Пайвандҳои дастрасӣ

Хабари нав

Хабарҳо

Эрон ноиби президенти замони Аҳмадинажодро зиндонӣ кард

Аҳмадинажод ва Ҳамид Бақоӣ

Додгоҳи Эрон Ҳамид Бақоӣ- ноиби раиси ҷумҳур дар аҳди Маҳмуд Аҳмадинажодро рӯзи 13 март баъди эълони ҳукумаш бо ҷурми ришваситонӣ зиндонӣ кард. Дар ин бора матуботи Эрон хабар дод.

Хабаргузории "Форс" аз қавли додстонии Теҳрон гуфт, ки афсарон Ҳамид Бақоиро боздошт карданд ва ба зиндон интиқол доданд. Бақоӣ моҳи декабр ба 15 соли зиндон маҳкум шуд.

Ҳамид Бақоӣ, ки аз соли 2011 то 2013, дар аҳди президенти пешини Эрон Маҳмуд Аҳмадинаҷод, дар мақоми ноиби раиси ҷумҳур фаъолият мекард, соли 2015 бо иттиҳоми фасодкорӣ барои муддати кӯтоҳ боздошт шуд.

Шӯрои Нигаҳбон- як сохтори қудратманди Эрон аз иштироки Бақоӣ дар интихоботи раёсати ҷумҳур ҷилавгирӣ кард ва ӯ барои чанд ҳафта дар моҳи июл зиндонӣ шуд.

Таъқиби додгоҳии Ҳамид Бақоӣ дар пасманзари таниши лафзии байни Маҳмуд Аҳмадинаҷод ва раиси идораи нерӯманди адлия Содиқ Амоли Лориҷонӣ ҷараён гиирифт, ки президенти собиқ ӯро ба диктотурӣ ва бекифоятӣ муттаҳам кардааст.

Ҳалокати 4 нафар дар маросимҳои чоршанбесурӣ дар Эрон

Мақомҳои бахши тандурустӣ ва бемористонӣ дар Эрон эълом карданд, ки дар ҳодисаи муртабит ба маросимҳои ҷашни чаҳоршанбесурӣ, дар саросари он кишвар ҳадди ақал чаҳор нафар ба ҳалокат расида ва беш аз 2 ҳазор нафар низ осеб диданд. Ба гузориши хабаргузории расмии Эрон -ИРНА, мақомоти беҳдоштӣ гуфтаанд, "то ба ҳол ду ҳазору 82 нафар дар ҳодисаҳои муртабит бо чаҳоршанбесурӣ дар кишвар осеб дида ва ва чаҳор нафар низ то кунун дар ин ҳодисаҳо ҷони худро аз даст додаанд.

Ба гуфтаи мақомот, бештарин маҷрӯҳони маросими чаҳоршанбесурӣ мисли соли гузашта дар Теҳрон будааст. Дар ҳамин ҳол раиси пулиси шаҳри Теҳрон гуфтааст, омори осебдидагон нисбат ба соли гузашта камтар мебошад. Ба гузориши хабаргузории нимарасмии "Форс", раиси пулиси Теҳрон ҳамчунин аз боздошт 14 нафар ба далели "нақзи қонунҳо" дар маросими чаҳоршанбесурӣ хабар додааст.

"Бачаи тиллоӣ" ба даҳ соли зиндон маҳкум шуд

Қуандиқ Бишимбоев - вазири пешини иқтисоди миллии Қазоқистон

Додгоҳи Остона вазири пешини иқтисоди миллии Қазоқиистон Қуандиқ Бишимбоевро бо ҷурми ришваситонӣ ва хилофкории молӣ ба муддати 10 сол аз озодӣ маҳрум кард.

Додгоҳ рӯзи 14 март ҳамроҳ бо Бишимбоев чанд нафари дигарро аз гурӯҳи 22 нафарӣ ба муҳлатҳои аз 2 то 7 зиндонӣ кард. Гумонбарони дигар ё ҷарима шуданд ва ё бар пояи афви соли 2017 ба озодӣ баромаданд.

Қундиқ Бишибоев 37-сола, ки ҷавонтарин вазири Қазоқистон ҳисоб мешуд, моҳи январи соли 2017 аз тарафи Хадамоти зидди-фасод боздошт шуд.

Қуандиқ Бишмбоев дастпарвардаи барномаи омӯзиши нухбагон, ё элитаи таҳти назари президент Назарбоев аст, ки ба зинаҳои қудрат аз мақоми муовини вазири саноат ва иқтисод баланд шуд ва то вазири иқтисоди миллӣ расид. Ба гуфтаи тафтишот, ӯ дар мақоми раҳбари ширкати ҳолдингии таҳти назари давлат - "Байтерек" ришва гирифтааст.

Бишимбоев дар мурофиаи ибтидоӣ иттиҳомро рад кард, дар ҳоле, ки боздоштшудаҳои дигар гуноҳро эътироф ва бо додситонӣ ҳамкорӣ карданд.

Маскав зарбулаҷали Британияро писанд накард, Мэй чораҳояшро эълон мекунад

Тереза Мэй - нахуствазири Британия

Дар ҳоле, ки Маскав зарбулаҷали Британияро бо талаби шарҳе, ки чӣ тавр гази фалаҷкунандаи асаби истеҳсоли Шӯравӣ дар Британия пайдо шуд, писанд накард, қарор аст имрӯз Тереза Мэй чораҳои ваъдагиашро дар муқобили Русия эълон кунад.

Ҷосуси пешини Идораи истихбороти Русия Сергей Скрипал ва духтари ӯ Юлия, ахиран бо истифода аз гази фалаҷкунандаи асаб, - "Новичок" ки Иттиҳоди Шӯравӣ дар замони "Ҷанги Сард" истеҳсол мекард, дар Британия заҳролуд шуданд. Маскав даст доштанашро дар ин ҳамла рад мекунад.

Тереза Мэй барои шарҳи қазия ба Маскав то нимашаби гузашта вақт дода буд. Нахуствазир гуфт, ки дар посух ба ин ҳамла як силсила чораҳои иқтисодӣ ва дипломатиро алайҳи Русия пиёда хоҳад кард.

Қарор аст имрӯз ҷаласаи Шӯрои амнияти Британия баргузор шавад ва дар он нахуствазир оиди таҳаввулоти ахир гузориш диҳад. Маскав Британияро ҳушдор додааст, ки ҳамагуна амалкард алайҳи Русия ба посухи ҳамсанг рӯ ба рӯ хоҳад шуд.

