Пайвандҳои дастрасӣ

Хабарҳо

Амири Қатар даъвати шоҳи Саудиро напазируфтааст

Акс аз бойгонӣ

Раҳбарони чанд кишвари арабӣ ва аз шарикони аслии Амрико дар шаҳри Риёз пойтахти Арабистони Саудӣ ҷамъ омадаанд ва ҳамкориҳояшонро баррасӣ мекунанд.

Дар нишасти сарони кишварҳои Шӯрои Ҳамкориҳои Халиҷ, раҳбарони Арабистони Саудӣ, Имороти Муттаҳидаи Арабӣ, Баҳрай Кувайт ва Уммон ҳузур доранд. Узви дигари шӯро Қатар фақат вазирашро ба нишаст фиристодааст, зеро робитаҳояш бо дигар узви шӯро бад шудааст.

Хабаргузории “Анадолу“- и Туркия аз қавли мақомоти Қатар навиштааст, ки Амир Тамим ал-Танӣ дар нишаст ҳузур нахоҳад дошт, вале сабаби нарафтанашро нагуфтаанд. Ҳарчанд ӯро Шоҳи Саудӣ Салмон расман ба нишаст даъват кардааст.

Арабистони Саудӣ, Имороти Муттаҳидаи Арабӣ, Баҳрайн ва Миср, моҳи июни соли 2017 Қатарро ба ҳимоят аз терроризм муттаҳам карданд ва равобити дипломатӣ бо ин кишварро қатъ карданд. Қатар ин иддаоро беасос номидааст.

Ваннеса аз Мексика зебосанами ҷаҳон эълон шуд

Зебосанами мексикоӣ Ванесса Понс де Леон дар озмуни ҷаҳонии Маликаи хубон дар соли 2018 мақоми аввалро соҳиб шуд ва тоҷи зебоиро ба сар гузошт.

Озмуни 68-уми Маликаи хубон имсол дар ҷазираи Ҳайнани Чин баргузор шуд. Ваннеса Понс де Леон 26 сол дорад. Мария Василевич, донишҷӯ аз Белорус дар байни зеботарин панҷгона қарор гирифт.

Дар ин панҷгона зеборӯён аз Ямайка, Тайланд ва Уганда ҳам шомил шуданд. Ба гуфтаи баргузоркунандагонаш ин озмунро 1 миллиард нафар дар саросари ҷаҳон тамошо кардаанд.

Дар Арманистон интихоботи порлумонӣ идома дорад

Раъйдиҳӣ дар Арманистон

Дар Арманистон 9- уми декабр интихоботи порлумонӣ сурат мегирад ва 9 баъд аз онки тазоҳуроти азими мардумӣ сабаби тағйири осоиштаи ҳукумат шуд.

Бино ба назарсанҷиҳо, дар интихобот эътилофи аҳзоби ба раҳбарии Никол Пашиниён, нахуствазири муваққат пешсаф аст. Дар 9 моҳи пеш маҳз зери раҳбарии ӯ тазоҳургарон ба хиёбонҳо баромаданд ва Серж Саркиссиён, раиси ҷумҳурро маҷбур карданд, ки аз мақомаш биравад.

Худи Пашиниён дар ниҳоят нахуствазир интихоб шуд, вале Ҳизби Ҷумҳурихоҳи ҳоким ҳамчунон дар порлумон соҳиби аксарияти курсиҳо монд. Ӯ моҳи октябр аз мақомаш истеъфо дод, то ки интихоботи зудраси порлумонӣ баргузор шавад. То замони интихоби нахуствазири нав, ӯ ҳамчунон салоҳиятҳои раиси ҳукуматро иҷро мекунад.

Ҳушдори Тереза Мей ба вакилони порлумони Бритониё

Тереза Мей

Тереза Мей нахуствазири Бритониё мегӯяд, агар вакилони мардумӣ созиши кишвар бо Иттиҳодияи Аврупо тасвиб накунанд, Бритониё ба як вазъи номаълуме рӯ ба рӯ мешавад.

Ӯ дар мусоҳибае, ки рӯзномаи “Мейл” рӯзи 9-уми декабр нашр кард, гуфтааст, тасвиб нашудани созиш маънии “бесуботии бузург” дар Бритониёро дорад. Ӯ бо муроҷиат ба вакилони мардумӣ гуфтааст, амалкарди онҳо сабаби интихобот мешавад ва дар ин сурат мумкин аст, “ҳеҷ хуруҷе аз Иттиҳодияи Аврупо сурат нагирад”.

Моҳи гузашта ҳукумати Бритониё ва Иттиҳодияи Аврупо дар бораи шароити тарки Бритониё аз иттиҳодия дар моҳи марти соли оянда ба мувофиқа расиданд, вале созиш дар ин заминаро бояд порлумони Бритониё ҳам тасвиб кунад.

Аксари вакилони порлумон аз ҷумла аъзои Ҳизби Муҳофизакори Тереза Мей ҳам мухолифи созиш ҳастанд .аз ин рӯ мумкин аст, ки тасвиб нашавад. Вакилон мегӯянд, созиши мазкур ҳамчунон Бритониёро пойбанди Иттиҳодияи Аврупо нигаҳ медорад.

Ҳомии шинохтаи ҳуқуқи Русия даргузашт

Людмила Алексеева 91 сол дошт.

