Пайвандҳои дастрасӣ

Хабари нав

Хабарҳо

Президенти Туркманистон ба писараш мақоми баланд дод

Сардор Бердимуҳаммадов - писари президенти Туркманистон

Президенти Туркманистон Қурбонгулӣ Бердимуҳаммадов писари худро ноиби раҳбари вилояти Аҳал таъин кард.

Хабари таъини Сардор Бердимуҳаммадови 37-сола ба ин мақом рӯзи 2 январ дар як изҳороти кӯтоҳ дар сомонаи хабарии ҳукумат нашр шуд.

Дар зинаҳои қудрат баланд шудани ягона писари раиси ҷуҳмур дар ин кишвари шадидан таҳти назорат, дар ҳолест, ки ӯ камтар аз як сол пеш ба мақоми муовини вазири умури хориҷии Туркманистон таъин шуда буд.

Минтақаи Аҳал бо Афғонистон ва Эрон ҳаммарз буда, маркази маъмурии он дар ҳашт километрии Ишқобод ҷойгир аст.

Бо дарёфти мақоми нав Сардор Бердимуҳаммадов ҷойи худро дар порлумон бозпас мегирад вале аз мақоми муовини вазири умури хориҷӣ канор меравад.

Таъини ӯ ба мақоми муовини вазири умури хориҷӣ дар моҳи марти соли 2018 ҳамчун аломате талаққӣ шуд, ки ӯ дар ояндаи ҷойгузини падар мешавад.

Қурбонгулӣ Бердимуҳаммадови 61-сола моҳи декабри соли 2006, баъди марги президенти худкомаи пешин Сафармурод Ниёзов зимоми қудрати Туркманистонро ба даст гирифт ва то ҳол ба ин кишвари дар ҳоли инзиво камтарин таъғирот ворид кардааст.

Бердимуҳаммадов ҳамчунин се духтар ва чаҳор набера дорад.

Сафири Кореяи Шимолӣ дар Италия аз назарҳо пинҳон шуд

Прачами Кореяи Шимолӣ дар назди бинои сафорати ин кишвар дар Италия

Як дипломати Кореяи Шимолӣ, ки то чанде пеш иҷрокунандаи сафири ин кишвар дар Италия буд, аз назарҳо пинҳон шуд. Дар ин бора Хадамоти ҷосусии Кореяи Ҷанубӣ хабар дод.

Қоунунгузори Кореяи Ҷанубӣ Ким Мин-ки мегӯяд, ки дар ин бора як мақоми Хадамоти истихбороти кишвар рӯзи 3 январ дар ҷаласаи пушти дарҳои баста хабар дод.

Тавре Кин ба хабарнигорон гуфт, мақоми Хадамоти истихбороти Кореяи Ҷаунбӣ гуфтааст, ки Ҷо Сонг-гил, иҷрокунандаи мақоми сафири Пхенян дар Рум ва ҳамсари ӯ маҳалли зисти худро авоили моҳи ноябр, чанд ҳафта пеш аз анҷоми муҳлати фаъолияташ тарк кард.

Ба думболи ин маълумот хабари тасдиқношудае пахш шуд, ки Ҷо аз як кишвари Ғарбӣ, ки номаш зикр нашудааст, дархости паноҳангӣ кард.

Шарҳи Кореяи Шимолӣ дар бораи ин дипломат то ҳол дарёфт нашудааст.

Дипломати 48-сола Ҷо Сонг-гил аз соли 2017, баъди ронда шудани сафири қаблӣ Мунг Ҷон-нам аз Италия, ба нишони эътироз алайҳи озмоиши ҳастаии Пхенян, ҳамчун иҷрокунандаи вазифаи сафир фаъолият мекард.

Охирин мақомдори баландпояи Кореяи Шимолӣ, ки фирор карда буд, Тай Ёонг Ҳо, муовини сафири Кореяи Шимолӣ дар Лондон буд. Ӯ соли 2016 мақомашро гузошт ва ҳамроҳ бо зану фарзандонаш ба Кореяи Ҷанубӣ гурехт.

Трамп: Русия "ҳақ буд", ки дар Афғонистон ҷангид ва ҳоло мебояд ба он ҷо баргардад

Доналд Трамп

Доналд Трамп, президенти Амрико, ҳангоми баҳси мубориза бо гуруҳи террористии "Давлати исломӣ" дар Афғонистон аз давлатҳои дигар, махсусан Русия, Покистон ва Ҳиндустон даъват кард, ки ба мубориза ҳамроҳ шаванд.

"Чаро Русия дар он ҷо нест? Чаро Покистон нест? Ҳиндустон нест? Чаро мо дар онҷоем, ҳол онки мо 6 ҳазор километр аз онҷо дурем", - гуфт Трамп.

Президенти Амрико гуфт, ҷанги солҳои 1980 дар Афғонистон ба варшикастагии Иттиҳоди Шӯравӣ сабаб шуд.

"Русия пештар Иттиҳоди Шӯравӣ буд. Афғонистон аз он Русия сохт, зеро онҳо дар Афғонистон ҷангиданд ва варшикаста шуданд. Русия барои он дар Афғонистон буд, ки террористон ба сӯи Русия ҳаракат мекарданд. Онҳо (русҳо) ҳақ доштанд, ки онҷо бошанд. Мушкил дар он буд, ки ҷанг душвор буд. Ва онҳо варшикаста шуданд. Онҳо дубора номи Русияро гирифтанд, на Иттиҳоди Шӯравиро. Медонед, бисёр минтақаҳое, ки Шумо дар бораашон мехонед, дигар ҳудуди Русия нестанд, маҳз ба хотири Афғонистон", - гуфт Доналд Трамп.

Президент Трамп ба ҳузури тӯлонии нерӯҳои Амрико дар ин кишвари ҷангзада мухолиф аст ва ахиран гуфт, ки воҳидҳои низомии Иёлоти Муттаҳидаро аз Сурия берун мекашад.

Баъди навори "қабеҳи пулис" кормандони академия ҷазо гирифтанд

Ба иттилои Вазорати корҳои дохилии Қазоқистон, навори видеоии табрикоти солинавии милисае, ки ахиран дар интернет нашр шуд, дар Академияи Вазорати корҳои дохилии Қазоқистон дар Қарағанда сабт шудааст.