Кӯдаки 11-моҳа, ки аз баданаш 16 сӯзан пайдо шуд, шифо ёфтааст

Бемористони Тошканд

Масъулони Маркази ҷумҳуриявии ёрии фаврии тиббии шаҳри Тошканди Узбекистон мегӯянд, вазъи саломатии Азизбек Абдумаҷидов- кӯдаки 11-моҳа, ки табибон аз бадани ӯ 16 сӯзан пайдо карданд, шифо ёфт ва ӯро аз бемористон ҷавоб доданд.

Ба гуфтаи табиби марказ Дониёр Асадуллоев, ҳоло, дар бадани кӯдак се сӯзан боқӣ мондааст, ки саломатии ӯ хатар надоранд.

Ёдрас мешавем, ки рӯзи 17 январи соли равон табибон дар бадани Азизбеки 11-моҳа, зодаи вилояти Фарғонаи Узбекистон 16 сӯзанро ошкор карданд. Ӯро фавран ба Тошканд бурда, тавассути ҷарроҳӣ 13 сӯзанро берун оварданд. Ҷарроҳӣ 9 соат давом кард.

Баъди ташхис дақиқ шуд, ки сӯзанҳо давоми ду моҳ дар ҷисми кӯдак будаанд. Сӯзанҳо дар ҳар ҷои бадани кӯдак, аз ҷумла дар рӯдаҳо, масона, қафаси сина, гардан, сутунмуҳра ва зери дил ҷой доштанд.

Бо чӣ роҳе ин сӯзанҳо ба бадани вай ворид шудаанд, ҳоло дақиқ нест. Табибон мегӯянд, кӯдак мустақилона наметавонист онҳоро фурӯ барад. "Касе қасдан сӯзанҳоро ба бадани кӯдак халондааст. Инро кормандони мақомот мушаххас хоҳанд кард", - гуфтанд табибон.

Ангела Меркел барои бори чаҳорум садри аъзами Олмон шуд

Ангела Меркел

Ангела Меркел барои бори чаҳорум мақоми садри аъзам, ё канслери Олмонро ишғол кард. Рӯзи чаҳоршанбе 364 намояндаи Бундестаг ба тарафдории номзади ҳизби "Иттиҳодияи Насрониву Демократҳо"- Ангела Меркел овоз доданд, -гуфт Deutche Welle.

Созиши эътилофӣ бораи таъсиси ҳукумати нави Олмон рӯзи душанбе ҳосил шуд. Дар зери ин созишнома Ангела Меркел, раҳбари ҳизби Иттиҳодияи Насрониву Демократҳо", Ҳорст Зеехофер, раҳбари "Иттиҳодияи Насрониву Сотсиалистҳо" ва иҷрокунандаи вазифаи ҳамраиси ҳизби "Сотциал-Демократ"-и Олмон Олаф Шолтс имзо гузоштанд.

Нахустин ҷаласаи кабинети нави вазирон ба рӯзи чоршанбе барномарезӣ шудааст.

Маъракаи интихоботии Владимир Путин дар Қрим анҷом меёбад. ВИДЕО

Владимир Путин бо миллиардери рус Аркадий Ротенберг

Президенти Русия Владимир Путин рӯзи чоршанбе сафареро дар водии Краснодар, Қрими ишғолшуда ва Севостопол анҷом медиҳад. Ин сафар дар фосилаи чаҳор руз аз интихоботи раёсати ҷумҳури Русия баргузор мешавад, ки Путин дар он яке аз номзадҳост. Дар ҷараёни сафар боздид аз терминали нави фурӯдгоҳи Севостопол ва сохтмони пули Қрим дар назар аст. Дар ин бора хабаргузории РИА Новостӣ рӯзи 14 март бо такя ба дафтари матбуоти Кремл гузориш дод.

Ин охирин сафари минтақавии Путин дар чаҳорчӯби маъркаи интихоботӣ аст. Ба гуфтаи шабакаи телевизионии "Дождь", дар Севостопол Владимир Путин дар гирдиҳамоҳии серодам иштирок мекунад. Ин ҷамъомад расман ба солгарди рефрендуми ҳамоиши Қрим ба Русия бахшида мешавад.

Раҳбари бахши сиёсии Иттиҳоди Аврупо Федерика Моғеринӣ қаблан гуфта буд, ки Иттиҳоди Аврупо интихобот дар Қрими ишғолшударо эътироф намекунад.

Рӯзи 12 март Иттиҳоди Аврупо таҳримҳои зидди Русияро, ки баъди ишғоли Қрим аз тарафи Маскав ва дахолаташ ба низои Донбасс ҷорӣ шуданд, тамдид кард Маскав ҳамоиши шибҳаҷазираи Қрим ба Русияро "барқарор шудани адолати таърихӣ" унвон кардааст.

Интихоботи президентии Русия: давлат нерӯманд бошад ё одил?
лутфан мунтазир бошед

### Феълан кор намекунад ###

0:00 0:02:50 0:00

Созишномаи сафари бевиза ба Узбекистон барои тасдиқ ба порлумон рафт

Раиси ҷумҳури Тоҷикистон Эмомалӣ Раҳмон рӯзи чаҳоршанбеи 14-уми март созишномаи байни ҳукумати Тоҷикистон ва Узбекистон дар бораи сафари шаҳрвандон ба кишварҳои якдигарро барои баррасӣ ба Маҷлиси Олӣ ирсол кардааст. Ин созишнома рӯзи 9-уми март дар ҷараёни сафари раиси ҷумҳури Узбекистон Шавкат Мирзиёев ба Душанбе, имзо шуда буд.

Ба иттилои дафтари матбуоти раёсати ҷумҳури Тоҷикистон, ин созишнома тартиб ва шароити мусофирати шаҳрвандони Тоҷикистону Узбекистонро ба кишварҳои якдигар танзим менамояд. Манбаъ мегӯяд, ки созишнома аз рӯзи гирифтани огоҳиномаҳои хаттӣ, дар мавриди иҷро шудани расмиёти дохилидавлатӣ, эътибори ҳуқуқӣ пайдо мекунад.

