Пайвандҳои дастрасӣ

Хабари нав

Хабарҳо

Даргирӣ бо эътирозгарон. Даҳҳо нафар боздошт шуд, бархе – захмӣ

Пулиси Украина болои як урдугоҳи эътирозгарон дар наздикии бинои порлумони он кишвар ҳамла бурд ва бо онҳо вориди даргирӣ шуд. Пулис мегӯяд, тақрибан панҷоҳ нафар аз эътирозгаронро боздошт кардааст.

Андрей Кришченко, сардори идораи пулиси пойтахти Украина, рӯзи 3-юми март ба хабарнигорон гуфт, “ҳамин ҳоло 39 нафарро боздошт кардем ва онҳо ба шуъбаи маҳаллии пулис бурда шуданд. Ду мардро хадамоти “Ёрии таъҷилӣ” ба бемористон бурд”.

Бино ба гузоришҳо, дар даргирӣ миёни пулиси Украина ва эътирозгарон дар Киев шаш муътариз ва чаҳор пулис низ захмӣ шудаанд.

Гуруҳе аз эътирозгарон дар Киев моҳи октябри соли гузашта урдугоҳеро дар наздикии порлумони ин кишвар эҷод карда, хостори поён додан ба масунияти порлумонӣ шуданд.

Пулиси Укриана гуфтааст, аз назди эътирозгарон норинҷак ва миқдори дигари аслиҳа ёфт шуд. Музокироти миёни эътирозгарон ва мақомҳои давлатии Украина дар моҳи феврали имсол бенатиҷа анҷом ёфт.

Покистон 52 сенатори нав интихоб мекунад

Покистон рӯзи шанбе сенаторҳои нав интихоб мекунад. Қонунгузорони покистонӣ дар чаҳор порлумони аёлатӣ – дар Панҷоб, Синд, Хайбар Пахтунва, Балуҷистон – ва ҳамчунон дар порлумони марказии он кишвар барои интихоби 52 сенатор раъй медиҳанд.

130 нафар барои интихоб дар Маҷлиси Сенати Покистон номзад ҳастанд.

Интихоботи Маҷлиси Сенати Покистон як чолиш барои ҳизби Навоз Шариф, нахуствазири пешини ин кишвар хоҳад буд. Кумисюни мустақили интихобот номзадии Шарифро ба унвони раҳбари ҳизби Лигаи мусалмонҳо рад кард.

Додгоҳи олии Покистон моҳи июли соли гузашта Навоз Шарифро ба хотири даст доштан дар фасоди идорӣ аз мақоми нахуствазир радди салоҳият намуд.

Рӯзимуродовро пеш аз муҳлат аз зиндони Узбекистон озод карданд

Акс аз бойгонӣ

Юсуф Рӯзимуродов, журналист ва фаъоли ҳизби мухолифи Эрк”, пеш аз муҳлат аз зиндон озод. Рӯзимуродови 54-соларо нуздаҳ сол боз дар яке аз маҳбасҳои Чирчиқи Узбекистон нигоҳ медоштанд.

Қарори озодии Юсуф Рӯзимуродов моҳи феврали имсол содир шудааст. Исмоил Одилов, ҳомии ҳуқуқи инсон дар Тошканд, дар суҳбат бо Радиои Озодӣ гуфт, “журналист Рӯзимуродов, ки соли 1999 зиндонӣ шуда буд, пеш аз муҳдат аз зиндон раҳо шуд. Ба қавли наздиконаш, феълан ӯ худро хуб эҳсос мекунад.”

Юсуф Рӯзимуродов пас аз таркиши 16-уми феврали соли 1999 дар Тошканд боздошт ва бар асоси чаҳор банди қонуни ҷиноии Узбекистон зиндонӣ шуд. Додгоҳи вилояти Тошканд дар аввал ӯро ба 15 соли зиндон маҳкум кард ва сипас бо изофаи айбҳои дигар муҳлати зиндонашро дароз намуд.

Хоҳари калонии Шабнами Сурайё дучори садама шуд

Сурайёи Қосим бо духтараш Рӯзигул. Акс аз ҳафтаномаи "СССР"

Рӯзигул, духтари калонии Сурайёи Қосим ва хоҳари бузурги Шабнами Сурайё, дар садамае аз пояш ҷароҳат бардошта, дар бемористон табобат мегирад. Наздикони Рӯзигул гуфтанд, ки ин ҳодиса баъд аз зуҳри 2-юми март дар чорроҳаи миёни Вазорати умури дохилӣ ва Вазорати тандурустӣ рух дод.

Рӯзи ҷумъа сарусадо дар бораи гӯё дар ҳолати беҳушӣ дар бемористон будани Шабнами Сурайё ба чархиш даромад. Чанде аз корбарони Радиои Озодӣ низ тавассути шабакаҳои иҷтимоӣ пурсиданд, ки ин хабар то куҷо дуруст аст.

Қаблан Шабнами Сурайё эълон карда буд, ки барои иштирок дар барномаҳои наврӯзии телевизиони GEM дар Туркия қарор дорад. Рӯзигул низ рӯзи 3-юми март дар суҳбат бо ҳафтаномаи «СССР» гуфтааст, ки хоҳараш дар Туркия аст ва ҳеч садамае накардааст.

Рӯзигул гуфтааст, ӯ дучори садама шуд ва пояшро «гипс» карданд. «Ҳоло вазъам хуб аст», - афзудааст ӯ.

