Пайвандҳои дастрасӣ

Хабари нав

Хабарҳо

Эрон аз ҳамла ба киштии "Собитӣ" хабар дод

Ба гуфтаи Ширкати миллии нафткаши эронӣ, як киштии нафткаши эронӣ ба зарбаҳои эҳтимолии мушакӣ дар соҳили Арабистони Саудӣ дучор шуда, ки сабаби рехтани нафт ба баҳри Сурх шудааст.

Ин ширкати давлатӣ рӯзи 11 октябр гуфт, "Собитӣ" дар 100 километрии бандари Ҷидда дар Арабистони Саудӣ дучори ду инфиҷор дар танаш шуд. Дар изҳорот омадааст, ки ин таркишҳо "эҳтимол аз зарбаҳои мушакӣ руй дода бошанд."

Телевизиони давлатӣ бо такя ба ширкати миллии нафти Эрон хабар дод, ки киштӣ бо ду мушак зада шудааст.

Аз ҷониби масъулони Саудӣ дар бораи ин ҳодиса, ки пас аз тезу тунд шудани кашмакашҳо дар минтақа ба вуқӯъ пайвастааст, ҳеҷ гуна тасдиқи фаврӣ нарасидааст.

Ширкати миллии нафткаши эронӣ гуфт: " Ҳама ҳайати киштӣ амн ҳастанд ва киштӣ низ устувор аст."

Хабаргузории давлатии IRNA гуфт: " Даруни "Собитӣ" оташе нест ва киштӣ" пурра пойдор аст. "Рехтани нафт аз нафткаши эронӣ" нигоҳ дошта шудааст ва ҳолат таҳти назорат аст. "

Се гузинаи Трамп дар рӯ ба рӯйи ҳамлаи Туркия ба курдҳои Сурия

Ҳангоме ки Туркия ҳамлаҳои худро ба артиши курдҳои Сурия пурзур кард ва дар Конгресси ИМА ҷорӣ кардани таҳримҳо ба Анқара барои амалҳояш дар шимолу шарқи Сурия оғоз ёфт, ҳазорон нафар хонаҳои худро тарк карданд. Дар ин ҳамлаҳои се рӯзи охир даҳҳо нафар кушта шуданд.

Дар ҳамин ҳол, президент Доналд Трамп рӯзи 10 октябр гуфт, ки омода аст "дар созиши миёни Туркия ва курдҳо миёнаравӣ кунад.

Қарори Трам дар бораи берун бурдани нерӯҳои ИМА, ки ба қувваҳои курд дар минтақа ёрӣ мерасонданд, пеш аз ҳуҷуми низомии Туркия буд.

”Мо яке аз се гузинаро дорем: Ҳазорон сарбозро фиристем ва ба таври низмӣ пирӯз шавем, Туркияро аз ҷиҳати молиявӣ ва таҳримҳо сахт зарба занем ё миёни Туркия ва курдҳо барои созиш миёнаравӣ кунем",--навишт ӯ дар Твиттер.

Баъдтар, ҳангоме ки хабарнигорон дар бораи гузинаҳояш пурсиданд, Трамп гуфт, "умедворам, ки тавонем миёнаравӣ кунем."

Вай афзуд, ки Иёлоти Муттаҳида мумкин аст, "ба зидди Туркия бо таҳримҳо ва дигар чизҳои молиявӣ кори сахтеро" анҷом диҳад.

Ҳангоми суханронии ӯ, 29 узви ҳизби ҷумҳурихоҳон дар Маҷлиси намояндагон эълом доштанд, қонунеро ошно хоҳанд кард, ки аз рӯи он мешавад ба Анқара барои амалҳояш дар шимоли Сурия таҳримҳо ҷорӣ кард. Ҷумҳурихоҳон дар Маҷлиси намояндагон ва Сенат, ба изҳороти рӯзи 6 октбри Трамп дар бораи баровардани нерӯҳои Амрико аз шимоли Сурия зидд буданд ва мунаққидон онро ҳамчун хиёнат ба нерӯҳои курди ҳампаймони Иёлоти Муттаҳида медонанд.

Пулис марги корманди Комиссариати ҳарбии Хоруғро шарҳ дод

Акс аз бойгонӣ.

Раёсати вазорати умури дохилӣ дар Вилояти Мухтори Куҳистони Бадахшон бо нашри як изҳорот ҳодисаи марги як корманди Комиссариати ҳарбии ин вилоятро шарҳ дод.

Аз рӯзи 9-уми октябр ба ин тараф дар шабакаҳои иҷтимоӣ хабаре чарх мезанад, ки корманди Комиссаритаи ҳарбии вилоят Расул Азимшоев аз сӯи кормандони мақомоти ҳифзи ҳуқуқ ба ҳалокат расонида шуда ва ҷасадаш ба дарёи Панҷ андохта шудаст. Дар зери ин хабар, ки дар гурӯҳи "Памир-Нюс" ба нашр расид, даҳҳо нафар шарҳу тавзеҳ навиштанд.

Дар изҳороти Раёсати умури дохилии Бадахшон, ки рӯзи 11-уми октябр дар сафҳаи "Фейсбук"-и мақомоти ин вилоят ба нашр расид, гуфта мешавад, ки Расул Азимшоев бинобар ҷанҷолҳои хонаводагӣ зери фишор қарор дошт ва бинобар ҳамин, тариқи худкушӣ худро ба дарёи Панҷ андохтааст.

Мақомоти пулиси Бадахшон дар шарҳи ҳодиса мегӯянд, ки ин корманди 36-солаи рӯзи 1-уми октябр аз маҳалли зисташ дар кӯчаи Аёмбеки шаҳри Хоруғ берун рафта ва ба тарафи номаълум ғайб зад ва пас аз муроҷиати наздикони ӯ, як рӯз пас тайи амалиёти ҷустуҷӯ пайдо ва ба пайвандонаш супурда шуд.

Дар изҳороти Раёсати корҳои дохилии Бадахшон гуфта мешавад, ки рӯзи 6-уми октябр бори дигар аз тарафи наздикони Азимшоев дар робита ба бедарак шудани ӯ ба Шӯъба вазорати корҳои дохилӣ дар шаҳри Хоруғ ариза ворид мешавад. Ба гуфтаи манбаъ, пас аз корҳои оперативӣ-ҷустуҷӯӣ рӯзи 8-уми октябр ҷасади Азимшоев дар дохили мошинаш "бе аломатҳои марги маҷбурӣ" аз дарёи Панҷ пайдо ва ба наздиконаш супурда мешавад.