Аз ин қабл дафтари матбуоти вазорати умури хориҷии Тоҷикистон дар тавзеҳи созишнома миёни Тоҷикистон ва Узбекистон дар бораи сафарҳои дуҷонибаи шаҳрвандон гуфт, ки сафари сокинон ба кишварҳои якдигар, танҳо пас аз анҷоми расмиёти дохилӣ аз ҷониби тарафҳо, амалӣ хоҳад шуд. Вазорати умури хориҷии Тоҷикистон ҳамчунин гуфт, ки шаҳрвандони кишвар танҳо бо шиносномаи хориҷӣ метавонанд ба Узбекистон сафар намоянд.

Руасои ҷумҳури Тоҷикистон ва Узбекистон рӯзи 9-уми март созишномаеро ба имзо расониданд, ки будубоши бераводиди шаҳрвандони ду кишвар ба қаламрави якдигар ба муддати 30 рӯзро пешбинӣ мекунад.

Тайи чанд рӯзи гузашта ва дар пайи имзои созишномаи равуои бераводид миёни ду кишвар, сокинони зиёди Тоҷикистон ба бовари ин, ки низоми виза пурра бардошта шудааст, ба гузаргоҳҳо марзӣ шитофтанд, вале сарҳадбонҳо ба онҳо гуфтанд, ки ҳанӯз муқаррароти нав ба иҷро надаромадааст.

Ҳоло муқаррароти рафтуомади бидуни визаи панҷрӯза барои сокинони наздимарзӣ амал мекунад ва онҳо метавонанд то 30 км ба ҳудуди кишварҳои якдигар ворид шаванд. Тоҷикистон бо Узбекистон 1339 километр марзи муштарак дорад ва дар ҳоли ҳозир сокинон тариқи беш аз даҳ гузаргоҳ метавонанд ба кишварҳои якдигар рафтуомад намоянд.

New York Times: раҳбари нави ЦРУ ба шиканҷаи гумонбарҳо раҳбарӣ мекард

Ҷина Ҳаспел - раҳбари нави Идораи истихбороти ИМА

Ҷина Ҳаспел, ки дирӯз Трамп ӯро ба мақоми раҳбари Идораи истихбороти ИМА пешниҳод кард, дар шиканҷаи гумонбарони терроризм, дар маҳбаси пинҳонии ЦРУ, воқеъ дар Таиланд иштирок мекард. Нашрияи New York Times рӯзи 13 март навишт, ки соли 2002 Ҷина Ҳаспел ба шиканҷаи ду гумонбари тероризм раҳбарӣ кард ва баъдан наворҳои бозпурсиро аз байн бурд.

Ҷина Ҳаспел дар Таиланд ба бозпурсии ду гумонбари терроризм -Абу Зубайда ва Абдул Раҳим ал-Ноширӣ раҳбарӣ кард Аввалиро 83 дафъа ба об ғарқ карданд ва пайваста сарашро ба девор мезаданд. Ҷараёни бозпурсӣ наворбардорӣ мешуд ва наворҳо то соли 2005, то замони фармони нест кардани онҳо, дар сандуқи оҳании иқоматгоҳи марбут ба ЦРУ дар Бангкок маҳфуз буданд.

Ба гуфтаи New York Times, "боло рафтан"- и Ҳаспел - шахси боэҳтиром дар байни ҳамкоронаш, ишораест, ки ЦРу-и таҳти назари Трамп ба яке аз саҳифаҳои тираи фаъолияти хадамоти махсус, дар муқоиса бо пешгузаштагон, бархурди оромона дорад.

Дар тӯли 8 соли ахир раҳбарони Идораи истихборот даҳҳо кормандро, ки аз шеваҳои мамнӯи бозпурсӣ истифода карданд, таҳти ҳимояи худ гирифтанд. Президент Трамп борҳо гуфтааст, ки "шиканҷа натиҷа додааст". Майк Помпео, раҳбари Идораи Истихборот, ки Трамп рӯзи гузашта ӯро ба мақоми Котиби давлатии ИМА интихоб кард, гуфта буд, ки "ба об ғарқ кардани гумонбарон ва шеваҳои дигар, шиканҷа нест ва онҳоеро, ки ин усулҳоро дар мубориза бо "Ал-Қоида" истифода кардаанд, "ватандӯстони воқеӣ" номид.

Пентагон ба изҳороти Русия дар робита ба Сурия посух дод

Тасвири Пентагон

Вазорати дифои ИМА Русияро ба даст доштан дар ҷиноятҳои режими Башор Асад муттаҳам кард ва аз Кремлин хост, ба ҷойи ба самти дигар кашидани таваҷҷӯҳи ҷомеаи байналмилалӣ ба коҳиши бӯҳрони башарӣ дар Ғутаи Шарқӣ мусоидат кунад.

Намояндаи Пентагон ба таҳдиди раҳбари Ситоди кулли нерӯҳои Русия Валерий Герасимов, рӯзи гузашта дар сӯҳбат бо шабакаи телевизионии CNBC вокуниш кард. Герасимов гуфт, ИМА мехоҳад нерӯҳои Сурияро ба ҳамлаи кимиёвӣ айбдор ва ҳуҷуми эҳтимолиаш ба муассисаҳои низомии Сурия дар Димишқро тавҷеҳ кунад.

Ба гуфтаи намояндаи Пентагон, "далелҳои нав ба нави истифодаи артиши Сурия аз силоҳи кимиёвӣ алайҳи мардумашро, ки нақзи ваҳшатноки қонуни байналмилалӣ аст, наметавон сарфи назар кард".

"Ин далел, ки Русия наметавонад мушкили силоҳи кимиёвиро танзим кунад, салоҳияти ин кишварро ба таъсири мусбат ва дурнамои ҳалли бӯҳрони Сурия зери суол мебарад",- гуфт намояндаи Пентагон.

Рӯзи гузашта ИМА гуфт, агар ҳукумати Сурия аз татбиқи қатъномаи СММ, барои берун овардани захмиҳо аз майдони ҷанг дар Ғутаи Шарқӣ сарпечӣ кунад, Амрико маҷбур аст аз "чораҳои мушаххас" кор бигирад.

Донишманди физикаи назариявӣ Стивен Ҳокинг даргузашт

Стивен Ҳокинг

Донишманди Британия Стивен Ҳокинг дар маҳалли зисташ, воқеъ дар Кембриҷ, даргузашт. Дар ин бора намояндаи хонаводаи Ҳокинг хабар дод. Ӯ 76-сола буд.

