Пайвандҳои дастрасӣ

Хабари нав

Хабарҳо

Гуруснанишинии Исмоилова бо талаби озодии блогнависи зиддифасод

Хадиҷа Исмоилова - рӯзноманигори шинохтаи Озарбойҷон. 15-уми январи соли 2019

Рӯзноманигори таҳқиқотгари Озарбойҷон Хадиҷа Исмоилова бо талаби озод кардани блогнависи зиддифасод Меҳмон Ҳусейнов ва дигар зиндониҳои сиёсӣ ба гурӯҳи фаъолоне пайваст, ки бо чунин талаб даст ба гуруснанишинӣ задаанд.

Хадиҷа Исмоилова рӯзи 15-уми январ аксҳои худаш, фаъоли ҳуқуқ Намиқ Абдуллоев ва дигаронро дар Фейсбук нашр кард, ки дар дафтари ҳизби "Мусавват" дар Боку гуруснанишинӣ эълон карданд.

"Ман чизи дигар барои қурбонӣ надорам, ба ҷуз саломатиам", - гуфт Исмоилова рӯзи 14-уми январ вақте аз барномаи ҳамоишаш ба эътирозгарон хабар дод.

Ӯ талаб кард, ки ҳукумати президент Илҳом Алиев "иттиҳоми алайҳи панҷ зиндонии сиёсиро, ки муҳлати ҳукмашон ба охир мерасад, лағв кунад" ва "ҳамаи рӯзноманигорон, блоггерҳо ва фаъолони ҳуқуқро озод кунад".

Исмоилова, инчунин, аз ҳукумат даъват кард, ки "сиёсати бидуни зиндонии сиёсӣ"-ро пеш бигирад ва баррасии "парвандаҳои ҳамаи зиндониҳои сиёсӣ"-ро якҷо бо гурӯҳҳои мустақили ҳукуқи башарро ба роҳ монад.

Талаби озодии блогнависи зиддифасод Меҳмед Ҳусейнов дар дохил ва хориҷи Озарбоҷон дар ҳоле шиддат мегирад, ки мақомот дар фосилаи чанд ҳафта аз анҷоми ҳукми зиндон алайҳи Меҳмон Ҳусейнов иттиҳоми нав эълон карданд. Ӯ ба "зуроварии хатарнок ба ҳаёти намояндаи ҳукумат" муттаҳам мешавад.

Ҳусейнов ва чанде аз зиндониҳои сиёсӣ ба нишони эътироз даст ба гуруснанишинӣ заданд.

Ҳусейнов ҳоло бо ҷурми "туҳмат" ҳукми дусолаи зиндон пушти сар мекунад, ки худаш ва ҷонибдоронаш онро ҳукми дорои ангезаҳои сиёсӣ меноманд.

"Паём"-и Эрон ба мадор нарасид

Парвози мушаки "Паём". Рӯзи 15-уми январ, 2019

Эрон гуфт, ки парвози моҳвораеро бо номи "Паём" ба роҳ монд, аммо мушак натавонист ба мадор бирасад. Роҳандозии мушак рӯзи 15-уми январ дар пасманзари ҳушдорҳои Амрико аз ингуна озмоишҳои Теҳрон ва иттиҳоми нақзи қатъномаи СММ сурат гирифт.

Вазири телекоммуникатсияи Эрон Муҳаммад Ҷавод Озари Ҷаҳромӣ ба телевизиони давлатӣ гуфт, мушаке, ки "Паём"-ро мебурд, дар марҳилаи сеюми раҳандозӣ натавонист суръати заруриро касб кунад. Ӯ сабаби ин нокомиро шарҳ надод, аммо гуфт, олимон бар сари ин масъала кор хоҳанд кард.

Нахуствазири Исроил Бенямин Нетаняҳу Эронро барои роҳандозии ин мушак шадидан интиқод кард. Ба гумони ӯ, ин "моҳвораи беозор" дар асл марҳилаи аввали мушаки байниқоравӣ буд".

"Мушаки дигари Эрон бо номи "Дӯстӣ" дар интизори парвоз аст", - гуфт Ҷаҳромӣ дар Твиттер баъди парвози номуваффақи мушаки "Паём". Пештар аз ин президенти Эрон Ҳасан Рӯҳонӣ гуфта буд, ки "Паём ва Дӯстӣ", қарор аст, дар бораи тағйири муҳити зисти Эрон маълумот ҷамъ кунанд.

Лаҳистониҳо барои гиромдошти шаҳрдори кушташуда ба кӯча баромаданд

Шаҳрдори Гданск чанд лаҳза қабл аз ҳамла

Ба дунболи эълони ҳалокати шаҳрдори Гдански Лаҳистон, ки рӯзи якшанбе дар як консерти хайрия мавриди ҳамла қарор гирифт, мардум дар чанд шаҳр, бо шумули Гданск, ба хотири гиромидошти ӯ ба кӯчаҳо баромаданд. Рӯзи ба хок супурдани Павел Адамович рӯзи мотам эълон мешавад.

Сарфи назар аз чандин амалиёт ва хунгузаронӣ табибон натавонистанд шаҳрдорро наҷот диҳанд. Онҳо мегӯянд, зарбаи корд ба рагҳои муҳими қалбаш осеб расонд.

