Пайвандҳои дастрасӣ

Хабари нав

Хабарҳо

Манзараи Сосониён ба феҳрасти ЮНЕСКО шомил шуд

Манзараи Сосониён дар вилояти Форс

ЮНЕСКО, Муассисаи илм ва фарҳанги Созмони Милал 8 маҳалли бостонӣ ва пеш аз ислом дар Эронро ба феҳрасти ҷаҳонии худ ворид кард ва бо ин шумораи осори Эрон дар феҳраст ба 24 адад расид.

“Манзараи бостонии Сосониён” яке аз осори бостониест, ки рӯзи 30-уми июн дар нишасти ЮНЕСКО дар Баҳрайн ба феҳрасти мӯътабари ҷаҳонӣ шомил шуд.

Мақбараи бостонии Сосониён дар вилояти Форс ҷойгир аст, ки онро гавҳораи сулолаи Сосониён медонанд. Ин сулола дар аввалҳои асри 3 дар тамоми қаламрави Эрон ва аз Миср то ба Афғонистону Осиёи Марказӣ ҳукмронӣ кардаанд.

Сосониён баъди ҳамлаи арабҳо дар миёнаҳои қарни 7 аз байн рафт. ЮНЕСКО чандин осори дигари қадимӣ аз ҷумла дар Ҳинду Ҷопон ва Олмону кишварҳои дигарро ба феҳрасти худ шомил кард.

ФИФА Русияву Сербистонро танбеҳ дод

Бозии Бразилия ва Сербистон дар рӯзи 27-уми июн дар майдони Спартаки Маскав.

Федератсиюни Байналмилалии Футбол ва ё ФИФА Русия ва Сербистонро барои рафтори мухлисонашон ҳангоми бозиҳои ҷоми ҷаҳонии имсола танбеҳ дод.

ФИФА рӯзи 30-уми июн гуфт, ки Федератсияи футболи Русия бояд барои амалкарди мухлисони рус, ки ҳангоми бозии кишвар бо Уругвай шиори миллатгароёнаро нишон доданд, 10 ҳазор доллар ҷарима бипардозад.

Дар ин бозӣ дар шаҳри Самара Русия 3 бар 0 бохт. Дар шиор рақами 88 буд, ки онро фашистони нав ба ҷойи Ҳайл Ҳитлер ба кор мебаранд.

Федератсиюни футболи Сербистон бояд 20 ҳазор доллар ҷарима бидиҳад, зеро мухлисон аз он кишвар ҳангоми бозии тими миллии Сербистон бо Бразилия шиореро намоиш доданд, ки аз як гурӯҳи миллатгароёни дар замони Ҷанги Дуввуми Ҷаҳонӣ ситоиш мекард. Сербистон дар ин бозӣ дар Маскав аз Бразилияи ду гол хӯрд.

Тамдиди мӯҳлати бозгашти паноҳҷӯёни афғон аз Покистон

Духтарони афғон баъди бозгашт аз мактабе дар ҳошияи Исломобод

Давлати Покистон мегӯяд, мӯҳлати бозгардонидани маҷбурии тақрибан 2 миллион паноҳандаи афғонро дароз кардааст. Дафтари раёсати ҷумҳурии Покистон рӯзи 30-уми июн гуфт, “мӯҳлати бозгардонидани паноҳҷӯёни сабтшуда дар кишварро барои се моҳи дигар дароз кард”.

Ҳукумати Покистон соли гузашта эълон кард, ки ҳамаи паноҳандагони афғон бояд ба кишварашон баргарданд, аммо аз он замон то кунун се дафъа мӯҳлати бозгашташонро тамдид кард. Охирин мӯҳлат рӯзи 30-уми июн ба поён расид.

Барои бисёре аз паноҳҷӯёни афғон Покистон ба ягона маҳалли зиндагӣ табдил шудааст. Онҳо сар аз солҳои 80-ум дар замони ҷанги шӯравӣ дар Афғонистон ба Покистон паноҳ бурданро шурӯъ карданд ва бисёре аз онҳо ба далели ноамнӣ дар Афғонистон бозгаштан намехоҳанд.

Тазоҳурот дар Шарқи Дури Русия барои ҳаққи бознишастагӣ

Акс аз бойгонӣ

Садҳо нафар дар минтақаи Шарқи Дури Русия бо даъвати Алексей Навалний, пешвои мухолифони давлат ба зидди азми давлат барои боло бурдани синни бознишастагӣ тазоҳурот карданд.

Рӯзи 1-уми июл бештар аз 500 нафар дар шаҳри Биробидҷон, маркази маъмурии Минтақаи Худмухтори Яҳудиён ҷамъ омаданд. “Бознишастаи гурусна, мояи ҳиҷолати давлат аст”, “Пеш аз нафақа бимиред” аз шиорҳои тазоҳургарон буд. Онҳо аз мақомот мехостанд, қонун дар бораи боло бурдани синни бознишастагиро пас бигиранд.