Людмила Алексеева, яке аз ҳомиёни собиқадори ҳуқуқи инсон ва аз мухолифони давлат дар Русия рӯзи 8-уми декабр ва дар синни 91-солагӣ даргузашт.

Михаил Федотов, раиси Шӯрои ҳуқуқи башар дар Русия гуфт, Людмила Алексеева “то охири умраш ҳомии ҳуқуқи инсон монд, ӯ зиндагиашро ба дӯстонаш бахшид. Марги ӯ талафоти бузурге барои тамоми ҳомиёни ҳуқуқи инсон аст.”

Рӯзномаи “Москов таймс” ӯро як дафъа “модари тамоми ҷомеаи ҳомии ҳуқуқ дар Русия” номидааст. Людмила Алексеева, ки дар асл бостоншинос буд, аз соли 1960 дар замони шӯравӣ барои ҳуқуқи инсон мубориза бурдааст.

Ӯ ба ҳимоят аз ҳуқуқи дигарандешон ба мисли нависанда Андрей Синиавский ва Юлий Даниел садо баланд кардааст, ки ҳардуро барои интиқоди ҳукумати шӯравӣ дар матбуоти хориҷӣ ба зиндон андохтанд.

Президенти собиқ худашро ба дасти пулис супурд

Роберт Кочариён

Роберт Кочариён, раиси ҷумҳури собиқи Арманистон баъди беэътибор шудани ҳукми раҳоии ӯ аз боздошт, ихтиёрӣ ба идораи пулис рафта ва худро ба дасти мақомот таслим кардааст. Дар ин бора Ҳайк Алумиён, вакили дифои ӯ хабар дод.

Аз ин пештар дар рӯзи 7-уми декабр, додгоҳи болоӣ ҳукм дар бораи раҳо кардани Роберт Кочариён аз боздоштро беэътибор кард ва амр дод, ки ӯ дигарбора дастгир шавад. Боздошти дигарбораи раиси ҷумҳури собиқ ду рӯз пеш аз интихоботи порлумонӣ дар Арманистон сурат мегирад.

Роберт Кочариёнро моҳи июли имсол ба саркӯби тазоҳуроти мухолифон дар соли 2008 муттаҳам ва дастгир карданд. Дар он сол дар натиҷаи фурӯ нишондани тазоҳурот 8 тазоҳургар ва ду маъмури пулис кушта шуданд. Роберт Кочариёнро ба он муттаҳам мекунанд, ки бар хилофи қонун ба артиш амр додааст, ба зидди тазоҳургарон аз нерӯ истифода кунанд.

Мухолифон дар он сол бо ин иддао, ки дар интихоботи порлумонӣ тақаллуб шудааст, ба майдон баромаданд. Роберт Кочариён мегӯяд, иддаоҳо асос надоранд ва раҳбарони нав мехоҳанд аз ӯ ниқор бигиранд.

Додситонҳо: "Шарикони Трамп дурӯғи зиёд гуфтаанд"

Пол Манафорт, раиси собиқи ситоди интихоботии Доналд Трамп, раиси ҷумҳури Амрико

Додситонҳои Амрико ҷузъиёти парвандаҳо ба зидди ду шарики Доналд Трамп, раиси ҷумҳури Иёлоти Муттаҳидаро нашр карданд ва мегӯянд, ки онҳо дар бораи иртиботашон бо мақомоти Русия дурӯғ гуфтаанд.

Дар сурати собит шудани ин иттиҳомот мумкин аст, Пол Манафорт, раиси собиқи ситоди интихоботии Трамп ва Майкл Коен, вакили собиқи дифои ӯро ба солҳои тулонии зиндон маҳкум кунанд.

Парвандаҳои навро додситонҳо рӯзи 7-уми декабр ба додгоҳ супурдаанд. Бо вуҷуди ин иттиҳомот ба зидди шариконаш Доналд Трамп рӯзи 7 -уми декабр бо нашри як баёния гуфт, ки “ҳеҷ чизе ба зидди ӯ пайдо накардаанд ва матбуот аз ҳеҷ чиз гузориш месозад”.

Айни замон Роберт Мюллер, додситони махсуси Амрико қазияи дахолати эҳтимолии Русия ба интихоботи президентии соли 2016 ва ҳамкории шарикони Трамп бо мақомоти Русияро таҳқиқ мекунад. Доналд Трамп иддаоҳо дар бораи чунин ҳамкориро рад кардааст, Русия ҳам гуфтааст, ба интихоботи Амрико ҳеҷ гуна дахолат накардааст.

Рӯҳонӣ амалкарди Амрикоро "терроризми иқтисодӣ" номид

Ҳасан Рӯҳонӣ, зимни нишасти хабарие дар шаҳри Ню Йорк дар рӯзи 26-уми сентябри соли 2018

Ҳасан Руҳонӣ, раиси ҷумҳури Эрон таҳримоти иқтисодии Амрико ба зидди кишварашро “терроризми иқтисодӣ” номид ва гуфт, дар сурати иҷрои таҳримот кишварҳои ғарбӣ зери сели маводи мухаддир мемонанд.

Ҳасан Руҳонӣ дар ин бора рӯзи 8-уми декабр дар як нишасти байналмилалӣ дар бораи мубориза бо терроризм дар шаҳри Теҳрон суҳбат кард. Дар ин нишаст раҳбарони порлумонҳои Афғонистону Эрон, Покистону Туркия ва Чину Русия ширкат доштанд.