Ҳамларо Штефан Б. анҷом дод, ки 27 сол дорад. Ӯ ба саҳна баромад ва бо корд ба Адамович ҳамла кард. Штефан Б дар саҳна боздошт шуд, аммо қабл аз ин дар микрофон фарёд зад, ки бо гуноҳи ҳизби "Платформаи шаҳрвандӣ", ки Павел Адамович узви он аст, ноодилона зиндонӣ шуд.

Ба гуфтаи матбуот, ин мард қаблан бо ҷурми ҳамлаи мусаллаҳона ба бонк маҳкум ба зиндон шуда буд. Гуфта мешавад, Штефан Б. мушкили равонӣ дорад.

Адамович 20 сол боз шаҳрдори Гданск ва узви шинохтаи ҳизби ҳокими "Ҳуқуқ ва Адолат" буд.

Тухмие, ки дастгоҳи Чин бурда буд, бори аввал дар Моҳ реша давонд

Моҳпаймои Чин

Дастгоҳи кайҳҳонии Чин - "Чанъэ 4", ки бомувафақият дар тарафи муқобил ё дар пушти Моҳ нишаст, бори аввал дар таърихи башар дар сатҳи Моҳ таҷрибаи биоложӣ анҷом дод. Тухмии пахта, ки моҳпаймои Чин бо худ бурда буд, реша тавонд. Дар ин бора телевизиони марказии Чин рӯзи 15 январ хабар дод.

Барои таҷриба шаш навъи биложӣ, бо шумули тухми пахта ва картошка интихоб шуд. Аз аксҳои фиристодаи моҳпаймо маълум мешавад, ки тухмии пахта беҳтар нумӯъ кардааст.

Ин аввалин тухмиест, ки бовуҷуди сахтиҳои муҳити зист, ба монандаи сатҳи пасти ҷозиба, радиатсияи баланд ва тафовути ҳарорат, дар Моҳ месабзад.

"Чанъэ 4" рӯзи 3 январ дар Моҳ нишаст. Тарафи муқобили Моҳ аз замин дида намешавад ва дастгоҳҳое, ки дар онҷо кор мекунанд наметавонанд ба таври мустақим аз замин радиосигнал бигиранд. Барои ҳамин чанд моҳ пеш аз маъмурияти аслӣ Чин ба мадори Моҳ дастгоҳи "Цюэцяо" ро фиристод, ки робитаи "Чанъэ 4" бо Заминро таъмин мекунад.

ВАО: амалиёти ба ИМА ворид кардани Бутина бо дастури Кремлин сурат гирифт

Мария Бутина

Амалиёти ворид кардани Мария Бутина ба доираҳои муҳофизакори нухбагони сиёсии ИМА бо дастуру пуштибонии Кремлин сурат гирифт. Раҳбари амалиёт ва роҳнамои Бутина муовини пешини раиси Шӯрои федерация ва муовини "Бонки Русия" Александр Торошин буд. Чунин аст натиҷагирии хадамоти махсуси ИМА, ки The daily Beast онро дастрас кард.

Мария Бутина охири соли гузашта гуноҳи худро эътироф кард, ки ӯ дар ИМА фаъолияти ғайриқонунӣ пеш мебурд, ҳамчун агенти Русия сабти ном нашуда буд ва солҳо бо муҳофизакорони шинохтаи Амрико, аз ҷумла бо намояндагони Созмони тирандозон, робита барқарор мекард. Биноба натиҷагирии хадамоти махсус нахустин тамосҳо бо намояндагони созмоне, ки аз ҳақи амрикоиҳо ба доштани силоҳ ҳимоят мекунад, бо ибтикори Торошин барқарор шуд. Ин тамосҳо муддатҳо пеш аз интихоботи соли 2016 оғоз шуданд.

Мақомоти Маскав,бо шумули президент Путин, даст доштани худро ба вуруди намояндагони Русия ба Созмони тирандозони ИМА қотеона рад мекунанд. Аммо дар санаде, ки The daily Beast дарёфт кард, гуфта мешавад, ки Вазорати умури хориҷии Русия ба ибтикори Торошин мухолиф набуд, зеро робита бо доираҳои муҳофизакор, дар сурати пирӯзии номзади Ҳизби ҷумҳурихоҳ дар интихобот, муҳим мешуд.

Ҳоло Александр Торошин ҳадафи таҳримҳои ИМА қарор дорад ва Мария Бутина баьди созиш бо тафтишот ҳукми додгоҳро интизор аст.

Узбекистон меҳнати иҷбории омӯзгоронро расман манъ мекунанд

Узбекистон -меҳнати иҷборӣ

Узбекистон тасмим доранд, ки ҷалби омӯзгорон ба меҳнати иҷбориро аз рӯи қонун манъ кунад.

Ҳамчунин дар назар аст, ки даст задан ба маоши муаллимон барои харҷҳои гуногун, аз ҷумла обуна ба нашрияҳову маҷаллаҳо манъ карда шавад.

Ин талабҳо дар лоиҳаи қонун "Дар бораи мавқеи омӯзгор" ворид шудааст. Лоиҳаи қонунро вазорати маорифи Узбектстан таҳия кард.

Дар лоиҳаи қонун, ки 11 январи соли ҷорӣ барои баҳсу баррасӣ дар интернет нашр шуд, мавқеи омӯзгор, усулҳои фаъолияти омӯзгорӣ, инчунин низоми боло бурдани тахассуси донишҷӯён нишон дода шудааст. Бар илова, қонуни мазкур ҳимояи шаъну шарафи омӯзгорро кафолат медиҳад.