Рӯзи 16-уми июн ҳукумати Русия ба порлумон қонунеро пешниҳод кард, ки бар асоси он бояд то соли 2028 мардҳо дар синни 65 солагӣ бознишаста шаванд. Ҳоло синни нафақаи мардҳо дар Русия 60 аст. Тарҳи қонуни нав ҳамчунин боло бурдани синни бознишастагии занон аз 55 то 63 солро пешбинӣ мекунанд.

Тазоҳурот дар Хуррамшаҳр ба бархӯрд кашид

Маъмурони пулис дар маҳалли тазоҳурот дар Хуррамшаҳр

Бино ба гузоришҳо садҳо тазоҳургари норозӣ аз камбуди оби ошомиданӣ дар Хуррамшаҳри Эрон бо маъмурони пулис бархӯрд кардаанд. Хабаргузории давлатии Эрон ИРНА гузориш додааст, ки эътирозгарон рӯзи 30-уми июн дар шаҳр ҷамъ омада ва ба зидди мақомот шиор доданд.

Ба навиштаи хабаргузорӣ, дар шоми он рӯз баъди онки тазоҳургарон ба самти афсарон санг андохтанд, маъмурони пулис барои пароканда кардани онҳо аз гази ашковар истифода бурданд.

Дар видеоҳое, ки аз маҳалли тазоҳурот нашр кардаанд, садои тир шунида мешавад. Телевизиони давлатии Эрон гуфт, ки теъдоде аз тазоҳургарон дастгир шудаанд.

Мунтақидон мегӯянд, мудирияти нодуруст бар изоваи хушксолиҳои чанд соли гузашта сабаби кам шудани оби рӯдхонаҳо ва обҳои зеризаминӣ дар Хуррамшаҳр шудааст.

Пештар аз ин дар Теҳрон низ дар моҳи гузашта мардум ба зидди мушкилоти иқтисодии афзоянда дар Эрон эътироз карданд.

Лавров: Русия аз таҳримҳои Ғарб мустақил буданро омӯхт

Сергей Лавров

Сергей Лавров, вазири умури хориҷии Русия, гуфт, ки кишвараш дар пайи таҳримҳои ҷорикардаи Ғарб ҳарчи бештар мустақил буданро омӯхт. Ӯ гуфт, дар ҳоли ҳозир низ Русия бо кишварҳои аврупоӣ робитаи тиҷоратӣ дорад.

Лавров рӯзи 29-уми июн дар суҳбат бо шабакаи бритониёии Channel 4 News гуфт, пас аз таҳримҳои соли 2014 Русия зарфияти ҳарбӣ ва иқтисодӣ, бахусус дар он бахшҳое, ки барои давлат ва мардум зарурист, боло бурд.

Ӯ ҳамчунин гуфт, солҳои охир ба ин натиҷа расидаанд, ки дар баъзе бахшҳои муҳим ҳеҷ гоҳ ба кишварҳои ғарбӣ такя накунанд. “Ҳаргиз набояд ба фанновариҳои Ғарб такя кард, чун ҳар лаҳза метавонад аз кор бимонад. Набояд ба воридоти маҳсулоти мавриди ниёзи мардум ба Ғарб пойбанд шуд, чун ҳар замон метавонад содироташ қатъ шавад”, - гуфтааст Сергей Лавров.

Ӯ афзудааст, таҳримҳои кишварҳои ғарбӣ алайҳи Русия додугирифт миёни Маскаву Ғарбро то панҷоҳ дарсад коҳиш дод.

Бо ин ҳол, гуфт Лавров, Аврупои Ғарбӣ яке аз шарикони тиҷоратии Русия боқӣ монда, додугирифт бо онҳо ба беш аз 250 миллиард доллар мерасад.

Трамп дар бораи Қрим ва таҳримҳо: “Хоҳем дид, ки Русия чӣ мекунад”

Доналд Трамп ва Владимир Путин

Трамп дар мавриди Қрим ва таҳримҳо: “Хоҳем дид, ки Русия чӣ мекунад”

Доналд Трамп, раиси ҷумҳури Амрико, чанд рӯз пеш аз мулоқоташ бо президент Владимир Путин эҳтимоли ба расмият шинохтани Қримро ҳамчун ҳудуди Русия рад накардааст. Ӯ шоми 29-уми июн дар ҳавопаймои Air Force One дар посух ба суоли хабарнигорон, ки оё имкони баррасии поён додан ба мухолифати тӯлонии Вашингтон дар мавриди тасарруфи Қрим аз сӯи Русия воқеяит дорад? гуфт, “Мо хоҳем дид”.

Трамп дар робита ба баррасии раъфи таҳримҳо алайҳи Русия низ ба ҳамин мазмун посух дод: “Мо хоҳем дид, ки Русия чӣ мекунад.”