Ӯ нақл кардааст, ки «таксии «0550» фармоиш дода, аз хона поин шудам. Ҳангоми гузаштан аз чорроҳаи назди Вазорати тандурустиву бинои ВКД таксӣ истод. Зеро «светофор» сурх буд. Чун сабз шуд, гузаштем. Вале ин ҳангом як мошини тамғаи «Нексӣ» бо суръати баланд чароғаки роҳро дар ранги сурх гузашта, омада ба таксии мо зад. Ба назарам омад, ки чанд бор чарх зада, ахиран сарам ба дари салон заду ҳушам рафт.»

Сурайёи Қосим, овозхони маъруфи тоҷик соҳиби се духтар – Рӯзигул, Шабнами Сурайё ва Фарзонаи Хуршед аст. Ба фарқ аз духтарони дигараш Рӯзигул касби овозхониро интихоб накардааст. Ягона писари ӯ Эмомалиҷони Хуршед соли 2017 даргузашт.

Ҷанги нав миёни Русияву Украина. Аврупо ба музокирот хонд

Иттиҳоди Аврупо гуфт, ки барои ҳалли низои нави газӣ миёни Русия ва Украина миёнравӣ хоҳад кард. Марос Сефкович, муовини раиси Кумисюни Аврупо гуфт, вазирони энержии Русия ва Украина сари гуфтугӯ менишинанд.

Сухангӯи вай рӯзи 2-юми март дар Брюссел ба хабарнигорон гуфт, вазири умури хориҷии Украина тақозо кардааст, то Сефкович барои оғози музокирот ҳамкорӣ кунад.

Ширкати давлати Газпроми Русия рӯзи панҷшанбе эълон кард, ки содироти газро ба Украина аз сар намегирад. Ин эълон боис шуд, Украиана дар ин сармои шадиди зимистон интиқоли газро ба хонаҳои мардум коҳиш диҳад.

Мактабу донишгоҳҳои бисёре дар Украина баста шудаанд ва таниши миёни Киев ва Маскав як бори дигар афзоиш ёфт. Нахуствазири Украина дар суханронии телевизионӣ рӯзи ҷумъа гуфт, бо ширкати давлатии гази Лаҳистон як қарордоди фаврӣ мебанданд ва интиқоли газ ба хонаҳои мардум дубора одӣ хоҳад шуд.

Тарҷума ва нашри чанд шеъри Лоиқ Шералӣ дар Узбекистон

Лоиқ Шералӣ

Чанд шеъри Лоиқ Шералӣ, шоири маъруфи тоҷик, ба забони узбекӣ тарҷума ва дар шаҳри Тошканд нашр шудааст. Дар Иттиҳоди нависандагони Тоҷикистон рӯзи 3-юми март гуфтанд, ки дар як маҷмӯи дастҷамъӣ намунаи ашъори Ашӯр Сафар, Низом Қосим ва Рустами Ваҳҳоб низ нашр гардид.

“Баҳори дӯстиву бародарии тоҷикону узбекон ҳамеша сабзу хуррам хоҳад монд”, - таъкид шудааст дар иттилоияи расмии Иттиҳоди адибони тоҷик.

Масъулони ин иттиҳоди эҷодӣ гуфтаанд, таваҷҷуҳи Маркази тарҷумаи Иттифоқи нависандагон ба тарҷумаву нашри осори адибони тоҷик ба забони узбекӣ низ “далели меҳру муҳаббатамон ба мардуми кишвари дӯст мебошад”. Ба қавли онҳо, то кунун ин марказ намунаи осори адибони тоҷикро беш аз ҳар забони дигаре ба забони узбекӣ тарҷума кардааст.

Тоҷикистону Узбекистон тайи тақрибан бист сол муносибати хубе надоштанд. Баъди ба қудрат расидани Шавкат Мирзиёев дар соли 2016 дар Узбекистон, яхи муносибатҳо то ҳадде об шуд ва ду кишвар ба ифтитоҳи гузаргоҳҳои то ин дам баста, баргузории рӯзҳои фарҳангу парвози ҳавопаймоҳо ва убури қаторҳо аз марзи якдигар оғоз карданд.

Қатли домод ба дасти падарарӯс дар Панҷакент

Панҷакент. Акс аз бойгонист

Як сокини шаҳри Панҷакент бо иттиҳоми қатли домодаш боздошт шудааст. Мақомоти умури дохилӣ гуфтанд, ки ин ҳодиса рӯзи 1-уми март дар деҳаи Сӯфиён рух дода, ҷасадро дар роҳи мошингарди “Айнӣ – Панҷакент” ёфтаанд.

Дафтари матбуоти Вазорати корҳои дохилии Тоҷикистон рӯзи 3-юми март гуфт, дар гардани мавриди фавтида чанд ҷароҳатро дидаанд. “Ҳангоми чораҳои фаврӣ-ҷустуҷӯӣ аз ҷониби кормандони милиса бо изи гарм падарарӯси марҳум дастгир карда шуд”, - гуфтанд дар ВКД.

Тафтишти ибтидоӣ маълум кардааст, ки сокини боздоштшудаи шаҳри Панҷакент дар ҳолати мастӣ ба гардани домодаш бо корд задааст. Тафтишот мегӯяд, гӯё ӯ ба домодаш хусумати шахсӣ дошт. Аммо дар бораи баҳси миёни онҳо тафсилот дода нашудааст. Инчунин ному насбаи онҳоро ошкор накардаанд.