Бар пояи ин тарҳ, ҷалби омӯзгорон ба меҳнати иҷборӣ, аз ҷумла сабзакориву поксозии ҳудуди ноҳияҳову шаҳрҳо, ҷамъоварии оҳанпораву коғазпора ва меҳнати мавсимӣ дар хоҷагиҳои кишоварзӣ манъ мешавад.

Ҳамчунин, волидони талабаҳо дигар ҳақ нахоҳанд дошт, ки ба уҳдадориҳои касбии омӯзгорон дахолат кунанд.

Гурӯҳи Толибон масъулияти ҳамла дар Green Village-ро бар дӯш гирифт

Осебдидаҳои таркиши 14 январи соли 2019 дар Афғонистон

Гурӯҳи мусаллаҳи Толибон масъулияти бомбгузории рӯзи 14 январ дар Green Villagе - макони дафтари созмонҳои байналмилалӣ дар Кобулро бар дӯш гирифт.

Ин таркиши 4 нафар кушта, 113 нафарро маҷруҳ кард.

Сухангӯи Толибон Забеҳулло Муҷоҳид рӯзи 15 январ гуфт, ки чаҳор ҳамлагар қабл аз ворид шудан ба Green Village бомбаи дохили мошинро ба кор дароварда, "теъдоди зиёди хориҷиҳоро" куштанд".

Вазорати дохилии Афғонистон гуфт, ки се низомӣ ва як шаҳрванди мулкӣ ба ҳалокат расид. Дар байни захмиҳо 12 зан ва 23 кудак ҳаст.

Мақомот барои муайян кардани ҳалокати ягон хориҷӣ таҳқиқот оғоз карданд.

Наҷиб Дониш, сухангӯи вазорати корҳои дохилии Афғонистон гуфт, дастгоҳи тарканда, ки дар мошине насб шуда буд, дар қисмати шарқии Кобул, наздикии маҷмааи Green Village таркид.

То чанде пеш дар маҷмааи Green Village кормандони намояндагии СММ кору зиндагӣ мекарданд. Аммо мақомот мегӯянд ин минтақа ҳоло тақрибан холӣ буда, танҳо як теъдод нигаҳбонҳо дар он ҳузур доранд.

ҲСДҚ: эътирозҳои зиддичиниро ба гардани Отамбоев бор карданианд

Алмосбек Отамбоев

Ҳизби сотсиал-демократии Қирғизистон (ҲСДҚ) мегӯяд, дар ин кишвар талошҳои рабт додани эътирозҳои зиддичинӣ ба ҳизб афзоиш ёфтааст. Сухангӯи ҲСДҚ Кундуз Жолдубоева рӯзи 14 январ дар ин замина изҳороти расмӣ нашр кард.

"Ин як ҳангомаи дурӯғу ифлоси навбатии мухолифони сиёсии мост, ки мехоҳанд, хатоҳои шахсии худро бар зиммаи президенти пешини Қирғизистон Алмосбек Отамбоев ва ҷонибдоронаш вогузор кунанд. Хадамоти махсуси ҳирфаӣ метавонад ба осонӣ созмондиҳандагони аслии тазоҳуротҳои ҳангомавиро муайян кунад", - омадааст дар изҳорот.

Жолдубоева афзудааст, ки на Отамбоев ва на ҲСДҚ ба тазоҳуротҳои зиддичинӣ рабте надоранд.

Аз моҳи декабри соли 2018 то ҳол дувумин тазоҳурот аст, ки бо талаби ихроҷи муҳоҷирони ғайриқонунии Чин дар Қирғизистон баргузор мешавад. Тазоҳургарон дар баробари ихроҷи муҳоҷирони ғариқонунии чинӣ, ҳамчунин аз сафорати Чин хостанд, Пекин таъқибу боздошти ақалиятҳои миллӣ, аз ҷумла қирғизтаборонро қатъ кунад. Дар сурати ғайр, таҳдид карданд, ки бо ихроҷи муҳоҷирони ғайриқонунии Чин мустақилона машғул хоҳанд шуд.

Президенти Қирғизистон Сооронбой Ҷеенбеков 9 январ дар мулоқот бо сокинони ноҳияи Соқулуқи вилояти Чӯй гуфт, "ин кори нирӯҳои дохилӣ аст, ки мехоҳанд, бо сиёсӣ сохтани масъала муносибатҳоро бо Чин бад кунанд. Вале кадом нирӯҳои дохилӣ аст, намедонем. Фикр накунанд, ки коре карда метавонанд. Ҳамаашонро ба ҷавобгарӣ хоҳем кашид. Аз чизе наметарсем. Бародарони гиромӣ, зидди ҳама чора меандешем ва ин масъаларо ҳал мекунем".

Никол Пашинян сарвазири Арманистон таъйин шуд

Президенти Арманистон Армен Саркисян фармони ба вазифаи сарвазирии ин кишвар таъйин шудани Никол Пашинянро имзо кард. Фармон дар сомонаи расмии президент нашр шудааст.

Пашинян баъд аз эътирозҳои оммавӣ дар моҳи майи соли гузашта сарвазири Арманистон шуда буд. Тазоҳургарон ба раҳбарии Серж Саргсян ва ҳизбаш эътироз баён карда, гуфтанд, ӯ мехоҳад, баъди ду давраи президентӣ давраи севум низ ҳамчун сарвазир кишварро раҳбарӣ кунад.