“Мо аз марги падари азизамон, ки имрӯз даргузашт, бисёр андуҳгин шудем. Ӯ донишманди бузург ва инсони барҷаста буд, ки меросаш солҳо бо мо хоҳад буд", - омадааст дар изҳороти фарзандони Ҳокинг - Люсӣ, Роберт ва Тим.

Стивен Ҳокинг - асосгузори космологияи квантӣ, назарияи пайдоиши ҷаҳон дар пайи таркиши Бузургро омӯхт ва дар робита ба “чолаҳои сиёҳ” бисёр кашфиёт кардааст. Соли 1979 ӯ баландтарин мақоми академикӣ дар Донишгоҳи Кембриҷро ба даст овард. Китоби Стивен Ҳокинг “Таърихи кӯтоҳи замон”, чопи соли 1988, пурфурӯштарин китоб шуд ва ба муаллифаш шӯҳрати ҷаҳонӣ овард.

Аввалҳои соли 1960 Ҳокинг дар пайи бемории “склерози амфиоторофӣ” фалаҷ шуд. Сарфи назар аз пешгӯии табибон, ӯ бо ин маризӣ 50 соли дигар умр дид. Аз тамоми мушакҳо танҳо мушаки рӯяш фаъол буд ва ӯ ба воситаи сентизатори нутқ сӯҳбат мекард.

Борону селобҳо кӯчаеро дар Душанбе хароб кард

Акс аз бойгонӣ

Дар пайи боришоти шадиди се рӯзи ахир дар Тоҷикистон дар бархе аз минтақаҳои кишвар хисорот сабт шудааст. Нисфирӯзии сешанбе, 13 март борони зиёд ва селобҳо боиси тахриби яке аз кӯчаҳо дар маҳаллаи Чашмасори ноҳияи Синои шаҳри Душанбе шуда, бархе аз қисматҳои ду ҳавлии маскунӣ дар ин маҳалла вайрон шудааст.

Масъулони ин ниҳод тавонистаанд то шоми дирӯз ҳаракат дар ин роҳро дубора барқарор кунанд. Дар ин бора рӯзи 14 март ба Радиои Озодӣ Умеда Юсуфӣ, сухангӯи Кумитаи ҳолатҳои фавқуллода ва мудофиаи граждании Тоҷикистон хабар дод.

Ҳамзамон, ба гуфтаи вай, баъд аз зуҳри 13 март дар ноҳияи Шаҳринав селобҳо боиси корношоям шудани қитъаҳои кишоварзӣ шуда, мақомоти маҳаллӣ барои мушаххас кардани миқдори хисорот комиссияи ҳукуматӣ таъсис додааст.

Аз сӯи дигар, 13 март дар пайи фаромадани тармаҳо дар ноҳияҳои Рӯшон ва Шуғнони вилояти Бадахшони Кӯҳӣ барои муддате ҳаракати нақлиёт дар роҳи мошингарди Хоруғ-Мурғоб мутаваққиф шудааст.

Далер Мерганов, сухангӯи ширкати IRS – масъули нигоҳубини роҳи мошингарди Душанбе-Чаноқ 14 март ба Радиои Озодӣ гуфт, ки дар қитаъи 56-71 ин ҷодда чанд адад тармаи бузург ҳаракати воситаҳои нақлиётӣ дар ин масирро масдуд кардаанд. “Мо водор шудем барои тоза кардани роҳ аз тармаҳо бори нахуст мошинҳои махсуси барфтозакунии “булдозерро”, ки тасмачарх ҳастанд, истифода кунем. То замони комилан тоза кардани роҳ аз барф ҷодда барои муддати муайяне баста шуд”, - гуфт Далер Мерганов.

Дар ҳамин ҳол, Ҷамила Байдуллоева, масъули Маркази ҳавошиносии Тоҷикистон ба Радиои Озодӣ гуфт, ки боронҳои шадид рӯзи 14 ва 15 март ҳам идома ёфта, сипас барои чанд рӯз ҳавои офтобӣ дар Тоҷикистон ҳукмфармо хоҳад шуд. “Мо аз қабл пешбинӣ мекардем, ки тӯли панҷ рӯзи ахир боришоти зиёди борон ва фаромадани тармаву ярч ва сангрезӣ сурат хоҳад гирифт. Дар маҷмӯъ, баъд аз тирамоҳу зимистону камбориш пешбинӣ шудааст, ки дар фасли баҳор боридани боронҳои шадид бештар мешавад”, - гуфт Ҷамила Байдуллоева.

7 кило ҳероин: ба шаҳрванди Тоҷикистон ҳабси якумрӣ таҳдид мекунад

Додгоҳи вилояти Тюмени Русия ба баррасии парвандаи як шаҳрванди Тоҷикистон шурӯъ кардааст, ки ба ӯ ҳабси якумра таҳдид мекунад.

Расонаҳои русӣ бо такя ба маводи парванда навиштаанд, ки ин шаҳрванди Тоҷикистон моҳи ноябри соли гузашта ҳангоми убури марзи Қазоқистон ба Русия бо мошини худ аз тарафи мақомот боздошт шудааст. Зимни ташхиси техникӣ аз оҳани чархҳои мошинаш бештар аз ҳафт гило ҳероин пайдо шудааст.

Аз шаҳрванди Тоҷикистон ном бурда нашудааст, танҳо гуфта шудааст, ки 38 сол дошта дар ивази маблағ розӣ шудааст маводи мухаддири гуруҳи қочоқчиёнро дар мошини Hyundai Starex-и худ аз Қазоқистон ба Русия интиқол диҳад.

Додситони вилояти Тюмен тафтиши парвандаи ин шаҳварнди Тоҷикистонро аз рӯи ду моддаи Кодекси ҷиноии Русия анҷом дода ба додгоҳ ирсол кардааст. Акнун аз руи ин ду модда шаҳрванди Тоҷикистонро ҳабси якумрӣ ё то 20 соли зиндон таҳдид мекунад.

Дар ҳоле ин шаҳрванди Тоҷикистонро ҳукми сангин таҳдид мекунад, ки як додгоҳи Русия охири соли гузашта сангинтарин ҷазо барои қочоқи маводи мухаддирро нисбати як шаҳрванди Тоҷикистон содир кард: раҳбарии як гурӯҳи қочоқчиён, ки дар давоми чор сол ба Русия 600 кг ҳероинро ворид кардааст, ба зиндони абад маҳкум шуд.

