Пайвандҳои дастрасӣ

Хабари нав

Хабарҳо

Гурӯҳи ношинос ҳамкори Би-Би-си дар Ганаро ба ҳалокат расонд

Акси тасвирӣ

Рӯзноманигори пажуҳишгар, ки бо Би-би-си ҳамкорӣ мекард, дар Гана кушта шуд. Таҳқиқоти ӯ ба фош шудани расвогии марбут ба фасод дар футболи маҳаллӣ, истеъфои раҳбари федератсияи футбол ва пароканда шудани ин ниҳод мусоидат кард. Журналист Аҳмад Ҳуйсейн Суале, ки фаъолияти махфӣ дошт, шаби ҷумъа дар пойтахти Гана - Аккра, ҳадафи тир қарор гирифт. Дар ин бора сомонаи шабакаи сеюми телевизиони ин кишвар рӯзи 17 январ хабар дод.

Ба гуфтаи телевизион, ба сӯи журналист дар роҳ ба сӯи хонааш аз ду мотосикл тир кушоданд. Ду тир аз шишаи тирезаи мошин ба синааш ва яке ба гарданаш расид.

Шабака мегӯяд, ки чанде пеш аз ин ҳамла, узви порлумони Гана Кеннеди Агяпонг барои муҷозоти журналист даъвати омавӣ ба амал овард. "Агар шумо ӯро дар ҷойе дидед, гушҳояшро шиканед, ман ба шумо мегӯям, ӯро латткӯб кунед, чӣ ҳодисае нашавад, ҳисобашро ман медиҳам, ӯ бисёр бачаи бад аст",- иқтибос кардааст телевизион аз узви порлумон.

Изҳороти Кеннеди Агяпонг вокуниш ба намоиши филми Би-би-си буд, ки дар он маводи Аҳмад Ҳуйсейн Суале истифода шуд. Дар ин филм гуфта мешуд, ки мақомоти Созмони футболи Гана, бо шумули президенти он Квеси Наянтакии ришва мегирифтанд. Наянтакии дар ҳуҷраи меҳмонхона ҳангоми гирифтани 65 ҳазор доллар наворбардорӣ шуд.

Ҳамла ба хабарнигорон дар Гана зиёд иттифоқ намеафтад,- мегӯяд Би-би-си. Охирин куштор соли 2015 рух дода буд.

Ду нафар бо ҷурми куштори Денис Тен ба 18 соли зиндон маҳкум шуд

Кореяи Ҷанубӣ - Денис Тен ҳангоми иҷрои рақси рӯи ях.18 феврали соли 2018

Додгоҳи Аламато ду нафарро бо ҷурми куштори раққоси рӯи ях Денис Тен ба 18 соли зиндон маҳкум кард. Додгоҳ ҳукми Армон Қудойберганов ва Нуралӣ Киясовро рӯзи 17 январ содир кард.

Айбдоркунандаи давлатӣ рӯзи 16 январ аз Додгоҳи шаҳри Алмаато барои Ормон Қудойбердиев ва Нуралӣ Киясов барои куштори варзишгари маъруфи қазоқ Денис Тен 20 соли зиндонро талаб кард.

Гумонбарон дар мурофиаи ахир айби дуздиро ба гардан гирифтанд, вале гуфтанд, ки куштор бо маслиҳати пешакӣ сурат нагирифта буд. Онҳо аз додгоҳ хостанд, ки банди "Куштор бо маслиҳати пешакӣ"-ро бекор кунад. Ба гуфтаи додситон Кунадик Досов, "айби гумонбарон дар рафти мурофиаҳо пурра исбот шуд".

Баррасии парванда 3-юми январ дар Додгоҳи шаҳри Алмаато оғоз шуда буд.

Варзишгари маъруфи қазоқ, раққоси рӯи ях ва барандаи ду медали чемпионати ҷаҳон, аз ҷумла бозиҳои олимпии шаҳри Сочии Русия Денис Тени 25-сола рӯзи 19-уми июли соли гузашта дар бемористони шаҳри Алмаато вафот кард. Ӯ бо чанд захми корд ба бемористон интиқол ёфта буд. Ба ӯ афроде ҳамла карданд, ки мехостанд, шишаи мошинашро бидузданд.

HRW: Осиёи Марказӣ бояд аз ҳуқуқи инсон ҳимоят кунад, агар сармоя мехоҳад

Логои созмони Human Rights Watch

Созмони ҳомии ҳуқуқи инсон Human Rights Watch аз раҳбарои давлатҳои Осиёи Марказӣ, ки дар пайи ҳамоиши бештари минтақавӣ, сармоягузории хориҷӣ ва рушди иқтисодӣ ҳастанд, даъват кард, ки ҳимояи ҳуқуқи инсонро дар ҷойи аввал гузоранд.

Ин даъват рӯзи 17 январ дар ҳоле садо дод, ки созмони ситодаш дар Ню Йорк гузориши солонаашро дар бораи вазъи ҳуқуқи инсон дар саросари ҷаҳон нашр кард.

"Барои зиндагии беҳтари 105 миллион сокини Осиёи Марказӣ, эҳтироми ҳуқуқи инсон бояд бо рушди иқтисод ва ҳамкориҳои минтақави дастибадаст ҳаркат кунанд,- гуфт раҳбари ин созмон дар умури Аврпуо ва Осиёи Маказӣ Ҳю Уиллиамсон.

Ӯ афзӯд, ки раҳбарони Осиёи Марказӣ "бояд иҷозат диҳанд, ки садоҳои интиқодӣ шунида шаванд ва аз бадтарин суиистифода, ба монанди зиндони кардани одамон бо парвандаҳои сисёӣ ва шиканҷа даст кашанд.