Русия соли 2014 нимҷазираи Қримро, ки то он вақт ба Украина тааллуқ дошт, тасарруф намуд. Маъмурияти Барак Обама, раиси ҷумҳури пешини Амрико, ба хотири ишғоли Қрим алайҳи Русия таҳрим ҷорӣ карда буд.

Доналд Трамп гуфт, ки ҳадафи мулоқоти қарибулвуқӯяш бо Путин беҳтар кардани равобити Вашингтону Маскав аст. Интизор меравад, Трампу Путин рӯзи 16-уми июл дар шаҳри Ҳелсинкӣ, маркази Финландия, бо ҳам мулоқот кунанд.

Норозиёни Хуррамшаҳр: “Ба номи дин моро ғорат карданд”

Гуруҳе аз сокинони Хуррамшаҳри Эрон рӯзи 29-уми июн бо норозигӣ аз шӯрӣ ва вазъи бади об таҷаммуъ карданд. Хабаргузории расмии “Ирна” навишт, ки онҳо дар маҳалли баргузории намози ҷумъа гирд омада ва хостори беҳбуди кайфияти об шудаанд.

Бар асоси наворҳои нашршуда дар шабакаҳои иҷтимоӣ, эътирозгарон дар ҳоле ки зарфҳои холии об дар даст доштанд, шиорҳоеро ба забони форсӣ ва арабӣ сар медоданд.

“Масъули белаёқат намехоҳем, намехоҳем”, “Ба номи дин моро ғорат карданд” ва “Фармондор, бирав, гум шав” аз ҷумлаи шиорҳои эътирозгарон буд.

Сокинони Ободон ва Хуррамшаҳри Эрон мегӯянд, ки мушкили оби ошомиданӣ доранд. Яке аз сокинони Ободон ба бахши форсии Радиои Озодӣ гуфт, “бар иловаи онки об шӯр аст, бӯғи ғализе дорад ва қобили нӯшидан нест. Мардум маҷбуранд об бихарранд, ки он ҳам то андозае шӯр шудааст.”

Аммо мақомоти Эрон гуфтаанд, ба сокинони Хуррамшаҳру Ободон оби поки бепул пешниҳод шудааст.

Ашраф Ғанӣ гуфт, оташбаси якҷониба бо Толибон анҷом ёфт

Ашраф Ғанӣ, раиси ҷумҳури Афғонистон гуфт, ки оташбаси якҷониба бо Толибон ба поён расид ва барои баргузории амалиёти низомӣ ба нирӯҳои амниятиву дифоии ин кишвар иҷоза дод.

Ӯ рӯзи 30-уми июн дар як нишасти хабарӣ дар Кобул гуфт, ҳар вақте ки Толибон оташбас бихоҳанд, ҳукумат омода аст.

“Ҳар вақте ки Толибон оташбас мехоҳанд, ман ба ин омода ҳастам. Ва хатми ҷанг яке аз талабҳои мардум аст. Толибон метавонанд муҳлати оташбасро таъйин кунанд: Даҳ рӯз мехоҳанд ё як сол. Аммо агар ҳамла карданд ва ҳуҷум сурат гирифт, нерӯҳо ҷавоби сангин хоҳанд дод.”

Оташбаси муштараки ҳукумати Афғонистон ва Толибон се рӯз – аз 15 то 17-уми июн – дар рӯзҳои таҷлил аз иди Рамазон идома кард. Баъди он Толибон муҳлати оташбасро тамдид накарданд. Вале ҳукумати Афғонистон яктарафа муҳлати оташбасро барои даҳ рӯз дароз намуд.

Ашраф Ғанӣ дар нишасти рӯзи шанбе гуфт, оташбас дар рӯзҳои ид нишон дод, ки мардуми Афғонистон сулҳ мехоҳанд ва аз Толибон хост, ба талаби мардум посухи мусбат диҳанд.

Фағонӣ: "Эрон ҳеч гоҳ дар қиболи дӯстӣ бо Тоҷикистон тардид накардааст"

Ҳуҷҷатуллоҳ Фағонӣ

Ҳуҷҷатуллоҳ Фағонӣ, сафири Эрон дар Душанбе, кишварашро яке аз миёнҷигарони аслӣ ва кафилони сулҳи Тоҷикистон ном бурдааст.

Ӯ дар паёми бахшида ба ҷашни ваҳдати миллӣ ва имзои Созишномаи сулҳ, ки рӯзи 27-уми июн таҷлил шуд, гуфтааст, “нақши мусбати Эрон дар амалӣ шудани оштии миллии тоҷикон бар касе пӯшида нест. Ва борҳо дар тайи ду даҳаи гузашта мавриди тасдиқи мақомот ва бузургони Тоҷикистон қарор гирифтааст.”

Ӯ афзудааст, ҷониби Эрон бовар дорад, ки амнияту шукуфоии кунунии Тоҷикистон маҳсули ҳамон ваҳдати миллӣ ва ҳамдилист.