Дар робита ба ин ҳодиса парвандаи ҷиноӣ боз шуда, тафтишот идома дорад. Тайи моҳҳои охир чанд ҳодисаи қатли сокинон ба дасти наздиконашон, аз ҷумла куштори падар ба дасти писар сабт шудааст.

Нигаронии НАТО, Трамп ва Меркел аз изҳороти Путин дар бораи силоҳҳои нав

Доналд Трамп, Ангела Меркел ва Эммануэл Макрон дар саммити НАТО

НАТО, садри аъзами Олмон Ангела Меркел ва президенти ИМА Доналд Трамп, аз эълони президенти Русия Владимир Путин, дар заминаи истиқрор ва тавлиди маҷмӯи силоҳҳои тавонманди ҳастаӣ, изҳори нигаронӣ карданд.

Рӯзи гузашта Путин дар паёми солонааш ба палатаи болоии порлумони Русия, аз тавлиди мушакҳои наве тавсиф кард, ки метаовнанд ба ҳар гӯшаи дунё зарба зананд ва сохтори дифои мушакии ИМА наметавонад онҳоро хунсо кунад.

Меркел ва Трамп рӯзи 2 март дар сӯҳбати телефонӣ гуфтанд, ки ин силоҳҳо ба "талошҳои байналмилалии назорати силоҳ" таъсири бад мегузоранд.

Ҳушдоре, ки Путин дар ҷараёни суханрониаш ба шарикони НАТО дод, "ғайриқобили қабул ва ғайри созанда буд",- гуфт сухангӯи НАТО Оана Лунгенску дар як изҳорот, ки онро хабаргузории Reuters иқтибос кард. "Мо хостори Ҷанги Сарди ҷадид ва сабқати силоҳ нестем",- гуфт ӯ ва афзӯд, ки ҳадафи сохтори дифоӣ, ки НАТО дар Аврупо бунёд кардааст, Русия нест.

Порлумони Арманистон Армен Саркисиянро президент интихоб кард

Армен Саркисиян ва Серж Саркисиян

Порлумони Арманистон рӯзи 2 март Армен Саркисиянро президенти навбатии кишвар интихоб кард.

Навад қонунгузор ба тарафдории Саркисияни 64-сола - нахуствазири собиқ ва сафири феълии Арманистон дар Британия овоз доданд. Даҳ нафар ба номзадии ӯ мухолифат кард.Саркисиян дар мақоми президентӣ Серж Саркисиянро иваз мекунад, ки ба гуфтаи мухолифин акнун нахуствазир мешавад ва ҳарду ҳукумат мекунанд.

Серж Саркисиян дар интихоб шудани президенти навбати рабте надорад. Армен Саркисиянро ҳизби ҳокими Республика рӯзи 19 январ ба мақоми президентӣ пешбарӣ кард.

Баъди референдуми соли 2015 Арманистон сохтори ҳукуматро аз нима президентӣ ба ҷумҳурии порлумонӣ табдил кард.

Дар натиҷа саплоҳияи президент коҳиш ёфт ва прездент дигар на дар интихоботи мустақим, балки ҳар ҳафт сол дар порлумон интихоб мешавад.

Мақомоти Узбекистон боз як додситонро боздошт карданд

Вазорати умури дохилии Узбекистон мегӯяд, алайҳи муовини пешини додситони шаҳри Тошканд оид ба мубориза бо коррупсия ва ҷиноятҳои иқтисодӣ, мушовири калони адлия Мираглам Мирзоеви 68-сола, мулаққаб ба "Антибиотик" парвандаи ҷиноӣ боз кардааст.

Як манбаъ дар ВКД Узбекистон гуфт, дар доираи ин парванда писару ҳамсари Мирзоев -- Абдурашид Мирзоев, сардори пешини шуъбаи мубориза бо терроризму ҷиноятҳои муташаккили Хадамоти амнияти Тошканд ва Муҳаббат Ҳасанова, раҳбари Коллегияи адвокатҳои ноҳияи Юнусобод ҳам дастгир шудаанд.

Ба гуфтаи ӯ, Мирзоев ва ҳамсару писараш дар доираи парвандае боздошт гаштанд, ки зидди додситони кулли пешини Ӯзбекистон Рашид Қодиров боз шудааст. Худи Қодиров 22 феврал дастгир шуда буд.

Дар доираи парвандаи Қодиров ҳамчунин Улуғбек Суннатов, муовини пешини додситони кул ва Ҷамшед Файзов, собиқ мушовири президенти пешини Узбекистон Ислом Каримов дастгир шудаанд.

Мирзоеви калонӣ то чанде пеш яке аз шахсиятҳои бонуфуз дар мақомоти додситонии Узбекистон ҳисоб мешуд. Ӯ баъд аз танқидҳои президенти Узбекистон Шавкат Мирзиёев дар ҷаласаи 9 феврал аз мақомаш барканор шуда буд.

ИМА интиқоли маҷмааи мушакии Javelin ба Украинаро тасдиқ кард

Акси тасвирӣ

Департаменти давлатии ИМА интиқоли маҷмааи зиддимушакии Javelin-ба Украинаро тасдиқ кард. Ин маҷмаа 47 миллион доллар арзиш дорад. Дар ин бора хабаргузории Reuters рӯзи панҷшанбе бо такя ба манбаҳои Пентагон гузориш дод.