Соли гузашта, президенти Узбекистон Шавкат Мирзиёев " барои ҳамкориҳои байнимарзӣ иқдом кард ва дар самти рушди вазъи ҳуқуқи шаҳрвандон қадамҳои назаррас бардошт; дар Қирғизистони ҳамсоя "ҳамалаҳои бераҳмона ба матбуот ва озодии баён камтар шуд",- гуфтааст HRW.

Аммо ин гурӯҳ "афзоиши тамоюлҳои манфӣ" дар кишварҳои дигари Осиёи Марказӣ, ба монанди Тоҷикистон ва Туркманистон ва "табдили ин тамоюлҳо сиёсатҳои саркубгарона"-ро зикр кардааст.

Созмон мегӯяд дар Қазоқистон низ дар робита ба ҳуқуқи башар ҳеҷ таъғироти чашмгир ба назар нарасид ва мақомоти он кишвар озодии баён ва ҳамоишу ҷамъмадҳоро бераҳмона саркуб карданд.

Уиллиамсон аз ИМА, Иттиҳоди Аврпуо ва шарикни дигари онҳо даъват кард, ки ба раҳбарони Осиёи Марказӣ пайғоми рушан диҳанд, ки "ҳамагуна барномаи ислоҳот бидуни рушди ҳуқуқи инсон ҳатман ба нокомӣ рӯ ба рӯ хоҳад шуд".

Назарсанҷӣ: Русҳо аз "фақри доимӣ" ва дағалӣ хиҷолат мекашанд

Акси тасвирӣ

Шаҳрвандони Русия аз камбизоатӣ, бесарусомонӣ, суқути Шӯравӣ ва беодобӣ хиҷолат мекашанд. Чунин аст натиҷаи як пурсиши Маркази омӯзиши афкори умум - "Левада", ки охири декабр анҷом шуд.

61 дар сади пурсидашудаҳо аз ин шарм медоранд, ки аҳолии Русия дар "фақри доимӣ ва бесарусомонӣ" ба сар мебаранд. 45 дар сад аз суқути Иттиҳоди Шӯравӣ эҳсоси хиҷолат ва нороҳатӣ мекунанд.

Аз се як ҳиссаи русҳо (37%) гуфтаанд, ки аз дағаливу беодобӣ ва набуди эҳтимром ба якдигар дар Русия шарм медоранд. 24 дар сади пурсидашудаҳо аз ин ки кишварашон ба таври доимӣ аз Ғарб қафо мондааст ва 21 дар сад аз таъқибу террорҳои соли 1920-1950 хиҷолат мекашанд.

9 дар сад аз интихоби Владимир Путин ба мақоми президент шарм медоранд. Вале ҳамзамон 70 дар сади пурсидашудаҳо Русияро давлати абарқудрат номидаанд. Соли гузашта ин рақам ба 72 дар сад баробар буд.

Дар робита ба ифтихор аз ватани худ, посухдиҳандаҳо ҳодисаҳои таърихиро зикр кардаанд. 87 дар сад Ҷанги Бузурги Ватанӣ, 50 дар сад дастовардҳои соҳаи кайҳоншиносӣ ва 37 дар сад адабиётро мояи ифтихор номиданд. 45 дар сад гуфтанд, ки ишғоли Қрим дар онҳо эҳсоси ифтихорро бедор мекунад.

Соҳибкорон Андиҷон вазифадор шуданд, ки "андози футбол" супоранд

Волии Андиҷон Шӯҳрат Абдураҳмонов

Даиси вилояти Андиҷони Узбекистон Шуҳрат Абдураҳмонов дар рафти омодагӣ ба бозиҳои Лигаи олӣ-2019 тамоми соҳибкорони вилоятро вазифадор кард, ки дастаи футболи "Андиҷон"-ро ҷамъан бо 8,5 миллиард сӯм ($964 ҳазор) "сармоягузорӣ" кунанд.

Дар феҳристи шашсаҳифагии ҳукумати вилояти Андиҷон номи 167 корхона ва ширкате оварда шудааст, ки бояд "андози футбол" супоранд. Як мансабдори Андиҷон низ тасдиқ кард, ки ба соҳибкорон пешниҳод шудааст, то ба дастаи маҳаллии футбол "кумак" кунанд.

Ба гуфтаи як манбаи огаҳ аз қазия, сармоягузори аслии даста -- ширкати GM Uzbekistan пулро пардохт накардааст ва бинобар ин, раиси вилоят пулро бар дӯши соҳибкорони маҳаллӣ бор кард.

Абдураҳмонов 9 январи соли равон дар як вохӯрӣ мушкилиҳои модиву техникии дастаи футболи "Андиҷон"-ро баррасӣ кард. Дар поёни ҷаласа рӯйхати 167 корхонае тартиб дода шуд, ки бояд ба дастаи футбол кумаки молӣ расонанд.

Соҳибкорони Андиҷон мегӯянд, баъди ҷаласаи раиси вилоят ба онҳо фишор меоранд, то пулро тезтар пардохт кунанд.

Бар асоси фармони президенти Узбекистон аз 9 марти соли 2017, GM Uzbekistan сармоягузори аслии дастаи футболи Андиҷон таъйин шудааст. Намояндаи ширкат гуфт, онҳо дар ҳолати муфлисшавӣ қарор доранд ва бинобар ин, наметавонанд, дастаро сармоягузорӣ кунанд.

Тими миллии Қирғизистон Филиппинро бо ҳисоби 3:1 шикаст дод

Ҷоми Осиё - тими Қирғизистон алайҳи дастаи Филиппин. 16 январ, 2019.

Дастаи мунтахаби футболи Қирғизистон дар доираи бозиҳои Ҷоми Осиё тими Филиппинро бо ҳисоби 3:1 шикаст дод.