“Умедворем, ин кишвари ҳамкеш, ҳамзабон ва ҳамфарҳанг бо сарлавҳа қарор додан ва пайгирии ҷиддии усули тилоии ваҳдат ҳамчунон бо дасти рад задан ба синаи мунодиёни тафриқагароӣ, масири тавсеа ва суботро бидуни таваққуф бипаймояд”, - гуфтааст сафири Эрон.

Ҳуҷҷатуллоҳ Фағонӣ дар идома афзудааст, “Эрон ба унвони кишваре, ки лаҳзае дар қиболи дӯстӣ ва бародарӣ бо Тоҷикистон тардиду диранг нанамудааст, ваҳдатро ба манзалаи калиди муваффақият на танҳо барои мардуми тоҷик, балки тамоми ҳампайвандон ва хешовандони минтақавӣ ва мусулмонони ҷаҳон медонад.”

Паёми сафири Эрон дар ҳолест, ки Душанбеву Теҳрон тақрибан се сол боз давраи мушкили муносиботро паси сар мекунанд. Қаблан Душанбе Эронро барои ҳимоят ва сармоягузории ҳизби дар Тоҷикистон мамнӯи наҳзати исломӣ ва қатли афроди саршинос дар замони даргириҳои дохилӣ ва баъди он муттаҳам кардааст.

Робитаҳои Тоҷикистону Эрон баъд аз он сард шуд, ки Муҳиддин Кабирӣ, раиси ҳизби дар Тоҷикистон мамнӯи наҳзати исломӣ ба конфронси "Ваҳдати исломӣ" ба Теҳрон даъват шуд ва аз ҷумла бо Оятуллоҳ Алии Хоманаӣ, раҳбари олии Эрон гуфтӯгуи кӯтоҳе кард. Конфронс моҳи декабри соли 2015, се моҳ баъд аз мамнӯъ шудани ин ҳизб дар Тоҷикистон, баргузор шуд. Мақомоти Тоҷикистон Ҳизби наҳзат ва раҳбари он Муҳиддин Кабириро ба ташкили ошӯби моҳи сентябри соли 2015 муттаҳам медонанд.

Михаил Саакашвилӣ ба шаш соли зиндон маҳкум шуд

Михаил Саакашвилӣ, раиси ҷумҳури собиқи Гурҷистон

Додгоҳе дар Гурҷистон Михаил Саакашвилӣ, раиси ҷумҳури собиқи ин кишварро дар ғайбаш ба шаш соли зиндон маҳкум кард.

Бар асоси ҳукми додгоҳ, ки рӯзи 29-уми июн содир шуд, Саакашвилӣ ба суиистифода аз қудрат дар замони президентиаш айбдор шудааст.

Додгоҳ, инчунин, гуфтааст, ки ӯ талош карда буд, далелҳои марбут ба латту кӯби Валерий Гелашвили, намояндаи мухолифин дар порлумонро дар соли 2005 пинҳон кунад.

Михаил Саакашвилӣ, ки дар ҳоли ҳозир дар Ҳолланд зиндагӣ мекунад, ҳукмро рад карда ва онро дорои ангезаи сиёсӣ донистааст.

Саакашвилӣ аз соли 2004 то соли 2013 раиси ҷумҳури Гурҷистон буд.

ВАО: Трамп ба Макрон пешниҳод карда буд, ки аз ИА хориҷ шавад

Доналд Трамп ва Эммануэл Макрон ҳангоми мулоқот дар Кохи Сафед.

Президенти ИМА Доналд Трамп ба Эммануэл Макрон, президенти Фаронса, ба шарти берун бурдани кишвараш аз Иттиҳодияи Аврупо созиши тиҷоратӣ пешниҳод кардааст. Дар ин бора матбуоти амрикоӣ рӯзи 29-уми июн хабар дод.

Манбаи нашрияи Washington Post мегӯяд, 24-уми апрели имсол, ҳангоми мулоқоти ду раҳбар дар Кохи Сафед, Трамп эҳтимоли берун рафтани Фаронса аз Иттиҳоди Аврупоро матраҳ кард.

Президент гӯё дар иваз ба Макрон созиши тиҷоратӣ бо шароити беҳтар аз Иттиҳоди Аврупоро пешниҳод кардааст. Ин маълумотро манбаъҳои CNN низ тасдиқ мекунанд.

Кохи Сафед аз шарҳи ин хабар даст кашид, аммо ҳамзамон онро такзиб ҳам накард.

Маҷаллаи Newsweek ёдовар мешавад, ки Фаронса ва Олмон нерӯи пешбарандаи Иттиҳоди Аврупо номбар мешаванд. Президенти Фаронса борҳо ба ҳамоиш ва зарурати ислоҳот дар Иттиҳодияи Аврупо таъкид кардааст.