Вазорати корҳои дохилии Қазоқистон гуфт, ки дар робита ба ин ҳодиса муовини сардори таҳсили соли аввали академияи Қарағанда аз мақом барканор шудааст. Ӯ дар навор бо алфози қабеҳ ҳарф мезад ва ба фасодкории мақомоти ҳифзи ҳуқуқ ишора мекард.

Алмас Садубоев, сухангӯи Вазорати корҳои дохилии Қазоқистон хабар дод, ки мақомдори академияи Қарағанда Тастайбеков А.Р. аз мақомаш дар вазорат барканор шуд. Ба гуфтаи Садубоев, роҳбари бевоситаи Тастайбеков ва роҳбари муассисаи мазкур ҷазои маъмурӣ гирифтаанд.

31-уми декабри соли 2018 дар интернет наворе нашр шуд, ки дар он марде дар либоси милиса "бародарон" (ба эҳтимоли зиёд, кормандони мақомоти ҳифзи ҳуқуқ)-ро бо алфози нохушоянд табрик мекунад.

Ин навор дар шабакаҳои иҷтимоӣ баҳсу баррасии зиёдро ба бор овард.

Кохи Сафед аз нияти ИМА барои ҳимояи курдҳои Сурия хабар дод

Афсари ИМА бо сарбозони курд дар шаҳри Ал-Маликия

Доналд Трамп, раиси ҷумҳури Амрико, гуфт, ки Иёлоти Муттаҳида нерӯҳояшро аз Сурия дар "муҳлати муайян" берун мекунад ва ошкор накардани замони хуруҷи нерӯҳоро ба талоши пуштибонӣ аз курдҳои Сурия вобаста донист.

Қаблан Туркия аз омодагиаш барои ҳамла ба курдҳо хабар дода буд. Reuters ба дунболи ин аз барномаи Пентагон хабар дод, ки баъди хуруҷи нерӯҳо силоҳҳояшро ба курдҳо месупорад. Сухан аз боби зиреҳпӯшҳо, хумпорандозҳо ва сохторҳои мушакии зидди тонкҳо аст. Ин тасмим ҳоло ниҳоӣ нашудааст.

Трамп дар бораи хуруҷи нерӯҳои ИМА аз Сурия рӯзи 19-уми декабри соли 2018 хабар дод ва ин қарорро ба шикасти комили гурӯҳи террористии "Давлати исломӣ" рабт дод. Фармондеҳии артиши Амрико бо натиҷагирии президент розӣ нашуд ва инро амали пеш аз вақт номид.

Рӯзи 1-уми январи имсол маълум шуд, ки Трамп суръати хуруҷи артишро кам мекунад ва барои ин чаҳор моҳ вақт дод. Ба навиштаи матбуот, президени ИМА мавқеашро баъди боздид аз пойгоҳи Амрико дар Ироқ дигар кард. Фармондеҳони артиш Трампро гӯё мутақоид кардаанд, ки ҷиҳодиҳо то охир саркӯб нашудаанд.

Туркия мегӯяд, дастаҳои курд, ки дар тарафи ИМА алайҳи ДИИШ меҷанганд, бо "Ҳизби Коргарии Курдистон" робита доранд. Анкара ва бисёр кишварҳои дунё, бо шумули давлатҳои узви Иттиҳоди Аврупо ин созмонро террористӣ арзёбӣ мекунанд.

Дар боғи ҷонварони Андиҷон шере нигаҳбонашро кушт. ВИДЕО

Акс аз бойгонӣ

Шере дар боғи ҷонварони вилояти Андиҷон ба нигаҳбонаш ҳамла карда, ӯро кушт. Тафсилоти ҳодисае, ки рӯзи 28-уми декабри соли 2018 дар боғи ҷонварони ноҳияи Хоҷаободи Андиҷон рух додааст, рӯзи 2-юми январ ба бахши узбекии Радиои Озодӣ маълум шуд.

Нигаҳбон дар лаҳзаҳое мавриди ҳамлаи ҷонвари ваҳшӣ қарор гирифт, ки мехост вориди қафас шуда, ба шер хӯрок диҳад.

“Гумони мо ин аст, ки ҷонвар сахт гурусна буд ва ба ҳамин сабаб ба ин мард ҳамла кард”, - гуфт як корманди боғи ҷонварон, ки нахост номаш бурда шавад. Фоҷеаи рухдода дар остонаи Соли навро ба хабарнигорон дар шӯъбаи умури дохилии шаҳри Андиҷон ҳам тасдиқ карданд. Боғи ҷонварон дар ноҳияи Хоҷаободи Андиҷон баъди Тошканд дувумин боғи калонтарини вуҳуш дар ҳудуди Узбекистон ба шумор меравад.

Ин муассиса соли 2016 таъсис ёфта дар ҳудуди он беш аз 50 навъи ҷонварон нигаҳдорӣ мешавад. Як ходими фарҳанги ҳукумати ноҳияи Хоҷаобод гуфт, ки ин боғ ба як ширкати хусусӣ тааллуқ дошт, аз ин хотир нахост ҳодисаро шарҳ бидиҳад. Раҳбарияти боғ барои журналистон дастнорас буд.

Ин ҳодисаи нодири ҳамлаи ҷонвари ваҳшӣ ба корманди боғи ҷонварон дар Узбекистон аст. Соли гузашта "Озодлик" хабар дода буд, ки дар Сирки давлатии Узбекистон шеру палангҳои гурусна маймунеро, ки мисли онҳо дар сирк кор мекард, нобуд карданд. Кормандони сирк ноябри порсол аз мушкили таъмини саривақтии ғизову ҳолати риққатбори ҷонварон шикоят карда буданд. Ҳомиёни ҳуқуқи ҷонварон ҳам дар заминаи шароити номусоиди нигаҳдошти ҳайвонот дар боғҳои вуҳуши Узбекистон изҳори нигаронӣ кардаанд.