Суханронии Ҳасан Руҳонӣ дар телевизиони давлатии Эрон нашр шуд ва ӯ мегуфт, агар Эрон заиф бишавад, дар муқобила бо қочоқи маводи мухаддир ҳам заиф хоҳад шуд.

Эрон яке аз роҳҳои аслии қочоқи маводи мухаддир аз Афғонистон аст, ки аз онҷо берун меяд ва то Аврупо ва кишварҳои Халиҷи Форс мерасад. Аҳволи иқтисоди Эрон баъди хуруҷи Амрико аз созиши атомӣ ва барқарории таҳримоти иқтисодӣ бисёр бад шудааст.

Боздошти 340 тазоҳургар дар пойтахти Фаронса

Пулис аз гази ашковар истифода бурд, то тазоҳургарон ба тарафи кохи раиси ҷумҳур наёянд.

Пулиси Фаронса барои монеъ шудан ба ҳаракати тазоҳургарон ба самти кохи раиси ҷумҳур дар шаҳри Порис аз гази ашковар истифода бурдааст. Бино ба гузоришҳо, тазоҳургарон бо маъмурони пулис бархурд кардаанд ва 340 нафари онҳо дастгир шудаанд.

Дар Фаронса чанд рӯз бо тазоҳуроти мардуми норозӣ идома дорад ва мақомот барои таъмини амният 89 ҳазор маъмури пулисро сафарбар кардаанд. Охири ҳафтаи гузашта тазоҳурот дар Порис ба хушунат печид ва дар натиҷа 130 нафар маҷрӯҳ шуданд.

Ҳукумати Фаронса ҳушдор дод, ки мумкин аст, тазоҳуроти ба ном “камарбандони зард” ба ихтиёри “унсурҳои ифротӣ ва саркаш” бигзарад. Тазоҳурот баъди он сар зад, ки ҳукумат гуфт, молиёт аз маводи сӯхтро боло мебарад, аммо зери фишори тазоҳургарон Эммануэл Макрон, раиси ҷумҳури Фаронса рӯзи 5-уми декабр гуфт, ки аз ин қарор даст мекашанд.

Аммо ин эълон тазоҳургаронро қонеъ накард. Онҳо ҳоло мехоҳанд, молиёт камтар шавад ва музди корашонро баланд бардоранд.

Таҳқиқи ришваситонии милиса дар "Истиқлол" поён ёфт

Мақомоти мубориза бо ришвахорӣ дар Тоҷикистон мегӯянд, таҳқиқи парвандаи як афсари Бозрасии давлатии автомобилиро, ки ба ришваситонӣ муттаҳам мешавад, анҷом дода ва барои муҳокима ба додгоҳ фиристодаанд.

Оҷонси мубориза бо коррупсия дар Тоҷикистон рӯзи 8-уми декабр бо нашри як баёнияи расмӣ гуфт, Фирдавс Ғаффоров, сардори шуъбаи бозрасӣ дар шаҳри Истиқлол рӯзи 4-уми октябр ронандаи як дучархаро дар роҳ дастгир карда ва бинобар надоштани ҳуҷҷати ронандагӣ ва шиносномаи техникӣ ба майдони ҷаримавӣ бурда” ва барои аз ҷавобгарии маъмурӣ озод кардани ӯ 2000 сомонӣ талаб кардааст.

Ба гуфтаи оҷонсӣ, баъди шикояти расмии ронанда, ки аз “А” ном бурдаанд, Фирдавс Ғаффоров дастгир ва ба ришваситонӣ муттаҳам шудааст. Дар баёнияи оҷонсӣ омадааст, Фирдавс Ғаффоров, рӯзи 6-уми октябр бо иттиҳоми гирифтани 2 ҳазор сомонӣ ришва дастгир шуд.

Истихбороти Чехия танқиди президентро рад кард

Пайкараи нахустин президенти Чехословакия Томас Масарик

Истихбороти Чехия шабакаи ҷосусҳои як хадамоти махсуси Русияро ошкор кард. Телевизиони Чехия рӯзи 7-уми декабр аз қавли раҳбари идораи амният ва иттилооти ин кишвар Михал Коуделка гуфт, ки ниҳоди таҳти назари ӯ дар панҷ соли охир даҳҳо ҷосуси Русия ва Чинро ошкор кардааст.

Изҳороти раҳбари истихбороти Чехия ба дунболи танқиди президент Милош Земан пахш шуд, ки гуфт, хадамоти амният бидуни далел дар бораи ҳузури теъдоди зиёди ҷосусҳои Русия ва Чин гузориш медиҳад, дар ҳоле ки ин маълумот дар гузоришҳои махфии хадамоти махсус вуҷуд надорад.

Бисёр сиёсатмадорони Чехия аз Идораи амният ва иттилоот пуштибонӣ карданд. Нахуствазир Андрей Бабиш гуфт, ин муассиса фаъолияти ҳирфаиро намоиш дод ва вазири умури дохилӣ ин истихборотро аз идораҳои ҳирфаии Аврупо номид.

Танқиди Милош Земан ба гузориши солонаи Идораи амният ва иттилоот дахл дошт, ки рӯзи 3-юми декабр нашр шуд. Дар ин санад таҳдиди фаъолияти Русия ба амният бештар аз таҳдидҳои террористӣ, тундгароӣ ва ҷиноӣ унвон шуд.