Назари наздикони Азимшоев дар робита ба ин ҳодиса то ба ҳол маълум нест. Раёсати корҳои дохилӣ дар Вилояти Мухтори Кӯҳистони Бадахшон мегӯяд, ки дар ҳоли ҳозир дар робита ба ин ҳодиса аз сӯи Додситонии вилоят парванда боз шуда, тафтишот идома дорад.

Ба гуфтаи мақомот, Азимшоев бо ҳамсараш мушкили хонаводагӣ дошт ва барои аз якдигар ҷудо нашуданашон ба онҳо ду моҳ муҳлат дода шуда буд ва дар ин муддат онҳо аз ҳамдигар ҷудо зиндагӣ карда, завҷааш дар маҳаллаи Поршневи шаҳри Хоруғ дар хонаи падараш истиқомат менамудааст. Вале дар байни ў ва завҷааш мунтазам ҷангу ҷанҷол ва муноқишаҳои оилавӣ сар мезадааст. Азимшоев соҳиби ду фарзанди ноболиғ будааст.

"Нияти ҳамла" шаҳрванди Қазоқистонро 10 сол зиндонӣ кард

Додгоҳе дар Алматои Қазоқистон як мардро бо айби ҳамкорӣ бо террористон 10 сол зиндонӣ кард. Дар ин бора сомонаи Кумитаи давлатии амнияти миллии Қазоқистон 11 октябр хабар дод.

"Айбномаи Битимбоев А.Ж. эътибори қонунӣ пайдо кард. Вай дар омодагӣ ба амали террористӣ, таблиғи терроризм, ангехтани бадбинии динӣ ва ғайриқонунӣ нигаҳ доштани силоҳ айбдор шуд",-омадааст дар хабари КДАМ.

"Дар рафти тафтишот муайян шуд, ки вай бо истифода аз маводи тарканда дар ҷойҳои ҷамъшавии одамон таркиш ташкил кардан мехост", - хабар дод кумита.

Марди гумонбар моҳи апрели соли ҷорӣ дар Алмато боздошт шуд. Тафтишот мегӯяд, вай тасмим дошт, ба Сурия рафта ба сафи ҷангҷӯён пайвандад.

Мақомоти Қазоқистон соли гузашта хабар дода буданд, ки аз оғози ҷангҳо дар Шарқи Наздик наздики 800 шаҳрванди Қазоқистон ба сафи гуруҳҳои террористӣ пайвастаанд. Аз оғози соли ҷорӣ бештар аз 500 шаҳрванди Қазоқистон, асосан занону кӯдакон аз Сурия ба Қазоқистон баргардонида ва бархе аз онҳо дар Қазоқистон зиндонӣ шудаанд.

Узбекистон 64 кӯдакро аз Ироқ баргардонд

Субҳи 11-уми октябр 64 кӯдакро аз Ироқ ба шаҳри Тошканди Узбекистон баргардонданд. Дар ин бора Явлон Вахапов, сафари Узбекистон дар ИМА хабар дод. "Аз ин шумор 39 писар ва 25 духтар ҳастанд. Аз ҷумла 14 тани онҳо камтар аз 3 сол син доранд",-гуфт сафир.

Волидони аксари ин кӯдакон ба Ироқу Сурия рафта, ба гуруҳи террористии "Давлати исломӣ" ва дигар ҷангҷӯён пайваста ва дар ниҳоят кушта ва ё боздошту зиндонӣ шудаанд.

Моҳи майи соли 2019 дар доираи як амалиёти башардӯстонаи дигар аз минтақаҳои низои Шарқи Наздик 156 шаҳрвандони Узбекистон баргардонида шуда буд.

Тоҷикистону Қазоқистон, Қирғизистону Гурҷистон ва дигар кишварҳо низ талоши баргардонидани шаҳрвандони худро аз минтақаҳои низои Шарқи Наздик доранд.

Куба баъд аз 43 сол дубора соҳиби президент шуд

Маҷлиси миллии Куба Мигел Диас-Канелро президент интихоб кард. Дар ин бора дар саҳифаи "Твиттер"-и порлумони Куба хабар дода шудааст. 17 номзад барои курсии президентии Куба даъвогар буданд. Аз 605 вакил 579 тан ба ҷонибдорӣ аз Диас-Канеля раъй доданд.

Дар Куба соли 1976 мақоми президентиро барҳам дода буданд. Раиси Шӯрои давлатӣ ҳамзамон роҳбари давлат буд. Мақоми президентӣ бо қабули конститутсияи нав дар Куба барқарор шуд. Президент аз сӯи порлумон барои 5 сол интихоб мешавад.

Диас-Канел ба ҳайси раиси Шӯрои давлатӣ аз моҳи апрели соли 2018 ба ин тараф Кубаро роҳбарӣ мекард.

Конститутсияи нави Куба моҳи феврали соли ҷорӣ қабул шуд. Ба ҷуз аз тағйири сохтори давлатӣ, ин конститутсия ҳамчунин ба шаҳвардон ҳаққи доштани амволи шахсӣ ва бозори озодро дод.

Нафткашҳои Қазоқистон маоши бештар талаб доранд

Дар шаҳри Оқтеппаи Қазоқистон рӯзи 11 октябр коргарони ширкати нафткаши "Нафти шарқ ва хадамот" бо талаби афзоиши маошашон пушти дари корфармо ҷамъ шуданд.

Яке аз эътирозгарон гуфт, пештар аз ин онҳо 50 дарсад боло бурдани маошашонро талаб доштанд ва корфармо афзоиши 20-дарсадиро ваъда дода буд. Аммо онро ҳам иҷро накард.

"Маоши мо кам аст. Ҳадди аксари маош наздики 300 доллар аст", - гуфт Амонтой Бердимагамбетов, яке аз коргарони ширкати "Нафти шарқ ва хадамот".

Кайрат Бекенов, муовини ҳокими вилояти Оқтеппа бо эътирозгарон гуфтугӯ кард. Вай гуфт, ширкат соли ҷорӣ ду маротиба: дар моҳи январ 9 фоиз ва дар моҳи сентябр 20 фоиз маоши коргаронро боло бурд. Бекенов афзуд, болоравии маош соли оянда баррасӣ хоҳад шуд.