Сафири ИМА бо амрикоии боздоштшуда дар Русия мулоқот кард

Пол Уилан

Сафири ИМА дар Русия Ҷон Ҳантсман рӯзи чоршанбе бо шаҳрванди Амрико Пол Уилан, ки мақомоти Русия ӯро бо гумони ҷосусӣ боздошт кардаанд, дар зиндони "Лефертово" мулоқот кард. Дар ин бора сухангӯи Департаменти давлатӣ хабар дод.

Пеш аз ин, рӯзи чоршанбе Котиби давлатии ИМА Майк Помпео гуфт, ки ИМА аз Русия озодии оҷили шаҳрвандаш ва шарҳи сабабҳои боздошти ӯро талаб кард.

Кормандони Хадамоти федеролии амнияти Русия Уиланро рӯзи 28 декабр боздошт карданд. Алайҳи ӯ аз рӯи банди 276-и Қонуни ҷиноии Русия (ҷосусӣ) парванда боз шудааст.

Хонаводаи Уилан иттиҳоми ҷосусиро рад мекунад ва мегӯяд, ки ӯ ба Русия барои ширкат дар як ҷашни арусӣ рафта буд.

Оҷонсии "Росбалт" бо такя ба манбае дар хадамоти махсуси Русия навишт, ки Пол Уилан дар Маскав, ҳангоми гирифтани флеш-карти ҳомили феҳрасти кормандони яке аз муассисаҳои махфии Русия боздошт шуд. Ин маълумот, ба гуфтаи манбаи "Росбалт", сирри давлатӣ ҳисоб мешавад. Шаҳрванди Амрико флеш-картро дар ҳуҷраи меҳмонхонаи "Метропол" гирифт ва дар ҳамон ҷо боздошт шуд,- мегӯяд оҷонсӣ.

Пол Уилани 48 сола сарбози пешини нерӯҳои пиёдагарди баҳрии ИМА аст, ки дар Мичган зиндагӣ мекунад. Ӯ солҳои ахир дар бахши амнияти ширкати BorgWarner кор мекард, ки барои автомошинҳо лавозими иловагӣ месозад. Ба гуфтаи The Washington Post, Пол Уилан соли 1994 дар нерӯҳои пиёдагарди баҳрӣ ба хизмат оғоз кард ва соли 2008 бинобар дуздӣ аз сафи нерӯҳои ИМА хориҷ шуд.

Миёнаҳои моҳи декабри соли 2018 дар ИМА додгоҳи шаҳрванди Русия Мария Бутина баргузор шуд. Бутина ба созиши ҷиноятӣ бо ҳадафи кор кардан дар ИМА, ба сифати агенти хориҷии бидуни сабти ном, муттаҳама шуд. Ин шаҳрванди Русия ба хотири ҳукми сабуктар бо додгоҳи ИМА созиш ва гуноҳашро эътироф кард.

Қазоқистон ҳаҷми маош ва нафақаи шаҳрвандонро боло бурд

Сар аз моҳи январи соли 2019 ҳаҷми маош ва нафақа дар Қазоқистон боло рафт. Дар ин бора сомонаи сарвазири он кишвар хабар дод.

Ба иттилои сомонаи мазкур, ҳаҷми маоши ҳадди ақал аз 72 доллар ба 110 доллар мерасад. Гуфта мешавад, болоравии маоши ҳадди ақал ба 1 миллиону 300 ҳазор қазоқистонӣ дахл хоҳад кард.

Ҳамзамон ҳаҷми нафақаҳо низ боло рафта, ба 135 доллар баробар мешавад.

Ҷанҷоли ҷосусӣ: ИМА аз Русия шарҳи боздошти шаҳрвандашро талаб кард

Майк Помпео

Мақомоти ИМА интизор доранд, ки дар робита ба боздошти сарбози пешини нерӯҳои пиёданизоми баҳрии Амрико Пол Уилан, ки ахиран дар Русия бо ҷурми ҷосусӣ боздошт шуд, аз Маскав маълумоти бештар бигиранд, - дар ин бора Котиби давлатии ИМА Майк Помпео хабар дод.

"Мо ба Русия изҳори умед кардем, ки соатҳои наздик ба ӯ дастрасӣ пайдо кунем ва дар бораи ин қазияи маълумоти бештар бигирем",- гуфт Помпео рӯзи 2 январ дар ҷараёни сафараш ба Бразилия.

Рӯзи 31 декабр Хадамоти амнияти федеролии Русия - ФСБ гуфт, ки шаҳрванди ИМА Пол Уилан рӯзи 28 декабр "ҳангоми анҷоми амали ҷосусӣ" боздошт шуд. Алайҳи ӯ аз рӯи банди 276- Қонуни ҷиноии Русия (ҷосусӣ) парванда боз шудааст.

Хонаводаи Уилан иттиҳоми ҷосусиро рад мекунад ва мегӯяд, ки ӯ ба Русия барои ширкат дар як ҷашни арусӣ рафта буд.

Пол Уилани 48 сола сарбози пешини нерӯҳои пиёдагарди баҳрии ИМА аст, ки дар Мичган зиндагӣ мекунад. Ӯ солҳои ахир дар бахши амнияти ширкати BorgWarner кор мекард, ки барои автомошинҳо лавозими иловагӣ месозад. Ба гуфтаи The Washington Post, Пол Уилан соли 1994 дар нерӯҳои пиёдагарди баҳрӣ ба хизмат оғоз кард ва соли 2008 аз он хориҷ шуд.

Миёнаҳои моҳи декабри соли 2018 дар ИМА додгоҳи шаҳрванди Русия Мария Бутина баргузор шуд. Бутина ба созиши ҷиноятӣ бо ҳадафи кор кардан дар ИМА, ба сифати агенти хориҷии бидуни сабти ном, муттаҳама шуд. Ин шаҳрванди Русия ба хотири ҳукми сабуктар бо додгоҳи ИМА созиш ва гуноҳашро эътироф кард.

Миллиардерҳои Русия дар як сол қариб $6 миллиард гум карданд

Миллиардери рус Виктор Векселберг

Ба маълумоти оҷонсии Bloomberg, миллиардерҳои рус дар соли 2018 ҷамъулҷамъ 5,9 миллиард доллар гум карданд. Дар феҳрасти 500 сарватманди дунё, ба гуфтаи Bloomberg, 25 шаҳрванди Русия шомил аст.Дар давоми соли гузашта танҳо нуҳ нафари онҳо тавонистанд дороии худро бештар кунанд.