Ҳар сеи голҳоро ҳамлагар Виталий Люкс ба ҳадаф расонд. Аз ҷониби ҳариф тӯбро Штефан Шрек ба дарвоза ворид кард. Ин нахустин пирӯзии футболбозони қирғиз дар чемпионат аст.

Варзишкорони қирғиз дар бозии нахустин бо ҳисоби 1:2 аз Чин шикаст хурда буданд. Бозии дувумро бо ҳисоби 0:1 ба Куриёи Ҷанубӣ бохтанд.

Дастаи мунтахаби футболи Қирғизистон барои баромадан ба плей-офф ё даври ҳаштякниҳоӣ шонс дорад. Вале он аз натиҷаи бозии дастаҳо дар гуруҳҳои дигар вобаста аст.

Тереза Мэй боварии порлумони Бритониёро ба даст овард

Нахуствазири Британия Тереза Мэй

Сарвазири Бритониё Тереза Мэй эътимоди аксари вакилони порлумони кишварашро ба даст овард. 306 вакили порлумон ба Мэй изҳори нобоварӣ карда, 326 вакил бар зидди истеъфои ӯ раъй доданд.

Пешниҳоди изҳори нобоварӣ ба Мэйро раҳбари Ҳизби мухолифи коргари Бритониё Ҷереми Корбин ба порлумон ироа карда буд. Ин пешниҳод дар ҳоле ба миён омад, ки порлумон созишномаи ҳукумати Мэйро барои бурунрафти Бритониё аз Иттиҳоди Аврупо (ИА) напазируфт. 432 вакил зидди созиши бо Брюссел мухолифат карданд.

Раъйгирии рӯзи сешанбе бузургтарин бохти як сарвазири Бритониё дар дар 95 соли ахир буд. Мэй талош кард, вакилон аз ин созишнома, ки баъди музокиротҳои тӯлонӣ ба даст омад, пуштибонӣ кунанд.

Интизор меравад, Мэй рӯзи панҷшанбе машваратро бо раҳбарони ҷиноҳҳои порлумонӣ дар бораи шартҳои эҳтимолии "нақшаи дувум" оғоз кунад. Эҳтимол аст, 21 январ дар робита ба стратегияи нави бурунрафти Бритониё аз ИА дубора дар порлумон раъйгирӣ шавад.

Агар ин бор низ нақшаи ҳукумат қабул нашавад, порлумони Бритониё эҳтимол аст, раванди бурунрафт аз ИА-ро зери назорат гирифта, барои созишномаи нав худаш талош кунад. Дар ғайри сурат, Бритониё маҷбур мешавад, Иттиҳоди Аврупоро бидуни созиш тарк кунад.

ИМА алайҳи ширкати чинии Huawei тафтиш оғоз кард

Huawei logo

Додситонии федеролии ИМА бар зидди ширкати истеҳсолкунандаи дастгоҳҳои мобилии "Huawei Technologies Co"-и Чин бо гумони дуздии сирри тиҷоратии шарикони амрикоӣ тафтиш оғоз кард.

Дар ин бор нашрияи The Wall Street Journal рӯзи 16 январ хабар дод. Ба навиштаи нашрия, сухан аз боби дастгоҳест, ки "T-Mobile"-и Амрико барои санҷиши телефонҳои ҳушманд истифода мекард.

Хабаргузории Reuters менависад, аз эълони расмии иттиҳом алайҳи ширкати чинӣ бармеояд, ки барои боз кардани парванда аллакай маводи кофӣ ҷамъоварӣ шудааст. Вазорати адлияи ИМА ва Huawei хабари расонаҳоро шарҳ намедиҳанд.

Huawei - бузургтарин таъминкунандаи таҷҳизоти телекоммуникатсионӣ ва телефонҳои ҳамроҳ дар ҷаҳон аст. Пештар ИМА ин ширкатро ба рӯҳхати сиёҳи таъминкунандагони таҷҳизот барои Идораи истихборот ва Бюрои федеролии тафтишоти Амрико ворид кард ва ба шаҳрвандонаш тавсия дод, ки аз харидории телефонҳои ҳамроҳи Huawei худдорӣ кунанд. Дар Вашингтон бар ин боваранд, ки ин дастгоҳҳо иттилои дархури манфиатҳои молӣ ё низомии Пекинро ҷамъоварӣ мекунанд.

Австралия ва Зеландияи нав аз истифодаи таҷҳизоти Huawei даст кашиданд. Ҷопон низ хариди таҷҳизоти ширкатро барои идораҳои давлатиро манъ кард. Мақомоти Чех низ моҳи декабри соли гузашта ба далели амнияти киберӣ ба мақомоти маҳаллӣ ҳушдор доданд, ки аз дастгоҳҳои Huawei истифода накунанд.

Хадамоти махсуси Лаҳистон ҳафтаи гузашта ду нафарро бо гумони ҳамкорӣ бо истихбороти Чин боздошт кард. Яке аз онҳо мудири савдои ширкати Huawei дар Лаҳистон аст.

Қосимов: кормандони пулис дар ҳамла ба нозирони табиат даст надоранд

Калмуханбет Қосимов - вазири корҳои дохилии Қазоқистон

Пулиси Қазоқистон шахсияти гумонбарони ҳамла ба кормандони ширкати "Охотзоопром"-ро муайян кард.

Калмуханбет Қосимов, вазири корҳои дохилии Қазоқистон гуфт, ки дар он ҳамла як кас кушта, як тани дигар ҷароҳат бардошт.

Вазир гуфт, бо моддаи "Куштор" парвандаи ҷиноӣ боз шудааст ва афзуд, ки дар байни гумонбарони ҳамла кормандони пулис ҳузур надоранд.

Ахиран Андрей Лукин, муовини додситонии кулли Қазоқистон гуфт, ки ҷинояткорон "сарфи назар аз мавқеи иҷтимоиву молиашон" муҷозот хоҳанд шуд.