Қирғизистон санҷиши ширкатҳои тиҷоратиро то 2 сол манъ мекунад

Бинои ҳукумати Қирғизистон

Ҳукумати Қирғизистон тасмим дорад, ба ҳама навъи санҷиши субъектҳои соҳибкорӣ 2 сол моратория эълон кунад. Ҳамзамон дар ин муддат ҷаримаи тоҷирон манъ хоҳад шуд. Дар ин бора вазири иқтисод Олег Панкратов хабар дод.

Ба гуфтаи ӯ, нозир набояд камбуди тоҷиронро барои ҷарима ошкор кунад, балки ба онҳо барои бартараф кардани камбудӣ кумак расонад.

"Ба ин тартиб, соҳибкор ва нозири давлатӣ ҳавасманд мешаванд, ки ба камбудҳо роҳ надиҳанд", - гуфт вазир.

Муҳаммадқулӣ Абилғозиев, сарвазири Қирғизистон ҳам гуфт, ҳукумат тасмим дорад, робитаи тиҷорат ва мақомоти давлатиро қатъ кунад.

Пештар аз ин Сооронбой Ҷеенбеков, президенти Қирғизистон дастур дода буд, ки санҷишҳои беасоси тиҷорат лағв шавад.

Остона аз Маскав истирдоди тоҷир Ертаевро талаб дорад

Жомарт Ертаев

Додситонии кулли Қазоқистон хабар дод, ки ҳаққи истиқомати тоҷири қазоқ Жомарт Ертаев дар Русия бекор шуд.

Қазоқистон талош дорад, Ертаевро ба кишвар истирдод кунанд. Ӯ дар ватанаш Қазоқистон дар дуздии миллионҳо доллари Bank RBK гумонбар мешавад.

Додгоҳи ноҳияи Преснени шаҳри Москва рӯзи 14-уми июн ҳабси хонагии Ертаевро бо дархости Додситонии кулли Қазоқистон то 8-уми ноябр тамдид кард. Додситонӣ хабар медиҳад, ки дар Қазоқистон барои истирдоди ӯ "чораҷӯиҳо" идома дорад.

Жомарт Ертаеви 45-сола ибтидои моҳи май аз сӯи мақомоти қудратии Русия боздошт шуд. Қазоқистон Ертаевро расман ба "қаллобӣ" гунаҳкор мекунад.

Вазорати корҳои дохилии Қазоқистон хабар дод, ки Ертаев замони фаъолият ҳамчун мушовири раиси шӯрои мудирони Bank RBK, бо роҳи қаллобӣ бештар аз 80 миллион долларро ба яғмо бурдааст.

Аммо Жомарт Ертаев мегӯяд, ҳаргиз дар Bank RBK кор накардааст. Нашрияи "Коммерсант"-и Русия аз қавли Жомарт Ертаев навишт, ки таъқиби вай ангезаи сиёсӣ дорад.

Толибон фармондеҳи нерӯҳои вижаи пулисро дар Кобул куштанд

Мақоми баландпояи пулиси Афғонистон Азизуллоҳ Корвон шоми 28-уми июн аз тарафи Толибон кушта шуд. Ба гуфтаи масъулони Вазорати умури дохилии Афғонистон, ӯ дар ҳоле ҳадафи тири Толибон қарор гирифт, ки ҳамроҳ бо хонаводааш дар минтақаи Макрориёни Кобул "пикник" дошт.

Сухангӯи Вазорати корҳои дохилӣ Наҷиб Дониш рӯзи 29-уми июн гуфт, Корвон - фармондеҳи воҳиди нирӯҳои вижаи пулис дар шарқи вилояти Пактико - даҳҳо амалиёти низомиро алайҳи Толибон анҷом дода буд. Азизуллоҳ Корвон дар ин авохир аз чанд талоши сӯиқасд ҷон ба саломат бурд.

"Ӯ бо нирӯҳои вижаи Амрико дар Пактико ҳармкории наздик дошт", - гуфт Нодир Катавазӣ, намояндаи порлумон аз ин вилоят. Ба гуфтаи Катавазӣ, ҳалокати Корвон зарба ба мубориза алайҳи шӯришгарон дар шарқи Афғонистон аст.

Масъулияти ҳамларо Толибон тавассути сухангӯи худ Забеҳуллоҳ Муҷоҳид бар дӯш гирифт.

CNN: Трамп ба Путин муомилот пешниҳод мекунад

Мулоқоти Путин ва Трамп дар ҳошияи нишасти G-20 дар Оламон. Июли соли 2017

Президенти ИМА Доналд Трамп мехоҳад ба Владимир Путин муомилотеро пешниҳод кунад, ки ба хуруҷи нерӯҳои Амрико аз Сурия суръат мебахшад. Дар ин бора шабакаи телевизионии CNN рӯзи 28 июн бо такя ба манбаҳояш хабар дод.