Аммо коргарон ин маълумоти Бекеновро рад карданд.

Дар моҳи сентябр коргарони ширкати "Нафти шарқ ва хадамот" гуфта буданд, ки дар сурати боло нарафтани маошашон корпартоӣ хоҳанд кард.

Дар ширкати "Нафти шарқ ва хадамот" дар маҷмуъ 1112 кас кор мекунад, ки аз ин шумор 106 танашон шаҳрвандони хориҷӣ ҳастанд.

Сокинони Фарғона ду ҷавони гумонбар ба дуздиро муҷозот карданд

Мақомоти умури дохилии Узбекистон мегӯянд, ҳодиса ибтидои моҳи равон дар деҳаи "Олтикуш"-и ноҳияи Данғараи вилояти Фарғона рух додааст.

Яке аз шоҳидон, ки ҳодисаро ба навор гирифтааст, мегӯяд, "Сокини "Олтикуш" вуруди пинҳонии ду ҷавон ба боғи себи худро дида, ҳамсояҳоро садо кардааст. Дар натиҷа мардум ҷамъ шуда, ҷавононро боздошт ва дар маҳалли ҳодиса муҷозот карданд".

Дар яке аз наворҳо дида мешавад, одамон ду ҷавонро дашном дода, латтукӯб мекунанд. Дар навори дувум нафаре пешниҳод мекунанд, ки ҷавонони боздоштшударо ба болои хар чапа шинонда, дар кӯчаҳо давр занонанд. Бархеҳо ба латтукӯб накардани ҷавонон низ даъват мекунанд.

Хадамоти матбуотии Идораи пулиси Фарғона гуфт, тафтиши ҳодиса оғоз шуда, натиҷаашро эълом хоҳанд кард.

Як маъмури пулиси ноҳияи Данғара гуфт, ҳодиса 3 октябр дар деҳаи Олтикуш рух додааст. "Соҳиби боғ як мошин себро мефурӯшад ва ду ҷавон субҳи барвақт ба хонаи ӯ даромада, пулҳоро медузданд. Вақти фирор сокинони деҳа онҳоро боздошт ва латтукӯб мекунанд", - афзуд ӯ.

Корхонаи сафолсозии Тошканд дубора гардон шуд

Корхонаи сафолсозии Тошканди Узбекистон дубора ба кор шуруъ кард. Шавкат Мирзиёев, президенти Узбекистон рӯзи 9 октябр аз ин корхона дидан кард.

Мирзиёев соли гузашта хабар дода буд, ки корхонаи мазкур баъди чанд соли аз фаъолият боз мондан, дубора гардон хоҳад шуд.

Корхонаи мазкур, ки соли 1952 сохта шуда буд, чанд соли охир аз кор ва истеҳсол монда буд.

Барои барқарории ин корхона бештар аз 9,2 миллион доллар харҷ шуд. Дар корхона дастгоҳҳои чинӣ насб шуда, барои 300 кас ҷои кор таҳия гардидааст.

Корхона солона 300 миллион зарфи сафолӣ истеҳсол мекунад.

Олими чиншинос дар Қазоқистон бо айби хиёнат ба давлат зиндонӣ шуд

Акс аз бойгонӣ.

Додгоҳе дар Алмато Константин Сироежкин, олими чиншиносро бо айби хиёнат ба давлат 10 сол зиндонӣ кард. Дар ин бора Кумитаи давлатии амнияти миллии Қазоқистон хабар медиҳад. Ҳукми додгоҳ нисбати олим 7 октябр содир шудааст.

Сироежкини 63-сола, шаҳрванди Қазоқистон моҳи феврали соли ҷорӣ дар робита ба ошкор шудани сирри давлатӣ боздошт шуд. Мақомоти Қазоқистон ҷузъиёти парвандаро ошкор намекунанд. Расонаҳо бори аввал аз боздошти Сироежкин дар моҳи май иттилоъ доданд.

Нашрияи Wall Street Journal (WSJ) 10 июли соли ҷорӣ бо такя ба манобеи худ навишт, ки "эҳтимол дорад, Сироежкин ҳуҷҷатҳои махфиеро дар ивази маблағ ба ихтиёри Чин гузоштааст". Нашрияи мазкур менависад, мақомоти Чин парвандаи олимро "бофта унвон мекунанд". Ба навиштаи WSJ, Сироежкин ҳангоми сарвазир будани президенти кунунии Қазоқистон Қосимҷомарт Тоқаев мушовири вай дар умури Чин буд.

Сироежкин муаллифи бештар аз ҳазор мақола аст. Вай сар аз соли 2006 ба ин тараф дар Институти таҳқиқотҳои стратегии назди президенти Қазоқистон фаъолият дошт.

Нишасти хабарии президенти Украина 14 соат идома кард

Президенти Украина Владимир Зеленский нишасти хабарии бузургеро баргузор кард. Он 14 соат идома ёфт. Дар нишаст даҳҳо рӯзноманигор ба президенти Украина суол доданд ва бештари онҳо ба суҳбати телефонии баҳсбарангезаш бо президенти ИМА Доналд Трамп ва вазъ дар Донбасс рабт доштанд.

Зеленский дар мавриди суҳбат бо Трамп гуфт, намехоҳад, ки Украина ба масъалаи сиёсати дохилии ИМА кашида шавад. Вай бори дигар изҳор дошт, ки Трамп ба ӯ фишор наовардааст ва тафтишот зидди писари муовини пешини президенти ИМА Ҷо Байден дар асоси қонун ва бо дархости додситонии Амрико сурат хоҳад гирифт.

Яке аз мавзуъҳои дигари суҳбати президенти Украина бо рӯзноманигорон вазъ дар Донбасс, пеш аз ҳама санади ба истилоҳ "формулаи Штайнмайер" буд, ки дар гуфтугӯҳои Минск имзо шуд. Ин санад, ки мақомҳои махсусро барои ҷумҳуриҳои худхондаи Донетск ва Луҳанск пешбинӣ мекунад, эътирози сокинони Украинаро ба бор овард.