Ҳамла ба кормандони "Охотзоопром" рӯзи 13 январ дар ноҳияи Нурини вилояти Қарағанда рух дод. Нозирони табиат он рӯз мехостанд, гумонбарони куштори сайгаҳо (як навъ бузҳои саҳроӣ)-ро боздошт кунанд, аммо шикорчиёни ғайриқонунӣ муқобилат нишон доданд. Дар ҳодисаҳои монанд ба ин дар гузашта ба ҳузури пулис ишора мешуд, бинобар ин вазир пеш аз он ки хабарнигорон суоле диҳанд, ҳузури кормандонашро дар ин ҳодиса рад кард.

Донишҷӯе худро дар долони нонвойхонаи Тошканд ба дор овехт

Дар айвони яке аз нонвойхонаҳои шаҳри Тошканди Узбекистон ҷасади донишҷӯи соли чаҳоруми Донишгоҳи иқтисоди ҷаҳонӣ ва дипломатия пайдо шуд. Ҳамдарсони вай мегӯянд, эҳтимол дорад донишҷӯ худкушӣ карда бошад. Донишҷӯи 23-сола зодаи вилояти Қашқадарё буд. Яке аз ҳамдарсони вай гуфт, донишҷӯ тақрибан соати 6 бегоҳи 14 январ хобгоҳро тарк карда буд. Субҳи 15 январ ҷасади вай пайдо шуд.

"Ҳангоми аз хобгоҳ берун рафтан вай гуфт, ки шабона дар назди хешонаш мемонад. Аммо субҳи рӯзи баъд ҷасадашро дар дор овехта пайдо карданд", - гуфт ҳамдарси донишҷӯи ҳалокшуда.

Як ҳамдарси дигари вай мегӯяд, вақтҳои охир он донишҷӯ маъюсу ноумед буд. "Мо ҳоло имтиҳон месупорем. Он ҷавон бештари вақт дар дарсҳо набуд, зеро кор мекард. Ӯро таҳдид карда буданд, ки хориҷ мешавад. Худатон фикр кунед: арзиши як соли таҳсил наздики 2590 доллар аст. Агар хориҷ мешуд, соли дигар ин қадар маблағро аз куҷо пайдо мекард?", - гуфт ҳамдарси дигари донишҷӯи ҳалокшуда.

Аммо маъмурияти донишгоҳ изҳороти ҳамдарсони донишҷӯро рад мекунанд.

Чаҳор сарбози ИМА дар як ҳамлаи маргталабона дар Сурия ҷон бохт

Макони таркиш дар Манбиҷи Сурия. 16 январ, 2019

Чаҳор сарбози амрикоӣ аз як таркиши маргталабона дар шаҳри Манбиҷи Сурия кушта ва се тани дигар захмӣ шуд. Ба навиштаи хабаргузории Reuters, масъулияти ин ҳамларо гурӯҳи террористии "Давлати Исломӣ бар дӯш гирифт.

Шаҳри Манбиҷ охири моҳи декабр таҳти назорати ҳукумати Сурия қарор гирифт. Чанд рӯз пеш аз ин президенти ИМА Доналд Трамп эълон кард, ки нерӯҳои Амрико аз қаламрави Сурия хориҷ мешаванд.

Раҳбари пешини Пентагон Ҷейм Мэттис ба нишорни эътироз алайҳи ин тасмим аз мақомаш истеъфо дод, чанд мансабдори дигари Вазорати дифоъ ба пайравӣ аз Мэттис аз мақом рафтанд.

Мухолифини Трамп мегӯянд, ки хуруҷи оҷили нерӯҳо дастаҳои мусаллаҳи Курдро, ки ҳамроҳ бо ИМА алайҳи ДИИШ ҷангидаанд, таҳти хатар қарор медиҳад. Туркия борҳо гуфтааст, ки алайҳи Курдҳои маҳаллӣ, ки Анқара онҳоро террорист мешуморад, амалиёти низомӣ омода мекунад.

Кормандони СММ аз озори ҷинсӣ дар ҷойи кор нақл карданд

Женева - Парчами СММ дар ситоди сомон

Сеяки кормандони Созмони Милали Муттаҳид дар ду соли ахири дастикам як дафъа мавриди ягон навъи озори ҷинсӣ қарор гирифтаанд. Дар ин бора пажуҳише мегӯяд, ки ширкати Deliotte бо дархости Созмони Милал анҷом дод.

Кормандони пурсидашуда аз ҷумла аз шӯхиҳои таҳқиромез, ишораҳои шаҳватомез ва дастрасонӣ шикоят карданд. Ба гуфтаи ин пажуҳиш, аз се ду ҳисаи онҳое, ки дар озори ҷинсӣ даст доранд, мардҳо буданд. 25 дар сади онҳоро раҳбарони сатҳи олӣ ва миёна буданд.

Дабири кулли СММ Антониу Гутерриш дар номае ба кормандонаш натиҷаи пажуҳишро "ҳушёркунанда" номид. Ба гуфти ӯ, омори озори ҷинсӣ дар Созмони Милали Муттаҳид аз омор дар идораҳои дигар фарқ намекунад. Аммо, гуфтааст Дабири кулл, СММ бояд ба меъёрҳои баланд муносиб бошад.

Додситон барои гумонбарони куштори Денис Тен 20 соли зиндонро талаб кард

Қазоқистон - мурофиаи додгоҳии гумонбарони куштори Денис Тен

Айбдоркунандаи давлатӣ аз Додгоҳи шаҳри Алмаато барои Ормон Қудойбердиев ва Нуралӣ Киясов - гумонбарони куштори варзишгари маъруфи қазоқ Денис Тен 20 соли зиндонро талаб кард.

Барои гумонбари севум Жанар Толибоева, ки дар хабар надодан ба мақомот айбдор аст, чаҳор соли зиндон талаб шуд.