Ба маълумоти CNN, пешниҳоди Трамп ба минтақҳои ҷанубу ғарби Сурия - ҳамммарз бо кишвари Урдун рабт дорад. Ба ақидаи президенти Амрико, бар пояи пешниҳоди ӯ Русия метавонад ба президент Башор Асад кӯмак кунад, ки қаламравҳои имтидоди марз бо Урдунро баргардонад. Дар иваз, Трамп аз Путин мехоҳад, ки шӯришгаронро маҳв накунад ва иҷозат диҳад, ки онҳо минтақаҳои дигар раванд. Ҳамсӯҳбатҳои шабакаи телевизионии CNN мегӯянд, президенти ИМА мехоҳад дар ҷанубу ғарби Сурия "манотиқи мамнуъ" бунёд кунад, то дастрасии Эрон ба минтақа қатъ шавад.

CNN мегӯяд, ҳатто дар ҳолати қабули ин пешниҳод Русия наметавонад иҷроиши онро кафолат диҳад.

Мулоқоти ду раҳбар ба 16 июл дар Ҳелсинкӣ барномарезӣ шудааст. Интизор меравад, ки дар ин мулоқот дурнамои равобити Русияву Амрико ва масоили байналмилалӣ матраҳ шавад.

Шӯро: "Раҳбарии якумрии Назарбоев конститутсионӣ аст"

Нурсултон Назарбоев

Шӯрои конститутсионии Қазоқистон лоиҳаи қонун дар бораи раҳбарии якумрии президент Нурсултон Назарбоев ба ин ниҳодро "конститусионӣ" унвон кард. Дар ин бора сомонаи Шӯрои конститутсионӣ рӯзи 28-уми июн хабар дод.

Шӯро мегӯяд, лоиҳаи қонунро баъд аз муроҷиати президенти Қазоқистон баррасӣ кард. Назарбоев хостааст, бисанҷанд, ки тағйироти воридкардаи порлумони Қазоқистон ба қонунгузорӣ мутобиқи Конститутсия ҳаст, ё не.

Сенати порлумони Қазоқистон 31-уми майи имсол лоиҳаи тағйиру иловаҳо ба қонуни мазкурро қабул карда буд. Бар пояи онҳо, мақоми Шӯрои амнияти миллии Қазоқистон аз як ниҳоди машваратӣ ба конститутсионӣ тағйир ёфт.

Ин қонун ба Назарбоев ҳамчун президенти нахустин ва соҳиби унвони “Пешвои миллат” иҷозат медиҳад, ки раиси якумрии Шӯрои амнияти миллии Қазоқистон бошад ва ҳамчунин бар пояи он, президенти нави ин кишвар дар назди раиси шӯро ҳисоботдиҳанда хоҳад буд.

Ҳамлагари Capital Gazette ба 5 куштори дараҷаи аввал муттаҳам шуд

Макони ҳамлаи мусаллаҳона ба идораи нашрия дар Мэриленд. 29-уми июни соли 2018

Марди 35-сола бо номи Ҷаред Рамос, ки рӯзи 28-уми июн дар ҳамла ба идораи нашрияи Capital Gazette, воқеъ дар Аннаполиси аёлати Мэриленд панҷ нафарро кушта ва як теъдоди дигарро захмӣ кард, ба панҷ куштори дараҷаи аввал муттаҳам шуд.

Гуфта мешавад, ин аз ҳама ҳамлаи пурқурбонӣ ба журналистон дар таърихи Иёлоти Муттаҳида буда, полис онро "ҳадафмандона" унвон кардааст. Capital Gazette қабл аз ин ҳамла дар шабакаҳои иҷтимоӣ пайғомҳои таҳдидомез мегирифт.

Яке аз кормандони Capital Gazette гуфт, ҳамлагар аз паси дари шишагӣ ба сӯи кормандони нашрия оташ кушод.

Дар ҳоли ҳозир, далели ҳамлаи ин марди 35-сола ба идораи нашрия мушаххас нест ва тафтишот идома дорад.

Ғарқ шудани ду сокини Душанбе дар канали Варзоб

Мақомоти ҳолатҳои фавқуллода ҷасади ду ҷавонписари сокини шаҳри Душанберо аз об берун оварданд. Ин ду ҷавон баъд аз зуҳри дирӯз дар канали обрасонӣ барои сокинони Душанбе маъруф ба "Дериватсиони", ки дар даромадгоҳи ноҳияи Варзоб воқеъ аст, ғарқ шудаанд.

Умеда Юсупова, сухангӯи Кумитаи ҳолатҳои фавқуллодаи Тоҷикистон мегӯяд, ҳодисаи ғарқ шудани ин ду ҷавон баъд аз зуҳри 28-уми июн рух дода, ҷасади онҳо субҳи имрӯз, пайдо гардид. Хонум Юсупова афзуд, ин ҷавонон, ки яке 24 ва дигаре 25 сол доштанд, дар макони мамнӯъ оббозӣ карданд.

Ду ҷавони ғарқшуда сокини маҳаллаи "Хуҷамбиёи поён"-и шаҳри Душанбе буда, дар назар аст имрӯз ҷасадашон ба хок супорида шавад.