Ба ғайр аз ҳамлаҳои киберӣ ба Вазорати умури хориҷии Чехия, хадамоти махсус Русияро ба татбиқи "стратегияи гибридӣ" дар қаламрави кишвар, ки барои заиф кардани НАТО ва Иттиҳоди Аврупо истифода мешавад, муттаҳам кард. Дар баробари ҷосусӣ, сухан аз талошҳои Русия барои назорат ба муассисаҳои калидӣ, ширкатҳо ва ташкили маъракаҳои таблиғотӣ ба фоидаи Маскав аст.

Президенти Чехия Милош Земан аз ҳаводорони Русия аст ва инро пинҳон намекунад. Ӯ борҳо ба Маскав сафар карда, зарурати лағви таҳримҳо алайҳи Русияро таъкид кардааст.

"Нигоҳи манфӣ ба Русия ва Путин бештар шудааст"

Бошандагони бахши умдаи кишварҳои ҷаҳон ба Русия ва раҳбари он Владимир Путин нигоҳи манфӣ доранд, вале аксари онҳо эътироф мекунанд, ки дар даҳ соли ахир нақши Русия дар саҳнаи байналмилалӣ бештар шуд. Ин аст натиҷаи пажуҳиши Pew Research -ширкати омӯзиши афкори умум, ки дар даҳҳо кишвар анҷом дод.

Ба сурати умум, 34 дар сади пурсидашудаҳо ба Русия назари нек доранд ва 54 дар сад нигоҳи манфӣ. Арзёбии фаъолияти Путин дар саҳнаи байналмилалӣ камтар аз ин аст. Танҳо 26 дар сад ӯро мусбат арзёбӣ кардаанд. 42 дар сад ба ин назаранд, ки Русия дар масоили байналмилалӣ нақши муҳим дошт, 19 дар сад назари баръакс доданд.

Арзёбии пурсидашудаҳо дар бораи Русия ва Путин дар кишварҳои мухталиф аз якдигар фарқ мекунад.

Назари манфӣ дар давлатҳои Ғарб бартарӣ дорад. Барои намуна дар Нидерландия 79 дар сад ба Русия назари манфӣ ва 15 дар сад нигоҳи мусбат доранд. Дар Британия ин рақам 62 ба 22 аст ва дар ИМА 64 ба 21 аст. Баҳои каме беҳтар, беш аз 30 дар сад, дар Олмон ва Италия дод шуд.

Дар Япония ва Исроил низ ба Русия ва Путин бештар назари манфӣ доранд.

Дар сафи кишварҳое, ки ба Русия баҳои мусбат додаанд, Филиппин Кореяи Ҷанубӣ, Тунис, Нигерия, як қатор кишварҳои Африқо, Амрикои Лотинӣ ва Юнон ҷой доранд.

Дар Аврупо бештар намояндагони ҳизбҳои ростгаро ва популистӣ ба Путин эътимод доштаанд. Аммо маъруфияти ӯ дар байни ин гурӯҳҳо камтар аз 50 дар сад аст.

Ба сурати умум, дар чанд соли ахир, муносибат ба Путин дар кишварҳои ғарбӣ дигар нашудааст - миқёси он дар Аврпуо як каме беҳтар, вале дар ИМА бештар манфӣ шудааст.

Чин хост, Канада мудири Huawei-ро озод кунад

Мэн Ванҷоу

Чин аз Канада раҳоии мудири молии ширкати Huawei-ро талаб кард, ки дар заминаи гӯё нақзи таҳримҳои ИМА алайҳи Эрон боздошт шуд ва дар ростои истирод ба Амрико қарор дорад. Дар бораи боздошти ӯ нашрияи La Press рӯзи 5-уми декабр хабар дод.

Баъзе коршиносон пешгӯӣ мекунанд, ки боздошти мудири молии Huawei эҳтимол ташаннуҷи байни Вашингтон ва Пекинро, ки бе ин ҳам дар заминаҳои тиҷоратӣ ихтилоф доранд, бештар мекунад.

Мэн муовини раҳбари шӯрои Huawei ва духтари бунёдгузори ин ширкат Рэн Ҷенфей аст, ки муҳнадиси низомии Чин буд.

Huawei бузургтарин таъминкунандаи таҷҳисотест, ки ширкатҳои телефонӣ ва интернетӣ истифода мекунанд.

Моҳи ноябр Thе Wall Street Journal хабар дод, ки ИМА аз кишварҳои шарикаш хостааст, ҳангоми бунёди шабакаҳои мобилии насли нав аз харидории таҷҳизоти Huawei даст кашанд. Музокирот бо Олмон, Италия ва Ҷопон ҷараён дорад. Ба назари Амрико, Пекин метавонад бо истифода аз таҷҳизоти ширкатҳои чинӣ маълумоти муҳими тиҷоратӣ ва низомиро ҷамъоварӣ кунад.

Қаблан Амрико ширкати Huawei-ро ба рӯйхати сиёҳи таъминкунандагони таҷҳизот барои сохторҳои давлатӣ ворид карда буд.

Навори боздошт Фаронсаро ба хашм овард

Тазоҳургаре бо парчами Фаронса

Дар пазманзари эътирозҳои саросарии маъруф ба "ҷомазардҳо" дар Фаронса, талабаҳои синфҳои болоӣ ва муаллимони литсейҳо низ даст ба тазоҳурот заданд.