Ҳукми Шералӣ Табарови 43-сола, як зодаи ноҳияи Восеъ ва 14 шаҳрванди дигари Тоҷикистон рӯзи 21 декабр дар додгоҳи вилояти Маскав содир шуда буд.

Трамп Тиллерсонро аз мақоми вазири умури хориҷӣ барканор кард

Рекс Тиллерсон

Доналд Трамп, раиси ҷумҳури Иёлоти Муттаҳидаи Амрико, Рекс Тиллерсон - Котиби давлтаии ИМА-ро аз мақом барканор кард. Тиллерсонро дар ин вазифа Майк Помпео - раҳбари Идораи истихбороти Амрико иваз мекунад. Дар ин бора нашрияи The Washington Post рӯзи 13-уми март хабар дод.

Як мақоми баландпояи маъмурияти Кохи Сафед ба шабакаи телевизионии CNN гуфт, Трамп рӯзи ҷумъа аз Тиллерсон хоста буд, ки аз мақоми Котиби давлатӣ канор равад.

"Майк Помпео, раҳбари ЦРУ, котиби давлатии нав мешавад, ӯ корҳои фантастикиро анҷом медиҳад! Ташаккур ба Рекс Тиллерсон барои хидматаш! Ҷина Ҳаспел раҳбарии Идораи истихборотро бар дӯш мегирад. Ба ҳама муборак бошад!",- навиштааст Трамп дар Твиттер.

Ҷина Ҳаспел дар Идораи истихбороти ИМА муовини Майк Помпео буд. Ӯ нахустин занест, ки дар ин мақоми калидӣ раҳбар мешавад.

Ҳафтаи гузашта Тиллерсон сафари кишварҳои африқоиро қатъ кард ва ба гуфтаи худаш бо далели корҳои "нотамом" ба Вашингтон баргашт.

Истеъфои Тиллерсон баъди овозаҳои чандмоҳа, ки мегуфтанд, собиқ раҳбари ширкати нафтии ExxonMobil Рекс Тиллерсон аз мақоми Котиби давлатии ИМА канор меравад, расмӣ шуд.

Писари даҳсола дар ҳаммоми Конибодом даргузашт

Як навраси тоҷик, ки барои хабаргирии наздиконаш аз вилояти Самараи Русия ба Тоҷикистон омад, шаби 6 ба 7-уми марти имсол дар ҳаммоми шаҳри Конибодом даргузашт. Камолҷон Нозирови 10-сола ду ҳафта пеш ба зодгоҳаш омада буд. Ӯ ҳамроҳи волидонаш дар Русия мезист ва дар ҳамонҷо таҳсил мекард.

Дар Додситонии шаҳри Конибодом гуфтанд, ки таҳқиқи ҳодисаро шуруъ шудааст ва ба ин хотир ба дари ҳаммом қуфл задаанд.

Фозилҷон Нозиров, бобои Камолҷон Нозиров, рӯзи 13-уми март дар суҳбат бо Радиои Озодӣ гуфт, чаҳор соли охир набераашро надида буд. "Барои дидорбинӣ омад ва ин охирин дидори мо шуд. Ӯ бо тағояш ба ҳаммоми маҳалла рафта будааст. Ҳамон шаб писарам аз Русия занг зад, ки “Камолҷонро аз даст додем. Ду рӯз истодем, шудем то писару келинам аз Русия баргарданд. Рӯзи 8-уми март Камолҷонро дафн кардем", - гуфт бобои навраси ҳалокшуда.

“Гунаҳкор кист: Соҳиби ҳаммом ё Ёрии таъҷилӣ?”

Додситонии шаҳри Конибодом мегӯяд, таҳқиқи ҳодисаро шуруъ кардаанд. Як мақоми додситонӣ рӯзи 13-уми март дар суҳбат ба Радиои Озодӣ гуфт, бо сабаби халал нарасондан ба ҷараёни тафтишот наметавонад ҷузъиётро ошкор кунад.

Аммо, ба қавли ин ҳамсуҳбати Радиои Озодӣ, онҳо ба дари ҳаммоми маҳаллаи Зарбед муҳр задаанд ва то анҷоми тафтишот дари он баста мемонад.

Марги мармузи навраси 10-сола пас аз рафтан ба ҳаммоми ҷамъиятӣ, сокинони деҳаи маҳаллаи “Таги мадраса”-и шаҳри Конибодомро нигарон кардааст.

Наздикони Камолҷон Нозиров мегӯянд, ӯ аз саломатиаш шикоят надошт ва ба ягон беморӣ низ гирифтор набуд. Фозилҷон Нозиров, бобои Камолҷон Нозиров мегӯяд, вазъи саломати наберааш хуб буд ва давоми як ҳафтае, ки дар Тоҷикистон буд, боре аз саломатиаш шикоят надошт.

Лавров: Маскав ба зарубулаҷали Лондон посух намедиҳад

Сергей Лавров

Вазири умури хорҷии Русия заҳролудшавии корманди пешини Идораи кулли истихбороти Русия Сергей Скрипал аз тарафи Маскавро рад кард. Лавров гуфт, Русия ба дархости Британия, дар заминаи заҳролудшавии Сергей Скрипал, то замони дастрасии Маскав ба маводи парванда посух намедиҳад. Дар ин бора хабаргузории РИА Новости рӯзи 13-уми март аз қавли Лавров гузориш дод.

Вазир гуфт, Русия аз мақомоти Британия дархост кард, дастрасии Маскавро ба заҳри фалаҷкунандаи асаб таъмин намояд, ки Сергей Скрипал ва духтари ӯро бо истифода аз ин мавод заҳролуд карданд, зеро Юлия духтари Скрипал, шаҳрванди Русия аст.

"Лондон ба ҷойи зарбулаҷал ба Русия бояд тааҳуди худро дар баробари Эъломияи истифода аз силоҳи кимиёвӣ иҷро кунад",- гуфт Сергей Лавров.