Ҳар сол дар мавсими оббозӣ дар кӯлу дарёҳову каналҳо ва ҳавзҳои Тоҷикистон даҳҳо нафар ҳалок мешаванд. Бино ба омори расмии Кумитаи ҳолатҳои фавқулодаи Тоҷикистон, соли гузашта дар кишвар беш аз 100 нафар ғарқ шудаанд, ки нисфи онҳо афроди зери синни 15-сола будаанд.

Макон ва замони мулоқоти Трампу Путин мушаххас шуд

Владимир Путин ва Доналд Трамп, соли 2017 дар Ветнам.

Мулоқоти президентҳои Амрико ва Русия - Донад Трамп ва Владимир Путин рӯзи 16-уми июл дар Ҳелсинки - пойтахти Финландия баргузор мешавад. Дар ин бора Кремлин ва Кохи Сафед рӯзи 28-уми июн хабар доданд.

Дар Кремлин гуфтанд, ки раҳбарони ду давлат вазъи феълӣ ва дурнамои робитаҳои Русияву Амрико ва масоили байналмилалиро баррасӣ мекунанд.

Барномаи мулоқоти Трамп ва Путин рӯзи гузашта баъди сафари Ҷон Болтон, ёвари президенти Амрико дар умури масоили амнияти миллӣ ба Маскав, эълон шуд. Худи Трамп борҳо гуфтааст, ки мехоҳад бо Путин муносибати беҳтар барпо кунад ва Русияро ба ҳалли масоили байналмилалӣ ҷалб намояд.

Мулоқоти ҳарду раиси ҷумҳур баъди иштироки Трамп дар ҷаласаи НАТО (11-12 июл), сафари ӯ ба Бритониё (13 июл) ва ҳамчунин баъди анҷоми бозиҳои Ҷоми ҷаҳонӣ оид ба футбол дар Маскав, ки Путин дар он ширкат мекунад, багузор хоҳад шуд.

Гимназияи рақами 53-ро дар Душанбе вайрон мекунанд

Дар пойтахти Тоҷикистон тахриби гимназияи машҳури рақами 53 ба номи Муҳаббат Маҳмудова шурӯъ шуд. Қарор аст, дар ҷойи ин гимназия дар тӯли як соли оянда мактаби наве бунёд шавад.

Дар гузашта дар ин мактаб фарзандони мақомоти баландпоя, аз ҷумла писари бузурги президент Эмомалӣ Раҳмон таҳсил кардаанд. Ин мактаб, ки дар ҳамсоягии манзили раиси ҷумҳур воқеъ аст, ҳамеша маҳалли раъйдиҳии мақомоти баландпоя, аз ҷумла президент Раҳмон буд.

Ҳамакнун мақомот тасмим гирифтаанд, хонандагони гимназияи шумораи 53 муваққатан дар мактаби миёнаи шумораи 70 ҷой дода шаванд.

Муассисаи давлатии гимназияи рақами 53 аз шаш бинои чаҳорошёна бо таҳхона ва 50 синфхона, аз ҷумла 4 синфи компютерӣ, озмоишгоҳи физика ва кимиё иборат хоҳад шуд.

Қазоқистон гуфт, аз тирамоҳ ба Тоҷикистон бензин медиҳад

Қазоқистон қасд дорад, аз тирамоҳи имсол маҳсулоти нафтии худ, аз ҷумла бензинро ба Тоҷикистону Қирғизистон ва Узбекистон содирот кунад.

Ба навиштаи маҷаллаи "Власть"-и чопи Қазоқистон, имкони содироти ин навъи маводи сӯхт дар пайи афзоиши тавлиди он дар корхонаҳои коркарди нафти Қазоқистон ва манъи воридоти бензин аз Русия фароҳам шудааст.

Муовини раиси ширкати “КазМунайГаз” Дониёр Тиесов ба маҷалла гуфтааст, ки ҳар моҳ кишвараш метавонад ба кишварҳои ҳамсоя то 400 ҳазор тонна маводи нафтӣ содирот кунад.

“Соли оянда метавонем то 1,2 миллион тонна бензинро ба ин кишварҳо содирот кунем. Бо дарназардошти арзонии воридоти маҳсулот аз Қазоқистон нисбат ба Русия, мутмаинам дар ин кишварҳо муштарии зиёде хоҳем дошт”, - афзудааст Дониёр Тиесов.

Ин дар ҳолест, ки дар ду ҳафтаи охир қимати сӯзишворӣ дар Тоҷикистон ба таври бесобиқа боло рафта, феълан як литр бензини навъи АИ-92 то 8 сомонӣ қимат дорад.

Соҳибназарон мегӯянд, ки дар зудтарин фурсат арзиши як литр гази моеъ, ки аз он ҳудуди 80 дарсади мошинҳои Тоҷикистон истифода мекунанд, то ба 6 сомонӣ хоҳад расид.