Миёнаҳои моҳи октябр Пашинян аз мақоми сарвазирӣ истеъфо дод ва муваққатан иҷрои ин вазифаро бар дӯш гирифт. Ибтидои моҳи ноябр президенти Арманистон порлумонро пароканда эълон ва фармон дар бораи баргузории интихоботи ғайринавбатиро имзо кард. Ин фармон баъди он содир шуд, ки порлумон ду навбат натавонист, сарвазири навро таъйид кунад.

Пашинян дар давраи роҳбарияш фурсат пайдо кард, ки ҳамаи роҳбарони вилоятҳои кишварро иваз кунад, маъракаи зидди фасодро ба роҳ монад ва ҳаҷми даромади буҷаро аз ҳисоби андоз афзоиш диҳад.

9 декабр дар интихоботи порлумонии Арманистон эътилофи "Иқдоми ман"-и иҷрокунандаи вазифаи сарвазир Никол Пашинян 70,43 дарсади раъйи мардумро ба даст овард.

Ҳизбҳои "Арманистони рӯ ба рушд" ва "Арманистони бомаърифат" бо касби мутаносибан 8 ва 6 дарсади раъй вориди порлумон шуданд. Ҳизби ҷумҳурихоҳи Арманистон, ки дар гузашта ҳизби ҳоким буд, ба порлумон роҳ наёфт. Ба ин ҳизб ҳамагӣ 4,7%-и сокинон раъй додаанд.

Мақомоти Туркманистон сабти номи сарбозони эҳтиётиро шуруъ карданд

Мақомоти Туркманистон дар ҳоли ҳозир сарбозони эҳтиётиро сабти ном мекунанд. Дар ҳамин ҳол, манбаъҳо мегӯянд, тамоми марзи Афғонистон бо Туркманистон дар ихтиёри ҷангҷӯён аст.

"Ба ҳамаи нуқтаҳои бақайдгирии низомӣ дастур шудааст, ки мардони то 50-соларо барои омодагӣ ба амалиёти низомӣ санҷанд",-хабар дод як манбаъ аз вазорати мудофиаи Туркманистон. Ба гуфтаи ин манбаъ, сабти номи сарбозони эҳтиётӣ ба вазъи марз бо Афғонистон рабт дорад. "Вазъи марз ноором аст",-гуфт манбаъ.

Панҷ вилояти Афғонистон бо Туркманистон ҳаммарз ҳастанд. Ахиран расонаҳо хабар доданд, ки низомиёни рус бо ҳамтоёни туркманашон размоишҳои муштарак барпо мекунанд. То ин замон низомиҳои Русия борҳо хабар доданд, ки гуруҳи қавии тундгаро дар марзи Афғонистон бо Туркманистон ҷамъ шудааст.

Трамп гуфт, ки "ҳеҷ гоҳ ба манфиати Русия кор накардааст"

Доналд Трамп

Президенти ИМА Доналд Трамп гуфт, ки "ҳеҷ гоҳ барои Русия кор накардааст" ва гузоришҳоеро, ки робитаи ӯ бо президенти Русия Владимир Путинро суолбарангез мехонанд "як дуруғи ғафс" номид.

Трамп рӯзи 14 январ ба думболи гузориши The Washington Post, ки охири ҳафта нашр шуд ва гуфт, ки президенти ИМА "бисёр талош кард, муҳтавои сӯҳбаташ бо Путинро пинҳон кунад" дар ҳузури хабарнигорон вокуниш кард. Дар гузориши ҷудогона нашрияи "The New York Times ошкор кард, ки баъди аз мақом барканор кардани Ҷеймс Коми, раҳбари пешини Идораи истихбороти ИМА, Бюрои федеролии тафтишот соли 2017 ба манзури оё Трамп ба манфиати Русия кор кардааст ё не, алайҳи ӯ бозҷӯӣ оғоз кард. Ин тафтишҳои эҳтимолӣ баъдан ба таҳқиқи бозҷӯии дахолати эҳтимолии Русия дар интихоботи соли 2016, ки ҳоло Роберт Мюллер пеш мебарад, ҳамроҳ шуданд.

Трамп, ки рӯзи душанбе қабл аз сафараш ба Ню Орлеан дар чаманзори Кохи сафед бо хабарнигорон сӯҳбат мекард, Идораи федеролии тафтишот ва Вазорати адлияро "нобакорҳои шинохта" ва "пулисҳои ифлос" унвон кард.

Майк Помпео бо мақомоти Арабистони Саудӣ мулоқот кард

Майк Помпео ва Муҳаммад бин Салмон. 14 январ, 2019

Раҳбарони Арабистони Саудӣ Котиби давлатии ИМА Майк Помпеоро мутақоид карданд, ки дастандаркорони куштори журналист Ҷамол Хошуқҷӣ ба ҷавобгарӣ кашида мешаванд. Помпео дар ин бора рӯзи 14 январ дар Риёз ба хабарнигорон маълумот дод. Хабаргузории Reuters вазъи баъди куштори Хошуқҷиро Арабистони Саудиро бузургтарин буҳрони сиёсӣ дар хонаводаи салтанатӣ медонад.

Помпео ба хабарнигорон гуфт, ки ҳангоми сӯҳбат бо шоҳ Салмон ва валиаҳди саудӣ Муҳаммад бин Салмон як идда масоили марбут ба ҳуқуқи инсон, бо шумули ҳуқуқи занон, аз ҷумла вазъи фаъолони ҳуқуқи башарро, ки моҳҳо зиндонӣ ва шиканҷа мешаванд, матраҳ кард.