Ба навиштаи хабаргузории France Press, рӯзи 6-уми декабр эътироз 280 мактабро фаро гирифт, ки талабаҳо ва муаллимонашон аз ислоҳоти маориф, аз ҷумла шадид шудани қабул ба донишгоҳҳо норозӣ ҳастанд. Дар чанд шаҳри Фаронса дар байни пулис ва эътирозгарон задухӯрд сурат гирифт.

Наворе аз литсейи Сент-Экзепюрӣ, воқеъ дар канораҳои Порис, ки дар он даҳҳо талаба баъди боздошт аз тарафи пулис дар саҳни мактаб ба зону нишастаанд, хашми корбарони шабакаҳои иҷтимоӣ ва мухолифини сиёсиро ба бор овард.

Аз амалкарди пулис баъзе намояндагони ҳизби ҳокими "Ба пеш" низ нороҳат шуданд. Вазири маориф Жан-Мишел Бланкер наворро "такондиҳанда" номид, аммо ҳамзамон гуфт, боздошт баъди задухӯрд бо пулис сурат гирифт, ки дар он на фақат талабаҳои литсей иштирок карданд.

Дар ҷараёни бетартибиҳо 146 нафар боздошт ва ду мошин оташ зада шуд. Нашрияи Le Mond гуфт, ки қариб ҳамаи боздоштшудаҳо ноболиғон буданд.

Интизор меравад, рӯзи шанбе "ҷомазардҳо" дубора ба кӯчаҳои Порис бароянд. Онҳо лағви молиёти маводи сӯхтро, ки ҳукумат ахиран анҷом дод, гузашти кофӣ намешуморанд.

HRW аз ИА хост, ки раҳоии Азимҷон Аскаровро талаб кунад

Азимҷон Аскаров

Созмони байналмилалии Human Rights Watch аз Иттиҳоди Аврупо даьват кард: ки барои раҳоии Азимҷон Аскаров, ҳомии ҳуқуқи маҳкум ба ҳабси абад дар Қирғизистон садо баланд кунад.

Муроҷиати Human Rights Watch ба Иттиыоди Аврупо рӯзи 6 декабр, пеш аз баргузории конфронси «Иттиҳоди Аврупо – Қирғизистон» нашр шуд. Конфрон ба 10-уми декабр барномарезӣ шудааст. Дар номаи созмон омадааст, ки Аскаров аз соли 2010 ғайриқонунӣ дар зиндон аст. Созмон гуфтааст, ки сарфи назар аз талаби Кумитаи ҳуқуқи инсони СММ соли 2016, Қирғизистон Аскаровро озод накард.

Азимҷон Аскаров бо айбномаи ташкили бетартибиҳо ва даст доштан дар куштори корманди пулис дар ҷараёни даргирии байниқавмии қирғизҳо ва узбектаборон дар моҳи июни соли 2010 ба ҳабси якумрӣ маҳкум шуд.

Моҳи апрели соли 2016 Кумитаи ҳуқуқи инсони СММ аз мақомоти Қирғизистон бозбинии парвандаи Аскаровро дархост кард. Кумита гуфт, Аскаров ғайриқонунӣ боздошту шиканҷа шуда, дар шароити хеле бад нигаҳдорӣ мешавад.

Дертар додгоҳи вилояти Чуйи Қирғизистон парвандаи ҳомии ҳуқуқро дубора баррасӣ кард, вале ҳукми зинаи аввалии додгоҳро бетағйир гузошт.

Расонаҳо: Трамп Ҳезер Найертро сафири ИМА дар СММ таъйин кард

Сухангӯи Департаменти давлатии ИМА Ҳезер Нойерт

Президенти ИМА Доналд Трамп дар бораи таъйини сухангӯи Департаменти давлатӣ Ҳезер Найерт ба мақоми сафирии Амрико дар СММ қарор қабул кард. Дар ин бора сомонаи Bloomberg рӯзи гузашта бо такя ба манобеи худ хабар дод. Хабаргузории Reuters ва чанд расонаи дигар ҳам ин хабарро нашр карданд.

Ба иттилои Fox News, Трамп ин хабарро рӯзи 7 декабр Трамп тавассути шабакаҳои иҷтимоӣ пахш мекунад. Моҳе пеш Трамп ба рӯзноманигорон хабар дод, ки Нойертро ба мақоми сафирӣ пешбарӣ кардааст.

Нойерти 48-сола, ба навиштаи Bloomberg, "интихоби ғайристандартӣ" ба мақоми сафири доимии ИМА дар СММ аст, зеро ӯ аз таҷрибаи корӣ дар мақомҳои олии давлатӣ бархурдор нест.

То таъинаш ба мақоми сухангӯи Департаменти давлатӣ, Ҳезер Найерт мудати тӯлонӣ хабарнигори шабакаи телевизионии ABC News буд ва баъдан ба шабакаи Fox News гузашт. Нойерт дар он шабака муҷрии яке аз барномаҳои писандидаи Доналд Трамп - "Fox and Friends" буд.

Никкӣ Ҳейлӣ - сафири амалкунандаи ИМА дар СММ моҳи октябр хабар дод, ки то охири сол аз ин мақом меравад. Расонаҳо навиштанд, ки Ҳейлӣ мумкин аст, Майкл Пенсро дар мақоми ноиби президенти ИМА иваз кунад.