Гумонбарон дар мурофиаи ахир айби дуздиро ба гардан гирифтанд, вале гуфтанд, ки куштор бо маслиҳати пешакӣ сурат нагирифта буд. Онҳо аз додгоҳ хостанд, ки банди "Куштор бо маслиҳати пешакӣ"-ро бекор кунад. Ба гуфтаи додситон Кунадик Досов, "айби гумонбарон дар рафти мурофиаҳо пурра исбот шуд".

Баррасии парванда 3-юми январ дар Додгоҳи шаҳри Алмаато оғоз шуда буд.

Варзишгари маъруфи қазоқ, раққоси рӯи ях ва барандаи ду медали чемпионати ҷаҳон, аз ҷумла бозиҳои олимпии шаҳри Сочии Русия Денис Тени 25-сола рӯзи 19-уми июли соли гузашта дар бемористони шаҳри Алмаато вафот кард. Ӯ бо чанд захми корд ба бемористон интиқол ёфта буд. Ба ӯ афроде ҳамла карданд, ки мехостанд, шишаи мошинашро бидузданд.

Путин иддао кард, ки "ҳузури ИМА Балканро ноором мекунад"

Билборди Путин дар Сербистон - Белград, 15 январ, 2019

Президенти Русия Владимир Путин иддао кард, ки Ийолоти Муттаҳидаи Амрико барои "ҳифзи ҷойгоҳ" суботи минтақаи Балканро баҳам мезанад. Шарҳи Путин дар ин робита рӯзи 15 январ, дар остонаи сафараш ба ин минтақа, дар нашрияҳои " Вечерние Новости" ва "Политика"-и Сербистон чоп шуд. Ин матлабро сомонаи Кремлин низ нашр кард.

Путин ба робитаҳои таърихии наздик бо Сербистон ва ҳамчунин ба нигарониҳои Маскав аз нуфузи Ғарб дар минтақа таъкид мекунад. Ӯ аз ҳушдорҳои Вашингтон ва бархе шарикони аврпуоии ИМА ёдовар шудааст, ки мегӯянд, Русия талош дорад вазъи минтақа, бо шумули Монтенегро, Босния ва Ҳесеговин ва Македонияро ноором созад.

Президенти Русия дар сӯҳбат аз бомбаборони соли 1999-и НАТО болои Сербистон, дар замони ҷанги Косово ва ҳамчунин истиқлолияти Косово аз Сербистон дар соли 2008 ёдовар шуд.

Сербистони ва Русия эълони истиқлолияти Косоворо маҳкум, аммо кишварҳои Ғарб аз он истиқбол карданд.

Путин ҳамчунин гуфт: "Монтенегро ба узвияти НАТО кашида шуд. Дар натиҷа ин кишвар ҳоло марҳилаи бесуботии сиёсиро убур мекунад".

Монтенегро якҷо бо ИМА ва давлатҳои дигар Русияро ба пуштибонӣ аз кӯшиши табаддулоти соли 2016 муттаҳам мекунанд, ки баъди ворид шудани Монтенегро ба НАТО ҷараён гирифт.

Иктишофи ИМА: Чин дар ояндаи наздик соҳиби силоҳи пешрафта мешавад

Ҳавопаймои ҷангии Чин - J-20

Неруҳои мусаллаҳи Чин дар ояндаи наздик соҳиби силоҳи пешрафта хоҳанд шуд. Ин силоҳ дар натиҷаи муосирсозии артиши он кишвар солҳои ахир тавсеа ёфт.

Ҳадаф аз коркардҳои охир тавсеаи босуръати амнияти артиши Чин ва бозгардонидани Тайван ба Чин унвон мешавад.

Ин хулоса дар гузориши махсуси иктишофи низомии Амрико зикр шудааст. Гузориш рӯзи сешанбе нашр шуд.

Дар гузориш омадааст, Пекин интизор дорад, ки эҳтимол "нерӯҳои хориҷӣ" аз Тайван ҳимоят кунанд. Ба ин далел Чин маҷбур аст, низомеро тавсеа диҳад, ки амалкардҳои "нерӯҳои хориҷӣ" дар минтақаро хунсо кунад. Бино бар иттилои Амрико, харҷҳои низомии Чин дар соли 2018 бештар аз 200 миллиард доллар будааст. Ин нишондод нисбати соли 2002 се барбар бештар аст. Буҷаи мудофиаи ИМА наздики 700 миллиард доллар аст, аммо бахши бузурги он ба таҳқиқотҳои илмӣ ва твсеаи силоҳҳои сарф мешавад. Чин барои таҳқиқотҳо сарфаҷӯӣ ва бештар аз силоҳҳои хориҷӣ нусхабардорӣ мекунад. Ин ҳам дар ҳоле, ки Чин силоҳҳои хориҷиро барои нусхабардорӣ ҳам бо роҳҳои машруъ ва ҳам бо роҳҳои номашруъ ба даст меорад. Ин кишвар ҳамчунин ширкатҳои ғарбиро маҷбур мекунад, ки дар ивази роҳ ёфтан ба бозори Чин, технологияҳои муҳимашонро дар ихтиёри чиниҳо гузоранд.

Бино ба гузориши иктишофи Амрико, Чин ҳамакнун соҳиби мушакҳои болдор аст, ки метавонад, онҳоро аз ҳавопаймо ва киштиҳо партоб кунад.

Коршиносони амрикоӣ мегӯянд, ҳамроҳсозии маҷбурии Тайван ба Чин ногузир аст. Аммо Чин мехоҳад, низоъе сурат нагирад.