Ҷамол Хошуқҷӣ, ки муддати тӯлонӣ шахси мавриди эътимоди нафарони атрофи шоҳи саудӣ буд ва солҳои ахир валиаҳд бин Салмонро танқид мекард, моҳи октябри соли 2018 дар консулгарии Арабистони Саудӣ дар Истамбул кушта шуд. Ин ҷиноят мавҷи маҳкумкуниҳоро дар саросари ҷаҳон ба миён овард. Вазорати молияи ИМА 17 шаҳрванди ин кишварро таҳрим кард ва Сенати ИМА қатъномаеро қабул кард, ки валиҳади саудӣ Муҳаммад бин Салмонро муттаҳам мекард.

Биноба арзёбии Идораи истихбороти ИМА фармоишгари ин куштор эҳтимол Муҳаммад бин Салмон буд. Мақомоти Риёз инро қотеона рад мекунанд. Дар робита ба ин куштор 21 нафар дар Арабистони Саудӣ бозҷӯӣ мешаванд. Панҷ нафари онҳо дар ростои ҳукми эъдом қарор доранд.

Ҳамлаҳои тоза алайҳи ҳамҷинсгароҳо дар Чеченистон - 2 кушта 40 боздоштшуда

Эътирози зидди таъқиби ҳамҷинсгароҳо дар Чеченистон

Ба маълумоти Шабакаи ҳамҷинсгароҳои Русия мавҷи нави таъқиби ҳамҷинсгароҳо дар Чеченистон оғоз шудааст. Ба гуфтаи ин созмон аз охири моҳи декабр дар ин ҷумҳурӣ дастикам 40 нафар ғайриқонунӣ боздошт ва ду нафар дар пайи шиканҷа ҳалок шуд.

Мисли мавридҳои қаблӣ, боздоштро ходимони ниҳодҳои ҳифзи тартибот анҷом доданд. Бахше аз осебдидаҳо дар зиндони Арғун нигаҳдорӣ мешаванд, ки номаш дар робита ба таъқиби ҳамҷинсгароҳо борҳо вирди забон шудааст. Бар пояи шоҳидии сокинони Чеченистон, ки бо фаъолони ҳуқуқ дар тамос шуданд, санадҳои боздошшудаҳоро мусодира ва онҳоро бо парвандаҳои сохта аз ҷумла алайҳи наздиконашон таҳдид мекунанд, маҷбур мекунанд ба варақҳои тоза, ки навиштае надорад, имзо гузоранд.

Ба гуфти ҷомеаи ҳамҷинсгароҳо, ин созмон тавонист 150 нафарро аз Чечнистон берун орад, ки 130 нафари онҳо Русияро тарк карданд.

Соли 2017 нашрияи "Новая газета" силсилаи матлабҳоро дар бораи таъқиб ва куштори ҳамҷинсгароҳо дар ин ҷумҳурии Қафқози Шимолӣ нашр кард. Созмонҳои байналмилалии ҳуқуқи инсон, СММ, ИМА ва Иттиҳоди Аврпуо аз Русия талаб карданд, ки ҳамаи хабарҳои марбут ба таъқибу куштори ҳамҷинсгароҳоро мавриди санҷиш қарор диҳад. Аммо Рамазон Қодиров - раҳбари ин ҷумҳурии Қафқози Шимолӣ иттиҳомро рад кард ва гуфт, ки Чеченистон ҳамҷинсгаро надорад.

Шаҳрдори Гданск баъди ҳамлаи ахир ба худ наомада даргузашт

Павел Адамович

Мири шаҳри Гдански Лаҳистон Павел Адамович, ки рӯзи якшанбе дар консерти хайрия бо корд захмӣ шуд, дар бемористон даргузашт

Вазъи Павел Адамович соатҳо боз вахим буд ва ӯ рӯзи 14 январ даргузашт,- гуфтанд мақомоти беҳдошт. Гуфта мешавад, ки корд ба қалби Алмович расида буд ва ӯ хуни зиёдро гум кард.

Ҳамларо Штефан Б. аҷом дод, ки 27 сол дорад. Ӯ ба саҳна баромад ва бо корд ба Адамович ҳамла карда ба қалбаш ду зарба зад. Штефан Б дар саҳна боздошт шуд аммо қабал аз ин дар микрафаон фарёд зад, ки бо гуноҳи ҳизби "Платформаи шаҳрвандӣ", ки Павел Адамович узви он аст, ноодилона зиндонӣ шуд.

Ба гуфтаи матбуот, ин мард қаблан бо ҷурми ҳамлаи мусаллаҳона ба банк маҳкум ба зиндон шуда буд. Гуфта мешавад, ки Штефан Б. мушкили равонӣ дорад.

Адамович 20 сол боз шаҳрдори Гданск ва узви шинохтаи ҳизби ҳокими "Ҳуқуқ ва Адолат" аст.

Беш аз нисфи шаҳрвандони Русия истеъфои ҳукуматро мехоҳанд

Акси тасвирӣ

Беш аз ними шаҳрвандони Русия (53%) аз истеъфои ҳукумат пуштибонӣ мекунанд, 40 дар сад ба ин мухолифанд. Чунин аст, натиҷаи назарсанҷии Маркази омӯзиши афкори умуми "Левада", ки миёнаҳои моҳи диекабр анҷом шуда рӯзи душанбе нашр шуд.