Мудири пешини UzMobile роҳбари Ucell таъйин шуд

Бинои Ucell дар Узбекистаон

Владимир Кравченко, мудири кулли пешини оператори миллии UzMobile ҳамакнун роҳбари Ucell таъйин шуд. Ширкати мобилии Ucell ахиран аз сӯи ҳукумати Узбекистон харидорӣ шуд.

Тони Грюнберг аз соли 2014 то кунун Ucell-ро мудирият мекард. Ба иттилои манбаъҳо, масъулони хориҷии Ucell сабукдӯш ва дар ивази онҳо шаҳрвандони Узбекистон ба кор таъйин шудаанд.

Владимир Кравченкои 33-сола Донишгоҳи вестминстери байналхалқии Тошкандро хатм кардааст. Ӯ моҳи марти соли 2017 мудири кулли UzMobile таъйин шуд.

Ширкати Telia (TeliaSonera-и пешин), ки сеяки саҳмияҳояш аз ҳукумати Шветсия аст, 5 декабр 94 дарсади саҳмияҳояшро ба Кумитаи давлатии Узбекистон дар умури хусисгардони моликият дар ивази $215 млн фурӯхт.

Баъди он ки сару садоҳо дар бораи порадиҳии TeliaSonera ба духтари пешини президенти Узбекистон Гулнора Каримова зиёд шуд, ширкат маҷбур гардид, ки ба вазорати адлияи ИМА наздики $1 млрд ҷарима пардозад.

Ширкати Telia 5 декабр дар сомонааш хабари фурӯхтани саҳмияҳояш ва хориҷшавиашро аз Узбекистон тасдиқ кард.

Порлумони Украина созишномаи дӯстӣ бо Русияро бекор кард

Суханронии Петр Порошенко дар Порлумон

Порлумони Украина рӯзи гузашта лоиҳаи қонуни "Лағви иҷрои созишномаи дӯстӣ, ҳамкорӣ ва шарикии Украина ва Русия"-ро ба тасвиб расонд.

Лоиҳаро президенти Украина Петр Порошенко рӯзи 3 декабр дар ҳоле ба порлумон пешниҳод кард, ки Русия се киштӣ ва 24 маллоҳи украиниро дар тангнои Керч тирборон ва боздошт кард. Мақоми лоиҳаи қонун ҳамчун "фаврӣ" арзёбӣ шуд.

​Пештар вазири умури дохилии Украина Павел Климкин хабар дод, ки дипломатҳои кишвараш аллакай иҷрои 48 созишнома бо Русияро қатъ карданд ва рӯзҳои наздик боз ҳудуди 40 қарордоди дигар бекор хоҳад шуд.

Созишномаи дӯстӣ ва ҳамкории Украинаву Москваро раҳбарони ду кишвар -- Леонид Кучма ва Борис Елтсин 31 майи соли 1997 имзо карда буданд. Он баъд аз тасвиби порлумони Украина ва Думаи давлатии Русия 1 апрели соли 1999 ба иҷро даромад. Украина низ аз ин созишнома расман аз 1 апрели соли 2019 хориҷ хоҳад шуд.

Порлумони Украина 6 декабр қонуни дигареро қабул кард, ки ба марзбонон иҷозат медиҳад, дар сурати ҳамла ба ин кишвар бидуни огоҳӣ ба сӯи ҳамлагарон оташ кушоянд.

Духтари президенти Қазоқистон ҷоизаи давлатӣ гирифт

Алия Назарбоева

Ҳайати муаллифони филми "Роҳ ба сӯи модар", ки духтари хурдии президенти Қазоқистон Алия Назарбоева - яке аз онҳост, соҳиби ҷоизаи давлатӣ шуд.

Фармони Нурсултон Назарбоев, президенти Қазоқистон дар бораи тақдими ҷоизаи давлатии соли 2018 дар бахши адабиёт ва санъат имрӯз дар расонаҳои расмӣ нашр шуд.

Дар ҳайати муаллифони филм коргардон Ахан Сатаев, бозигарон Олтиной Ногербек ва Одил Ахметов ҳам шомиланд. Назарбоев ҳамзамон ба мудири пешини театри давлатии "Операи Остона" Толеубек Алпиев ва дигар ходимони театр, шоирон Акуштап Бахтигереев, Тиништикбек Абдикаримов ва Утеген Оралбоевро ҷоиза дод.

Моҳи сентябри соли 2017 дар маҷаллаи амрикоии Holywood Reporter мақолаи "Оскарҳо: Қазоқистон "Роҳ ба сӯи модар" дар бахши филмҳои хориҷӣ, нашр шуда буд.

Додситони қазоқ барои "ҷиҳодиён" ҳукми тӯлонӣ хост

Даврон Булгимбоев

Додгоҳи шаҳри Алматои Қазоқистон шаби 6 декабр баррасии парвандаи "ҷиҳодиён"-ро ба поён расонд, ки дар доираи он се шаҳрванди ин кишвар -- Алмат Жумагулов, Оралбек Омиров ва Кенҷабек Абишев дар даъват ба терроризм айбдор мешаванд.

Айбдоркунандаи давлатӣ Даврон Булгимбоев гуфт, тафтишот ва додгоҳ айби гумонбаронро пурра собит кард ва аз додрас хост, Жумагуловро 9 сол ва Абишеву Омировро 8-солӣ аз озодӣ маҳрум кунад.