Сегонаи сарватмандони рус, ки натавонистанд доротар шаванд, молики "Ренова" Виктор Векселберг бо $3,1 миллиард бохт, президенти ширкати маъдани Урал Искандар Маҳмудов бо $2,4 миллиард ва молики "Серверстал" Алксей Мордашев бо $2,2 миллард доллар бохт номбар мешаванд.

Ба сафи онҳое, ки ба сарвати худ сарват зам кардаанд, ҳамраиси "Лукойл" Вагит Алекперов бо афзоиши дороии $3,4 миллард ва ҳамраисони "Новатэк" Леонид Михелсон ва Генадий Тимченко ворид шудаанд, ки ҳар яке дороии худро ба маблағи $2,7 миллард афзун кардааст.

Сарватмандтарин шаҳрванди Русия яке аз моликони аслии "Норникел" Владимир Потанин аст, ки Bloomberg дороии ӯро $20 миллиард шумурдааст.

Аз 20 шахси сарватманди дунё чордаҳ нафар шаҳрванди ИМА мебошанд. Муваффақтарини онҳо бунёдгузори Amazon Ҷефф Безос аст: дороии ӯ $125 миллиард ҳисоб шудааст.

Намояндаи Тоҷикистон раҳбари сохтори зиддитеррористии СҲШ шуд. ВИДЕО

Ҷумъахон Ғиёсов шурӯъ аз 1 январ раҳбарии Кумитаи иҷроияи сохтори минтақавии зиддитеррористии Созмони ҳамкориҳои Шонгҳойро ба ӯҳда гирифт. Хабаргузории Интерфакс рӯзи чоршанбе бо такя ба вазорати умури хориҷии Узбекистон хабар дод, ки шурӯъ аз 1 январ бар асоси қарори Шӯрои раҳбарони кишварҳои узви СҲШ раиси Кумитаи иҷроияи сохтори минтақавии мубориза бо терроризми ин созмонро, ки қароргоҳаш дар Тошканд аст, намояндаи Тоҷикистон Ҷумъахон Ғиёсов ба ӯҳда мегирад. Дар ин мақом ӯ се соли оянда кор хоҳад кард.

Ғиёсов давоми солҳои 2017-2018 дар вазифаи муовини раиси кумитаи иҷроияи ин сохтор кор карда, пеш аз он дар КДАМ ва Кумитаи умури дини Тоҷикистон кор кардааст.

Сохтори минтақавии зиддитеррористии СҲШ соли 2004 таъсис шуда, дар шаҳри Тошканд амал мекунад. То охири соли 2018 раҳбарии ин сохторро намояндаи Русия Евгений Сисоев ба ӯҳда дошт.

Инчунин, шурӯъ аз 1 январи соли 2019 бар асоси қарори шӯрои раҳбарони кишварҳои узви СҲШ, ба вазифаи дабири кулли ин созмон намояндаи Узбекистон Владимир Норов таъин шуд. Норов дар гузашта раиси Пажӯҳишгоҳи мутолеоти стратегии назди президенти Узбекистон ва вазири умури хориҷии ин кишвар кор кардааст. Норов дар ин мақом шаҳрванди Тоҷикистон Рашид Олимовро иваз кард.

Ба узвияти Созмони ҳамкорҳои Шонгҳой Ҳинд, Чин, Қазоқистон, Қирғизистон, Русия, Покистон, Тоҷикистон ва Узбекистон шомил ҳастанд.

Владимир Норов ба курсии дабири кулли Созмони ҳамкориҳои Шангҳай нишаст
лутфан мунтазир бошед

Феълан кор намекунад

0:00 0:00:20 0:00

Эътирозҳои Ҳиндустон баъди ибодати занҳо дар маъбади Сабаримала

Эътирози занон дар Ҳиндустон - 1 январ, 2019

Ба думболи ибодати ду зан дар маъбади шаҳри Сабаримала, аёлати Керала - бузургтарин макони зиёрати ҳиндуҳо, эътирозҳо оғоз шуданд. Пулис барои пароканда кардани тазоҳурот аз гази ашковар истифода кард. Дар ин бораи матбуоти Ҳиндустон рӯзи 2 январ хабар дод.

Эътирозгарон якчанд роҳро бастанд. Баъзе иштирокдорони тазоҳурот дукондорон ва савдогаронро ба коршиканӣ даъват карданд. Дар баъзе ноҳияиҳои аёлат мардум ба сӯи пулис санг андохтанд.

Рӯзи 1 январ барои аввалин бор дар чандин аср, ба ду зан даст дод, ки дар маъбад ибодат кунанд. Ҳамон рӯз занон дар Ҳиндустон пушти ҳам саф кашида аз худ ба дарозои 620 килолметр занҷири зинда сохтанд. Бо ин шева онҳо пуштибонии худро аз баробарии ҷинсӣ баён карданд. Ба гуфтаи мақомот дар намоишҳо беш аз 5 миллион нафар иштирок кард.

Муддати тӯлонӣ занҳои аз 10 то 50 сола ҳақ надоштанд ба маъбади Сабаримала ворид шаванд. Моҳи сентябри соли 2018 Додгоҳи олии Ҳиндустон қарори манъро расман бекор кард. Аммо мардҳо тамоми занҳоеро, ки мехостанд ба маъбад ворид шаванд, бо сангу чӯб заданд.

Рӯзи 4 март дар Бадахшон интихобот баргузор мешавад

Рӯзи 4 март дар ҳавзаи интихоботии Вилояти Мухтори Кӯҳистони Бадахшон №1 интихоботи узви Маҷлиси миллии Маҷлиси Олии Тоҷикистон баргузор мешавад. Дар интихобот Ёдгор Файзов бар ивази узви хориҷшуда аз ҳавзаи интихоботии ВМКБ Шодихон Ҷамшед ба узвияти маҷлис шомил мешавад. Ин тасмим рӯзи 2 январ дар ҷаласаи Комиссияи марказии интихобот ва раъйпурсии Тоҷикистон гирифта шуд, ки таҳти раёсати Бахтиёр Худоёрзода, раиси комиссиюни интихоботҳо баргузор гардид.