Аз ҳамлаи "Аш-Шабоб" дастикам 14 нафар дар Кения ҷон бохт

Нерӯҳои вежаи Кения дар макони ҳамлаи мусаллаҳона. 16-уми январи 2019

Дар натиҷаи ҳамлаи мусаллаҳона ба меҳмонхонае дар Найроби, пойтахти Кения, дастикам 14 нафар кушта шуд. Reuters хабар дод, ки ҳамлагаронро пулис дар ҷараёни амалиёт маҳв кард. Теъдоди онҳо эълон нашудааст. Ҳодиса рӯзи 15-уми январ рух дод.

Қабл аз тасарруфи меҳмонхона аз ҷониби гурӯҳи мусаллаҳ ду таркиш ба амал омад. Ходимони пулис ва хадамоти махсус ба ҷойи ҳодиса ҳозир шуданд. Ҷинояткорон аз силоҳ оташ кушода, якчанд норинҷак партофтанд ва сипас биноро масдуд карданд.

Амалиёти маҳви ин гурӯҳ 20 соат идома кард. Дар ин муддат аз меҳмонхона 700 нафарро берун оварданд. Мақомот ҳодисаро ҳамчун амали террористӣ таҳқиқ мекунанд.

Масъулияти ҳамларо гуруҳи тундрави "Аш-Шабоб" бар уҳда гирифтааст.

Солҳои охир дар Кения чандин ҳамлаи мусаллаҳона анҷом шуд, ки масъулияташро "ҷиҳодиҳо" бар дӯш гирифтанд. Яке аз ҳамлаҳои даҳшатбор соли 2015 дар Найроби сурат гирифт, ки дар натиҷаи он тақрибан 150 донишҷӯ кушта шуд.

Ҳамлаҳо баъди он бештар шуданд, ки низомиёни Кения ба ҷанги зидди гуруҳи "Аш Шабоб" дар ҳудуди Сомалӣ пайвастанд.

Трамп меҳмонони Кохи Сафедро бо ҳамбургер зиёфат дод

Президенти Амрико Доналд Трамп пули ҳамбургер ва питсаҳоеро, ки барои аъзои дастаи футболи Донишгоҳи Клемсон фармоиш шуда буд, аз ҳисоби худ пардохт кард. Трамп онҳоро рӯзи 14-уми январ дар Кохи Сафед ба ҳузур пазируфт.

Трамп барои он маҷбур шуд, ғизоҳоро худ фармоиш дода ва пули онҳоро бипардозад, ки низоми ба истилоҳ "шатдаун" - қисман қатъшавии сармоягузории ҳукумати федеролӣ дар Амрико - идома дорад.

"Шатдаун" беш аз се ҳафта мешавад, барои он идома дорад, ки Конгресс ба иллати ихтилофи назар роҷеъ ба бунёди девор дар марз бо Мексика наметавонад будҷаи соли 2019-ро қабул кунад. Доналд Трамп талаб дорад, барои бунёди девор пул ҷудо шавад, вале демократҳо зидди он ҳастанд.

Ба огаҳии хадамоти матбуотии Трамп, бахши бузурги ҳайати шахсӣ ба далели "шатдаун" ба рухсатии бемузд рафтаанд. Дар натиҷа президент маҷбур шуд, зиёфатро дар Кохи Сафед барои футболбозон -- ғолибони чемпионати миллӣ шахсан ташкил кунад.

Трамп ба рӯзноманигорон гуфт, аз шабакаҳои McDonald's, Wendy's ва Burger King 300 ҳамбургер фармоиш дода буд. Президент гуфт, барои он ҳамбургер фармоиш дод, ки "фикр мекунам, ҳамбургер ғизои дӯстдоштаи онҳо аст". Ба қавли Трамп, ин ғизои миллии амрикоиҳо аст.

Раиси ҷумҳури Амрико бештари вақти худро дар давраи "шатдаун" дар Кохи Сафед мегузаронад.

Пеш аз сафари Мирзиёев ба Аврупо Фейсбук ва Ютуб дастрас шуд

Дар Узбекистон аз 14-уми январи имсол шабакаҳои иҷтимоии Facebook, Вконтакте ва саҳифаи YouTube дубора дастрас шуданд. Ба иттилои расонаҳои узбекӣ, то ҳол воридшавӣ ба шабакаҳои мазкур танҳо бо VPN ва филтршиканҳо (анонимайзерҳо) имконпазир буд.

Тамоми ширкатҳои фароҳамкунандаи интернет дар Узбекистон низ тасдиқ карданд, ки шабакаҳои иҷтимоӣ дар ин кишвар бидуни филтршиканҳо дубора дастрас шудаанд.

Дастрасӣ ба Facebook дар Узбекистон моҳи сентябри соли гузашта маҳдуд шуда буд. Дертар YouTube низ дастнорас шуд.

Қарор аст, президенти Узбекистон Шавкат Мирзиёев рӯзҳои 20-22-юми январ аз Олмон дидан кунад. Бархе корбарони узбек мегӯянд, дастрас шудани шабакаҳои иҷтимоӣ ба ин сафар рабт доранд.

Пешниҳодҳо зидди мақоми расмии забони русӣ дар Қирғизистон

Дар Қирғизистон пешниҳод доранд, бо баргузории ҳамапурсӣ меъёри мақоми расмии забони русӣ аз Конститутсия бардошта шавад.

Ин яке аз пешниҳодҳои кумитаи иҷроияи қурултойи нерӯҳои ҷамъиятӣ, сиёсӣ ва меҳанпарастии Қирғизистон барои референдуми ворид кардани тағйирот ба Конститутсия аст.