Дар маҷмуъ, ба Украина 210 маҷмааи низомӣ фиристода хоҳад шуд. Дар изҳороти мақомоти мудофиаи амрикоӣ омадааст, " Javelin ба Украина кумак мекунад, ки истиқлолият ва тамомияти арзиашро ҳифз намояд". ИМА бар ин назар аст, ки фиристодани маҷмааи Javelin ба Украина тавозуни низомиро дар минтақа ба ҳам нахоҳад зад.

Моҳи декабри соли 2017 ҳукумати президент Доналд Трамп интиқоли бахши аввали аслиҳаи мудофиавӣ ба артиши Украина тасдиқ карда буд. Он замон гуфта шуд, ки Трамп тасмим дорад, интиқоли маҷмааи Javelin-ро низ тасдиқ кунад.

Ҳукумати пешини Амрико бо роҳбарии президент Барак Обама ҳарчанд дар низоъи байни Русия ва Украина аз Киев ҳимоят мекард ва зидди Москва таҳрим низ ҷорӣ карда буд, вале аз интиқоли аслиҳа ба артиши Украина худдорӣ меварзид.

Владимир Путин, президенти Русия пештар гуфт, интиқоли силоҳ ба Украина "вазъи Донбассро тағйир нахоҳад дод". Вале Путин гуфта буд, ки ҷудоихоҳони рӯ ба Русия метавонанд "ба минтақаҳои дигари низоъ" силоҳ интиқол диҳанд. Ӯ шарҳ надод, ки чиро дар назар дорад.

Раҳбари Олии Эрон Башор Асадро "намунаи олии муқовимат" номид

Раҳбари Олии Эрон Оятулло Алӣ Хоманеӣ ва президенти Сурия Башор Асад

Раҳбари Олии Эрон Оятулло Алӣ Хоманеӣ, рӯзи 1 март аз президенти Сурия Башор Асад ситоиш кард ва гуфт, ки сарфи назар аз хашми байналмилалӣ дар робита ба марги аҳолии мулкӣ дар Ғутаи Шарқӣ, Теҳрон аз Асад пуштибонӣ хоҳад кард.

Изҳороти Хоманеӣ дар ҳоле пахш шуд, ки Иттиҳоди Аврупо аз Эрон ва Русия даъват кард, ба Асад фишор биёранд то оташабасро риоя ва аз идомаи ҳамла ба Ғутаи Шарқӣ, ки то ҳол беш аз 500 нафарро қурбон кардааст, худдорӣ кунад. "Эрон ҳамчунин аз режими Сурия ҳимоят хоҳад кард",- гуфт раҳбари Олии Эрон Оятулло Алӣ Хоманеӣ дар сомонаи расмиаш. "Сурия дар хати ҷанг қарор дорад ва вазифаи мо аст, ки аз сокинонаш ҳимоя кунем",- афзӯд Хоманеӣ.

Раҳбари Олии Эрон Башор Асадро " намунаи олии муқовимат ва мубориза" номид, ки ба гуфтаи Хоманеӣ "ҳеҷ гоҳ тардид нашуд ва қавӣ истод".

Рӯзи 24 феврал Шӯрои амнияти Созмони Милали Муттаҳид қатъномаи оташбаси 30-рӯза дар Ғутаро қабул кард. Аммо сарфи назар аз ин, хушунатҳо дар ин минтақаи воқеъ дар канораҳои Димиқ идома дорад.

Русия рӯзи 26 феврал барои ироаи кӯмакҳои башардӯстона ба Ғутаи Шарқӣ "оташбаси панҷсота ва "долони амниятӣ" эълон кард. Аммо Созмони Милали Муттаҳид мегӯяд, ки панҷ соат барои расонидани кӯмак кифоя нест.

Президент Путин оғози ҷанги сарди навро рад кард

Владимир Путин

Раиси ҷумҳури Русия Владимир Путин, ки дирӯз аз бунёди силоҳҳои навтарини бенамуна хабар дод, дар сӯҳбат бо шабакаи телевизионии NBC назари таҳлилгарон дар борои оғози ҷанги сарди ҷадидро "таблиғот" номид. Путин ҳамзамон гуфт, ин ҷанг ҳанӯз соли 2002, замоне шурӯъ шуд, ки Амрико аз созишномаи сохтори муҳофизати зиддимушакӣ канор рафт.

Сӯҳбаи вежаи Путин бо шабакаи телевизиони Амрико, баъди паёми солонаи ӯ ба палатаи болоии порлумони Русия сурат гирифт. Қариб нисфи ин паём ба ситоиши тақвияти низомии Русия бахшида шуд. Паёми президент ҳамзамон бо пахши наворҳои видеоӣ ҷараён гирифт, ки силоҳҳои нави Русияро намоиш медод. Баъдан маълум, ки ин наворҳо 11 сол пеш дар барномаи "Ударная сила"-и шабакаи аввали телеваизиони Русия истифода шуданд.

Путин гуфт, ки ба наздикӣ мушакҳои ҳастаии навтарин ба таслиҳоти Русия ворид мешаванд, ки сохтори дифоии зиддимушакии Амрико ба он корагар нест.