Зеленский гуфт, аз "Майдони нав" ҳарос надорад ва барои Донетску Луҳанск вақте мақоми нав дода мешавад, ки дар ин замина қонун ба имзо бирасад. Ба гуфтаи ӯ, масъалаи мазкур пас аз саммити "шакли нормандӣ" ҳал хоҳад шуд. Президенти Украина гуфт, мехоҳад ба баҳси "шакли нормандӣ" масъалаи Қримро низ шомил кунад, зеро "ҳама чиз бо ишғоли он дар соли 2014 оғоз шуд".

Ёвари президенти Русия Юрий Ушаков гуфт, Украина муҳлати ихроҷи нерӯҳоро нақз мекунад. Ӯ ҳамчунин Киевро ба он айбдор кард, ки гӯиё талош дорад, кори "формулаи Штайнмайер"-ро ба ҳам бизанад. Вай таъкид кард, ки агар дар робита ба иҷрои созишномаи Минск натиҷаҳои дақиқ дида нашавад, саммити "чаҳоргонаи нормандӣ" лозим нест.

Дар Қазоқистон волидонро барои тазоҳуроти фарзандашон ҳабс карданианд

Аъзоёни Сенати Қазоқистон пешниҳод карданд, ки волидон барои иштироки фарзанди ноболиғашон дар ҳамоишҳои эътирозӣ ҷарима ё ба муҳлати 10 шабонарӯз ҳабс карда шаванд.

Маблағи ҷарима 100 нишондоди маоши ҳадди ақал (252 500 танга ё 647 доллар) аст. Ин банд ба лоиҳаи тағйиру иловаҳо ба қонун дар бораи хидмати давлатӣ ва мубориза бо коррупсия шомил карда шудааст.

Қонунгузории кунунии Қазоқистон барои ҷалби ноболиғон ба қонуншикании маъмурӣ ҷарима ба андозаи 50 нишондод пешбинӣ мекунад. ​

Муаллифони тарҳ бар инанд, ки ҳузури ноболиғон дар ҳамоишҳои эътирозӣ "рушди устувори ҷисмонӣ ва равонии саломатии наврасон"-ро ба ҳам мезанад.

Бар асоси қонунҳои амалкунандаи Қазоқистон, сокинон барои баргузории тазоҳурот бояд аз мақомот иҷозат гиранд. Дар ғайри сурат ҳамоиши эътирозӣ ғайриқонунӣ дониста мешавад. Ҳомиёни ҳуқуқ мегӯянд, ин қонун ҳуқуқи сокинон ба озодии ҷамъомадҳои осоиштаро маҳдуд мекунад.

Эмомалӣ Раҳмон барои ширкат дар ҷаласаи сарони ИДМ ба Туркманистон рафт

Эмомалӣ Раҳмон, раиси ҷумҳури Тоҷикистон рӯзи 11-уми октябр ҷиҳати ширкат дар ҷаласаи Шӯрои сарони кишварҳои аъзои Иттиҳоди Давлатҳои Мустақил ба Туркманистон рафт.

Тибқи иттилои дафтари матбуоти раёсати ҷумҳури Тоҷикистон, дар ин сафар Эмомалӣ Раҳмонро вазири умури хориҷӣ, ёвари президент дар умури муносибатҳои байналмилалӣ, вазири рушди иқтисод ва савдо, Додситони кулл ва дигар афроди расмӣ ҳамроҳӣ мекунанд.

Ҷаласаи Шӯрои сарони кишварҳои аъзои Иттиҳоди Давлатҳои Мустақил имрӯз, 11-уми октябр дар шаҳри Ишқобод баргузор мешавад.

Ба иттилои расмии котиботи ИДМ, дар ҷаласаи президентони кишварҳои узви ин созмон, эъломияи ҳамкориҳои стратегии иқтисодӣ ва Барномаи ҳамкорӣ дар самти мубориза бо терроризм ва дигар зуҳуроти ифротгароӣ имзо шавад. Инчунин қарор аст раҳбарии давраии ин созмон ба Узбекистон гузарад.

Бо ин ки аз таъсиси Иттиҳоди Давлатҳои Мустақил 28 сол сипарӣ шуд, аммо таҳлилгарон мегӯянд, ИДМ ҳамоно як созмони "шаклногирифта ва бесамар" боқӣ монд.

Иттиҳоди Давлатҳои Мустақил 8 декабри соли 1991, баъди пош хӯрдани Иттиҳоди Шӯравӣ таъсис шуда, то имрӯз ба узвияти он 10 ҷумҳурии Шӯравии собиқ - Озарбойҷон, Арманистон, Беларус, Қазоқистон, Қирғизистон, Молдова, Русия, Тоҷикистон, Туркманистон ва Узбакистон шомил ҳастанд.

Эрон-Камбоҷа: 2:0. Вале чаро ҷараёни бозӣ ба ҳошия рафт?

Варзишгоҳи Озодӣ, Теҳрон, 10 октябр

Нахустин бор дар таърихи 40 соли охири Эрон занон барои тамошои футболи мардон ба варзишгоҳ роҳ ёфтанд. Бозӣ шоми 10 октябр дар варзишгоҳи Озодии шаҳри Теҳрон шурӯъ шуд, ки рақобатҳои мунтахаби миллии Эрон ва Камбоҷа дар чаҳорчӯби бозиҳои интихобии Ҷоми ҷаҳонии футбол мебошад.

Радио Фардо хабар медиҳад, ки дар даҳ дақиқаи аввали бозӣ эрониҳо ба дарвозаи рақиб ду гол заданд ва пеш гузаштанд. Вале ба назар мерасад, ки на ҷараёни бозӣ, балки иҷозаи ширкати занони тамошобин дар он мояи таваҷҷӯҳи бештар ба ин бозӣ гардид.

Барои фароҳам шудани чунин имконият талошҳои чандинсолаи созмонҳои ҳомии ҳуқуқи занон, фишори афзояндаи Федератсияи байналмилалии футбол ва ниҳоят, марги фоҷеабори як духтари мухлиси футбол сабаб шуд. Ин духтари ҷавон худро баъди он оташ зад, ки додгоҳе ӯро барои талоши ворид шудан ба варзишгоҳ ба шаш моҳи ҳабс маҳкум кард.

Мақомот дар Эрон гуфтанд, аз миёни 80 ҳазор ҷой дар варзишгоҳ дар як макони ҷудогонае 3500 ҷой барои бонувон ихтисос дода мешавад мешавад. Шоҳидон мегӯянд, ки дар бозӣ дар фазои наздик ба идона ҷараён дорад.