Моҳи ноябри соли 2016 аз се як ҳиссаи шаҳрвандони Русия истеъфои ҳукуматро мехостанд.

Бахши умдаи шаҳрвандон (57%) бовар доранд, ки ҳукумати Русия наметавонад мушкилоти боло рафтани нархҳо ва коҳиши даромади аҳолиро ҳал кунад. 46 дар сад мегӯянд, ки ҳукумат наметавонад онҳоро бо ҷойи кор таъмин кунад ва 43 дар сад бовар доранд, ки ҳукумат дар фикри таъмини иҷтимоии мардум нест.

Бинобар ин назарсанҷӣ, 36 дар сад гуфтанд, ки ҳукумат бо ҳайъати феълиаш аз ӯҳдаи муқовимат ба буҳрони иқтисодӣ намебарояд.

Маркази ислоҳоти иқтисодӣ ва сиёсӣ рӯзи 8 январ гуфт, ки соли 2018 рӯҳияи эътирозии шаҳрвандони Русия дар муқоиса бо солҳои пешин боло рафт. Коршиносон инро дар қадами аввал ба норозигии мардум аз боло бурдани синни нафақа - номаъруфтарин ислоҳоти мақомоти кунунии Русия, рабт доданд.

Ҳавопаймое дар Эрон суқут кард. 15 нафар ҳалок шуд

Макони суқути ҳавопаймо

Ҳавопаймои борбар бо 16 нафар рӯзи душанбе дар канораҳои Теҳрон, пойтахти Эрон суқут кард. Биноба хабарҳои ахир аз 16 нафаре, ки дар ҳавопаймо буд, танҳо як нафар зинда монд.

Ба гуфтаи хабаргузории "Форс" ҳавопаймо ба нерӯҳои мусаллаҳи Эрон таалуқ дошт ва аз Бишкек - пойтахти Қирғизистон гушт мебурд.

Низомиёни Эрон мегӯянд, Boeing 707 дар фурӯдгоҳи Фатҳ, наздикиҳои шаҳри Караҷ нишасти изтирорӣ анҷом дод. Ҳангоми нишастан аз хати парвоз берун шуда, дар поёни роҳ ба девор бархурд ва оташ гирифт.

Телевизиони давлатӣ акси макони суқути ҳавопайморо нишон дод, ки дуди ғализе аз он баланд мешуд.

Муҳандиси ҳавопаймо, ки дар ин ҳодиса ҷон ба саломат бурд, ба бемористон интиқол ёфт.

Истеҳсоли ҳавопаймои Boeing 707 ҳанӯз соли 1950 оғоз шуда буд. Бинобар таҳримҳо Эрон охирин давлате буд, ки ин навъи ҳавопайморо барои мусофирбарӣ истифода мекард. Якчанд адад Boeing 707 дар ихтиёри низомиёни Эрон қарор дорад.

Дар Қирғизистон қабрҳои масеҳиёнро вайрон карданд

Хабри шикастаи масеҳиён дар Иссиқкул

Тахриби қабрҳо дар гуристонми масеҳиён 11 январ рух дод. Бино ба иттилои пешакӣ, дар маҷмуъ 90 салиб ва ёдгории болои қабрҳо шикаста шуд.

Дар ноҳияи Иссиқкули Қирғизистон гуруҳи муфаттишон ҳодисаи тахрибкории қабристони деҳаи Ананеворо тафтиш мекунад.

Тахриби гурҳо ворисони мурдаҳоро нигарон кардааст. "Одамоне ки ин корро кардаанд, аз ақл бегонаанд. Зеро одами солим чунин кореро намекунад. Инҷо бадбинии миллӣ нест", - гуфт Александр, яке аз сокинони маҳаллӣ.

Сталбек Усубакунов, намояндаи пулиси ноҳияи Иссиқкӯл гуфт, гумонбарон ҳоло пайдо нашудаанд.

Ананево яке аз бузургтарин деҳаҳои гуногунмиллати ноҳияи Иссиқкӯл аст. Шумори аҳолии ин деҳа ба бештар аз 14 ҳазор мерасад.

Узбекистон дар садри раддабандии маргу мири сокинон аз ғизои нодуруст

Дастархони узбекӣ

Донишмандонди Донишгоҳи Йена ба номи Фридрих Шиллер раддабандии кишварҳоро аз рӯи маргу мири шаҳрвандонашон ба иллати ғизои нодуруст тартиб додаанд. Узбекистон бо нишондоди аз ҳама баланд дар садри ин раддабанӣ қарор гирифт.

Бар асоси натиҷаҳои пажӯҳиш, ки маълумоти соли 1990 то соли 2016-ро дар бар мегирад, дар Узбекистон бар сари ҳар 100 ҳазор аҳолӣ 394 қурбонии ғизои нодуруст рост меояд.

Дар раддабандӣ кишварҳои пасошӯравӣ 11 раддаи аввалро касб кардаанд. Дар мақоми дувуму севум Туркманистон ва Қирғизистон қарор гирифтаанд.

Зинаҳои боқиро Украина, Молдова, Озарбойҷон, Белорус, Тоҷикистон ва Қазоқистон ишғол кардаанд. Русия бо 291 ҳолати маргу мир бар сари 100 ҳазор аҳолӣ дар мақоми 10-ум аст.