Шодихон Ҷамшед то 1 октябри соли 2018 дар мақоми раиси Вилояти Мухтори Кӯҳистони Бадахшон кор карда баъди интиқодҳои президенти Тоҷикистон аз тартибу интизом дар вилоят аз мақомаш барканор шуд. Ба ҷойи ӯ раҳбари Бунёди Оғохон дар Тоҷикистон Ёдгор Файзов таъйин шуд. Файзов феълан иҷрокунандаи вазифаи раиси вилояти Бадахшон аст ва қарор аст номзадии ӯро маҷлиси вилоятӣ тасдиқ кунад. Шодихон Ҷамшед ба мақоми муовини вазири беҳдошти Тоҷикистон таъин шуд.

Президент фармони "Солҳои рушди деҳоту сайёҳӣ ва ҳунарҳои мардумӣ"-ро имзо кард

Президенти Тоҷикистон рӯзи 2 январ фармонеро имзо кард, ки тибқи он солҳои 2019-2021 «Солҳои рушди деҳот, сайёҳӣ ва ҳунарҳои мардумӣ»
эълон мешавад. Дар вебсайти президент гуфта мешавад, ки ин тасмим мутобиқи моддаи 69 Конститутсияи Тоҷикистон, бо мақсади вусъат бахшидан ба рушди деҳот, соҳаи сайёҳӣ ва дастгирии ҳунарҳои мардумӣ гирифта мешавад. Масъулияти назорати иҷрои ин фармон ба дӯши Дастгоҳи иҷроияи президент вогузор мешавад. Қарор аст дар давоми як моҳ нақшаи нақшаи чорабиниҳо барои амалисозии ин барнома таҳия ва барои тасдиқ пешниҳод шавад.

Эмомалӣ Раҳмон, раиси ҷумҳури Тоҷикистон рӯзи 26-уми декабр дар паёми солонаи худ ба порлумони Тоҷикистон ҳадаф аз ин тасмимро, рушди деҳоти кишвар ва ҳамчунин ҷалби сайёҳон ва рушди ҳунарҳои мардумӣ унвон кард.

Соли 2018 дар Тоҷикистон "Соли рушди сайёҳӣ ва ҳунарҳои мардумӣ" эълон шуда буд. Ҳукумат ба ҳадафи рушди соҳаи сайёҳӣ ва ҷалби ҷаҳонгардон, сохтори наверо бо номи Кумитаи рушди сайёҳӣ таъсис дод. Раиси ҷумҳури Тоҷикистон дар паёми худ гуфт, ки шумораи сайёҳон дар соли 2018 назар ба соли қаблӣ дувуним баробар афзоиш ёфт.

Netflix саҳнаи танқиди Арабистони Саудиро аз шоу бардошт

Ҳасан Минҳоҷ

Онлайн-синамои Netflix саҳнаи танқиди Арабистони Саудиро аз намоиш берун кард. Дар ин бора матбуоти ИМА рӯзи 2 январ хабар дод.

Муҷрии телевизион Ҳасан Минҳоҷ Риёзро барои куштори журналист Ҷамол Хошуқҷӣ дар консулгарии Арабистони Саудӣ дар Туркия, танқид кард. "Фурсате расидааст, ки муносибат бо Арабистони Саудӣ бозбинӣ шавад. Ман инро ҳамчун як мусалмон, ҳамчун як амрикоӣ мегӯям",- гуфт Минҳоҷ дар барномаи мазҳакавиаш бо номи " Қонуни Ватанпарастӣ".

Мақомоти Саудӣ ин саҳнаро нақзи қонунҳои маҳаллӣ оиди ҷиноятҳои киберӣ арзёбӣ карданд. Netflix гуфт, ки ба озодии эҷодӣ эҳтиром мегузорад, аммо тасмим гирифт, ки саҳнаро лағв кунад.

Ҳоло ин саҳна дар ИМа дастрас буда, аммо дар Арабистони Саудӣ масдуд шудааст.

Мақоланависи The Washington Post Ҷамол Хошуқҷӣ аввали моҳи октябр дар консулгарии Арабистони Саудӣ дар Истамбул кушта шуд. Ин журналисти саудӣ солҳои ахир аз Риёз шадидан интиқод мекард. Хадамоти истихбороти Туркия ва ИМА ба ин натиҷа расидаанд, ки мақомоти баландпояи Арабистони Саудӣ эҳтимол дар кушори журналист даст доранд. Риёз ин иттиҳомро рад мекунад. Ҷасади Хошуқҷӣ то ҳол пайдо нест.

Дар Амрико алайҳи муҳоҷирон аз гази ашковар истифода шуд

Муҳоҷирон дар марзи Мексика

Марзбонҳои ИМА бо ҳадафи пароканда кардани муҳоҷирон дар марзи Мексика аз гази ашковар истифода карданд. Дар ин бора хабаргузории Associated Press рӯзи 2 январ гузориш дод. Ба гуфтаи хабаргузорӣ, ҳудудан 150 нафар мехостанд марзро дар минтақаи Тихуан убур кунанд.

Хадамоти марзбониву гумрукии ИМА гуфт, ки гази ашковарро барои дифоъ аз худ ба кор бурданд. Марзбонҳо мегӯянд, ки муҳоҷирон ба тарафи онҳо санг партофтанд. Ба ғайр аз ин, онҳо хостанд якчанд кӯдакро аз монеаи марзӣ ба тарафи ИМА партоянд. 25 нафар боздошт шудааст.

Хабарнигори Associated Press мегӯяд, ки муҳоҷирон баъди истифодаи гази ашковар ба сӯи марзбонҳо санг партофтанд.

Муҳоҷирон мегӯянд, ки онҳо бо корвони Гондурас моҳи декабри соли 2018 ба марз расиданд. Бахши умдаи онҳо дар минтақаи Тихуан имкони дархости паноҳандагии сиёсӣ дар ИМА-ро интизоранд. Аммо бинобар теъдоди зиёди паноҳҷӯён мумкин ин раванд якчанд моҳро дар бар бигирад.

