ки чор ҳамкорашро бо зарби корд маҷрӯҳ кард, аз тири туфанги як ходими дигари полис кушта шуд.

Феълан сабаби рух додани ин ҳодиса маълум нест. Ҳамлаи рӯзи 3 октябр дар дар қароргоҳи марказии полис воқеъ дар назди калисои Нотр-Дам рух дод.

Муфаттишон гуфтанд, ки фарзияи аввали онҳо ин аст, ки ҳамлаи маргбортарин ба полис дар таърихи чанд соли охири Фаронса дар паи моҷарои корӣ рух додааст.

Мақомоти умури нақлиёти Париж гуфтанд, ки минтақаи атрофи идораи полис муҳосира шуда, бо далелҳои амниятӣ истгоҳи наздиктарини метро ҳам баста шудааст.

Як сухангӯи полис гуфт, ки феълан ин ҳодисаро ба ҳеҷ шакл шарҳ дода наметавонад.

Манобеи полис гуфтанд, ки ҳамлагар дар бахши маъмурияти идораи полис кор мекард, вале тасдиқи дурустии ин хабар феълан имкон надорад.

Ҳамла як рӯз баъди он рух дод, ки ходимони полис дар саросари Фаронса бо талаби шароити беҳтари кор намоиши эътирозӣ баргузор карданд.

"Сайтбандӣ" ба Русия "сироят" кард. ВИДЕО

Сайтбандӣ ба Русия сироят кард.
лутфан мунтазир бошед
Embed

Феълан кор намекунад

0:00 0:01:35 0:00

Amnesty International, созмони ҳомии ҳуқуқи инсон, ки қароргоҳаш дар Лондон аст, аз Русия даъват кард, дастрасӣ ба сомонаи хабаргузории "Фергана-нюс"-ро фавран барқарор кунад.

Раиси бахши русии Amnesty International Наталия Звягина рӯзи 2-уми октябр ин амалро ҳамла ба озодии баён номид.

«Роскомнадзор» ё Идораи нозири соҳаи мухобирот дар Русия шоми якуми октябр сайти оҷонси иттилоотии «Фергана-нюс»-ро дар рӯйхати сомонаҳои мамнуъ шомил кард. Ба навиштаи Amnesty International, субҳи 2-юми октябр дастрасӣ ба ин сайт дар қаламрави Русия номумкин шуд.

«Фергана-нюс» яке аз оҷонсиҳои пешқадами русзабон дар бозтоби ҳодисаҳои Осиёи Марказӣ мебошад. Кормандони оҷонсӣ мегӯянд, аз «Роскомнадзор» ҳеҷ хушдоре дар бораи поймол намудани қонунҳо дастрас накардаанд.

Дар гузашта панҷ ҷумҳурии Осиёи Марказӣ борҳо дастрасӣ ба ин сайтро манъ ва ё маҳдуд карда буданд. Феълан фақат Туркманистон ин сайтро бастааст.

"Роскомнадзор" – хадамоти нозири арсаи мухобирот дар Русия – моҳи августи имсол дастрасӣ ба сомонаи оҷонси иттилоотии "Азия-Плюс"-ро низ дар қаламрави ин кишвар масдуд карда буд.

Мақомоти Русия далели чунин иқдоми худро расонаӣ накарданд. Масъулони хабаргузорӣ гуфтанд, ба эҳтимоли зиёд Русия аз нашри хабари худкушии як зан дар Хуҷанд нигарон шуда, онҳоро ба таблиғи "ончи дар ҳудуди Русия манъ аст", муттаҳам кардааст.

Ёфтҳои бештар

Гузоришҳои видеоӣ

Тоҷикистону Эрон масъалаи визаро баррасӣ карданд
лутфан мунтазир бошед

Феълан кор намекунад

0:00 0:03:10 0:00
XS
SM
MD
LG