Додрас пас аз баромади додситон танаффус эълом карда, иштирокдорони боқиро огаҳ кард, ки барои баромад кардан омодагӣ бубинанд. Қарор аст, субҳи имрӯз мурофиа идома ёбад.

Алмат Жумагулови 44-сола дар таблиғи терроризм ва барангехтани адовати миллӣ айбдор мешавад. Кенҷабек Абишеви 52-сола ва Оралбек Омирови 48-сола дар таблиғи терроризм айбдор ҳастанд. Айбдоршавандаҳо ин айбро рад мекунанд ва онро сиёсӣ меноманд. Ҳар сеи гумонбарон тирамоҳи соли 2017 боздошт шуданд.

Як қатор созмонҳои ҳомии ҳуқуқи Қазоқистон Абишев ва Жумагуловро маҳбусони сиёсӣ меноманд.

Ҳавопаймои Душанбе – Алмато ба далели туман дар Чимкент нишаст

Фурудгоҳи Остона

Ҳавопаймои ширкати давлатии TajikAir, ки рӯзи гузашта аз Душанбе ба шаҳри Алматои Қазоқистон парвоз мекард, ба далели вазъи номусоиди ҳаво натавонист, дар фурудгоҳи Алмато нишинад ва ба фурудгоҳи иловагӣ фиристода шуд.

Расонаҳои маҳаллӣ бо такя ба маркази матбуотии фурудгоҳи Алмато хабар доданд, ки ҳавопаймои ширкати TajikAir ба фурудгоҳи шаҳри Чимкент фиристода шудааст.

Ҳамчунин хабар дода мешавад, ки ба далели вазъи бади ҳаво парвози ҳавопаймоҳои маҳаллӣ низ бо таъхир сурат мегирад.

Дар хабари фурудгоҳ ҳамчунин гуфта шудааст, ки сарфи назар аз вазъи ҳаво омодааст,

Ҳавопаймои ширкати миллии Тоҷикистон - TajikAir, ки аз Душанбе ба шаҳри Алматои Қазоқистон парвоз карда буд, ба далели вазъи номусоиди ҳаво натавонист, дар фурудгоҳи Алмато ба замин нишинад ва ба фурудгоҳи иловагӣ фиристода шуд.

Расонаҳои маҳаллӣ бо такя ба маркази матбуотии фурудгоҳи Алмато хабар доданд, ки ҳавопаймои ширкати TajikAir ба фурудгоҳи шаҳри Чимкент фиристода шудааст.

Ҳамчунин хабар дода мешавад, ки ба далели вазъи бади ҳаво парвози ҳавопаймоҳои маҳаллӣ ҳам бо таъхир сурат мегирад.

Дар хабари фурудгоҳ ҳамчунин гуфта шудааст, ки сарфи назар аз боду ҳаво Алмато омодааст, ҳавопаймоҳоро қабул кунад.

Порлумони Британия санади дохилии Facebook-ро ошкор кард

Порлумони Британия рӯзи чоршанбе 200-саҳифа санади дохилии Facebook-ро нашр кард. Аз ин санадҳо бармеояд, ки соли 2012 раҳбари ширкати Facebook Марк Зукерберг бо боварӣ буд, ки дар ягон маълумоти корбарон аз як барномасоз ба дигаре намегузарад. Баъди се сол маълумоти 87 миллион корбари ин шабака дар ихтиёри ширкати Cambridge Analytica қарор гирифт. Дар ин бора хабаргузории Reuters рӯзи 6 декабр гузориш дод.

Аз санадҳои дохилии Facebook чандин натиҷа ҳосил мешавад.

Тавре маълум шуд, ширкат дастрасии таҳиягарони барномаҳо ба хазинаи маълумоти корбаронро маҳдуд кард, аммо ширкатҳои бузурге мисли Netflix, Airbnb ва Badoo истисно шуданд.

Ба ғайр аз ин, раҳбарияти Facebook роҳҳои чӣ тавр аз корбарон пинҳон кардани ҷамъоварии маълумот дар бораи зангҳо ва паёмҳои онҳоро баррасӣ карда буд. Сохтори Facebook бояд корбаронро аз ин барнома огоҳ мекард. Аммо зоҳиран ширкат тавонист ин мушкилотро ҳал кунад. Бисёр корбарон ба таблиғоти ҳадафмандона рӯ ба рӯ мешаванд, ки танҳо дар натиҷаи пайгирии фаъолияти онҳо дар шабакаҳо имконпазир аст.

Ва ниҳоят, Facebook бо рақибонашро фаъолона мубориза мебурд. Тавре дар санадҳои дохилии ширкат гуфта мешавад, моҳи январи соли 2013 Facebook дастрасии хадамоти Vine-ро ба барномаи "ҷустуҷӯи дӯстон" масдуд кард, то аз манбаҳои шабака истифода накунад. Зукерберк шахсан аз ин қарор пуштибонӣ кардааст.

Таркиш дар ҷанубу шарқи Эрон се нафарро қурбон кард

Саҳнаи таркиши 6 декабр дар Чорбаҳори Эрон

Телевизиони давлатии Эрон гуфт, ки аз таркиши бомбае дар шаҳри бандарии Чобаҳор, воқеъ дар ҷанубу шарқи кишвар, дастикам се нафар кушта ва чанд тани дигар захмӣ шуд.