Муқовимати президенти ИМА Доналд Трамп бо демократҳо дар Конгресс дар робита ба сармоягузории девор дар марзи Мексика, ки Кохи сафед бар сари сохтмони он пофишорӣ дорад, ба қатъ шудани қисме аз фаъолиятҳои ҳукумат расонд. Чаҳоряки идораҳои давлатӣ корро муваққатан қатъ карданд.

Пекин барои ҳамоиш бо Тайван "тамоми чораҳо" - ҳифз мекунад

Сӣ Ҷинпин

Сӣ Ҷинпин гуфт, Чин аз истифодаи "тамоми чораҳо" алайҳи ҳамагуна нерӯе, ки ба ҳамошии осоиштаи Чин бо Тайван муқовимат мекунад, даст намекашад.

Раҳбари Чин рӯзи 2 январ дар як изҳорот гуфт, шубҳае нест, ки ин ҳамоиш сурат мегирад. Ӯ аз мардуми ҳарду тарафи халиҷи Тайван даъват кард, ки барои расидан ба ин ҳадаф талош кунанд.

Рӯзи 1 январ президенти Тайван Тсай Инвен аз Чин даъват кард, ки барои ҳалли мушкили дуҷониба танҳо аз роҳи мусолиҳатомез кор бигирад.

Ӯ дахолати Чин ба рушди сиёсӣ ва иқтисодии Тайванро "бузургтарин чолиш кишвар" унвон кард.

Чин мудохила ба умури дохилии Тайванро рад мекунад.

Нерӯҳои миллии Чин, бо сарварии Чан Кайшӣ, соли 1949, баъди бохтани ҷанги шаҳрвандӣ ба коммунистҳо аз Тайван фирор карданд. Чин Тайванро як бахши қаламрави худ медонад.

Пайдо шудани пораҳои "Чакан"-и мутааллиқ ба қарнҳои 2-3-и пеш аз милод

Бостоншиносони тоҷик якҷо бо гурӯҳе аз антропологҳои Русия дар ноҳияиФархори ҳаммарз бо Афғонистон пораҳои матои "Чакан"-ро пайдо карданд, ки ба қарнҳои (2-3-и) пеш аз милод рост меояд.

Азизулло Муродов, мудири Осорхонаи ноҳияи Фархор чоршанбе 2-юми январ дар суҳбат ба Радиои Озодӣ гуфт, ки ин матоъ дар ковишҳои солҳои гузашта аз бадани ҷасади як духтари 11-12-сола аз мавзеи Уртабуз пайдо шуда буд. Муродов гуфт, ки барои дақиқ кардани таърихи ин матоъ онро барои ташхис ба Русия бурда буданд. Ӯ мегӯяд, ки баъди ташхис дақиқ карданд, ки ин матоъ чакан буда, аз асрҳои (2-3-и) пеш аз милод мондааст.

"Ин дар ковишҳои солҳои пеш пайдо шуда буд ва онро барои ташхис ба Русия бурда буданд ва дар онҷо дақиқ карданд, ки ин чакан аст ва ба асрҳои 2-3 пеш аз милод тааллуқ дорад. Ин чакан ҳангоми ковиш аз тани як духтари 11-12 сола пайдо шудааст ва дар он нақшҳои гул ва гунчишк тасвир ёфтааст ва ҳоло пораҳои он дар Осорхонаи миллии Тоҷикистон нигоҳ дошта мешавад",--гуфт мусоҳиби мо.

Ковишҳои бостоншиносӣ аз тобистони соли 2013 дар мавзеи "Уртабуз"-и шаҳраки Фархор оғоз шуда, то ин замон даҳҳо мавод ва ашёи таърихӣ пайдо шудааст. Соли 2014 дар пайи як кофтуков дар ин мавзеъ муҳаққиқон аз умқи 10 метри зери хок гӯри 2,5-метраи инсон ва даҳҳо адад ҳайкалчаҳои Буддоро пайдо карда буданд.

Саидмурод Бобомуллоев, раиси Осорхонаи бостоншиносии Тоҷикистон дар як сӯҳбати қаблиаш ба Радиои Озодӣ гуфта буд, ки бозёфти ахир баёнгари он аст, ки дар асри биринҷии миёна дар ҳудуди Фархори имрӯза одамон зиндагӣ доштанд.

Ҷаноби Бобомуллоев афзуд, ки дар он замон одате миёни мардум вуҷуд доштааст, ки баъди фавт дар бари ҷасад кӯза ва даруни он шир, гӯшт ё об мегузоштанд. Ӯ мегӯяд, ки ҳар як бозёфти пайдошуда як саҳифаи навро барои рӯшан кардани таърихи тоҷикон боз мекунад.

"Дар таърихи шашҷилдаи халқи тоҷик ва умуман дар таърихи халқи тоҷик, аз сабабе, ки далелҳо набуданд ва як ақидае буд, ки дар инҷо мардуми маданияти Ҳисор, яъне мардуми давраи асри санг зиндагӣ мекардаст, ки ба асри 12-11 пеш аз мелод ба инҷо мардумон омаданд, ки бо номи маданияти археологии Вахш машҳур аст. Аммо ин бозёфтҳои мо нишон медиҳад, ки тамоми Бохтари бузурги он замон, ки қисмати чапи дарёи Ому қисмати асосии Бохтар буд ва дар онҷо мардум зиндагӣ мекард, аммо дар тарафи рости дарёи Ому мардум зиндагӣ карда як фарҳанг доштаанд",-гуфт Бобомуллоев.

Зимнан, бостоншиносони тоҷик мегӯянд, бовар меравад, ки дар ин мавзеъи Уртабуз даҳҳо осори таърихӣ нуҳуфтааст, ки таҳқиқӣ васеъро ва ковишҳои бузургро талаб мекунад.

Шоумен ва продюсери Украина довталаби курсии президентӣ шуд

Владимир Зеленский

Шуомен ва продюсер Владимир Зеленский эълон кард, ки дар интихоботи президентии Украина иштирок мекунад. Ӯ бо ин эълон аз тариқи шабакаи телевизионии 1+1 ба мурдуми Украина муроҷиат кард. Муроҷиати Зеленский чанд дақиқа пеш аз фарорасии соли нав пахш шуд. Барои ин, шабака суханронии табрикотии президент Петр Порошенкоро ба вақти дигар гузаронд. Суханронии президент замоне пахш шуд, ки соли 2019 фаро расида буд.