"Забони русӣ барои мо зарурист. Аммо ҳамчун яке аз забонҳои дорои аҳамияти байналхалқӣ. Ба хотири он ки вақте мо дар хориҷ ҳастем, бо ин забон гуфтугӯ кунем. Ин забон бояд аз боғчаҳо сар карда ҳамчун забони хориҷӣ омӯзонида шавад. Вале мақомаш бояд мисли забонҳои СММ - байналхалқӣ бошад, дар як радиф бо англисӣ. Забони давлатӣ бояд забони қирғизӣ боқӣ монад. Ҳамаи ҳуҷҷатгузориҳо бояд бо забони қирғизӣ сурат гиранд ва мансабдорон ҳам бояд бо забони қирғизӣ суханронӣ кунанд. Агар ин чораҳо андешида нашаванд, қирғизҳо аз байн мераванд", - гуфт Азимбек Бекназаров, намояндаи қурултой.

Дар Қирғизистон забони русӣ мақоми расмӣ дорад. Коргузорӣ ва хидматрасонӣ дар шаҳрҳо бо забонӣ русӣ норизоии қисме аз ҷомеаро ба бор овардааст.

Як амрикоӣ дар ҳамла ба як меҳмонхона дар Кения кушта шуд

Як мақоми вазорати умури хориҷии Амрико таъйид кардааст, ки як шаҳрванди ин кишвар дар ҳамлаи рӯзи сешанбеи ниманизомиёни гурӯҳи "Аш-Шабоб" дар пойтахти Кения, кушта шудааст. Ин мақоми вазорати умури хориҷии Амрико гуфтааст, "таъйид мекунам, ки як шаҳрванди амрикоӣ дар ин ҳамла кушта шудааст."

Ин манбаъ шарҳи бештаре дар бораи шахсияти ин шаҳрванди амрикоӣ ироа накардааст. Мақомҳои Кения мегӯянд, дар ҳамлаи гурӯҳи исломии "Аш-Шабоб" дар як меҳмонхонаи муҷаллал дар пойтахти он кишвар, ҳадди ақал 15 нафар кушта шудаанд.

Гуруснанишинии Исмоилова бо талаби озодии блогнависи зиддифасод

Хадиҷа Исмоилова - рӯзноманигори шинохтаи Озарбойҷон. 15-уми январи соли 2019

Рӯзноманигори таҳқиқотгари Озарбойҷон Хадиҷа Исмоилова бо талаби озод кардани блогнависи зиддифасод Меҳмон Ҳусейнов ва дигар зиндониҳои сиёсӣ ба гурӯҳи фаъолоне пайваст, ки бо чунин талаб даст ба гуруснанишинӣ задаанд.

Хадиҷа Исмоилова рӯзи 15-уми январ аксҳои худаш, фаъоли ҳуқуқ Намиқ Абдуллоев ва дигаронро дар Фейсбук нашр кард, ки дар дафтари ҳизби "Мусавват" дар Боку гуруснанишинӣ эълон карданд.

"Ман чизи дигар барои қурбонӣ надорам, ба ҷуз саломатиам", - гуфт Исмоилова рӯзи 14-уми январ вақте аз барномаи ҳамоишаш ба эътирозгарон хабар дод.

Ӯ талаб кард, ки ҳукумати президент Илҳом Алиев "иттиҳоми алайҳи панҷ зиндонии сиёсиро, ки муҳлати ҳукмашон ба охир мерасад, лағв кунад" ва "ҳамаи рӯзноманигорон, блоггерҳо ва фаъолони ҳуқуқро озод кунад".

Исмоилова, инчунин, аз ҳукумат даъват кард, ки "сиёсати бидуни зиндонии сиёсӣ"-ро пеш бигирад ва баррасии "парвандаҳои ҳамаи зиндониҳои сиёсӣ"-ро якҷо бо гурӯҳҳои мустақили ҳукуқи башарро ба роҳ монад.

Талаби озодии блогнависи зиддифасод Меҳмед Ҳусейнов дар дохил ва хориҷи Озарбоҷон дар ҳоле шиддат мегирад, ки мақомот дар фосилаи чанд ҳафта аз анҷоми ҳукми зиндон алайҳи Меҳмон Ҳусейнов иттиҳоми нав эълон карданд. Ӯ ба "зуроварии хатарнок ба ҳаёти намояндаи ҳукумат" муттаҳам мешавад.

Ҳусейнов ва чанде аз зиндониҳои сиёсӣ ба нишони эътироз даст ба гуруснанишинӣ заданд.

Ҳусейнов ҳоло бо ҷурми "туҳмат" ҳукми дусолаи зиндон пушти сар мекунад, ки худаш ва ҷонибдоронаш онро ҳукми дорои ангезаҳои сиёсӣ меноманд.

"Паём"-и Эрон ба мадор нарасид

Парвози мушаки "Паём". Рӯзи 15-уми январ, 2019

Эрон гуфт, ки парвози моҳвораеро бо номи "Паём" ба роҳ монд, аммо мушак натавонист ба мадор бирасад. Роҳандозии мушак рӯзи 15-уми январ дар пасманзари ҳушдорҳои Амрико аз ингуна озмоишҳои Теҳрон ва иттиҳоми нақзи қатъномаи СММ сурат гирифт.

Вазири телекоммуникатсияи Эрон Муҳаммад Ҷавод Озари Ҷаҳромӣ ба телевизиони давлатӣ гуфт, мушаке, ки "Паём"-ро мебурд, дар марҳилаи сеюми раҳандозӣ натавонист суръати заруриро касб кунад. Ӯ сабаби ин нокомиро шарҳ надод, аммо гуфт, олимон бар сари ин масъала кор хоҳанд кард.

Нахуствазири Исроил Бенямин Нетаняҳу Эронро барои роҳандозии ин мушак шадидан интиқод кард. Ба гумони ӯ, ин "моҳвораи беозор" дар асл марҳилаи аввали мушаки байниқоравӣ буд".

"Мушаки дигари Эрон бо номи "Дӯстӣ" дар интизори парвоз аст", - гуфт Ҷаҳромӣ дар Твиттер баъди парвози номуваффақи мушаки "Паём". Пештар аз ин президенти Эрон Ҳасан Рӯҳонӣ гуфта буд, ки "Паём ва Дӯстӣ", қарор аст, дар бораи тағйири муҳити зисти Эрон маълумот ҷамъ кунанд.