Рӯзи гузашта нахуствазири Британия Тереза Мэй ҳангоми суханронӣ дар порлумон гуфт, бино ба хулосаи муфаттишон Скрипал ва духтари ӯ бо маводи фалаҷкунандаи асаб - "Новичок" заҳролуд шуданд, ки он дар Иттиҳоди Шӯравӣ коркард мешуд. Тереза Мэй ба Русия 24 соат вақт дод, то шарҳ диҳад, ки чӣ тавр ин мавод дар Британия пайдо шуд.

Мэй дар дар ин замина ду фарзия пешниҳод кард: ё Русия алайҳи Британия маводи кимиёвии ҳарбӣ истифода кард, ё Маскав натавонист коркардҳои низомияшро ба таври зарурӣ ҳифз кунад ва он ба дасти сеюм расид.

Герасимов гуфт, Русия ҳамлаи Амрико ба Димишқро бе ҷавоб намегузорад

Раҳбари ситоди кулли нерӯҳои Русия генерал Валерий Герасимов

Вазорати дифои Русия гуфт, ки дар посух ба ҳамлаи эҳтимолии Амрико ба Димишқ аз чораҳои ҷавобӣ кор мегирад. Дар ин бора сардори ситоди кулли нерӯҳои Русия генерал Валерий Герасимов рӯзи 13-уми март изҳорот дод.

Ӯ гуфт, ки дар муассисаҳо ва пойгоҳҳои Вазорати дифои Сурия мушовирони Русия, намояндагони Маркази оштидиҳии ду тарафи низоъ кор мекунанд.

"Дар сурати таҳдид ба ҷони низомиёни мо, нерӯҳои низомии Федератсияи Русия чораҳои ҷавобиро, ҳам бар зидди мушакҳо ва ҳам мушакбарҳо, ки истифода мешаванд, ба кор мебарад", - гуфт Герасимов.

Қаблан Иёлоти Муттаҳидаи Амрико ҳушдор дод, ки агар Русия, Эрон ва Сурия оташбаси 30-рӯзаро сарфи назар кунанд, Амрико барои хотима додан ба ҳамлаҳои кимиёвӣ ва "азиятҳои ғайриинсонӣ" дар Сурия даст ба амал мезанад.

Сафири ИМА дар Созмони Милали Муттҳаид, Никки Ҳейлӣ рӯзи 12 март дар Шӯрои амнияти СММ гуфт, оташбасе, ки онро СММ ду ҳафта пеш тасвиб кард, ноком шуд. Ӯ гуфт ИМА оташбаси нави 30- рӯза пешниҳод мекунад, ки наметавонад мавриди суиистифода қарор бигирад ва ҳазорҳо нафарро дар Ғутаи Шарқӣ ба гуруснагӣ ва марг рӯ ба рӯ кунад.

Раҳбари Пентагон бо сафари элоннашуда вориди Кобул шуд

Ҷим Мэттис - раҳбари Пентагон

Вазири дифои ИМА Ҷим Мэттис бо сафари эълоннашуда вориди Кобул шуд, то аз амалиёти ҳарбӣ ва дурнамои ҷалби Толибон ба гуфтушунид бо ҳукумати Афғонистон натиҷагирӣ кунад. Ин сафар, ки рӯзи 13 март оғоз шуда, замони баргузории он ба далели амниятӣ эълон нашуд, бо ҳадафи таҳкими мавқеи Амрико дар ҷанге, ки 16 сол боз идома дорад, ҷараён мегирад.

Мэттис қабл аз фурӯдоии ҳавопаймо дар Кобул ба хабарнигорон гуфт, ки Ийолоти Муттаҳидаи Амрико аломатҳои таваҷҷӯҳи Толибонро ба гуфтушунид мушоҳида мекунад.

Қарор аст дар ин сафар Мэттис бо президенти Афғонистон Ашраф Ғанӣ ва низомиёни ИМА, бо шумули генерал Ҷон Николсон, фармондеҳи нерӯҳои Амрико дар Афғонистон мулоқот кунад.

Рӯзи 28 феврал Ашраф Ғанӣ ба Толибон таъсиси ҳизби сиёсиро пешниҳод кард ва гуфт, ки барои берун овардани ин гурӯҳ аз зери таҳримҳои кор хоҳад кард, агар Толбибон ба музокирот розӣ шаванд.

Мэттис ҳамчунин гуфт, ки ҷангиён бояд ҳукумати Кобул ва волоияти қонунро эътироф кунанд. Толибон то ҳол гуфтугӯи мустақим бо ҳукумати ғарбгаро ва ба гуфтаи онҳо "ғайриқонунӣ"-и Афғонистонро рад мекардаанд. Ин гурӯҳи мусаллаҳ пофишорӣ дошт, ки танҳо бо Ийолоти Муттаҳидаи Амрико музокирот мекунад. Толибон ҳамчунин шарти дигар доранд, ки нерӯҳои НАТО бояд қабл аз оғози гуфтушунид Афғонистонро тарк кунанд.

Хонаводаи Додохонов ба ташхиси ҷасадҳо дар Саудӣ иҷозат надод

Ҷасади соҳибкори тоҷик Бахтиёр Додохонов ва се узви оилаи ӯро, ки дар яке аз меҳмонхонаҳои шаҳри Мадинаи Арабистони Саудӣ ёфт шуд, дар ҳамонҷо дафн карданд. Наздикони Бахтиёр Додохонов мегӯянд, ки ба ташхиси ҷасадҳо иҷоза надодаанд.

Қаблан чаҳор намояндаи хонаводаи Додохоновҳо барои иштирок дар санҷиши тиббии ҷасади соҳибкор Бахтиёр Додохонов ва зану ду писараш ба Арабистони Саудӣ рафта буданд. Ҷасади ин чаҳор нафар рӯзи 5-уми марти имсол дар ҳуҷраи меҳмонхонае дар Мадина ошкор шуд.

Бахтиёр Додохонови 35-сола соҳибкор буд ва барои Ҳаҷҷи Умра дар Мадина қарор дошт. Ҳамроҳ бо ӯ ҳамсараш Гулнора Додохонова (33-сола), писаронаш Некрӯз (8-сола) ва Беҳрӯз (12-сола) низ буданд, ки ба ҳалокат расиданд.

Наздикони Бахтиёр Додохонов мегӯянд, барои бозкушоии ҷасадҳо ё анҷоми амалиёти колбадшиносӣ ба мақомоти Арабистони Саудӣ иҷоза надодаанд. Ба қавли ҳамсуҳбати Радиои Озодӣ, мақомоти Саудӣ ба онҳо гуфтаанд, ки натиҷаҳои пешакии марги Бахтиёр Додохонов ва оилаашро то як моҳи дигар эълон хоҳанд кард.