Зеленский гуфт, ки дар вазъияти феълӣ ҳар як сокини Украина се роҳ дорад. Якум - шеваи зиндагии феълиро идома диҳад ва бо ҷараён ҳаракат кунад. Дуюм барои мардикорӣ ба хориҷи кишвар равад ва сеюм - роҳе, ки ӯ интихоб кардааст.

Маъракаи интихоботӣ расман 31 декабр оғоз шуд. Райъдиҳӣ 31 март баргузор мешавад. Биноба маълумоти марказҳои омӯзиши афкори умум, феълан раҳбари ҳизби "Баткившина" Юлия Тимошенко бар дигарон бартарӣ дорад. Ҷойи дуюм бо Владимир Зеленский аст. Шабакаи телевизионии 1+1, ки муроҷитаи Зеленскийро пахш кард, ба ӯ таалуқ дорад.

Туркманистон фурӯши шаробро маҳдуд кард

Қонуни нави Туркманистон, ки фурӯши шаробро маҳдуд мекунад, ба иҷро даромад.

Сар аз 1 январ фурӯши шароб дар ин кишвари асосан мусалмоннишин дар қатор, ҳавопаймо, киштӣ ва муассисаҳои варзишӣ мамнӯъ шуд.

Дарёфти шароб барои аҳолии 5,6 миллионнафарии Туркманистон дар иду ҷашнҳо низ мушкил мешавад, зеро шароб дар ин рӯзҳо ба фурӯш намебарояд.

Сар аз соли 2021, рузҳои шанбе ва якшанбе машруботи алкоҳолӣ, ба ғайр аз бару ресторанҳо дигар дар ягон ҷо пайдо намешавад.

Тукманистон, кишваре, ки феълан ба бӯҳрони иқтисодӣ, бекорӣ, таваррум ва камбуди ғизо гирифтор аст, аз тарафи Қурбонгулӣ Бердимуҳаммадов - раҳбари худкомае идора мешавад, ки худро ҳамчун варзишгари тавоно дар чандин навъи спорт муаррифӣ мекунад.

https://www.youtube.com/watch?v=Pa5j3-nC4AI

Бердимуҳаммадов аз шаҳрвандони кишвар пайваста даъват мекунад, ки ба варзиш машғул шаванд ва қавл додааст, ки то соли 2015 Туркманистонро аз тамоку озод мекунад.

Трамп раҳбарони Конгрессро ба гуфтугӯи амнияти марз даъват кард

Президент Трамп ва сентаор Линдси Грэм

Дар пасманзаро мушкили тасдиқи буҷа ва қисман қатъ шудани фаъолияи ҳукумати Амрико президенти ИМА Доналд Трамп раҳбарони ҳарду палатаи Конгрессро барои гуфтугӯи амнияти марз ба Кохи сафед даъват кард.

Ёварон рӯзи 1 январ гуфтанд, ки ҳашт раҳбари Конгресс рӯзи 2 январ дар брифинги Вазорати амнияти дохилии ИМА иштирок мекунанд. Маълум нест, ки оё дар байни раҳбарони Конгресс ва маъмурияти президент музокироти буҷа сурат мегирад ё хайр.

Брифинг як рӯз қабл аз даъвати ҷаласаи аввали Конгресси нав, ки дар он Демократҳо аксарият шудаанд, баргузор мешавад.

Трамп барои татбиқи ваъдаи давраи интихоботи соли 2016 - бунёди девори амниятӣ дар байни ИМА ва Мексика 5 миллиард доллар мехоҳад, дар ҳоле, ки Демократҳо дар Конгресс афзоиши сармоягузории марзро рад карданд ва чизе бештар аз 1,3 миллиарди феълӣ додан намехоҳанд.

Муқовимати буҷа, ки 22 декабр оғоз шуд, фаъолияти ҳукумати Амрикоро қисман қатъ кард.

Теъдоди қубониёни таркиши Магнитогорск ба 19 нафар расид

Макони таркиш дар Магнитогорск

Теъдоди қурбониёни таркиш дар хонаи истиқоматӣ дар Магнитогорски Русия ба 19 афар расид. Дар ин бора хабаргузории РИА Новости рӯзи 2 январ гузориш дод. Ҷасади қурбониҳоро аз зери оворҳои хонаи фурӯрафта берун оварданд. Сарнавишти беш аз 20 нафари дигар маълум нест. Имрӯз дар Челябинск рӯзи мотам эълон шудааст.

Дар Вазорати ҳолатҳои изтирории Русия мегӯянд, ки ҷустуҷӯи одамон дар чаҳор баст идома дорад.

Кумитаи тафтишоти Русия фарзияи амали террористӣ дар Магнитогорскро рад кард. Изҳороти ин ниҳод дар ҳоле пахш шуд, ки рӯзи гузашта баъзе расонаҳо аз эҳтимоли амали террористӣ гузориш доданд. Аз ҷумла ба навиштаи нашрияи Znak.com хонаеро, ки дар он таркиш рух дод, як рӯз пеш марде иҷора гирифт ва дар он манзил гӯё нишонаҳои маводи мунфаҷира ошкор шуд. Муфаттишолн ошкор шудани нишонаҳои маводи таркандаро рад карданд.

Субҳи 31 декабр сутуни хонаи 10 ошёна дар яке даромадгоҳҳои бино фурӯ рафт. Фарзияи аслӣ таркиши гази табии гуфта мешавад.

Боздошти 3 ноболиғ дар Ҷӯибодом барои дуздӣ

Бинои додгоҳи ноҳияи Рӯдакӣ.