Ба гуфтаи муаллифон, сокинони кишварҳои мазкур гирифтори бемориҳое шудаанд, ки дар натиҷаи истифодаи аз ҳад зиёди намак ва истеъмоли ками мева сар задаанд.

​Дар Аврупо нишондоди аз ҳама баланди маргу мири сокинон ба иллати ғизои нодуруст дар Олмон ба қайд гирифта шудааст. Ба гуфтаи пажӯҳишгарон, сокинони Испания, Исроил ва Фаронса ғизои беҳтар мехуранд.

Маҳви 10 ҷангҷӯи ДОИШ аз ҷумла, ҷангҷӯёни тоҷик

Сарбозони афғон зимни амалиёт ба зидди ДИИШ дар вилояти Нангарҳор. Акс аз рӯзи 8-уми майи соли 2017.

Вазорати дифои Афғонистон мегӯяд, дар як амалиёти муштарак бо неруҳои махсус дар вилояти Бодғис 10 узви гуруҳи ба ном “Давлати исломӣ“-ро куштанд ва дар байни онҳо шаҳрвандони Тоҷикистон ҳам ҳастанд.

Дар баёнияи вазорат аз рӯзи 13-уми январ омадааст, ки амалиёт дар рустои Чашмаи Ширин дар ноҳияи Ҷованд сурат гирифт ва 16 узви дигари ДОИШ бо шумули зану фарзандонашон дастгир шуданд.

Телевизиони “Тулӯъ” гузориш дод, ки ҷангҷӯёни кушташуда аз Туркияву Чин, Тоҷикистон ва Қирғизистон ҳастанд. Дар вазорати дифои Афғонистон ба Радиои Озодӣ рӯзи 14-уми январ гуфтанд, ки ҷузъиёти хабарро дар идомаи рӯз нашр мекунанд.

Трамп Туркияро аз амалҳои хушунатбори зидди курдҳо ҳушдор дод

Доналд Трамп ва Раҷаб Тайиб Эрдуғон

Доналд Трамп, президенти ИМА дар твиттер аз хуруҷи нерӯҳои Амрико аз Сурия хабар дод. Ӯ навишт, ки артиши амрикоӣ ҳамзамон ба мавқеъҳои боқимондаи гуруҳи террористии "Давлати исломӣ" дар Сурия зарба хоҳад зад.

Ҳамзамон Трамп бо ҷиддият Туркияро аз амалҳои хушунатбори зидди курдҳои Сурия ҳушдор дод. Курдҳо минтақаҳои шимолу шарқи Сурияро дар назорат дошта, дар мубориза зидди террористон ҳампаймони ИМА ҳастанд. Аммо Туркия аксари созмонҳои курдиҳо ҳамчун гуруҳҳои террористӣ эътироф мекунад.

"Ба берунории артиш аз Сурия шуруъ кардем. Дар ҳамин ҳол, ба боқимондаҳои "Давлати Исломӣ" зарбаҳои сахт мезанем. Ва ҳамларо идома медиҳем, агар онҳо дубора зуҳур кунанд", - навишт рӯзи якшанбе Трамп дар твиттер. Ба дунболи ин суханон Трамп илова кард, ки: "Агар Туркия ба курдҳо ҳамла кунад, мо иқтисоди онро маҳв мекунем". Ба илова Трамп курдҳоро аз иғвоангезӣ нисбати Туркия ҳушдор дод. "Ман намехоҳам, ки курдҳо нисбати Туркия, Русия, Эрон ё Сурия иғво барангезанд. Онҳо дар торумори "Давлати Исломӣ" саҳми калоне доштанд. Мо ба онҳо изҳори сипос мекунем, аммо ҳоло бояд артишро ба хона баргардонем", - навишт Трамп.

Президенти Туркия Раҷаб Эрдуғон дар мазҳари ба ёвари Трамп дар умури амнияти миллӣ Ҷон Болтон ҳамла лафзӣ кард. Болтон пештар аз ин гуфт, ки артиши амрикоӣ ба шарти ҳамла накардани Туркия ба курдҳои ҳампаймони ИМА аз Сурия хориҷ мешаванд.

Зодагони Осиёи Марказӣ бо гумон терроризм дар Алмато боздошт шуданд

Боздошти гумонбарони терроризм дар Қазоқистон

Кумитаи амнияти миллии Қазоқистон гурӯҳеро бо гумони омодагӣ ба ҳамлаҳои террористӣ дар Алмато боздошт кард. Боздошти ин гурӯҳи рӯзи 10 январ сурат гирифтааст.

Ба гуфтаи ин ниҳод, боздоштшудаҳо "зодагони Осиёи Марказӣ буда, ба барномарезии ҳамлаи террористӣ дар Қазоқистон гумонбар мешаванд".

Аз манзили боздоштшудаҳои василаҳои омода кардани дастгоҳҳои тарканда, инчунин аслиҳа ва муҳимоти дигари ҷангӣ мусодира шудааст.

"Ба иттилои тафтишот, боздоштшудаҳо бо дастури ҷангҷӯёне, ки аз "Давлати Исломӣ" баргаштаанд, ба теракт омода мешуданд. Онҳо ният доштанд, дар шаҳри Алмато дар минтақаҳои ҷамъшавии одамон ҳамла анҷом диҳанд", - хабар медиҳад кумитаи амнияти миллии Қазоқистон.