Ходимони БДА-и Узбекистонро аз паси дарахтҳо берун оварданд

Ходими БДА дар пинҳонгоҳ

Дар Узбекистон ба кормандони Бозрасии давлатии автомобилӣ (БДА) амр шудааст, ки ҳангоми иҷрои вазифаи худ дигар дар пушти дарахт ё иншооте пинҳон нашаванд.

Ин хабарро сардори Раёсати умури дохилии шаҳри Тошканд генерал-майор Рустам Ҷураев дар суҳбат бо расонаҳои маҳаллӣ тасдиқ кард.

Пештар масъулони Вазорати умури дохилии Узбекистон мегуфтанд, ки кормандони онҳо ҳақ доранд, вазифаҳои худро ҳам пинҳонӣ ва ҳам ошкоро анҷом диҳанд.

Тайи як ҳафтаи ахир дар кори Раёсати умури дохилии Тошканд як қатор навгониҳо ба мушоҳида расид. Аз ҷумла сомонаи расмии раёсат фаъол шуд ва акнун сокинон метавонанд наворҳои худро дар бораи нақзи қоидаҳои ҳаракат дар роҳ ба мақомот фиристанд. Ҳамчунин раёсат ҳамкории наздикро бо корбарони интернет ба роҳ мондааст.

Захарова ҷаласаи порлумони Бритонияро "масхарабозӣ" номид

Мария Захарова

Сухангӯи Вазорати корҳои хориҷии Русия Мария Захарова ба изҳороти сарвазири Бритония Тереза Мэй вокуниш нишон дод.

"Ин як масхарабозӣ дар порлумони Бритония буд. Як маъракаи навбатии сиёсиву иттилоотиест, ки асосаш ҳангома аст", - иқтибос овардааст РИА Новости аз суханҳои Захарова.

Сухангӯи ВКХ Русия афзуд, Бритония бояд шарҳ диҳад, ки қазияҳои пешин, аз ҷумла парвандаҳои Литвиненко, Березовский, Перепиличний ва бисёре аз дигарон чӣ гуна ба поён расиданд.

Сарвазири Бритония рӯзи 12 март гуфт, ки афсари пешини Идораи кулли истихбороти Русия Сергей Скрипалро бо маводе заҳролуд кардаанд, ки дар озмоишгоҳҳои Русия коркард шудааст. Ба гуфтаи ӯ, агар ин тасдиқ шавад, кишвараш зидди Русия чораҳои иловагӣ хоҳад андешид.

“Заҳролудшавии Скрипал: Бритониё Русияро айбдор мекунад"

Ҳаракати сиёсии Аблязов "созмони экстремистӣ" эълон шуд

Мухтор Аблязов

Додгоҳе дар шаҳри Остона ҳаракати сиёсии "Интихоботи демократии Қазоқистон"-ро, ки ҳанӯз сабти ном нашудааст, "созмони тундрав" эътироф кард.

Ин ҳаракатро раиси пешини Бонки БТА Мухтор Аблязов таъсис додааст, ки ҳоло дар хориҷ зиндагӣ мекунад. Аблязов худро мухолифи президенти амалкунандаи Қазоқистон Нурсултон Назарбоев медонад.

Дар нишасти хабарие дар шаҳри Остона 13 март намояндаи додситонии кулли Қазоқистон Оксана Лоскутова гуфт, ҳаракати сиёсии Аблязовро додгоҳи Есилскии Остона тундрав эътироф кард.

"Фаъолияти ин ҳаракат дар саросари Қазоқистон манъ гардид", - гуфт Лоскутова. Ба гуфтаи ин мақомдор, паҳн кардани матлаб дар бораи ҳаракати "Интихоботи демократии Қазоқистон" дар расонаҳо, шабакаҳои иҷтимоӣ, паёмакрасонаҳо ва сомонаҳо манъ шуд.

Намояндаи додситонии кул гуфт, Мухтор Аблязов "фаъолияти ғайриқонунӣ" анҷом медиҳад. "Тавассути шабакаҳои иҷтимоӣ ва паҳн кардани варақаҳо Аблязов сокинонро ба пайвастан ба ҳаракати худ даъват, ҳукуматро бадном ва ҳисси эътирозии мардумро бармеангезонад. Ҳадафи Аблязов ва фаъолони ҳаракати вай ғасби ҳукумат аст", - гуфт Лосуктова.

Аммо Мухтори Аблязов мегӯяд, ки мехоҳад "режими Назарбоев"-ро бо роҳи осоишта барҳам диҳад.

Моҳи июни соли 2017 Аблязов дар Қазоқистон ғоибона ба 20 соли зиндон маҳкум шуд. Ӯро дар "дуздии амволи бонки БТА" айбдор медонанд. Аммо Аблязов ин айбҳоро рад мекунад.

Прокурорҳо бояд аз даромади худ гузориш диҳанд

Президент Эмомалӣ Раҳмон дар мулоқоташ бо кормандони системаи прокуратураи Тоҷикистон гуфт, мувофиқ ба қонунгузории Тоҷикистон дар баробари хизматчиёни давлатӣ ҳамакнун прокурорҳо ва дигар кормандони мақомоти ҳифзи қонун бояд дар бораи даромад ва дороиҳои худ эъломия пешниҳод кунанд.

Эъломия аз даромад дар гузашта бештар аз хизматчиёни сохторҳои давлатӣ тақозо мешуд.

Дар мулоқоташ бо кормандони прокуратура ва дигар ходимони ҳифзи қонун дар Душанбе, Эмомалӣ Раҳмон аз ҳолатҳои коррупсия ва сӯиистифода аз мақом дар миёни сохторҳои ҳифзи қонун изҳори нигаронӣ кард.