Путин меравад, Раҳмон чӣ? Дар Ишқобод ҷаласаи сарони ИДМ баргузор мешавад

28 сентябри соли 2018, Тоҷикистон.

Рӯзи 11 октябр дар Ишқободи Туркманистон раҳбарони кишварҳои узви Итиҳоди Давлатҳои Муштаракулманофеъ (ИДМ) барои ширкат дар ҷаласаи Шӯрои раҳбарони ин созмон ҷамъ мешаванд. Ба иттилои расмии котиботи ИДМ, дар ҷаласаи президентони кишварҳои узви ин созмон, эъломияи ҳамкориҳои стратегии иқтисодӣ ва Барномаи ҳамкорӣ дар самти мубориза бо терроризм ва дигар зуҳуроти ифротгароӣ имзо шавад. Инчунин қарор аст раҳбарии давраии ин созмон ба Узбекистон гузарад, созмоне, ки ҳамчун вориси Иттиҳоди Шуравӣ таъсис ёфта, аз тарафи коршиносон "клуби президентҳо" унвон шудааст ва амалан нуфузи зиёде надорад. Хабаргузориҳои русӣ гуфтанд, ки дар ин нишаст президенти Русия Владимир Путин иштирок хоҳад кард.

Феълан маълум нест, ки оё президенти Тоҷикистон Эмомалӣ Раҳмон ҳам ба Туркманистон сафар мекунад ё хайр. Соли гузашта, замоне, ки раҳбарии давраии ин созмон аз Душанбе ба Ишқобод мегузашт, президенти Туркманистон Қурбонгулӣ Бердимуҳаммадов ба ин нишаст ҳозир нашуд ва бархе таҳлилгарони сиёсӣ вуҷуди сардӣ дар равобити ду ҳамсояи наздикро далели худдории президенти Туркманистон аз сафар ба Тоҷикистон арзёбӣ кардангд. Мақомоти тоҷик Туркманистонро дар эҷоди монеаҳо дар убуру мурури мошинҳои боркаш аз қаламрави ин кишвар айбдор кардааст.

То ҳол дар ин замина тағйироте мушоҳида намешавад. Як рӯз пеш аз ҷаласаи сарони кишварҳо, дар пойтахти Туркманистон ҷаласаи Шӯрои вазирони умури хориҷаи ин созмон баргузор шуд ва дар ҳошияи он Сергей Лавров бо ҳамтоҳояш аз кишварҳои Осиёи Марказӣ дар чаҳорчӯби, ба истилоҳ, гурӯҳи панҷгона ба иловаи Русия дидору гуфтугӯ карданд. Тоҷикистонро дар ин нишаст вазири хориҷа Сироҷиддин Мӯҳриддин намояндагӣ кард.

Озарбойҷону Арманистон, Беларус, Қазоқистон, Қирғизистон, Молдова, Русия, Тоҷикистон, Туркманистон ва Узбекистону Украина шомили ИДМ ҳастанд. Гурҷистон баъди ҷанги кӯтоҳмуддати соли 2008 бо Русия аз узвияти он хориҷ шуд. Украина ба далели мухолифатҳояш бо Русия ва ишғоли Қрим аз тарафи Маскав дар соли 2014 чанд сол боз намояндагони худро ба нишастҳои созмон намефиристад.

Дар Қазоқистон "Форуми тиҷорати Осиёи Миёна" доир мешавад

Рӯзҳои 12-13 ноябри соли ҷорӣ дар шаҳри Чимкенти Қазоқистон бо ибтикори Оҷонсии Амрико оид ба рушди байналмилалӣ (USAID), Форуми тиҷоратии Осиёи Марказӣ баргузор мегардад.

Аз сафорати Амрико дар Душанбе рӯзи 10-уми октябр ба Радиои Озодӣ иттилоъ доданд, ки дар ин форум роҳбарони ширкатҳо, намояндагони бахши давлатӣ ва коршиносони соҳа аз Осиёи Марказӣ ва Ҷанубӣ, Аврупо ва Иёлоти Муттаҳида, аз ҷумла намояндагони ҳукумати Тоҷикистон иштирок мекунанд.

Манбаъ афзуд, мавзӯи форуми имсола "Равишҳои инноватсионӣ ва сармоягузорӣ дар бахши меваю сабзавот" буда ва ширкатдорон бо технологияҳои нав, имкониятҳои сармоягузорӣ ва дурнамои рушди тиҷорат, шинос мешаванд.

Аз ҷумла, ширкатдорон бо равишҳои гуногуни сармоягузорӣ дар бахши меваю сабзавот дар Осиёи Миёна ва берун аз он шинос мешаванд. Ҳамчунин коршиносони Бонки Аврупоии Таҷдид ва Рушд дар ин бора ҷаласаи худро доир мекунанд ва мутахассисони Барномаи Рушди СММ ширкатдоронро бо истеҳсоли маҳсулот дар минтақа шинос мекунад.

Дар ҳошияи ин форум ширкати байналмилалии омӯзишии "CERT Academy" конфронси амалиеро оиди "Тағйир додани тафаккур дар системаи идоракунӣ бо стандартҳо нав"-ро мегузаронад.

Амрико сарпарасти асосии форум дар доираи тарҳи USAID оид ба рақобатпазирӣ, савдо ва ҷойҳои корӣ дар Осиёи Марказӣ мебошад ва онро бо шарикони маҳаллӣ ва байналмилалии худро доир мекунад.

Ин форум дар ҳоле баргузор мешавад, ки коршиносон мегӯянд, бо вуҷуди талошҳо, тиҷорат миёни ин кишварҳои Осиёи Миёна бо Амрико ба андозаи кофӣ густарда нест.

Кишварҳои Осиёи Миёна бо Амрико дар доираи Гурӯҳи С5+1 ҳам ҳамкорӣ доранд. Гурӯҳи С5+1 аз Амрико ва панҷ кишвари Осиёи Марказӣ -Тоҷикистон, Узбекистон, Қазоқистон, Қирғизистон ва Туркманистон ташкил шудааст.

Мулоқоти нахустини вазирони хориҷаи Тоҷикистон, Қазоқистон, Қирғизистон, Туркманистон, Узбекистон ва ИМА моҳи ноябри соли 2015 дар шаҳри Самарқанд баргузор шуд ва ширкаткунандагон дар заминаи ҳамкориҳо дар бахшҳои амният, иқтисодиёт ва муҳити зист ба мувофиқа расиданд.