Ба думболи изҳороти президент Владимир Путин дар бораи тақвияти силоҳи ҳастаии Русия, Пентагон гуфт, ки ин изҳорот барои онҳо "ғайричашмдошт" набуд . "Амрикоиҳо бояд нигарон набошанд. Мо комилан омодаем", - гуфт намояндаи Пентагон Дана Вайт рӯзи 1 март.

Бердимуҳаммадов дар 8 март ба занҳо 11-долларӣ тақдим мекунад

Занҳои вилояти Аҳали Туркманистон

Туҳфаи идонаи президенти Туркманистон Қурбонгулӣ Бердимуҳаммадов ба занҳои кишвараш дар Рӯзи байналмилалии занҳо соли ҷорӣ аз 40 манат, муодили 11,4 доллар, иборат хоҳад буд.

Президент Бердимуҳаммадов дар ин бора рӯзи 28 феврал фармон имзо кард.

Ба навиштаи расонаҳои маҳаллӣ, туҳфа ба занҳое, ки дар муассисаҳо, созмонҳо ва корхонаҳо фаъолият мекунанд, тақдим мешавад. Бознишастаҳо, донишҷӯён, хонандагони мактаб ва боғча низ аз президент тӯҳфа дарёфт мекунанд.

Президенти Туркманистон ба занҳои кишвар дар рӯзи иди онҳоҷйоиза пулӣ медиҳад. Ин маросимро маъмулан аз тариқи телевизиони давлатӣ намоиш медиҳанд.

Ҳалокати шаш муҳоҷири Узбекистон дар роҳ ба сӯи Русия

Сухтор дар автобусе, ки муҳоҷирони Узбакистонро ба Русия мебурд

Дар натиҷаи садамаи нақлиётии рӯзи 1 март дар ҳудуди вилояти Мангистауи Қазоқистон шаш шаҳрванди Узбекистон кушта шуд.

Ба иттилои вазорати ҳолатҳои фавқулоддаи Узбекистон, бархурди мошини сабукрав бо мошини борбар субҳи 1 март рух дод.

Мақомоти Қазоқистон мегӯянд, ҳамаи 7 мусофири мошини сабукрав ҳалок шуд.

Шаш тан аз ҳалокшудаҳо шаҳрвандони Узбекистон буданд, хабар медиҳад вазорати ҳолатҳои фавқулоддаи ин кишвар.

Пулис бо моддаи "Вайрон кардани қоидаҳои ҳаракати роҳ" парванда боз кард.

Дар давоми ду моҳи ахир теъдоде аз шаҳрвандони Узбекистон дар пайи садамаҳои нақлиётӣ дар ҳудуди Қазоқистон ба ҳалокат расид.

Сӯхтор дар пойтахти Озарбойҷон 24 нафарро қурбон кард. ВИДЕО

Бар асари сӯҳтор дар Маркази эҳёгарии нашъамандон пойтахти Озарбойҷон - Боку, 24 нафар ҳалок шуд.

Вазорати тандурустии Озарбойҷон гуфт, ки се нафари дигар бо ҷароҳатҳои номушаххас ба бемористон интиқол ёфт. Мақомот теъдоди наҷотёфтаҳоро 34 нафар мегӯянд.

Дар бораи сабаби аслии сӯхтор калимаи мушаххасе истифода нашудааст, вале Додситонии кулл, вазорати беҳдошт ва Вазорати дохилӣ ҳодисаро дар изҳороти худ ,халал дар кори ноқилҳо, унвон карданд.

Ҳодиса субҳи барвақти рӯзи 2-юми март рух додааст. Вазорати ҳолатҳои изтирории Озарбойҷон мегӯяд, ки оташ хомуш карда шуд ва ҷузъиёти бештари ҳодиса дертар эълон мешавад. Мақомоти баландпоя, аз ҷумла вазири ҳолатҳои изтирорӣ Камолиддин Ҳайдаров, вазири корҳои дохилӣ Рамил Усубов ва ноиби нахуствазир Алӣ Ҳусейнов ба ҷойи ҳодиса рафтанд.

Сӯхтор дар диспансери мӯътодони маводи мухаддир ҷони даҳҳо нафарро гирифт
лутфан мунтазир бошед

Феълан кор намекунад

0:00 0:01:01 0:00

Созмони ҳуқуқи башар: Интерпол “Red Notice”-ро аз номи Кабирӣ бардошт

Як созмони ҳомии ҳуқуқи инсон гуфт, ҳафтаи гузашта Интерпол номи Муҳиддин Кабирӣ, раиси ҳизби дар Тоҷикистон мамнӯи наҳзати исломиро аз феҳристи афроде, ки шадидан ҷустуҷӯ мешаванд, берун кардааст.

Масъулони созмони Defending the Human Right to a Fair Trial, ки дар Белгияву Лондон қароргоҳ дорад, 28-уми феврал гуфтанд, "беш аз як сол зарур шуд, то “огоҳии сурх” (Red Notice) аз номи Муҳиддин Кабирӣ бардошта шавад.

Онҳо дар вебсайти расмии худ гуфтанд, Интерпол "ба суистифодаи Тоҷикистон аз системаи Red Notice посухи рад дод" ва Кабириро "ба ҳайси паноҳандаи сиёсӣ эътироф кард".

Номи Муҳиддин Кабирӣ соли 2016 вориди листи Интерпол шуда, чанд муддат дар вебсайти пулиси байналмилалӣ ҳам қарор дошт, аммо баъди чанде аз онҷо ғайб зад.