Вай гуфт, ки солҳои 2007-2016 аз ҷониби Агентии назорати давлатии молиявӣ ва мубориза бо коррупсия 13 ҳазор ҷинояти коррупсионӣ ва ҷиноятҳои иқтисодии хусусияти коррупсионидошта ошкор ва ба қайд гирифта шудааст. Аз соли 2010 инҷониб, дар маҷмӯъ, нисбат ба 2300 нафар кормандони мақомоти ҳифзи ҳуқуқ, сохторҳои ҳарбӣ ва судҳо, аз ҷумла мақомоти корҳои дохилӣ - 696, мудофиа - 539, амнияти миллӣ - 545, гумрук - 109, андоз - 124, адлия - 81, Гвардияи миллӣ - 78, Шӯрои адлия ва Суди Олӣ - 53, Кумитаи ҳолатҳои фавқулода ва мудофиаи гражданӣ - 30, Агентии назорати маводи нашъаовар - 23 ва Агентии назорати давлатии молиявӣ ва мубориза бо коррупсия 19 парвандаи ҷиноятӣ оғоз карда шудааст.

Шаҳрвандони Тоҷикистон бо 24 тонна сӯзишвории қочоқӣ боздошт шуданд

Акс аз бойгонӣ

Мақомоти марзбонии Қирғизистон гуфтанд, ки дар гузаргоҳи марзии ноҳияи Лайлаки вилояти Ботканд 24 тонна сӯзишвории қочоқӣ ошкор ва боздошт шудааст. Ботканд бо вилояти Суғди Тоҷикистон ҳаммарз аст.

Дар хабари расмии марзбонҳои Қирғизистон гуфта мешавад, ки субҳи 13 март ду шаҳрванди Тоҷикистон талош доштанд бо ду мошини борбар дар макони дур аз назорати марзбонӣ аз Қирғизистон ба Тоҷикистон сӯзишвории бидуни қайдро ворид кунанд. Ҳангоми талоши убури марз дар 250-метрии сарҳад ин мошинҳо ва соҳибонаш боздошта шуданд.

Соҳибони бори қочоқӣ ба пардохти ҷарима муваззаф шуда, сӯзишвории мусодирашуда ба ихтиёри кормандони хадамоти давлатии мубориза бо ҷиноятҳои иқтисодӣ дода шуд. Ноябри соли 2017 нахуствазири Қирғизистон Сапар Исоқов супориш дод, ки назорат аз қочоқи сӯзишворӣ шадидтар шавад.

“Мегафон” ва “Вавилон” аз болоравии расмии нархҳо хабар доданд

Ду ширкати мобилӣ дар Тоҷикистон хабар додаанд, ки нархи тамосро боло мебаранд. Ин дар ҳолест, ки қаблан ширкати “Тселл” низ нархи гуфтугӯйро боло бурда буд. Баланд рафтани нархи алоқаи мобилӣ пеш аз ҳама аҳолиро нигарон кардааст, ки мегӯянд ин кор зарбае ба ҷайби онҳо хоҳад буд.

Ширкатҳои “Мегафон” ва “Вавилон” субҳи 13 март бо пахши иттилоия хабар доданд, ки сар аз ҳафтаи оянда дар нархгузории онҳо тағйирот сурат мегирад.

Масъулини ширкати “Вавилон” мегӯянд, аз рӯзи душанбе 19 март нархгузорӣ дар чанд тарофа гаронтар хоҳад шуд. Аз ҷумла дар тарофаҳои “Муфид”, “Дастрас”, “Фоиданок”, “Оддӣ”, “Суғдиён” ва аз 1 апрел дар тарофаҳои “Сайёҳ” ва “Бадахшон” нархҳо боло мераванд. Аммо ин ширкат шарҳ надодааст, ки нархҳо чӣ қадар гаронтар хоҳанд шуд.

Ширкати “Мегафон” низ рӯзи 13 март хабар додааст, ки аз ҳафтаи оянда арзиши ягонаи зангҳо ва паёмакҳо амал мекунад, ки он 20,5 дирамро ташкил медиҳад. Муштариён мегӯянд, қаблан барои як дақиқаи занг ва смс 16 дирам пардохт мекарданд.

Раванди болоравии нархи гуфтугуи телефонӣ, аз оғози моҳи марти соли равон шуруъ шуд. Нахуст ширкати “Тселл” нархи гуфтугӯй дар чанд тарофаашро боло бурд.

Қаблан як манбаъ дар Хадамоти зиддиинҳисорӣ, бо шарти ифшо нашудани номаш ба Радиои Озодӣ гуфта буд, чор ширкати мобилӣ барои гарон кардани нархи гуфтугӯй аз ин ниҳод иҷозат хостаанд. Ҳамакнун се ширкати мобилӣ тавонистанд розигии Хадамоти зиддиинҳисорӣ барои боло бурдани нархро ба даст оварданд.

Алоқаи мобилӣ дар Тоҷикистон аз камтарин хадамотҳое буд, ки дар солҳои гузашта нархаш пайваста поён мерафт. Ширкатҳои мобилӣ бо коҳиши нарх талош мекарданд муштариёни зиёдтарро ҷалб кунанд.

Коршиносон мегӯянд, боло рафтани нархи алоқаи мобилӣ дар Тоҷикистон натиҷаи дахолати зиёди давлат ба бозори алоқа аст.

Соҳаи мухобироти Тоҷикистон то чанд соли пеш аз бахшҳои босуръат рушдкунандаи иқтисоди кишвар маҳсуб меёфт, вале дар ду соли охир се ширкат – "Тселл", "Мегафон" ва "Билайн" аз ҷониби сохторҳои андоз барои мушкил дар пардохти молиёт ҷарима шуданд. Аз ҷумла, ширкати "Билайн" 151,3 миллион сомонӣ, "Мегафон" - 155 миллион сомонӣ ва "Тселл" - 155 миллион сомонӣ ҷарима шуданд. Ду ширкати аввал дар баҳсҳои додгоҳӣ мағлуб шуданд.

Феълан дар Тоҷикистон панҷ ширкат “Вавилон,” “Тселл,” “Мегафон,” “Билайн” ва “ТК Мобайл” ба аҳолӣ хадамоти мобилиро пешниҳод мекунанд. Қаблан ширкатҳои мобилӣ чандин маротиба тариқи сафоратхонаҳо ва намояндагиҳои созмонҳои байналхалқӣ дар Душанбе аз гаронии андоз шикоят карда буданд.

Ёфтҳои бештар

Гузоришҳои видеоӣ

Ахбори Озодӣ аз 18-уми феврали соли 2019
лутфан мунтазир бошед
### Эмбед ###

### Феълан кор намекунад ###

0:00 0:15:00 0:00
XS
SM
MD
LG