Лаҳистониҳо барои гиромдошти шаҳрдори кушташуда ба кӯча баромаданд

Шаҳрдори Гданск чанд лаҳза қабл аз ҳамла

Ба дунболи эълони ҳалокати шаҳрдори Гдански Лаҳистон, ки рӯзи якшанбе дар як консерти хайрия мавриди ҳамла қарор гирифт, мардум дар чанд шаҳр, бо шумули Гданск, ба хотири гиромидошти ӯ ба кӯчаҳо баромаданд. Рӯзи ба хок супурдани Павел Адамович рӯзи мотам эълон мешавад.

Сарфи назар аз чандин амалиёт ва хунгузаронӣ табибон натавонистанд шаҳрдорро наҷот диҳанд. Онҳо мегӯянд, зарбаи корд ба рагҳои муҳими қалбаш осеб расонд.

Ҳамларо Штефан Б. анҷом дод, ки 27 сол дорад. Ӯ ба саҳна баромад ва бо корд ба Адамович ҳамла кард. Штефан Б дар саҳна боздошт шуд, аммо қабл аз ин дар микрофон фарёд зад, ки бо гуноҳи ҳизби "Платформаи шаҳрвандӣ", ки Павел Адамович узви он аст, ноодилона зиндонӣ шуд.

Ба гуфтаи матбуот, ин мард қаблан бо ҷурми ҳамлаи мусаллаҳона ба бонк маҳкум ба зиндон шуда буд. Гуфта мешавад, Штефан Б. мушкили равонӣ дорад.

Адамович 20 сол боз шаҳрдори Гданск ва узви шинохтаи ҳизби ҳокими "Ҳуқуқ ва Адолат" буд.

Тухмие, ки дастгоҳи Чин бурда буд, бори аввал дар Моҳ реша давонд

Моҳпаймои Чин

Дастгоҳи кайҳҳонии Чин - "Чанъэ 4", ки бомувафақият дар тарафи муқобил ё дар пушти Моҳ нишаст, бори аввал дар таърихи башар дар сатҳи Моҳ таҷрибаи биоложӣ анҷом дод. Тухмии пахта, ки моҳпаймои Чин бо худ бурда буд, реша тавонд. Дар ин бора телевизиони марказии Чин рӯзи 15 январ хабар дод.

Барои таҷриба шаш навъи биложӣ, бо шумули тухми пахта ва картошка интихоб шуд. Аз аксҳои фиристодаи моҳпаймо маълум мешавад, ки тухмии пахта беҳтар нумӯъ кардааст.

Ин аввалин тухмиест, ки бовуҷуди сахтиҳои муҳити зист, ба монандаи сатҳи пасти ҷозиба, радиатсияи баланд ва тафовути ҳарорат, дар Моҳ месабзад.

"Чанъэ 4" рӯзи 3 январ дар Моҳ нишаст. Тарафи муқобили Моҳ аз замин дида намешавад ва дастгоҳҳое, ки дар онҷо кор мекунанд наметавонанд ба таври мустақим аз замин радиосигнал бигиранд. Барои ҳамин чанд моҳ пеш аз маъмурияти аслӣ Чин ба мадори Моҳ дастгоҳи "Цюэцяо" ро фиристод, ки робитаи "Чанъэ 4" бо Заминро таъмин мекунад.

ВАО: амалиёти ба ИМА ворид кардани Бутина бо дастури Кремлин сурат гирифт

Мария Бутина

Амалиёти ворид кардани Мария Бутина ба доираҳои муҳофизакори нухбагони сиёсии ИМА бо дастуру пуштибонии Кремлин сурат гирифт. Раҳбари амалиёт ва роҳнамои Бутина муовини пешини раиси Шӯрои федерация ва муовини "Бонки Русия" Александр Торошин буд. Чунин аст натиҷагирии хадамоти махсуси ИМА, ки The daily Beast онро дастрас кард.

Мария Бутина охири соли гузашта гуноҳи худро эътироф кард, ки ӯ дар ИМА фаъолияти ғайриқонунӣ пеш мебурд, ҳамчун агенти Русия сабти ном нашуда буд ва солҳо бо муҳофизакорони шинохтаи Амрико, аз ҷумла бо намояндагони Созмони тирандозон, робита барқарор мекард. Биноба натиҷагирии хадамоти махсус нахустин тамосҳо бо намояндагони созмоне, ки аз ҳақи амрикоиҳо ба доштани силоҳ ҳимоят мекунад, бо ибтикори Торошин барқарор шуд. Ин тамосҳо муддатҳо пеш аз интихоботи соли 2016 оғоз шуданд.

Мақомоти Маскав,бо шумули президент Путин, даст доштани худро ба вуруди намояндагони Русия ба Созмони тирандозони ИМА қотеона рад мекунанд. Аммо дар санаде, ки The daily Beast дарёфт кард, гуфта мешавад, ки Вазорати умури хориҷии Русия ба ибтикори Торошин мухолиф набуд, зеро робита бо доираҳои муҳофизакор, дар сурати пирӯзии номзади Ҳизби ҷумҳурихоҳ дар интихобот, муҳим мешуд.

Ҳоло Александр Торошин ҳадафи таҳримҳои ИМА қарор дорад ва Мария Бутина баьди созиш бо тафтишот ҳукми додгоҳро интизор аст.

Ёфтҳои бештар

Гузоришҳои видеоӣ

Кор аз дохили хона. Соҳибхоназанҳо ҳунари комютеру интернетро азхуд карданд
лутфан мунтазир бошед

### Феълан кор намекунад ###

0:00 0:02:24 0:00
XS
SM
MD
LG