Бо ин вуҷуд, мақомоти Тоҷикистон мегӯянд, ҷустуҷӯи байналмилалии Муҳиддин Кабирӣ поён наёфтааст. Аввали соли равон Додгоҳи олии Тоҷикистон ба муҳокимаи парвандаи ӯ дар ғайбаш шурӯъ кард.

Муҳиддин Кабирӣ, ки дар гузашта мақомоти тоҷик ӯро барои даст доштан дар ошӯби Ҳоҷӣ Ҳалим муттаҳам карда буданд, аз моҳи марти соли 2015 ба ин тараф дар хориҷ қарор дорад. Кабирии 53-сола соли 2006 дар пайи даргузашти Саид Абдуллоҳи Нурӣ ба раҳбарии ҳизби наҳзати исломӣ расид. Вай ду дафъа вакили Маҷлиси Намояндагони Тоҷикистон низ буд.

Як ҷуфти солманди покистонӣ аз ҷангҳои Ғута ҷон ба саломат бурд

Зану шарвҳари покистонӣ аз ҷангҳои Ғута ҷон ба саломат бурданд. 1 март, 2018

Як зану шавҳари солманди покистонитабор, ба думболи оташбаси авоили ҳафтаи Русия ва эҷоди долони хайрия, аз Ғутаи шарқии Сурия берун оварда шуд.

Хабаргузории наздик ба шӯришгарони ҷиноҳи "Ҷайш ал-Ислом" - Кумаит, рӯзи 28 феврал акси ин ду нафарро нашр кард, ки зоҳиран дар назди мошини Ҳилоли аҳмари Сурия нишастаанд ва дар даст сандаҳои Покистонро доранд.

Хабаргузории France Press мугӯяд, ки Муҳаммад Фадҳал Акрами 73-сола ва ҳамсари 62- солаи ӯ Сағран Бибӣ, аз шаҳри Думои воқеъ дар канораҳои Димишқ беун омаданд. Ду писар, се духтар ва 12 набераи онҳо дар шаҳр монд.

Шабакаи телевизионии Ал-Арабияи Саудӣ мегӯяд, ки ин ҷуфт беш аз 40 сол дар Сурия зиндагӣ кардааст.

Нозирони ҳуқуқи башари Сурия мегӯянд, аз замони эълони оташбас ва "долони башардӯстона" ин ҷуфт, аз 400,000 сокини Ғутаи Шарқӣ ягона нафароне ҳастанд, ки тавонистанд хориҷ шаванд. Ба гуфтаи гурӯҳи нозири ҷанги ҳафтсолаи шаҳрвандӣ дар Сурия, раҳоии ин ду нафар баъди моҳҳо гуфтушуниди сафорати Покистон дар Сурия имконпазир шуд.

Ҷанги шир дар байни Маскаву Минск. Лукашенко иқдоми ҷавобӣ ваъда кард

Президенти Беларусяи Александр Лукашенко

Раиси ҷумҳури Беларусия ҳушдор дод, ки қарори Маскав, дар заминаи манъи содироти маҳсулоти ширии ин кишвар ба Русияро беҷавоб намегузорад. Дар ин бора хабаргузории расмии БЕЛТА рӯзи 1 март гузориш дод.

Ба гуфтаи Лукашенко, ӯ маълумот дорад, ки Русия аз Зеландияи Нав шири хушк ворид кард ва бинобар пур шудани бозор шири Беларусия "нодаркор" шуд. Луашенко таъкид кард, ки дигар чунин рафторри Русияро таҳаммул намекунад.

Сар аз 26 феврал содироти ҳамагуна маҳсулоти ширии Беларусия ба қаламрави Русия манъ шуд. Росселхознадзор ин қарорро ба риоя накардани талаботи беҳдоштӣ аз тарафи Белорусия марбут кард.

Путин гуфт, ки Русия мушаки шикастнопазир дорад

Владимир Путин ҳангоми ироаи паёми солона

Раиси ҷумҳури Русия Владимир Путин, рӯзи 1 март дар паёми солонааш ба палатаи болоии порлумон, аз пешрафтҳои низомии кишвараш ситоиш кард ва гуфт, ки баъди берун шудани ИМА аз созишномаи АВМ, Русия ба рушди таслиҳоти стратегии ҳастаияш тамаркуз кардааст ва мушакҳои байниқоравиро тавсеа медиҳад.

Путин ҳамчунин аз озмоиши ҷадиди силоҳи ҳастаӣ гузориш дод ва иддао кард, ки ин силоҳ дар баробари душман шикастнопазир аст.

Ҳангоми изҳороти Путин дар бораи силоҳи нави ҳастаӣ, навои компютерии 11 соли пеш намоиш дода шуд. Ин навор бо мушаки байниқоравии "Сатана" 25 сентябри соли 2007 дар барномаи "Ударная сила"- и шабакаи аввали Русия намоиш дода шуд.

Дар суханронии Путин ин навор ҳамчун намоиши маҷмаи мушакии нав, бо мушаки вазнини байниқоравӣ, истифода шуд.

Путин ҳамчунин гуфт, Росия ба зудӣ мушакҳои ҳастаии навтаринро, ки сохтори зиддимушакии Амрикоро бартараф мекунанд, ба таслиҳоташ ворид мекунад.

Масоили низомӣ қариб нисфи суханронии президенти Русияро фаро гирифт.