Се ноболиғи 12-13-сола ба иттиҳоми дуздии ҷӯмакҳои обгузар аз манзили як сокини деҳаи Ҷӯибодоми ноҳияи Рӯдакӣ, боздошт шудаанд. Шӯъбаи корҳои дохилии ноҳияи Рӯдакӣ мегӯяд, ки ин ноболиғон рӯзи 19-уми декабр ба ҳавлии истиқоматии яке аз сокинон ворид шуда, аз онҷо 669-адад ҷӯмакҳои обгузари "Винтел", ки арзиши умумиашон 18 ҳазору 211-сомонӣ мебошад, дуздиданд ва аз ҷойи ҳодиса ғайб задаанд. Мақомоти пулис мегӯянд, пас аз он, ки соҳибхона мақомотро дар ҷараён гузоштанд, дар натиҷаи гузаронидани чорабиниҳои оперативӣ-ҷустуҷӯӣ ин се ноболиғи сокини деҳаи Ҷӯибодом боздошт шудаанд ва тафтиши ин ҳодиса идома дорад.

Сафорат: Оилаи дувум аз Тоҷикистон дар ҳодисаи Магнитогорск "осеб надидааст"

Мақомоти сафорати Тоҷикистон дар Русия гуфтанд, ки ҳодисаи фурӯ рафтани як бахши бинои бисёрошёна дар Магнитогорскро аз наздик пайгирӣ доранд.

Дар ин ҳодиса Шӯҳрат Улфатов, сокини 28-солаи ноҳияи Кушониёни вилояти Хатлон, осеб дида, ҷустуҷӯи ҳамсар ва се кӯдакаш дар зери вайронаҳо идома дорад.

Масъулони хадамоти матбуоти сафорат рӯзи 1-уми январ дар суҳбат бо Радиои Озодӣ гуфтанд, дар ҳодисаи фурӯ рафтани як қисми бино дар Магнитогорск ба ҷуз оилаи Улфатовҳо, боз як хонаводаи дигари тоҷик ҳам буд, ки “аъзои он комилан сиҳату саломат ҳастанд”.

Дар сафорати Тоҷикистон исми ин хонаводаро нагуфтанд. Вале дар рӯйхате, ки Идораи ҳолатҳои фавқулодаи Магнитогорск нашр кард, ному насаби Самиев Маҳмадрозиқ Бегиҷонович ва ҳафт узви хонаводаи ӯ сабт ёфтааст.

"Сафар Сафаров, консули генералии Тоҷикистон дар Екатеринбург ба маҳалли ҳодиса рафтааст. Мо бо мақомоти Вазорати корҳои хориҷӣ, Вазорати ҳолатҳои фавқулода ва Вазорати тандурустии Русия дар тамос ҳастем, ки ба шаҳрванд Шуҳрат Улфатов кумак расонда шавад. Улфатов дар бемористон аст ва ҳолаташ вазнин аст. Ҳар кумак ё таҳияи санаде зарур аст, мо барои ӯ мекунем", - гуфтанд дар хадамоти матбуоти сафорат.

Як бахши бинои чандтабақа дар шаҳри Магнитогорск субҳи 31-уми декабри соли 2018 фурӯ рафт. Шумораи қурбониёни ин ҳодиса рӯзи сешанбе ба ҳашт нафар расид. Чанд тани дигарро зинда аз зери вайронаҳо берун овардаанд. Сарнавишти даҳҳо нафари дигар ҳанӯз маълум нест.

Бино ба иттилои мақомот, сабаби фурӯрезии бино таркиши газ будааст. Дар солҳои 2017-2018 дар Русия дастикам 44 ҳолати таркиши газ дар манзили сокинон сабт шудааст.

Рамазон Раҳимзода рисолаи докторӣ ҳимоя кардааст

Рамазон Раҳимзода

Рамазон Раҳимзода, вазири корҳои дохилии Тоҷикистон, ба сафи докторони илми ҳуқуқ пайвастааст. Як мақоми Шӯрои илмии ҳуқуқи Донишгоҳи миллии Тоҷикистон рӯзи 1-уми январ дар суҳбат бо Радиои Озодӣ ҳимояи рисолаи доктории Раҳимзодаро тасдиқ кард. Ӯ гуфт, ҳимояи рисола рӯзи 29-уми декабри соли 2018 сурат гирифт.

Мавзӯи рисолаи доктории Рамазон Раҳимзода “Фаъолияти ҷустуҷӯӣ-оперативӣ барои таъмини амнияти иқтисодии Ҷумҳурии Тоҷикистон: мушкилоти назариявӣ, методология ва таҷриба (таҳлили таърихӣ- ҳуқуқӣ ва умуминазариявӣ)” аст.

Абдураҳим Холиқзода – вакили порлумон ва собиқ раиси Кумитаи дин, Аида Куманалиева – устоди Донишгоҳи байналмилалии Қирғизистон ва Рамон Ромашев – профессори Донишгоҳи гуманитарии иттифоқҳои касабаи шаҳри Санкт-Петербург ба кори илмии Раҳимзода тақриз навиштаанд.

Генерал Рамазон Раҳимзода дар баробари таълифи чанд китоби илмиву таълимӣ дар арсаи криминилистика ва кофтукоби фаврӣ, шеър ҳам менависад. Маҷмӯи шеърҳои Раҳимзода таҳти тахаллуси эҷодии Ниҳонӣ чоп шудааст.

Раҳимзода ҳамчунин пйеса ва матни намоишномаҳои театрӣ низ эҷод мекунад. Моҳи августи имсол Театри академӣ-драмавии ба номи Аблуқосим Лоҳутӣ дар шаҳри Душанбе аз рӯи асари Раҳимзода намоишномаи "Дили модар"-ро таҳия кард, ки ба мубориза бо терроризм бахшида шудааст.

Солҳои охир бисёре аз мақомдорони тоҷик дар мавзуъҳои мухталиф рисолаҳои илмӣ дифоъ кардаанд. Аммо соли гузашта пойгоҳи интернетии "Диссернет" чандин рисолаи олимони тоҷик, аз ҷумла баъзе аз мансабдоронро тақаллубӣ баровард.

Ёфтҳои бештар

Гузоришҳои видеоӣ

Гуфтугӯ бо Анваршоҳ Мирзоев дар бораи вазъи футболи тоҷик
лутфан мунтазир бошед

Феълан кор намекунад

0:00 0:05:18 0:00
XS
SM
MD
LG