Трамп ҳамкорӣ накарданашро бо Конгресс шарҳ дод

"Мо ҳамкорӣ мекунем, агар ҳуқуқҳои моро таъмин мекунанд", - гуфт Доналд Трамп дар шарҳи рад кардани ҳамкориаш дар пажуҳиши марбут ба эъломи нобоварӣ ба президент, ки аз сӯи Кохи Cафед роҳандозӣ шудааст.

Доналд Трамп ваъда кард, ки дар сурати таъмин намудани "ҳамаи ҳуқуқҳояш" дар раванди эъломи нобоварӣ нисбати президент бо Кохи Cафед ҳамкорӣ мекунад.

Трамп гуфт, демократҳои Конгресс ҳуқуқи ҷумҳурихоҳонро маҳдуд карда, вакили мудофеи президентро бо маводи парванда ошно намекунанд. "Онҳо ба мо барои бозии одилона ҳақ намедиҳанд. Ин ноодилонатарин вазъ аст, ки мо шоҳидаш шудем",-гуфт афзуд Трамп.

Рӯзноманигорон ҳамчунин аз Трамп хостанд, ки даъвати Ҷо Байден, рақиби эҳтимолии интихоботии Трампро дар интихоботи соли ояндаи президентӣ шарҳ диҳад. Ҷо Байден ба эъломи нобоварӣ ба Трамп даъват карда буд.

Нуфуз ё рейтинги Байден мисли санг меуфтад, гуфт Трамп. Далелҳои фасодкории вай сабт шудааст. "Ман дар назар дорам, ки вай гуфта буд: мо ба украинҳо ду миллиард доллар - ё чи қадар маблағ буд он ҷо - намедиҳем, то замоне ки онҳо додситонро барканор накунанд. Ва баъдаш, марҳамат: додситон дигар вуҷуд надорад...", - афзуд Трамп.​

Конгресси ИМА баъди он раванди эъломи нобоварӣ ба Трампро шуруъ кард, ки президенти ИМА гӯё дар ҷараёни як суҳбати телефонӣ дар моҳи июли соли ҷорӣ ба президенти Украина Владимир Зеленский фишор овардааст. Дар он суҳбати телефонӣ Трамп аз ҳамтои украинаш дархост кард, ки тафтиш нисбати писари Ҷо Байденро идома диҳанд. Ба гуфтаи Трамп, Байдени хeрдӣ дар Украина фасодкорӣ кардааст. Мунтақидони Трамп мегӯянд, вай аз ҳадди салоҳиятҳояш берун рафта, талош кардааст, ки нисбати рақиби эҳтимолиаш далел пайдо кунад.

Рӯзи сешанбе Кохи Сафед расман хабар дод, ки дар робита ба пажуҳиши эъломи нобоварӣ бо демократҳои Конгресс ҳамкорӣ намекунад. Нэнсӣ Пелосӣ, раиси Палатаи намояндагон гуфт, талоши пинҳон кардани ҳақиқат аз сӯи президент ҳамчун далели монеъ шудан ба адолати додгоҳӣ баҳо дода мешавад.

Президенти Узбекистон бо сафари дурӯза ба Ишқобод меравад

Президенти Узбекистон Шавкат Мирзиёев рӯзҳои 10-11 октябри соли 2019 дар ҷаласаи Шӯрои раҳбарони кишварҳои Иттиҳоди Давлатҳои Мустақил (ИДМ) дар шаҳри Ишқободи Туркманистон иштирок хоҳад кард.

Ба огаҳии хадамоти матбуотии президенти Узбекистон, дар ҷаласа маҷмуи масоиле баррасӣ мешаванд, ки ба рушду тақвияти ҳамкориҳои ҳамаҷониба дар доираи иттиҳод равона шудаанд. Ҳамчунин дар робита ба мушкилиҳои байналмилалӣ табодули назар карда мешавад.

Дар поёни ҷаласа имзо як қатор санадҳо, аз ҷумла Қарори интиқоли раҳбарии ИДМ дар соли 2020 ба Узбекистон, Эъломияи ҳамкориҳои стратегии иқтисодӣ, изҳороти раҳбарони кишварҳои ИДМ бахшида ба 75-умин солгарди пирӯзии мардумӣ Шӯравӣ дар Ҷанги Бузурги Ватанӣ дар солҳои 1941-1945 ва Барномаи ҳамкориҳо дар мубориза бо терроризм ва экстремизм барои солҳои 2020-2022 дар назар аст.

Ҳамчунин Шавкат Мирзиёев дар доираи саммити ИДМ бо раҳбарони як қатор кишварҳо дар Ишқобод мулоқот хоҳад кард.

Эрон хабарнигори рус Юлия Юзикро озод кард

Юлия Юзик.

Мақомоти Эрон хабарнигори рус Юлия Юзикро аз боздошт раҳо карданд. Юзик бо гумони ҷосусӣ ба нафъи Исроил ҳафтаи гузашта дар шаҳри Теҳрон боздошт шуда буд. Ба навиштаи хабаргузориҳо, вай ба Москва баргаштааст.

Дар ҳамин ҳол, хабар дода намешавад, ки айбҳои нисбати Юзик эъломшуда бекор гардидаанд ё на ва ё умуман, айбе эълом шуда буд ё на.

Юлия Юзикро оғози моҳи октябр дар шаҳри Теҳрон боздошт карданд. Вай бо даъват ба Эрон омада буд. Ҳанӯз дар фурудгоҳ шиносномаашро гирифта, гуфтанд, дар бозгашт ба дасташ хоҳанд дод.

Вазорати корҳои хориҷии Эрон 4 октябр хабар дод, ки Юзикро барои "шарҳи бархе аз масоил" боздошт кардаанд. Вазорат ваъда дода буд, ки вай ба зудӣ раҳо мешавад. Мақомоти Эрон ҳамчунин гуфтанд, ӯро ба далели мушкили виза боздошт кардаанд.

Аммо хабарнигор тариқи телефон ба наздиконаш гуфтааст, ки ӯро бо айби ҷосусӣ ба нафъи Исроил боздошт кардаанд.

Созмони "Хабарнигорони бидуни марз" озодии Юзикро талаб карда буд.