Гузоришҳо мегӯянд, ки таркиши рӯзи 6 декабр дар наздикии идораи пулис ба вуқуъ пайваст.

Хабаргузории давлатии Эрон - IRNA аз қавли манбаи номаълум гуфтааст, ки ба эҳтмоли қавӣ бомба "ҳамлаи интиҳорӣ" ва ҳадаф идораи пулис буд. Ба гуфтаи ин манбаъ, баъди таркиш садои тирандозӣ дар минтақа шунида мешуд.

Масъулияти ҳамларо то ҳол касе бар дӯш нагиифтааст.

Чобаҳор шаҳри бандарии калидӣ дар 100 километрии марзи Эрон бо Покистон ҷойгир аст.

Дар 10 сол 36 зан дар Қафқози Шимолӣ қурбонии "куштори номусӣ" шуд

Қурбонии куштори номусӣ

Сиёсатшиносе аз минтақаи Ростов-на-Дону бо ҳафтод сокини Доғистон, Ингушистон ва Чеченистон дар мавзӯи мамнуъи "кушторҳои номусӣ" сӯҳбат кардааст. Натиҷаи ин сӯҳбатҳо дар гузориши Бунёди Ҳолландии "Ибтикори ҳуқуқӣ" рӯзи 6 декабр нашр шуд. Муаллифони гузориш муътақиданд, ки масъалаи "кушторҳои номусӣ" фаротар аз намунаҳоест, ки дар гузориш овардаанд. Ҷомеа ва мақомоти ҳукуматӣ дар баробари ин мушкилот хомушӣ ихтиёр мекунанд.

Таҳқиқи номзади улуми сиёсӣ Саида Сироҷиддинова - раҳбари маркази омузиши мушкилоти минтақавии Қафқоз, 33 мавриди "кушторҳои номусӣ"-ро ошкор кард. Дар натиҷаи ин ҷиноятҳо 39 нафар, ки 36 нафари онҳо занҳо буданд, кушта шуданд.

Дар се маврид занҳо ва мардҳо кушта шуданд. Дар як маврид сокини Ингушистон се зан - хоҳарзодааш ва ду духтари ӯро ба қатл расонд. Дар ҳодисаи дигар сокини Ингушистон духтарони 17 ва 19 солаи худро кушт.

Аз 33 мавриди "куштори номусӣ" 22 ҳодиса дар Доғистон, 2 маврид дар Ингушистон ва 9 ҳодиса дар Чеченистон рух додааст. Доғистон дар робита ба "кушторҳои номусӣ" дар ҷойи аввал қарор дорад, аммо на барои он ки дар ин қаламрав чунин ҳодисаҳо бештар ба вуқуъ мепавандад, балки мақомот ба онҳо вокуниш нишон медиҳанд ва тафтиш мекунанд.

Ба маълумоти Созмони Милали Муттаҳид ҳамасола дар ҷаҳон дастикам 5 ҳазор "куштори номусӣ" анҷом мешавад.

Британия додани раводид ба олигархҳоро қатъ мекунад

Акси тасвирӣ

Аз 7-уми декабр бо ҳадафи ҷилавгирӣ аз пулшӯӣ Британия ироаи раводиди сармоягузорӣ ба хориҷиёни сарватмандро қатъ мекунад. Додани виза эҳтимол соли 2019 дубора аз сар гиифта мешавад. Дар ин бора Bloomberg рӯзи шашуми декабр бо такя ба Вазорати умури дохилии Британия хабар дод.

Раводиди "тиллоӣ" асосан ба хориҷиҳое дода мешуд, ки ба иқтисоди Британия на кам аз 2 миллион фунт стерлинг (2,5 миллион доллар) сармоягузорӣ кунанд.

Қаблан хабар дода шуд, ки Лондон мехоҳад раванди дарёфти "визаи тиллоӣ"-ро шадидтар кунад. Ба тартиби нав, гирифтани виза талаботе мисли тафтиши молӣ ва манфиатҳои тиҷоратии довталаб ворид мешавад. Бондҳои давлатӣ, ки ҳаққи иқомат дар ин кишварро таъмин мекунад, аз рӯйхати самоягузориҳо соқит мешаванд.

Ҳамчунин, довталабон бояд исбот кунанд, ки маблағи сармоягузорӣ то замони дархости раводид ду сол дар ихтиёри онҳо буд.

Мақомоти Британия ҳамчунин тасмим гирифтаанд, тамоми раводидҳоеро, ки то соли 2015 ироа шудаанд, мавриди санҷиш қарор диҳанд.

Bloomberg мегӯяд, ин дигаргунӣ аз ҳама беш ба олигархҳои рус таъсир мерасонад. Баҳори имсол мақомоти Британия раводиди сармоягузор Роман Абрамовичро тамдид накарданд. Қаблан дар сомонаи порлумони Британия дар бораи "пулҳои чиркин" аз Русия гузориш пахш шуд. Муаллифони ин гузориш даъват карданд, ки абзори фишори молӣ ба президенти Русия Владимир Путин ва атрофиёнаш бештар истифода шавад.

Ёфтҳои бештар

Гузоришҳои видеоӣ

Сайфулло Сафаров дар бораи бознишастагиву интихобот гуфт
лутфан мунтазир бошед

### Феълан кор намекунад ###

0:00 0:03:00 0:00
XS
SM
MD
LG