Раиси ҷумҳури Русия гуфт, амалиёти Сурия тавонмандии низомии кишварашро ба намоиш гузошт. Ӯ афзӯд, ки дар 17 соли ахир Русия беш аз 300 системаи ҷадидро мавриди истфодаи низомӣ қарор дод.

Бахши дигари суханронии президент ба барномаи рушди Русия то соли 2024, дақиқ ба замоне бахшида шуд, ки салоҳияти президент ба поён мерасад. Ин президентро шаҳрвандони Русия ҳамин моҳ интихоб мекунанд.

Путин аз ҷумла дастур дод, ки маҷмуи махсулоти дохилӣ якуним баробар афзоиш ёбад ва Русия ба клуби кишварҳое "80+"дохил шавад, ки ҳисоби миёнаи умри мардуми онҳо баланд аст.

Толибон ба даъвати Ғанӣ барои сулҳ бархурди сард нишон дод

Ҷангиёни Толибон

Толибон ба даъвати президенти Афғонистон Ашраф Ғанӣ, ки ба ин гурӯҳ ба ивази сулҳу созиш эътирофи сиёсӣ, шиноснома, дафтари намояндагӣ ва имтиёзҳои дигарро ваъда дод, бархурди сард нишон доданд. Ин даъват рӯзи гузашта дар конфронси "Раванди Кобул" садо дод ва намояндагони беш аз 20 кишвар аз он пуштибонӣ карданд.

Толибон, ки ба ин нишаст даъватӣ набуданд, ба суханони Ғанӣ дафъатан вокуниш накарданд. Як мақоми Толибон ба шарти ошкор нашудани номаш ба хабаргузории Reuters гуфт, ки Раҳбарияти Толибон пешниҳодҳои Ғаниро меомӯзанд.

Аммо хабаргузории dpa шоми 28 феврал аз пахши изҳороте дар сомонаи Толибон гузориш дод ва гуфт, ки Толибон аз ба пешниҳодҳои Ғанӣ истиқболи гарм нишон надод. Дар изҳорот омадааст, "шубҳа нест, ки суханронии Ғанӣ олӣ буд", аммо ба гуфтаи dpa, ин гурӯҳ мегӯяд, Ғанӣ нукоти муҳимро сарфи назар кард.

Толибон дар ин изҳорот гуфтаанд, ки сабаби аслии идомаи ҷанг дар Афғонистон ҳузури "нерӯҳои таҷовугари хориҷӣ" аст ва то ин неруҳо аз Афғонистон берун нашаванд, музокирот маъное надорад,

Амрико писари сафири пешини Қирғизистон дар Вашингтонро боздошт кард

Ходимони пулиси Амрико - акси тасвирӣ

Ийолоти Муттаҳидаи Амрико писари сафири пешини Қирғизистон дар Вашингтонро бо гумони қочоқи силоҳ боздошт кард.

Замира Сидиқова рӯзи 1 март гуфт, ки писараш Тенгиз Сидиқов, ки дар Вашингтон зиндагӣ мекунад, иштибоҳан ба кӯшиши қочоқи силоҳ ба Чеченистони Русия муттаҳам шуд.

Замира Сидиқова, ки солҳои 2005-2010 сафири Қирғизистон дар Вашингтон буд, аз рӯзноманигорони эътирофшудаи ин кишвар номбар мешавад.

Идораи додситонӣ дар Ноҳияи Шарқии Вирҷиниа гуфт, ки писари Сидиқова як гумонбар дар қазияи Элдар Ризвонов аст, ки рӯзи 27 феврал боздошт шуд.

Дар изҳороти ин идора, ки ҳарду боздоштшударо шаҳрванди Қирғизистон муаррифӣ кардааст, гуфта мешавад, ки онҳо беш аз 100 силоҳи оташфишонро аз банду баст ҷудо карда, мехостанд ин борро бидуни муҷаввиз ба Чеченистон интиқол диҳанд.

Содиқови 28 сола ва Ризвонови 27 сола ба нақзи Қонун дар бораи содироти силоҳ муттаҳам мешаванд, ки харидуфурӯши таслиҳоти хориҷӣ муомилоти тиҷоратӣ бо силоҳ, қочоқ, пулшӯӣ ва тақаллуби бонкири назорат мекунад.

Замира Сидиқова мегӯяд, ки пулис писари ӯро баъди боздошти ҳамхонаи қаблиаш Ризвонов ва кофтукови хона боздошт кард.

Раҳбари бахши иртибототи Кохи сафед аз мақом меравад

Ҳоуп Ҳикс - раҳбари бахши иртибототи Кохи сафед

Раҳбари бахши иртибототи Кохи сафед Ҳоуп Ҳикс аз мақомаш истеъфо медиҳад. Дар ин бора хабаргузории Reuters рӯзи 28 феврал бо такя ба сухангӯи Кохи сафед Сара Сандерс гузориш дод.

Тасмими истеъфо дар ҳоле гирифта шуд, ки Ҳикси 29-сола - ҷавонтарин раҳбари бахши иртиботот дар таърихи Кохи сафед, ҳудуди 9 соат дар ҷаласаи пӯшидаи Кумитаи истихбороти палатаи намояндагони Амрико гузориш дод. Ин кумита робитаи эҳтимолии ситоди интихоботии Трамп бо Русияро таҳқиқ мекунад.