Юзик - муаллифи китобҳои "Арусони Худо" дар бораи террористзанон ва "Рӯзномаи Беслан" - дар бораи фоҷиаи Беслани Русия аст.

Занозании шаҳрвандони Қазоқистон бо роҳсозони чинӣ

Дар ноҳияи Оқсӯи вилояти Алматои Қазоқистон 7 октябр роҳсозони маҳаллӣ ва чинӣ бо ҳам ҷанҷол карданд. Пулиси вилояти Алмато мегӯяд, дар занозанӣ сокинони маҳаллӣ низ иштирок доштанд.

Ба огаҳии пулис, ҷанҷол нахуст миёни чаҳор шаҳрванди Чин -- кормандони ширкати ТОО Citic Construction cар задааст. Дар натиҷа яке аз онҳо, ки қазоқтабор аст ва ҳаққи иқомат дар Қазоқистонро дорад, осеби сабуки ҷисмонӣ дидааст.

Як гуруҳи сокинони маҳаллӣ бо кормандони "Citic Construction", ки шаҳрванди Қазоқистонанд, ҳамроҳ шуда, рӯзи дувум кормандони чиниро латукӯб кардаанд. Дар натиҷа чаҳор шаҳрванди Чин бо осебҳои гуногуни ҷисмонӣ дар беморхона бистарӣ гаштанд.

Дар робита ба ҳодисаи мазкур тафтишот оғоз шуда, пулис мегӯяд, шахсияти гумонбаронро муайян ва онҳоро боздошт кардааст. Ҳамчунин муайян шудааст, ки 33 корманди хориҷии Citic Construction қоидаҳои будубошро дар Қазоқистон риоя намекардаанд.

Садамаи маргбори пулиси узбек ҳангоми фирор аз ҳамкоронаш

Нозири Идораи пулиси вилояти Фарғонаи Узбекистон А.Э., ки 26 сентябр бо мошини хидматияш сокини 52-солаи ноҳияи Риштон Гавҳар Раҳимоваро пахш карда, ба қатл расонда буд, ҳанӯз ҳам дар мақомаш ифои вазифа дорад

Ба гуфтаи як манбаъ дар мақомоти умури дохилии Фарғона, нозир Раҳимоваро ҳангоми фирор аз маъмурони амнияти дохилии Идораи пулиси вилоят пахш кардааст. Он рӯз рейди боздошти кормандони пулисе ҷараён дошт, ки дар ҳолати мастӣ ифои вазифа мекунанд.

Намояндаи додситонии вилояти Фарғона гуфт, дар робита ба садама бо иштироки лейтенант А. Э. парвандаи ҷиноӣ боз шудааст. Як манбаъ дар Идораи пулиси Фарғона ба шарти ифшо нашудани номаш гуфт, лейтенант бо вуҷуди боз шудани парвандаи ҷиноӣ ҳанӯз ҳам дар мақоми худ ифои вазифа мекунад.

Ба гуфтаи ин афсар, раҳбарияти Идораи пулиси Фарғона Вазорати умури дохилӣ ва маъмурияти президенти Узбекистонро аз рух додани садама бо иштироки корманди худ огаҳ накардааст, ки хилофи қоидаи мақомоти умури дохилӣ шумурда мешавад.

Дар Идораи пулиси Фарғона тасдиқ карданд, ки бо иштироки корманди онҳо 26 сентябр садама рух додааст, вале гуфтанд, ки "лейтенант ҳеч гоҳ нушокии спиртӣ наменӯшид".

Бахши узбекии Радиои Озодӣ тавонист бо худи лейтенант суҳбат кунад. Нозири узбек гуфт, худро дар ин садама гунаҳкор намеҳисобад ва умедвор аст, додгоҳ қарори одилона содир меунад.

Ба огаҳии додситонии Фарғона, зидди нозир бар асоси банди "Аз беэҳтиётӣ ба қатл расондан" айб эълом шуда, дар сурати исбот ба ӯ 2 соли корҳои ислоҳӣ ё маҳрум шудан аз озодӣ ба муҳлати аз 1 то 3 сол таҳдид мекунад.

Парлумон ба ҳукумати Руминия нобоварӣ эълон кард

Виорика Дэнчилэ дар ҳалқаи тарафдоронаш раъйи адами эътимодро мешунавад

Дар остонаи интихоботи президентӣ ва соле пеш аз интихоботи парлумонии Руминия, парлумон ба ҳукумати нахуствазири ин кишвар Виорика Дэнчилэ нобоварӣ эълон кард. Дар овоздиҳии рӯзи 10 октябр 238 вакил ба ҷонибдорӣ аз ин қарор овоз доданд ва ин панҷ баробар бештар назар ба ҳаҷми ҳадди аққали овозҳо будааст. Парлумони Руминия аз 465 курсӣ иборат аст. Дэнчиле моҳи августи имсол аксари овози тарафдоронашро аз даст дод. Он замон шарикаш – Иттиҳоди либерал-демократҳо дар паи ихтилофҳо бар сари шахсияти номзади президентӣ аз эътилофи ҳукуматӣ берун шуда буд.

Баъдан, рӯзи 2 октябр азимтарин гурӯҳи оппозитсионӣ бо исми PNL эълон кард, ки барои баргузории овоздиҳӣ имзои заруриро чамъоварӣ кардааст.

Дэнчиле аз соли 2016 дар сари қудрат аст ва дар ин муддат мардум борҳо бо талаби ислоҳоти низоми додгустарӣ ва тадбирҳои зиддикоррупсионӣ раҳпаймоӣ кардаанд.

Бо айни ҳамин сабаб ҳам Иттиҳоди Аврупо ва ИМА ҳукумат ва тарафдорони ӯро мавриди интиқод қарор додаанд.

Президент Клаус Йоҳаннис гуфт, ки барои таъйини номзадии нахуствазири наве, ки то замони интихоботи парлумонӣ раҳбарии ҳукуматро ба ӯҳда гирад, бо ҳизбҳои сиёсӣ машварат хоҳад кард. Президенти ростгарои амалкунандаро дар интихоботи 10 ноябр номзади калидӣ меноманд.