Ҳаракати автобусҳо дар Душанбе зиёдтар мешавад, вале

Шаҳрдории Душанбе эълон кард, ки аз рӯзи 16-уми январ ҳаракати мусофирбарҳои хурде, ки дар як хатсайри серодам мусофир мекашонанд, манъ мешавад.

Шаҳрдорӣ рӯзи 11-уми январ бо нашри як эълон дар вебсайти расмии худ навиштааст, ки бо мақсади кам кардани танбашавии нақлиёт дар кӯчаю хиёбонҳои марказии Душанбе ва беҳтар кардани хизматрасонӣ ба мусофирон, аз 16 январи соли 2019 ҳаракати микроавтобусҳои хатсайри рақами 33 манъ карда мешавад”.

Ба гуфтаи шаҳрдорӣ ба ҷойи ин ҳаракати автобусҳои рақами 2, 18, 4, 12 зиёд мекунанд ва фосилаи ҳаракати онҳо низ кутоҳтар мешавад, то мусофирон саривақт ба манзилу кор бирасанд.

Мусофирбарҳои (маршрутка) хурди рақами 33 дар Душанбе рӯзона ба ҳазорон нафар дар пойтахти Тоҷикистон идмат мерасонанд. Бо вуҷуди афзоиши шумораи автобусҳо дар Душанбе, шикоятҳо аз норасоии нақлиёт дар пойтахт ва ҳам бо таъхир ҳаракат кардани автобусҳо зиёд аст.

Толибон як кӯдак ва се афсари пулисро дар Ҳирот куштанд

Акс аз бойгонист.

Дар натиҷаи ҳамла ба як идораи пулис дар шаҳри Ҳироти Афғонистон 5 нафар кушта шудаанд. Фарҳод Ҷайлонӣ, сухангӯи ҳуукумати вилояти Ҳирот гуфт, ки ҳамла соати 6 ба вақти маҳаллӣ ва рӯзи 12-уми январ ба вуқуъ пайваст.

Қорӣ Юсуф Аҳмадӣ, як сухангӯи Толибон гуфтааст, ки ҳамла кори дасти ҷангҷӯёни онҳо буд. Фарҳод Ҷайлонӣ ба Радиои Озодӣ гуфт, дар ҷараёни даргирии дусоата се афсари пулис, як кӯдак ва як ғайринизомии дигар кушта шуданд.

Чаҳор маъмури дигари пулис ҷароҳат бардоштаанд. Амонулло Амирхел, фармондеҳи пулиси шаҳр гуфт, ки маъмурони пулис дар ҷараёни даргирии ду соата, ҳарсе ҷангҷӯро куштанд. Бо вуҷуди талошҳо барои оғози музокироти сулҳ бо Толибон ва хотима додан ба ҷанги 17-сола ин гуруҳ вақтҳои ахир тақрибан ҳар рӯз ба неруҳои амниятӣ ҳамла мекунад.

Фалокат дар кони Чин 21 нафарро ҳалок кард

Акс аз бойгонӣ

Дар натиҷаи таркиши як кони ангишт дар Чин 21 нафар ба ҳалокат расидаанд. Ба навиштаи хабаргузориҳои давлатӣ, фоҷиа рӯзи 13-уми январ дар вилояти Шансӣ дар яке аз вилоятҳои аслии истихроҷкунандаи ангишт ба вуқуъ пайвастааст.

Шастушаш конкани дигарро наҷот додаанд. Бо вуҷуди коҳиши талафот дар конҳои ангишт дар Чин дар солҳои гузашта, дар ин кишвар назар ба ҳар гушаи дигари дунё ангиштканҳо зиёдтар дар зери нақб монда ҳалок мешаванд.

Эрон аз тасмими Лаҳистон асабонӣ шудааст

Оятулло Алии Хоманаӣ, раҳбари Эрон

Вазорати умури хориҷии Эрон тасмими Лаҳистон барои мизбонии муштараки як ҳамоиши амниятӣ дар мавриди Ховари Миёнаро “амали душманона ба зидди Эрон” номидааст.

Хабаргузории давлатии ИРНА рӯзи 13-уми январ навишт, ки дипломатҳои эронӣ бо ҳадафи баёни эътироз, Войтсех Унолт, кордори сафорати Лаҳистон дар Теҳронро ба вазорат даъват кардаанд. Қарор аст, конфронси мазкур бо мусоидати Амрико ва Лаҳистон рӯзҳои 13 ва 14-уми феврал дар Варшава сурат бигирад.

Хабаргузории ИРНА аз қавли як мақоми вазорат навиштааст, дар сурати мизбонии нишаст, Эрон “аксуламал” нишон медиҳад. Ба қавли хабаргузорӣ, дипломати лаҳистонӣ, бо шарҳ додани нишаст, гуфтааст, ки он ба зидди Эрон нигаронида нашудааст.

Майк Помпео, вазири умури хориҷии Амрико гуфтааст, ки дар нишасти вазирони чандин кишвар, “ба масъалаи сулҳу субот ва озодиву амният дар Ховари Миёна таммаркуз хоҳад шуд”. Дар нишаст ба қавли ӯ нақши ноамнкунандаи Эрон дар минтақа ҳам баррасӣ мешавад.

Ёфтҳои бештар

Гузоришҳои видеоӣ

Кор аз дохили хона. Соҳибхоназанҳо ҳунари комютеру интернетро азхуд карданд
лутфан мунтазир бошед

### Феълан кор намекунад ###

0:00 0:02:24 0:00
XS
SM
MD
LG