Гурҷистон ҳарими ҳавоиро ба ҳавопаймоҳои Сурия баст

Фурудгоҳи байналмилалии Тбилиси

Гурҷистон ҳарими ҳавоияшро барои ширкатҳои ҳавонавардии Сурия масдуд кард. Ин қарор посух ба эътирофи истиқлоли ду ҷумҳурии мухтори Гурҷистон - Абхозистон ва Осетияи Ҷанубӣ аз тарафи Сурия буд.

Ба ин тартиб, ҳукумати Гурҷистон ду ширкати ҳавонавардии Сурияро, ки ба Русия парвоз анҷом медоданд, аз истифодаи ҳарими ҳавоияш маҳрум кард.

Ин тадбир барои Сурия дарднок буд, зеро хайтсайрро ба таври қобили мулоҳиза аз 30 дақиқа то 5 соат тӯлонӣ кард. Ба дунболи қатъи робитаҳои дипломатӣ бо Сурия, Гурҷистон Созмони байналмилалии авиатсияи гражданиро огоҳ кард, ки аз ин ба баъд аз хизматрасонӣ ба Syrian Air ва Sham Wings, ки ҳафтае ду дафъа ба шаҳрҳои Русия парвоз мекунанд, даст мекашад.

Тайи як ҳафтаи jхир ҳавопамоҳои Сурия маҷбур шудаанд бо парвоз дар фарози Баҳри Хазар ва соҳилҳои Озарбойҷон, вақти бештар сарф кунанд.

Туркманистон сафари шарҳвандони то 40-соларо ба хориҷ мамнӯъ кард

Терминали парвозҳои байналмилалии фурӯдгоҳи Ишқобод

Туркманистон барои сафарҳои хориҷии шарвандони то 40-сола маҳдудият ҷорӣ кард. Ба иттилои Бахши туркмании Радиои Озодӣ дар Дашоғуз минбаъд сокиноне, ки синашон аз 40 поин аст, ҳаққи сафар ба хориҷро надоранд.

"Дашоғузиҳо рӯзи 25 июн дар Хадамоти муҳоҷирати шаҳрӣ огаҳ шуданд, ки синни маҳдудияти сафар ба хориҷ аз 30 то ба 40 боло бурда шудааст", - изҳор дошт хабарнигори радио.

Як сокини ноҳияи Сафармурод Туркманбошӣ гуфт, барои гирифтани иҷозатнома ва дарёфти раводиди сайёҳӣ ба хадамоти муҳоҷирати маҳаллӣ муроҷиат кард, вале ҷавоби рад гирифт.

"Дар шарҳи қарори нав гуфтанд, ки дигар нирӯи корӣ дар вилоят намондааст. Мегӯянд, агар ҳамаи шумо биравед, дар инҷо кӣ кор мекунад", - изҳор дошт сокини 36-солаи ноҳияи мазкур.

Миёнаҳои моҳи апрел хабар дода шуд, ки мақомоти Туркманистон мехоҳанд шаҳрвандони то 30-сола бо шумули занҳоро аз сафар ба хориҷ маҳрум кунанд.

Ширкати "РусГидро" Қирғизистонро ба додгоҳи Гаага мекашонад

Ширкати РусГидро ГЭС дар Норин

Ширкати "РусГидро" Қирғизистонро огоҳ кард, ки дар робита ба бунёди силсила неругоҳҳои Норини боло ба додгоҳи Гаага даъво хоҳад бурд. Дар ин бора раиси "РусГидро" Николай Шулгинов хабар дод.

"Бо даъвати ҷониби Қирғизистон фардову пасфардо ҳайати мо барои идомаи гуфтугӯҳо сафар мекунад. Ҳарчанд мо натиҷаҳои мусбатро интизор надорем. Мо ҳамзамон бо гуфтугӯҳо барои ҳалли масъала дар додгоҳи Гаага омода мешавем", - гуфт Шулгинов.

Ҳукумати Қирғизистон мегӯяд, то кунун огоҳномаи "РусГидро"-ро дарёфт накардааст.

Соли 2012 ҳукуматҳои Русия ва Қирғизистон дар мавриди сохмони неругоҳи Қамбарота-1 ва силсиланеругоҳҳои Норини боло шартнома бастанд. Сохтмони ин ду неругоҳро ширкати русии "РусГидро" ба зима гирифт. Аммо баъди қатъи корҳои сохтмонӣ дар соли 2015 Қирғизистон шартномаро якҷониба бекор кард. Ба ин далел, ҷониби Русия даъво дорад, ки Қирғизистон бояд ба "РусГидро" 37 млн долар пардохт кунад.

Ёфтҳои бештар

Гузоришҳои видеоӣ

Кор аз дохили хона. Соҳибхоназанҳо ҳунари комютеру интернетро азхуд карданд
лутфан мунтазир бошед

### Феълан кор намекунад ###

0:00 0:02:24 0:00
XS
SM
MD
LG