Ҳоуп Ҳикс аз посух додан ба бисёр суолҳо канор рафт, аммо эътироф кард, ки баъзан водор мешуд "дуруғи беозор" бигӯяд. Ҳикс нагуфт, ки амри "дурӯғ гуфтан" аз тарафи кадом узви тим ворид мешуд. Ин корманди Кохи сафед гуфт, ки дар робита ба таҳқиқи қазияи "нақши пойи Русия" ҳеҷ гоҳ огоҳона изҳороти дуруғин пахш накардааст.

Дар байни пурсишҳое, ки Ҳикс нахост ба онҳо посух бигӯяд, ин суол ҳам буд, ки оё ӯ дар робита ба мулоқоти писарии калонии Трамп бо ҳуқуқдони Русия Наталя Веселнитская чӣ нақш дошт.

Дар Амрико таҳқиқи парвандаи созиши эҳтимолии тими интихоботии Трамп бо Русия ҷараён дорад, ки онро прокурори махсус Роберт Мюллер пеш мебарад.

Қазоқистон садҳо хонаводаро аз нӯшидани шароб маҳрум кард

Акси тасвирӣ

Алексей Милюк, як намояндаи вазорати корҳои дохилии Қазоқистон рӯзи 1 март хабар дод, ки мақомот тавассути додгоҳ нӯшидани машруботро ба аъзои садҳо хонаводаи носолим манъ карданд.

Ин хонаводаҳо акнун ҳақ надоранд на дар манзили худ ва на дар манзили дигарон шароб нӯшанд. Вайрон кардани тартиботи мазкур 15 рӯзи ҳабс дар пай дорад.

Қонунгузории Қазоқистон дар охири соли 2017 тағйир ёфт ва имкони манъи шаробнӯширо фароҳам овард. Дар Кодекси қонунвайронкунии маъмурии Қазоқистон омадааст, агар нӯшидани шароб сабаби сар задани қонуншиканӣ гардад, додгоҳ ҳақ дорад ба ВКД иҷозат диҳад, ки шаҳрванди мушаххасро аз нӯшидани машрубот манъ кунад.

Ба иттилои Милюк, мақомоти Қазоқистон рӯйхати 10 ҳазор хонаводаи "носолим"-ро дар ихтиёр доранд. Ҳамаи онҳо мумкин аст, аз нӯшидани шароб маҳрум шаванд. Дар соли 2017 350 хонавода ва аз ибтидои соли 2018 855 хонаводаи носолим аз шаробнӯшӣ маҳрум шуданд.

Ба иттилои вазорати тандурустии Қазоқистон, дар соли 2017 ба ҳисоби миёна ҳар сокини кишвар аз 11 то 12 литр шароб истифода кардааст. Ин нишондод нисбати кишварҳои ҳамсояи Қазоқистон зиёд арзёбӣ мешавад. Дар ҳамин ҳол, 18 дарсади аҳолии ин кишвар вобастаи шароб дониста мешаванд: онҳо дар ҳафта бештар аз ду маротиба шароб менӯшанд.

Истеъфои мансабдорони Словакия баъди куштори рӯзноманигор Ян Кучак

Маросими хайрбод бо журналисти Слования Ян Кучак

Ба думболи куштори хабрнигори таҳқиқотгар Ян Кучак як қатор мақомдорҳо, аз ҷумла ёвари нахуствазир Мария Трошкова, котиби Шӯрои амният Вилиам Ясан ва вазири фарҳанг Марек Мадярич аз мақомҳои худ истеъфо доданд. Мадярич гуфт, ҳатто наметавонад тасаввур кунад, ки баъд аз ин ҳодиса чигуна дар "курсии вазирӣ" хоҳад нишаст.

Ян Кучак, рӯзноманигори сомонаи Aktuality.sk дар ҳамкорӣ бо Маркази байналмилалии таҳқиқи фасод ва ҷиноятҳои созмонёфта (OCCRP) робитаҳои эҳтимолии сиёсатмадорони Словакияро бо мафияи итолиёвӣ таҳқиқ мекард. Охирин матлаби Кучак 9 феврал нашр шуд, ки мавзӯи он тақаллубкориҳои молиётии марбут ба як маҷмуаи истиқоматӣ дар Братислав буд.

Ҷасади Ян Кучакро бо захми тир 25 феврал пайдо карданд ва пулис гуфт, куштори ӯ ба фаъолияти касбияш рабт дорад. "Дар Словакия бори нахуст аст, ки ба рӯзноманигор ин гуна ҳамла мекунанд", - афзуд намояндаи пулис.

Дар робита ба куштори мазкур мухолифон талаб доранд, ки вазири умури дохилӣ Роберт Калиняк ва сардори пулиси ин кишвар Тибор Гашпар ба истеъфо раванд.

Ёфтҳои бештар

Шарҳи боздошти 113 гумонбар ба узвият дар "Бародарони мусалмон"
лутфан мунтазир бошед

Феълан кор намекунад

0:00 0:03:43 0:00
Гузоришҳои радиоӣ
ПОДКАСТ
Шарҳи боздошти 113 гумонбар ба узвият дар "Бародарони мусалмон"
Гузоришҳои радиоӣ

Гузоришҳои видеоӣ

Суқути ҳавопаймои Амрико дар Ғазнӣ
лутфан мунтазир бошед
Embed

Феълан кор намекунад

0:00 0:00:40 0:00
XS
SM
MD
LG