Петер Ҳандке ва Олга Токарчук - барандаи ҷоизаи Нобел дар бахши адабиёт

Петер Ҳандке ва Олга Токарчук

Академияи Нобел дар Стокҳолм рӯзи 10 октябр ҷоиза дар бахши адабиётро ба ду нависанда аз Полша ва Австрия - Олга Токарчук ва Петер Ҳандке тақдим кард. Исми барандаҳои ҷоизаи бонуфуз дар маросими ботантана эълон шуд. Соли гузашта дар паи як моҷаро маросими тақдими Нобел дар бахши адабиёт боздошта шуд.

Академияи Шветсия дар Стокҳолм ба ҳайати доварон тағйирот ворид ва чанд узви навро барои арзёбии номзадии барандаҳо вориди комиссиюн кард. Дар моҷарое, ки порсол рух дод, поймолшавии оинномаи ҷоиза дар заминаи ихтилофи манфитаҳо ва ҳам озори ҷинсӣ сабаби боздошта шудани маросими ҷоизасупорӣ унвон шуда буд.

Ҳамсари як узви академия Катарина Фростенсон бо иттиҳоми таҷовуз ба номус ба 2,5 соли зиндон маҳкум шуд. Баъди ин шоира Фростенсон ҳайати академияро тарк кард.

То имрӯз ҷоизаи Нобел дар бахши тиб, физика ва химия тақдим шудааст. Қарор аст исми барандаи ҷоизаи сулҳи Нобел рӯзи 11 октябр эълон шавад ва исми барандаи ҷоиза дар бахши иқтисод 14 октябр маълум мешавад. Арзиши пулии ҳар як ҷоизаи Нобел 9 миллион крон ё 908 ҳазор доллар буда, ҳамасола дар зодрӯзи Нобел 10 декабр тақдим мешавад.

Олга Токарчук барандаи ҷоизаи Нобел дар бахши адабиёт дар соли 2018 дониста шуд. Ӯ соли 1962 дар оилаи украиниҳо таваллуд шудааст. Қаблан романи «Давандаҳо»-и ӯ барандаи ҷоизаи байналмилалии Букер шудааст.

Ғолиби соли 2019-и ҷоизаи Нобел дар бахши адабиёт Петер Ҳандке соли 1942 таваллуд шудааст. Дар миёни асарҳои бисёр машҳури ӯ «Тарси дарвозабон пеш аз зарбаи 11-метра», «Бозгашти батадриҷ ба хона» буда, ӯ муаллифи филми Вин Вандерс «Осмони Берлин» мебошад.

Ҷоизаи Нобел, ки аз соли 1901 тақдим мешавад, то ҳол 590 маротиба тақдим шудааст. 908 шахсият ва 27 созмон барандаи ин ҷоиза шудаанд.

Зеленский: "Пеш аз сӯҳбат бо Трамп хабар надоштам, ки кӯмаки низомӣ боздошта шуд"

Президенти Украина Владимир Зеленский гуфт, ӯ хабар надошт, ки кӯмакҳои низомии ИМА пеш аз сӯҳбати телефонии ӯ ва президенти ИМА Доналд Трамп боздошта шуда буд. Ин сӯҳбати телефонӣ, ки 25 июл барпо шуд, боиси шурӯи ҷараёни импичмент ё радди салоҳият ба Трамп гардид.

Зеленский рӯзи 10 октябр дар мулоқот бо журналистон дар Киев дар ҷараёни ба гуфтааш, нишасти матбуотӣ ё “марафони якрӯза” гуфт, ки гуфтугӯи телефонӣ марбут ба кумакҳои низомӣ набуд ва дар рафти сӯҳбат “таҳдиде” низ нашудааст . "Ман тасаввур надоштам, ки кӯмаки низомӣ қатъ шудааст. Вақте ман инро фаҳмидам, ин мавзӯъро дар вохӯрии Варшава бо ноиби президент Майк Пенс дар миён гузоштам”, илова намуд ӯ. Демократҳо дар Маҷлиси намояндагон таҳқиқеро сар карданд, ки метавонад ба импечменти Трамп сабаб шавад. Таҳқиқот ба сӯҳбати телефонии Трамп ва Зеленский рабт дорад, ки дар ҷараёни он Трамп аз Зеленский хостааст, ки ноиби президенти пешин Ҷо Байден ва писари ӯ Ҳантерро, ки дар Украина тиҷорат дошт, тафтиш кунад. Демократҳо даъво доранд, ки Трамп ба Зеленский бо таҳдиди боздошти кӯмаки низомӣ фишор овардааст , ки Байденро тафтиш кунад. Трамп ин иддаоро рад карда гуфтааст, ки ягон кори иштибоҳе накардааст.

Аз Узбекистон хостанд, аз таҷрибаҳои "худкомагӣ" даст кашад

Нафосат Оллашукурова.

Созмони ҳомии ҳуқуқи рӯзноманигорон "Кумитаи ҳифзи рӯзноманигорон" (CPJ) аз Узбекистон хост, блогнавис Нафосат Оллашукуроваро озод кунад. Нафосат Оллашукурова, ки пайваста аз фаъолияти мақомоти давлатӣ интиқод мекунад, моҳи гузашта дар бемористони бемориҳои равонӣ бистарӣ шуд.

Додгоҳи вилояти Хоразми Узбекистон 30 сентябр Нафосат Оллашукуроваро баъди 10 рӯзи адои ҳукми маъмурӣ, ба беморхонаи бемориҳои равонӣ фиристод.

Мақомоти Узбекистон бояд "ба ҳама рӯзноманигорон имкони инъикоси озодонаи ҳаводисро бидиҳанд", мегӯяд Гулноза Саид, ҳамоҳангсози барномаҳои CPJ. "Агар Узбекистон мехоҳад, ҷаҳон ислоҳоти онро ҷиддӣ қабул кунад, пас зарур аст, ки он кишвар аз таҷрибаҳои худкомагӣ, амсоли интиқоли хабарнигорон ба беморхонаҳои касалиҳои равонӣ даст кашад",- гуфт Гулноза Саид.

Нафосат Оллашукурова дар шабакаҳои иҷтимоӣ мавзуъҳое амсоли фасодкорӣ ва тахриби ғайриқонунии манзилу амволи сокинонро аз сӯи мақомот инъикос мекунад.

Ёфтҳои бештар

Гузоришҳои видеоӣ

Тоҷикистону Эрон масъалаи визаро баррасӣ карданд
лутфан мунтазир бошед

Феълан кор намекунад

0:00 0:03:10 0:00
XS
SM
MD
LG